| Library / Tipiṭaka / তিপিটক • Tipiṭaka / মহাৰিভঙ্গ • Mahāvibhaṅga |
৪. ভোজনৰগ্গো
4. Bhojanavaggo
১. আৰসথপিণ্ডসিক্খাপদং
1. Āvasathapiṇḍasikkhāpadaṃ
২০৩. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন সাৰত্থিযা অৰিদূরে অঞ্ঞতরস্স পূগস্স আৰসথপিণ্ডো পঞ্ঞত্তো হোতি। ছব্বগ্গিযা ভিক্খূ পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পৰিসিত্ৰা পিণ্ডং অলভমানা আৰসথং অগমংসু। মনুস্সা – ‘‘চিরস্সম্পি ভদন্তা আগতা’’তি তে সক্কচ্চং পরিৰিসিংসু। অথ খো ছব্বগ্গিযা ভিক্খূ দুতিযম্পি দিৰসং…পে॰… ততিযম্পি দিৰসং পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পৰিসিত্ৰা পিণ্ডং অলভমানা আৰসথং গন্ত্ৰা ভুঞ্জিংসু। অথ খো ছব্বগ্গিযানং ভিক্খূনং এতদহোসি – ‘‘কিং মযং করিস্সাম আরামং গন্ত্ৰা! হিয্যোপি ইধেৰ আগন্তব্বং ভৰিস্সতী’’তি, তত্থেৰ অনুৰসিত্ৰা অনুৰসিত্ৰা আৰসথপিণ্ডং ভুঞ্জন্তি। তিত্থিযা অপসক্কন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা অনুৰসিত্ৰা অনুৰসিত্ৰা আৰসথপিণ্ডং ভুঞ্জিস্সন্তি! নযিমেসঞ্ঞেৰ আৰসথপিণ্ডো পঞ্ঞত্তো; সব্বেসঞ্ঞেৰ আৰসথপিণ্ডো পঞ্ঞত্তো’’তি।
203. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sāvatthiyā avidūre aññatarassa pūgassa āvasathapiṇḍo paññatto hoti. Chabbaggiyā bhikkhū pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisitvā piṇḍaṃ alabhamānā āvasathaṃ agamaṃsu. Manussā – ‘‘cirassampi bhadantā āgatā’’ti te sakkaccaṃ parivisiṃsu. Atha kho chabbaggiyā bhikkhū dutiyampi divasaṃ…pe… tatiyampi divasaṃ pubbaṇhasamayaṃ nivāsetvā pattacīvaramādāya sāvatthiṃ piṇḍāya pavisitvā piṇḍaṃ alabhamānā āvasathaṃ gantvā bhuñjiṃsu. Atha kho chabbaggiyānaṃ bhikkhūnaṃ etadahosi – ‘‘kiṃ mayaṃ karissāma ārāmaṃ gantvā! Hiyyopi idheva āgantabbaṃ bhavissatī’’ti, tattheva anuvasitvā anuvasitvā āvasathapiṇḍaṃ bhuñjanti. Titthiyā apasakkanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā anuvasitvā anuvasitvā āvasathapiṇḍaṃ bhuñjissanti! Nayimesaññeva āvasathapiṇḍo paññatto; sabbesaññeva āvasathapiṇḍo paññatto’’ti.
অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – কথঞ্হি নাম ছব্বগ্গিযা ভিক্খূ অনুৰসিত্ৰা অনুৰসিত্ৰা আৰসথপিণ্ডং ভুঞ্জিস্সন্তীতি…পে॰… সচ্চং কির তুম্হে, ভিক্খৰে, অনুৰসিত্ৰা অনুৰসিত্ৰা আৰসথপিণ্ডং ভুঞ্জথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, অনুৰসিত্ৰা অনুৰসিত্ৰা আৰসথপিণ্ডং ভুঞ্জিস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – kathañhi nāma chabbaggiyā bhikkhū anuvasitvā anuvasitvā āvasathapiṇḍaṃ bhuñjissantīti…pe… saccaṃ kira tumhe, bhikkhave, anuvasitvā anuvasitvā āvasathapiṇḍaṃ bhuñjathāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, anuvasitvā anuvasitvā āvasathapiṇḍaṃ bhuñjissatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘একো আৰসথপিণ্ডো ভুঞ্জিতব্বো। ততো চে উত্তরিং ভুঞ্জেয্য, পাচিত্তিয’’ন্তি।
‘‘Eko āvasathapiṇḍo bhuñjitabbo. Tato ce uttariṃ bhuñjeyya, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২০৪. তেন খো পন সমযেন আযস্মা সারিপুত্তো কোসলেসু জনপদে সাৰত্থিং গচ্ছন্তো যেন অঞ্ঞতরো আৰসথো তেনুপসঙ্কমি। মনুস্সা – ‘‘চিরস্সম্পি থেরো আগতো’’তি সক্কচ্চং পরিৰিসিংসু। অথ খো আযস্মতো সারিপুত্তস্স ভুত্তাৰিস্স খরো আবাধো উপ্পজ্জি, নাসক্খি তম্হা আৰসথা পক্কমিতুং। অথ খো তে মনুস্সা দুতিযম্পি দিৰসং আযস্মন্তং সারিপুত্তং এতদৰোচুং – ‘‘ভুঞ্জথ, ভন্তে’’তি। অথ খো আযস্মা সারিপুত্তো – ‘‘ভগৰতা পটিক্খিত্তং অনুৰসিত্ৰা অনুৰসিত্ৰা আৰসথপিণ্ডং ভুঞ্জিতু’’ন্তি কুক্কুচ্চাযন্তো ন পটিগ্গহেসি; ছিন্নভত্তো অহোসি। অথ খো আযস্মা সারিপুত্তো সাৰত্থিং গন্ত্ৰা ভিক্খূনং এতমত্থং আরোচেসি। ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গিলানেন ভিক্খুনা অনুৰসিত্ৰা অনুৰসিত্ৰা আৰসথপিণ্ডং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
204. Tena kho pana samayena āyasmā sāriputto kosalesu janapade sāvatthiṃ gacchanto yena aññataro āvasatho tenupasaṅkami. Manussā – ‘‘cirassampi thero āgato’’ti sakkaccaṃ parivisiṃsu. Atha kho āyasmato sāriputtassa bhuttāvissa kharo ābādho uppajji, nāsakkhi tamhā āvasathā pakkamituṃ. Atha kho te manussā dutiyampi divasaṃ āyasmantaṃ sāriputtaṃ etadavocuṃ – ‘‘bhuñjatha, bhante’’ti. Atha kho āyasmā sāriputto – ‘‘bhagavatā paṭikkhittaṃ anuvasitvā anuvasitvā āvasathapiṇḍaṃ bhuñjitu’’nti kukkuccāyanto na paṭiggahesi; chinnabhatto ahosi. Atha kho āyasmā sāriputto sāvatthiṃ gantvā bhikkhūnaṃ etamatthaṃ ārocesi. Bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gilānena bhikkhunā anuvasitvā anuvasitvā āvasathapiṇḍaṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
২০৫. ‘‘অগিলানেন ভিক্খুনা একো আৰসথপিণ্ডো ভুঞ্জিতব্বো। ততো চে উত্তরি ভুঞ্জেয্য, পাচিত্তিয’’ন্তি।
205.‘‘Agilānena bhikkhunā eko āvasathapiṇḍo bhuñjitabbo. Tato ce uttari bhuñjeyya, pācittiya’’nti.
২০৬. অগিলানো নাম সক্কোতি তম্হা আৰসথা পক্কমিতুং।
206.Agilāno nāma sakkoti tamhā āvasathā pakkamituṃ.
গিলানো নাম ন সক্কোতি তম্হা আৰসথা পক্কমিতুং।
Gilāno nāma na sakkoti tamhā āvasathā pakkamituṃ.
আৰসথপিণ্ডো নাম পঞ্চন্নং ভোজনানং অঞ্ঞতরং ভোজনং – সালায ৰা মণ্ডপে ৰা রুক্খমূলে ৰা অজ্ঝোকাসে ৰা অনোদিস্স যাৰদত্থো পঞ্ঞত্তো হোতি। অগিলানেন ভিক্খুনা সকিং ভুঞ্জিতব্বো। ততো চে উত্তরি ‘ভুঞ্জিস্সামী’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি পাচিত্তিযস্স।
Āvasathapiṇḍo nāma pañcannaṃ bhojanānaṃ aññataraṃ bhojanaṃ – sālāya vā maṇḍape vā rukkhamūle vā ajjhokāse vā anodissa yāvadattho paññatto hoti. Agilānena bhikkhunā sakiṃ bhuñjitabbo. Tato ce uttari ‘bhuñjissāmī’ti paṭiggaṇhāti, āpatti dukkaṭassa. Ajjhohāre ajjhohāre āpatti pācittiyassa.
২০৭. অগিলানো অগিলানসঞ্ঞী ততুত্তরি আৰসথপিণ্ডং ভুঞ্জতি, আপত্তি পাচিত্তিযস্স। অগিলানো ৰেমতিকো ততুত্তরি আৰসথপিণ্ডং ভুঞ্জতি, আপত্তি পাচিত্তিযস্স। অগিলানো গিলানসঞ্ঞী ততুত্তরিং আৰসথপিণ্ডং ভুঞ্জতি, আপত্তি পাচিত্তিযস্স।
207. Agilāno agilānasaññī tatuttari āvasathapiṇḍaṃ bhuñjati, āpatti pācittiyassa. Agilāno vematiko tatuttari āvasathapiṇḍaṃ bhuñjati, āpatti pācittiyassa. Agilāno gilānasaññī tatuttariṃ āvasathapiṇḍaṃ bhuñjati, āpatti pācittiyassa.
গিলানো অগিলানসঞ্ঞী, আপত্তি দুক্কটস্স। গিলানো ৰেমতিকো আপত্তি দুক্কটস্স। গিলানো গিলানসঞ্ঞী, অনাপত্তি।
Gilāno agilānasaññī, āpatti dukkaṭassa. Gilāno vematiko āpatti dukkaṭassa. Gilāno gilānasaññī, anāpatti.
২০৮. অনাপত্তি গিলানস্স, অগিলানো সকিং ভুঞ্জতি, গচ্ছন্তো, ৰা আগচ্ছন্তো ৰা ভুঞ্জতি, সামিকা নিমন্তেত্ৰা ভোজেন্তি, ওদিস্স পঞ্ঞত্তো হোতি, ন যাৰদত্থো পঞ্ঞত্তো হোতি, পঞ্চ ভোজনানি ঠপেত্ৰা সব্বত্থ অনাপত্তি, উম্মত্তকস্স, আদিকম্মিকস্সাতি।
208. Anāpatti gilānassa, agilāno sakiṃ bhuñjati, gacchanto, vā āgacchanto vā bhuñjati, sāmikā nimantetvā bhojenti, odissa paññatto hoti, na yāvadattho paññatto hoti, pañca bhojanāni ṭhapetvā sabbattha anāpatti, ummattakassa, ādikammikassāti.
আৰসথপিণ্ডসিক্খাপদং নিট্ঠিতং পঠমং।
Āvasathapiṇḍasikkhāpadaṃ niṭṭhitaṃ paṭhamaṃ.
২. গণভোজনসিক্খাপদং
2. Gaṇabhojanasikkhāpadaṃ
২০৯. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন দেৰদত্তো পরিহীনলাভসক্কারো সপরিসো কুলেসু ৰিঞ্ঞাপেত্ৰা ৰিঞ্ঞাপেত্ৰা ভুঞ্জতি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা কুলেসু ৰিঞ্ঞাপেত্ৰা ৰিঞ্ঞাপেত্ৰা ভুঞ্জিস্সন্তি! কস্স সম্পন্নং ন মনাপং, কস্স সাদুং ন রুচ্চতী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম দেৰদত্তো সপরিসো কুলেসু ৰিঞ্ঞাপেত্ৰা ৰিঞ্ঞাপেত্ৰা ভুঞ্জিস্সতী’’তি…পে॰… সচ্চং কির ত্ৰং, দেৰদত্ত, সপরিসো কুলেসু ৰিঞ্ঞাপেত্ৰা ৰিঞ্ঞাপেত্ৰা ভুঞ্জসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, সপরিসো কুলেসু ৰিঞ্ঞাপেত্ৰা ৰিঞ্ঞাপেত্ৰা ভুঞ্জিস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
209. Tena samayena buddho bhagavā rājagahe viharati veḷuvane kalandakanivāpe. Tena kho pana samayena devadatto parihīnalābhasakkāro sapariso kulesu viññāpetvā viññāpetvā bhuñjati. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā kulesu viññāpetvā viññāpetvā bhuñjissanti! Kassa sampannaṃ na manāpaṃ, kassa sāduṃ na ruccatī’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma devadatto sapariso kulesu viññāpetvā viññāpetvā bhuñjissatī’’ti…pe… saccaṃ kira tvaṃ, devadatta, sapariso kulesu viññāpetvā viññāpetvā bhuñjasīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, sapariso kulesu viññāpetvā viññāpetvā bhuñjissasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘গণভোজনে পাচিত্তিয’’ন্তি।
‘‘Gaṇabhojane pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২১০. তেন খো পন সমযেন মনুস্সা গিলানে ভিক্খূ ভত্তেন নিমন্তেন্তি। ভিক্খূ কুক্কুচ্চাযন্তা নাধিৰাসেন্তি – ‘‘পটিক্খিত্তং ভগৰতা গণভোজন’’ন্তি। ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গিলানেন ভিক্খুনা গণভোজনং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
210. Tena kho pana samayena manussā gilāne bhikkhū bhattena nimantenti. Bhikkhū kukkuccāyantā nādhivāsenti – ‘‘paṭikkhittaṃ bhagavatā gaṇabhojana’’nti. Bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gilānena bhikkhunā gaṇabhojanaṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
‘‘গণভোজনে, অঞ্ঞত্র সমযা, পাচিত্তিযং। তত্থাযং সমযো। গিলানসমযো – অযং তত্থ সমযো’’তি।
‘‘Gaṇabhojane, aññatra samayā, pācittiyaṃ. Tatthāyaṃ samayo. Gilānasamayo – ayaṃ tattha samayo’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২১১. তেন খো পন সমযেন মনুস্সা চীৰরদানসমযে সচীৰরভত্তং পটিযাদেত্ৰা ভিক্খূ নিমন্তেন্তি – ‘‘ভোজেত্ৰা চীৰরেন অচ্ছাদেস্সামা’’তি। ভিক্খূ কুক্কুচ্চাযন্তা নাধিৰাসেন্তি – ‘‘পটিক্খিত্তং ভগৰতা গণভোজন’’ন্তি। চীৰরং পরিত্তং উপ্পজ্জতি। ভিক্খূ ভগৰতো এতমত্থং আরোচেসুং…পে॰… অনুজানামি, ভিক্খৰে, চীৰরদানসমযে গণভোজনং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
211. Tena kho pana samayena manussā cīvaradānasamaye sacīvarabhattaṃ paṭiyādetvā bhikkhū nimantenti – ‘‘bhojetvā cīvarena acchādessāmā’’ti. Bhikkhū kukkuccāyantā nādhivāsenti – ‘‘paṭikkhittaṃ bhagavatā gaṇabhojana’’nti. Cīvaraṃ parittaṃ uppajjati. Bhikkhū bhagavato etamatthaṃ ārocesuṃ…pe… anujānāmi, bhikkhave, cīvaradānasamaye gaṇabhojanaṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
‘‘গণভোজনে, অঞ্ঞত্র সমযা, পাচিত্তিযং। তত্থাযং সমযো। গিলানসমযো, চীৰরদানসমযো – অযং তত্থ সমযো’’তি।
‘‘Gaṇabhojane, aññatra samayā, pācittiyaṃ. Tatthāyaṃ samayo. Gilānasamayo, cīvaradānasamayo – ayaṃ tattha samayo’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২১২. তেন খো পন সমযেন মনুস্সা চীৰরকারকে ভিক্খূ ভত্তেন নিমন্তেন্তি। ভিক্খূ কুক্কুচ্চাযন্তা নাধিৰাসেন্তি – ‘‘পটিক্খিত্তং ভগৰতা গণভোজন’’ন্তি । ভগৰতো এতমত্থং আরোচেসুং…পে॰… অনুজানামি, ভিক্খৰে, চীৰরকারসমযে গণভোজনং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
