| Library / Tipiṭaka / திபிடக • Tipiṭaka / விமதிவினோத³னீ-டீகா • Vimativinodanī-ṭīkā |
பூ⁴மட்ட²கதா²வண்ணனா
Bhūmaṭṭhakathāvaṇṇanā
94. வாசாய வாசாயாதி ஏகேகத்த²தீ³பிகாய வாசாய வாசாய. உபலத்³தோ⁴தி ஞாதோ. பாளியங் ஸேஸஅட்ட²கதா²ஸு ச குதா³லங் வா பிடகங் வாதி இத³மேவ த்³வயங் வத்வா வாஸிப²ரஸூனங் அவுத்தத்தா தேஸம்பி ஸங்கே²பட்ட²கதா²தீ³ஸு ஆக³தபா⁴வங் த³ஸ்ஸேதுங் ஸங்கே²பட்ட²கதா²யந்திஆதி³ வுத்தங். தெ²ய்யசித்தேன கதத்தா ‘‘து³க்கடேஹி ஸத்³தி⁴ங் பாசித்தியானீ’’தி வுத்தங்.
94.Vācāyavācāyāti ekekatthadīpikāya vācāya vācāya. Upaladdhoti ñāto. Pāḷiyaṃ sesaaṭṭhakathāsu ca kudālaṃ vā piṭakaṃ vāti idameva dvayaṃ vatvā vāsipharasūnaṃ avuttattā tesampi saṅkhepaṭṭhakathādīsu āgatabhāvaṃ dassetuṃ saṅkhepaṭṭhakathāyantiādi vuttaṃ. Theyyacittena katattā ‘‘dukkaṭehi saddhiṃ pācittiyānī’’ti vuttaṃ.
அட்ட²வித⁴ங் ஹேதந்திஆதீ³ஸு ஏதங் து³க்கடங் நாம தே²ரேஹி த⁴ம்மஸங்கா³ஹகேஹி இமஸ்மிங் டா²னே ஸமோதா⁴னெத்வா அட்ட²வித⁴ந்தி த³ஸ்ஸிதந்தி யோஜனா. ஸப்³பே³ஸம்பி து³க்கடானங் இமேஸுயேவ அட்ட²ஸு ஸங்க³ஹேதப்³ப³பா⁴வதோ பன இதரேஹி ஸத்தஹி து³க்கடேஹி வினிமுத்தங் வினயது³க்கடேயேவ ஸங்க³ஹேதப்³ப³ங். த³ஸவித⁴ங் ரதனந்தி ‘‘முத்தா மணி வேளுரியோ ஸங்கோ² ஸிலா பவாளங் ரஜதங் ஜாதரூபங் லோஹிதகோ மஸாரக³ல்ல’’ந்தி ஏவமாக³தங் த³ஸவித⁴ங் ரதனங்.
Aṭṭhavidhaṃ hetantiādīsu etaṃ dukkaṭaṃ nāma therehi dhammasaṅgāhakehi imasmiṃ ṭhāne samodhānetvā aṭṭhavidhanti dassitanti yojanā. Sabbesampi dukkaṭānaṃ imesuyeva aṭṭhasu saṅgahetabbabhāvato pana itarehi sattahi dukkaṭehi vinimuttaṃ vinayadukkaṭeyeva saṅgahetabbaṃ. Dasavidhaṃ ratananti ‘‘muttā maṇi veḷuriyo saṅkho silā pavāḷaṃ rajataṃ jātarūpaṃ lohitako masāragalla’’nti evamāgataṃ dasavidhaṃ ratanaṃ.
