| Library / Tipiṭaka / တိပိဋက • Tipiṭaka / ကင္ခာဝိတရဏီ-အဘိနဝ-ဋီကာ • Kaṅkhāvitaraṇī-abhinava-ṭīkā |
၅. ဘောဇနပ္ပဋိဂ္ဂဟဏပဌမသိက္ခာပဒဝဏ္ဏနာ
5. Bhojanappaṭiggahaṇapaṭhamasikkhāpadavaṇṇanā
ဧကတောအဝသ္သုတေတိ ပုဂ္ဂလသ္သ ဝာ ဘိက္ခုနိယာ ဝာ အဝသ္သုတေ။ မဟာပစ္စရိယံ ပနေတ္ထ ‘‘ဘိက္ခုနိယာ အဝသ္သုတဘာဝေတိ ဒဋ္ဌဗ္ဗ’’န္တိ (ပာစိ. အဋ္ဌ. ၇၀၁) ဝုတ္တံ။ တံ ‘‘အနဝသ္သုတောတိ ဇာနန္တီ ပဋိဂ္ဂဏ္ဟာတီ’’တိ (ပာစိ. ၇၀၃) ဣမာယ ပာဠိယာ န သမေတိ။ ယဒိ ဟိ ပုဂ္ဂလသ္သ အဝသ္သုတဘာဝော နပ္ပမာဏံ, ကိံ ‘‘အနဝသ္သုတောတိ ဇာနန္တီ’’တိ ဣမိနာ ဝစနေန, ‘‘အနာပတ္တိ ဥဘတောအနဝသ္သုတာ ဟောန္တိ, အနဝသ္သုတာ ပဋိဂ္ဂဏ္ဟာတီ’’တိ ဧတ္တကမေဝ ဝတ္တဗ္ဗံ သိယာ။ ဥဘောသု အနဝသ္သုတေသူတိ ပုဂ္ဂလော စေဝ ဘိက္ခုနီ စာတိ ဥဘောသု အနဝသ္သုတေသု ဂဏ္ဟန္တိယာ သဗ္ဗထာပိ အနာပတ္တိ။ ‘‘အနဝသ္သုတော’’တိ ဝာ ဉတ္ဝာ ဂဏ္ဟန္တိယာတိ သယံ အနဝသ္သုတာ သမာနာ အဝသ္သုတေပိ ‘‘အနဝသ္သုတော အယ’’န္တိ သညာယ တသ္သ ဟတ္ထတော ပဋိဂ္ဂဏ္ဟန္တိယာ။ အထ သယံ အနဝသ္သုတာပိ အညံ အဝသ္သုတံ ဝာ အနဝသ္သုတံ ဝာ ‘‘အဝသ္သုတော’’တိ ဉတ္ဝာ ပဋိဂ္ဂဏ္ဟာတိ, ဒုက္ကဋမေဝ။ ဝုတ္တဉ္ဟေတံ အနန္တရသိက္ခာပဒေ ‘‘ကိသ္သ တ္ဝံ, အယ္ယေ, န ပဋိဂ္ဂဏ္ဟာသီတိ, အဝသ္သုတာ, အယ္ယေတိ, တ္ဝံ ပန, အယ္ယေ, အဝသ္သုတာတိ, နာဟံ, အယ္ယေ, အဝသ္သုတာ’’တိ။
Ekatoavassuteti puggalassa vā bhikkhuniyā vā avassute. Mahāpaccariyaṃ panettha ‘‘bhikkhuniyā avassutabhāveti daṭṭhabba’’nti (pāci. aṭṭha. 701) vuttaṃ. Taṃ ‘‘anavassutoti jānantī paṭiggaṇhātī’’ti (pāci. 703) imāya pāḷiyā na sameti. Yadi hi puggalassa avassutabhāvo nappamāṇaṃ, kiṃ ‘‘anavassutoti jānantī’’ti iminā vacanena, ‘‘anāpatti ubhatoanavassutā honti, anavassutā paṭiggaṇhātī’’ti ettakameva vattabbaṃ siyā. Ubhosu anavassutesūti puggalo ceva bhikkhunī cāti ubhosu anavassutesu gaṇhantiyā sabbathāpi anāpatti. ‘‘Anavassuto’’ti vā ñatvā gaṇhantiyāti sayaṃ anavassutā samānā avassutepi ‘‘anavassuto aya’’nti saññāya tassa hatthato paṭiggaṇhantiyā. Atha sayaṃ anavassutāpi aññaṃ avassutaṃ vā anavassutaṃ vā ‘‘avassuto’’ti ñatvā paṭiggaṇhāti, dukkaṭameva. Vuttañhetaṃ anantarasikkhāpade ‘‘kissa tvaṃ, ayye, na paṭiggaṇhāsīti, avassutā, ayyeti, tvaṃ pana, ayye, avassutāti, nāhaṃ, ayye, avassutā’’ti.
ဘောဇနပ္ပဋိဂ္ဂဟဏပဌမသိက္ခာပဒဝဏ္ဏနာ နိဋ္ဌိတာ။
Bhojanappaṭiggahaṇapaṭhamasikkhāpadavaṇṇanā niṭṭhitā.