212. Tena kho pana samayena manussā cīvarakārake bhikkhū bhattena nimantenti. Bhikkhū kukkuccāyantā nādhivāsenti – ‘‘paṭikkhittaṃ bhagavatā gaṇabhojana’’nti . Bhagavato etamatthaṃ ārocesuṃ…pe… anujānāmi, bhikkhave, cīvarakārasamaye gaṇabhojanaṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
‘‘গণভোজনে, অঞ্ঞত্র সমযা, পাচিত্তিযং। তত্থাযং সমযো। গিলানসমযো, চীৰরদানসমযো, চীৰরকারসমযো – অযং তত্থ সমযো’’তি।
‘‘Gaṇabhojane, aññatra samayā, pācittiyaṃ. Tatthāyaṃ samayo. Gilānasamayo, cīvaradānasamayo, cīvarakārasamayo – ayaṃ tattha samayo’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২১৩. তেন খো পন সমযেন ভিক্খূ মনুস্সেহি সদ্ধিং অদ্ধানং গচ্ছন্তি। অথ খো তে ভিক্খূ তে মনুস্সে এতদৰোচুং – ‘‘মুহুত্তং, আৰুসো, আগমেথ; পিণ্ডায চরিস্সামা’’তি। তে এৰমাহংসু – ‘‘ইধেৰ, ভন্তে, ভুঞ্জথা’’তি। ভিক্খূ কুক্কুচ্চাযন্তা ন পটিগ্গণ্হন্তি – ‘‘পটিক্খিত্তং ভগৰতা গণভোজন’’ন্তি। ভগৰতো এতমত্থং আরোচেসুং…পে॰… অনুজানামি, ভিক্খৰে, অদ্ধানগমনসমযে গণভোজনং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
213. Tena kho pana samayena bhikkhū manussehi saddhiṃ addhānaṃ gacchanti. Atha kho te bhikkhū te manusse etadavocuṃ – ‘‘muhuttaṃ, āvuso, āgametha; piṇḍāya carissāmā’’ti. Te evamāhaṃsu – ‘‘idheva, bhante, bhuñjathā’’ti. Bhikkhū kukkuccāyantā na paṭiggaṇhanti – ‘‘paṭikkhittaṃ bhagavatā gaṇabhojana’’nti. Bhagavato etamatthaṃ ārocesuṃ…pe… anujānāmi, bhikkhave, addhānagamanasamaye gaṇabhojanaṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
‘‘গণভোজনে, অঞ্ঞত্র সমযা, পাচিত্তিযং। তত্থাযং সমযো। গিলানসমযো, চীৰরদানসমযো, চীৰরকারসমযো, অদ্ধানগমনসমযো – অযং তত্থ সমযো’’তি।
‘‘Gaṇabhojane, aññatra samayā, pācittiyaṃ. Tatthāyaṃ samayo. Gilānasamayo, cīvaradānasamayo, cīvarakārasamayo, addhānagamanasamayo – ayaṃ tattha samayo’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২১৪. তেন খো পন সমযেন ভিক্খূ মনুস্সেহি সদ্ধিং নাৰায গচ্ছন্তি। অথ খো তে ভিক্খূ তে মনুস্সে এতদৰোচুং – ‘‘মুহুত্তং, আৰুসো, তীরং উপনেথ; পিণ্ডায চরিস্সামা’’তি। তে এৰমাহংসু – ‘‘ইধেৰ, ভন্তে, ভুঞ্জথা’’তি। ভিক্খূ কুক্কুচ্চাযন্তা ন পটিগ্গণ্হন্তি – ‘‘পটিক্খিত্তং ভগৰতা গণভোজন’’ন্তি। ভগৰতো এতমত্থং আরোচেসুং…পে॰… অনুজানামি, ভিক্খৰে, নাৰাভিরুহনসমযে গণভোজনং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
214. Tena kho pana samayena bhikkhū manussehi saddhiṃ nāvāya gacchanti. Atha kho te bhikkhū te manusse etadavocuṃ – ‘‘muhuttaṃ, āvuso, tīraṃ upanetha; piṇḍāya carissāmā’’ti. Te evamāhaṃsu – ‘‘idheva, bhante, bhuñjathā’’ti. Bhikkhū kukkuccāyantā na paṭiggaṇhanti – ‘‘paṭikkhittaṃ bhagavatā gaṇabhojana’’nti. Bhagavato etamatthaṃ ārocesuṃ…pe… anujānāmi, bhikkhave, nāvābhiruhanasamaye gaṇabhojanaṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
‘‘গণভোজনে, অঞ্ঞত্র সমযা, পাচিত্তিযং। তত্থাযং সমযো। গিলানসমযো, চীৰরদানসমযো, চীৰরকারসমযো, অদ্ধানগমনসমযো, নাৰাভিরুহনসমযো – অযং তত্থ সমযো’’তি।
‘‘Gaṇabhojane, aññatra samayā, pācittiyaṃ. Tatthāyaṃ samayo. Gilānasamayo, cīvaradānasamayo, cīvarakārasamayo, addhānagamanasamayo, nāvābhiruhanasamayo – ayaṃ tattha samayo’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২১৫. তেন ০ খো পন সমযেন দিসাসু ৰস্সংৰুট্ঠা ভিক্খূ রাজগহং আগচ্ছন্তি ভগৰন্তং দস্সনায। মনুস্সা নানাৰেরজ্জকে ভিক্খূ পস্সিত্ৰা ভত্তেন নিমন্তেন্তি। ভিক্খূ কুক্কুচ্চাযন্তা নাধিৰাসেন্তি – ‘‘পটিক্খিত্তং ভগৰতা গণভোজন’’ন্তি। ভগৰতো এতমত্থং আরোচেসুং…পে॰… অনুজানামি, ভিক্খৰে, মহাসমযে গণভোজনং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
215. Tena 0 kho pana samayena disāsu vassaṃvuṭṭhā bhikkhū rājagahaṃ āgacchanti bhagavantaṃ dassanāya. Manussā nānāverajjake bhikkhū passitvā bhattena nimantenti. Bhikkhū kukkuccāyantā nādhivāsenti – ‘‘paṭikkhittaṃ bhagavatā gaṇabhojana’’nti. Bhagavato etamatthaṃ ārocesuṃ…pe… anujānāmi, bhikkhave, mahāsamaye gaṇabhojanaṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
‘‘গণভোজনে , অঞ্ঞত্র সমযা, পাচিত্তিযং। তত্থাযং সমযো। গিলানসমযো, চীৰরদানসমযো, চীৰরকারসমযো, অদ্ধানগমনসমযো, নাৰাভিরুহনসমযো, মহাসমযো – অযং তত্থ সমযো’’তি।
‘‘Gaṇabhojane , aññatra samayā, pācittiyaṃ. Tatthāyaṃ samayo. Gilānasamayo, cīvaradānasamayo, cīvarakārasamayo, addhānagamanasamayo, nāvābhiruhanasamayo, mahāsamayo – ayaṃ tattha samayo’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২১৬. তেন খো পন সমযেন রঞ্ঞো মাগধস্স সেনিযস্স বিম্বিসারস্স ঞাতিসালোহিতো আজীৰকেসু পব্বজিতো হোতি। অথ খো সো আজীৰকো যেন রাজা মাগধো সেনিযো বিম্বিসারো তেনুপসঙ্কমি; উপসঙ্কমিত্ৰা রাজানং মাগধং সেনিযং বিম্বিসারং এতদৰোচ – ‘‘ইচ্ছামহং, মহারাজ, সব্বপাসণ্ডিকভত্তং কাতু’’ন্তি। ‘‘সচে ত্ৰং, ভন্তে, বুদ্ধপ্পমুখং ভিক্খুসঙ্ঘং পঠমং ভোজেয্যাসি’’। ‘‘এৰং করেয্যামী’’তি। অথ খো সো আজীৰকো ভিক্খূনং সন্তিকে দূতং পাহেসি – ‘‘অধিৰাসেন্তু মে ভিক্খূ স্ৰাতনায ভত্ত’’ন্তি। ভিক্খূ কুক্কুচ্চাযন্তা নাধিৰাসেন্তি – ‘‘পটিক্খিত্তং ভগৰতা গণভোজন’’ন্তি। অথ খো সো আজীৰকো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি, সম্মোদনীযং কথং সারণীযং ৰীতিসারেত্ৰা একমন্তং অট্ঠাসি। একমন্তং ঠিতো খো সো আজীৰকো ভগৰন্তং এতদৰোচ – ‘‘ভৰম্পি গোতমো পব্বজিতো, অহম্পি পব্বজিতো; অরহতি পব্বজিতো পব্বজিতস্স পিণ্ডং পটিগ্গহেতুং। অধিৰাসেতু মে ভৰং গোতমো স্ৰাতনায ভত্তং সদ্ধিং ভিক্খুসঙ্ঘেনা’’তি। অধিৰাসেসি ভগৰা তুণ্হীভাৰেন। অথ খো সো আজীৰকো ভগৰতো অধিৰাসনং ৰিদিত্ৰা পক্কামি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, সমণভত্তসমযে গণভোজনং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
216. Tena kho pana samayena rañño māgadhassa seniyassa bimbisārassa ñātisālohito ājīvakesu pabbajito hoti. Atha kho so ājīvako yena rājā māgadho seniyo bimbisāro tenupasaṅkami; upasaṅkamitvā rājānaṃ māgadhaṃ seniyaṃ bimbisāraṃ etadavoca – ‘‘icchāmahaṃ, mahārāja, sabbapāsaṇḍikabhattaṃ kātu’’nti. ‘‘Sace tvaṃ, bhante, buddhappamukhaṃ bhikkhusaṅghaṃ paṭhamaṃ bhojeyyāsi’’. ‘‘Evaṃ kareyyāmī’’ti. Atha kho so ājīvako bhikkhūnaṃ santike dūtaṃ pāhesi – ‘‘adhivāsentu me bhikkhū svātanāya bhatta’’nti. Bhikkhū kukkuccāyantā nādhivāsenti – ‘‘paṭikkhittaṃ bhagavatā gaṇabhojana’’nti. Atha kho so ājīvako yena bhagavā tenupasaṅkami; upasaṅkamitvā bhagavatā saddhiṃ sammodi, sammodanīyaṃ kathaṃ sāraṇīyaṃ vītisāretvā ekamantaṃ aṭṭhāsi. Ekamantaṃ ṭhito kho so ājīvako bhagavantaṃ etadavoca – ‘‘bhavampi gotamo pabbajito, ahampi pabbajito; arahati pabbajito pabbajitassa piṇḍaṃ paṭiggahetuṃ. Adhivāsetu me bhavaṃ gotamo svātanāya bhattaṃ saddhiṃ bhikkhusaṅghenā’’ti. Adhivāsesi bhagavā tuṇhībhāvena. Atha kho so ājīvako bhagavato adhivāsanaṃ viditvā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, samaṇabhattasamaye gaṇabhojanaṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
২১৭. গণভোজনে , অঞ্ঞত্র সমযা, পাচিত্তিযং। তত্থাযং সমযো। গিলানসমযো, চীৰরদানসমযো, চীৰরকারসমযো, অদ্ধানগমনসমযো, নাৰাভিরুহনসমযো, মহাসমযো, সমণভত্তসমযো – অযং তত্থ সমযো’’তি।
217.Gaṇabhojane, aññatra samayā, pācittiyaṃ. Tatthāyaṃ samayo. Gilānasamayo, cīvaradānasamayo, cīvarakārasamayo, addhānagamanasamayo, nāvābhiruhanasamayo, mahāsamayo, samaṇabhattasamayo – ayaṃ tattha samayo’’ti.
২১৮. গণভোজনং নাম যত্থ চত্তারো ভিক্খূ পঞ্চন্নং ভোজনানং অঞ্ঞতরেন ভোজনেন নিমন্তিতা ভুঞ্জন্তি। এতং গণভোজনং নাম।
218.Gaṇabhojanaṃ nāma yattha cattāro bhikkhū pañcannaṃ bhojanānaṃ aññatarena bhojanena nimantitā bhuñjanti. Etaṃ gaṇabhojanaṃ nāma.
অঞ্ঞত্র সমযাতি ঠপেত্ৰা সমযং।
Aññatra samayāti ṭhapetvā samayaṃ.
গিলানসমযো নাম অন্তমসো পাদাপি ফলিতা 1 হোন্তি। ‘‘গিলানসমযো’’তি ভুঞ্জিতব্বং।
Gilānasamayo nāma antamaso pādāpi phalitā 2 honti. ‘‘Gilānasamayo’’ti bhuñjitabbaṃ.
চীৰরদানসমযো নাম অনত্থতে কথিনে ৰস্সানস্স পচ্ছিমো মাসো, অত্থতে কথিনে পঞ্চমাসা। ‘‘চীৰরদানসমযো’’তি ভুঞ্জিতব্বং।
Cīvaradānasamayo nāma anatthate kathine vassānassa pacchimo māso, atthate kathine pañcamāsā. ‘‘Cīvaradānasamayo’’ti bhuñjitabbaṃ.
চীৰরকারসমযো নাম চীৰরে কযিরমানে। ‘‘চীৰরকারসমযো’’তি ভুঞ্জিতব্বং।
Cīvarakārasamayo nāma cīvare kayiramāne. ‘‘Cīvarakārasamayo’’ti bhuñjitabbaṃ.
অদ্ধানগমনসমযো নাম ‘‘অদ্ধযোজনং গচ্ছিস্সামী’’তি ভুঞ্জিতব্বং, গচ্ছন্তেন ভুঞ্জিতব্বং, গতেন ভুঞ্জিতব্বং।
Addhānagamanasamayo nāma ‘‘addhayojanaṃ gacchissāmī’’ti bhuñjitabbaṃ, gacchantena bhuñjitabbaṃ, gatena bhuñjitabbaṃ.
নাৰাভিরুহনসমযো নাম ‘‘নাৰং অভিরুহিস্সামী’’তি ভুঞ্জিতব্বং, আরুল়্হেন ভুঞ্জিতব্বং, ওরুল়্হেন ভুঞ্জিতব্বং।
Nāvābhiruhanasamayo nāma ‘‘nāvaṃ abhiruhissāmī’’ti bhuñjitabbaṃ, āruḷhena bhuñjitabbaṃ, oruḷhena bhuñjitabbaṃ.
মহাসমযো নাম যত্থ দ্ৰে তযো ভিক্খূ পিণ্ডায চরিত্ৰা যাপেন্তি, চতুত্থে আগতে ন যাপেন্তি। ‘‘মহাসমযো’’তি ভুঞ্জিতব্বং।
Mahāsamayo nāma yattha dve tayo bhikkhū piṇḍāya caritvā yāpenti, catutthe āgate na yāpenti. ‘‘Mahāsamayo’’ti bhuñjitabbaṃ.
সমণভত্তসমযো নাম যো কোচি পরিব্বাজকসমাপন্নো ভত্তং করোতি। ‘‘সমণভত্তসমযো’’তি ভুঞ্জিতব্বং।
Samaṇabhattasamayo nāma yo koci paribbājakasamāpanno bhattaṃ karoti. ‘‘Samaṇabhattasamayo’’ti bhuñjitabbaṃ.
‘‘অঞ্ঞত্র সমযা ভুঞ্জিস্সামী’’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি পাচিত্তিযস্স।
‘‘Aññatra samayā bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti pācittiyassa.
২১৯. গণভোজনে গণভোজনসঞ্ঞী, অঞ্ঞত্র সমযা, ভুঞ্জতি, আপত্তি পাচিত্তিযস্স। গণভোজনে ৰেমতিকো, অঞ্ঞত্র সমযা, ভুঞ্জতি, আপত্তি পাচিত্তিযস্স। গণভোজনে নগণভোজনসঞ্ঞী, অঞ্ঞত্র সমযা, ভুঞ্জতি, আপত্তি পাচিত্তিযস্স।
219. Gaṇabhojane gaṇabhojanasaññī, aññatra samayā, bhuñjati, āpatti pācittiyassa. Gaṇabhojane vematiko, aññatra samayā, bhuñjati, āpatti pācittiyassa. Gaṇabhojane nagaṇabhojanasaññī, aññatra samayā, bhuñjati, āpatti pācittiyassa.
নগণভোজনে গণভোজনসঞ্ঞী , আপত্তি দুক্কটস্স। নগণভোজনে ৰেমতিকো, আপত্তি দুক্কটস্স। নগণভোজনে নগণভোজনসঞ্ঞী, অনাপত্তি।
Nagaṇabhojane gaṇabhojanasaññī , āpatti dukkaṭassa. Nagaṇabhojane vematiko, āpatti dukkaṭassa. Nagaṇabhojane nagaṇabhojanasaññī, anāpatti.
২২০. অনাপত্তি সমযে, দ্ৰে তযো একতো ভুঞ্জন্তি, পিণ্ডায চরিত্ৰা একতো সন্নিপতিত্ৰা ভুঞ্জন্তি, নিচ্চভত্তং, সলাকভত্তং, পক্খিকং, উপোসথিকং, পাটিপদিকং, পঞ্চ ভোজনানি ঠপেত্ৰা সব্বত্থ অনাপত্তি, উম্মত্তকস্স, আদিকম্মিকস্সাতি।
220. Anāpatti samaye, dve tayo ekato bhuñjanti, piṇḍāya caritvā ekato sannipatitvā bhuñjanti, niccabhattaṃ, salākabhattaṃ, pakkhikaṃ, uposathikaṃ, pāṭipadikaṃ, pañca bhojanāni ṭhapetvā sabbattha anāpatti, ummattakassa, ādikammikassāti.
গণভোজনসিক্খাপদং নিট্ঠিতং দুতিযং।
Gaṇabhojanasikkhāpadaṃ niṭṭhitaṃ dutiyaṃ.