‘‘முத்தா மணி வேளுரியோ ச ஸங்கோ²,
‘‘Muttā maṇi veḷuriyo ca saṅkho,
ஸிலா பவாளங் ரஜதஞ்ச ஹேமங்;
Silā pavāḷaṃ rajatañca hemaṃ;
லோஹிதகஞ்ச மஸாரக³ல்லங்,
Lohitakañca masāragallaṃ,
த³ஸேதே தீ⁴ரோ ரதனானி ஜஞ்ஞா’’தி. –
Dasete dhīro ratanāni jaññā’’ti. –
ஹி வுத்தங். ஸத்தவித⁴ங் த⁴ஞ்ஞந்தி ஸாலி வீஹி யவோ கங்கு³ குத்³ரூஸங் வரகோ கோ³து⁴மோதி இமங் ஸத்தவித⁴ங் த⁴ஞ்ஞங். ஆவுத⁴ப⁴ண்டா³தி³ந்தி ஆதி³-ஸத்³தே³ன துரியப⁴ண்ட³இத்தி²ரூபாதி³ங் ஸங்க³ண்ஹாதி. அனாமஸிதப்³பே³ வத்து²ம்ஹி து³க்கடங் அனாமாஸது³க்கடங். து³ரூபசிண்ணது³க்கடந்தி ‘‘அகத்தப்³ப³’’ந்தி வாரிதஸ்ஸ கதத்தா து³ட்டு² உபசிண்ணங் சரிதந்தி து³ரூபசிண்ணங், தஸ்மிங் து³க்கடங் து³ரூபசிண்ணது³க்கடங். வினயே பஞ்ஞத்தங் அவஸேஸங் து³க்கடங் வினயது³க்கடங். ஏகாத³ஸ ஸமனுபா⁴ஸனா நாம பி⁴க்கு²பாதிமொக்கே² சத்தாரோ யாவததியகா ஸங்கா⁴தி³ஸேஸா அரிட்ட²ஸிக்கா²பத³ந்தி பஞ்ச, பி⁴க்கு²னீபாதிமொக்கே² ஏகங் யாவததியகபாராஜிகங் சத்தாரோ ஸங்கா⁴தி³ஸேஸா சண்ட³காளீஸிக்கா²பத³ந்தி ச².
Hi vuttaṃ. Sattavidhaṃ dhaññanti sāli vīhi yavo kaṅgu kudrūsaṃ varako godhumoti imaṃ sattavidhaṃ dhaññaṃ. Āvudhabhaṇḍādinti ādi-saddena turiyabhaṇḍaitthirūpādiṃ saṅgaṇhāti. Anāmasitabbe vatthumhi dukkaṭaṃ anāmāsadukkaṭaṃ. Durūpaciṇṇadukkaṭanti ‘‘akattabba’’nti vāritassa katattā duṭṭhu upaciṇṇaṃ caritanti durūpaciṇṇaṃ, tasmiṃ dukkaṭaṃ durūpaciṇṇadukkaṭaṃ. Vinaye paññattaṃ avasesaṃ dukkaṭaṃ vinayadukkaṭaṃ. Ekādasa samanubhāsanā nāma bhikkhupātimokkhe cattāro yāvatatiyakā saṅghādisesā ariṭṭhasikkhāpadanti pañca, bhikkhunīpātimokkhe ekaṃ yāvatatiyakapārājikaṃ cattāro saṅghādisesā caṇḍakāḷīsikkhāpadanti cha.
ஸஹபயோக³தோ பட்டா²ய செத்த² புரிமபுரிமா ஆபத்தியோ படிப்பஸ்ஸம்ப⁴ந்தீதி ஆஹ அத² து⁴ரனிக்கே²பங் அகத்வாதிஆதி³. ‘‘து⁴ரனிக்கே²பங் அகத்வா’’தி வுத்தத்தா து⁴ரனிக்கே²பங் கத்வா புன க²ணந்தஸ்ஸ புரிமாபத்தியோ ந படிப்பஸ்ஸம்ப⁴ந்தீதி வத³ந்தி. ‘‘சே²த³னபச்சயா து³க்கடங் தே³ஸெத்வா முச்சதீ’’தி வத்வா புப்³ப³பயோகே³ ஆபத்தீனங் தே³ஸேதப்³ப³தாய அவுத்தத்தா ஸஹபயோகே³ பத்தே புப்³ப³பயோகே³ ஆபத்தியோ படிப்பஸ்ஸம்ப⁴ந்தீதி வேதி³தப்³ப³ங்.
