| Library / Tipiṭaka / திபிடக • Tipiṭaka / பரிவாரபாளி • Parivārapāḷi |
2. பூ⁴தகா³மவக்³கோ³
2. Bhūtagāmavaggo
64. பூ⁴தகா³மபாதப்³யதா பாசித்தியங் கத்த² பஞ்ஞத்தந்தி? ஆளவியங் பஞ்ஞத்தங். கங் ஆரப்³பா⁴தி? ஆளவகே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ஆளவகா பி⁴க்கூ² ருக்க²ங் சி²ந்தி³ங்ஸு, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி…பே॰….
64. Bhūtagāmapātabyatā pācittiyaṃ kattha paññattanti? Āḷaviyaṃ paññattaṃ. Kaṃ ārabbhāti? Āḷavake bhikkhū ārabbha. Kismiṃ vatthusminti? Āḷavakā bhikkhū rukkhaṃ chindiṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
65. அஞ்ஞவாத³கே விஹேஸகே பாசித்தியங் கத்த² பஞ்ஞத்தந்தி? கோஸம்பி³யங் பஞ்ஞத்தங். கங் ஆரப்³பா⁴தி? ஆயஸ்மந்தங் ச²ன்னங் ஆரப்³ப⁴. கிஸ்மிங் வத்து²ஸ்மிந்தி? ஆயஸ்மா ச²ன்னோ ஸங்க⁴மஜ்ஜே² ஆபத்தியா அனுயுஞ்ஜியமானோ அஞ்ஞேனஞ்ஞங் படிசரி, தஸ்மிங் வத்து²ஸ்மிங். ஏகா பஞ்ஞத்தி, ஏகா அனுபஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி…பே॰….
65. Aññavādake vihesake pācittiyaṃ kattha paññattanti? Kosambiyaṃ paññattaṃ. Kaṃ ārabbhāti? Āyasmantaṃ channaṃ ārabbha. Kismiṃ vatthusminti? Āyasmā channo saṅghamajjhe āpattiyā anuyuñjiyamāno aññenaññaṃ paṭicari, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
66. உஜ்ஜா²பனகே கி²ய்யனகே பாசித்தியங் கத்த² பஞ்ஞத்தந்தி? ராஜக³ஹே பஞ்ஞத்தங். கங் ஆரப்³பா⁴தி? மெத்தியபூ⁴மஜகே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? மெத்தியபூ⁴மஜகா பி⁴க்கூ² ஆயஸ்மந்தங் த³ப்³ப³ங் மல்லபுத்தங் பி⁴க்கூ² உஜ்ஜா²பேஸுங், தஸ்மிங் வத்து²ஸ்மிங். ஏகா பஞ்ஞத்தி, ஏகா அனுபஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி…பே॰….
66. Ujjhāpanake khiyyanake pācittiyaṃ kattha paññattanti? Rājagahe paññattaṃ. Kaṃ ārabbhāti? Mettiyabhūmajake bhikkhū ārabbha. Kismiṃ vatthusminti? Mettiyabhūmajakā bhikkhū āyasmantaṃ dabbaṃ mallaputtaṃ bhikkhū ujjhāpesuṃ, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
67. ஸங்கி⁴கங் மஞ்சங் வா பீட²ங் வா பி⁴ஸிங் வா கொச்ச²ங் வா அஜ்ஜோ²காஸே ஸந்த²ரித்வா அனுத்³த⁴ரித்வா அனாபுச்சா² பக்கமந்தஸ்ஸ பாசித்தியங் கத்த² பஞ்ஞத்தந்தி? ஸாவத்தி²யங் பஞ்ஞத்தங். கங் ஆரப்³பா⁴தி? ஸம்ப³ஹுலே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ஸம்ப³ஹுலா பி⁴க்கூ² ஸங்கி⁴கங் ஸேனாஸனங் அஜ்ஜோ²காஸே ஸந்த²ரித்வா அனுத்³த⁴ரித்வா அனாபுச்சா² பக்கமிங்ஸு, தஸ்மிங் வத்து²ஸ்மிங். ஏகா பஞ்ஞத்தி, ஏகா அனுபஞ்ஞத்தி. ச²ன்னங் ஆபத்திஸமுட்டா²னானங் த்³வீஹி ஸமுட்டா²னேஹி ஸமுட்டா²தி கதி²னகே…பே॰….
