| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
5. பூ⁴மிஜஸுத்தங்
5. Bhūmijasuttaṃ
25. ஸாவத்தி²யங் விஹரதி. அத² கோ² ஆயஸ்மா பூ⁴மிஜோ ஸாயன்ஹஸமயங் படிஸல்லானா வுட்டி²தோ யேனாயஸ்மா ஸாரிபுத்தோ தேனுபஸங்கமி; உபஸங்கமித்வா ஆயஸ்மதா ஸாரிபுத்தேன ஸத்³தி⁴ங் ஸம்மோதி³. ஸம்மோத³னீயங் கத²ங் ஸாரணீயங் வீதிஸாரெத்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா பூ⁴மிஜோ ஆயஸ்மந்தங் ஸாரிபுத்தங் ஏதத³வோச –
25. Sāvatthiyaṃ viharati. Atha kho āyasmā bhūmijo sāyanhasamayaṃ paṭisallānā vuṭṭhito yenāyasmā sāriputto tenupasaṅkami; upasaṅkamitvā āyasmatā sāriputtena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho āyasmā bhūmijo āyasmantaṃ sāriputtaṃ etadavoca –
‘‘ஸந்தாவுஸோ ஸாரிபுத்த, ஏகே ஸமணப்³ராஹ்மணா கம்மவாதா³ ஸயங்கதங் ஸுக²து³க்க²ங் பஞ்ஞபெந்தி. ஸந்தி பனாவுஸோ ஸாரிபுத்த, ஏகே ஸமணப்³ராஹ்மணா கம்மவாதா³ பரங்கதங் ஸுக²து³க்க²ங் பஞ்ஞபெந்தி. ஸந்தாவுஸோ ஸாரிபுத்த, ஏகே ஸமணப்³ராஹ்மணா கம்மவாதா³ ஸயங்கதஞ்ச பரங்கதஞ்ச ஸுக²து³க்க²ங் பஞ்ஞபெந்தி. ஸந்தி பனாவுஸோ ஸாரிபுத்த, ஏகே ஸமணப்³ராஹ்மணா கம்மவாதா³ அஸயங்காரங் அபரங்காரங் அதி⁴ச்சஸமுப்பன்னங் ஸுக²து³க்க²ங் பஞ்ஞபெந்தி. இத⁴ நோ, ஆவுஸோ ஸாரிபுத்த, ப⁴க³வா கிங்வாதீ³ கிமக்கா²யீ , கத²ங் ப்³யாகரமானா ச மயங் வுத்தவாதி³னோ சேவ ப⁴க³வதோ அஸ்ஸாம, ந ச ப⁴க³வந்தங் அபூ⁴தேன அப்³பா⁴சிக்கெ²ய்யாம, த⁴ம்மஸ்ஸ சானுத⁴ம்மங் ப்³யாகரெய்யாம, ந ச கோசி ஸஹத⁴ம்மிகோ வாதா³னுபாதோ கா³ரய்ஹங் டா²னங் ஆக³ச்செ²ய்யா’’தி?
‘‘Santāvuso sāriputta, eke samaṇabrāhmaṇā kammavādā sayaṃkataṃ sukhadukkhaṃ paññapenti. Santi panāvuso sāriputta, eke samaṇabrāhmaṇā kammavādā paraṃkataṃ sukhadukkhaṃ paññapenti. Santāvuso sāriputta, eke samaṇabrāhmaṇā kammavādā sayaṃkatañca paraṃkatañca sukhadukkhaṃ paññapenti. Santi panāvuso sāriputta, eke samaṇabrāhmaṇā kammavādā asayaṃkāraṃ aparaṃkāraṃ adhiccasamuppannaṃ sukhadukkhaṃ paññapenti. Idha no, āvuso sāriputta, bhagavā kiṃvādī kimakkhāyī , kathaṃ byākaramānā ca mayaṃ vuttavādino ceva bhagavato assāma, na ca bhagavantaṃ abhūtena abbhācikkheyyāma, dhammassa cānudhammaṃ byākareyyāma, na ca koci sahadhammiko vādānupāto gārayhaṃ ṭhānaṃ āgaccheyyā’’ti?
