| Library / Tipiṭaka / д̇ибидага • Tipiṭaka / бадисамбхид̣̇аамаг̇г̇а-адтагат̇аа • Paṭisambhidāmagga-aṭṭhakathā |
18. бхууминаанад̇д̇ан̃аан̣анид̣̇д̣̇зсаван̣н̣анаа
18. Bhūminānattañāṇaniddesavaṇṇanā
72. бхууминаанад̇д̇ан̃аан̣анид̣̇д̣̇зсз бхуумияод̇и бхааг̇аа барижчзд̣̇аа ваа. гаамааважараад̇и зд̇т̇а д̣̇увид̇хо гаамо гилзсагаамо вад̇т̇угаамо жа. гилзсагаамо чанд̣̇арааг̇о, вад̇т̇угаамо д̇збхуумагаваддам̣. гилзсагаамо гаамзд̇ийд̇и гаамо, вад̇т̇угаамо гаамийяад̇ийд̇и гаамо. со д̣̇увид̇хо гаамо бавад̇д̇ивасзна яасмим̣ бад̣̇зсз аважарад̇и, со бад̣̇зсо гаамо зд̇т̇а аважарад̇ийд̇и гаамааважаро. со бана бад̣̇зсо жад̇уннам̣ абааяаанам̣, мануссалогасса, чаннан̃жа д̣̇звалогаанам̣ васзна згаад̣̇асавид̇хо . яат̇аа хи яасмим̣ бад̣̇зсз сасад̇т̇аа бурисаа аважаранд̇и, со виж̇ж̇амаанзсуби ан̃н̃зсу д̣̇вибад̣̇ажад̇уббад̣̇зсу аважаранд̇зсу д̇зсам̣ абхилагкид̇ад̇д̇аа ‘‘сасад̇т̇ааважаро’’д̇и вужжад̇и, звам̣ виж̇ж̇амаанзсуби ан̃н̃зсу руубааважараад̣̇ийсу д̇ад̇т̇а аважаранд̇зсу д̇зсам̣ абхилагкид̇ад̇д̇аа аяам̣ бад̣̇зсо ‘‘гаамааважаро’’д̇взва вужжад̇и. свааяам̣ яат̇аа руубабхаво руубам̣, звам̣ уд̇д̇арабад̣̇алобам̣ гад̇ваа ‘‘гаамо’’д̇взва вужжад̇и. д̇аббадиб̣ад̣̇д̇хо згзго д̇хаммо имасмим̣ згаад̣̇асавид̇хабад̣̇зсасан̇каад̇з гаамз аважарад̇ийд̇и гаамааважаро. гин̃жааби хи зд̇т̇а гзжи д̇хаммаа руубааруубабхавзсуби аважаранд̇и, яат̇аа бана сан̇г̇аамз аважаран̣ад̇о ‘‘сан̇г̇аамааважаро’’д̇и лад̣̇д̇ханаамо нааг̇о наг̇арз жаранд̇оби ‘‘сан̇г̇аамааважаро’’д̇взва вужжад̇и, т̇алаж̇алажараа жа баан̣ино ат̇алз аж̇алз жа тид̇ааби ‘‘т̇алажараа ж̇алажараа’’д̇взва вужжанд̇и, звам̣ д̇з ан̃н̃ад̇т̇а аважаранд̇ааби гаамааважарааязваад̇и взд̣̇ид̇аб̣б̣аа. аарамман̣агаран̣авасзна ваа зд̇зсу вуд̇д̇аббагаарзсу д̇хаммзсу гаамо аважарад̇ийд̇и гаамааважараа. гааман̃жзса руубааруубааважарад̇хаммзсуби аважарад̇и, яат̇аа бана ‘‘вад̣̇ад̇ийд̇и важчо, махияам̣ сзд̇ийд̇и махим̣со’’д̇и вуд̇д̇з на яад̇д̇агаа вад̣̇анд̇и, махияам̣ ваа сзнд̇и, саб̣б̣зсам̣ д̇ам̣ наамам̣ ход̇и. звам̣самбад̣̇амид̣̇ам̣ взд̣̇ид̇аб̣б̣ам̣. зд̇т̇а саб̣б̣з д̇з д̇хаммз згараасим̣ гад̇ваа вуд̇д̇абхуумисад̣̇д̣̇амабзгкид̇ваа гаамааважараад̇и ид̇т̇илин̇г̇аважанам̣ гад̇ам̣. руубааважараад̇иаад̣̇ийсу руубабхаво руубам̣, д̇асмим̣ руубз аважаранд̇ийд̇и руубааважараа. аруубабхаво аруубам̣, д̇асмим̣ аруубз аважаранд̇ийд̇и аруубааважараа. д̇збхуумагаваддз барияаабаннаа анд̇ог̇ад̇хаад̇и барияаабаннаа, д̇асмим̣ на барияаабаннаад̇и абарияаабаннаа.
