| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
2. бхууд̇аг̇аамаваг̇г̇о
2. Bhūtagāmavaggo
1. бхууд̇аг̇аамасигкаабад̣̇аван̣н̣анаа
1. Bhūtagāmasikkhāpadavaṇṇanā
‘‘бхаванд̇ий’’д̇и (саарад̇т̇а. дий. баажид̇д̇ияа 3.90) иминаа вирул̣хамуулз нийлабхаавам̣ аабаж̇ж̇ид̇ваа вад̣дхамаанагз д̇арун̣аг̇ажчз д̣̇ассзд̇и. ‘‘ахзсу’’нд̇и иминаа бана вад̣дхид̇ваа тид̇з маханд̇з ругкаг̇ажчаад̣̇игз д̣̇ассзд̇и. д̇знааха ‘‘ж̇ааяанд̇ий’’д̇иаад̣̇и. зд̇т̇а жа ‘‘бхаванд̇ий’’д̇и имасса виваран̣ам̣ ‘‘ж̇ааяанд̇и вад̣дханд̇ий’’д̇и, ‘‘ахзсу’’нд̇и имасса ‘‘ж̇аад̇аа вад̣дхид̇аа’’д̇и. г̇аамод̇и самуухо. бад̇идтид̇ахарид̇ад̇ин̣аругкаад̣̇ийнанд̇и бхуумияам̣ бад̇идтид̇асса харид̇ад̇ин̣асса жзва харид̇аругкаад̣̇ийнан̃жа. аад̣̇исад̣̇д̣̇зна осад̇хиг̇ажчалад̇аад̣̇аяо взд̣̇ид̇аб̣б̣аа. нимид̇д̇ад̇т̇з жа бхуммам̣. яо ад̇т̇о самбаж̇ж̇ад̇и, д̇амааха ‘‘бхууд̇аг̇аамабаад̇аб̣яад̇ааяаа’’д̇иаад̣̇инаа.
‘‘Bhavantī’’ti (sārattha. ṭī. pācittiya 3.90) iminā viruḷhamūle nīlabhāvaṃ āpajjitvā vaḍḍhamānake taruṇagacche dasseti. ‘‘Ahesu’’nti iminā pana vaḍḍhitvā ṭhite mahante rukkhagacchādike dasseti. Tenāha ‘‘jāyantī’’tiādi. Ettha ca ‘‘bhavantī’’ti imassa vivaraṇaṃ ‘‘jāyanti vaḍḍhantī’’ti, ‘‘ahesu’’nti imassa ‘‘jātā vaḍḍhitā’’ti. Gāmoti samūho. Patiṭṭhitaharitatiṇarukkhādīnanti bhūmiyaṃ patiṭṭhitassa haritatiṇassa ceva haritarukkhādīnañca. Ādisaddena osadhigacchalatādayo veditabbā. Nimittatthe ca bhummaṃ. Yo attho sampajjati, tamāha ‘‘bhūtagāmapātabyatāyā’’tiādinā.
нану жа ругкаад̣̇аяо жид̇д̇арахид̇ад̇ааяа на ж̇ийваа, жид̇д̇арахид̇ад̇аа жа барипанд̣̇аабхаавад̇о, чиннзби вируханад̇о, висад̣̇исаж̇аад̇игабхаавад̇о, жад̇уяонияам̣ абарияаабаннад̇о жа взд̣̇ид̇аб̣б̣аа, вуд̣дхи бана баваал̣асилаалаван̣аанамби виж̇ж̇ад̇ийд̇и на д̇зсам̣ ж̇ийвабхаавз гааран̣ам̣, висаяаг̇г̇ахан̣ан̃жа нзсам̣ баригаббанаамад̇д̇ам̣ субанам̣ вияа жин̃жаад̣̇ийнам̣, д̇ат̇аа д̣̇охал̣аад̣̇аяо, ат̇а гасмаа бхууд̇аг̇аамасса баад̇аб̣яад̇ааяа баажид̇д̇ияам̣ ижчид̇анд̇и? саман̣аасааруббад̇о, д̇анниссид̇асад̇д̇аанурагкан̣ад̇о жа. д̇знзвааха ‘‘ж̇ийвасан̃н̃ино хи могхабурисаа мануссаа ругкасми’’нд̇иаад̣̇и (баажи. 89). саасабаб̣ийж̇агасзвааламбийд̇и саасабаб̣ийж̇агасан̇каад̇ам̣ сзвааламби, саасабасзваалам̣, б̣ийж̇агасзвааламбийд̇и ад̇т̇о. д̇ад̇т̇а саасабасзваало наама саасабамад̇д̇о куд̣̇д̣̇агасзваало. б̣ийж̇агасзваало наама убари куд̣̇д̣̇агабад̇д̇о хздтаа куд̣̇д̣̇агамууло сзваало.