৩. পরম্পরভোজনসিক্খাপদং
3. Paramparabhojanasikkhāpadaṃ
২২১. তেন সমযেন বুদ্ধো ভগৰা ৰেসালিযং ৰিহরতি মহাৰনে কূটাগারসালাযং। তেন খো পন সমযেন ৰেসালিযং পণীতানং ভত্তানং ভত্তপটিপাটি অধিট্ঠিতা হোতি। অথ খো অঞ্ঞতরস্স দলিদ্দস্স কম্মকারস্স 3 এতদহোসি – ‘‘ন খো ইদং ওরকং ভৰিস্সতি যথযিমে মনুস্সা সক্কচ্চং ভত্তং করোন্তি; যংনূনাহম্পি ভত্তং করেয্য’’ন্তি। অথ খো সো দলিদ্দো কম্মকারো যেন কিরপতিকো তেনুপসঙ্কমি; উপসঙ্কমিত্ৰা তং কিরপতিকং এতদৰোচ – ‘‘ইচ্ছামহং, অয্যপুত্ত, বুদ্ধপ্পমুখস্স ভিক্খুসঙ্ঘস্স ভত্তং কাতুং। দেহি মে ৰেতন’’ন্তি। সোপি খো কিরপতিকো সদ্ধো হোতি পসন্নো। অথ খো সো কিরপতিকো তস্স দলিদ্দস্স কম্মকারস্স অব্ভাতিরেকং 4 ৰেতনং অদাসি। অথ খো সো দলিদ্দো কম্মকারো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো সো দলিদ্দো কম্মকারো ভগৰন্তং এতদৰোচ – ‘‘অধিৰাসেতু মে, ভন্তে, ভগৰা স্ৰাতনায ভত্তং সদ্ধিং ভিক্খুসঙ্ঘেনা’’তি। ‘‘মহা খো, আৰুসো, ভিক্খুসঙ্ঘো। জানাহী’’তি। ‘‘হোতু 5 ভন্তে, মহা ভিক্খুসঙ্ঘো। বহূ মে বদরা পটিযত্তা বদরমিস্সেন পেয্যা পরিপূরিস্সন্তী’’তি। অধিৰাসেসি ভগৰা তুণ্হীভাৰেন।
221. Tena samayena buddho bhagavā vesāliyaṃ viharati mahāvane kūṭāgārasālāyaṃ. Tena kho pana samayena vesāliyaṃ paṇītānaṃ bhattānaṃ bhattapaṭipāṭi adhiṭṭhitā hoti. Atha kho aññatarassa daliddassa kammakārassa 6 etadahosi – ‘‘na kho idaṃ orakaṃ bhavissati yathayime manussā sakkaccaṃ bhattaṃ karonti; yaṃnūnāhampi bhattaṃ kareyya’’nti. Atha kho so daliddo kammakāro yena kirapatiko tenupasaṅkami; upasaṅkamitvā taṃ kirapatikaṃ etadavoca – ‘‘icchāmahaṃ, ayyaputta, buddhappamukhassa bhikkhusaṅghassa bhattaṃ kātuṃ. Dehi me vetana’’nti. Sopi kho kirapatiko saddho hoti pasanno. Atha kho so kirapatiko tassa daliddassa kammakārassa abbhātirekaṃ 7 vetanaṃ adāsi. Atha kho so daliddo kammakāro yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so daliddo kammakāro bhagavantaṃ etadavoca – ‘‘adhivāsetu me, bhante, bhagavā svātanāya bhattaṃ saddhiṃ bhikkhusaṅghenā’’ti. ‘‘Mahā kho, āvuso, bhikkhusaṅgho. Jānāhī’’ti. ‘‘Hotu 8 bhante, mahā bhikkhusaṅgho. Bahū me badarā paṭiyattā badaramissena peyyā paripūrissantī’’ti. Adhivāsesi bhagavā tuṇhībhāvena.
অথ খো সো দলিদ্দো কম্মকারো ভগৰতো অধিৰাসনং ৰিদিত্ৰা উট্ঠাযাসনা ভগৰন্তং অভিৰাদেত্ৰা পদক্খিণং কত্ৰা পক্কামি। অস্সোসুং খো ভিক্খূ – ‘‘দলিদ্দেন কির কম্মকারেন স্ৰাতনায বুদ্ধপ্পমুখো ভিক্খুসঙ্ঘো নিমন্তিতো, বদরমিস্সেন পেয্যা পরিপূরিস্সন্তী’’তি। তে কালস্সেৰ পিণ্ডায চরিত্ৰা ভুঞ্জিংসু। অস্সোসুং খো মনুস্সা – ‘‘দলিদ্দেন কির কম্মকারেন বুদ্ধপ্পমুখো ভিক্খুসঙ্ঘো নিমন্তিতো’’তি। তে দলিদ্দস্স কম্মকারস্স পহূতং খাদনীযং ভোজনীযং অভিহরিংসু। অথ খো সো দলিদ্দো কম্মকারো তস্সা রত্তিযা অচ্চযেন পণীতং খাদনীযং ভোজনীযং পটিযাদাপেত্ৰা ভগৰতো কালং আরোচাপেসি – ‘‘কালো, ভন্তে, নিট্ঠিতং ভত্ত’’ন্তি।
Atha kho so daliddo kammakāro bhagavato adhivāsanaṃ viditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Assosuṃ kho bhikkhū – ‘‘daliddena kira kammakārena svātanāya buddhappamukho bhikkhusaṅgho nimantito, badaramissena peyyā paripūrissantī’’ti. Te kālasseva piṇḍāya caritvā bhuñjiṃsu. Assosuṃ kho manussā – ‘‘daliddena kira kammakārena buddhappamukho bhikkhusaṅgho nimantito’’ti. Te daliddassa kammakārassa pahūtaṃ khādanīyaṃ bhojanīyaṃ abhihariṃsu. Atha kho so daliddo kammakāro tassā rattiyā accayena paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi – ‘‘kālo, bhante, niṭṭhitaṃ bhatta’’nti.
অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায যেন তস্স দলিদ্দস্স কম্মকারস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি সদ্ধিং ভিক্খুসঙ্ঘেন। অথ খো সো দলিদ্দো কম্মকারো ভত্তগ্গে ভিক্খূ পরিৰিসতি। ভিক্খূ এৰমাহংসু – ‘‘থোকং, আৰুসো, দেহি। থোকং, আৰুসো, দেহী’’তি। ‘‘মা খো তুম্হে, ভন্তে, ‘অযং দলিদ্দো কম্মকারো’তি থোকং থোকং পটিগ্গণ্হিত্থ। পহূতং মে খাদনীযং ভোজনীযং পটিযত্তং।
Atha kho bhagavā pubbaṇhasamayaṃ nivāsetvā pattacīvaramādāya yena tassa daliddassa kammakārassa nivesanaṃ tenupasaṅkami; upasaṅkamitvā paññatte āsane nisīdi saddhiṃ bhikkhusaṅghena. Atha kho so daliddo kammakāro bhattagge bhikkhū parivisati. Bhikkhū evamāhaṃsu – ‘‘thokaṃ, āvuso, dehi. Thokaṃ, āvuso, dehī’’ti. ‘‘Mā kho tumhe, bhante, ‘ayaṃ daliddo kammakāro’ti thokaṃ thokaṃ paṭiggaṇhittha. Pahūtaṃ me khādanīyaṃ bhojanīyaṃ paṭiyattaṃ.
পটিগ্গণ্হথ, ভন্তে, যাৰদত্থ’’ন্তি। ‘‘ন খো মযং, আৰুসো, এতংকারণা থোকং থোকং পটিগ্গণ্হাম। অপিচ, মযং কালস্সেৰ পিণ্ডায চরিত্ৰা ভুঞ্জিম্হা; তেন মযং থোকং থোকং পটিগ্গণ্হামা’’তি।
Paṭiggaṇhatha, bhante, yāvadattha’’nti. ‘‘Na kho mayaṃ, āvuso, etaṃkāraṇā thokaṃ thokaṃ paṭiggaṇhāma. Apica, mayaṃ kālasseva piṇḍāya caritvā bhuñjimhā; tena mayaṃ thokaṃ thokaṃ paṭiggaṇhāmā’’ti.
অথ খো সো দলিদ্দো কম্মকারো উজ্ঝাযতি খিয্যতি ৰিপাচেতি – ‘‘কথঞ্হি নাম ভদন্তা মযা নিমন্তিতা অঞ্ঞত্র ভুঞ্জিস্সন্তি! ন চাহং পটিবলো যাৰদত্থং দাতু’’ন্তি? অস্সোসুং খো ভিক্খূ তস্স দলিদ্দস্স কম্মকারস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খূ অঞ্ঞত্র নিমন্তিতা অঞ্ঞত্র ভুঞ্জিস্সন্তী’’তি…পে॰… সচ্চং কির, ভিক্খৰে, ভিক্খূ অঞ্ঞত্র নিমন্তিতা অঞ্ঞত্র ভুঞ্জন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তে, ভিক্খৰে, মোঘপুরিসা অঞ্ঞত্র নিমন্তিতা অঞ্ঞত্র ভুঞ্জিস্সন্তি! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Atha kho so daliddo kammakāro ujjhāyati khiyyati vipāceti – ‘‘kathañhi nāma bhadantā mayā nimantitā aññatra bhuñjissanti! Na cāhaṃ paṭibalo yāvadatthaṃ dātu’’nti? Assosuṃ kho bhikkhū tassa daliddassa kammakārassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū aññatra nimantitā aññatra bhuñjissantī’’ti…pe… saccaṃ kira, bhikkhave, bhikkhū aññatra nimantitā aññatra bhuñjantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā aññatra nimantitā aññatra bhuñjissanti! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘পরম্পরভোজনে পাচিত্তিয’’ন্তি।
‘‘Paramparabhojanepācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২২২. তেন খো পন সমযেন অঞ্ঞতরো ভিক্খু গিলানো হোতি। অঞ্ঞতরো ভিক্খু পিণ্ডপাতং আদায যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং এতদৰোচ – ‘‘ভুঞ্জাহি, আৰুসো’’তি। ‘‘অলং, আৰুসো, অত্থি মে ভত্তপচ্চাসা’’তি। তস্স ভিক্খুনো পিণ্ডপাতো উস্সূরে 9 আহরীযিত্থ। সো ভিক্খু ন চিত্তরূপং ভুঞ্জি। ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গিলানেন ভিক্খুনা পরম্পরভোজনং ভুঞ্জিতুং। এৰঞ্চ পন , ভিক্খৰে, ইমং সিক্খাপদং উদ্দিসেয্যাথ –
222. Tena kho pana samayena aññataro bhikkhu gilāno hoti. Aññataro bhikkhu piṇḍapātaṃ ādāya yena so bhikkhu tenupasaṅkami; upasaṅkamitvā taṃ bhikkhuṃ etadavoca – ‘‘bhuñjāhi, āvuso’’ti. ‘‘Alaṃ, āvuso, atthi me bhattapaccāsā’’ti. Tassa bhikkhuno piṇḍapāto ussūre 10 āharīyittha. So bhikkhu na cittarūpaṃ bhuñji. Bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gilānena bhikkhunā paramparabhojanaṃ bhuñjituṃ. Evañca pana , bhikkhave, imaṃ sikkhāpadaṃ uddiseyyātha –
‘‘পরম্পরভোজনে, অঞ্ঞত্র সমযা, পাচিত্তিযং। তত্থাযং সমযো। গিলানসমযো – অযং তত্থ সমযো’’তি।
‘‘Paramparabhojane,aññatra samayā, pācittiyaṃ. Tatthāyaṃ samayo. Gilānasamayo – ayaṃ tattha samayo’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২২৩. তেন খো পন সমযেন মনুস্সা চীৰরদানসমযে সচীৰরভত্তং পটিযাদেত্ৰা 11 ভিক্খূ নিমন্তেন্তি – ‘‘ভোজেত্ৰা চীৰরেন অচ্ছাদেস্সামা’’তি। ভিক্খূ কুক্কুচ্চাযন্তা নাধিৰাসেন্তি – ‘‘পটিক্খিত্তং ভগৰতা পরম্পরভোজন’’ন্তি। চীৰরং পরিত্তং উপ্পজ্জতি। ভগৰতো এতমত্থং আরোচেসুং…পে॰… অনুজানামি, ভিক্খৰে, চীৰরদানসমযে পরম্পরভোজনং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
223. Tena kho pana samayena manussā cīvaradānasamaye sacīvarabhattaṃ paṭiyādetvā 12 bhikkhū nimantenti – ‘‘bhojetvā cīvarena acchādessāmā’’ti. Bhikkhū kukkuccāyantā nādhivāsenti – ‘‘paṭikkhittaṃ bhagavatā paramparabhojana’’nti. Cīvaraṃ parittaṃ uppajjati. Bhagavato etamatthaṃ ārocesuṃ…pe… anujānāmi, bhikkhave, cīvaradānasamaye paramparabhojanaṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
‘‘পরম্পরভোজনে, অঞ্ঞত্র সমযা, পাচিত্তিযং। তত্থাযং সমযো। গিলানসমযো, চীৰরদানসমযো – অযং তত্থ সমযো’’তি।
‘‘Paramparabhojane, aññatra samayā, pācittiyaṃ. Tatthāyaṃ samayo. Gilānasamayo, cīvaradānasamayo – ayaṃ tattha samayo’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২২৪. তেন খো পন সমযেন মনুস্সা চীৰরকারকে ভিক্খূ ভত্তেন নিমন্তেন্তি। ভিক্খূ কুক্কুচ্চাযন্তা নাধিৰাসেন্তি – ‘‘পটিক্খিত্তং ভগৰতা পরম্পরভোজন’’ন্তি। ভগৰতো এতমত্থং আরোচেসুং…পে॰… অনুজানামি, ভিক্খৰে, চীৰরকারসমযে পরম্পরভোজনং ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
224. Tena kho pana samayena manussā cīvarakārake bhikkhū bhattena nimantenti. Bhikkhū kukkuccāyantā nādhivāsenti – ‘‘paṭikkhittaṃ bhagavatā paramparabhojana’’nti. Bhagavato etamatthaṃ ārocesuṃ…pe… anujānāmi, bhikkhave, cīvarakārasamaye paramparabhojanaṃ bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
২২৫. ‘‘পরম্পরভোজনে, অঞ্ঞত্র সমযা, পাচিত্তিযং। তত্থাযং সমযো। গিলানসমযো, চীৰরদানসমযো, চীৰরকারসমযো – অযং তত্থ সমযো’’তি।
225.‘‘Paramparabhojane, aññatra samayā, pācittiyaṃ. Tatthāyaṃ samayo. Gilānasamayo, cīvaradānasamayo, cīvarakārasamayo – ayaṃ tattha samayo’’ti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২২৬. অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায আযস্মতা আনন্দেন পচ্ছাসমণেন যেন অঞ্ঞতরং কুলং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। অথ খো তে মনুস্সা ভগৰতো চ আযস্মতো চ আনন্দস্স ভোজনং অদংসু। আযস্মা আনন্দো কুক্কুচ্চাযন্তো ন পটিগ্গণ্হাতি। ‘‘গণ্হাহি 13, আনন্দা’’তি। ‘‘অলং, ভগৰা , অত্থি মে ভত্তপচ্চাসা’’তি। ‘‘তেনহানন্দ, ৰিকপ্পেত্ৰা গণ্হাহী’’তি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, ৰিকপ্পেত্ৰা 14 পরম্পরভোজনং ভুঞ্জিতুং। এৰঞ্চ পন, ভিক্খৰে, ৰিকপ্পেতব্বং – ‘ময্হং ভত্তপচ্চাসং ইত্থন্নামস্স দম্মী’’’তি।
226. Atha kho bhagavā pubbaṇhasamayaṃ nivāsetvā pattacīvaramādāya āyasmatā ānandena pacchāsamaṇena yena aññataraṃ kulaṃ tenupasaṅkami; upasaṅkamitvā paññatte āsane nisīdi. Atha kho te manussā bhagavato ca āyasmato ca ānandassa bhojanaṃ adaṃsu. Āyasmā ānando kukkuccāyanto na paṭiggaṇhāti. ‘‘Gaṇhāhi 15, ānandā’’ti. ‘‘Alaṃ, bhagavā , atthi me bhattapaccāsā’’ti. ‘‘Tenahānanda, vikappetvā gaṇhāhī’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, vikappetvā 16 paramparabhojanaṃ bhuñjituṃ. Evañca pana, bhikkhave, vikappetabbaṃ – ‘mayhaṃ bhattapaccāsaṃ itthannāmassa dammī’’’ti.
২২৭. পরম্পরভোজনং নাম পঞ্চন্নং ভোজনানং অঞ্ঞতরেন ভোজনেন নিমন্তিতো, তং ঠপেত্ৰা অঞ্ঞং পঞ্চন্নং ভোজনানং অঞ্ঞতরং ভোজনং ভুঞ্জতি, এতং পরম্পরভোজনং নাম।
227.Paramparabhojanaṃ nāma pañcannaṃ bhojanānaṃ aññatarena bhojanena nimantito, taṃ ṭhapetvā aññaṃ pañcannaṃ bhojanānaṃ aññataraṃ bhojanaṃ bhuñjati, etaṃ paramparabhojanaṃ nāma.
অঞ্ঞত্র সমযাতি ঠপেত্ৰা সমযং।
Aññatra samayāti ṭhapetvā samayaṃ.
গিলানসমযো নাম ন সক্কোতি একাসনে নিসিন্নো যাৰদত্থং ভুঞ্জিতুং। ‘‘গিলানসমযো’’তি ভুঞ্জিতব্বং।
Gilānasamayo nāma na sakkoti ekāsane nisinno yāvadatthaṃ bhuñjituṃ. ‘‘Gilānasamayo’’ti bhuñjitabbaṃ.
চীৰরদানসমযো নাম অনত্থতে কথিনে ৰস্সানস্স পচ্ছিমো মাসো, অত্থতে কথিনে পঞ্চ মাসা। ‘‘চীৰরদানসমযো’’তি ভুঞ্জিতব্বং।
Cīvaradānasamayo nāma anatthate kathine vassānassa pacchimo māso, atthate kathine pañca māsā. ‘‘Cīvaradānasamayo’’ti bhuñjitabbaṃ.
চীৰরকারসমযো নাম চীৰরে কযিরমানে। ‘‘চীৰরকারসমযো’’তি ভুঞ্জিতব্বং।
Cīvarakārasamayo nāma cīvare kayiramāne. ‘‘Cīvarakārasamayo’’ti bhuñjitabbaṃ.
‘‘অঞ্ঞত্র সমযা ভুঞ্জিস্সামী’’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি পাচিত্তিযস্স।
‘‘Aññatra samayā bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti pācittiyassa.
২২৮. পরম্পরভোজনে পরম্পরভোজনসঞ্ঞী, অঞ্ঞত্র সমযা, ভুঞ্জতি, আপত্তি পাচিত্তিযস্স। পরম্পরভোজনে ৰেমতিকো, অঞ্ঞত্র সমযা, ভুঞ্জতি, আপত্তি পাচিত্তিযস্স। পরম্পরভোজনে নপরম্পরভোজনসঞ্ঞী, অঞ্ঞত্র সমযা, ভুঞ্জতি, আপত্তি পাচিত্তিযস্স।
228. Paramparabhojane paramparabhojanasaññī, aññatra samayā, bhuñjati, āpatti pācittiyassa. Paramparabhojane vematiko, aññatra samayā, bhuñjati, āpatti pācittiyassa. Paramparabhojane naparamparabhojanasaññī, aññatra samayā, bhuñjati, āpatti pācittiyassa.