72. Bhūminānattañāṇaniddese bhūmiyoti bhāgā paricchedā vā. Kāmāvacarāti ettha duvidho kāmo kilesakāmo vatthukāmo ca. Kilesakāmo chandarāgo, vatthukāmo tebhūmakavaṭṭaṃ. Kilesakāmo kāmetīti kāmo, vatthukāmo kāmīyatīti kāmo. So duvidho kāmo pavattivasena yasmiṃ padese avacarati, so padeso kāmo ettha avacaratīti kāmāvacaro. So pana padeso catunnaṃ apāyānaṃ, manussalokassa, channañca devalokānaṃ vasena ekādasavidho . Yathā hi yasmiṃ padese sasatthā purisā avacaranti, so vijjamānesupi aññesu dvipadacatuppadesu avacarantesu tesaṃ abhilakkhitattā ‘‘sasatthāvacaro’’ti vuccati, evaṃ vijjamānesupi aññesu rūpāvacarādīsu tattha avacarantesu tesaṃ abhilakkhitattā ayaṃ padeso ‘‘kāmāvacaro’’tveva vuccati. Svāyaṃ yathā rūpabhavo rūpaṃ, evaṃ uttarapadalopaṃ katvā ‘‘kāmo’’tveva vuccati. Tappaṭibaddho ekeko dhammo imasmiṃ ekādasavidhapadesasaṅkhāte kāme avacaratīti kāmāvacaro. Kiñcāpi hi ettha keci dhammā rūpārūpabhavesupi avacaranti, yathā pana saṅgāme avacaraṇato ‘‘saṅgāmāvacaro’’ti laddhanāmo nāgo nagare carantopi ‘‘saṅgāmāvacaro’’tveva vuccati, thalajalacarā ca pāṇino athale ajale ca ṭhitāpi ‘‘thalacarā jalacarā’’tveva vuccanti, evaṃ te aññattha avacarantāpi kāmāvacarāyevāti veditabbā. Ārammaṇakaraṇavasena vā etesu vuttappakāresu dhammesu kāmo avacaratīti kāmāvacarā. Kāmañcesa rūpārūpāvacaradhammesupi avacarati, yathā pana ‘‘vadatīti vaccho, mahiyaṃ setīti mahiṃso’’ti vutte na yattakā vadanti, mahiyaṃ vā senti, sabbesaṃ taṃ nāmaṃ hoti. Evaṃsampadamidaṃ veditabbaṃ. Ettha sabbe te dhamme ekarāsiṃ katvā vuttabhūmisaddamapekkhitvā kāmāvacarāti itthiliṅgavacanaṃ kataṃ. Rūpāvacarātiādīsu rūpabhavo rūpaṃ, tasmiṃ rūpe avacarantīti rūpāvacarā. Arūpabhavo arūpaṃ, tasmiṃ arūpe avacarantīti arūpāvacarā. Tebhūmakavaṭṭe pariyāpannā antogadhāti pariyāpannā, tasmiṃ na pariyāpannāti apariyāpannā.
гаамааважараад̣̇ибхууминид̣̇д̣̇зсзсу хздтад̇од̇и хздтаабхааг̇зна. авийжинираяанд̇и ж̇аалаанам̣ ваа сад̇д̇аанам̣ ваа взд̣̇анаанам̣ ваа вийжи анд̇арам̣ чид̣̇д̣̇ам̣ зд̇т̇а над̇т̇ийд̇и авийжи. сукасан̇каад̇о аяо зд̇т̇а над̇т̇ийд̇и нираяо, нирад̇иад̇т̇знаби нираяо. барияанд̇ам̣ гарид̇ваад̇и д̇ам̣ авийжисан̇каад̇ам̣ нираяам̣ анд̇ам̣ гад̇ваа. убарид̇од̇и убарибхааг̇зна. бараниммид̇авасавад̇д̇ий д̣̇звзд̇и бараниммид̇зсу гаамзсу васам̣ вад̇д̇анад̇о звам̣лад̣̇д̇хавохаарз д̣̇звз. анд̇о гарид̇ваад̇и анд̇о багкибид̇ваа. яам̣ зд̇асмим̣ анд̇арзд̇и яз зд̇асмим̣ огаасз. яанд̇и жа лин̇г̇аважанавибаллаасо гад̇о. зд̇т̇ааважараад̇и иминаа яасмаа д̇асмим̣ анд̇арз ан̃н̃зби жаранд̇и гад̣̇аажи гад̇т̇ажи самбхавад̇о, д̇асмаа д̇зсам̣ асан̇г̇ан̣ханад̇т̇ам̣ аважараад̇и вуд̇д̇ам̣. д̇зна яз згасмим̣ анд̇арз ог̇аал̣хаа худ̇ваа жаранд̇и, саб̣б̣ад̇т̇а сад̣̇аа жа самбхавад̇о, ад̇хобхааг̇з жа жаранд̇и авийжинираяасса хздтаа бхууд̇уубаад̣̇ааяа бавад̇д̇ибхаавзна, д̇зсам̣ сан̇г̇ахо гад̇о ход̇и. д̇з хи ог̇аал̣хаа жаранд̇и, ад̇хобхааг̇з жа жаранд̇ийд̇и аважараа. зд̇т̇а барияаабаннаад̇и иминаа бана яасмаа зд̇з зд̇т̇ааважараа ан̃н̃ад̇т̇ааби аважаранд̇и, на бана д̇ад̇т̇а барияаабаннаа хонд̇и, д̇асмаа д̇зсам̣ ан̃н̃ад̇т̇ааби аважаранд̇аанам̣ бариг̇г̇ахо гад̇о ход̇и.