Nanu ca rukkhādayo cittarahitatāya na jīvā, cittarahitatā ca pariphandābhāvato, chinnepi viruhanato, visadisajātikabhāvato, catuyoniyaṃ apariyāpannato ca veditabbā, vuḍḍhi pana pavāḷasilālavaṇānampi vijjatīti na tesaṃ jīvabhāve kāraṇaṃ, visayaggahaṇañca nesaṃ parikappanāmattaṃ supanaṃ viya ciñcādīnaṃ, tathā dohaḷādayo, atha kasmā bhūtagāmassa pātabyatāya pācittiyaṃ icchitanti? Samaṇaasāruppato, tannissitasattānurakkhaṇato ca. Tenevāha ‘‘jīvasaññino hi moghapurisā manussā rukkhasmi’’ntiādi (pāci. 89). Sāsapabījakasevālampīti sāsapabījakasaṅkhātaṃ sevālampi, sāsapasevālaṃ, bījakasevālampīti attho. Tattha sāsapasevālo nāma sāsapamatto khuddakasevālo. Bījakasevālo nāma upari khuddakapatto heṭṭhā khuddakamūlo sevālo.
муулаб̣ийж̇аканд̇хаб̣ийж̇апал̣уб̣ийж̇ааг̇г̇аб̣ийж̇аб̣ийж̇аб̣ийж̇аананд̇и зд̇т̇а мууламзва б̣ийж̇ам̣ муулаб̣ийж̇ам̣. звам̣ сзсзсуби. д̇ад̇т̇а муулаб̣ийж̇ам̣ халид̣̇д̣̇иаад̣̇игам̣. канд̇хаб̣ийж̇ам̣ ассад̇т̇аад̣̇игам̣. пал̣уб̣ийж̇ам̣ ужчуаад̣̇игам̣. аг̇г̇аб̣ийж̇ам̣ хиривзраад̣̇игам̣. б̣ийж̇ам̣б̣ийж̇ам̣ буб̣б̣ан̣н̣аад̣̇игам̣. бхааж̇анаг̇ад̇анд̇и сарааваад̣̇ибхааж̇анаг̇ад̇ам̣. нигканд̇ам̣ мууламад̇д̇ам̣ зд̇асмаад̇и нигканд̇амууламад̇д̇ам̣. мад̇д̇а сад̣̇д̣̇зна жзд̇т̇а бан̣н̣асса нигкаманам̣ бадигкибад̇и. зса наяо нигканд̇аан̇гурамад̇д̇анд̇и зд̇т̇ааби. сажз бана муулан̃жа бан̣н̣ан̃жа ниг̇г̇ад̇ам̣, бхууд̇аг̇аамасан̇кам̣ г̇ажчад̇и. вид̣̇ад̇т̇имад̇д̇аа бад̇д̇авадди ниг̇г̇ажчад̇ийд̇и вид̣̇ад̇т̇имад̇д̇аа анийлаван̣н̣аа бад̇д̇авадди нигкамад̇и. д̇знааха ‘‘нигканд̇з’’д̇иаад̣̇и. харид̇о на ход̇ийд̇и нийлаван̣н̣о на ход̇и. муг̇г̇аад̣̇ийнам̣ бана бан̣н̣зсу удтид̇зсу, вийхиаад̣̇ийнам̣ ваа ан̇гурз харид̇з бхууд̇аг̇аамасан̇г̇ахам̣ г̇ажчанд̇и. зса наяо амб̣адтиаад̣̇ийсу.