67. Saṅghikaṃ mañcaṃ vā pīṭhaṃ vā bhisiṃ vā kocchaṃ vā ajjhokāse santharitvā anuddharitvā anāpucchā pakkamantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sambahule bhikkhū ārabbha. Kismiṃ vatthusminti? Sambahulā bhikkhū saṅghikaṃ senāsanaṃ ajjhokāse santharitvā anuddharitvā anāpucchā pakkamiṃsu, tasmiṃ vatthusmiṃ. Ekā paññatti, ekā anupaññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti kathinake…pe….
68. ஸங்கி⁴கே விஹாரே ஸெய்யங் ஸந்த²ரித்வா அனுத்³த⁴ரித்வா அனாபுச்சா² பக்கமந்தஸ்ஸ பாசித்தியங் கத்த² பஞ்ஞத்தந்தி? ஸாவத்தி²யங் பஞ்ஞத்தங். கங் ஆரப்³பா⁴தி? ஸத்தரஸவக்³கி³யே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ஸத்தரஸவக்³கி³யா பி⁴க்கூ² ஸங்கி⁴கே விஹாரே ஸெய்யங் ஸந்த²ரித்வா அனுத்³த⁴ரித்வா அனாபுச்சா² பக்கமிங்ஸு, தஸ்மிங் வத்து²ஸ்மிங். ஏகா பஞ்ஞத்தி . ச²ன்னங் ஆபத்திஸமுட்டா²னானங் த்³வீஹி ஸமுட்டா²னேஹி ஸமுட்டா²தி கதி²னகே…பே॰….
68. Saṅghike vihāre seyyaṃ santharitvā anuddharitvā anāpucchā pakkamantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Sattarasavaggiye bhikkhū ārabbha. Kismiṃ vatthusminti? Sattarasavaggiyā bhikkhū saṅghike vihāre seyyaṃ santharitvā anuddharitvā anāpucchā pakkamiṃsu, tasmiṃ vatthusmiṃ. Ekā paññatti . Channaṃ āpattisamuṭṭhānānaṃ dvīhi samuṭṭhānehi samuṭṭhāti kathinake…pe….
69. ஸங்கி⁴கே விஹாரே ஜானங் புப்³பு³பக³தங் பி⁴க்கு²ங் அனுபக²ஜ்ஜ ஸெய்யங் கப்பெந்தஸ்ஸ பாசித்தியங் கத்த² பஞ்ஞத்தந்தி? ஸாவத்தி²யங் பஞ்ஞத்தங். கங் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ச²ப்³ப³க்³கி³யா பி⁴க்கூ² தே²ரே பி⁴க்கூ² அனுபக²ஜ்ஜ ஸெய்யங் கப்பேஸுங், தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ஏகேன ஸமுட்டா²னேன ஸமுட்டா²தி – காயதோ ச சித்ததோ ச ஸமுட்டா²தி, ந வாசதோ…பே॰….
69. Saṅghike vihāre jānaṃ pubbupagataṃ bhikkhuṃ anupakhajja seyyaṃ kappentassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū there bhikkhū anupakhajja seyyaṃ kappesuṃ, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ ekena samuṭṭhānena samuṭṭhāti – kāyato ca cittato ca samuṭṭhāti, na vācato…pe….
70. பி⁴க்கு²ங் குபிதேன அனத்தமனேன ஸங்கி⁴கா விஹாரா நிக்கட்³ட⁴ந்தஸ்ஸ பாசித்தியங் கத்த² பஞ்ஞத்தந்தி? ஸாவத்தி²யங் பஞ்ஞத்தங். கங் ஆரப்³பா⁴தி? ச²ப்³ப³க்³கி³யே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி? ச²ப்³ப³க்³கி³யா பி⁴க்கூ² குபிதா அனத்தமனா பி⁴க்கூ² ஸங்கி⁴கா விஹாரா நிக்கட்³டி⁴ங்ஸு , தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி…பே॰….
70. Bhikkhuṃ kupitena anattamanena saṅghikā vihārā nikkaḍḍhantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Chabbaggiye bhikkhū ārabbha. Kismiṃ vatthusminti? Chabbaggiyā bhikkhū kupitā anattamanā bhikkhū saṅghikā vihārā nikkaḍḍhiṃsu , tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
71. ஸங்கி⁴கே விஹாரே உபரிவேஹாஸகுடியா ஆஹச்சபாத³கங் மஞ்சங் வா பீட²ங் வா அபி⁴னிஸீத³ந்தஸ்ஸ பாசித்தியங் கத்த² பஞ்ஞத்தந்தி? ஸாவத்தி²யங் பஞ்ஞத்தங். கங் ஆரப்³பா⁴தி? அஞ்ஞதரங் பி⁴க்கு²ங் ஆரப்³ப⁴. கிஸ்மிங் வத்து²ஸ்மிந்தி? அஞ்ஞதரோ பி⁴க்கு² ஸங்கி⁴கே விஹாரே உபரிவேஹாஸகுடியா ஆஹச்சபாத³கங் மஞ்சங் ஸஹஸா அபி⁴னிஸீதி³, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் த்³வீஹி ஸமுட்டா²னேஹி ஸமுட்டா²தி – ஸியா காயதோ ஸமுட்டா²தி, ந வாசதோ ந சித்ததோ; ஸியா காயதோ ச சித்ததோ ச ஸமுட்டா²தி, ந வாசதோ…பே॰….
