Library / Tipiṭaka / তিপিটক • Tipiṭaka / মজ্ঝিমনিকায • Majjhimanikāya

    ৬. ভূমিজসুত্তং

    6. Bhūmijasuttaṃ

    ২২৩. এৰং মে সুতং – একং সমযং ভগৰা রাজগহে ৰিহরতি ৰেল়ুৰনে কলন্দকনিৰাপে। অথ খো আযস্মা ভূমিজো পুব্বণ্হসমযং নিৰাসেত্ৰা পত্তচীৰরমাদায যেন জযসেনস্স রাজকুমারস্স নিৰেসনং তেনুপসঙ্কমি; উপসঙ্কমিত্ৰা পঞ্ঞত্তে আসনে নিসীদি। অথ খো জযসেনো রাজকুমারো যেনাযস্মা ভূমিজো তেনুপসঙ্কমি; উপসঙ্কমিত্ৰা আযস্মতা ভূমিজেন সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো জযসেনো রাজকুমারো আযস্মন্তং ভূমিজং এতদৰোচ – ‘‘সন্তি, ভো ভূমিজ, একে সমণব্রাহ্মণা এৰংৰাদিনো এৰংদিট্ঠিনো – ‘আসঞ্চেপি করিত্ৰা ব্রহ্মচরিযং চরন্তি, অভব্বা 1 ফলস্স অধিগমায; অনাসঞ্চেপি 2 করিত্ৰা ব্রহ্মচরিযং চরন্তি, অভব্বা ফলস্স অধিগমায; আসঞ্চ অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমাযা’তি। ইধ ভোতো ভূমিজস্স সত্থা কিংৰাদী 3 কিমক্খাযী’’তি? ‘‘ন খো মেতং, রাজকুমার, ভগৰতো সম্মুখা সুতং, সম্মুখা পটিগ্গহিতং। ঠানঞ্চ খো এতং ৰিজ্জতি যং ভগৰা এৰং ব্যাকরেয্য – ‘আসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায ; অনাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায; আসঞ্চ অনাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায। আসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমায ; অনাসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমায; আসঞ্চ অনাসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমায; নেৰাসং নানাসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমাযা’তি। ন খো মে তং, রাজকুমার, ভগৰতো সম্মুখা সুতং, সম্মুখা পটিগ্গহিতং। ঠানঞ্চ খো এতং ৰিজ্জতি যং ভগৰা এৰং ব্যাকরেয্যা’’তি। ‘‘সচে খো ভোতো ভূমিজস্স সত্থা এৰংৰাদী 4 এৰমক্খাযী, অদ্ধা ভোতো ভূমিজস্স সত্থা সব্বেসংযেৰ পুথুসমণব্রাহ্মণানং মুদ্ধানং 5 মঞ্ঞে আহচ্চ তিট্ঠতী’’তি । অথ খো জযসেনো রাজকুমারো আযস্মন্তং ভূমিজং সকেনেৰ থালিপাকেন পরিৰিসি।

    223. Evaṃ me sutaṃ – ekaṃ samayaṃ bhagavā rājagahe viharati veḷuvane kalandakanivāpe. Atha kho āyasmā bhūmijo pubbaṇhasamayaṃ nivāsetvā pattacīvaramādāya yena jayasenassa rājakumārassa nivesanaṃ tenupasaṅkami; upasaṅkamitvā paññatte āsane nisīdi. Atha kho jayaseno rājakumāro yenāyasmā bhūmijo tenupasaṅkami; upasaṅkamitvā āyasmatā bhūmijena saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho jayaseno rājakumāro āyasmantaṃ bhūmijaṃ etadavoca – ‘‘santi, bho bhūmija, eke samaṇabrāhmaṇā evaṃvādino evaṃdiṭṭhino – ‘āsañcepi karitvā brahmacariyaṃ caranti, abhabbā 6 phalassa adhigamāya; anāsañcepi 7 karitvā brahmacariyaṃ caranti, abhabbā phalassa adhigamāya; āsañca anāsañcepi karitvā brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā brahmacariyaṃ caranti, abhabbā phalassa adhigamāyā’ti. Idha bhoto bhūmijassa satthā kiṃvādī 8 kimakkhāyī’’ti? ‘‘Na kho metaṃ, rājakumāra, bhagavato sammukhā sutaṃ, sammukhā paṭiggahitaṃ. Ṭhānañca kho etaṃ vijjati yaṃ bhagavā evaṃ byākareyya – ‘āsañcepi karitvā ayoniso brahmacariyaṃ caranti, abhabbā phalassa adhigamāya ; anāsañcepi karitvā ayoniso brahmacariyaṃ caranti, abhabbā phalassa adhigamāya; āsañca anāsañcepi karitvā ayoniso brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā ayoniso brahmacariyaṃ caranti, abhabbā phalassa adhigamāya. Āsañcepi karitvā yoniso brahmacariyaṃ caranti, bhabbā phalassa adhigamāya ; anāsañcepi karitvā yoniso brahmacariyaṃ caranti, bhabbā phalassa adhigamāya; āsañca anāsañcepi karitvā yoniso brahmacariyaṃ caranti, bhabbā phalassa adhigamāya; nevāsaṃ nānāsañcepi karitvā yoniso brahmacariyaṃ caranti, bhabbā phalassa adhigamāyā’ti. Na kho me taṃ, rājakumāra, bhagavato sammukhā sutaṃ, sammukhā paṭiggahitaṃ. Ṭhānañca kho etaṃ vijjati yaṃ bhagavā evaṃ byākareyyā’’ti. ‘‘Sace kho bhoto bhūmijassa satthā evaṃvādī 9 evamakkhāyī, addhā bhoto bhūmijassa satthā sabbesaṃyeva puthusamaṇabrāhmaṇānaṃ muddhānaṃ 10 maññe āhacca tiṭṭhatī’’ti . Atha kho jayaseno rājakumāro āyasmantaṃ bhūmijaṃ sakeneva thālipākena parivisi.