Sahapayogato paṭṭhāya cettha purimapurimā āpattiyo paṭippassambhantīti āha atha dhuranikkhepaṃ akatvātiādi. ‘‘Dhuranikkhepaṃ akatvā’’ti vuttattā dhuranikkhepaṃ katvā puna khaṇantassa purimāpattiyo na paṭippassambhantīti vadanti. ‘‘Chedanapaccayā dukkaṭaṃ desetvā muccatī’’ti vatvā pubbapayoge āpattīnaṃ desetabbatāya avuttattā sahapayoge patte pubbapayoge āpattiyo paṭippassambhantīti veditabbaṃ.
அபரத்³த⁴ங் விரத்³த⁴ங் க²லிதந்தி ஸப்³ப³மேதங் யஞ்ச து³க்கடந்தி எத்த² வுத்தஸ்ஸ து³க்கடஸ்ஸ பரியாயவசனங், யங் மனுஸ்ஸோ கரேதிஆதி³ பனெத்த² ஓபம்மனித³ஸ்ஸனங். ஸங்யோக³பா⁴வோதி த்³வித்தங் ஸந்தா⁴ய வுத்தங், தேன ரஸ்ஸத்தஸ்ஸாபி நிமித்தங் த³ஸ்ஸிதந்தி வேதி³தப்³ப³ங். ஏகஸ்ஸ மூலேதி ஏகஸ்ஸ ஸந்திகே. ஸப்³ப³த்தா²பி ஆமஸனே து³க்கடங், ப²ந்தா³பனே து²ல்லச்சயஞ்ச விஸுங் விஸுங் ஆமஸனப²ந்தா³பனபயோக³ங் கரொந்தஸ்ஸேவ ஹோதி, ஏகபயோகே³ன க³ண்ஹந்தஸ்ஸ பன உத்³தா⁴ரே பாராஜிகமேவ, ந து³க்கடது²ல்லச்சயானீதி வத³ந்தி, ஏகபயோகே³ன க³ண்ஹந்தஸ்ஸாபி ஆமஸனப²ந்தா³பனானம்பி லப்³ப⁴மானத்தா தங் ந க³ஹேதப்³ப³ங். ந ஹி ஸக்கா அனாமஸித்வா அப²ந்தா³பெத்வா ச கிஞ்சி க³ஹேதுங். ‘‘ஏகமேவ தே³ஸெத்வா முச்சதீ’’தி பங்ஸுக²ணனாதி³ஸமானபயோகே³பி புரிமா ஆபத்தி உத்தரமுத்தரங் ஆபத்திங் பத்வா படிப்பஸ்ஸம்ப⁴ந்தீதி ஸஞ்ஞாய குருந்த³ட்ட²கதா²யங் வுத்தங், இதரட்ட²கதா²ஸு பன க²ணனபயோக³பே⁴தே³ஹி பயோகே³ பயோகே³ ஆபன்னா ஆபத்தியோ உத்தரமுத்தரங் பத்வா ந படிப்பஸ்ஸம்ப⁴ந்தி அஞ்ஞமஞ்ஞங் ஸதி³ஸத்தா வியூஹனங் பத்வா தா ஸப்³பா³பி படிப்பஸ்ஸம்ப⁴ந்தி விஸதி³ஸபயோக³த்தாதி இமினா அதி⁴ப்பாயேன படிப்பஸ்ஸத்³தி⁴விதா⁴னங் வுத்தந்தி வேதி³தப்³ப³ங். இமினா ஹி அவஹாரகஸ்ஸ ஆஸன்னங் ஓரிமந்தங் பராமஸதி.
Aparaddhaṃ viraddhaṃ khalitanti sabbametaṃ yañca dukkaṭanti ettha vuttassa dukkaṭassa pariyāyavacanaṃ, yaṃ manusso karetiādi panettha opammanidassanaṃ. Saṃyogabhāvoti dvittaṃ sandhāya vuttaṃ, tena rassattassāpi nimittaṃ dassitanti veditabbaṃ. Ekassa mūleti ekassa santike. Sabbatthāpi āmasane dukkaṭaṃ, phandāpane thullaccayañca visuṃ visuṃ āmasanaphandāpanapayogaṃ karontasseva hoti, ekapayogena gaṇhantassa pana uddhāre pārājikameva, na dukkaṭathullaccayānīti vadanti, ekapayogena gaṇhantassāpi āmasanaphandāpanānampi labbhamānattā taṃ na gahetabbaṃ. Na hi sakkā anāmasitvā aphandāpetvā ca kiñci gahetuṃ. ‘‘Ekameva desetvā muccatī’’ti paṃsukhaṇanādisamānapayogepi purimā āpatti uttaramuttaraṃ āpattiṃ patvā paṭippassambhantīti saññāya kurundaṭṭhakathāyaṃ vuttaṃ, itaraṭṭhakathāsu pana khaṇanapayogabhedehi payoge payoge āpannā āpattiyo uttaramuttaraṃ patvā na paṭippassambhanti aññamaññaṃ sadisattā viyūhanaṃ patvā tā sabbāpi paṭippassambhanti visadisapayogattāti iminā adhippāyena paṭippassaddhividhānaṃ vuttanti veditabbaṃ. Iminā hi avahārakassa āsannaṃ orimantaṃ parāmasati.