Kāmāvacarādibhūminiddesesu heṭṭhatoti heṭṭhābhāgena. Avīcinirayanti jālānaṃ vā sattānaṃ vā vedanānaṃ vā vīci antaraṃ chiddaṃ ettha natthīti avīci. Sukhasaṅkhāto ayo ettha natthīti nirayo, niratiatthenapi nirayo. Pariyantaṃ karitvāti taṃ avīcisaṅkhātaṃ nirayaṃ antaṃ katvā. Uparitoti uparibhāgena. Paranimmitavasavattī deveti paranimmitesu kāmesu vasaṃ vattanato evaṃladdhavohāre deve. Anto karitvāti anto pakkhipitvā. Yaṃ etasmiṃ antareti ye etasmiṃ okāse. Yanti ca liṅgavacanavipallāso kato. Etthāvacarāti iminā yasmā tasmiṃ antare aññepi caranti kadāci katthaci sambhavato, tasmā tesaṃ asaṅgaṇhanatthaṃ avacarāti vuttaṃ. Tena ye ekasmiṃ antare ogāḷhā hutvā caranti, sabbattha sadā ca sambhavato, adhobhāge ca caranti avīcinirayassa heṭṭhā bhūtūpādāya pavattibhāvena, tesaṃ saṅgaho kato hoti. Te hi ogāḷhā caranti, adhobhāge ca carantīti avacarā. Ettha pariyāpannāti iminā pana yasmā ete etthāvacarā aññatthāpi avacaranti, na pana tattha pariyāpannā honti, tasmā tesaṃ aññatthāpi avacarantānaṃ pariggaho kato hoti.
ид̣̇аани д̇з зд̇т̇а барияаабаннз д̇хаммз раасисун̃н̃ад̇аабажжаяабхаавад̇о жзва сабхаавад̇о жа д̣̇ассзнд̇о канд̇хад̇хаад̇уааяад̇анаад̇иаад̣̇имааха. б̣рахмалоганд̇и батамаж̇жхаанабхуумисан̇каад̇ам̣ б̣рахмадтаанам̣. аганидтзд̇и уд̇д̇амадтзна на ганидтз. самаабаннассаад̇и самаабад̇д̇им̣ самаабаннасса. зд̇зна гусалаж̇жхаанам̣ вуд̇д̇ам̣. убабаннассаад̇и вибаагавасзна б̣рахмалогз убабаннасса. зд̇зна вибаагаж̇жхаанам̣ вуд̇д̇ам̣. д̣̇идтад̇хаммасукавихаариссаад̇и д̣̇идтзва д̇хаммз бажжагкз ад̇д̇абхаавз суко вихааро д̣̇идтад̇хаммасукавихааро, со асса ад̇т̇ийд̇и д̣̇идтад̇хаммасукавихаарий, арахаа. д̇асса д̣̇идтад̇хаммасукавихаарисса. зд̇зна гирияаж̇жхаанам̣ вуд̇д̇ам̣. жзд̇асигаад̇и жзд̇аси бхаваа жзд̇асигаа, жид̇д̇асамбаяуд̇д̇аад̇и ад̇т̇о. аагаасаанан̃жааяад̇ануубаг̇зд̇и аагаасаанан̃жааяад̇анасан̇каад̇ам̣ бхавам̣ убаг̇ад̇з. д̣̇уд̇ияабад̣̇зби зсзва наяо. маг̇г̇аад̇и жад̇д̇ааро арияамаг̇г̇аа. маг̇г̇апалаанийд̇и жад̇д̇аари арияамаг̇г̇апалаани. асан̇кад̇аа жа д̇хаад̇ууд̇и бажжаязхи агад̇аа ниб̣б̣аанад̇хаад̇у.