    ২২৪. অথ খো আযস্মা ভূমিজো পচ্ছাভত্তং পিণ্ডপাতপটিক্কন্তো যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো আযস্মা ভূমিজো ভগৰন্তং এতদৰোচ – ‘‘ইধাহং, ভন্তে, পুব্বণ্হসমযং নিৰাসেত্ৰা পত্তচীৰরমাদায যেন জযসেনস্স রাজকুমারস্স নিৰেসনং তেনুপসঙ্কমিং; উপসঙ্কমিত্ৰা পঞ্ঞত্তে আসনে নিসীদিং। অথ খো, ভন্তে, জযসেনো রাজকুমারো যেনাহং তেনুপসঙ্কমি; উপসঙ্কমিত্ৰা মযা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো, ভন্তে, জযসেনো রাজকুমারো মং এতদৰোচ – ‘সন্তি, ভো ভূমিজ, একে সমণব্রাহ্মণা এৰংৰাদিনো এৰংদিট্ঠিনো – আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা…পে॰… আসঞ্চ অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমাযা’তি। ‘ইধ ভোতো ভূমিজস্স সত্থা কিংৰাদী কিমক্খাযী’তি? এৰং ৰুত্তে অহং, ভন্তে, জযসেনং রাজকুমারং এতদৰোচং – ‘ন খো মে তং, রাজকুমার, ভগৰতো সম্মুখা সুতং, সম্মুখা পটিগ্গহিতং। ঠানঞ্চ খো এতং ৰিজ্জতি যং ভগৰা এৰং ব্যাকরেয্য – আসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায; আসঞ্চ অনাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা অযোনিসো ব্রহ্মচরিযং চরন্তি, অভব্বা ফলস্স অধিগমায। আসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমায; অনাসঞ্চেপি করিত্ৰা…পে॰… আসঞ্চ অনাসঞ্চেপি করিত্ৰা…পে॰… নেৰাসং নানাসঞ্চেপি করিত্ৰা যোনিসো ব্রহ্মচরিযং চরন্তি, ভব্বা ফলস্স অধিগমাযাতি। ন খো মে তং, রাজকুমার, ভগৰতো সম্মুখা সুতং, সম্মুখা পটিগ্গহিতং। ঠানঞ্চ খো এতং ৰিজ্জতি যং ভগৰা এৰং ব্যাকরেয্যা’তি। ‘সচে ভোতো ভূমিজস্স সত্থা এৰংৰাদী এৰমক্খাযী, অদ্ধা ভোতো ভূমিজস্স সত্থা সব্বেসংযেৰ পুথুসমণব্রাহ্মণানং মুদ্ধানং মঞ্ঞে আহচ্চ তিট্ঠতী’তি। ‘কচ্চাহং, ভন্তে, এৰং পুট্ঠো এৰং ব্যাকরমানো ৰুত্তৰাদী চেৰ ভগৰতো হোমি, ন চ ভগৰন্তং অভূতেন অব্ভাচিক্খামি, ধম্মস্স চানুধম্মং ব্যাকরোমি, ন চ কোচি সহধম্মিকো ৰাদানুৰাদো গারয্হং ঠানং আগচ্ছতী’’’তি?

