| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៤៥២. ភូរិបញ្ញជាតកំ (១៤)
452. Bhūripaññajātakaṃ (14)
១៤៥.
145.
សច្ចំ កិរ ត្វំ អបិ 1 ភូរិបញ្ញ, យា តាទិសី សីរិ ធិតី មតី ច;
Saccaṃ kira tvaṃ api 2 bhūripañña, yā tādisī sīri dhitī matī ca;
ន តាយតេភាវវសូបនិតំ, យោ យវកំ ភុញ្ជសិ អប្បសូបំ។
Na tāyatebhāvavasūpanitaṃ, yo yavakaṃ bhuñjasi appasūpaṃ.
១៤៦.
146.
សុខំ ទុក្ខេន បរិបាចយន្តោ, កាលា កាលំ វិចិនំ ឆន្ទឆន្នោ;
Sukhaṃ dukkhena paripācayanto, kālā kālaṃ vicinaṃ chandachanno;
អត្ថស្ស ទ្វារានិ អវាបុរន្តោ, តេនាហំ តុស្សាមិ យវោទនេន។
Atthassa dvārāni avāpuranto, tenāhaṃ tussāmi yavodanena.
១៤៧.
147.
កាលញ្ច ញត្វា អភិជីហនាយ, មន្តេហិ អត្ថំ បរិបាចយិត្វា;
Kālañca ñatvā abhijīhanāya, mantehi atthaṃ paripācayitvā;
វិជម្ភិស្សំ សីហវិជម្ភិតានិ, តាយិទ្ធិយា ទក្ខសិ មំ បុនាបិ។
Vijambhissaṃ sīhavijambhitāni, tāyiddhiyā dakkhasi maṃ punāpi.
១៤៨.
148.
សុខីបិ ហេកេ 3 ន ករោន្តិ បាបំ, អវណ្ណសំសគ្គភយា បុនេកេ;
Sukhīpi heke 4 na karonti pāpaṃ, avaṇṇasaṃsaggabhayā puneke;
បហូ សមានោ វិបុលត្ថចិន្តី, កិំការណា មេ ន ករោសិ ទុក្ខំ។
Pahū samāno vipulatthacintī, kiṃkāraṇā me na karosi dukkhaṃ.
១៤៩.
149.
ន បណ្ឌិតា អត្តសុខស្ស ហេតុ, បាបានិ កម្មានិ សមាចរន្តិ;
Na paṇḍitā attasukhassa hetu, pāpāni kammāni samācaranti;
ទុក្ខេន ផុដ្ឋា ខលិតាបិ សន្តា, ឆន្ទា ច ទោសា ន ជហន្តិ ធម្មំ។
Dukkhena phuṭṭhā khalitāpi santā, chandā ca dosā na jahanti dhammaṃ.
១៥០.
150.
យេន កេនចិ វណ្ណេន, មុទុនា ទារុណេន វា;
Yena kenaci vaṇṇena, mudunā dāruṇena vā;
ឧទ្ធរេ ទីនមត្តានំ, បច្ឆា ធម្មំ សមាចរេ។
Uddhare dīnamattānaṃ, pacchā dhammaṃ samācare.
១៥១.
151.
យស្ស រុក្ខស្ស ឆាយាយ, និសីទេយ្យ សយេយ្យ វា;
Yassa rukkhassa chāyāya, nisīdeyya sayeyya vā;
ន តស្ស សាខំ ភញ្ជេយ្យ, មិត្តទុព្ភោ ហិ បាបកោ។
Na tassa sākhaṃ bhañjeyya, mittadubbho hi pāpako.
១៥២.
152.
តំ ហិស្ស ទីបញ្ច បរាយនញ្ច, ន តេន មេត្តិំ ជរយេថ បញ្ញោ។
Taṃ hissa dīpañca parāyanañca, na tena mettiṃ jarayetha pañño.
១៥៣.
153.
អលសោ គិហី កាមភោគី ន សាធុ, អសញ្ញតោ បព្ពជិតោ ន សាធុ;
Alaso gihī kāmabhogī na sādhu, asaññato pabbajito na sādhu;
រាជា ន សាធុ អនិសម្មការី, យោ បណ្ឌិតោ កោធនោ តំ ន សាធុ។
Rājā na sādhu anisammakārī, yo paṇḍito kodhano taṃ na sādhu.
១៥៤.
154.
និសម្ម ខត្តិយោ កយិរា, នានិសម្ម ទិសម្បតិ;
Nisamma khattiyo kayirā, nānisamma disampati;
និសម្មការិនោ រាជ, យសោ កិត្តិ ច វឌ្ឍតីតិ។
Nisammakārino rāja, yaso kitti ca vaḍḍhatīti.
ភូរិបញ្ញជាតកំ ចុទ្ទសមំ។
Bhūripaññajātakaṃ cuddasamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤៥២] ១៤. ភូរិបញ្ញជាតកវណ្ណនា • [452] 14. Bhūripaññajātakavaṇṇanā
