| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
6. பூ⁴மிஜஸுத்தவண்ணனா
6. Bhūmijasuttavaṇṇanā
223. ஆஸஞ்சேபி கரித்வாதி, ‘‘இமினாஹங் ப்³ரஹ்மசரியேன தே³வோ வா ப⁴வெய்யங் தே³வஞ்ஞதரோ வா, து³க்க²தோ வா முச்செய்ய’’ந்தி பத்த²னங் கத்வா சேபி சரந்தி, அப⁴ப்³பா³ ப²லஸ்ஸ அதி⁴க³மாய தண்ஹாய ப்³ரஹ்மசரியஸ்ஸ விதூ³ஸிதத்தாதி அதி⁴ப்பாயோ. அனாஸஞ்சேபி கரித்வாதி வுத்தனயேன பத்த²னங் அகத்வா. அப⁴ப்³பா³ ப²லஸ்ஸ அதி⁴க³மாய அனியமிதபா⁴வதோ. பணிதா⁴னவஸேன ஹி புஞ்ஞப²லங் நியதங் நாம ஹோதி, தத³பா⁴வதோ கதங் புஞ்ஞங் ந லப⁴தீதி அதி⁴ப்பாயோ. ததியபக்கே² உப⁴யட்டா²னேஹி வுத்தங், சதுத்த²பக்கோ² ஸம்மாவதாரோ இதி சதுகோடிகோ பஞ்ஹோ ஜாலவஸேன ஆஹடோ, தத்த² ஆஸா நாம பத்த²னா, மிச்சா²கா³ஹஸ்மிங் ஸதி ந விபச்சதி, ஸம்மாகா³ஹஸ்மிங் ஸதி விபச்சதி, உப⁴யதா²பி உப⁴யாபெக்கா²னாம, யோ மிச்ச²த்தத⁴ம்மே புரக்க²த்வா ப்³ரஹ்மசரியங் சரதி, தஸ்ஸ யதா²தி⁴ப்பாயப²லங் ஸமிஜ்ஜ²தீதி ந வத்தப்³ப³ங் அயோனிஸோ ப்³ரஹ்மசரியஸ்ஸ சிண்ணத்தா; யோ பன ஸம்மத்தங் புரக்க²த்வா ப்³ரஹ்மசரியங் சரதி, தஸ்ஸ யதா²தி⁴ப்பாயங் ப்³ரஹ்மசரியப²லங் ந ஸமிஜ்ஜ²தீதி ந வத்தப்³ப³ங் யோனிஸோ ப்³ரஹ்மசரியஸ்ஸ சிண்ணத்தா. தேன வுத்தங் – ‘‘ஆஸஞ்சேபி கரித்வா அயோனிஸோ ப்³ரஹ்மசரியங் சரந்தீ’’திஆதி³. ஸேஸங் ஸுவிஞ்ஞெய்யமேவ.
223.Āsañcepikaritvāti, ‘‘imināhaṃ brahmacariyena devo vā bhaveyyaṃ devaññataro vā, dukkhato vā mucceyya’’nti patthanaṃ katvā cepi caranti, abhabbā phalassa adhigamāya taṇhāya brahmacariyassa vidūsitattāti adhippāyo. Anāsañcepi karitvāti vuttanayena patthanaṃ akatvā. Abhabbā phalassa adhigamāya aniyamitabhāvato. Paṇidhānavasena hi puññaphalaṃ niyataṃ nāma hoti, tadabhāvato kataṃ puññaṃ na labhatīti adhippāyo. Tatiyapakkhe ubhayaṭṭhānehi vuttaṃ, catutthapakkho sammāvatāro iti catukoṭiko pañho jālavasena āhaṭo, tattha āsā nāma patthanā, micchāgāhasmiṃ sati na vipaccati, sammāgāhasmiṃ sati vipaccati, ubhayathāpi ubhayāpekkhānāma, yo micchattadhamme purakkhatvā brahmacariyaṃ carati, tassa yathādhippāyaphalaṃ samijjhatīti na vattabbaṃ ayoniso brahmacariyassa ciṇṇattā; yo pana sammattaṃ purakkhatvā brahmacariyaṃ carati, tassa yathādhippāyaṃ brahmacariyaphalaṃ na samijjhatīti na vattabbaṃ yoniso brahmacariyassa ciṇṇattā. Tena vuttaṃ – ‘‘āsañcepi karitvā ayoniso brahmacariyaṃ carantī’’tiādi. Sesaṃ suviññeyyameva.
பூ⁴மிஜஸுத்தவண்ணனாய லீனத்த²ப்பகாஸனா ஸமத்தா.
Bhūmijasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 6. பூ⁴மிஜஸுத்தங் • 6. Bhūmijasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 6. பூ⁴மிஜஸுத்தவண்ணனா • 6. Bhūmijasuttavaṇṇanā