    224. Atha kho āyasmā bhūmijo pacchābhattaṃ piṇḍapātapaṭikkanto yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho āyasmā bhūmijo bhagavantaṃ etadavoca – ‘‘idhāhaṃ, bhante, pubbaṇhasamayaṃ nivāsetvā pattacīvaramādāya yena jayasenassa rājakumārassa nivesanaṃ tenupasaṅkamiṃ; upasaṅkamitvā paññatte āsane nisīdiṃ. Atha kho, bhante, jayaseno rājakumāro yenāhaṃ tenupasaṅkami; upasaṅkamitvā mayā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho, bhante, jayaseno rājakumāro maṃ etadavoca – ‘santi, bho bhūmija, eke samaṇabrāhmaṇā evaṃvādino evaṃdiṭṭhino – āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā…pe… āsañca anāsañcepi karitvā brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā brahmacariyaṃ caranti, abhabbā phalassa adhigamāyā’ti. ‘Idha bhoto bhūmijassa satthā kiṃvādī kimakkhāyī’ti? Evaṃ vutte ahaṃ, bhante, jayasenaṃ rājakumāraṃ etadavocaṃ – ‘na kho me taṃ, rājakumāra, bhagavato sammukhā sutaṃ, sammukhā paṭiggahitaṃ. Ṭhānañca kho etaṃ vijjati yaṃ bhagavā evaṃ byākareyya – āsañcepi karitvā ayoniso brahmacariyaṃ caranti, abhabbā phalassa adhigamāya; anāsañcepi karitvā ayoniso brahmacariyaṃ caranti, abhabbā phalassa adhigamāya; āsañca anāsañcepi karitvā ayoniso brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā ayoniso brahmacariyaṃ caranti, abhabbā phalassa adhigamāya. Āsañcepi karitvā yoniso brahmacariyaṃ caranti, bhabbā phalassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā yoniso brahmacariyaṃ caranti, bhabbā phalassa adhigamāyāti. Na kho me taṃ, rājakumāra, bhagavato sammukhā sutaṃ, sammukhā paṭiggahitaṃ. Ṭhānañca kho etaṃ vijjati yaṃ bhagavā evaṃ byākareyyā’ti. ‘Sace bhoto bhūmijassa satthā evaṃvādī evamakkhāyī, addhā bhoto bhūmijassa satthā sabbesaṃyeva puthusamaṇabrāhmaṇānaṃ muddhānaṃ maññe āhacca tiṭṭhatī’ti. ‘Kaccāhaṃ, bhante, evaṃ puṭṭho evaṃ byākaramāno vuttavādī ceva bhagavato homi, na ca bhagavantaṃ abhūtena abbhācikkhāmi, dhammassa cānudhammaṃ byākaromi, na ca koci sahadhammiko vādānuvādo gārayhaṃ ṭhānaṃ āgacchatī’’’ti?

    ‘‘তগ্ঘ ত্ৰং, ভূমিজ, এৰং পুট্ঠো এৰং ব্যাকরমানো ৰুত্তৰাদী চেৰ মে হোসি, ন চ মং অভূতেন অব্ভাচিক্খসি, ধম্মস্স চানুধম্মং ব্যাকরোসি, ন চ কোচি সহধম্মিকো ৰাদানুৰাদো গারয্হং ঠানং আগচ্ছতি। যে হি কেচি, ভূমিজ, সমণা ৰা ব্রাহ্মণা ৰা মিচ্ছাদিট্ঠিনো মিচ্ছাসঙ্কপ্পা মিচ্ছাৰাচা মিচ্ছাকম্মন্তা মিচ্ছাআজীৰা মিচ্ছাৰাযামা মিচ্ছাসতী মিচ্ছাসমাধিনো তে আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; আসঞ্চ অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায। তং কিস্স হেতু? অযোনি হেসা, ভূমিজ, ফলস্স অধিগমায।

    ‘‘Taggha tvaṃ, bhūmija, evaṃ puṭṭho evaṃ byākaramāno vuttavādī ceva me hosi, na ca maṃ abhūtena abbhācikkhasi, dhammassa cānudhammaṃ byākarosi, na ca koci sahadhammiko vādānuvādo gārayhaṃ ṭhānaṃ āgacchati. Ye hi keci, bhūmija, samaṇā vā brāhmaṇā vā micchādiṭṭhino micchāsaṅkappā micchāvācā micchākammantā micchāājīvā micchāvāyāmā micchāsatī micchāsamādhino te āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā brahmacariyaṃ caranti, abhabbā phalassa adhigamāya; āsañca anāsañcepi karitvā brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā brahmacariyaṃ caranti, abhabbā phalassa adhigamāya. Taṃ kissa hetu? Ayoni hesā, bhūmija, phalassa adhigamāya.

    ২২৫. ‘‘সেয্যথাপি, ভূমিজ, পুরিসো তেলত্থিকো তেলগৰেসী তেলপরিযেসনং চরমানো ৰালিকং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য। আসঞ্চেপি করিত্ৰা ৰালিকং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, অভব্বো তেলস্স অধিগমায; অনাসঞ্চেপি করিত্ৰা ৰালিকং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, অভব্বো তেলস্স অধিগমায; আসঞ্চ অনাসঞ্চেপি করিত্ৰা ৰালিকং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, অভব্বো তেলস্স অধিগমায; নেৰাসং নানাসঞ্চেপি করিত্ৰা ৰালিকং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, অভব্বো তেলস্স অধিগমায। তং কিস্স হেতু? অযোনি হেসা, ভূমিজ, তেলস্স অধিগমায। এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা মিচ্ছাদিট্ঠিনো মিচ্ছাসঙ্কপ্পা মিচ্ছাৰাচা মিচ্ছাকম্মন্তা মিচ্ছাআজীৰা মিচ্ছাৰাযামা মিচ্ছাসতী মিচ্ছাসমাধিনো তে আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; আসঞ্চ অনাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায। তং কিস্স হেতু? অযোনি হেসা, ভূমিজ, ফলস্স অধিগমায।

