| Library / Tipiṭaka / திபிடக • Tipiṭaka / கு²த்³த³ஸிக்கா²-மூலஸிக்கா² • Khuddasikkhā-mūlasikkhā |
14. பூ⁴மினித்³தே³ஸவண்ணனா
14. Bhūminiddesavaṇṇanā
136. யாஸு வுத்த²ங் பக்கஞ்ச கப்பதி, தா கப்பியா பூ⁴மியோ ஸம்முதி ச ஸம்முதிகுடி ச…பே॰… க³ஹபதி ச க³ஹபதிகுடி சாதி இமா சதஸ்ஸோ ஹொந்தீதி யோஜெத்வா அத்தோ² வேதி³தப்³போ³. தத்த² பே⁴ஸஜ்ஜக்க²ந்த⁴கே (மஹாவ॰ 295) வுத்தாய உத்திது³தியகம்மவாசாய, அபலோகனகம்மவஸேன வா ஸாவெத்வா ஸம்மா உத்திஸம்பன்னங் கரீயதீதி ஸம்முதி, த²ம்பா⁴னங் பி⁴த்திபாதா³னங் வா உக்³க³மனங் உத்³த⁴ங் கத்வா ட²பனங், ‘‘கப்பியகுடிங் கரோமா’’தி வாசாய ஸாவனஞ்ச அந்தங் யஸ்ஸா ஸா உஸ்ஸாவனந்தா. ததா² ச வுத்தங் ‘‘த²ம்ப⁴ப்பதிட்டா²னஞ்ச வசனபரியோஸானஞ்ச ஸமகாலங் வட்டதீ’’தி (மஹாவ॰ அட்ட²॰ 295). நிஸாத³னங் பவிஸனங் ஸன்னிவேஸனங் நிஸாதோ³, கு³ன்னங் விய நிஸாதோ³ ஏதிஸ்ஸாதி கோ³னிஸாதி³. பி⁴க்கு²ங் ட²பெத்வா ஸேஸஸஹத⁴ம்மிகா ஸப்³பே³ ச தே³வமனுஸ்ஸா இத⁴ க³ஹபதீதி ஸாமஞ்ஞேன அதி⁴ப்பேதா. எத்த² பன க³ஹபதிஸம்ப³ந்தி⁴னீ குடி தீ³கே⁴ன க³ஹபதீ.
136. Yāsu vutthaṃ pakkañca kappati, tā kappiyā bhūmiyo sammuti ca sammutikuṭi ca…pe… gahapati ca gahapatikuṭi cāti imā catasso hontīti yojetvā attho veditabbo. Tattha bhesajjakkhandhake (mahāva. 295) vuttāya uttidutiyakammavācāya, apalokanakammavasena vā sāvetvā sammā uttisampannaṃ karīyatīti sammuti, thambhānaṃ bhittipādānaṃ vā uggamanaṃ uddhaṃ katvā ṭhapanaṃ, ‘‘kappiyakuṭiṃ karomā’’ti vācāya sāvanañca antaṃ yassā sā ussāvanantā. Tathā ca vuttaṃ ‘‘thambhappatiṭṭhānañca vacanapariyosānañca samakālaṃ vaṭṭatī’’ti (mahāva. aṭṭha. 295). Nisādanaṃ pavisanaṃ sannivesanaṃ nisādo, gunnaṃ viya nisādo etissāti gonisādi. Bhikkhuṃ ṭhapetvā sesasahadhammikā sabbe ca devamanussā idha gahapatīti sāmaññena adhippetā. Ettha pana gahapatisambandhinī kuṭi dīghena gahapatī.
‘‘யங் பன அகப்பியபூ⁴மியங் ஸஹஸெய்யப்பஹோனகே கே³ஹே வுத்த²’’ந்தி (மஹாவ॰ அட்ட²॰ 295) அட்ட²கதா²வசனதோ யங் ஸங்கோ⁴ ஆகங்க²தி விஹாரங் வா அட்³ட⁴யோக³ங் வா பாஸாத³ங் வா ஹம்மியங் வா கு³ஹங் வா லேணாதி³ங் வா, தேஸம்பி ஸாமஞ்ஞவசனங் விஞ்ஞாயதீதி தங்தங்லக்க²ணப்பத்தா ஸஹஸெய்யப்பஹோனகா லேணாத³யோ சதூஸ்வேவ குடீஸு அந்தோக³தா⁴தி வேதி³தப்³ப³ங். இமாஸு சதூஸு ஸஹஸெய்யப்பஹோனகே பதே³ஸே யங் ஸங்கி⁴கங் புக்³க³லிகங் வா பி⁴க்கு²ஸந்தகங் ஏகரத்தம்பி அந்தோவுத்த²ங் அனுபஸம்பன்னேன பக்கஞ்ச யாவகாலிகங் யாமகாலிகஞ்ச அந்தோவுத்த²அந்தோபக்கஸங்க²ங் ந க³ச்ச²தி, கோ பன வாதோ³ இதரத்³வயே. தங் பன அகப்பியபூ⁴மியம்பி வுத்த²ங் பக்கஞ்ச வட்டதி. தேன வுத்தங் ‘‘யாஸு வுத்த²ங் பக்கஞ்ச கப்பதீ’’தி.