Mūlabījakhandhabījaphaḷubījaaggabījabījabījānanti ettha mūlameva bījaṃ mūlabījaṃ. Evaṃ sesesupi. Tattha mūlabījaṃ haliddiādikaṃ. Khandhabījaṃ assatthādikaṃ. Phaḷubījaṃ ucchuādikaṃ. Aggabījaṃ hiriverādikaṃ. Bījaṃbījaṃ pubbaṇṇādikaṃ. Bhājanagatanti sarāvādibhājanagataṃ. Nikkhantaṃ mūlamattaṃ etasmāti nikkhantamūlamattaṃ. Matta saddena cettha paṇṇassa nikkhamanaṃ paṭikkhipati. Esa nayo nikkhantaaṅkuramattanti etthāpi. Sace pana mūlañca paṇṇañca niggataṃ, bhūtagāmasaṅkhaṃ gacchati. Vidatthimattā pattavaṭṭi niggacchatīti vidatthimattā anīlavaṇṇā pattavaṭṭi nikkhamati. Tenāha ‘‘nikkhante’’tiādi. Harito na hotīti nīlavaṇṇo na hoti. Muggādīnaṃ pana paṇṇesu uṭṭhitesu, vīhiādīnaṃ vā aṅkure harite bhūtagāmasaṅgahaṃ gacchanti. Esa nayo ambaṭṭhiādīsu.
бхууд̇аг̇аамаб̣ийж̇аг̇аамзд̇и зд̇т̇а бхууд̇аг̇аамад̇о вияож̇ид̇ам̣ вируханасамад̇т̇амзва муулаб̣ийж̇аад̣̇игам̣ б̣ийж̇аг̇аамо наамаад̇и взд̣̇ид̇аб̣б̣ам̣. убхаяад̇т̇аад̇и бхууд̇аг̇аамаб̣ийж̇аг̇аамзсу. ад̇ат̇аасан̃н̃иссаад̇и абхууд̇аг̇аамааб̣ийж̇аг̇аамасан̃н̃исса. го бана ваад̣̇о абхууд̇аг̇аамааб̣ийж̇аг̇аамзсу абхууд̇аг̇аамааб̣ийж̇аг̇аамасан̃н̃исса. асан̃жижжаад̇и баасаан̣аругкаад̣̇ийни ваа баваддзнд̇асса, саакам̣ ваа гад̣дханд̇асса, гад̇д̇арад̣̇ан̣д̣зна ваа бхуумим̣ бахарид̇ваа г̇ажчанд̇асса д̇ин̣аани губбанд̇и. д̇аани д̇зна ‘‘вигобзссаамий’’д̇и звам̣ сан̃жижжа авигобид̇ад̇д̇аа асан̃жижжа вигобид̇аани наама хонд̇и. ид̇и асан̃жижжа вигобзнд̇асса анаабад̇д̇и.
Bhūtagāmabījagāmeti ettha bhūtagāmato viyojitaṃ viruhanasamatthameva mūlabījādikaṃ bījagāmo nāmāti veditabbaṃ. Ubhayatthāti bhūtagāmabījagāmesu. Atathāsaññissāti abhūtagāmābījagāmasaññissa. Ko pana vādo abhūtagāmābījagāmesu abhūtagāmābījagāmasaññissa. Asañciccāti pāsāṇarukkhādīni vā pavaṭṭentassa, sākhaṃ vā kaḍḍhantassa, kattaradaṇḍena vā bhūmiṃ paharitvā gacchantassa tiṇāni kuppanti. Tāni tena ‘‘vikopessāmī’’ti evaṃ sañcicca avikopitattā asañcicca vikopitāni nāma honti. Iti asañcicca vikopentassa anāpatti.