    225. ‘‘Seyyathāpi, bhūmija, puriso telatthiko telagavesī telapariyesanaṃ caramāno vālikaṃ doṇiyā ākiritvā udakena paripphosakaṃ paripphosakaṃ pīḷeyya. Āsañcepi karitvā vālikaṃ doṇiyā ākiritvā udakena paripphosakaṃ paripphosakaṃ pīḷeyya, abhabbo telassa adhigamāya; anāsañcepi karitvā vālikaṃ doṇiyā ākiritvā udakena paripphosakaṃ paripphosakaṃ pīḷeyya, abhabbo telassa adhigamāya; āsañca anāsañcepi karitvā vālikaṃ doṇiyā ākiritvā udakena paripphosakaṃ paripphosakaṃ pīḷeyya, abhabbo telassa adhigamāya; nevāsaṃ nānāsañcepi karitvā vālikaṃ doṇiyā ākiritvā udakena paripphosakaṃ paripphosakaṃ pīḷeyya, abhabbo telassa adhigamāya. Taṃ kissa hetu? Ayoni hesā, bhūmija, telassa adhigamāya. Evameva kho, bhūmija, ye hi keci samaṇā vā brāhmaṇā vā micchādiṭṭhino micchāsaṅkappā micchāvācā micchākammantā micchāājīvā micchāvāyāmā micchāsatī micchāsamādhino te āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā brahmacariyaṃ caranti, abhabbā phalassa adhigamāya; āsañca anāsañcepi karitvā brahmacariyaṃ caranti, abhabbā phalassa adhigamāya; nevāsaṃ nānāsañcepi karitvā brahmacariyaṃ caranti, abhabbā phalassa adhigamāya. Taṃ kissa hetu? Ayoni hesā, bhūmija, phalassa adhigamāya.

    ‘‘সেয্যথাপি , ভূমিজ, পুরিসো খীরত্থিকো খীরগৰেসী খীরপরিযেসনং চরমানো গাৰিং তরুণৰচ্ছং ৰিসাণতো আৰিঞ্ছেয্য 11। আসঞ্চেপি করিত্ৰা গাৰিং তরুণৰচ্ছং ৰিসাণতো আৰিঞ্ছেয্য, অভব্বো খীরস্স অধিগমায; অনাসঞ্চেপি করিত্ৰা…পে॰… আসঞ্চ অনাসঞ্চেপি করিত্ৰা…পে॰… নেৰাসং নানাসঞ্চেপি করিত্ৰা গাৰিং তরুণৰচ্ছং ৰিসাণতো আৰিঞ্ছেয্য, অভব্বো খীরস্স অধিগমায। তং কিস্স হেতু? অযোনি হেসা, ভূমিজ, খীরস্স অধিগমায। এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা মিচ্ছাদিট্ঠিনো…পে॰… মিচ্ছাসমাধিনো তে আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা…পে॰… আসঞ্চ অনাসঞ্চেপি করিত্ৰা…পে॰… নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায। তং কিস্স হেতু? অযোনি হেসা, ভূমিজ, ফলস্স অধিগমায।

    ‘‘Seyyathāpi , bhūmija, puriso khīratthiko khīragavesī khīrapariyesanaṃ caramāno gāviṃ taruṇavacchaṃ visāṇato āviñcheyya 12. Āsañcepi karitvā gāviṃ taruṇavacchaṃ visāṇato āviñcheyya, abhabbo khīrassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā gāviṃ taruṇavacchaṃ visāṇato āviñcheyya, abhabbo khīrassa adhigamāya. Taṃ kissa hetu? Ayoni hesā, bhūmija, khīrassa adhigamāya. Evameva kho, bhūmija, ye hi keci samaṇā vā brāhmaṇā vā micchādiṭṭhino…pe… micchāsamādhino te āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā brahmacariyaṃ caranti, abhabbā phalassa adhigamāya. Taṃ kissa hetu? Ayoni hesā, bhūmija, phalassa adhigamāya.