নপরম্পরভোজনে পরম্পরভোজনসঞ্ঞী, আপত্তি দুক্কটস্স। নপরম্পরভোজনে ৰেমতিকো, আপত্তি দুক্কটস্স। নপরম্পরভোজনে নপরম্পরভোজনসঞ্ঞী, অনাপত্তি।
Naparamparabhojane paramparabhojanasaññī, āpatti dukkaṭassa. Naparamparabhojane vematiko, āpatti dukkaṭassa. Naparamparabhojane naparamparabhojanasaññī, anāpatti.
২২৯. অনাপত্তি সমযে, ৰিকপ্পেত্ৰা ভুঞ্জতি, দ্ৰে তযো নিমন্তনে একতো ভুঞ্জতি, নিমন্তনপটিপাটিযা ভুঞ্জতি, সকলেন গামেন নিমন্তিতো তস্মিং গামে যত্থ কত্থচি ভুঞ্জতি , সকলেন পূগেন নিমন্তিতো তস্মিং পূগে যত্থ কত্থচি ভুঞ্জতি, নিমন্তিযমানো ভিক্খং গহেস্সামীতি ভণতি, নিচ্চভত্তে, সলাকভত্তে, পক্খিকে, উপোসথিকে, পাটিপদিকে, পঞ্চ ভোজনানি ঠপেত্ৰা সব্বত্থ অনাপত্তি, উম্মত্তকস্স, আদিকম্মিকস্সাতি।
229. Anāpatti samaye, vikappetvā bhuñjati, dve tayo nimantane ekato bhuñjati, nimantanapaṭipāṭiyā bhuñjati, sakalena gāmena nimantito tasmiṃ gāme yattha katthaci bhuñjati , sakalena pūgena nimantito tasmiṃ pūge yattha katthaci bhuñjati, nimantiyamāno bhikkhaṃ gahessāmīti bhaṇati, niccabhatte, salākabhatte, pakkhike, uposathike, pāṭipadike, pañca bhojanāni ṭhapetvā sabbattha anāpatti, ummattakassa, ādikammikassāti.
পরম্পরভোজনসিক্খাপদং নিট্ঠিতং ততিযং।
Paramparabhojanasikkhāpadaṃ niṭṭhitaṃ tatiyaṃ.
৪. কাণমাতুসিক্খাপদং
4. Kāṇamātusikkhāpadaṃ
২৩০. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন কাণমাতা উপাসিকা সদ্ধা হোতি পসন্না। কাণা গামকে অঞ্ঞতরস্স পুরিসস্স দিন্না হোতি। অথ খো কাণা মাতুঘরং অগমাসি কেনচিদেৰ করণীযেন। অথ খো কাণায সামিকো কাণায সন্তিকে দূতং পাহেসি – ‘‘আগচ্ছতু কাণা, ইচ্ছামি কাণায আগত’’ন্তি। অথ খো কাণমাতা উপাসিকা ‘‘কিস্মিং ৰিয রিত্তহত্থং গন্তু’’ন্তি পূৰং 17 পচি। পক্কে পূৰে অঞ্ঞতরো পিণ্ডচারিকো ভিক্খু কাণমাতায উপাসিকায নিৰেসনং পাৰিসি। অথ খো কাণমাতা উপাসিকা তস্স ভিক্খুনো পূৰং দাপেসি। সো নিক্খমিত্ৰা অঞ্ঞস্স আচিক্খি। তস্সপি পূৰং দাপেসি। সোপি নিক্খমিত্ৰা অঞ্ঞস্স আচিক্খি। তস্সপি পূৰং দাপেসি। যথাপটিযত্তং পূৰং পরিক্খযং অগমাসি। দুতিযম্পি খো কাণায সামিকো কাণায সন্তিকে দূতং পাহেসি – ‘‘আগচ্ছতু কাণা, ইচ্ছামি কাণায আগত’’ন্তি। দুতিযম্পি খো কাণমাতা উপাসিকা ‘‘কিস্মিং ৰিয রিত্তহত্তং গন্তু’’ন্তি পূৰং পচি। পক্কে পূৰে অঞ্ঞতরো পিণ্ডচারিকো ভিক্খু কাণমাতায উপাসিকায নিৰেসনং পাৰিসি। অথ খো কাণমাতা উপাসিকা তস্স ভিক্খুনো পূৰং দাপেসি। সো নিক্খমিত্ৰা অঞ্ঞস্স আচিক্খি। তস্সপি পূৰং দাপেসি। সোপি নিক্খমিত্ৰা অঞ্ঞস্স আচিক্খি। তস্সপি পূৰং দাপেসি। যথাপটিযত্তং পূৰং পরিক্খযং অগমাসি। ততিযম্পি খো কাণায সামিকো কাণায সন্তিকে দূতং পাহেসি – ‘‘আগচ্ছতু কাণা, ইচ্ছামি কাণায আগতং। সচে কাণা নাগচ্ছিস্সতি, অহং অঞ্ঞং পজাপতিং আনেস্সামী’’তি। ততিযম্পি খো কাণমাতা উপাসিকা কিস্মিং ৰিয রিত্তহত্থং গন্তুন্তি পূৰং পচি। পক্কে পূৰে অঞ্ঞতরো পিণ্ডচারিকো ভিক্খু কাণমাতায উপাসিকায নিৰেসনং পাৰিসি। অথ খো কাণমাতা উপাসিকা তস্স ভিক্খুনো পূৰং দাপেসি। সো নিক্খমিত্ৰা অঞ্ঞস্স আচিক্খি। তস্সপি পূৰং দাপেসি। সোপি নিক্খমিত্ৰা অঞ্ঞস্স আচিক্খি। তস্সপি পূৰং দাপেসি। যথাপটিযত্তং পূৰং পরিক্খযং অগমাসি। অথ খো কাণায সামিকো অঞ্ঞং পজাপতিং আনেসি।
230. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena kāṇamātā upāsikā saddhā hoti pasannā. Kāṇā gāmake aññatarassa purisassa dinnā hoti. Atha kho kāṇā mātugharaṃ agamāsi kenacideva karaṇīyena. Atha kho kāṇāya sāmiko kāṇāya santike dūtaṃ pāhesi – ‘‘āgacchatu kāṇā, icchāmi kāṇāya āgata’’nti. Atha kho kāṇamātā upāsikā ‘‘kismiṃ viya rittahatthaṃ gantu’’nti pūvaṃ 18 paci. Pakke pūve aññataro piṇḍacāriko bhikkhu kāṇamātāya upāsikāya nivesanaṃ pāvisi. Atha kho kāṇamātā upāsikā tassa bhikkhuno pūvaṃ dāpesi. So nikkhamitvā aññassa ācikkhi. Tassapi pūvaṃ dāpesi. Sopi nikkhamitvā aññassa ācikkhi. Tassapi pūvaṃ dāpesi. Yathāpaṭiyattaṃ pūvaṃ parikkhayaṃ agamāsi. Dutiyampi kho kāṇāya sāmiko kāṇāya santike dūtaṃ pāhesi – ‘‘āgacchatu kāṇā, icchāmi kāṇāya āgata’’nti. Dutiyampi kho kāṇamātā upāsikā ‘‘kismiṃ viya rittahattaṃ gantu’’nti pūvaṃ paci. Pakke pūve aññataro piṇḍacāriko bhikkhu kāṇamātāya upāsikāya nivesanaṃ pāvisi. Atha kho kāṇamātā upāsikā tassa bhikkhuno pūvaṃ dāpesi. So nikkhamitvā aññassa ācikkhi. Tassapi pūvaṃ dāpesi. Sopi nikkhamitvā aññassa ācikkhi. Tassapi pūvaṃ dāpesi. Yathāpaṭiyattaṃ pūvaṃ parikkhayaṃ agamāsi. Tatiyampi kho kāṇāya sāmiko kāṇāya santike dūtaṃ pāhesi – ‘‘āgacchatu kāṇā, icchāmi kāṇāya āgataṃ. Sace kāṇā nāgacchissati, ahaṃ aññaṃ pajāpatiṃ ānessāmī’’ti. Tatiyampi kho kāṇamātā upāsikā kismiṃ viya rittahatthaṃ gantunti pūvaṃ paci. Pakke pūve aññataro piṇḍacāriko bhikkhu kāṇamātāya upāsikāya nivesanaṃ pāvisi. Atha kho kāṇamātā upāsikā tassa bhikkhuno pūvaṃ dāpesi. So nikkhamitvā aññassa ācikkhi. Tassapi pūvaṃ dāpesi. Sopi nikkhamitvā aññassa ācikkhi. Tassapi pūvaṃ dāpesi. Yathāpaṭiyattaṃ pūvaṃ parikkhayaṃ agamāsi. Atha kho kāṇāya sāmiko aññaṃ pajāpatiṃ ānesi.
অস্সোসি খো কাণা – ‘‘তেন কির পুরিসেন অঞ্ঞা পজাপতি আনীতা’’তি। সা রোদন্তী অট্ঠাসি। অথ খো ভগৰা পুব্বণ্হসমযং নিৰাসেত্ৰা পত্তচীৰরমাদায যেন কাণমাতায উপাসিকায নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। অথ খো কাণমাতা উপাসিকা যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নং খো কাণমাতরং উপাসিকং ভগৰা এতদৰোচ – ‘‘কিস্সাযং কাণা রোদতী’’তি? অথ খো কাণমাতা উপাসিকা ভগৰতো এতমত্থং আরোচেসি। অথ খো ভগৰা কাণমাতরং উপাসিকং ধম্মিযা কথায সন্দস্সেত্ৰা সমাদপেত্ৰা সমুত্তেজেত্ৰা সম্পহংসেত্ৰা উট্ঠাযাসনা পক্কামি।
Assosi kho kāṇā – ‘‘tena kira purisena aññā pajāpati ānītā’’ti. Sā rodantī aṭṭhāsi. Atha kho bhagavā pubbaṇhasamayaṃ nivāsetvā pattacīvaramādāya yena kāṇamātāya upāsikāya nivesanaṃ tenupasaṅkami; upasaṅkamitvā paññatte āsane nisīdi. Atha kho kāṇamātā upāsikā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinnaṃ kho kāṇamātaraṃ upāsikaṃ bhagavā etadavoca – ‘‘kissāyaṃ kāṇā rodatī’’ti? Atha kho kāṇamātā upāsikā bhagavato etamatthaṃ ārocesi. Atha kho bhagavā kāṇamātaraṃ upāsikaṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmi.
২৩১. তেন খো পন সমযেন অঞ্ঞতরো সত্থো রাজগহা পটিযালোকং গন্তুকামো হোতি। অঞ্ঞতরো পিণ্ডচারিকো ভিক্খু তং সত্থং পিণ্ডায পাৰিসি। অঞ্ঞতরো উপাসকো তস্স ভিক্খুনো সত্তুং দাপেসি। সো নিক্খমিত্ৰা অঞ্ঞস্স আচিক্খি। তস্সপি সত্তুং দাপেসি। সো নিক্খমিত্ৰা অঞ্ঞস্স আচিক্খি। তস্সপি সত্তুং দাপেসি। যথাপটিযত্তং পাথেয্যং পরিক্খযং অগমাসি । অথ খো সো উপাসকো তে মনুস্সে এতদৰোচ – ‘‘অজ্জণ্হো, অয্যা, আগমেথ, যথাপটিযত্তং পাথেয্যং অয্যানং দিন্নং। পাথেয্যং পটিযাদেস্সামী’’তি। ‘‘নায্যো 19 সক্কা আগমেতুং, পযাতো সত্থো’’তি অগমংসু। অথ খো তস্স উপাসকস্স পাথেয্যং পটিযাদেত্ৰা পচ্ছা গচ্ছন্তস্স চোরা অচ্ছিন্দিংসু। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা ন মত্তং জানিত্ৰা পটিগ্গহেস্সন্তি! অযং ইমেসং দত্ৰা পচ্ছা গচ্ছন্তো চোরেহি অচ্ছিন্নো’’তি। অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। অথ খো তে ভিক্খূ ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘তেন হি, ভিক্খৰে, ভিক্খূনং সিক্খাপদং পঞ্ঞপেস্সামি দস অত্থৰসে পটিচ্চ – সঙ্ঘসুট্ঠুতায, সঙ্ঘফাসুতায…পে॰… ৰিনযানুগ্গহায। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
231. Tena kho pana samayena aññataro sattho rājagahā paṭiyālokaṃ gantukāmo hoti. Aññataro piṇḍacāriko bhikkhu taṃ satthaṃ piṇḍāya pāvisi. Aññataro upāsako tassa bhikkhuno sattuṃ dāpesi. So nikkhamitvā aññassa ācikkhi. Tassapi sattuṃ dāpesi. So nikkhamitvā aññassa ācikkhi. Tassapi sattuṃ dāpesi. Yathāpaṭiyattaṃ pātheyyaṃ parikkhayaṃ agamāsi . Atha kho so upāsako te manusse etadavoca – ‘‘ajjaṇho, ayyā, āgametha, yathāpaṭiyattaṃ pātheyyaṃ ayyānaṃ dinnaṃ. Pātheyyaṃ paṭiyādessāmī’’ti. ‘‘Nāyyo 20 sakkā āgametuṃ, payāto sattho’’ti agamaṃsu. Atha kho tassa upāsakassa pātheyyaṃ paṭiyādetvā pacchā gacchantassa corā acchindiṃsu. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā na mattaṃ jānitvā paṭiggahessanti! Ayaṃ imesaṃ datvā pacchā gacchanto corehi acchinno’’ti. Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Atha kho te bhikkhū bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘tena hi, bhikkhave, bhikkhūnaṃ sikkhāpadaṃ paññapessāmi dasa atthavase paṭicca – saṅghasuṭṭhutāya, saṅghaphāsutāya…pe… vinayānuggahāya. Evañca pana, bhikkhave, imaṃ sikkhāpadaṃ uddiseyyātha –
২৩২. ‘‘ভিক্খুং পনেৰ কুলং উপগতং পূৰেহি ৰা মন্থেহি ৰা অভিহট্ঠুং পৰারেয্য, আকঙ্খমানেন ভিক্খুনা দ্ৰত্তিপত্তপূরা পটিগ্গহেতব্বা ততো চে উত্তরি পটিগ্গণ্হেয্য পাচিত্তিযং। দ্ৰত্তিপত্তপূরে পটিগ্গহেত্ৰা ততো নীহরিত্ৰা ভিক্খূহি সদ্ধিং সংৰিভজিতব্বং। অযং তত্থ সামীচী’’তি।
232.‘‘Bhikkhuṃ paneva kulaṃ upagataṃ pūvehi vā manthehi vā abhihaṭṭhuṃ pavāreyya, ākaṅkhamānena bhikkhunā dvattipattapūrā paṭiggahetabbā tato ce uttari paṭiggaṇheyya pācittiyaṃ. Dvattipattapūre paṭiggahetvā tato nīharitvā bhikkhūhi saddhiṃ saṃvibhajitabbaṃ. Ayaṃ tattha sāmīcī’’ti.
২৩৩. ভিক্খুং পনেৰ কুলং উপগতন্তি কুলং নাম চত্তারি কুলানি – খত্তিযকুলং, ব্রাহ্মণকুলং, ৰেস্সকুলং, সুদ্দকুলং।
233.Bhikkhuṃ paneva kulaṃ upagatanti kulaṃ nāma cattāri kulāni – khattiyakulaṃ, brāhmaṇakulaṃ, vessakulaṃ, suddakulaṃ.
উপগতন্তি তত্থ গতং।
Upagatanti tattha gataṃ.
পূৰং নাম যংকিঞ্চি পহেণকত্থায পটিযত্তং।
Pūvaṃ nāma yaṃkiñci paheṇakatthāya paṭiyattaṃ.
মন্থং নাম যংকিঞ্চি পাথেয্যত্থায পটিযত্তং।
Manthaṃ nāma yaṃkiñci pātheyyatthāya paṭiyattaṃ.
অভিহট্ঠুং পৰারেয্যাতি যাৰতকং ইচ্ছসি তাৰতকং গণ্হাহীতি।
Abhihaṭṭhuṃ pavāreyyāti yāvatakaṃ icchasi tāvatakaṃ gaṇhāhīti.
আকঙ্খমানেনাতি ইচ্ছমানেন।
Ākaṅkhamānenāti icchamānena.
দ্ৰত্তিপত্তপূরা পটিগ্গহেতব্বাতি দ্ৰেতযো পত্তপূরা পটিগ্গহেতব্বা।
Dvattipattapūrā paṭiggahetabbāti dvetayo pattapūrā paṭiggahetabbā.
ততো চে উত্তরি পটিগণ্হেয্যাতি ততুত্তরি পটিগ্গণ্হাতি, আপত্তি পাচিত্তিযস্স।
Tatoce uttari paṭigaṇheyyāti tatuttari paṭiggaṇhāti, āpatti pācittiyassa.
দ্ৰত্তিপত্তপূরে পটিগ্গহেত্ৰা ততো নিক্খমন্তেন ভিক্খুং পস্সিত্ৰা আচিক্খিতব্বং – ‘‘অমুত্র মযা দ্ৰত্তিপত্তপূরা পটিগ্গহিতা, মা খো তত্থ পটিগ্গণ্হী’’তি। সচে পস্সিত্ৰা ন আচিক্খতি, আপত্তি দুক্কটস্স। সচে আচিক্খিতে পটিগ্গণ্হাতি, আপত্তি দুক্কটস্স।
Dvattipattapūre paṭiggahetvā tato nikkhamantena bhikkhuṃ passitvā ācikkhitabbaṃ – ‘‘amutra mayā dvattipattapūrā paṭiggahitā, mā kho tattha paṭiggaṇhī’’ti. Sace passitvā na ācikkhati, āpatti dukkaṭassa. Sace ācikkhite paṭiggaṇhāti, āpatti dukkaṭassa.