தத்தே²வாதி முக²வட்டியமேவ. பு³ந்தே³னாதி கும்பி⁴யா ஹெட்டி²மதலேன. ஏகட்டா²னே டி²தாய கும்பி⁴யா டா²னா சாவனங் ச²ஹி ஆகாரேஹி வேதி³தப்³ப³ந்தி ஸம்ப³ந்தோ⁴. ஏகட்டா²னேதி ச ஸங்க²லிகப³த்³த⁴பா⁴வேன ஏகஸ்மிங் பதிட்டி²தோகாஸட்டா²னேதி அத்தோ². கா²ணுகங் கேஸக்³க³மத்தம்பி டா²னா சாவேதீதி கா²ணுகங் அத்தனோ பதிட்டி²தட்டா²னதோ பஞ்சஹி ஆகாரேஹி டா²னா சாவேதி. சி²ன்னமத்தே பாராஜிகந்தி அவஸ்ஸங் சே பததி, சி²ன்னமத்தே பாராஜிகங். பரிச்சே²தோ³தி பஞ்சமாஸகாதி³க³ருபா⁴வபரிச்சே²தோ³. அபப்³யூஹந்தோதி டி²தட்டா²னதோ அபனயனவஸேன வியூஹந்தோ ராஸிங் கரொந்தோ. ஏவங் கத்வாதி பா⁴ஜனமுக²வட்டியா கும்பி⁴க³தேன பா⁴ஜனக³தஸ்ஸ ஏகாப³த்³த⁴பா⁴வங் வியோஜெத்வாதி அத்தோ². உபட்³ட⁴கும்பீ⁴யந்தி உபட்³ட⁴புண்ணாய கும்பி⁴யா. வினயத⁴ம்மதாதி அதி⁴ககாரணாலாபே⁴ வினயவினிச்ச²யத⁴ம்மதாதி அதி⁴ப்பாயோ. ந கேவலஞ்செத்த² க³ருகதாவ, ஸுத்தானுக³மனம்பி அத்தீ²தி த³ஸ்ஸெந்தோ அபிசாதிஆதி³மாஹ. கண்டே²ன பன பரிச்சி²ன்னகாலேதி முக²க³தங் அஜ்ஜோ²ஹடகாலேதி அத்தோ². அஜ்ஜோ²ஹரணமேவ ஹெத்த² பரிச்சி²ந்த³னங், ந கண்ட²பித³ஹனங். சிக்கனந்தி த²த்³த⁴ங், ப³ஹலங் க⁴னந்தி அத்தோ².
Tatthevāti mukhavaṭṭiyameva. Bundenāti kumbhiyā heṭṭhimatalena. Ekaṭṭhāne ṭhitāya kumbhiyā ṭhānā cāvanaṃ chahi ākārehi veditabbanti sambandho. Ekaṭṭhāneti ca saṅkhalikabaddhabhāvena ekasmiṃ patiṭṭhitokāsaṭṭhāneti attho. Khāṇukaṃ kesaggamattampi ṭhānā cāvetīti khāṇukaṃ attano patiṭṭhitaṭṭhānato pañcahi ākārehi ṭhānā cāveti. Chinnamatte pārājikanti avassaṃ ce patati, chinnamatte pārājikaṃ. Paricchedoti pañcamāsakādigarubhāvaparicchedo. Apabyūhantoti ṭhitaṭṭhānato apanayanavasena viyūhanto rāsiṃ karonto. Evaṃ katvāti bhājanamukhavaṭṭiyā kumbhigatena bhājanagatassa ekābaddhabhāvaṃ viyojetvāti attho. Upaḍḍhakumbhīyanti upaḍḍhapuṇṇāya kumbhiyā. Vinayadhammatāti adhikakāraṇālābhe vinayavinicchayadhammatāti adhippāyo. Na kevalañcettha garukatāva, suttānugamanampi atthīti dassento apicātiādimāha. Kaṇṭhena pana paricchinnakāleti mukhagataṃ ajjhohaṭakāleti attho. Ajjhoharaṇameva hettha paricchindanaṃ, na kaṇṭhapidahanaṃ. Cikkananti thaddhaṃ, bahalaṃ ghananti attho.