    ২২৬. ‘‘সেয্যথাপি, ভূমিজ, পুরিসো নৰনীতত্থিকো নৰনীতগৰেসী নৰনীতপরিযেসনং চরমানো উদকং কলসে আসিঞ্চিত্ৰা মত্থেন 13 আৰিঞ্ছেয্য। আসঞ্চেপি করিত্ৰা উদকং কলসে আসিঞ্চিত্ৰা মত্থেন আৰিঞ্ছেয্য, অভব্বো নৰনীতস্স অধিগমায; অনাসঞ্চেপি করিত্ৰা…পে॰… আসঞ্চ অনাসঞ্চেপি করিত্ৰা…পে॰… নেৰাসং নানাসঞ্চেপি করিত্ৰা উদকং কলসে আসিঞ্চিত্ৰা মত্থেন আৰিঞ্ছেয্য, অভব্বো নৰনীতস্স অধিগমায। তং কিস্স হেতু? অযোনি হেসা, ভূমিজ, নৰনীতস্স অধিগমায। এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা মিচ্ছাদিট্ঠিনো…পে॰… মিচ্ছাসমাধিনো তে আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা…পে॰… আসঞ্চ অনাসঞ্চেপি করিত্ৰা…পে॰… নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায। তং কিস্স হেতু? অযোনি হেসা, ভূমিজ, ফলস্স অধিগমায।

    226. ‘‘Seyyathāpi, bhūmija, puriso navanītatthiko navanītagavesī navanītapariyesanaṃ caramāno udakaṃ kalase āsiñcitvā matthena 14 āviñcheyya. Āsañcepi karitvā udakaṃ kalase āsiñcitvā matthena āviñcheyya, abhabbo navanītassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā udakaṃ kalase āsiñcitvā matthena āviñcheyya, abhabbo navanītassa adhigamāya. Taṃ kissa hetu? Ayoni hesā, bhūmija, navanītassa adhigamāya. Evameva kho, bhūmija, ye hi keci samaṇā vā brāhmaṇā vā micchādiṭṭhino…pe… micchāsamādhino te āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā brahmacariyaṃ caranti, abhabbā phalassa adhigamāya. Taṃ kissa hetu? Ayoni hesā, bhūmija, phalassa adhigamāya.

    ‘‘সেয্যথাপি, ভূমিজ, পুরিসো অগ্গিত্থিকো 15 অগ্গিগৰেসী অগ্গিপরিযেসনং চরমানো অল্লং কট্ঠং সস্নেহং উত্তরারণিং আদায অভিমন্থেয্য 16। আসঞ্চেপি করিত্ৰা অল্লং কট্ঠং সস্নেহং উত্তরারণিং আদায অভিমন্থেয্য, অভব্বো অগ্গিস্স অধিগমায; অনাসঞ্চেপি করিত্ৰা…পে॰… আসঞ্চ অনাসঞ্চেপি করিত্ৰা…পে॰… নেৰাসং নানাসঞ্চেপি করিত্ৰা অল্লং কট্ঠং সস্নেহং উত্তরারণিং আদায অভিমন্থেয্য, অভব্বো অগ্গিস্স অধিগমায। তং কিস্স হেতু? অযোনি হেসা, ভূমিজ, অগ্গিস্স অধিগমায। এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা মিচ্ছাদিট্ঠিনো…পে॰… মিচ্ছাসমাধিনো তে আসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায; অনাসঞ্চেপি করিত্ৰা…পে॰…আসঞ্চ অনাসঞ্চেপি করিত্ৰা…পে॰… নেৰাসং নানাসঞ্চেপি করিত্ৰা ব্রহ্মচরিযং চরন্তি, অভব্বা ফলস্স অধিগমায। তং কিস্স হেতু? অযোনি হেসা, ভূমিজ, ফলস্স অধিগমায। যে হি কেচি, ভূমিজ, সমণা ৰা ব্রাহ্মণা ৰা সম্মাদিট্ঠিনো সম্মাসঙ্কপ্পা সম্মাৰাচা সম্মাকম্মন্তা সম্মাআজীৰা সম্মাৰাযামা সম্মাসতী সম্মাসমাধিনো তে আসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; অনাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; আসঞ্চ অনাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায। তং কিস্স হেতু? যোনি হেসা, ভূমিজ, ফলস্স অধিগমায।

    ‘‘Seyyathāpi, bhūmija, puriso aggitthiko 17 aggigavesī aggipariyesanaṃ caramāno allaṃ kaṭṭhaṃ sasnehaṃ uttarāraṇiṃ ādāya abhimantheyya 18. Āsañcepi karitvā allaṃ kaṭṭhaṃ sasnehaṃ uttarāraṇiṃ ādāya abhimantheyya, abhabbo aggissa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā allaṃ kaṭṭhaṃ sasnehaṃ uttarāraṇiṃ ādāya abhimantheyya, abhabbo aggissa adhigamāya. Taṃ kissa hetu? Ayoni hesā, bhūmija, aggissa adhigamāya. Evameva kho, bhūmija, ye hi keci samaṇā vā brāhmaṇā vā micchādiṭṭhino…pe… micchāsamādhino te āsañcepi karitvā brahmacariyaṃ caranti, abhabbā phalassa adhigamāya; anāsañcepi karitvā…pe…āsañca anāsañcepi karitvā…pe… nevāsaṃ nānāsañcepi karitvā brahmacariyaṃ caranti, abhabbā phalassa adhigamāya. Taṃ kissa hetu? Ayoni hesā, bhūmija, phalassa adhigamāya. Ye hi keci, bhūmija, samaṇā vā brāhmaṇā vā sammādiṭṭhino sammāsaṅkappā sammāvācā sammākammantā sammāājīvā sammāvāyāmā sammāsatī sammāsamādhino te āsañcepi karitvā brahmacariyaṃ caranti, bhabbā phalassa adhigamāya; anāsañcepi karitvā brahmacariyaṃ caranti, bhabbā phalassa adhigamāya; āsañca anāsañcepi karitvā brahmacariyaṃ caranti, bhabbā phalassa adhigamāya; nevāsaṃ nānāsañcepi karitvā brahmacariyaṃ caranti, bhabbā phalassa adhigamāya. Taṃ kissa hetu? Yoni hesā, bhūmija, phalassa adhigamāya.