ততো নীহরিত্ৰা ভিক্খূহি সদ্ধিং সংৰিভজিতব্বন্তি পটিক্কমনং নীহরিত্ৰা সংৰিভজিতব্বং।
Tatonīharitvā bhikkhūhi saddhiṃ saṃvibhajitabbanti paṭikkamanaṃ nīharitvā saṃvibhajitabbaṃ.
অযং তত্থ সামীচীতি অযং তত্থ অনুধম্মতা।
Ayaṃ tattha sāmīcīti ayaṃ tattha anudhammatā.
২৩৪. অতিরেকদ্ৰত্তিপত্তপূরে অতিরেকসঞ্ঞী পটিগ্গণ্হাতি, আপত্তি পাচিত্তিযস্স। অতিরেকদ্ৰত্তিপত্তপূরে ৰেমতিকো পটিগ্গণ্হাতি, আপত্তি পাচিত্তিযস্স। অতিরেকদ্ৰত্তিপত্তপূরে ঊনকসঞ্ঞী পটিগ্গণ্হাতি, আপত্তি পাচিত্তিযস্স।
234. Atirekadvattipattapūre atirekasaññī paṭiggaṇhāti, āpatti pācittiyassa. Atirekadvattipattapūre vematiko paṭiggaṇhāti, āpatti pācittiyassa. Atirekadvattipattapūre ūnakasaññī paṭiggaṇhāti, āpatti pācittiyassa.
ঊনকদ্ৰত্তিপত্তপূরে অতিরেকসঞ্ঞী, আপত্তি দুক্কটস্স। ঊনকদ্ৰত্তিপত্তপূরে ৰেমতিকো, আপত্তি দুক্কটস্স। ঊনকদ্ৰত্তিপত্তপূরে ঊনকসঞ্ঞী, অনাপত্তি।
Ūnakadvattipattapūre atirekasaññī, āpatti dukkaṭassa. Ūnakadvattipattapūre vematiko, āpatti dukkaṭassa. Ūnakadvattipattapūre ūnakasaññī, anāpatti.
২৩৫. অনাপত্তি দ্ৰত্তিপত্তপূরে পটিগ্গণ্হাতি, ঊনকদ্ৰত্তিপত্তপূরে পটিগ্গণ্হাতি, ন পহেণকত্থায ন পাথেয্যত্থায পটিযত্তং দেন্তি, পহেণকত্থায ৰা পাথেয্যত্থায ৰা পটিযত্তসেসকং দেন্তি, গমনে পটিপ্পস্সদ্ধে দেন্তি, ঞাতকানং পৰারিতানং, অঞ্ঞস্সত্থায, অত্তনো ধনেন, উম্মত্তকস্স, আদিকম্মিকস্সাতি।
235. Anāpatti dvattipattapūre paṭiggaṇhāti, ūnakadvattipattapūre paṭiggaṇhāti, na paheṇakatthāya na pātheyyatthāya paṭiyattaṃ denti, paheṇakatthāya vā pātheyyatthāya vā paṭiyattasesakaṃ denti, gamane paṭippassaddhe denti, ñātakānaṃ pavāritānaṃ, aññassatthāya, attano dhanena, ummattakassa, ādikammikassāti.
কাণমাতুসিক্খাপদং নিট্ঠিতং চতুত্থং।
Kāṇamātusikkhāpadaṃ niṭṭhitaṃ catutthaṃ.
৫. পঠমপৰারণাসিক্খাপদং
5. Paṭhamapavāraṇāsikkhāpadaṃ
২৩৬. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অঞ্ঞতরো ব্রাহ্মণো ভিক্খূ নিমন্তেত্ৰা ভোজেসি। ভিক্খূ ভুত্তাৰী পৰারিতা ঞাতিকুলানি গন্ত্ৰা একচ্চে ভুঞ্জিংসু একচ্চে পিণ্ডপাতং আদায অগমংসু। অথ খো সো ব্রাহ্মণো পটিৰিস্সকে 21 এতদৰোচ – ‘‘ভিক্খূ মযা অয্যা সন্তপ্পিতা। এথ, তুম্হেপি সন্তপ্পেস্সামী’’তি। তে এৰমাহংসু – ‘‘কিং ত্ৰং, অয্যো 22, অম্হে সন্তপ্পেস্সসি? যেপি তযা নিমন্তিতা তেপি অম্হাকং ঘরানি আগন্ত্ৰা একচ্চে ভুঞ্জিংসু একচ্চে পিণ্ডপাতং আদায অগমংসূ’’তি!
236. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññataro brāhmaṇo bhikkhū nimantetvā bhojesi. Bhikkhū bhuttāvī pavāritā ñātikulāni gantvā ekacce bhuñjiṃsu ekacce piṇḍapātaṃ ādāya agamaṃsu. Atha kho so brāhmaṇo paṭivissake 23 etadavoca – ‘‘bhikkhū mayā ayyā santappitā. Etha, tumhepi santappessāmī’’ti. Te evamāhaṃsu – ‘‘kiṃ tvaṃ, ayyo 24, amhe santappessasi? Yepi tayā nimantitā tepi amhākaṃ gharāni āgantvā ekacce bhuñjiṃsu ekacce piṇḍapātaṃ ādāya agamaṃsū’’ti!
অথ খো সো ব্রাহ্মণো উজ্ঝাযতি খিয্যতি ৰিপাচেতি – ‘‘কথঞ্হি নাম ভদন্তা অম্হাকং ঘরে ভুঞ্জিত্ৰা অঞ্ঞত্র ভুঞ্জিস্সন্তি! ন চাহং পটিবলো যাৰদত্থং দাতু’’ন্তি! অস্সোসুং খো ভিক্খূ তস্স ব্রাহ্মণস্স উজ্ঝাযন্তস্স খিয্যন্তস্স ৰিপাচেন্তস্স। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খূ ভুত্তাৰী পৰারিতা অঞ্ঞত্র ভুঞ্জিস্সন্তী’’তি…পে॰… সচ্চং কির, ভিক্খৰে, ভিক্খূ ভুত্তাৰী পৰারিতা অঞ্ঞত্র ভুঞ্জন্তীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তে, ভিক্খৰে, মোঘপুরিসা ভুত্তাৰী পৰারিতা অঞ্ঞত্র ভুঞ্জিস্সন্তি ! নেতং, ভিক্খৰে, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
Atha kho so brāhmaṇo ujjhāyati khiyyati vipāceti – ‘‘kathañhi nāma bhadantā amhākaṃ ghare bhuñjitvā aññatra bhuñjissanti! Na cāhaṃ paṭibalo yāvadatthaṃ dātu’’nti! Assosuṃ kho bhikkhū tassa brāhmaṇassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhū bhuttāvī pavāritā aññatra bhuñjissantī’’ti…pe… saccaṃ kira, bhikkhave, bhikkhū bhuttāvī pavāritā aññatra bhuñjantīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā bhuttāvī pavāritā aññatra bhuñjissanti ! Netaṃ, bhikkhave, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘যো পন ভিক্খু ভুত্তাৰী পৰারিতো খাদনীযং ৰা ভোজনীযং ৰা খাদেয্য ৰা ভুঞ্জেয্য ৰা, পাচিত্তিয’’ন্তি।
‘‘Yo pana bhikkhu bhuttāvī pavārito khādanīyaṃ vā bhojanīyaṃ vā khādeyya vā bhuñjeyya vā, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২৩৭. তেন খো পন সমযেন ভিক্খূ গিলানানং ভিক্খূনং পণীতে পিণ্ডপাতে নীহরন্তি। গিলানা ন চিত্তরূপং ভুঞ্জন্তি। তানি ভিক্খূ ছট্টেন্তি। অস্সোসি খো ভগৰা উচ্চাসদ্দং মহাসদ্দং কাকোরৰসদ্দং। সুত্ৰান আযস্মন্তং আনন্দং আমন্তেসি – ‘‘কিং নু খো সো, আনন্দ, উচ্চাসদ্দো মহাসদ্দো কাকোরৰসদ্দো’’তি? অথ খো আযস্মা আনন্দো ভগৰতো এতমত্থং আরোচেসি। ‘‘ভুঞ্জেয্যুং পনানন্দ, ভিক্খূ গিলানাতিরিত্ত’’ন্তি। ‘‘ন ভুঞ্জেয্যুং, ভগৰা’’তি। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি ভিক্খৰে, গিলানস্স চ অগিলানস্স চ অতিরিত্তং ভুঞ্জিতুং। এৰঞ্চ পন, ভিক্খৰে, অতিরিত্তং কাতব্বং – ‘‘অলমেতং সব্ব’’ন্তি। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
237. Tena kho pana samayena bhikkhū gilānānaṃ bhikkhūnaṃ paṇīte piṇḍapāte nīharanti. Gilānā na cittarūpaṃ bhuñjanti. Tāni bhikkhū chaṭṭenti. Assosi kho bhagavā uccāsaddaṃ mahāsaddaṃ kākoravasaddaṃ. Sutvāna āyasmantaṃ ānandaṃ āmantesi – ‘‘kiṃ nu kho so, ānanda, uccāsaddo mahāsaddo kākoravasaddo’’ti? Atha kho āyasmā ānando bhagavato etamatthaṃ ārocesi. ‘‘Bhuñjeyyuṃ panānanda, bhikkhū gilānātiritta’’nti. ‘‘Na bhuñjeyyuṃ, bhagavā’’ti. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi bhikkhave, gilānassa ca agilānassa ca atirittaṃ bhuñjituṃ. Evañca pana, bhikkhave, atirittaṃ kātabbaṃ – ‘‘alametaṃ sabba’’nti. Evañca pana, bhikkhave, imaṃ sikkhāpadaṃ uddiseyyātha –
২৩৮. ‘‘যো পন ভিক্খু ভুত্তাৰী পৰারিতো অনতিরিত্তং খাদনীযং ৰা ভোজনীযং ৰা খাদেয্য ৰা ভুঞ্জেয্য ৰা, পাচিত্তিয’’ন্তি।
238.‘‘Yopana bhikkhu bhuttāvī pavārito anatirittaṃ khādanīyaṃ vā bhojanīyaṃ vā khādeyya vā bhuñjeyya vā, pācittiya’’nti.
২৩৯. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
239.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ভুত্তাৰী নাম পঞ্চন্নং ভোজনানং অঞ্ঞতরং ভোজনং অন্তমসো কুসগ্গেনপি ভুত্তং হোতি।
Bhuttāvī nāma pañcannaṃ bhojanānaṃ aññataraṃ bhojanaṃ antamaso kusaggenapi bhuttaṃ hoti.
পৰারিতো নাম অসনং পঞ্ঞাযতি, ভোজনং পঞ্ঞাযতি, হত্থপাসে ঠিতো অভিহরতি, পটিক্খেপো পঞ্ঞাযতি।
Pavārito nāma asanaṃ paññāyati, bhojanaṃ paññāyati, hatthapāse ṭhito abhiharati, paṭikkhepo paññāyati.
অনতিরিত্তং নাম অকপ্পিযকতং হোতি, অপ্পটিগ্গহিতকতং হোতি, অনুচ্চারিতকতং হোতি , অহত্থপাসে কতং হোতি, অভুত্তাৰিনা কতং হোতি, ভুত্তাৰিনা পৰারিতেন আসনা ৰুট্ঠিতেন কতং হোতি, ‘‘অলমেতং সব্বন্তি অৰুত্তং হোতি, ন গিলানাতিরিত্তং হোতি’’ – এতং অনতিরিত্তং নাম।
Anatirittaṃ nāma akappiyakataṃ hoti, appaṭiggahitakataṃ hoti, anuccāritakataṃ hoti , ahatthapāse kataṃ hoti, abhuttāvinā kataṃ hoti, bhuttāvinā pavāritena āsanā vuṭṭhitena kataṃ hoti, ‘‘alametaṃ sabbanti avuttaṃ hoti, na gilānātirittaṃ hoti’’ – etaṃ anatirittaṃ nāma.
অতিরিত্তং নাম কপ্পিযকতং হোতি, পটিগ্গহিতকতং হোতি, উচ্চারিতকতং হোতি, হত্থপাসে কতং হোতি, ভুত্তাৰিনা কতং হোতি, ভুত্তাৰিনা পৰারিতেন আসনা অৰুট্ঠিতেন কতং হোতি, ‘‘অলমেতং সব্ব’’ন্তি ৰুত্তং হোতি, গিলানাতিরিত্তং হোতি – এতং অতিরিত্তং নাম।
Atirittaṃ nāma kappiyakataṃ hoti, paṭiggahitakataṃ hoti, uccāritakataṃ hoti, hatthapāse kataṃ hoti, bhuttāvinā kataṃ hoti, bhuttāvinā pavāritena āsanā avuṭṭhitena kataṃ hoti, ‘‘alametaṃ sabba’’nti vuttaṃ hoti, gilānātirittaṃ hoti – etaṃ atirittaṃ nāma.
খাদনীযং নাম পঞ্চ ভোজনানি – যামকালিকং সত্তাহকালিকং যাৰজীৰিকং ঠপেত্ৰা অৰসেসং খাদনীযং নাম।
Khādanīyaṃ nāma pañca bhojanāni – yāmakālikaṃ sattāhakālikaṃ yāvajīvikaṃ ṭhapetvā avasesaṃ khādanīyaṃ nāma.
ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং।
Bhojanīyaṃ nāma pañca bhojanāni – odano, kummāso, sattu, maccho, maṃsaṃ.
‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স অজ্ঝোহারে অজ্ঝোহারে আপত্তি পাচিত্তিযস্স।
‘‘Khādissāmi bhuñjissāmī’’ti paṭiggaṇhāti, āpatti dukkaṭassa ajjhohāre ajjhohāre āpatti pācittiyassa.
২৪০. অনতিরিত্তে অনতিরিত্তসঞ্ঞী খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স। অনতিরিত্তে ৰেমতিকো খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স। অনতিরিত্তে অতিরিত্তসঞ্ঞী খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স।
240. Anatiritte anatirittasaññī khādanīyaṃ vā bhojanīyaṃ vā khādati vā bhuñjati vā, āpatti pācittiyassa. Anatiritte vematiko khādanīyaṃ vā bhojanīyaṃ vā khādati vā bhuñjati vā, āpatti pācittiyassa. Anatiritte atirittasaññī khādanīyaṃ vā bhojanīyaṃ vā khādati vā bhuñjati vā, āpatti pācittiyassa.
যামকালিকং সত্তাহকালিকং যাৰজীৰিকং আহারত্থায পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্স। অতিরিত্তে অনতিরিত্তসঞ্ঞী, আপত্তি দুক্কটস্স। অতিরিত্তে ৰেমতিকো, আপত্তি দুক্কটস্স। অতিরিত্তে অতিরিত্তসঞ্ঞী, অনাপত্তি।
Yāmakālikaṃ sattāhakālikaṃ yāvajīvikaṃ āhāratthāya paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassa. Atiritte anatirittasaññī, āpatti dukkaṭassa. Atiritte vematiko, āpatti dukkaṭassa. Atiritte atirittasaññī, anāpatti.
২৪১. অনাপত্তি অতিরিত্তং কারাপেত্ৰা ভুঞ্জতি, ‘‘অতিরিত্তং কারাপেত্ৰা ভুঞ্জিস্সামী’’তি পটিগ্গণ্হাতি, অঞ্ঞস্সত্থায হরন্তো গচ্ছতি, গিলানস্স সেসকং ভুঞ্জতি, যামকালিকং সত্তাহকালিকং যাৰজীৰিকং সতি পচ্চযে পরিভুঞ্জতি, উম্মত্তকস্স, আদিকম্মিকস্সাতি।
241. Anāpatti atirittaṃ kārāpetvā bhuñjati, ‘‘atirittaṃ kārāpetvā bhuñjissāmī’’ti paṭiggaṇhāti, aññassatthāya haranto gacchati, gilānassa sesakaṃ bhuñjati, yāmakālikaṃ sattāhakālikaṃ yāvajīvikaṃ sati paccaye paribhuñjati, ummattakassa, ādikammikassāti.
পঠমপৰারণাসিক্খাপদং নিট্ঠিতং পঞ্চমং।
Paṭhamapavāraṇāsikkhāpadaṃ niṭṭhitaṃ pañcamaṃ.