‘‘படிச்சஸமுப்பன்னங் கோ², ஆவுஸோ, ஸுக²து³க்க²ங் வுத்தங் ப⁴க³வதா. கிங் படிச்ச? ப²ஸ்ஸங் படிச்ச. இதி வத³ங் வுத்தவாதீ³ சேவ ப⁴க³வதோ அஸ்ஸ, ந ச ப⁴க³வந்தங் அபூ⁴தேன அப்³பா⁴சிக்கெ²ய்ய, த⁴ம்மஸ்ஸ சானுத⁴ம்மங் ப்³யாகரெய்ய, ந ச கோசி ஸஹத⁴ம்மிகோ வாதா³னுபாதோ கா³ரய்ஹங் டா²னங் ஆக³ச்செ²ய்ய.
‘‘Paṭiccasamuppannaṃ kho, āvuso, sukhadukkhaṃ vuttaṃ bhagavatā. Kiṃ paṭicca? Phassaṃ paṭicca. Iti vadaṃ vuttavādī ceva bhagavato assa, na ca bhagavantaṃ abhūtena abbhācikkheyya, dhammassa cānudhammaṃ byākareyya, na ca koci sahadhammiko vādānupāto gārayhaṃ ṭhānaṃ āgaccheyya.
‘‘தத்ராவுஸோ, யே தே ஸமணப்³ராஹ்மணா கம்மவாதா³ ஸயங்கதங் ஸுக²து³க்க²ங் பஞ்ஞபெந்தி, தத³பி ப²ஸ்ஸபச்சயா. யேபி தே…பே॰… யேபி தே…பே॰… யேபி தே ஸமணப்³ராஹ்மணா கம்மவாதா³ அஸயங்காரங் அபரங்காரங் அதி⁴ச்சஸமுப்பன்னங் ஸுக²து³க்க²ங் பஞ்ஞபெந்தி, தத³பி ப²ஸ்ஸபச்சயா.
‘‘Tatrāvuso, ye te samaṇabrāhmaṇā kammavādā sayaṃkataṃ sukhadukkhaṃ paññapenti, tadapi phassapaccayā. Yepi te…pe… yepi te…pe… yepi te samaṇabrāhmaṇā kammavādā asayaṃkāraṃ aparaṃkāraṃ adhiccasamuppannaṃ sukhadukkhaṃ paññapenti, tadapi phassapaccayā.
‘‘தத்ராவுஸோ, யே தே ஸமணப்³ராஹ்மணா கம்மவாதா³ ஸயங்கதங் ஸுக²து³க்க²ங் பஞ்ஞபெந்தி, தே வத அஞ்ஞத்ர ப²ஸ்ஸா படிஸங்வேதி³ஸ்ஸந்தீதி நேதங் டா²னங் விஜ்ஜதி. யேபி தே…பே॰ … யேபி தே…பே॰… யேபி தே ஸமணப்³ராஹ்மணா கம்மவாதா³ அஸயங்காரங் அபரங்காரங் அதி⁴ச்சஸமுப்பன்னங் ஸுக²து³க்க²ங் பஞ்ஞபெந்தி, தே வத அஞ்ஞத்ர ப²ஸ்ஸா படிஸங்வேதி³ஸ்ஸந்தீதி நேதங் டா²னங் விஜ்ஜதீ’’தி.
‘‘Tatrāvuso, ye te samaṇabrāhmaṇā kammavādā sayaṃkataṃ sukhadukkhaṃ paññapenti, te vata aññatra phassā paṭisaṃvedissantīti netaṃ ṭhānaṃ vijjati. Yepi te…pe. … yepi te…pe… yepi te samaṇabrāhmaṇā kammavādā asayaṃkāraṃ aparaṃkāraṃ adhiccasamuppannaṃ sukhadukkhaṃ paññapenti, te vata aññatra phassā paṭisaṃvedissantīti netaṃ ṭhānaṃ vijjatī’’ti.