    ২২৭. ‘‘সেয্যথাপি, ভূমিজ, পুরিসো তেলত্থিকো তেলগৰেসী তেলপরিযেসনং চরমানো তিলপিট্ঠং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য। আসঞ্চেপি করিত্ৰা তিলপিট্ঠং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, ভব্বো তেলস্স অধিগমায; অনাসঞ্চেপি করিত্ৰা…পে॰… আসঞ্চ অনাসঞ্চেপি করিত্ৰা…পে॰… নেৰাসং নানাসঞ্চেপি করিত্ৰা তিলপিট্ঠং দোণিযা আকিরিত্ৰা উদকেন পরিপ্ফোসকং পরিপ্ফোসকং পীল়েয্য, ভব্বো তেলস্স অধিগমায। তং কিস্স হেতু? যোনি হেসা, ভূমিজ, তেলস্স অধিগমায। এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা সম্মাদিট্ঠিনো…পে॰… সম্মাসমাধিনো তে আসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; অনাসঞ্চেপি করিত্ৰা…পে॰… আসঞ্চ অনাসঞ্চেপি করিত্ৰা…পে॰… নেৰাসং নানাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায। তং কিস্স হেতু? যোনি হেসা, ভূমিজ, ফলস্স অধিগমায।

    227. ‘‘Seyyathāpi, bhūmija, puriso telatthiko telagavesī telapariyesanaṃ caramāno tilapiṭṭhaṃ doṇiyā ākiritvā udakena paripphosakaṃ paripphosakaṃ pīḷeyya. Āsañcepi karitvā tilapiṭṭhaṃ doṇiyā ākiritvā udakena paripphosakaṃ paripphosakaṃ pīḷeyya, bhabbo telassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā tilapiṭṭhaṃ doṇiyā ākiritvā udakena paripphosakaṃ paripphosakaṃ pīḷeyya, bhabbo telassa adhigamāya. Taṃ kissa hetu? Yoni hesā, bhūmija, telassa adhigamāya. Evameva kho, bhūmija, ye hi keci samaṇā vā brāhmaṇā vā sammādiṭṭhino…pe… sammāsamādhino te āsañcepi karitvā brahmacariyaṃ caranti, bhabbā phalassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā brahmacariyaṃ caranti, bhabbā phalassa adhigamāya. Taṃ kissa hetu? Yoni hesā, bhūmija, phalassa adhigamāya.

    ‘‘সেয্যথাপি, ভূমিজ, পুরিসো খীরত্থিকো খীরগৰেসী খীরপরিযেসনং চরমানো গাৰিং তরুণৰচ্ছং থনতো আৰিঞ্ছেয্য। আসঞ্চেপি করিত্ৰা গাৰিং তরুণৰচ্ছং থনতো আৰিঞ্ছেয্য, ভব্বো খীরস্স অধিগমায; অনাসঞ্চেপি করিত্ৰা…পে॰… আসঞ্চ অনাসঞ্চেপি করিত্ৰা…পে॰… নেৰাসং নানাসঞ্চেপি করিত্ৰা গাৰিং তরুণৰচ্ছং থনতো আৰিঞ্ছেয্য, ভব্বো খীরস্স অধিগমায। তং কিস্স হেতু? যোনি হেসা, ভূমিজ, খীরস্স অধিগমায। এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা সম্মাদিট্ঠিনো…পে॰… সম্মাসমাধিনো তে আসঞ্চেপি করিত্ৰা…পে॰… অনাসঞ্চেপি করিত্ৰা…পে॰… আসঞ্চ অনাসঞ্চেপি করিত্ৰা…পে॰… নেৰাসং নানাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায। তং কিস্স হেতু? যোনি হেসা, ভূমিজ, ফলস্স অধিগমায।