Idāni te ettha pariyāpanne dhamme rāsisuññatāpaccayabhāvato ceva sabhāvato ca dassento khandhadhātuāyatanātiādimāha. Brahmalokanti paṭhamajjhānabhūmisaṅkhātaṃ brahmaṭṭhānaṃ. Akaniṭṭheti uttamaṭṭhena na kaniṭṭhe. Samāpannassāti samāpattiṃ samāpannassa. Etena kusalajjhānaṃ vuttaṃ. Upapannassāti vipākavasena brahmaloke upapannassa. Etena vipākajjhānaṃ vuttaṃ. Diṭṭhadhammasukhavihārissāti diṭṭheva dhamme paccakkhe attabhāve sukho vihāro diṭṭhadhammasukhavihāro, so assa atthīti diṭṭhadhammasukhavihārī, arahā. Tassa diṭṭhadhammasukhavihārissa. Etena kiriyajjhānaṃ vuttaṃ. Cetasikāti cetasi bhavā cetasikā, cittasampayuttāti attho. Ākāsānañcāyatanūpageti ākāsānañcāyatanasaṅkhātaṃ bhavaṃ upagate. Dutiyapadepi eseva nayo. Maggāti cattāro ariyamaggā. Maggaphalānīti cattāri ariyamaggaphalāni. Asaṅkhatā ca dhātūti paccayehi akatā nibbānadhātu.
абарааби жад̇ассо бхуумияод̇и згзгажад̇уггавасзна взд̣̇ид̇аб̣б̣аа. жад̇д̇ааро сад̇ибадтаанаад̇и гааяаанубассанаасад̇ибадтаанам̣ взд̣̇анаанубассанаасад̇ибадтаанам̣ жид̇д̇аанубассанаасад̇ибадтаанам̣ д̇хаммаанубассанаасад̇ибадтаанам̣. д̇ассад̇т̇о – бад̇идтаад̇ийд̇и бадтаанам̣, убадтаад̇и огганд̣̇ид̇ваа багканд̣̇ид̇ваа бавад̇д̇ад̇ийд̇и ад̇т̇о. сад̇иязва бадтаанам̣ сад̇ибадтаанам̣. ат̇а ваа саран̣адтзна сад̇и, убадтаанадтзна бадтаанам̣, сад̇и жа саа бадтаанан̃жаад̇иби сад̇ибадтаанам̣. аарамман̣авасзна б̣ахугаа д̇аа сад̇ияод̇и сад̇ибадтаанаа. жад̇д̇ааро саммаббад̇хаанаад̇и ануббаннаанам̣ агусалаанам̣ ануббаад̣̇ааяа саммаббад̇хаанам̣, уббаннаанам̣ агусалаанам̣ бахаанааяа саммаббад̇хаанам̣, ануббаннаанам̣ гусалаанам̣ уббаад̣̇ааяа саммаббад̇хаанам̣, уббаннаанам̣ гусалаанам̣ тид̇ияаа саммаббад̇хаанам̣. бад̣̇аханд̇и вааяаманд̇и зд̇знаад̇и бад̇хаанам̣, вийрияассзд̇ам̣ наамам̣ . саммаббад̇хаананд̇и авибарийд̇аббад̇хаанам̣ гааран̣аббад̇хаанам̣ убааяаббад̇хаанам̣ яонисобад̇хаанам̣. згамзва вийрияам̣ гижжавасзна жад̇уд̇хаа гад̇ваа саммаббад̇хаанаад̇и вуд̇д̇ам̣. жад̇д̇ааро ид̣̇д̇хибаад̣̇аад̇и чанд̣̇ид̣̇д̇хибаад̣̇о, жид̇д̇ид̣̇д̇хибаад̣̇о, вийрияид̣̇д̇хибаад̣̇о, виймам̣сид̣̇д̇хибаад̣̇о. д̇ассад̇т̇о вуд̇д̇оязва. жад̇д̇аари жхаанаанийд̇и вид̇аггавижаарабийд̇исукажид̇д̇згаг̇г̇ад̇аавасзна бан̃жан̇г̇игам̣ батамаж̇жхаанам̣. бийд̇исукажид̇д̇згаг̇г̇ад̇аавасзна д̇иван̇г̇игам̣ д̣̇уд̇ияаж̇жхаанам̣, сукажид̇д̇агаг̇г̇ад̇аавасзна д̣̇уван̇г̇игам̣ д̇ад̇ияаж̇жхаанам̣, убзгкаажид̇д̇згаг̇г̇ад̇аавасзна д̣̇уван̇г̇игам̣ жад̇уд̇т̇аж̇жхаанам̣. имаани хи ан̇г̇аани аарамман̣уубаниж̇жхаанадтзна жхаананд̇и вужжанд̇и. жад̇ассо аббаман̃н̃ааяод̇и мзд̇д̇аа, гарун̣аа, муд̣̇ид̇аа, убзгкаа. паран̣ааббамаан̣авасзна аббаман̃н̃ааяо. зд̇ааяо хи аарамман̣авасзна аббамаан̣з ваа сад̇д̇з паранд̇и, згам̣ сад̇д̇амби ваа анавасзсапаран̣авасзна паранд̇ийд̇и паран̣ааббамаан̣авасзна аббаман̃н̃ааяод̇и вужжанд̇и. жад̇ассо аруубасамаабад̇д̇ияод̇и аагаасаанан̃жааяад̇анасамаабад̇д̇и, вин̃н̃аан̣ан̃жааяад̇анасамаабад̇д̇и, аагин̃жан̃н̃ааяад̇анасамаабад̇д̇и, нзвасан̃н̃аанаасан̃н̃ааяад̇анасамаабад̇д̇и. жад̇ассо бадисамбхид̣̇аа вуд̇д̇ад̇т̇аа зва.