அஸ்ஸோஸி கோ² ஆயஸ்மா ஆனந்தோ³ ஆயஸ்மதோ ஸாரிபுத்தஸ்ஸ ஆயஸ்மதா பூ⁴மிஜேன ஸத்³தி⁴ங் இமங் கதா²ஸல்லாபங். அத² கோ² ஆயஸ்மா ஆனந்தோ³ யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஆயஸ்மா ஆனந்தோ³ யாவதகோ ஆயஸ்மதோ ஸாரிபுத்தஸ்ஸ ஆயஸ்மதா பூ⁴மிஜேன ஸத்³தி⁴ங் அஹோஸி கதா²ஸல்லாபோ தங் ஸப்³ப³ங் ப⁴க³வதோ ஆரோசேஸி.
Assosi kho āyasmā ānando āyasmato sāriputtassa āyasmatā bhūmijena saddhiṃ imaṃ kathāsallāpaṃ. Atha kho āyasmā ānando yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā ānando yāvatako āyasmato sāriputtassa āyasmatā bhūmijena saddhiṃ ahosi kathāsallāpo taṃ sabbaṃ bhagavato ārocesi.
‘‘ஸாது⁴ ஸாது⁴, ஆனந்த³, யதா² தங் ஸாரிபுத்தோ ஸம்மா ப்³யாகரமானோ ப்³யாகரெய்ய. படிச்சஸமுப்பன்னங் கோ², ஆனந்த³, ஸுக²து³க்க²ங் வுத்தங் மயா. கிங் படிச்ச? ப²ஸ்ஸங் படிச்ச. இதி வத³ங் வுத்தவாதீ³ சேவ மே அஸ்ஸ, ந ச மங் அபூ⁴தேன அப்³பா⁴சிக்கெ²ய்ய, த⁴ம்மஸ்ஸ சானுத⁴ம்மங் ப்³யாகரெய்ய, ந ச கோசி ஸஹத⁴ம்மிகோ வாதா³னுபாதோ கா³ரய்ஹங் டா²னங் ஆக³ச்செ²ய்ய.
‘‘Sādhu sādhu, ānanda, yathā taṃ sāriputto sammā byākaramāno byākareyya. Paṭiccasamuppannaṃ kho, ānanda, sukhadukkhaṃ vuttaṃ mayā. Kiṃ paṭicca? Phassaṃ paṭicca. Iti vadaṃ vuttavādī ceva me assa, na ca maṃ abhūtena abbhācikkheyya, dhammassa cānudhammaṃ byākareyya, na ca koci sahadhammiko vādānupāto gārayhaṃ ṭhānaṃ āgaccheyya.
‘‘தத்ரானந்த³ , யே தே ஸமணப்³ராஹ்மணா கம்மவாதா³ ஸயங்கதங் ஸுக²து³க்க²ங் பஞ்ஞபெந்தி தத³பி ப²ஸ்ஸபச்சயா. யேபி தே…பே॰… யேபி தே…பே॰… யேபி தே ஸமணப்³ராஹ்மணா கம்மவாதா³ அஸயங்காரங் அபரங்காரங் அதி⁴ச்சஸமுப்பன்னங் ஸுக²து³க்க²ங் பஞ்ஞபெந்தி தத³பி ப²ஸ்ஸபச்சயா.
‘‘Tatrānanda , ye te samaṇabrāhmaṇā kammavādā sayaṃkataṃ sukhadukkhaṃ paññapenti tadapi phassapaccayā. Yepi te…pe… yepi te…pe… yepi te samaṇabrāhmaṇā kammavādā asayaṃkāraṃ aparaṃkāraṃ adhiccasamuppannaṃ sukhadukkhaṃ paññapenti tadapi phassapaccayā.
