| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
5. போ⁴ஜனப்படிக்³க³ஹணபட²மஸிக்கா²பத³வண்ணனா
5. Bhojanappaṭiggahaṇapaṭhamasikkhāpadavaṇṇanā
ஏகதோஅவஸ்ஸுதேதி புக்³க³லஸ்ஸ வா பி⁴க்கு²னியா வா அவஸ்ஸுதே. மஹாபச்சரியங் பனெத்த² ‘‘பி⁴க்கு²னியா அவஸ்ஸுதபா⁴வேதி த³ட்ட²ப்³ப³’’ந்தி (பாசி॰ அட்ட²॰ 701) வுத்தங். தங் ‘‘அனவஸ்ஸுதோதி ஜானந்தீ படிக்³க³ண்ஹாதீ’’தி (பாசி॰ 703) இமாய பாளியா ந ஸமேதி. யதி³ ஹி புக்³க³லஸ்ஸ அவஸ்ஸுதபா⁴வோ நப்பமாணங், கிங் ‘‘அனவஸ்ஸுதோதி ஜானந்தீ’’தி இமினா வசனேன, ‘‘அனாபத்தி உப⁴தோஅனவஸ்ஸுதா ஹொந்தி, அனவஸ்ஸுதா படிக்³க³ண்ஹாதீ’’தி எத்தகமேவ வத்தப்³ப³ங் ஸியா. உபோ⁴ஸு அனவஸ்ஸுதேஸூதி புக்³க³லோ சேவ பி⁴க்கு²னீ சாதி உபோ⁴ஸு அனவஸ்ஸுதேஸு க³ண்ஹந்தியா ஸப்³ப³தா²பி அனாபத்தி. ‘‘அனவஸ்ஸுதோ’’தி வா ஞத்வா க³ண்ஹந்தியாதி ஸயங் அனவஸ்ஸுதா ஸமானா அவஸ்ஸுதேபி ‘‘அனவஸ்ஸுதோ அய’’ந்தி ஸஞ்ஞாய தஸ்ஸ ஹத்த²தோ படிக்³க³ண்ஹந்தியா. அத² ஸயங் அனவஸ்ஸுதாபி அஞ்ஞங் அவஸ்ஸுதங் வா அனவஸ்ஸுதங் வா ‘‘அவஸ்ஸுதோ’’தி ஞத்வா படிக்³க³ண்ஹாதி, து³க்கடமேவ. வுத்தஞ்ஹேதங் அனந்தரஸிக்கா²பதே³ ‘‘கிஸ்ஸ த்வங், அய்யே, ந படிக்³க³ண்ஹாஸீதி, அவஸ்ஸுதா, அய்யேதி, த்வங் பன, அய்யே, அவஸ்ஸுதாதி, நாஹங், அய்யே, அவஸ்ஸுதா’’தி.
Ekatoavassuteti puggalassa vā bhikkhuniyā vā avassute. Mahāpaccariyaṃ panettha ‘‘bhikkhuniyā avassutabhāveti daṭṭhabba’’nti (pāci. aṭṭha. 701) vuttaṃ. Taṃ ‘‘anavassutoti jānantī paṭiggaṇhātī’’ti (pāci. 703) imāya pāḷiyā na sameti. Yadi hi puggalassa avassutabhāvo nappamāṇaṃ, kiṃ ‘‘anavassutoti jānantī’’ti iminā vacanena, ‘‘anāpatti ubhatoanavassutā honti, anavassutā paṭiggaṇhātī’’ti ettakameva vattabbaṃ siyā. Ubhosu anavassutesūti puggalo ceva bhikkhunī cāti ubhosu anavassutesu gaṇhantiyā sabbathāpi anāpatti. ‘‘Anavassuto’’ti vā ñatvā gaṇhantiyāti sayaṃ anavassutā samānā avassutepi ‘‘anavassuto aya’’nti saññāya tassa hatthato paṭiggaṇhantiyā. Atha sayaṃ anavassutāpi aññaṃ avassutaṃ vā anavassutaṃ vā ‘‘avassuto’’ti ñatvā paṭiggaṇhāti, dukkaṭameva. Vuttañhetaṃ anantarasikkhāpade ‘‘kissa tvaṃ, ayye, na paṭiggaṇhāsīti, avassutā, ayyeti, tvaṃ pana, ayye, avassutāti, nāhaṃ, ayye, avassutā’’ti.
போ⁴ஜனப்படிக்³க³ஹணபட²மஸிக்கா²பத³வண்ணனா நிட்டி²தா.
Bhojanappaṭiggahaṇapaṭhamasikkhāpadavaṇṇanā niṭṭhitā.