৬. দুতিযপৰারণাসিক্খাপদং
6. Dutiyapavāraṇāsikkhāpadaṃ
২৪২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন দ্ৰে ভিক্খূ কোসলেসু জনপদে সাৰত্থিং অদ্ধানমগ্গপ্পটিপন্না হোন্তি। একো ভিক্খু অনাচারং আচরতি। দুতিযো ভিক্খু তং ভিক্খুং এতদৰোচ – ‘‘মাৰুসো, এৰরূপমকাসি, নেতং কপ্পতী’’তি। সো তস্মিং উপনন্ধি। অথ খো তে ভিক্খূ সাৰত্থিং অগমংসু। তেন খো পন সমযেন সাৰত্থিযং অঞ্ঞতরস্স পূগস্স সঙ্ঘভত্তং হোতি। দুতিযো ভিক্খু ভুত্তাৰী পৰারিতো হোতি। উপনদ্ধো 25 ভিক্খু ঞাতিকুলং গন্ত্ৰা পিণ্ডপাতং আদায যেন সো ভিক্খু তেনুপসঙ্কমি; উপসঙ্কমিত্ৰা তং ভিক্খুং এতদৰোচ – ‘‘ভুঞ্জাহি, আৰুসো’’তি। ‘‘অলং, আৰুসো, পরিপুণ্ণোম্হী’’তি। ‘‘সুন্দরো, আৰুসো, পিণ্ডপাতো, ভুঞ্জাহী’’তি। অথ খো সো ভিক্খু তেন ভিক্খুনা নিপ্পীল়িযমানো তং পিণ্ডপাতং ভুঞ্জি। উপনদ্ধো ভিক্খু তং ভিক্খুং এতদৰোচ – ‘‘ত্ৰম্পি 26 নাম, আৰুসো, মং ৰত্তব্বং মঞ্ঞসি যং ত্ৰং ভুত্তাৰী পৰারিতো অনতিরিত্তং ভোজনং ভুঞ্জসী’’তি। ‘‘ননু, আৰুসো, আচিক্খিতব্ব’’ন্তি। ‘‘ননু, আৰুসো, পুচ্ছিতব্ব’’ন্তি।
242. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena dve bhikkhū kosalesu janapade sāvatthiṃ addhānamaggappaṭipannā honti. Eko bhikkhu anācāraṃ ācarati. Dutiyo bhikkhu taṃ bhikkhuṃ etadavoca – ‘‘māvuso, evarūpamakāsi, netaṃ kappatī’’ti. So tasmiṃ upanandhi. Atha kho te bhikkhū sāvatthiṃ agamaṃsu. Tena kho pana samayena sāvatthiyaṃ aññatarassa pūgassa saṅghabhattaṃ hoti. Dutiyo bhikkhu bhuttāvī pavārito hoti. Upanaddho 27 bhikkhu ñātikulaṃ gantvā piṇḍapātaṃ ādāya yena so bhikkhu tenupasaṅkami; upasaṅkamitvā taṃ bhikkhuṃ etadavoca – ‘‘bhuñjāhi, āvuso’’ti. ‘‘Alaṃ, āvuso, paripuṇṇomhī’’ti. ‘‘Sundaro, āvuso, piṇḍapāto, bhuñjāhī’’ti. Atha kho so bhikkhu tena bhikkhunā nippīḷiyamāno taṃ piṇḍapātaṃ bhuñji. Upanaddho bhikkhu taṃ bhikkhuṃ etadavoca – ‘‘tvampi 28 nāma, āvuso, maṃ vattabbaṃ maññasi yaṃ tvaṃ bhuttāvī pavārito anatirittaṃ bhojanaṃ bhuñjasī’’ti. ‘‘Nanu, āvuso, ācikkhitabba’’nti. ‘‘Nanu, āvuso, pucchitabba’’nti.
অথ খো সো ভিক্খু ভিক্খূনং এতমত্থং আরোচেসি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খু ভিক্খুং ভুত্তাৰিং পৰারিতং অনতিরিত্তেন ভোজনেন অভিহট্ঠুং পৰারেস্সতী’’ তি…পে॰… সচ্চং কির ত্ৰং, ভিক্খু, ভিক্খুং ভুত্তাৰিং পৰারিতং অনতিরিত্তেন ভোজনেন অভিহট্ঠুং পৰারেসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, ভিক্খুং ভুত্তাৰিং পৰারিতং অনতিরিত্তেন ভোজনেন অভিহট্ঠুং পৰারেস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন ভিক্খৰে ইমং সিক্খাপদং উদ্দিসেয্যাথ –
Atha kho so bhikkhu bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhu bhikkhuṃ bhuttāviṃ pavāritaṃ anatirittena bhojanena abhihaṭṭhuṃ pavāressatī’’ ti…pe… saccaṃ kira tvaṃ, bhikkhu, bhikkhuṃ bhuttāviṃ pavāritaṃ anatirittena bhojanena abhihaṭṭhuṃ pavāresīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, bhikkhuṃ bhuttāviṃ pavāritaṃ anatirittena bhojanena abhihaṭṭhuṃ pavāressasi! Netaṃ, moghapurisa, appasannānaṃ vā pasādāya…pe… evañca pana bhikkhave imaṃ sikkhāpadaṃ uddiseyyātha –
২৪৩. ‘‘যো পন ভিক্খু ভিক্খুং ভুত্তাৰিং পৰারিতং অনতিরিত্তেন খাদনীযেন ৰা ভোজনীযেন ৰা অভিহট্ঠুং পৰারেয্য – ‘হন্দ, ভিক্খু, খাদ ৰা ভুঞ্জ ৰা’তি, জানং আসাদনাপেক্খো, ভুত্তস্মিং, পাচিত্তিয’’ন্তি।
243.‘‘Yo pana bhikkhu bhikkhuṃ bhuttāviṃ pavāritaṃ anatirittena khādanīyena vā bhojanīyena vā abhihaṭṭhuṃ pavāreyya – ‘handa, bhikkhu, khāda vā bhuñja vā’ti, jānaṃ āsādanāpekkho, bhuttasmiṃ, pācittiya’’nti.
২৪৪. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
244.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ভিক্খুন্তি অঞ্ঞং ভিক্খুং।
Bhikkhunti aññaṃ bhikkhuṃ.
ভুত্তাৰী নাম পঞ্চন্নং ভোজনানং অঞ্ঞতরং ভোজনং, অন্তমসো কুসগ্গেনপি ভুত্তং হোতি।
Bhuttāvī nāma pañcannaṃ bhojanānaṃ aññataraṃ bhojanaṃ, antamaso kusaggenapi bhuttaṃ hoti.
পৰারিতো নাম অসনং পঞ্ঞাযতি, ভোজনং পঞ্ঞাযতি, হত্থপাসে ঠিতো অভিহরতি, পটিক্খেপো পঞ্ঞাযতি।
Pavārito nāma asanaṃ paññāyati, bhojanaṃ paññāyati, hatthapāse ṭhito abhiharati, paṭikkhepo paññāyati.
অনতিরিত্তং নাম অকপ্পিযকতং হোতি, অপ্পটিগ্গহিতকতং হোতি, অনুচ্চারিতকতং হোতি, অহত্থপাসে কতং হোতি, অভুত্তাৰিনা কতং হোতি, ভুত্তাৰিনা পৰারিতেন আসনা ৰুট্ঠিতেন কতং হোতি, ‘‘অলমেতং সব্ব’’ন্তি অৰুত্তং হোতি, ন গিলানাতিরিত্তং হোতি – এতং অনতিরিত্তং নাম।
Anatirittaṃ nāma akappiyakataṃ hoti, appaṭiggahitakataṃ hoti, anuccāritakataṃ hoti, ahatthapāse kataṃ hoti, abhuttāvinā kataṃ hoti, bhuttāvinā pavāritena āsanā vuṭṭhitena kataṃ hoti, ‘‘alametaṃ sabba’’nti avuttaṃ hoti, na gilānātirittaṃ hoti – etaṃ anatirittaṃ nāma.
খাদনীযং নাম পঞ্চ ভোজনানি – যামকালিকং সত্তাহকালিকং যাৰজীৰিকং ঠপেত্ৰা অৰসেসং খাদনীযং নাম।
Khādanīyaṃ nāma pañca bhojanāni – yāmakālikaṃ sattāhakālikaṃ yāvajīvikaṃ ṭhapetvā avasesaṃ khādanīyaṃ nāma.
ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং।
Bhojanīyaṃ nāma pañca bhojanāni – odano, kummāso, sattu, maccho, maṃsaṃ.
অভিহট্ঠুং পৰারেয্যাতি যাৰতকং ইচ্ছসি তাৰতকং গণ্হাহীতি।
Abhihaṭṭhuṃ pavāreyyāti yāvatakaṃ icchasi tāvatakaṃ gaṇhāhīti.
জানাতি নাম সামং ৰা জানাতি, অঞ্ঞে ৰা তস্স আরোচেন্তি, সো ৰা আরোচেতি।
Jānāti nāma sāmaṃ vā jānāti, aññe vā tassa ārocenti, so vā āroceti.
আসাদনাপেক্খোতি ‘‘ইমিনা ইমং চোদেস্সামি সারেস্সামি পটিচোদেস্সামি পটিসারেস্সামি মঙ্কু করিস্সামী’’তি অভিহরতি, আপত্তি দুক্কটস্স। তস্স ৰচনেন ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্স। ভোজনপরিযোসানে আপত্তি পাচিত্তিযস্স।
Āsādanāpekkhoti ‘‘iminā imaṃ codessāmi sāressāmi paṭicodessāmi paṭisāressāmi maṅku karissāmī’’ti abhiharati, āpatti dukkaṭassa. Tassa vacanena ‘‘khādissāmi bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassa. Bhojanapariyosāne āpatti pācittiyassa.
২৪৫. পৰারিতে পৰারিতসঞ্ঞী অনতিরিত্তেন খাদনীযেন ৰা ভোজনীযেন ৰা অভিহট্ঠুং পৰারেতি, আপত্তি পাচিত্তিযস্স। পৰারিতে ৰেমতিকো অনতিরিত্তেন খাদনীযেন ৰা ভোজনীযেন ৰা অভিহট্ঠুং পৰারেতি, আপত্তি দুক্কটস্স। পৰারিতে অপ্পৰারিতসঞ্ঞী অনতিরিত্তেন খাদনীযেন ৰা ভোজনীযেন ৰা অভিহট্ঠুং পৰারেতি, অনাপত্তি। যামকালিকং সত্তাহকালিকং যাৰজীৰিকং আহারত্থায অভিহরতি, আপত্তি দুক্কটস্স। তস্স ৰচনেন ‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্স। অপ্পৰারিতে পৰারিতসঞ্ঞী , আপত্তি দুক্কটস্স। অপ্পৰারিতে ৰেমতিকো, আপত্তি দুক্কটস্স। অপ্পৰারিতে অপ্পৰারিতসঞ্ঞী, অনাপত্তি।
245. Pavārite pavāritasaññī anatirittena khādanīyena vā bhojanīyena vā abhihaṭṭhuṃ pavāreti, āpatti pācittiyassa. Pavārite vematiko anatirittena khādanīyena vā bhojanīyena vā abhihaṭṭhuṃ pavāreti, āpatti dukkaṭassa. Pavārite appavāritasaññī anatirittena khādanīyena vā bhojanīyena vā abhihaṭṭhuṃ pavāreti, anāpatti. Yāmakālikaṃ sattāhakālikaṃ yāvajīvikaṃ āhāratthāya abhiharati, āpatti dukkaṭassa. Tassa vacanena ‘‘khādissāmi bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassa. Appavārite pavāritasaññī , āpatti dukkaṭassa. Appavārite vematiko, āpatti dukkaṭassa. Appavārite appavāritasaññī, anāpatti.
২৪৬. অনাপত্তি অতিরিত্তং কারাপেত্ৰা দেতি, ‘‘অতিরিত্তং কারাপেত্ৰা ভুঞ্জাহী’’তি দেতি, অঞ্ঞস্সত্থায হরন্তো গচ্ছাহীতি দেতি, গিলানস্স সেসকং দেতি, ‘‘যামকালিকং সত্তাহকালিকং যাৰজীৰিকং সতি পচ্চযে পরিভুঞ্জা’’তি দেতি, উম্মত্তকস্স, আদিকম্মিকস্সাতি।
246. Anāpatti atirittaṃ kārāpetvā deti, ‘‘atirittaṃ kārāpetvā bhuñjāhī’’ti deti, aññassatthāya haranto gacchāhīti deti, gilānassa sesakaṃ deti, ‘‘yāmakālikaṃ sattāhakālikaṃ yāvajīvikaṃ sati paccaye paribhuñjā’’ti deti, ummattakassa, ādikammikassāti.
দুতিযপৰারণাসিক্খাপদং নিট্ঠিতং ছট্ঠং।
Dutiyapavāraṇāsikkhāpadaṃ niṭṭhitaṃ chaṭṭhaṃ.
৭. ৰিকালভোজনসিক্খাপদং
7. Vikālabhojanasikkhāpadaṃ
২৪৭. তেন সমযেন বুদ্ধো ভগৰা রাজগহে ৰিহরতি ৰেল়ুৰনে কলন্দকনিৰাপে। তেন খো পন সমযেন রাজগহে গিরগ্গসমজ্জো হোতি। সত্তরসৰগ্গিযা ভিক্খূ গিরগ্গসমজ্জং দস্সনায অগমংসু। মনুস্সা সত্তরসৰগ্গিযে ভিক্খূ পস্সিত্ৰা নহাপেত্ৰা ৰিলিম্পেত্ৰা ভোজেত্ৰা খাদনীযং অদংসু। সত্তরসৰগ্গিযা ভিক্খূ খাদনীযং আদায আরামং গন্ত্ৰা ছব্বগ্গিযে ভিক্খূ এতদৰোচুং – ‘‘গণ্হাথাৰুসো, খাদনীযং খাদথা’’তি। ‘‘কুতো তুম্হেহি, আৰুসো, খাদনীযং লদ্ধ’’ন্তি? সত্তরসৰগ্গিযা ভিক্খূ ছব্বগ্গিযানং ভিক্খূনং এতমত্থং আরোচেসুং। ‘‘কিং পন তুম্হে, আৰুসো, ৰিকালে ভোজনং ভুঞ্জথা’’তি? ‘‘এৰমাৰুসো’’তি। ছব্বগ্গিযা ভিক্খূ উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সত্তরসৰগ্গিযা ভিক্খূ ৰিকালে ভোজনং ভুঞ্জিস্সন্তী’’তি! অথ খো ছব্বগ্গিযা ভিক্খূ ভিক্খূনং এতমত্থং আরোচেসুং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সত্তরসৰগ্গিযা ভিক্খূ ৰিকালে ভোজনং ভুঞ্জিস্সন্তী’’তি…পে॰… সচ্চং কির তুম্হে, ভিক্খৰে, ৰিকালে ভোজনং ভুঞ্জথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম তুম্হে, মোঘপুরিসা, ৰিকালে ভোজনং ভুঞ্জিস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
247. Tena samayena buddho bhagavā rājagahe viharati veḷuvane kalandakanivāpe. Tena kho pana samayena rājagahe giraggasamajjo hoti. Sattarasavaggiyā bhikkhū giraggasamajjaṃ dassanāya agamaṃsu. Manussā sattarasavaggiye bhikkhū passitvā nahāpetvā vilimpetvā bhojetvā khādanīyaṃ adaṃsu. Sattarasavaggiyā bhikkhū khādanīyaṃ ādāya ārāmaṃ gantvā chabbaggiye bhikkhū etadavocuṃ – ‘‘gaṇhāthāvuso, khādanīyaṃ khādathā’’ti. ‘‘Kuto tumhehi, āvuso, khādanīyaṃ laddha’’nti? Sattarasavaggiyā bhikkhū chabbaggiyānaṃ bhikkhūnaṃ etamatthaṃ ārocesuṃ. ‘‘Kiṃ pana tumhe, āvuso, vikāle bhojanaṃ bhuñjathā’’ti? ‘‘Evamāvuso’’ti. Chabbaggiyā bhikkhū ujjhāyanti khiyyanti vipācenti – ‘‘kathañhi nāma sattarasavaggiyā bhikkhū vikāle bhojanaṃ bhuñjissantī’’ti! Atha kho chabbaggiyā bhikkhū bhikkhūnaṃ etamatthaṃ ārocesuṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma sattarasavaggiyā bhikkhū vikāle bhojanaṃ bhuñjissantī’’ti…pe… saccaṃ kira tumhe, bhikkhave, vikāle bhojanaṃ bhuñjathāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, vikāle bhojanaṃ bhuñjissatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
২৪৮. যো পন ভিক্খু ৰিকালে খাদনীযং ৰা ভোজনীযং ৰা খাদেয্য ৰা ভুঞ্জেয্য ৰা, পাচিত্তিয’’ন্তি।
248.Yopana bhikkhu vikāle khādanīyaṃvā bhojanīyaṃ vā khādeyya vā bhuñjeyya vā, pācittiya’’nti.
২৪৯. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
249.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ৰিকালো নাম মজ্ঝন্হিকে ৰীতিৰত্তে যাৰ অরুণুগ্গমনা।
Vikālo nāma majjhanhike vītivatte yāva aruṇuggamanā.
খাদনীযং নাম পঞ্চ ভোজনানি – যামকালিকং সত্তাহকালিকং যাৰজীৰিকং ঠপেত্ৰা অৰসেসং খাদনীযং নাম।
Khādanīyaṃ nāma pañca bhojanāni – yāmakālikaṃ sattāhakālikaṃ yāvajīvikaṃ ṭhapetvā avasesaṃ khādanīyaṃ nāma.
ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং।
Bhojanīyaṃ nāma pañca bhojanāni – odano, kummāso, sattu, maccho, maṃsaṃ.
‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি পাচিত্তিযস্স।
‘‘Khādissāmi bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti pācittiyassa.
২৫০. ৰিকালে ৰিকালসঞ্ঞী খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স। ৰিকালে ৰেমতিকো খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স। ৰিকালে কালসঞ্ঞী খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স।
250. Vikāle vikālasaññī khādanīyaṃ vā bhojanīyaṃ vā khādati vā bhuñjati vā, āpatti pācittiyassa. Vikāle vematiko khādanīyaṃ vā bhojanīyaṃ vā khādati vā bhuñjati vā, āpatti pācittiyassa. Vikāle kālasaññī khādanīyaṃ vā bhojanīyaṃ vā khādati vā bhuñjati vā, āpatti pācittiyassa.
যামকালিকং সত্তাহকালিকং যাৰজীৰিকং আহারত্থায পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্স। কালে ৰিকালসঞ্ঞী, আপত্তি দুক্কটস্স। কালে ৰেমতিকো, আপত্তি দুক্কটস্স। কালে কালসঞ্ঞী, অনাপত্তি।
Yāmakālikaṃ sattāhakālikaṃ yāvajīvikaṃ āhāratthāya paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassa. Kāle vikālasaññī, āpatti dukkaṭassa. Kāle vematiko, āpatti dukkaṭassa. Kāle kālasaññī, anāpatti.
