| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
5. பூ⁴மிஜஸுத்தவண்ணனா
5. Bhūmijasuttavaṇṇanā
25-26. பஞ்சமே பூ⁴மிஜோதி தஸ்ஸ தே²ரஸ்ஸ நாமங். ஸேஸமிதா⁴பி புரிமஸுத்தே வுத்தனயேனேவ வேதி³தப்³ப³ங். அயங் பன விஸேஸோ – யஸ்மா இத³ங் ஸுக²து³க்க²ங் ந கேவலங் ப²ஸ்ஸபச்சயா உப்பஜ்ஜதி, காயேனபி கரியமானங் கரீயதி, வாசாயபி மனஸாபி, அத்தனாபி கரியமானங் கரீயதி, பரேனபி கரியமானங் கரீயதி, ஸம்பஜானேனபி கரியமானங் கரீயதி, அஸம்பஜானேனபி, தஸ்மா தஸ்ஸ அபரம்பி பச்சயவிஸேஸங் த³ஸ்ஸேதுங் காயே வா ஹானந்த³, ஸதீதிஆதி³மாஹ. காயஸஞ்சேதனாஹேதூதி காயத்³வாரே உப்பன்னசேதனாஹேது. வசீஸஞ்சேதனாமனோஸஞ்சேதனாஸுபி ஏஸேவ நயோ. எத்த² ச காயத்³வாரே காமாவசரகுஸலாகுஸலவஸேன வீஸதி சேதனா லப்³ப⁴ந்தி, ததா² வசீத்³வாரே. மனொத்³வாரே நவஹி ரூபாரூபசேதனாஹி ஸத்³தி⁴ங் ஏகூனதிங்ஸாதி தீஸு த்³வாரேஸு ஏகூனஸத்ததி சேதனா ஹொந்தி, தப்பச்சயங் விபாகஸுக²து³க்க²ங் த³ஸ்ஸிதங். அவிஜ்ஜாபச்சயா சாதி இத³ங் தாபி சேதனா அவிஜ்ஜாபச்சயா ஹொந்தீதி த³ஸ்ஸனத்த²ங் வுத்தங். யஸ்மா பன தங் யதா²வுத்தசேதனாபே⁴த³ங் காயஸங்கா²ரஞ்சேவ வசீஸங்கா²ரஞ்ச மனோஸங்கா²ரஞ்ச பரேஹி அனுஸ்ஸாஹிதோ ஸாமங் அஸங்கா²ரிகசித்தேன கரோதி, பரேஹி காரியமானோ ஸஸங்கா²ரிகசித்தேனாபி கரோதி, ‘‘இத³ங் நாம கம்மங் கரோதி, தஸ்ஸ ஏவரூபோ நாம விபாகோ ப⁴விஸ்ஸதீ’’தி, ஏவங் கம்மஞ்ச விபாகஞ்ச ஜானந்தோபி கரோதி, மாதாபிதூஸு சேதியவந்த³னாதீ³னி கரொந்தேஸு அனுகரொந்தா தா³ரகா விய கேவலங் கம்மமேவ ஜானந்தோ ‘‘இமஸ்ஸ பன கம்மஸ்ஸ அயங் விபாகோ’’தி விபாகங் அஜானந்தோபி கரோதி, தஸ்மா தங் த³ஸ்ஸேதுங் ஸாமங் வா தங், ஆனந்த³, காயஸங்கா²ரங் அபி⁴ஸங்க²ரோதீதிஆதி³ வுத்தங்.