‘‘Yaṃ pana akappiyabhūmiyaṃ sahaseyyappahonake gehe vuttha’’nti (mahāva. aṭṭha. 295) aṭṭhakathāvacanato yaṃ saṅgho ākaṅkhati vihāraṃ vā aḍḍhayogaṃ vā pāsādaṃ vā hammiyaṃ vā guhaṃ vā leṇādiṃ vā, tesampi sāmaññavacanaṃ viññāyatīti taṃtaṃlakkhaṇappattā sahaseyyappahonakā leṇādayo catūsveva kuṭīsu antogadhāti veditabbaṃ. Imāsu catūsu sahaseyyappahonake padese yaṃ saṅghikaṃ puggalikaṃ vā bhikkhusantakaṃ ekarattampi antovutthaṃ anupasampannena pakkañca yāvakālikaṃ yāmakālikañca antovutthaantopakkasaṅkhaṃ na gacchati, ko pana vādo itaradvaye. Taṃ pana akappiyabhūmiyampi vutthaṃ pakkañca vaṭṭati. Tena vuttaṃ ‘‘yāsu vutthaṃ pakkañca kappatī’’ti.
137. வாஸத்தா²ய கதே ஸங்கி⁴கே வா ஏகஸந்தகே வா ஸஹஸெய்யப்பஹோனகே கே³ஹே கப்பியாகுடி லத்³த⁴ப்³பா³தி ஸம்ப³ந்தோ⁴. தத்த² வாஸத்தா²யாதி இமினா அவாஸத்தா²ய கதங் நிவத்தேதி. ஏகஸந்தகேதி ஏகஸ்ஸ பி⁴க்கு²னோ ஸந்தகே. கப்பியாகுடீதி பா⁴வப்பதா⁴னோயங் நித்³தே³ஸோ, ந ஹி கே³ஹே கே³ஹங் லத்³து⁴ங் யுஜ்ஜதீதி கப்பியகுடிதாதி அத்தோ². தீ³கோ⁴ பன கா³தா²வஸேன, கப்பியா குடிதாதி வா விஸேஸனவஸேன த³ட்ட²ப்³ப³ங். ஸஹஸெய்யப்பஹோனகேதி எத்த² ஸஹஸெய்யப்பஹோனகங் வாஸாகா³ரலக்க²ணே வுத்தலக்க²ணங் ஸேனாஸனங்.
137. Vāsatthāya kate saṅghike vā ekasantake vā sahaseyyappahonake gehe kappiyākuṭi laddhabbāti sambandho. Tattha vāsatthāyāti iminā avāsatthāya kataṃ nivatteti. Ekasantaketi ekassa bhikkhuno santake. Kappiyākuṭīti bhāvappadhānoyaṃ niddeso, na hi gehe gehaṃ laddhuṃ yujjatīti kappiyakuṭitāti attho. Dīgho pana gāthāvasena, kappiyā kuṭitāti vā visesanavasena daṭṭhabbaṃ. Sahaseyyappahonaketi ettha sahaseyyappahonakaṃ vāsāgāralakkhaṇe vuttalakkhaṇaṃ senāsanaṃ.
138. இதா³னி தா குடியோ கமேன த³ஸ்ஸெத்வா தத்த² படிபஜ்ஜிதப்³ப³விதி⁴ங், தாஸங் ஸப்³ப³தா²பக³மஞ்ச த³ஸ்ஸேதுங் ‘‘கே³ஹே’’திஆதி³மாஹ. தத்த² ‘‘கப்பியகுடிங் கரோம, கப்பியகுடிங் கரோமா’’தி ஏவமீரயந்தி ஸம்ப³ந்தோ⁴. இட்ட²கா ச த²ம்பா⁴ ச ‘‘இட்ட²காத²ம்பா⁴’’தி வத்தப்³பே³ ரஸ்ஸோ. இட்ட²கத²ம்பா⁴ ஆதி³ யஸ்ஸ பி⁴த்திபாஸாத³ஸ்ஸாதி ப³ஹுப்³பீ³ஹி. பச்சா² பட²மஸத்³தே³ன கம்மதா⁴ரயோ. ‘‘ட²பெய்ய சே, ஸா உஸ்ஸாவனந்திகா’’தி ஏவங் சே-ஸா-ஸத்³தே³ யோஜெத்வா அத்தோ² வேதி³தப்³போ³.
138. Idāni tā kuṭiyo kamena dassetvā tattha paṭipajjitabbavidhiṃ, tāsaṃ sabbathāpagamañca dassetuṃ ‘‘gehe’’tiādimāha. Tattha ‘‘kappiyakuṭiṃ karoma, kappiyakuṭiṃ karomā’’ti evamīrayanti sambandho. Iṭṭhakā ca thambhā ca ‘‘iṭṭhakāthambhā’’ti vattabbe rasso. Iṭṭhakathambhā ādi yassa bhittipāsādassāti bahubbīhi. Pacchā paṭhamasaddena kammadhārayo. ‘‘Ṭhapeyya ce, sā ussāvanantikā’’ti evaṃ ce-sā-sadde yojetvā attho veditabbo.