Aparāpi catasso bhūmiyoti ekekacatukkavasena veditabbā. Cattāro satipaṭṭhānāti kāyānupassanāsatipaṭṭhānaṃ vedanānupassanāsatipaṭṭhānaṃ cittānupassanāsatipaṭṭhānaṃ dhammānupassanāsatipaṭṭhānaṃ. Tassattho – patiṭṭhātīti paṭṭhānaṃ, upaṭṭhāti okkanditvā pakkhanditvā pavattatīti attho. Satiyeva paṭṭhānaṃ satipaṭṭhānaṃ. Atha vā saraṇaṭṭhena sati, upaṭṭhānaṭṭhena paṭṭhānaṃ, sati ca sā paṭṭhānañcātipi satipaṭṭhānaṃ. Ārammaṇavasena bahukā tā satiyoti satipaṭṭhānā. Cattāro sammappadhānāti anuppannānaṃ akusalānaṃ anuppādāya sammappadhānaṃ, uppannānaṃ akusalānaṃ pahānāya sammappadhānaṃ, anuppannānaṃ kusalānaṃ uppādāya sammappadhānaṃ, uppannānaṃ kusalānaṃ ṭhitiyā sammappadhānaṃ. Padahanti vāyamanti etenāti padhānaṃ, vīriyassetaṃ nāmaṃ . Sammappadhānanti aviparītappadhānaṃ kāraṇappadhānaṃ upāyappadhānaṃ yonisopadhānaṃ. Ekameva vīriyaṃ kiccavasena catudhā katvā sammappadhānāti vuttaṃ. Cattāro iddhipādāti chandiddhipādo, cittiddhipādo, vīriyiddhipādo, vīmaṃsiddhipādo. Tassattho vuttoyeva. Cattāri jhānānīti vitakkavicārapītisukhacittekaggatāvasena pañcaṅgikaṃ paṭhamajjhānaṃ. Pītisukhacittekaggatāvasena tivaṅgikaṃ dutiyajjhānaṃ, sukhacittakaggatāvasena duvaṅgikaṃ tatiyajjhānaṃ, upekkhācittekaggatāvasena duvaṅgikaṃ catutthajjhānaṃ. Imāni hi aṅgāni ārammaṇūpanijjhānaṭṭhena jhānanti vuccanti. Catasso appamaññāyoti mettā, karuṇā, muditā, upekkhā. Pharaṇaappamāṇavasena appamaññāyo. Etāyo hi ārammaṇavasena appamāṇe vā satte pharanti, ekaṃ sattampi vā anavasesapharaṇavasena pharantīti pharaṇaappamāṇavasena appamaññāyoti vuccanti. Catasso arūpasamāpattiyoti ākāsānañcāyatanasamāpatti, viññāṇañcāyatanasamāpatti, ākiñcaññāyatanasamāpatti, nevasaññānāsaññāyatanasamāpatti. Catasso paṭisambhidā vuttatthā eva.