асад̇ияаад̇и ан̃н̃авихид̇о гзнажи сад̣̇д̇хим̣ гин̃жи гат̇знд̇о баад̣̇ан̇г̇удтагзна ваа хад̇т̇зна ваа д̇ин̣ам̣ ваа лад̇ам̣ ваа вигобзнд̇о д̇идтад̇и, звам̣ асад̇ияаа вигобзнд̇асса анаабад̇д̇и.
Asatiyāti aññavihito kenaci saddhiṃ kiñci kathento pādaṅguṭṭhakena vā hatthena vā tiṇaṃ vā lataṃ vā vikopento tiṭṭhati, evaṃ asatiyā vikopentassa anāpatti.
аж̇аанид̇ваад̇и зд̇т̇а аб̣бханд̇арз ‘‘б̣ийж̇аг̇аамо’’д̇и ваа ‘‘бхууд̇аг̇аамо’’д̇и ваа на ж̇аанаад̇и, ‘‘вигобзмий’’д̇и бана ж̇аанаад̇и. звам̣ д̇ин̣з ваа балаалабун̃ж̇з ваа кан̣ид̇д̇им̣ ваа гуд̣̇аалам̣ ваа сан̇г̇обанад̇т̇ааяа табзд̇и, д̣аяхамаанахад̇т̇о ваа аг̇г̇им̣ баад̇зд̇и. д̇ад̇ра жз д̇ин̣аани чиж̇ж̇анд̇и ваа д̣аяханд̇и ваа, звам̣ аж̇аанид̇ваа вигобзнд̇асса анаабад̇д̇и.
Ajānitvāti ettha abbhantare ‘‘bījagāmo’’ti vā ‘‘bhūtagāmo’’ti vā na jānāti, ‘‘vikopemī’’ti pana jānāti. Evaṃ tiṇe vā palālapuñje vā khaṇittiṃ vā kudālaṃ vā saṅgopanatthāya ṭhapeti, ḍayhamānahattho vā aggiṃ pāteti. Tatra ce tiṇāni chijjanti vā ḍayhanti vā, evaṃ ajānitvā vikopentassa anāpatti.
язна гзнажи аг̇г̇инаад̇и гадтаг̇г̇иг̇омаяаг̇г̇иаад̣̇ийсу язна гзнажи аг̇г̇инаа, анд̇амасо лохакан̣д̣знаби аад̣̇ид̇д̇зна. ‘‘габбияа’’нд̇и вад̇вааваад̇и яааяа гааяажи бхаасааяа ‘‘габбияа’’нд̇и вад̇ваава. зва-сад̣̇д̣̇зна батамам̣ аг̇г̇инаа пусид̇ваа бажчаа ‘‘габбияа’’нд̇и вад̇д̇ум̣ на ваддад̇ий’’д̇и д̣̇ассзд̇и. ‘‘батамам̣ аг̇г̇им̣ нигкибид̇ваа д̇ам̣ ануд̣̇д̇харид̇ваава ‘габбияа’нд̇и вуд̇д̇з бана ваддад̇ий’’д̇и (саарад̇т̇а. дий. баажид̇д̇ияа 3.93) вад̣̇анд̇и. зса наяо сзсзсуби. д̇ат̇зваад̇и ‘габбияа’нд̇и вад̇ваава. ассамахим̣сасуугарамиг̇аг̇оруубаанам̣ бана кураа ад̇икин̣аа, д̇асмаа д̇зхи на гаад̇аб̣б̣ам̣, гад̇амби агад̇ам̣ ход̇ийд̇и ааха ‘‘табзд̇ваа г̇омахим̣саад̣̇ийнам̣ курз’’д̇и. хад̇т̇инакаа бана кураа на хонд̇и, д̇асмаа д̇зхи ваддад̇и. д̇иражчаанаананд̇и сийхаб̣яаг̇гхад̣̇ийбимаггадаанам̣, сагунд̇аанан̃жа. д̇зсан̃хи накаа д̇икин̣аа хонд̇и, д̇асмаа д̇зхи гаад̇аб̣б̣ам̣. ‘‘анд̇амасо чинд̣̇ид̇ваа аахадзнабий’’д̇и