யோபி தெ²ய்யசித்தேன பரஸ்ஸ கும்பி⁴யா பாத³க்³க⁴னகங் ஸப்பிங் வா தேலங் வா அவஸ்ஸங் பிவனகங் யங் கிஞ்சி து³கூலஸாடகங் வா சம்மக²ண்டா³தீ³னங் வா அஞ்ஞதரங் பக்கி²பதி, ஹத்த²தோ முத்தமத்தே பாராஜிகந்தி எத்த² அவஹாரோ வீமங்ஸிதப்³போ³. யதி³ ச து³கூலாதீ³ஸு ஸப்பிதேலானங் பவிஸனங் ஸந்தா⁴ய பாராஜிகங் ப⁴வெய்ய, தத்த² பவிட்ட²தேலாதி³னோ கும்பி⁴க³தேன ஏகாப³த்³த⁴தாய ந தாவ அவஹாரோ பா⁴ஜனந்தரங் பவேஸெத்வா க³ஹணகாலே விய. ததா² ஹி வுத்தங் – ‘‘பா⁴ஜனங் பன நிமுஜ்ஜாபெத்வா க³ண்ஹந்தஸ்ஸ யாவ ஏகாப³த்³த⁴ங் ஹோதி, தாவ ரக்க²தீ’’திஆதி³. அத² தேலாதி³வினாஸேன பாராஜிகங் ப⁴வெய்ய, ததா³பி திணஜ்ஜா²பனாதீ³ஸு விய அவஹாரோ நத்தி², து³க்கடேன ஸத்³தி⁴ங் ப⁴ண்ட³தெ³ய்யமேவ ஹோதி, ததா² ச பாத³க்³க⁴னகங் தேலாதி³ங் பீதங் து³கூலாதி³ங் உத்³த⁴ரந்தஸ்ஸாபி பாராஜிகங் ந ஸியா தத்த² பவிட்ட²ஸ்ஸ தேலாதி³னோ வினட்ட²ட்டே²ன க³ஹணக்க²ணே அவிஜ்ஜமானத்தா, விஜ்ஜமானத்தேன ச உத்³தா⁴ரேயேவ பாராஜிகங் வத்தப்³ப³ங், ந ஹத்த²தோ முத்தமத்தேதி. ஸப்³ப³அட்ட²கதா²ஸு ச து³கூலாதீ³னங் பக்கி²பனே ஹத்த²தோ முத்தமத்தே பாராஜிகஸ்ஸ வுத்தத்தா ந தங் படிக்கி²பிதுங் ஸக்கா. அட்ட²கதா²ப்பமாணேன பனேதங் க³ஹேதப்³ப³ங், யுத்தி பனெத்த² பண்டி³தேஹி புப்³பா³பரங் ஸங்ஸந்தி³த்வா உத்³தா⁴ரேதப்³பா³.