139. ஸகலோ அபரிக்கி²த்தோ ஆராமோபி வாதி ஸம்ப³ந்தோ⁴. ஸேனாஸனங் பரிக்கி²த்தங் வா ஹோது, அபரிக்கி²த்தங் வா, ந தங் பமாணங்.
139. Sakalo aparikkhitto ārāmopi vāti sambandho. Senāsanaṃ parikkhittaṃ vā hotu, aparikkhittaṃ vā, na taṃ pamāṇaṃ.
140. அஞ்ஞேஹி கப்பியகுடியா அத்தா²ய தி³ன்னோ வா தேஸங் ஸந்தகோ வாதி யோஜனா.
140. Aññehi kappiyakuṭiyā atthāya dinno vā tesaṃ santako vāti yojanā.
141. அவிரோத⁴பா⁴வேன கப்பனீயா கப்பா, கப்ப ஸாமத்தி²யமிச்சேதஸ்மா இத்தி²யங் ஆபச்சயே ரூபங், ந கப்பா அகப்பா, அகப்பா ச ஸா குடி சேதி அகப்பகுடி, தாய. ஸப்பிஆதீ³தி இமினா ஸத்தாஹகாலிகங் யாவஜீவிகஞ்ச க³ஹிதங்.
141. Avirodhabhāvena kappanīyā kappā, kappa sāmatthiyamiccetasmā itthiyaṃ āpaccaye rūpaṃ, na kappā akappā, akappā ca sā kuṭi ceti akappakuṭi, tāya. Sappiādīti iminā sattāhakālikaṃ yāvajīvikañca gahitaṃ.
142. தேஹேவாதி அகப்பகுடியங் வுத்த²ஸப்பிஆதீ³ஹி ஏவ ஸத்³தி⁴ங் ஸத்தாஹகாலிகஸங்ஸட்ட²தாய ‘‘ஸத்தாஹங் கப்பதே’’தி வுத்தங். ஸாமிஸேதி ஆமிஸஸங்கா²தேன புரிமத்³வயேன ஸஹிதே. ஸாமபாகதாதி ஸாமங் அத்தனா பாகோ ஏதஸ்ஸாதி ஸாமபாகங், ஸத்தாஹகாலிகேன ஸஹ பக்கங் ஸாமிஸங் யாவஜீவிகங், தஸ்ஸ பா⁴வோ ஸாமபாகதா. ஸயங் பக்கங் தங் அத்தனா ஸங்ஸட்ட²தாய தம்பி ஆமிஸங் ஸாமபாகக³திகங் கரோதீதி தஸ்ஸ ஸாமபாகதா ஹோதீதி அதி⁴ப்பாயோ.
142.Tehevāti akappakuṭiyaṃ vutthasappiādīhi eva saddhiṃ sattāhakālikasaṃsaṭṭhatāya ‘‘sattāhaṃ kappate’’ti vuttaṃ. Sāmiseti āmisasaṅkhātena purimadvayena sahite. Sāmapākatāti sāmaṃ attanā pāko etassāti sāmapākaṃ, sattāhakālikena saha pakkaṃ sāmisaṃ yāvajīvikaṃ, tassa bhāvo sāmapākatā. Sayaṃ pakkaṃ taṃ attanā saṃsaṭṭhatāya tampi āmisaṃ sāmapākagatikaṃ karotīti tassa sāmapākatā hotīti adhippāyo.
143. அதி⁴ட்டி²தாதி பதிட்டி²தா. ஏவ-ஸத்³தோ³ திட்ட²திஸத்³த³ஸ்ஸ அந்தே த³ட்ட²ப்³போ³.
143.Adhiṭṭhitāti patiṭṭhitā. Eva-saddo tiṭṭhatisaddassa ante daṭṭhabbo.
144. ஸப்³பே³ஸூதி த²ம்பா⁴தீ³ஸு ஸகலேஸு. ஜஹிதங் வத்து² குடிபூ⁴மி யஸ்ஸா ஜஹிதவத்து²கா. பரிக்கி²த்தே ஜஹிதவத்து²காதி ஸம்ப³ந்தோ⁴. ஸேஸாதி இதரா த்³வே குடியோ. ச²த³னவிப்³ப⁴மாதி ச²த³னஸ்ஸ வினாஸா. எத்தா²பி ‘‘ஜஹிதவத்து²கா’’தி ஆனேதப்³ப³ந்தி.
144.Sabbesūti thambhādīsu sakalesu. Jahitaṃ vatthu kuṭibhūmi yassā jahitavatthukā. Parikkhitte jahitavatthukāti sambandho. Sesāti itarā dve kuṭiyo. Chadanavibbhamāti chadanassa vināsā. Etthāpi ‘‘jahitavatthukā’’ti ānetabbanti.
பூ⁴மினித்³தே³ஸவண்ணனா நிட்டி²தா.
Bhūminiddesavaṇṇanā niṭṭhitā.