    ‘‘Seyyathāpi, bhūmija, puriso khīratthiko khīragavesī khīrapariyesanaṃ caramāno gāviṃ taruṇavacchaṃ thanato āviñcheyya. Āsañcepi karitvā gāviṃ taruṇavacchaṃ thanato āviñcheyya, bhabbo khīrassa adhigamāya; anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā gāviṃ taruṇavacchaṃ thanato āviñcheyya, bhabbo khīrassa adhigamāya. Taṃ kissa hetu? Yoni hesā, bhūmija, khīrassa adhigamāya. Evameva kho, bhūmija, ye hi keci samaṇā vā brāhmaṇā vā sammādiṭṭhino…pe… sammāsamādhino te āsañcepi karitvā…pe… anāsañcepi karitvā…pe… āsañca anāsañcepi karitvā…pe… nevāsaṃ nānāsañcepi karitvā brahmacariyaṃ caranti, bhabbā phalassa adhigamāya. Taṃ kissa hetu? Yoni hesā, bhūmija, phalassa adhigamāya.

    ২২৮. ‘‘সেয্যথাপি, ভূমিজ, পুরিসো নৰনীতত্থিকো নৰনীতগৰেসী নৰনীতপরিযেসনং চরমানো দধিং কলসে আসিঞ্চিত্ৰা মত্থেন আৰিঞ্ছেয্য। আসঞ্চেপি করিত্ৰা দধিং কলসে আসিঞ্চিত্ৰা মত্থেন আৰিঞ্ছেয্য, ভব্বো নৰনীতস্স অধিগমায; অনাসঞ্চেপি করিত্ৰা… আসঞ্চ অনাসঞ্চেপি করিত্ৰা… নেৰাসং নানাসঞ্চেপি করিত্ৰা দধিং কলসে আসিঞ্চিত্ৰা মত্থেন আৰিঞ্ছেয্য, ভব্বো নৰনীতস্স অধিগমায। তং কিস্স হেতু? যোনি হেসা, ভূমিজ, নৰনীতস্স অধিগমায। এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা সম্মাদিট্ঠিনো…পে॰… সম্মাসমাধিনো তে আসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; অনাসঞ্চেপি করিত্ৰা… আসঞ্চ অনাসঞ্চেপি করিত্ৰা … নেৰাসং নানাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায। তং কিস্স হেতু? যোনি হেসা, ভূমিজ, ফলস্স অধিগমায।

    228. ‘‘Seyyathāpi, bhūmija, puriso navanītatthiko navanītagavesī navanītapariyesanaṃ caramāno dadhiṃ kalase āsiñcitvā matthena āviñcheyya. Āsañcepi karitvā dadhiṃ kalase āsiñcitvā matthena āviñcheyya, bhabbo navanītassa adhigamāya; anāsañcepi karitvā… āsañca anāsañcepi karitvā… nevāsaṃ nānāsañcepi karitvā dadhiṃ kalase āsiñcitvā matthena āviñcheyya, bhabbo navanītassa adhigamāya. Taṃ kissa hetu? Yoni hesā, bhūmija, navanītassa adhigamāya. Evameva kho, bhūmija, ye hi keci samaṇā vā brāhmaṇā vā sammādiṭṭhino…pe… sammāsamādhino te āsañcepi karitvā brahmacariyaṃ caranti, bhabbā phalassa adhigamāya; anāsañcepi karitvā… āsañca anāsañcepi karitvā … nevāsaṃ nānāsañcepi karitvā brahmacariyaṃ caranti, bhabbā phalassa adhigamāya. Taṃ kissa hetu? Yoni hesā, bhūmija, phalassa adhigamāya.

    ‘‘সেয্যথাপি, ভূমিজ, পুরিসো অগ্গিত্থিকো অগ্গিগৰেসী অগ্গিপরিযেসনং চরমানো সুক্খং কট্ঠং কোল়াপং উত্তরারণিং আদায অভিমন্থেয্য; ( ) 19 আসঞ্চেপি করিত্ৰা… অনাসঞ্চেপি করিত্ৰা.. আসঞ্চ অনাসঞ্চেপি করিত্ৰা… নেৰাসং নানাসঞ্চেপি করিত্ৰা সুক্খ কট্ঠং কোল়াপং উত্তরারণিং আদায অভিমন্থেয্য, ভব্বো অগ্গিস্স অধিগমায। তং কিস্স হেতু? যোনি হেসা, ভূমিজ, অগ্গিস্স অধিগমায। এৰমেৰ খো, ভূমিজ, যে হি কেচি সমণা ৰা ব্রাহ্মণা ৰা সম্মাদিট্ঠিনো…পে॰… সম্মাসমাধিনো তে আসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; অনাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; আসঞ্চ অনাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায; নেৰাসং নানাসঞ্চেপি করিত্ৰা ব্রহ্মচরিযং চরন্তি, ভব্বা ফলস্স অধিগমায। তং কিস্স হেতু? যোনি হেসা, ভূমিজ, ফলস্স অধিগমায।