Yopi theyyacittena parassa kumbhiyā pādagghanakaṃ sappiṃ vā telaṃ vā avassaṃ pivanakaṃ yaṃ kiñci dukūlasāṭakaṃ vā cammakhaṇḍādīnaṃ vā aññataraṃ pakkhipati, hatthato muttamatte pārājikanti ettha avahāro vīmaṃsitabbo. Yadi ca dukūlādīsu sappitelānaṃ pavisanaṃ sandhāya pārājikaṃ bhaveyya, tattha paviṭṭhatelādino kumbhigatena ekābaddhatāya na tāva avahāro bhājanantaraṃ pavesetvā gahaṇakāle viya. Tathā hi vuttaṃ – ‘‘bhājanaṃ pana nimujjāpetvā gaṇhantassa yāva ekābaddhaṃ hoti, tāva rakkhatī’’tiādi. Atha telādivināsena pārājikaṃ bhaveyya, tadāpi tiṇajjhāpanādīsu viya avahāro natthi, dukkaṭena saddhiṃ bhaṇḍadeyyameva hoti, tathā ca pādagghanakaṃ telādiṃ pītaṃ dukūlādiṃ uddharantassāpi pārājikaṃ na siyā tattha paviṭṭhassa telādino vinaṭṭhaṭṭhena gahaṇakkhaṇe avijjamānattā, vijjamānattena ca uddhāreyeva pārājikaṃ vattabbaṃ, na hatthato muttamatteti. Sabbaaṭṭhakathāsu ca dukūlādīnaṃ pakkhipane hatthato muttamatte pārājikassa vuttattā na taṃ paṭikkhipituṃ sakkā. Aṭṭhakathāppamāṇena panetaṃ gahetabbaṃ, yutti panettha paṇḍitehi pubbāparaṃ saṃsanditvā uddhāretabbā.
பலிபு³ஜ்ஜி²ஸ்ஸதீதி நிவாரெஸ்ஸதி. வுத்தனயேன பாராஜிகந்தி ஹத்த²தோ முத்தமத்தேயேவ பாராஜிகங். நேவ அவஹாரோ, ந கீ³வாதி அத்தனோ பா⁴ஜனத்தா வுத்தங், அனாபத்திமத்தமேவ வுத்தங், ந பன ஏவங் விசாரிதந்தி அதி⁴ப்பாயோ. ப³ஹிக³தங் நாம ஹோதீதி ததோ பட்டா²ய தேலஸ்ஸ அட்டா²னதோ அதோ⁴முக²பா⁴வதோ ச ப³ஹிக³தங் நாம ஹோதி. அந்தோ பட்டா²ய சி²த்³தே³ கரியமானே தேலஸ்ஸ நிக்க²மித்வா க³தக³தட்டா²னங் பா⁴ஜனஸங்க்²யமேவ க³ச்ச²தீதி ஆஹ ‘‘பா³ஹிரந்ததோ பாத³க்³க⁴னகே க³ளிதே பாராஜிக’’ந்தி. யதா² ததா² வா கதஸ்ஸாதி பா³ஹிரந்ததோ வா அப்³ப⁴ந்தரந்ததோ வா பட்டா²ய கதஸ்ஸ. மஜ்ஜே² ட²பெத்வா கதசி²த்³தே³தி மஜ்ஜே² தோ²கங் கபாலங் ட²பெத்வா பச்சா² தங் சி²ந்த³ந்தேன கதசி²த்³தே³.
Palibujjhissatīti nivāressati. Vuttanayena pārājikanti hatthato muttamatteyeva pārājikaṃ. Neva avahāro, na gīvāti attano bhājanattā vuttaṃ, anāpattimattameva vuttaṃ, na pana evaṃ vicāritanti adhippāyo. Bahigataṃ nāma hotīti tato paṭṭhāya telassa aṭṭhānato adhomukhabhāvato ca bahigataṃ nāma hoti. Anto paṭṭhāya chidde kariyamāne telassa nikkhamitvā gatagataṭṭhānaṃ bhājanasaṅkhyameva gacchatīti āha ‘‘bāhirantato pādagghanake gaḷite pārājika’’nti. Yathā tathā vā katassāti bāhirantato vā abbhantarantato vā paṭṭhāya katassa. Majjhe ṭhapetvā katachiddeti majjhe thokaṃ kapālaṃ ṭhapetvā pacchā taṃ chindantena katachidde.