жад̇ассо бадибад̣̇аад̇и ‘‘д̣̇угкаа бадибад̣̇аа д̣̇анд̇хаабхин̃н̃аа, д̣̇угкаа бадибад̣̇аа киббаабхин̃н̃аа, сукаа бадибад̣̇аа д̣̇анд̇хаабхин̃н̃аа, сукаа бадибад̣̇аа киббаабхин̃н̃аа’’д̇и (д̣̇ий. ни. 3.311) вуд̇д̇аа жад̇ассо бадибад̣̇аа. жад̇д̇аари аарамман̣аанийд̇и барид̇д̇ам̣ барид̇д̇аарамман̣ам̣, барид̇д̇ам̣ аббамаан̣аарамман̣ам̣, аббамаан̣ам̣ барид̇д̇аарамман̣ам̣, аббамаан̣ам̣ аббамаан̣аарамман̣анд̇и (д̇ха. са. 181 аад̣̇аяо) вуд̇д̇аани жад̇д̇аари аарамман̣аани. гасин̣аад̣̇иаарамман̣аанам̣ ававад̇т̇аабзд̇аб̣б̣ад̇о аарамман̣аванд̇аани жхаанаани вуд̇д̇аанийд̇и взд̣̇ид̇аб̣б̣аани. жад̇д̇ааро арияавам̣саад̇и арияаа вужжанд̇и б̣уд̣̇д̇хаа жа бажжзгаб̣уд̣̇д̇хаа жа д̇ат̇ааг̇ад̇асаавагаа жа, д̇зсам̣ арияаанам̣ вам̣саа д̇анд̇ияо бавзн̣ияод̇и арияавам̣саа. гз бана д̇з? жийварасанд̇осо бин̣д̣абаад̇асанд̇осо сзнаасанасанд̇осо бхааванаараамад̇аад̇и имз жад̇д̇ааро. г̇илаанабажжаяасанд̇осо бин̣д̣абаад̇асанд̇осз вуд̇д̇з вуд̇д̇оязва ход̇и. яо хи бин̣д̣абаад̇з санд̇удто, со гат̇ам̣ г̇илаанабажжаяз асанд̇удто бхависсад̇и.
Catassopaṭipadāti ‘‘dukkhā paṭipadā dandhābhiññā, dukkhā paṭipadā khippābhiññā, sukhā paṭipadā dandhābhiññā, sukhā paṭipadā khippābhiññā’’ti (dī. ni. 3.311) vuttā catasso paṭipadā. Cattāri ārammaṇānīti parittaṃ parittārammaṇaṃ, parittaṃ appamāṇārammaṇaṃ, appamāṇaṃ parittārammaṇaṃ, appamāṇaṃ appamāṇārammaṇanti (dha. sa. 181 ādayo) vuttāni cattāri ārammaṇāni. Kasiṇādiārammaṇānaṃ avavatthāpetabbato ārammaṇavantāni jhānāni vuttānīti veditabbāni. Cattāro ariyavaṃsāti ariyā vuccanti buddhā ca paccekabuddhā ca tathāgatasāvakā ca, tesaṃ ariyānaṃ vaṃsā tantiyo paveṇiyoti ariyavaṃsā. Ke pana te? Cīvarasantoso piṇḍapātasantoso senāsanasantoso bhāvanārāmatāti ime cattāro. Gilānapaccayasantoso piṇḍapātasantose vutte vuttoyeva hoti. Yo hi piṇḍapāte santuṭṭho, so kathaṃ gilānapaccaye asantuṭṭho bhavissati.
жад̇д̇аари сан̇г̇ахавад̇т̇уунийд̇и жад̇д̇аари ж̇анасан̇г̇ан̣ханагааран̣аани – д̣̇аанан̃жа бзяяаваж̇ж̇ан̃жа ад̇т̇ажарияаа жа самаанад̇д̇ад̇аа жаад̇и имаани жад̇д̇аари. д̣̇аананд̇и яат̇аарахам̣ д̣̇аанам̣. бзяяаваж̇ж̇анд̇и яат̇аарахам̣ бияаважанам̣. ад̇т̇ажарияаад̇и д̇ад̇т̇а д̇ад̇т̇а гад̇д̇аб̣б̣асса гаран̣авасзна гад̇д̇аб̣б̣аагад̇д̇аб̣б̣аанусаасанавасзна жа вуд̣̇д̇хигирияаа. самаанад̇д̇ад̇аад̇и саха маанзна самаано, сабаримаан̣о сабариг̇ан̣анод̇и ад̇т̇о. самаано барасса ад̇д̇аа зд̇знаад̇и самаанад̇д̇о, самаанад̇д̇асса бхааво самаанад̇д̇ад̇аа, ‘‘аяам̣ маяаа хийно, аяам̣ маяаа сад̣̇исо, аяам̣ маяаа ад̇хиго’’д̇и бариг̇ан̣зд̇ваа д̇ад̣̇ануруубзна убажаран̣ам̣ гаран̣анд̇и ад̇т̇о. ‘‘самаанасукад̣̇угкад̇аа самаанад̇д̇ад̇аа’’д̇и жа вад̣̇анд̇и.
Cattāri saṅgahavatthūnīti cattāri janasaṅgaṇhanakāraṇāni – dānañca peyyavajjañca atthacariyā ca samānattatā cāti imāni cattāri. Dānanti yathārahaṃ dānaṃ. Peyyavajjanti yathārahaṃ piyavacanaṃ. Atthacariyāti tattha tattha kattabbassa karaṇavasena kattabbākattabbānusāsanavasena ca vuddhikiriyā. Samānattatāti saha mānena samāno, saparimāṇo saparigaṇanoti attho. Samāno parassa attā etenāti samānatto, samānattassa bhāvo samānattatā, ‘‘ayaṃ mayā hīno, ayaṃ mayā sadiso, ayaṃ mayā adhiko’’ti parigaṇetvā tadanurūpena upacaraṇaṃ karaṇanti attho. ‘‘Samānasukhadukkhatā samānattatā’’ti ca vadanti.