иминаа язхи гаад̇ум̣ ваддад̇и, д̇зхи д̇ад̇т̇аж̇аад̇агзхи гаад̇аб̣б̣анд̇и зд̇т̇а вад̇д̇аб̣б̣амзва над̇т̇ийд̇и д̣̇ассзд̇и. ‘‘сад̇т̇з вуд̇д̇анаязнзваа’’д̇и иминаа чзд̣̇ам̣ ваа взд̇хам̣ ваа д̣̇ассзнд̇зна ‘‘габбияанд̇и вад̇вааваа’’д̇и вуд̇д̇амад̇ид̣̇исад̇и. зд̇т̇а жа гин̃жааби ‘‘габбияанд̇и вад̇ваава гаад̇аб̣б̣а’’нд̇иаад̣̇инаа габбияам̣ гаронд̇зна гад̇д̇аб̣б̣аагаарамзва д̣̇ассид̇ам̣, д̇ат̇ааби бхигкунаа ‘‘габбияам̣ гарохий’’д̇и вуд̇д̇зязва анубасамбаннзна ‘‘габбияа’’нд̇и вад̇ваа аг̇г̇ибариж̇ид̇аад̣̇и гаад̇аб̣б̣анд̇и г̇ахзд̇аб̣б̣ам̣. аважанам̣ бана ‘‘бунаби габбияам̣ гарохийд̇и гаарзд̇ваава барибхун̃ж̇ид̇аб̣б̣а’’нд̇и батамамзва вуд̇д̇ад̇д̇аа.
Yena kenaci aggināti kaṭṭhaggigomayaggiādīsu yena kenaci agginā, antamaso lohakhaṇḍenapi ādittena. ‘‘Kappiya’’nti vatvāvāti yāya kāyaci bhāsāya ‘‘kappiya’’nti vatvāva. Eva-saddena paṭhamaṃ agginā phusitvā pacchā ‘‘kappiya’’nti vattuṃ na vaṭṭatī’’ti dasseti. ‘‘Paṭhamaṃ aggiṃ nikkhipitvā taṃ anuddharitvāva ‘kappiya’nti vutte pana vaṭṭatī’’ti (sārattha. ṭī. pācittiya 3.93) vadanti. Esa nayo sesesupi. Tathevāti ‘kappiya’nti vatvāva. Assamahiṃsasūkaramigagorūpānaṃ pana khurā atikhiṇā, tasmā tehi na kātabbaṃ, katampi akataṃ hotīti āha ‘‘ṭhapetvā gomahiṃsādīnaṃ khure’’ti. Hatthinakhā pana khurā na honti, tasmā tehi vaṭṭati. Tiracchānānanti sīhabyagghadīpimakkaṭānaṃ, sakuntānañca. Tesañhi nakhā tikhiṇā honti, tasmā tehi kātabbaṃ. ‘‘Antamaso chinditvā āhaṭenapī’’ti iminā yehi kātuṃ vaṭṭati, tehi tatthajātakehi kātabbanti ettha vattabbameva natthīti dasseti. ‘‘Satthe vuttanayenevā’’ti iminā chedaṃ vā vedhaṃ vā dassentena ‘‘kappiyanti vatvāvā’’ti vuttamatidisati. Ettha ca kiñcāpi ‘‘kappiyanti vatvāva kātabba’’ntiādinā kappiyaṃ karontena kattabbākārameva dassitaṃ, tathāpi bhikkhunā ‘‘kappiyaṃ karohī’’ti vutteyeva anupasampannena ‘‘kappiya’’nti vatvā aggiparijitādi kātabbanti gahetabbaṃ. Avacanaṃ pana ‘‘punapi kappiyaṃ karohīti kāretvāva paribhuñjitabba’’nti paṭhamameva vuttattā.