‘‘தத்ரானந்த³ , யே தே ஸமணப்³ராஹ்மணா கம்மவாதா³ ஸயங்கதங் ஸுக²து³க்க²ங் பஞ்ஞபெந்தி, தே வத அஞ்ஞத்ர ப²ஸ்ஸா படிஸங்வேதி³ஸ்ஸந்தீதி நேதங் டா²னங் விஜ்ஜதி. யேபி தே…பே॰… யேபி தே…பே॰… யேபி தே ஸமணப்³ராஹ்மணாகம்மவாதா³ அஸயங்காரங் அபரங்காரங் அதி⁴ச்சஸமுப்பன்னங் ஸுக²து³க்க²ங் பஞ்ஞபெந்தி, தே வத அஞ்ஞத்ர ப²ஸ்ஸா படிஸங்வேதி³ஸ்ஸந்தீதி நேதங் டா²னங் விஜ்ஜதி.
‘‘Tatrānanda , ye te samaṇabrāhmaṇā kammavādā sayaṃkataṃ sukhadukkhaṃ paññapenti, te vata aññatra phassā paṭisaṃvedissantīti netaṃ ṭhānaṃ vijjati. Yepi te…pe… yepi te…pe… yepi te samaṇabrāhmaṇākammavādā asayaṃkāraṃ aparaṃkāraṃ adhiccasamuppannaṃ sukhadukkhaṃ paññapenti, te vata aññatra phassā paṭisaṃvedissantīti netaṃ ṭhānaṃ vijjati.
‘‘காயே வா ஹானந்த³, ஸதி காயஸஞ்சேதனாஹேது உப்பஜ்ஜதி அஜ்ஜ²த்தங் ஸுக²து³க்க²ங். வாசாய வா ஹானந்த³, ஸதி வசீஸஞ்சேதனாஹேது உப்பஜ்ஜதி அஜ்ஜ²த்தங் ஸுக²து³க்க²ங். மனே வா ஹானந்த³, ஸதி மனோஸஞ்சேதனாஹேது உப்பஜ்ஜதி அஜ்ஜ²த்தங் ஸுக²து³க்க²ங் அவிஜ்ஜாபச்சயா ச.
‘‘Kāye vā hānanda, sati kāyasañcetanāhetu uppajjati ajjhattaṃ sukhadukkhaṃ. Vācāya vā hānanda, sati vacīsañcetanāhetu uppajjati ajjhattaṃ sukhadukkhaṃ. Mane vā hānanda, sati manosañcetanāhetu uppajjati ajjhattaṃ sukhadukkhaṃ avijjāpaccayā ca.
‘‘ஸாமங் வா தங், ஆனந்த³, காயஸங்கா²ரங் அபி⁴ஸங்க²ரோதி, யங்பச்சயாஸ்ஸ 1 தங் உப்பஜ்ஜதி அஜ்ஜ²த்தங் ஸுக²து³க்க²ங். பரே வா தங் 2, ஆனந்த³, காயஸங்கா²ரங் அபி⁴ஸங்க²ரொந்தி, யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங். ஸம்பஜானோ வா தங், ஆனந்த³, காயஸங்கா²ரங் அபி⁴ஸங்க²ரோதி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங். அஸம்பஜானோ வா தங், ஆனந்த³, காயஸங்கா²ரங் அபி⁴ஸங்க²ரோதி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங்.
‘‘Sāmaṃ vā taṃ, ānanda, kāyasaṅkhāraṃ abhisaṅkharoti, yaṃpaccayāssa 3 taṃ uppajjati ajjhattaṃ sukhadukkhaṃ. Pare vā taṃ 4, ānanda, kāyasaṅkhāraṃ abhisaṅkharonti, yaṃpaccayāssa taṃ uppajjati ajjhattaṃ sukhadukkhaṃ. Sampajāno vā taṃ, ānanda, kāyasaṅkhāraṃ abhisaṅkharoti yaṃpaccayāssa taṃ uppajjati ajjhattaṃ sukhadukkhaṃ. Asampajāno vā taṃ, ānanda, kāyasaṅkhāraṃ abhisaṅkharoti yaṃpaccayāssa taṃ uppajjati ajjhattaṃ sukhadukkhaṃ.