பத்தீ²னஸ்ஸ கா²த³னங் இதரஸ்ஸ பானஞ்ச ஸப்பிஆதீ³னங் பரிபோ⁴கோ³தி ஆஹ ‘‘அகா²தி³தப்³ப³ங் வா அபாதப்³ப³ங் வா கரோதீ’’தி. கஸ்மா பனெத்த² து³க்கடங் வுத்தந்தி ஆஹ ‘‘டா²னாசாவனஸ்ஸ நத்தி²தாய து³க்கட’’ந்தி. புரிமத்³வயந்தி பே⁴த³னங் ச²ட்³ட³னஞ்ச. கும்பி⁴ஜஜ்ஜரகரணேனாதி புண்ணகும்பி⁴யா ஜஜ்ஜரகரணேன. மாதிகாஉஜுகரணேனாதி உத³கபுண்ணாய மாதிகாய உஜுகரணேன. ஏகலக்க²ணந்தி பே⁴த³னங் கும்பி⁴யா ஜஜ்ஜரகரணேன, ச²ட்³ட³னங் மாதிகாய உஜுகரணேன ச ஸத்³தி⁴ங் ஏகஸபா⁴வங். பச்சி²மங் பன த்³வயந்தி ஜா²பனங் அபரிபோ⁴க³கரணஞ்ச. எத்த² ஏவங் வினிச்ச²யங் வத³ந்தீதி ஏதஸ்மிங் மஹாஅட்ட²கதா²யங் வுத்தே அத்தே² ஏகே ஆசரியா ஏவங் வினிச்ச²யங் வத³ந்தி. பச்சி²மத்³வயங் ஸந்தா⁴ய வுத்தந்தி எத்த² புரிமபத³த்³வயே வினிச்ச²யோ ஹெட்டா² வுத்தானுஸாரேன ஸக்கா விஞ்ஞாதுந்தி தத்த² கிஞ்சி அவத்வா பச்சி²மபத³த்³வயங் ஸந்தா⁴ய ‘‘டா²னாசாவனஸ்ஸ நத்தி²தாய து³க்கட’’ந்தி இத³ங் வுத்தந்தி அதி⁴ப்பாயோ . தெ²ய்யசித்தேனாதி அத்தனோ வா பரஸ்ஸ வா காதுகாமதாவஸேன உப்பன்னதெ²ய்யசித்தேன. வினாஸேதுகாமதாயாதி ஹத்த²பாதா³தீ³னி சி²ந்த³ந்தோ விய கேவலங் வினாஸேதுகாமதாய. வுத்தனயேன பி⁴ந்த³ந்தஸ்ஸ வா ச²ட்³டெ³ந்தஸ்ஸ வாதி முக்³க³ரேன போதெ²த்வா பி⁴ந்த³ந்தஸ்ஸ வா உத³கங் வா வாலிகங் வா ஆகிரித்வா உத்தராபெந்தஸ்ஸ வாதி அத்தோ². அயுத்தந்தி சேதி பாளியங் புரிமத்³வயேபி து³க்கடஸ்ஸேவ வுத்தத்தா ‘‘புரிமத்³வயே பாராஜிக’’ந்தி இத³ங் அயுத்தந்தி யதி³ தும்ஹாகங் ஸியாதி அத்தோ². நாதி அயுத்தபா⁴வங் நிஸேதெ⁴த்வா தத்த² காரணமாஹ ‘‘அஞ்ஞதா² க³ஹேதப்³ப³த்த²தோ’’தி.