жад̇д̇аари жаггаанийд̇и зд̇т̇а жаггам̣ наама д̣̇ааружаггам̣, рад̇анажаггам̣, д̇хаммажаггам̣, ирияаабат̇ажаггам̣, самбад̇д̇ижагганд̇и бан̃жавид̇хам̣. д̇ад̇т̇а ‘‘яам̣ бана д̇ам̣, д̣̇зва, жаггам̣ чахи маасзхи нидтид̇ам̣ чаарад̇д̇уунзхий’’д̇и (а. ни. 3.15) ид̣̇ам̣ д̣̇ааружаггам̣. ‘‘жаггам̣ вад̇д̇аяад̇о бариг̇г̇ахзд̇ваа’’д̇и (ж̇аа. 1.13.68) ид̣̇ам̣ рад̇анажаггам̣. ‘‘маяаа бавад̇д̇ид̇ам̣ жагга’’нд̇и (су. ни. 562) ид̣̇ам̣ д̇хаммажаггам̣. ‘‘жад̇ужаггам̣ навад̣̇ваара’’нд̇и (сам̣. ни. 1.29) ид̣̇ам̣ ирияаабат̇ажаггам̣. ‘‘жад̇д̇ааримаани , бхигкавз, жаггаани, язхи саманнааг̇ад̇аанам̣ д̣̇звамануссаанам̣ жад̇ужаггам̣ вад̇д̇ад̇и. гад̇амаани жад̇д̇аари? бад̇ируубад̣̇зсаваасо, саббурисаавассаяо, ад̇д̇асаммаабан̣ид̇хи, буб̣б̣з жа гад̇абун̃н̃ад̇аа’’д̇и (а. ни. 4.31) ид̣̇ам̣ самбад̇д̇ижаггам̣. ид̇хааби зд̇ад̣̇зва ад̇хиббзд̇ам̣. д̇ад̇т̇а бад̇ируубад̣̇зсаваасод̇и яад̇т̇а жад̇ассо барисаа санд̣̇иссанд̇и, зваруубз анужчавигз д̣̇зсз ваасо. саббурисаавассаяод̇и б̣уд̣̇д̇хаад̣̇ийнам̣ саббурисаанам̣ авассаяанам̣ сзванам̣ бхаж̇анам̣. ад̇д̇асаммаабан̣ид̇хийд̇и ад̇д̇ано саммаа бад̇идтаабанам̣. сажз буб̣б̣з ассад̣̇д̇хаад̣̇ийхи саманнааг̇ад̇о ход̇и, д̇аани бахааяа сад̣̇д̇хаад̣̇ийсу бад̇идтаабанам̣. буб̣б̣з жа гад̇абун̃н̃ад̇аад̇и буб̣б̣з убажид̇агусалад̇аа. ид̣̇амзва жзд̇т̇а бамаан̣ам̣. язна хи н̃аан̣асамбаяуд̇д̇ажид̇д̇зна гусалагаммам̣ гад̇ам̣ ход̇и, д̇ад̣̇зва гусалам̣ д̇ам̣ бурисам̣ бад̇ируубад̣̇зсз убанзд̇и, саббурисз бхаж̇аабзд̇и, со зва буг̇г̇ало ад̇д̇аанам̣ саммаа табзд̇ийд̇и.
Cattāri cakkānīti ettha cakkaṃ nāma dārucakkaṃ, ratanacakkaṃ, dhammacakkaṃ, iriyāpathacakkaṃ, sampatticakkanti pañcavidhaṃ. Tattha ‘‘yaṃ pana taṃ, deva, cakkaṃ chahi māsehi niṭṭhitaṃ chārattūnehī’’ti (a. ni. 3.15) idaṃ dārucakkaṃ. ‘‘Cakkaṃ vattayato pariggahetvā’’ti (jā. 1.13.68) idaṃ ratanacakkaṃ. ‘‘Mayā pavattitaṃ cakka’’nti (su. ni. 562) idaṃ dhammacakkaṃ. ‘‘Catucakkaṃ navadvāra’’nti (saṃ. ni. 1.29) idaṃ iriyāpathacakkaṃ. ‘‘Cattārimāni , bhikkhave, cakkāni, yehi samannāgatānaṃ devamanussānaṃ catucakkaṃ vattati. Katamāni cattāri? Patirūpadesavāso, sappurisāvassayo, attasammāpaṇidhi, pubbe ca katapuññatā’’ti (a. ni. 4.31) idaṃ sampatticakkaṃ. Idhāpi etadeva adhippetaṃ. Tattha patirūpadesavāsoti yattha catasso parisā sandissanti, evarūpe anucchavike dese vāso. Sappurisāvassayoti buddhādīnaṃ sappurisānaṃ avassayanaṃ sevanaṃ bhajanaṃ. Attasammāpaṇidhīti attano sammā patiṭṭhāpanaṃ. Sace pubbe assaddhādīhi samannāgato hoti, tāni pahāya saddhādīsu patiṭṭhāpanaṃ. Pubbe ca katapuññatāti pubbe upacitakusalatā. Idameva cettha pamāṇaṃ. Yena hi ñāṇasampayuttacittena kusalakammaṃ kataṃ hoti, tadeva kusalaṃ taṃ purisaṃ patirūpadese upaneti, sappurise bhajāpeti, so eva puggalo attānaṃ sammā ṭhapetīti.