‘‘ஸாமங் வா தங், ஆனந்த³, வசீஸங்கா²ரங் அபி⁴ஸங்க²ரோதி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங். பரே வா தங், ஆனந்த³, வசீஸங்கா²ரங் அபி⁴ஸங்க²ரொந்தி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங். ஸம்பஜானோ வா தங், ஆனந்த³…பே॰… அஸம்பஜானோ வா தங், ஆனந்த³, வசீஸங்கா²ரங் அபி⁴ஸங்க²ரோதி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங்.
‘‘Sāmaṃ vā taṃ, ānanda, vacīsaṅkhāraṃ abhisaṅkharoti yaṃpaccayāssa taṃ uppajjati ajjhattaṃ sukhadukkhaṃ. Pare vā taṃ, ānanda, vacīsaṅkhāraṃ abhisaṅkharonti yaṃpaccayāssa taṃ uppajjati ajjhattaṃ sukhadukkhaṃ. Sampajāno vā taṃ, ānanda…pe… asampajāno vā taṃ, ānanda, vacīsaṅkhāraṃ abhisaṅkharoti yaṃpaccayāssa taṃ uppajjati ajjhattaṃ sukhadukkhaṃ.
‘‘ஸாமங் வா தங், ஆனந்த³, மனோஸங்கா²ரங் அபி⁴ஸங்க²ரோதி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங். பரே வா தங், ஆனந்த³, மனோஸங்கா²ரங் அபி⁴ஸங்க²ரொந்தி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங். ஸம்பஜானோ வா தங், ஆனந்த³…பே॰… அஸம்பஜானோ வா தங், ஆனந்த³, மனோஸங்கா²ரங் அபி⁴ஸங்க²ரோதி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங்.
‘‘Sāmaṃ vā taṃ, ānanda, manosaṅkhāraṃ abhisaṅkharoti yaṃpaccayāssa taṃ uppajjati ajjhattaṃ sukhadukkhaṃ. Pare vā taṃ, ānanda, manosaṅkhāraṃ abhisaṅkharonti yaṃpaccayāssa taṃ uppajjati ajjhattaṃ sukhadukkhaṃ. Sampajāno vā taṃ, ānanda…pe… asampajāno vā taṃ, ānanda, manosaṅkhāraṃ abhisaṅkharoti yaṃpaccayāssa taṃ uppajjati ajjhattaṃ sukhadukkhaṃ.
‘‘இமேஸு , ஆனந்த³, த⁴ம்மேஸு அவிஜ்ஜா அனுபதிதா. அவிஜ்ஜாய த்வேவ, ஆனந்த³, அஸேஸவிராக³னிரோதா⁴ ஸோ காயோ ந ஹோதி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங். ஸா வாசா ந ஹோதி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங். ஸோ மனோ ந ஹோதி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²ங். கெ²த்தங் தங் ந ஹோதி…பே॰… வத்து² தங் ந ஹோதி…பே॰… ஆயதனங் தங் ந ஹோதி…பே॰… அதி⁴கரணங் தங் ந ஹோதி யங்பச்சயாஸ்ஸ தங் உப்பஜ்ஜதி அஜ்ஜ²த்தங் ஸுக²து³க்க²’’ந்தி. பஞ்சமங்.
‘‘Imesu , ānanda, dhammesu avijjā anupatitā. Avijjāya tveva, ānanda, asesavirāganirodhā so kāyo na hoti yaṃpaccayāssa taṃ uppajjati ajjhattaṃ sukhadukkhaṃ. Sā vācā na hoti yaṃpaccayāssa taṃ uppajjati ajjhattaṃ sukhadukkhaṃ. So mano na hoti yaṃpaccayāssa taṃ uppajjati ajjhattaṃ sukhadukkhaṃ. Khettaṃ taṃ na hoti…pe… vatthu taṃ na hoti…pe… āyatanaṃ taṃ na hoti…pe… adhikaraṇaṃ taṃ na hoti yaṃpaccayāssa taṃ uppajjati ajjhattaṃ sukhadukkha’’nti. Pañcamaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 5. பூ⁴மிஜஸுத்தவண்ணனா • 5. Bhūmijasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 5. பூ⁴மிஜஸுத்தவண்ணனா • 5. Bhūmijasuttavaṇṇanā