Patthīnassa khādanaṃ itarassa pānañca sappiādīnaṃ paribhogoti āha ‘‘akhāditabbaṃ vā apātabbaṃ vā karotī’’ti. Kasmā panettha dukkaṭaṃ vuttanti āha ‘‘ṭhānācāvanassa natthitāya dukkaṭa’’nti. Purimadvayanti bhedanaṃ chaḍḍanañca. Kumbhijajjarakaraṇenāti puṇṇakumbhiyā jajjarakaraṇena. Mātikāujukaraṇenāti udakapuṇṇāya mātikāya ujukaraṇena. Ekalakkhaṇanti bhedanaṃ kumbhiyā jajjarakaraṇena, chaḍḍanaṃ mātikāya ujukaraṇena ca saddhiṃ ekasabhāvaṃ. Pacchimaṃ pana dvayanti jhāpanaṃ aparibhogakaraṇañca. Ettha evaṃ vinicchayaṃ vadantīti etasmiṃ mahāaṭṭhakathāyaṃ vutte atthe eke ācariyā evaṃ vinicchayaṃ vadanti. Pacchimadvayaṃ sandhāya vuttanti ettha purimapadadvaye vinicchayo heṭṭhā vuttānusārena sakkā viññātunti tattha kiñci avatvā pacchimapadadvayaṃ sandhāya ‘‘ṭhānācāvanassa natthitāya dukkaṭa’’nti idaṃ vuttanti adhippāyo . Theyyacittenāti attano vā parassa vā kātukāmatāvasena uppannatheyyacittena. Vināsetukāmatāyāti hatthapādādīni chindanto viya kevalaṃ vināsetukāmatāya. Vuttanayena bhindantassa vā chaḍḍentassa vāti muggarena pothetvā bhindantassa vā udakaṃ vā vālikaṃ vā ākiritvā uttarāpentassa vāti attho. Ayuttanti ceti pāḷiyaṃ purimadvayepi dukkaṭasseva vuttattā ‘‘purimadvaye pārājika’’nti idaṃ ayuttanti yadi tumhākaṃ siyāti attho. Nāti ayuttabhāvaṃ nisedhetvā tattha kāraṇamāha ‘‘aññathā gahetabbatthato’’ti.
ஏவமேகே வத³ந்தீதி ஹெட்டா² வுத்தஸ்ஸ அத்த²னயஸ்ஸ அத்தனா அனபி⁴மதபா⁴வங் த³ஸ்ஸெத்வா ஸயங் அஞ்ஞதா²பி பாளிங் அட்ட²கத²ஞ்ச ஸங்ஸந்தி³த்வா அத்த²ங் த³ஸ்ஸேதுகாமோ அயங் பனெத்த² ஸாரோதிஆதி³மாஹ. அசாவேதுகாமோவாதி தெ²ய்யசித்தேன டா²னா அசாவேதுகாமோவ. அச²ட்³டே³துகாமோயேவாதி எத்தா²பி தெ²ய்யசித்தேனாதி ஸம்ப³ந்தி⁴தப்³ப³ங். இத³ஞ்ஹி தெ²ய்யசித்தபக்க²ங் ஸந்தா⁴ய வுத்தங் நாஸேதுகாமதாபக்க²ஸ்ஸ வக்க²மானத்தா. தேனேவாஹ நாஸேதுகாமதாபக்கே² பனாதிஆதி³. இதரதா²பி யுஜ்ஜதீதி தெ²ய்யசித்தாபா⁴வா டா²னா சாவேதுகாமஸ்ஸாபி து³க்கடங் யுஜ்ஜதீதி வுத்தங் ஹோதி.
Evameke vadantīti heṭṭhā vuttassa atthanayassa attanā anabhimatabhāvaṃ dassetvā sayaṃ aññathāpi pāḷiṃ aṭṭhakathañca saṃsanditvā atthaṃ dassetukāmo ayaṃ panettha sārotiādimāha. Acāvetukāmovāti theyyacittena ṭhānā acāvetukāmova. Achaḍḍetukāmoyevāti etthāpi theyyacittenāti sambandhitabbaṃ. Idañhi theyyacittapakkhaṃ sandhāya vuttaṃ nāsetukāmatāpakkhassa vakkhamānattā. Tenevāha nāsetukāmatāpakkhe panātiādi. Itarathāpi yujjatīti theyyacittābhāvā ṭhānā cāvetukāmassāpi dukkaṭaṃ yujjatīti vuttaṃ hoti.
பூ⁴மட்ட²கதா²வண்ணனானயோ நிட்டி²தோ.
Bhūmaṭṭhakathāvaṇṇanānayo niṭṭhito.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 2. து³தியபாராஜிகங் • 2. Dutiyapārājikaṃ
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 2. து³தியபாராஜிகங் • 2. Dutiyapārājikaṃ
டீகா • Tīkā / வினயபிடக (டீகா) • Vinayapiṭaka (ṭīkā) / ஸாரத்த²தீ³பனீ-டீகா • Sāratthadīpanī-ṭīkā / பூ⁴மட்ட²கதா²வண்ணனா • Bhūmaṭṭhakathāvaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / பூ⁴மட்ட²கதா²தி³வண்ணனா • Bhūmaṭṭhakathādivaṇṇanā