২৫১. অনাপত্তি যামকালিকং সত্তাহকালিকং যাৰজীৰিকং সতি পচ্চযে পরিভুঞ্জতি, উম্মত্তকস্স, আদিকম্মিকস্সাতি।
251. Anāpatti yāmakālikaṃ sattāhakālikaṃ yāvajīvikaṃ sati paccaye paribhuñjati, ummattakassa, ādikammikassāti.
ৰিকালভোজনসিক্খাপদং নিট্ঠিতং সত্তমং।
Vikālabhojanasikkhāpadaṃ niṭṭhitaṃ sattamaṃ.
৮. সন্নিধিকারকসিক্খাপদং
8. Sannidhikārakasikkhāpadaṃ
২৫২. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন আযস্মতো আনন্দস্স উপজ্ঝাযো আযস্মা বেলট্ঠসীসো 29 অরঞ্ঞে ৰিহরতি। সো পিণ্ডায চরিত্ৰা সুক্খকুরং আরামং হরিত্ৰা সুক্খাপেত্ৰা নিক্খিপতি। যদা আহারেন অত্থো হোতি, তদা উদকেন তেমেত্ৰা তেমেত্ৰা ভুঞ্জতি, চিরেন গামং পিণ্ডায পৰিসতি। ভিক্খূ আযস্মন্তং বেলট্ঠসীসং এতদৰোচুং – ‘‘কিস্স ত্ৰং, আৰুসো, চিরেন গামং পিণ্ডায পৰিসসী’’তি? অথ খো আযস্মা বেলট্ঠসীসো ভিক্খূনং এতমত্থং আরোচেসি। ‘‘কিং পন ত্ৰং, আৰুসো, সন্নিধিকারকং ভোজনং ভুঞ্জসী’’তি? ‘‘এৰমাৰুসো’’তি। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম আযস্মা বেলট্ঠসীসো সন্নিধিকারকং ভোজনং ভুঞ্জিস্সতী’’তি…পে॰… সচ্চং কির ত্ৰং, বেলট্ঠসীস, সন্নিধিকারকং ভোজনং ভুঞ্জসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, বেলট্ঠসীস, সন্নিধিকারকং ভোজনং ভুঞ্জিস্সসি! নেতং, বেলট্ঠসীস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
252. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena āyasmato ānandassa upajjhāyo āyasmā belaṭṭhasīso 30 araññe viharati. So piṇḍāya caritvā sukkhakuraṃ ārāmaṃ haritvā sukkhāpetvā nikkhipati. Yadā āhārena attho hoti, tadā udakena temetvā temetvā bhuñjati, cirena gāmaṃ piṇḍāya pavisati. Bhikkhū āyasmantaṃ belaṭṭhasīsaṃ etadavocuṃ – ‘‘kissa tvaṃ, āvuso, cirena gāmaṃ piṇḍāya pavisasī’’ti? Atha kho āyasmā belaṭṭhasīso bhikkhūnaṃ etamatthaṃ ārocesi. ‘‘Kiṃ pana tvaṃ, āvuso, sannidhikārakaṃ bhojanaṃ bhuñjasī’’ti? ‘‘Evamāvuso’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā belaṭṭhasīso sannidhikārakaṃ bhojanaṃ bhuñjissatī’’ti…pe… saccaṃ kira tvaṃ, belaṭṭhasīsa, sannidhikārakaṃ bhojanaṃ bhuñjasīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, belaṭṭhasīsa, sannidhikārakaṃ bhojanaṃ bhuñjissasi! Netaṃ, belaṭṭhasīsa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
২৫৩. ‘‘যো পন ভিক্খু সন্নিধিকারকং খাদনীযং ৰা ভোজনীযং ৰা খাদেয্য ৰা ভুঞ্জেয্য ৰা, পাচিত্তিয’’ন্তি।
253.‘‘Yopana bhikkhu sannidhikārakaṃ khādanīyaṃ vā bhojanīyaṃ vākhādeyya vā bhuñjeyya vā, pācittiya’’nti.
২৫৪. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
254.Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
সন্নিধিকারকং নাম অজ্জ পটিগ্গহিতং অপরজ্জু খাদিতং হোতি।
Sannidhikārakaṃ nāma ajja paṭiggahitaṃ aparajju khāditaṃ hoti.
খাদনীযং নাম পঞ্চ ভোজনানি – যামকালিকং সত্তাহকালিকং যাৰজীৰিকং ঠপেত্ৰা অৰসেসং খাদনীযং নাম।
Khādanīyaṃ nāma pañca bhojanāni – yāmakālikaṃ sattāhakālikaṃ yāvajīvikaṃ ṭhapetvā avasesaṃ khādanīyaṃ nāma.
ভোজনীযং নাম পঞ্চ ভোজনানি – ওদনো, কুম্মাসো, সত্তু, মচ্ছো, মংসং।
Bhojanīyaṃ nāma pañca bhojanāni – odano, kummāso, sattu, maccho, maṃsaṃ.
‘‘খাদিস্সামি ভুঞ্জিস্সামী’’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি পাচিত্তিযস্স।
‘‘Khādissāmi bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti pācittiyassa.
২৫৫. সন্নিধিকারকে সন্নিধিকারকসঞ্ঞী খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স। সন্নিধিকারকে ৰেমতিকো খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স। সন্নিধিকারকে অসন্নিধিকারকসঞ্ঞী খাদনীযং ৰা ভোজনীযং ৰা খাদতি ৰা ভুঞ্জতি ৰা, আপত্তি পাচিত্তিযস্স।
255. Sannidhikārake sannidhikārakasaññī khādanīyaṃ vā bhojanīyaṃ vā khādati vā bhuñjati vā, āpatti pācittiyassa. Sannidhikārake vematiko khādanīyaṃ vā bhojanīyaṃ vā khādati vā bhuñjati vā, āpatti pācittiyassa. Sannidhikārake asannidhikārakasaññī khādanīyaṃ vā bhojanīyaṃ vā khādati vā bhuñjati vā, āpatti pācittiyassa.
যামকালিকং সত্তাহকালিকং যাৰজীৰিকং আহারত্থায পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি দুক্কটস্স। অসন্নিধিকারকে সন্নিধিকারকসঞ্ঞী, আপত্তি দুক্কটস্স। অসন্নিধিকারকে ৰেমতিকো, আপত্তি দুক্কটস্স। অসন্নিধিকারকে অসন্নিধিকারকসঞ্ঞী, অনাপত্তি।
Yāmakālikaṃ sattāhakālikaṃ yāvajīvikaṃ āhāratthāya paṭiggaṇhāti, āpatti dukkaṭassa. Ajjhohāre ajjhohāre āpatti dukkaṭassa. Asannidhikārake sannidhikārakasaññī, āpatti dukkaṭassa. Asannidhikārake vematiko, āpatti dukkaṭassa. Asannidhikārake asannidhikārakasaññī, anāpatti.
২৫৬. অনাপত্তি যাৰকালিকং যাৰকালে নিদহিত্ৰা ভুঞ্জতি, যামকালিকং যামে নিদহিত্ৰা ভুঞ্জতি, সত্তাহকালিকং সত্তাহং নিদহিত্ৰা ভুঞ্জতি, যাৰজীৰিকং সতি পচ্চযে পরিভুঞ্জতি, উম্মত্তকস্স, আদিকম্মিকস্সাতি।
256. Anāpatti yāvakālikaṃ yāvakāle nidahitvā bhuñjati, yāmakālikaṃ yāme nidahitvā bhuñjati, sattāhakālikaṃ sattāhaṃ nidahitvā bhuñjati, yāvajīvikaṃ sati paccaye paribhuñjati, ummattakassa, ādikammikassāti.
সন্নিধিকারকসিক্খাপদং নিট্ঠিতং অট্ঠমং।
Sannidhikārakasikkhāpadaṃ niṭṭhitaṃ aṭṭhamaṃ.
৯. পণীতভোজনসিক্খাপদং
9. Paṇītabhojanasikkhāpadaṃ
২৫৭. তেন সমযেন বুদ্ধো ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন ছব্বগ্গিযা ভিক্খূ পণীতভোজনানি অত্তনো অত্থায ৰিঞ্ঞাপেত্ৰা ভুঞ্জন্তি। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম সমণা সক্যপুত্তিযা পণীতভোজনানি অত্তনো অত্থায ৰিঞ্ঞাপেত্ৰা ভুঞ্জিস্সন্তি! কস্স সম্পন্নং ন মনাপং, কস্স সাদুং ন রুচ্চতী’’তি!! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ছব্বগ্গিযা ভিক্খূ পণীতভোজনানি অত্তনো অত্থায ৰিঞ্ঞাপেত্ৰা ভুঞ্জিস্সন্তী’’তি …পে॰… সচ্চং কির তুম্হে, ভিক্খৰে, পণীতভোজনানি অত্তনো অত্থায ৰিঞ্ঞাপেত্ৰা ভুঞ্জথাতি? ‘‘সচ্চং, ভগৰা’’তি। ৰিগরহি বুদ্ধো ভগৰা …পে॰… কথঞ্হি নাম তুম্হে, মোঘপুরিসা, পণীতভোজনানি অত্তনো অত্থায ৰিঞ্ঞাপেত্ৰা ভুঞ্জিস্সথ! নেতং, মোঘপুরিসা, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
257. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū paṇītabhojanāni attano atthāya viññāpetvā bhuñjanti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā paṇītabhojanāni attano atthāya viññāpetvā bhuñjissanti! Kassa sampannaṃ na manāpaṃ, kassa sāduṃ na ruccatī’’ti!! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū paṇītabhojanāni attano atthāya viññāpetvā bhuñjissantī’’ti …pe… saccaṃ kira tumhe, bhikkhave, paṇītabhojanāni attano atthāya viññāpetvā bhuñjathāti? ‘‘Saccaṃ, bhagavā’’ti. Vigarahi buddho bhagavā …pe… kathañhi nāma tumhe, moghapurisā, paṇītabhojanāni attano atthāya viññāpetvā bhuñjissatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘যানি খো পন তানি পণীতভোজনানি, সেয্যথিদং – সপ্পি নৰনীতং তেলং মধু ফাণিতং মচ্ছো মংসং খীরং দধি। যো পন ভিক্খু এৰরূপানি পণীতভোজনানি অত্তনো অত্থায ৰিঞ্ঞাপেত্ৰা ভুঞ্জেয্য, পাচিত্তিয’’ন্তি।
‘‘Yāni kho pana tāni paṇītabhojanāni, seyyathidaṃ – sappi navanītaṃ telaṃ madhu phāṇitaṃ maccho maṃsaṃ khīraṃ dadhi. Yo pana bhikkhu evarūpāni paṇītabhojanāni attano atthāya viññāpetvābhuñjeyya, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২৫৮. তেন খো পন সমযেন ভিক্খূ গিলানা হোন্তি। গিলানপুচ্ছকা ভিক্খূ গিলানে ভিক্খূ এতদৰোচুং – ‘‘কচ্চাৰুসো খমনীযং, কচ্চি যাপনীয’’ন্তি? ‘‘পুব্বে মযং, আৰুসো, পণীতভোজনানি অত্তনো অত্থায ৰিঞ্ঞাপেত্ৰা ভুঞ্জাম, তেন নো ফাসু হোতি; ইদানি পন ‘‘ভগৰতা পটিক্খিত্ত’’ন্তি কুক্কুচ্চাযন্তা ন ৰিঞ্ঞাপেম, তেন নো ন ফাসু হোতী’’তি। ভগৰতো এতমত্থং আরোচেসুং। অথ খো ভগৰা এতস্মিং নিদানে এতস্মিং পকরণে ধম্মিং কথং কত্ৰা ভিক্খূ আমন্তেসি – ‘‘অনুজানামি, ভিক্খৰে, গিলানেন ভিক্খুনা পণীতভোজনানি অত্তনো অত্থায ৰিঞ্ঞাপেত্ৰা ভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
258. Tena kho pana samayena bhikkhū gilānā honti. Gilānapucchakā bhikkhū gilāne bhikkhū etadavocuṃ – ‘‘kaccāvuso khamanīyaṃ, kacci yāpanīya’’nti? ‘‘Pubbe mayaṃ, āvuso, paṇītabhojanāni attano atthāya viññāpetvā bhuñjāma, tena no phāsu hoti; idāni pana ‘‘bhagavatā paṭikkhitta’’nti kukkuccāyantā na viññāpema, tena no na phāsu hotī’’ti. Bhagavato etamatthaṃ ārocesuṃ. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, gilānena bhikkhunā paṇītabhojanāni attano atthāya viññāpetvā bhuñjituṃ. Evañca pana, bhikkhave, imaṃ sikkhāpadaṃ uddiseyyātha –
২৫৯. ‘‘যানি খো পন তানি পণীতভোজনানি, সেয্যথিদং – সপ্পি নৰনীতং তেলং মধু ফাণিতং মচ্ছো মংসং খীরং দধি। যো পন ভিক্খু এৰরূপানি পণীতভোজনানি অগিলানো অত্তনো অত্থায ৰিঞ্ঞাপেত্ৰা ভুঞ্জেয্য, পাচিত্তিয’’ন্তি।
259.‘‘Yānikho pana tāni paṇītabhojanāni, seyyathidaṃ – sappi navanītaṃ telaṃ madhu phāṇitaṃ maccho maṃsaṃ khīraṃ dadhi. Yo pana bhikkhu evarūpāni paṇītabhojanāni agilāno attano atthāya viññāpetvā bhuñjeyya, pācittiya’’nti.
২৬০. যানি খো পন তানি পণীতভোজনানীতি সপ্পি নাম গোসপ্পি ৰা অজিকাসপ্পি ৰা মহিংসসপ্পি ৰা, যেসং মংসং কপ্পতি তেসং সপ্পি।
260.Yāni kho pana tāni paṇītabhojanānīti sappi nāma gosappi vā ajikāsappi vā mahiṃsasappi vā, yesaṃ maṃsaṃ kappati tesaṃ sappi.
নৰনীতং নাম তেসঞ্ঞেৰ নৰনীতং।
Navanītaṃ nāma tesaññeva navanītaṃ.
তেলং নাম তিলতেলং সাসপতেলং মধুকতেলং এরণ্ডতেলং ৰসাতেলং।
Telaṃ nāma tilatelaṃ sāsapatelaṃ madhukatelaṃ eraṇḍatelaṃ vasātelaṃ.
মধু নাম মক্খিকামধু ।
Madhu nāma makkhikāmadhu .
ফাণিতং নাম উচ্ছুম্হা নিব্বত্তং।
Phāṇitaṃ nāma ucchumhā nibbattaṃ.
মংসং নাম যেসং মংসং কপ্পতি, তেসং মংসং।
Maṃsaṃ nāma yesaṃ maṃsaṃ kappati, tesaṃ maṃsaṃ.
খীরং নাম গোখীরং ৰা অজিকাখীরং ৰা মহিংসখীরং ৰা, যেসং মংসং কপ্পতি, তেসং খীরং।
Khīraṃ nāma gokhīraṃ vā ajikākhīraṃ vā mahiṃsakhīraṃ vā, yesaṃ maṃsaṃ kappati, tesaṃ khīraṃ.
দধি নাম তেসঞ্ঞেৰ দধি।
Dadhi nāma tesaññeva dadhi.
যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
Yopanāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
এৰরূপানি পণীতভোজনানীতি তথারূপানি পণীতভোজনানি।
Evarūpāni paṇītabhojanānīti tathārūpāni paṇītabhojanāni.
অগিলানো নাম যস্স ৰিনা পণীতভোজনানি ফাসু হোতি।
Agilāno nāma yassa vinā paṇītabhojanāni phāsu hoti.
গিলানো নাম যস্স ৰিনা পণীতভোজনানি ন ফাসু হোতি।
Gilāno nāma yassa vinā paṇītabhojanāni na phāsu hoti.
অগিলানো অত্তনো অত্থায ৰিঞ্ঞাপেতি, পযোগে 33 দুক্কটং। পটিলাভেন ‘‘ভুঞ্জিস্সামী’’তি পটিগ্গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি পাচিত্তিযস্স।
Agilāno attano atthāya viññāpeti, payoge 34 dukkaṭaṃ. Paṭilābhena ‘‘bhuñjissāmī’’ti paṭiggaṇhāti, āpatti dukkaṭassa. Ajjhohāre ajjhohāre āpatti pācittiyassa.
২৬১. অগিলানো অগিলানসঞ্ঞী পণীতভোজনানি অত্তনো অত্থায ৰিঞ্ঞাপেত্ৰা ভুঞ্জতি, আপত্তি পাচিত্তিযস্স। অগিলানো ৰেমতিকো পণীতভোজনানি অত্তনো অত্থায ৰিঞ্ঞাপেত্ৰা ভুঞ্জতি, আপত্তি পাচিত্তিযস্স। অগিলানো গিলানসঞ্ঞী পণীতভোজনানি অত্তনো অত্থায ৰিঞ্ঞাপেত্ৰা ভুঞ্জতি, আপত্তি পাচিত্তিযস্স।
261. Agilāno agilānasaññī paṇītabhojanāni attano atthāya viññāpetvā bhuñjati, āpatti pācittiyassa. Agilāno vematiko paṇītabhojanāni attano atthāya viññāpetvā bhuñjati, āpatti pācittiyassa. Agilāno gilānasaññī paṇītabhojanāni attano atthāya viññāpetvā bhuñjati, āpatti pācittiyassa.
গিলানো অগিলানসঞ্ঞী, আপত্তি দুক্কটস্স। গিলানো ৰেমতিকো, আপত্তি দুক্কটস্স। গিলানো গিলানসঞ্ঞী অনাপত্তি।
Gilāno agilānasaññī, āpatti dukkaṭassa. Gilāno vematiko, āpatti dukkaṭassa. Gilāno gilānasaññī anāpatti.