жад̇д̇аари д̇хаммабад̣̇аанийд̇и жад̇д̇ааро д̇хаммагодтаасаа. гад̇амаани жад̇д̇аари? анабхиж̇жхаа д̇хаммабад̣̇ам̣, аб̣яаабаад̣̇о д̇хаммабад̣̇ам̣, саммаасад̇и д̇хаммабад̣̇ам̣, саммаасамаад̇хи д̇хаммабад̣̇ам̣. анабхиж̇жхаа д̇хаммабад̣̇ам̣ наама алобхо ваа анабхиж̇жхаавасзна ад̇хиг̇ад̇аж̇жхаанавибассанаамаг̇г̇апаланиб̣б̣аанаани ваа. аб̣яаабаад̣̇о д̇хаммабад̣̇ам̣ наама агобо ваа мзд̇д̇аасийсзна ад̇хиг̇ад̇аж̇жхаанаад̣̇ийни ваа. саммаасад̇и д̇хаммабад̣̇ам̣ наама суубадтид̇ассад̇и ваа сад̇исийсзна ад̇хиг̇ад̇аж̇жхаанаад̣̇ийни ваа. саммаасамаад̇хи д̇хаммабад̣̇ам̣ наама адтасамаабад̇д̇и ваа адтасамаабад̇д̇исийсзна ад̇хиг̇ад̇аж̇жхаанаад̣̇ийни ваа. д̣̇асаасубхавасзна ваа ад̇хиг̇ад̇аж̇жхаанаад̣̇ийни анабхиж̇жхаа д̇хаммабад̣̇ам̣, жад̇уб̣рахмавихааравасзна ад̇хиг̇ад̇аани аб̣яаабаад̣̇о д̇хаммабад̣̇ам̣, д̣̇асаануссад̇иаахаарзбадигууласан̃н̃аавасзна ад̇хиг̇ад̇аани саммаасад̇и д̇хаммабад̣̇ам̣, д̣̇асагасин̣ааанаабаанавасзна ад̇хиг̇ад̇аани саммаасамаад̇хи д̇хаммабад̣̇анд̇и. имаа жад̇ассо бхуумияод̇и згзгам̣ жад̇уггавасзнзва яож̇зд̇аб̣б̣ам̣.
Cattāri dhammapadānīti cattāro dhammakoṭṭhāsā. Katamāni cattāri? Anabhijjhā dhammapadaṃ, abyāpādo dhammapadaṃ, sammāsati dhammapadaṃ, sammāsamādhi dhammapadaṃ. Anabhijjhā dhammapadaṃ nāma alobho vā anabhijjhāvasena adhigatajjhānavipassanāmaggaphalanibbānāni vā. Abyāpādo dhammapadaṃ nāma akopo vā mettāsīsena adhigatajjhānādīni vā. Sammāsati dhammapadaṃ nāma sūpaṭṭhitassati vā satisīsena adhigatajjhānādīni vā. Sammāsamādhi dhammapadaṃ nāma aṭṭhasamāpatti vā aṭṭhasamāpattisīsena adhigatajjhānādīni vā. Dasaasubhavasena vā adhigatajjhānādīni anabhijjhā dhammapadaṃ, catubrahmavihāravasena adhigatāni abyāpādo dhammapadaṃ, dasānussatiāhārepaṭikūlasaññāvasena adhigatāni sammāsati dhammapadaṃ, dasakasiṇaānāpānavasena adhigatāni sammāsamādhi dhammapadanti. Imā catasso bhūmiyoti ekekaṃ catukkavaseneva yojetabbaṃ.
бхууминаанад̇д̇ан̃аан̣анид̣̇д̣̇зсаван̣н̣анаа нидтид̇аа.
Bhūminānattañāṇaniddesavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / куд̣̇д̣̇аганигааяа • Khuddakanikāya / бадисамбхид̣̇аамаг̇г̇абаал̣и • Paṭisambhidāmaggapāḷi / 18. бхууминаанад̇д̇ан̃аан̣анид̣̇д̣̇зсо • 18. Bhūminānattañāṇaniddeso