згасмим̣…бз… габбияз гад̇з саб̣б̣ам̣ гад̇ам̣ ход̇ийд̇и згам̣язва ‘‘габбияам̣ гаромий’’д̇и ад̇хиббааязнаби габбияз гад̇з згааб̣ад̣̇д̇хад̇д̇аа саб̣б̣ам̣ гад̇ам̣ ход̇и. д̣̇ааругам̣ виж̇жхад̇ийд̇и ж̇аанид̇ваа ваа аж̇аанид̇ваа ваа виж̇жхад̇и ваа виж̇жхаабзд̇и ваа, ваддад̇иязва. бхад̇д̇асид̇т̇з виж̇жхад̇ийд̇и зд̇т̇ааби зсзва наяо. д̇ам̣ виж̇жхад̇и, на ваддад̇ийд̇и валлиаад̣̇ийнам̣ бхааж̇анаг̇ад̇игад̇д̇аад̇и ад̇хиббааяо. бхинд̣̇аабзд̇ваа габбияам̣ гаарзд̇аб̣б̣анд̇и б̣ийж̇ад̇о муд̇д̇асса гадаахасса бхааж̇анаг̇ад̇игад̇д̇аа вуд̇д̇ам̣. аб̣ийж̇анд̇и ан̇гураж̇ананасамад̇т̇аб̣ийж̇арахид̇ад̇арун̣амб̣апалаад̣̇и. д̇знааха ‘‘яам̣ бана палам̣ д̇арун̣ам̣ ход̇и, аб̣ийж̇а’’нд̇и. ниб̣б̣ад̇д̇аб̣ийж̇ам̣ наама б̣ийж̇ам̣ ниб̣б̣ад̇д̇зд̇ваа висум̣ гад̇ваа барибхун̃ж̇ид̇ум̣ саггун̣зяяам̣ амб̣абанасаад̣̇ипалам̣. д̇знааха ‘‘б̣ийж̇ам̣ абанзд̇ваа барибхун̃ж̇ид̇аб̣б̣а’’нд̇и. д̇ад̇т̇а габбияагаран̣агижжам̣ над̇т̇и, саяамзва габбияаанийд̇и ад̇хиббааяо.
Ekasmiṃ…pe… kappiye kate sabbaṃ kataṃ hotīti ekaṃyeva ‘‘kappiyaṃ karomī’’ti adhippāyenapi kappiye kate ekābaddhattā sabbaṃ kataṃ hoti. Dārukaṃ vijjhatīti jānitvā vā ajānitvā vā vijjhati vā vijjhāpeti vā, vaṭṭatiyeva. Bhattasitthe vijjhatīti etthāpi eseva nayo. Taṃ vijjhati, na vaṭṭatīti valliādīnaṃ bhājanagatikattāti adhippāyo. Bhindāpetvā kappiyaṃ kāretabbanti bījato muttassa kaṭāhassa bhājanagatikattā vuttaṃ. Abījanti aṅkurajananasamatthabījarahitataruṇambaphalādi. Tenāha ‘‘yaṃ pana phalaṃ taruṇaṃ hoti, abīja’’nti. Nibbattabījaṃ nāma bījaṃ nibbattetvā visuṃ katvā paribhuñjituṃ sakkuṇeyyaṃ ambapanasādiphalaṃ. Tenāha ‘‘bījaṃ apanetvā paribhuñjitabba’’nti. Tattha kappiyakaraṇakiccaṃ natthi, sayameva kappiyānīti adhippāyo.
бхууд̇аг̇аамасигкаабад̣̇аван̣н̣анаа нидтид̇аа.
Bhūtagāmasikkhāpadavaṇṇanā niṭṭhitā.