25-26. Pañcame bhūmijoti tassa therassa nāmaṃ. Sesamidhāpi purimasutte vuttanayeneva veditabbaṃ. Ayaṃ pana viseso – yasmā idaṃ sukhadukkhaṃ na kevalaṃ phassapaccayā uppajjati, kāyenapi kariyamānaṃ karīyati, vācāyapi manasāpi, attanāpi kariyamānaṃ karīyati, parenapi kariyamānaṃ karīyati, sampajānenapi kariyamānaṃ karīyati, asampajānenapi, tasmā tassa aparampi paccayavisesaṃ dassetuṃ kāye vā hānanda, satītiādimāha. Kāyasañcetanāhetūti kāyadvāre uppannacetanāhetu. Vacīsañcetanāmanosañcetanāsupi eseva nayo. Ettha ca kāyadvāre kāmāvacarakusalākusalavasena vīsati cetanā labbhanti, tathā vacīdvāre. Manodvāre navahi rūpārūpacetanāhi saddhiṃ ekūnatiṃsāti tīsu dvāresu ekūnasattati cetanā honti, tappaccayaṃ vipākasukhadukkhaṃ dassitaṃ. Avijjāpaccayā cāti idaṃ tāpi cetanā avijjāpaccayā hontīti dassanatthaṃ vuttaṃ. Yasmā pana taṃ yathāvuttacetanābhedaṃ kāyasaṅkhārañceva vacīsaṅkhārañca manosaṅkhārañca parehi anussāhito sāmaṃ asaṅkhārikacittena karoti, parehi kāriyamāno sasaṅkhārikacittenāpi karoti, ‘‘idaṃ nāma kammaṃ karoti, tassa evarūpo nāma vipāko bhavissatī’’ti, evaṃ kammañca vipākañca jānantopi karoti, mātāpitūsu cetiyavandanādīni karontesu anukarontā dārakā viya kevalaṃ kammameva jānanto ‘‘imassa pana kammassa ayaṃ vipāko’’ti vipākaṃ ajānantopi karoti, tasmā taṃ dassetuṃ sāmaṃ vā taṃ, ānanda, kāyasaṅkhāraṃ abhisaṅkharotītiādi vuttaṃ.
இமேஸு, ஆனந்த³, த⁴ம்மேஸூதி யே இமே ‘‘ஸாமங் வா தங், ஆனந்த³, காயஸங்கா²ர’’ந்திஆதீ³ஸு சதூஸு டா²னேஸு வுத்தா ச²ஸத்ததி த்³வேஸதா சேதனாத⁴ம்மா, இமேஸு த⁴ம்மேஸு அவிஜ்ஜா உபனிஸ்ஸயகோடியா அனுபதிதா. ஸப்³பே³பி ஹி தே ‘‘அவிஜ்ஜாபச்சயா ஸங்கா²ரா’’தி எத்தே²வ ஸங்க³ஹங் க³ச்ச²ந்தி. இதா³னி விவட்டங் த³ஸ்ஸெந்தோ அவிஜ்ஜாய த்வேவாதிஆதி³மாஹ. ஸோ காயோ ந ஹோதீதி யஸ்மிங் காயே ஸதி காயஸஞ்சேதனாபச்சயங் அஜ்ஜ²த்தங் ஸுக²து³க்க²ங் உப்பஜ்ஜதி, ஸோ காயோ ந ஹோதி. வாசாமனேஸுபி ஏஸேவ நயோ. அபிச காயோதி சேதனாகாயோ, வாசாபி சேதனாவாசா, மனோபி கம்மமனோயேவ. த்³வாரகாயோ வா காயோ. வாசாமனேஸுபி ஏஸேவ நயோ. கீ²ணாஸவோ சேதியங் வந்த³தி, த⁴ம்மங் ப⁴ணதி, கம்மட்டா²னங் மனஸி கரோதி, கத²மஸ்ஸ காயாத³யோ ந ஹொந்தீதி? அவிபாகத்தா. கீ²ணாஸவேன ஹி கதங் கம்மங் நேவ குஸலங் ஹோதி நாகுஸலங். அவிபாகங் ஹுத்வா கிரியாமத்தே திட்ட²தி, தேனஸ்ஸ தே காயாத³யோ ந ஹொந்தீதி வுத்தங்.