২৬২. অনাপত্তি গিলানস্স, গিলানো হুত্ৰা ৰিঞ্ঞাপেত্ৰা অগিলানো ভুঞ্জতি, গিলানস্স সেসকং ভুঞ্জতি, ঞাতকানং পৰারিতানং অঞ্ঞস্সত্থায অত্তনো ধনেন, উম্মত্তকস্স, আদিকম্মিকস্সাতি।
262. Anāpatti gilānassa, gilāno hutvā viññāpetvā agilāno bhuñjati, gilānassa sesakaṃ bhuñjati, ñātakānaṃ pavāritānaṃ aññassatthāya attano dhanena, ummattakassa, ādikammikassāti.
পণীতভোজনসিক্খাপদং নিট্ঠিতং নৰমং।
Paṇītabhojanasikkhāpadaṃ niṭṭhitaṃ navamaṃ.
১০. দন্তপোনসিক্খাপদং
10. Dantaponasikkhāpadaṃ
২৬৩. তেন সমযেন বুদ্ধো ভগৰা ৰেসালিযং ৰিহরতি মহাৰনে কূটাগারসালাযং। তেন খো পন সমযেন অঞ্ঞতরো ভিক্খু সব্বপংসুকূলিকো সুসানে ৰিহরতি। সো মনুস্সেহি দিয্যমানং ন ইচ্ছতি পটিগ্গহেতুং, সুসানেপি রুক্খমূলেপি উম্মারেপি অয্যৰোসাটিতকানি সামং গহেত্ৰা পরিভুঞ্জতি 35। মনুস্সা উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম অযং ভিক্খু অম্হাকং অয্যৰোসাটিতকানি সামং গহেত্ৰা পরিভুঞ্জিস্সতি! থেরোযং ভিক্খু ৰঠরো মনুস্সমংসং মঞ্ঞে খাদতী’’তি! অস্সোসুং খো ভিক্খূ তেসং মনুস্সানং উজ্ঝাযন্তানং খিয্যন্তানং ৰিপাচেন্তানং। যে তে ভিক্খূ অপ্পিচ্ছা…পে॰… তে উজ্ঝাযন্তি খিয্যন্তি ৰিপাচেন্তি – ‘‘কথঞ্হি নাম ভিক্খু অদিন্নং মুখদ্ৰারং আহারং আহরিস্সতী’’তি…পে॰… সচ্চং কির ত্ৰং, ভিক্খু, অদিন্নং মুখদ্ৰারং আহারং আহরসীতি? ‘‘সচ্চং, ভগৰা’’তি। ৰিগরহি বুদ্ধো ভগৰা…পে॰… কথঞ্হি নাম ত্ৰং, মোঘপুরিস, অদিন্নং মুখদ্ৰারং আহারং আহরিস্সসি! নেতং, মোঘপুরিস, অপ্পসন্নানং ৰা পসাদায…পে॰… এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
263. Tena samayena buddho bhagavā vesāliyaṃ viharati mahāvane kūṭāgārasālāyaṃ. Tena kho pana samayena aññataro bhikkhu sabbapaṃsukūliko susāne viharati. So manussehi diyyamānaṃ na icchati paṭiggahetuṃ, susānepi rukkhamūlepi ummārepi ayyavosāṭitakāni sāmaṃ gahetvā paribhuñjati 36. Manussā ujjhāyanti khiyyanti vipācenti – ‘‘kathañhi nāma ayaṃ bhikkhu amhākaṃ ayyavosāṭitakāni sāmaṃ gahetvā paribhuñjissati! Theroyaṃ bhikkhu vaṭharo manussamaṃsaṃ maññe khādatī’’ti! Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhu adinnaṃ mukhadvāraṃ āhāraṃ āharissatī’’ti…pe… saccaṃ kira tvaṃ, bhikkhu, adinnaṃ mukhadvāraṃ āhāraṃ āharasīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, adinnaṃ mukhadvāraṃ āhāraṃ āharissasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘যো পন ভিক্খু অদিন্নং মুখদ্ৰারং আহারং আহরেয্য, পাচিত্তিয’’ন্তি।
‘‘Yopana bhikkhu adinnaṃ mukhadvāraṃ āhāraṃ āhareyya, pācittiya’’nti.
এৰঞ্চিদং ভগৰতা ভিক্খূনং সিক্খাপদং পঞ্ঞত্তং হোতি।
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
২৬৪. তেন খো পন সমযেন ভিক্খূ উদকদন্তপোনে 37 কুক্কুচ্চাযন্তি । ভগৰতো এতমত্থং আরোচেসুং…পে॰… ‘‘অনুজানামি, ভিক্খৰে, উদকদন্তপোনং সামং গহেত্ৰা পরিভুঞ্জিতুং। এৰঞ্চ পন, ভিক্খৰে, ইমং সিক্খাপদং উদ্দিসেয্যাথ –
264. Tena kho pana samayena bhikkhū udakadantapone 38 kukkuccāyanti . Bhagavato etamatthaṃ ārocesuṃ…pe… ‘‘anujānāmi, bhikkhave, udakadantaponaṃ sāmaṃ gahetvā paribhuñjituṃ. Evañca pana, bhikkhave, imaṃ sikkhāpadaṃ uddiseyyātha –
২৬৫. ‘‘যো পন ভিক্খু অদিন্নং মুখদ্ৰারং আহারং আহরেয্য, অঞ্ঞত্র উদকদন্তপোনা, পাচিত্তিয’’ন্তি।
265.‘‘Yo pana bhikkhu adinnaṃ mukhadvāraṃ āhāraṃ āhareyya, aññatra udakadantaponā, pācittiya’’nti.
২৬৬. যো পনাতি যো যাদিসো…পে॰… ভিক্খূতি…পে॰… অযং ইমস্মিং অত্থে অধিপ্পেতো ভিক্খূতি।
266.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
অদিন্নং নাম অপ্পটিগ্গহিতকং ৰুচ্চতি।
Adinnaṃ nāma appaṭiggahitakaṃ vuccati.
দিন্নং নাম কাযেন ৰা কাযপটিবদ্ধেন ৰা নিস্সগ্গিযেন ৰা দেন্তে হত্থপাসে ঠিতো কাযেন ৰা কাযপটিবদ্ধেন ৰা পটিগ্গণ্হাতি, এতং দিন্নং নাম।
Dinnaṃ nāma kāyena vā kāyapaṭibaddhena vā nissaggiyena vā dente hatthapāse ṭhito kāyena vā kāyapaṭibaddhena vā paṭiggaṇhāti, etaṃ dinnaṃ nāma.
আহারো নাম উদকদন্তপোনং ঠপেত্ৰা যংকিঞ্চি অজ্ঝোহরণীযং, এসো আহারো নাম।
Āhāro nāma udakadantaponaṃ ṭhapetvā yaṃkiñci ajjhoharaṇīyaṃ, eso āhāro nāma.
অঞ্ঞত্র উদকদন্তপোনাতি ঠপেত্ৰা উদকদন্তপোনং।
Aññatra udakadantaponāti ṭhapetvā udakadantaponaṃ.
‘‘খাদিস্সামি ভুঞ্জিস্সামী’’তি গণ্হাতি, আপত্তি দুক্কটস্স। অজ্ঝোহারে অজ্ঝোহারে আপত্তি পাচিত্তিযস্স।
‘‘Khādissāmi bhuñjissāmī’’ti gaṇhāti, āpatti dukkaṭassa. Ajjhohāre ajjhohāre āpatti pācittiyassa.
২৬৭. অপ্পটিগ্গহিতকে অপ্পটিগ্গহিতকসঞ্ঞী অদিন্নং মুখদ্ৰারং আহারং আহারেতি, অঞ্ঞত্র উদকদন্তপোনা, আপত্তি পাচিত্তিযস্স। অপ্পটিগ্গহিতকে ৰেমতিকো অদিন্নং মুখদ্ৰারং আহারং আহারেতি, অঞ্ঞত্র উদকদন্তপোনা, আপত্তি পাচিত্তিযস্স। অপ্পটিগ্গহিতকে পটিগ্গহিতকসঞ্ঞী অদিন্নং মুখদ্ৰারং আহারং আহারেতি, অঞ্ঞত্র উদকদন্তপোনা, আপত্তি পাচিত্তিযস্স।
267. Appaṭiggahitake appaṭiggahitakasaññī adinnaṃ mukhadvāraṃ āhāraṃ āhāreti, aññatra udakadantaponā, āpatti pācittiyassa. Appaṭiggahitake vematiko adinnaṃ mukhadvāraṃ āhāraṃ āhāreti, aññatra udakadantaponā, āpatti pācittiyassa. Appaṭiggahitake paṭiggahitakasaññī adinnaṃ mukhadvāraṃ āhāraṃ āhāreti, aññatra udakadantaponā, āpatti pācittiyassa.
পটিগ্গহিতকে অপ্পটিগ্গহিতকসঞ্ঞী, আপত্তি দুক্কটস্স। পটিগ্গহিতকে ৰেমতিকো, আপত্তি দুক্কটস্স। পটিগ্গহিতকে পটিগ্গহিতকসঞ্ঞী, অনাপত্তি।
Paṭiggahitake appaṭiggahitakasaññī, āpatti dukkaṭassa. Paṭiggahitake vematiko, āpatti dukkaṭassa. Paṭiggahitake paṭiggahitakasaññī, anāpatti.
২৬৮. অনাপত্তি উদকদন্তপোনে, চত্তারি মহাৰিকতানি সতি পচ্চযে অসতি কপ্পিযকারকে সামং গহেত্ৰা পরিভুঞ্জতি, উম্মত্তকস্স, আদিকম্মিকস্সাতি।
268. Anāpatti udakadantapone, cattāri mahāvikatāni sati paccaye asati kappiyakārake sāmaṃ gahetvā paribhuñjati, ummattakassa, ādikammikassāti.
দন্তপোনসিক্খাপদং নিট্ঠিতং দসমং।
Dantaponasikkhāpadaṃ niṭṭhitaṃ dasamaṃ.
ভোজনৰগ্গো চতুত্থো।
Bhojanavaggo catuttho.
তস্সুদ্দানং –
Tassuddānaṃ –
পিণ্ডো গণং পরং পূৰং, দ্ৰে চ ৰুত্তা পৰারণা।
Piṇḍo gaṇaṃ paraṃ pūvaṃ, dve ca vuttā pavāraṇā;
ৰিকালে সন্নিধী খীরং, দন্তপোনেন তে দসাতি॥
Vikāle sannidhī khīraṃ, dantaponena te dasāti.
Footnotes:
Related texts:
অট্ঠকথা • Aṭṭhakathā / ৰিনযপিটক (অট্ঠকথা) • Vinayapiṭaka (aṭṭhakathā) / মহাৰিভঙ্গ-অট্ঠকথা • Mahāvibhaṅga-aṭṭhakathā
১. আৰসথপিণ্ডসিক্খাপদৰণ্ণনা • 1. Āvasathapiṇḍasikkhāpadavaṇṇanā
২. গণভোজনসিক্খাপদৰণ্ণনা • 2. Gaṇabhojanasikkhāpadavaṇṇanā
৩. পরম্পরভোজনসিক্খাপদৰণ্ণনা • 3. Paramparabhojanasikkhāpadavaṇṇanā
৪. কাণমাতাসিক্খাপদৰণ্ণনা • 4. Kāṇamātāsikkhāpadavaṇṇanā
৫. পঠমপৰারণসিক্খাপদৰণ্ণনা • 5. Paṭhamapavāraṇasikkhāpadavaṇṇanā
৬. দুতিযপৰারণসিক্খাপদৰণ্ণনা • 6. Dutiyapavāraṇasikkhāpadavaṇṇanā
৭. ৰিকালভোজনসিক্খাপদৰণ্ণনা • 7. Vikālabhojanasikkhāpadavaṇṇanā
৮. সন্নিধিকারকসিক্খাপদৰণ্ণনা • 8. Sannidhikārakasikkhāpadavaṇṇanā
৯. পণীতভোজনসিক্খাপদৰণ্ণনা • 9. Paṇītabhojanasikkhāpadavaṇṇanā
১০. দন্তপোনসিক্খাপদৰণ্ণনা • 10. Dantaponasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / সারত্থদীপনী-টীকা • Sāratthadīpanī-ṭīkā
১. আৰসথপিণ্ডসিক্খাপদৰণ্ণনা • 1. Āvasathapiṇḍasikkhāpadavaṇṇanā
২. গণভোজনসিক্খাপদৰণ্ণনা • 2. Gaṇabhojanasikkhāpadavaṇṇanā
৩. পরম্পরভোজনসিক্খাপদৰণ্ণনা • 3. Paramparabhojanasikkhāpadavaṇṇanā
৪. কাণমাতাসিক্খাপদৰণ্ণনা • 4. Kāṇamātāsikkhāpadavaṇṇanā
৫. পঠমপৰারণাসিক্খাপদৰণ্ণনা • 5. Paṭhamapavāraṇāsikkhāpadavaṇṇanā
৬. দুতিযপৰারণাসিক্খাপদৰণ্ণনা • 6. Dutiyapavāraṇāsikkhāpadavaṇṇanā
৭. ৰিকালভোজনসিক্খাপদৰণ্ণনা • 7. Vikālabhojanasikkhāpadavaṇṇanā
৮. সন্নিধিকারকসিক্খাপদৰণ্ণনা • 8. Sannidhikārakasikkhāpadavaṇṇanā
৯. পণীতভোজনসিক্খাপদৰণ্ণনা • 9. Paṇītabhojanasikkhāpadavaṇṇanā
১০. দন্তপোনসিক্খাপদৰণ্ণনা • 10. Dantaponasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰজিরবুদ্ধি-টীকা • Vajirabuddhi-ṭīkā
১. আৰসথপিণ্ডসিক্খাপদৰণ্ণনা • 1. Āvasathapiṇḍasikkhāpadavaṇṇanā
২. গণভোজনসিক্খাপদৰণ্ণনা • 2. Gaṇabhojanasikkhāpadavaṇṇanā
৩. পরম্পরভোজনসিক্খাপদৰণ্ণনা • 3. Paramparabhojanasikkhāpadavaṇṇanā
৪. কাণমাতাসিক্খাপদৰণ্ণনা • 4. Kāṇamātāsikkhāpadavaṇṇanā
৫. পঠমপৰারণসিক্খাপদৰণ্ণনা • 5. Paṭhamapavāraṇasikkhāpadavaṇṇanā
৬. দুতিযপৰারণসিক্খাপদৰণ্ণনা • 6. Dutiyapavāraṇasikkhāpadavaṇṇanā
৭. ৰিকালভোজনসিক্খাপদৰণ্ণনা • 7. Vikālabhojanasikkhāpadavaṇṇanā
৮. সন্নিধিকারকসিক্খাপদৰণ্ণনা • 8. Sannidhikārakasikkhāpadavaṇṇanā
৯. পণীতভোজনসিক্খাপদৰণ্ণনা • 9. Paṇītabhojanasikkhāpadavaṇṇanā
১০. দন্তপোনসিক্খাপদৰণ্ণনা • 10. Dantaponasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / ৰিমতিৰিনোদনী-টীকা • Vimativinodanī-ṭīkā
১. আৰসথপিণ্ডসিক্খাপদৰণ্ণনা • 1. Āvasathapiṇḍasikkhāpadavaṇṇanā
২. গণভোজনসিক্খাপদৰণ্ণনা • 2. Gaṇabhojanasikkhāpadavaṇṇanā
৩. পরম্পরভোজনসিক্খাপদৰণ্ণনা • 3. Paramparabhojanasikkhāpadavaṇṇanā
৪. কাণমাতাসিক্খাপদৰণ্ণনা • 4. Kāṇamātāsikkhāpadavaṇṇanā
৫. পঠমপৰারণাসিক্খাপদৰণ্ণনা • 5. Paṭhamapavāraṇāsikkhāpadavaṇṇanā
৬. দুতিযপৰারণাসিক্খাপদৰণ্ণনা • 6. Dutiyapavāraṇāsikkhāpadavaṇṇanā
৭. ৰিকালভোজনসিক্খাপদৰণ্ণনা • 7. Vikālabhojanasikkhāpadavaṇṇanā
৮. সন্নিধিকারকসিক্খাপদৰণ্ণনা • 8. Sannidhikārakasikkhāpadavaṇṇanā
৯. পণীতভোজনসিক্খাপদৰণ্ণনা • 9. Paṇītabhojanasikkhāpadavaṇṇanā
১০. দন্তপোনসিক্খাপদৰণ্ণনা • 10. Dantaponasikkhāpadavaṇṇanā
টীকা • Tīkā / ৰিনযপিটক (টীকা) • Vinayapiṭaka (ṭīkā) / পাচিত্যাদিযোজনাপাল়ি • Pācityādiyojanāpāḷi
১. আৰসথপিণ্ডসিক্খাপদ-অত্থযোজনা • 1. Āvasathapiṇḍasikkhāpada-atthayojanā
২. গণভোজনসিক্খাপদং • 2. Gaṇabhojanasikkhāpadaṃ
৩. পরম্পরভোজনসিক্খাপদং • 3. Paramparabhojanasikkhāpadaṃ
৪. কাণমাতাসিক্খাপদং • 4. Kāṇamātāsikkhāpadaṃ
৫. পঠমপৰারণসিক্খাপদং • 5. Paṭhamapavāraṇasikkhāpadaṃ
৬. দুতিযপৰারণসিক্খাপদং • 6. Dutiyapavāraṇasikkhāpadaṃ
৭. ৰিকালভোজনসিক্খাপদং • 7. Vikālabhojanasikkhāpadaṃ
৮. সন্নিধিকারকসিক্খাপদং • 8. Sannidhikārakasikkhāpadaṃ
৯. পণীতভোজনসিক্খাপদং • 9. Paṇītabhojanasikkhāpadaṃ
১০. দন্তপোনসিক্খাপদং • 10. Dantaponasikkhāpadaṃ