71. Saṅghike vihāre uparivehāsakuṭiyā āhaccapādakaṃ mañcaṃ vā pīṭhaṃ vā abhinisīdantassa pācittiyaṃ kattha paññattanti? Sāvatthiyaṃ paññattaṃ. Kaṃ ārabbhāti? Aññataraṃ bhikkhuṃ ārabbha. Kismiṃ vatthusminti? Aññataro bhikkhu saṅghike vihāre uparivehāsakuṭiyā āhaccapādakaṃ mañcaṃ sahasā abhinisīdi, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ dvīhi samuṭṭhānehi samuṭṭhāti – siyā kāyato samuṭṭhāti, na vācato na cittato; siyā kāyato ca cittato ca samuṭṭhāti, na vācato…pe….
72. த்³வத்திபரியாயே அதி⁴ட்ட²ஹித்வா ததுத்தரி அதி⁴ட்ட²ஹந்தஸ்ஸ பாசித்தியங் கத்த² பஞ்ஞத்தந்தி? கோஸம்பி³யங் பஞ்ஞத்தங். கங் ஆரப்³பா⁴தி? ஆயஸ்மந்தங் ச²ன்னங் ஆரப்³ப⁴. கிஸ்மிங் வத்து²ஸ்மிந்தி? ஆயஸ்மா ச²ன்னோ கதபரியோஸிதங் விஹாரங் புனப்புனங் சா²தா³பேஸி, புனப்புனங் லிம்பாபேஸி, அதிபா⁴ரிகோ விஹாரோ பரிபதி , தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் ச²ஹி ஸமுட்டா²னேஹி ஸமுட்டா²தி…பே॰….
72. Dvattipariyāye adhiṭṭhahitvā tatuttari adhiṭṭhahantassa pācittiyaṃ kattha paññattanti? Kosambiyaṃ paññattaṃ. Kaṃ ārabbhāti? Āyasmantaṃ channaṃ ārabbha. Kismiṃ vatthusminti? Āyasmā channo katapariyositaṃ vihāraṃ punappunaṃ chādāpesi, punappunaṃ limpāpesi, atibhāriko vihāro paripati , tasmiṃ vatthusmiṃ. Ekā paññatti. Channaṃ āpattisamuṭṭhānānaṃ chahi samuṭṭhānehi samuṭṭhāti…pe….
73. ஜானங் ஸப்பாணகங் உத³கங் திணங் வா மத்திகங் வா ஸிஞ்சந்தஸ்ஸ பாசித்தியங் கத்த² பஞ்ஞத்தந்தி? ஆளவியங் பஞ்ஞத்தங். கங் ஆரப்³பா⁴தி? ஆளவகே பி⁴க்கூ² ஆரப்³ப⁴. கிஸ்மிங் வத்து²ஸ்மிந்தி ? ஆளவகா பி⁴க்கூ² ஜானங் ஸப்பாணகங் உத³கங் திணம்பி மத்திகம்பி ஸிஞ்சிங்ஸு, தஸ்மிங் வத்து²ஸ்மிங். ஏகா பஞ்ஞத்தி. ச²ன்னங் ஆபத்திஸமுட்டா²னானங் தீஹி ஸமுட்டா²னேஹி ஸமுட்டா²தி…பே॰….
73. Jānaṃ sappāṇakaṃ udakaṃ tiṇaṃ vā mattikaṃ vā siñcantassa pācittiyaṃ kattha paññattanti? Āḷaviyaṃ paññattaṃ. Kaṃ ārabbhāti? Āḷavake bhikkhū ārabbha. Kismiṃ vatthusminti ? Āḷavakā bhikkhū jānaṃ sappāṇakaṃ udakaṃ tiṇampi mattikampi siñciṃsu, tasmiṃ vatthusmiṃ. Ekā paññatti. Channaṃ āpattisamuṭṭhānānaṃ tīhi samuṭṭhānehi samuṭṭhāti…pe….
பூ⁴தகா³மவக்³கோ³ து³தியோ.
Bhūtagāmavaggo dutiyo.
