| Library / Tipiṭaka / තිපිටක • Tipiṭaka / පරිවාරපාළි • Parivārapāḷi |
2. භූතගාමවග්‌ගො
2. Bhūtagāmavaggo
166. භූතගාමං පාතෙන්‌තො ද්‌වෙ ආපත්‌තියො ආපජ්‌ජති. පාතෙති, පයොගෙ දුක්‌කටං; පහාරෙ පහාරෙ ආපත්‌ති පාචිත්‌තියස්‌ස.
166. Bhūtagāmaṃ pātento dve āpattiyo āpajjati. Pāteti, payoge dukkaṭaṃ; pahāre pahāre āpatti pācittiyassa.
අඤ්‌ඤෙනඤ්‌ඤං පටිචරන්‌තො ද්‌වෙ ආපත්‌තියො ආපජ්‌ජති. අනාරොපිතෙ අඤ්‌ඤවාදකෙ අඤ්‌ඤෙනඤ්‌ඤං පටිචරති, ආපත්‌ති දුක්‌කටස්‌ස; ආරොපිතෙ අඤ්‌ඤවාදකෙ අඤ්‌ඤෙනඤ්‌ඤං පටිචරති, ආපත්‌ති පාචිත්‌තියස්‌ස.
Aññenaññaṃ paṭicaranto dve āpattiyo āpajjati. Anāropite aññavādake aññenaññaṃ paṭicarati, āpatti dukkaṭassa; āropite aññavādake aññenaññaṃ paṭicarati, āpatti pācittiyassa.
භික්‌ඛුං උජ්‌ඣාපෙන්‌තො ද්‌වෙ ආපත්‌තියො ආපජ්‌ජති. උජ්‌ඣාපෙති, පයොගෙ දුක්‌කටං; උජ්‌ඣාපිතෙ ආපත්‌ති පාචිත්‌තියස්‌ස.
Bhikkhuṃ ujjhāpento dve āpattiyo āpajjati. Ujjhāpeti, payoge dukkaṭaṃ; ujjhāpite āpatti pācittiyassa.
සඞ්‌ඝිකං මඤ්‌චං වා පීඨං වා භිසිං වා කොච්‌ඡං වා අජ්‌ඣොකාසෙ සන්‌ථරිත්‌වා අනුද්‌ධරිත්‌වා අනාපුච්‌ඡා පක්‌කමන්‌තො ද්‌වෙ ආපත්‌තියො ආපජ්‌ජති. පඨමං පාදං ලෙඩ්‌ඩුපාතං අතික්‌කාමෙති, ආපත්‌ති දුක්‌කටස්‌ස; දුතියං පාදං අතික්‌කාමෙති, ආපත්‌ති පාචිත්‌තියස්‌ස.
Saṅghikaṃ mañcaṃ vā pīṭhaṃ vā bhisiṃ vā kocchaṃ vā ajjhokāse santharitvā anuddharitvā anāpucchā pakkamanto dve āpattiyo āpajjati. Paṭhamaṃ pādaṃ leḍḍupātaṃ atikkāmeti, āpatti dukkaṭassa; dutiyaṃ pādaṃ atikkāmeti, āpatti pācittiyassa.
සඞ්‌ඝිකෙ විහාරෙ සෙය්‍යං සන්‌ථරිත්‌වා අනුද්‌ධරිත්‌වා අනාපුච්‌ඡා පක්‌කමන්‌තො ද්‌වෙ ආපත්‌තියො ආපජ්‌ජති. පඨමං පාදං පරික්‌ඛෙපං අතික්‌කාමෙති, ආපත්‌ති දුක්‌කටස්‌ස; දුතියං පාදං අතික්‌කාමෙති, ආපත්‌ති පාචිත්‌තියස්‌ස.
Saṅghike vihāre seyyaṃ santharitvā anuddharitvā anāpucchā pakkamanto dve āpattiyo āpajjati. Paṭhamaṃ pādaṃ parikkhepaṃ atikkāmeti, āpatti dukkaṭassa; dutiyaṃ pādaṃ atikkāmeti, āpatti pācittiyassa.
සඞ්‌ඝිකෙ විහාරෙ ජානං පුබ්‌බුපගතං භික්‌ඛුං අනුපඛජ්‌ජ සෙය්‍යං කප්‌පෙන්‌තො ද්‌වෙ ආපත්‌තියො ආපජ්‌ජති. නිපජ්‌ජති, පයොගෙ දුක්‌කටං; නිපන්‌නෙ ආපත්‌ති පාචිත්‌තියස්‌ස.
Saṅghike vihāre jānaṃ pubbupagataṃ bhikkhuṃ anupakhajja seyyaṃ kappento dve āpattiyo āpajjati. Nipajjati, payoge dukkaṭaṃ; nipanne āpatti pācittiyassa.
භික්‌ඛුං කුපිතො අනත්‌තමනො සඞ්‌ඝිකා විහාරා නික්‌කඩ්‌ඪෙන්‌තො ද්‌වෙ ආපත්‌තියො ආපජ්‌ජති. නික්‌කඩ්‌ඪති, පයොගෙ දුක්‌කටං; නික්‌කඩ්‌ඪිතෙ ආපත්‌ති පාචිත්‌තියස්‌ස.
Bhikkhuṃ kupito anattamano saṅghikā vihārā nikkaḍḍhento dve āpattiyo āpajjati. Nikkaḍḍhati, payoge dukkaṭaṃ; nikkaḍḍhite āpatti pācittiyassa.
සඞ්‌ඝිකෙ විහාරෙ උපරිවෙහාසකුටියා ආහච්‌චපාදකං මඤ්‌චං වා පීඨං වා අභිනිසීදන්‌තො ද්‌වෙ ආපත්‌තියො ආපජ්‌ජති. අභිනිසීදති, පයොගෙ දුක්‌කටං; අභිනිසින්‌නෙ ආපත්‌ති පාචිත්‌තියස්‌ස.
Saṅghike vihāre uparivehāsakuṭiyā āhaccapādakaṃ mañcaṃ vā pīṭhaṃ vā abhinisīdanto dve āpattiyo āpajjati. Abhinisīdati, payoge dukkaṭaṃ; abhinisinne āpatti pācittiyassa.
ද්‌වත්‌තිපරියායෙ අධිට්‌ඨහිත්‌වා තතුත්‌තරි අධිට්‌ඨහන්‌තො ද්‌වෙ ආපත්‌තියො ආපජ්‌ජති. අධිට්‌ඨෙති, පයොගෙ දුක්‌කටං; අධිට්‌ඨිතෙ ආපත්‌ති පාචිත්‌තියස්‌ස.
Dvattipariyāye adhiṭṭhahitvā tatuttari adhiṭṭhahanto dve āpattiyo āpajjati. Adhiṭṭheti, payoge dukkaṭaṃ; adhiṭṭhite āpatti pācittiyassa.
ජානං සප්‌පාණකං උදකං තිණං වා මත්‌තිකං වා සිඤ්‌චන්‌තො ද්‌වෙ ආපත්‌තියො ආපජ්‌ජති. සිඤ්‌චති, පයොගෙ දුක්‌කටං; සිඤ්‌චිතෙ ආපත්‌ති පාචිත්‌තියස්‌ස.
Jānaṃ sappāṇakaṃ udakaṃ tiṇaṃ vā mattikaṃ vā siñcanto dve āpattiyo āpajjati. Siñcati, payoge dukkaṭaṃ; siñcite āpatti pācittiyassa.
භූතගාමවග්‌ගො දුතියො.
Bhūtagāmavaggo dutiyo.
Related texts:
ටීකා • Tīkā / විනයපිටක (ටීකා) • Vinayapiṭaka (ṭīkā) / වජිරබුද්‌ධි-ටීකා • Vajirabuddhi-ṭīkā / කතාපත්‌තිවාරාදිවණ්‌ණනා • Katāpattivārādivaṇṇanā