Imesu, ānanda, dhammesūti ye ime ‘‘sāmaṃ vā taṃ, ānanda, kāyasaṅkhāra’’ntiādīsu catūsu ṭhānesu vuttā chasattati dvesatā cetanādhammā, imesu dhammesu avijjā upanissayakoṭiyā anupatitā. Sabbepi hi te ‘‘avijjāpaccayā saṅkhārā’’ti ettheva saṅgahaṃ gacchanti. Idāni vivaṭṭaṃ dassento avijjāya tvevātiādimāha. So kāyo na hotīti yasmiṃ kāye sati kāyasañcetanāpaccayaṃ ajjhattaṃ sukhadukkhaṃ uppajjati, so kāyo na hoti. Vācāmanesupi eseva nayo. Apica kāyoti cetanākāyo, vācāpi cetanāvācā, manopi kammamanoyeva. Dvārakāyo vā kāyo. Vācāmanesupi eseva nayo. Khīṇāsavo cetiyaṃ vandati, dhammaṃ bhaṇati, kammaṭṭhānaṃ manasi karoti, kathamassa kāyādayo na hontīti? Avipākattā. Khīṇāsavena hi kataṃ kammaṃ neva kusalaṃ hoti nākusalaṃ. Avipākaṃ hutvā kiriyāmatte tiṭṭhati, tenassa te kāyādayo na hontīti vuttaṃ.
கெ²த்தங் தங் ந ஹோதீதிஆதீ³ஸுபி விருஹனட்டே²ன தங் கெ²த்தங் ந ஹோதி, பதிட்டா²னட்டே²ன வத்து² ந ஹோதி, பச்சயட்டே²ன ஆயதனங் ந ஹோதி, காரணட்டே²ன அதி⁴கரணங் ந ஹோதி. ஸஞ்சேதனாமூலகஞ்ஹி அஜ்ஜ²த்தங் ஸுக²து³க்க²ங் உப்பஜ்ஜெய்ய, ஸா ஸஞ்சேதனா ஏதேஸங் விருஹனாதீ³னங் அத்தா²னங் அபா⁴வேன தஸ்ஸ ஸுக²து³க்க²ஸ்ஸ நேவ கெ²த்தங், ந வத்து² ந ஆயதனங், ந அதி⁴கரணங் ஹோதீதி. இமஸ்மிங் ஸுத்தே வேத³னாதீ³ஸு ஸுக²து³க்க²மேவ கதி²தங், தஞ்ச கோ² விபாகமேவாதி. பஞ்சமங்.
Khettaṃ taṃ na hotītiādīsupi viruhanaṭṭhena taṃ khettaṃ na hoti, patiṭṭhānaṭṭhena vatthu na hoti, paccayaṭṭhena āyatanaṃ na hoti, kāraṇaṭṭhena adhikaraṇaṃ na hoti. Sañcetanāmūlakañhi ajjhattaṃ sukhadukkhaṃ uppajjeyya, sā sañcetanā etesaṃ viruhanādīnaṃ atthānaṃ abhāvena tassa sukhadukkhassa neva khettaṃ, na vatthu na āyatanaṃ, na adhikaraṇaṃ hotīti. Imasmiṃ sutte vedanādīsu sukhadukkhameva kathitaṃ, tañca kho vipākamevāti. Pañcamaṃ.
ச²ட்ட²ங் உபவாணஸுத்தங் உத்தானமேவ. எத்த² பன வட்டது³க்க²மேவ கதி²தந்தி. ச²ட்ட²ங்.
Chaṭṭhaṃ upavāṇasuttaṃ uttānameva. Ettha pana vaṭṭadukkhameva kathitanti. Chaṭṭhaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya
5. பூ⁴மிஜஸுத்தங் • 5. Bhūmijasuttaṃ
6. உபவாணஸுத்தங் • 6. Upavāṇasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā)
5. பூ⁴மிஜஸுத்தவண்ணனா • 5. Bhūmijasuttavaṇṇanā
6. உபவாணஸுத்தவண்ணனா • 6. Upavāṇasuttavaṇṇanā