    ‘‘Seyyathāpi, bhūmija, puriso aggitthiko aggigavesī aggipariyesanaṃ caramāno sukkhaṃ kaṭṭhaṃ koḷāpaṃ uttarāraṇiṃ ādāya abhimantheyya; ( ) 20 āsañcepi karitvā… anāsañcepi karitvā.. āsañca anāsañcepi karitvā… nevāsaṃ nānāsañcepi karitvā sukkha kaṭṭhaṃ koḷāpaṃ uttarāraṇiṃ ādāya abhimantheyya, bhabbo aggissa adhigamāya. Taṃ kissa hetu? Yoni hesā, bhūmija, aggissa adhigamāya. Evameva kho, bhūmija, ye hi keci samaṇā vā brāhmaṇā vā sammādiṭṭhino…pe… sammāsamādhino te āsañcepi karitvā brahmacariyaṃ caranti, bhabbā phalassa adhigamāya; anāsañcepi karitvā brahmacariyaṃ caranti, bhabbā phalassa adhigamāya; āsañca anāsañcepi karitvā brahmacariyaṃ caranti, bhabbā phalassa adhigamāya; nevāsaṃ nānāsañcepi karitvā brahmacariyaṃ caranti, bhabbā phalassa adhigamāya. Taṃ kissa hetu? Yoni hesā, bhūmija, phalassa adhigamāya.

    ‘‘সচে খো তং, ভূমিজ, জযসেনস্স রাজকুমারস্স ইমা চতস্সো উপমা পটিভাযেয্যুং অনচ্ছরিযং তে জযসেনো রাজকুমারো পসীদেয্য, পসন্নো চ তে পসন্নাকারং করেয্যা’’তি। ‘‘কুতো পন মং, ভন্তে, জযসেনস্স রাজকুমারস্স ইমা চতস্সো উপমা পটিভাযিস্সন্তি অনচ্ছরিযা পুব্বে অস্সুতপুব্বা, সেয্যথাপি ভগৰন্ত’’ন্তি?

    ‘‘Sace kho taṃ, bhūmija, jayasenassa rājakumārassa imā catasso upamā paṭibhāyeyyuṃ anacchariyaṃ te jayaseno rājakumāro pasīdeyya, pasanno ca te pasannākāraṃ kareyyā’’ti. ‘‘Kuto pana maṃ, bhante, jayasenassa rājakumārassa imā catasso upamā paṭibhāyissanti anacchariyā pubbe assutapubbā, seyyathāpi bhagavanta’’nti?

    ইদমৰোচ ভগৰা। অত্তমনো আযস্মা ভূমিজো ভগৰতো ভাসিতং অভিনন্দীতি।

    Idamavoca bhagavā. Attamano āyasmā bhūmijo bhagavato bhāsitaṃ abhinandīti.

    ভূমিজসুত্তং নিট্ঠিতং ছট্ঠং।

    Bhūmijasuttaṃ niṭṭhitaṃ chaṭṭhaṃ.




    Next: ৭. অনুরুদ্ধসুত্তং • 7. Anuruddhasuttaṃ




    Footnotes:
    1. চরতি, অভব্বো (সী॰ পী॰) এৰমুপরিপি একৰচনেনেৰ দিস্সতি
    2. আসঞ্চ অনাসঞ্চ চেপি (অট্ঠ॰)
    3. কিংৰাদী কিংদিট্ঠী (স্যা॰ কং॰ ক॰)
    4. এৰংৰাদী এৰংদিট্ঠী (স্যা॰ কং॰ ক॰)
    5. বুদ্ধানং (ক॰) মুদ্ধানন্তিমুদ্ধং, মত্থকন্তি অত্থো
    6. carati, abhabbo (sī. pī.) evamuparipi ekavacaneneva dissati
    7. āsañca anāsañca cepi (aṭṭha.)
    8. kiṃvādī kiṃdiṭṭhī (syā. kaṃ. ka.)
    9. evaṃvādī evaṃdiṭṭhī (syā. kaṃ. ka.)
    10. buddhānaṃ (ka.) muddhānantimuddhaṃ, matthakanti attho
    11. আৰিঞ্জেয্য (সী॰ স্যা॰ কং॰ পী॰)
    12. āviñjeyya (sī. syā. kaṃ. pī.)
    13. মন্থেন (সী॰), মত্তেন (ক॰)
    14. manthena (sī.), mattena (ka.)
    15. অগ্গত্থিকো (সী॰)
    16. অভিমত্থেয্য (স্যা॰ কং॰ পী॰ ক॰)
    17. aggatthiko (sī.)
    18. abhimattheyya (syā. kaṃ. pī. ka.)
    19. (ভব্বো অগ্গিস্স অধিগমায) (সব্বত্থ)
    20. (bhabbo aggissa adhigamāya) (sabbattha)



    Related texts:



    অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৬. ভূমিজসুত্তৰণ্ণনা • 6. Bhūmijasuttavaṇṇanā

    টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ৬. ভূমিজসুত্তৰণ্ণনা • 6. Bhūmijasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact