| Library / Tipiṭaka / ཏིཔིཊཀ • Tipiṭaka / མཧཱཝིབྷངྒ • Mahāvibhaṅga |
༢. བྷཱུཏགཱམཝགྒོ
2. Bhūtagāmavaggo
༡. བྷཱུཏགཱམསིཀྑཱཔདཾ
1. Bhūtagāmasikkhāpadaṃ
༨༩. ཏེན སམཡེན བུདྡྷོ བྷགཝཱ ཨཱལ༹ཝིཡཾ ཝིཧརཏི ཨགྒཱལ༹ཝེ ཙེཏིཡེ། ཏེན ཁོ པན སམཡེན ཨཱལ༹ཝཀཱ བྷིཀྑཱུ ནཝཀམྨཾ ཀརོནྟཱ རུཀྑཾ ཚིནྡནྟིཔི ཚེདཱཔེནྟིཔི། ཨཉྙཏརོཔི ཨཱལ༹ཝཀོ བྷིཀྑུ རུཀྑཾ ཚིནྡཏི། ཏསྨིཾ རུཀྑེ ཨདྷིཝཏྠཱ དེཝཏཱ ཏཾ བྷིཀྑུཾ ཨེཏདཝོཙ – ‘‘མཱ, བྷནྟེ, ཨཏྟནོ བྷཝནཾ ཀཏྟུཀཱམོ མཡ྄ཧཾ བྷཝནཾ ཚིནྡཱི’’ཏི། སོ བྷིཀྑུ ཨནཱདིཡནྟོ ཚིནྡི ཡེཝ, ཏསྶཱ ཙ དེཝཏཱཡ དཱརཀསྶ བཱཧུཾ ཨཱཀོཊེསི། ཨཐ ཁོ ཏསྶཱ དེཝཏཱཡ ཨེཏདཧོསི – ‘‘ཡཾནྣཱུནཱཧཾ ཨིམཾ བྷིཀྑུཾ ཨིདྷེཝ ཛཱིཝིཏཱ ཝོརོཔེཡྻ’’ནྟི། ཨཐ ཁོ ཏསྶཱ དེཝཏཱཡ ཨེཏདཧོསི – ‘‘ན ཁོ མེཏཾ པཏིརཱུཔཾ ཡཱཧཾ ཨིམཾ བྷིཀྑུཾ ཨིདྷེཝ ཛཱིཝིཏཱ ཝོརོཔེཡྻཾ། ཡནྣཱུནཱཧཾ བྷགཝཏོ ཨེཏམཏྠཾ ཨཱརོཙེཡྻ’’ནྟི། ཨཐ ཁོ སཱ དེཝཏཱ ཡེན བྷགཝཱ ཏེནུཔསངྐམི; ཨུཔསངྐམིཏྭཱ བྷགཝཏོ ཨེཏམཏྠཾ ཨཱརོཙེསི། ‘‘སཱདྷུ སཱདྷུ དེཝཏེ! སཱདྷུ ཁོ ཏྭཾ, དེཝཏེ, ཏཾ བྷིཀྑུཾ ཛཱིཝིཏཱ ན ཝོརོཔེསི། སཙཛྫ ཏྭཾ, དེཝཏེ, ཏཾ བྷིཀྑུཾ ཛཱིཝིཏཱ ཝོརོཔེཡྻཱསི, བཧུཉྩ ཏྭཾ, དེཝཏེ, ཨཔུཉྙཾ པསཝེཡྻཱསི། གཙྪ ཏྭཾ, དེཝཏེ, ཨམུཀསྨིཾ ཨོཀཱསེ རུཀྑོ ཝིཝིཏྟོ ཏསྨིཾ ཨུཔགཙྪཱ’’ཏི། མནུསྶཱ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ སམཎཱ སཀྱཔུཏྟིཡཱ རུཀྑཾ ཚིནྡིསྶནྟིཔི ཚེདཱཔེསྶནྟིཔི ཨེཀིནྡྲིཡཾ སམཎཱ སཀྱཔུཏྟིཡཱ ཛཱིཝཾ ཝིཧེཋེསྶནྟཱི’’ཏི!
89. Tena samayena buddho bhagavā āḷaviyaṃ viharati aggāḷave cetiye. Tena kho pana samayena āḷavakā bhikkhū navakammaṃ karontā rukkhaṃ chindantipi chedāpentipi. Aññataropi āḷavako bhikkhu rukkhaṃ chindati. Tasmiṃ rukkhe adhivatthā devatā taṃ bhikkhuṃ etadavoca – ‘‘mā, bhante, attano bhavanaṃ kattukāmo mayhaṃ bhavanaṃ chindī’’ti. So bhikkhu anādiyanto chindi yeva, tassā ca devatāya dārakassa bāhuṃ ākoṭesi. Atha kho tassā devatāya etadahosi – ‘‘yaṃnnūnāhaṃ imaṃ bhikkhuṃ idheva jīvitā voropeyya’’nti. Atha kho tassā devatāya etadahosi – ‘‘na kho metaṃ patirūpaṃ yāhaṃ imaṃ bhikkhuṃ idheva jīvitā voropeyyaṃ. Yannūnāhaṃ bhagavato etamatthaṃ āroceyya’’nti. Atha kho sā devatā yena bhagavā tenupasaṅkami; upasaṅkamitvā bhagavato etamatthaṃ ārocesi. ‘‘Sādhu sādhu devate! Sādhu kho tvaṃ, devate, taṃ bhikkhuṃ jīvitā na voropesi. Sacajja tvaṃ, devate, taṃ bhikkhuṃ jīvitā voropeyyāsi, bahuñca tvaṃ, devate, apuññaṃ pasaveyyāsi. Gaccha tvaṃ, devate, amukasmiṃ okāse rukkho vivitto tasmiṃ upagacchā’’ti. Manussā ujjhāyanti khiyyanti vipācenti – ‘‘kathañhi nāma samaṇā sakyaputtiyā rukkhaṃ chindissantipi chedāpessantipi ekindriyaṃ samaṇā sakyaputtiyā jīvaṃ viheṭhessantī’’ti!
ཨསྶོསུཾ ཁོ བྷིཀྑཱུ ཏེསཾ མནུསྶཱནཾ ཨུཛ྄ཛྷཱཡནྟཱནཾ ཁིཡྻནྟཱནཾ ཝིཔཱཙེནྟཱནཾ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱལ༹ཝཀཱ བྷིཀྑཱུ རུཀྑཾ ཚིནྡིསྶནྟིཔི ཚེདཱཔེསྶནྟིཔཱི’’ཏི…པེ॰… ‘‘སཙྩཾ ཀིར ཏུམྷེ, བྷིཀྑཝེ, རུཀྑཾ ཚིནྡཐཱཔི ཚེདཱཔེཐཱཔཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, རུཀྑཾ ཚིནྡིསྶཐཱཔི, ཚེདཱཔེསྶཐཱཔི! ཛཱིཝསཉྙིནོ ཧི, མོགྷཔུརིསཱ, མནུསྶཱ རུཀྑསྨིཾ, ནེཏཾ མོགྷཔུརིསཱ ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Assosuṃ kho bhikkhū tesaṃ manussānaṃ ujjhāyantānaṃ khiyyantānaṃ vipācentānaṃ. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āḷavakā bhikkhū rukkhaṃ chindissantipi chedāpessantipī’’ti…pe… ‘‘saccaṃ kira tumhe, bhikkhave, rukkhaṃ chindathāpi chedāpethāpī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, rukkhaṃ chindissathāpi, chedāpessathāpi! Jīvasaññino hi, moghapurisā, manussā rukkhasmiṃ, netaṃ moghapurisā appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༩༠. ‘‘བྷཱུཏགཱམཔཱཏབྱཏཱཡ པཱཙིཏྟིཡ’’ནྟི།
90.‘‘Bhūtagāmapātabyatāya pācittiya’’nti.
༩༡. བྷཱུཏགཱམོ ནཱམ པཉྩ བཱིཛཛཱཏཱནི – མཱུལབཱིཛཾ, ཁནྡྷབཱིཛཾ, ཕལུ༹བཱིཛཾ, ཨགྒབཱིཛཾ, བཱིཛབཱིཛམེཝ 1 པཉྩམཾ།
91.Bhūtagāmo nāma pañca bījajātāni – mūlabījaṃ, khandhabījaṃ, phaḷubījaṃ, aggabījaṃ, bījabījameva 2 pañcamaṃ.
མཱུལབཱིཛཾ ནཱམ – ཧལིདྡི, སིངྒིཝེརཾ, ཝཙཱ, ཝཙཏྟཾ, ཨཏིཝིསཱ, ཀཊུཀརོཧིཎཱི, ཨུསཱིརཾ, བྷདྡམཱུཏྟཀཾ, ཡཱནི ཝཱ པནཉྙཱནིཔི ཨཏྠི མཱུལེ ཛཱཡནྟི, མཱུལེ སཉྫཱཡནྟི, ཨེཏཾ མཱུལབཱིཛཾ ནཱམ།
Mūlabījaṃ nāma – haliddi, siṅgiveraṃ, vacā, vacattaṃ, ativisā, kaṭukarohiṇī, usīraṃ, bhaddamūttakaṃ, yāni vā panaññānipi atthi mūle jāyanti, mūle sañjāyanti, etaṃ mūlabījaṃ nāma.
ཁནྡྷབཱིཛཾ ནཱམ – ཨསྶཏྠོ, ནིགྲོདྷོ, པིལཀྑོ, ཨུདུམྦརོ, ཀཙྪཀོ, ཀཔིཏྠནོ, ཡཱནི ཝཱ པནཉྙཱནིཔི ཨཏྠི ཁནྡྷེ ཛཱཡནྟི, ཁནྡྷེ སཉྫཱཡནྟི, ཨེཏཾ ཁནྡྷབཱིཛཾ ནཱམ།
Khandhabījaṃ nāma – assattho, nigrodho, pilakkho, udumbaro, kacchako, kapitthano, yāni vā panaññānipi atthi khandhe jāyanti, khandhe sañjāyanti, etaṃ khandhabījaṃ nāma.
ཕལུ༹བཱིཛཾ ནཱམ – ཨུཙྪུ, ཝེལུ༹, ནལོ༹, ཡཱནི ཝཱ པནཉྙཱནིཔི ཨཏྠི པབྦེ ཛཱཡནྟི, པབྦེ སཉྫཱཡནྟི, ཨེཏཾ ཕལུ༹བཱིཛཾ ནཱམ།
Phaḷubījaṃ nāma – ucchu, veḷu, naḷo, yāni vā panaññānipi atthi pabbe jāyanti, pabbe sañjāyanti, etaṃ phaḷubījaṃ nāma.
ཨགྒབཱིཛཾ ནཱམ – ཨཛྫུཀཾ, ཕཎིཛྫཀཾ, ཧིརིཝེརཾ, ཡཱནི ཝཱ པནཉྙཱནིཔི ཨཏྠི ཨགྒེ ཛཱཡནྟི, ཨགྒེ སཉྫཱཡནྟི, ཨེཏཾ ཨགྒབཱིཛཾ ནཱམ།
Aggabījaṃ nāma – ajjukaṃ, phaṇijjakaṃ, hiriveraṃ, yāni vā panaññānipi atthi agge jāyanti, agge sañjāyanti, etaṃ aggabījaṃ nāma.
བཱིཛབཱིཛཾ ནཱམ – པུབྦཎྞཾ, ཨཔརཎྞཾ, ཡཱནི ཝཱ པནཉྙཱནིཔི ཨཏྠི བཱིཛེ ཛཱཡནྟི, བཱིཛེ སཉྫཱཡནྟི, ཨེཏཾ བཱིཛབཱིཛཾ ནཱམ།
Bījabījaṃ nāma – pubbaṇṇaṃ, aparaṇṇaṃ, yāni vā panaññānipi atthi bīje jāyanti, bīje sañjāyanti, etaṃ bījabījaṃ nāma.
༩༢. བཱིཛེ བཱིཛསཉྙཱི ཚིནྡཏི ཝཱ ཚེདཱཔེཏི ཝཱ, བྷིནྡཏི ཝཱ བྷེདཱཔེཏི ཝཱ, པཙཏི ཝཱ པཙཱཔེཏི ཝཱ, ཨཱཔཏྟི པཱཙིཏྟིཡསྶ། བཱིཛེ ཝེམཏིཀོ ཚིནྡཏི ཝཱ ཚེདཱཔེཏི ཝཱ, བྷིནྡཏི ཝཱ བྷེདཱཔེཏི ཝཱ, པཙཏི ཝཱ པཙཱཔེཏི ཝཱ, ཨཱཔཏྟི དུཀྐཊསྶ། བཱིཛེ ཨབཱིཛསཉྙཱི ཚིནྡཏི ཝཱ ཚེདཱཔེཏི ཝཱ, བྷིནྡཏི ཝཱ བྷེདཱཔེཏི ཝཱ, པཙཏི ཝཱ པཙཱཔེཏི ཝཱ, ཨནཱཔཏྟི། ཨབཱིཛེ བཱིཛསཉྙཱི ཨཱཔཏྟི དུཀྐཊསྶ། ཨབཱིཛེ ཝེམཏིཀོ, ཨཱཔཏྟི དུཀྐཊསྶ། ཨབཱིཛེ ཨབཱིཛསཉྙཱི, ཨནཱཔཏྟི།
92. Bīje bījasaññī chindati vā chedāpeti vā, bhindati vā bhedāpeti vā, pacati vā pacāpeti vā, āpatti pācittiyassa. Bīje vematiko chindati vā chedāpeti vā, bhindati vā bhedāpeti vā, pacati vā pacāpeti vā, āpatti dukkaṭassa. Bīje abījasaññī chindati vā chedāpeti vā, bhindati vā bhedāpeti vā, pacati vā pacāpeti vā, anāpatti. Abīje bījasaññī āpatti dukkaṭassa. Abīje vematiko, āpatti dukkaṭassa. Abīje abījasaññī, anāpatti.
༩༣. ཨནཱཔཏྟི – ‘‘ཨིམཾ ཛཱན, ཨིམཾ དེཧི, ཨིམཾ ཨཱཧར, ཨིམིནཱ ཨཏྠོ, ཨིམཾ ཀཔྤིཡཾ ཀརོཧཱི’’ཏི བྷཎཏི, ཨསཉྩིཙྩ, ཨསྶཏིཡཱ, ཨཛཱནནྟསྶ, ཨུམྨཏྟཀསྶ, ཨཱདིཀམྨིཀསྶཱཏི།
93. Anāpatti – ‘‘imaṃ jāna, imaṃ dehi, imaṃ āhara, iminā attho, imaṃ kappiyaṃ karohī’’ti bhaṇati, asañcicca, assatiyā, ajānantassa, ummattakassa, ādikammikassāti.
བྷཱུཏགཱམསིཀྑཱཔདཾ ནིཊྛིཏཾ པཋམཾ།
Bhūtagāmasikkhāpadaṃ niṭṭhitaṃ paṭhamaṃ.
༢. ཨཉྙཝཱདཀསིཀྑཱཔདཾ
2. Aññavādakasikkhāpadaṃ
༩༤. ཏེན སམཡེན བུདྡྷོ བྷགཝཱ ཀོསམྦིཡཾ ཝིཧརཏི གྷོསིཏཱརཱམེ། ཏེན ཁོ པན སམཡེན ཨཱཡསྨཱ ཚནྣོ ཨནཱཙཱརཾ ཨཱཙརིཏྭཱ སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ཨཉྙེནཉྙཾ པཊིཙརཏི – ‘‘ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཐཾ ཨཱཔནྣོ, ཀཾ བྷཎཐ, ཀིཾ བྷཎཐཱ’’ཏི? ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱཡསྨཱ ཚནྣོ སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ཨཉྙེནཉྙཾ པཊིཙརིསྶཏི – ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཐཾ ཨཱཔནྣོ, ཀཾ བྷཎཐ, ཀིཾ བྷཎཐཱ’’ཏི…པེ॰… སཙྩཾ ཀིར ཏྭཾ, ཚནྣ, སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ཨཉྙེནཉྙཾ པཊིཙརསི – ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཐཾ ཨཱཔནྣོ, ཀཾ བྷཎཐ, ཀིཾ བྷཎཐཱཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏྭཾ, མོགྷཔུརིས, སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ཨཉྙེནཉྙཾ པཊིཙརིསྶསི – ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཐཾ ཨཱཔནྣོ, ཀཾ བྷཎཐ, ཀིཾ བྷཎཐཱཏི! ནེཏཾ, མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཏེན ཧི, བྷིཀྑཝེ, སངྒྷོ ཚནྣསྶ བྷིཀྑུནོ ཨཉྙཝཱདཀཾ རོཔེཏུ། ཨེཝཉྩ པན, བྷིཀྑཝེ , རོཔེཏབྦཾ། བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
94. Tena samayena buddho bhagavā kosambiyaṃ viharati ghositārāme. Tena kho pana samayena āyasmā channo anācāraṃ ācaritvā saṅghamajjhe āpattiyā anuyuñjīyamāno aññenaññaṃ paṭicarati – ‘‘ko āpanno, kiṃ āpanno, kismiṃ āpanno, kathaṃ āpanno, kaṃ bhaṇatha, kiṃ bhaṇathā’’ti? Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā channo saṅghamajjhe āpattiyā anuyuñjīyamāno aññenaññaṃ paṭicarissati – ko āpanno, kiṃ āpanno, kismiṃ āpanno, kathaṃ āpanno, kaṃ bhaṇatha, kiṃ bhaṇathā’’ti…pe… saccaṃ kira tvaṃ, channa, saṅghamajjhe āpattiyā anuyuñjīyamāno aññenaññaṃ paṭicarasi – ko āpanno, kiṃ āpanno, kismiṃ āpanno, kathaṃ āpanno, kaṃ bhaṇatha, kiṃ bhaṇathāti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, saṅghamajjhe āpattiyā anuyuñjīyamāno aññenaññaṃ paṭicarissasi – ko āpanno, kiṃ āpanno, kismiṃ āpanno, kathaṃ āpanno, kaṃ bhaṇatha, kiṃ bhaṇathāti! Netaṃ, moghapurisa, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho channassa bhikkhuno aññavādakaṃ ropetu. Evañca pana, bhikkhave , ropetabbaṃ. Byattena bhikkhunā paṭibalena saṅgho ñāpetabbo –
༩༥. ‘‘སུཎཱཏུ མེ, བྷནྟེ, སངྒྷོ། ཨཡཾ ཚནྣོ བྷིཀྑུ སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ཨཉྙེནཉྙཾ པཊིཙརཏི། ཡདི སངྒྷསྶ པཏྟཀལླཾ, སངྒྷོ ཚནྣསྶ བྷིཀྑུནོ ཨཉྙཝཱདཀཾ རོཔེཡྻ། ཨེསཱ ཉཏྟི།
95. ‘‘Suṇātu me, bhante, saṅgho. Ayaṃ channo bhikkhu saṅghamajjhe āpattiyā anuyuñjīyamāno aññenaññaṃ paṭicarati. Yadi saṅghassa pattakallaṃ, saṅgho channassa bhikkhuno aññavādakaṃ ropeyya. Esā ñatti.
‘‘སུཎཱཏུ མེ, བྷནྟེ, སངྒྷོ། ཨཡཾ ཚནྣོ བྷིཀྑུ སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ཨཉྙེནཉྙཾ པཊིཙརཏི། སངྒྷོ ཚནྣསྶ བྷིཀྑུནོ ཨཉྙཝཱདཀཾ རོཔེཏི། ཡསྶཱཡསྨཏོ ཁམཏི ཚནྣསྶ བྷིཀྑུནོ ཨཉྙཝཱདཀསྶ རོཔནཱ, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Ayaṃ channo bhikkhu saṅghamajjhe āpattiyā anuyuñjīyamāno aññenaññaṃ paṭicarati. Saṅgho channassa bhikkhuno aññavādakaṃ ropeti. Yassāyasmato khamati channassa bhikkhuno aññavādakassa ropanā, so tuṇhassa; yassa nakkhamati, so bhāseyya.
‘‘རོཔིཏཾ སངྒྷེན ཚནྣསྶ བྷིཀྑུནོ ཨཉྙཝཱདཀཾ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Ropitaṃ saṅghena channassa bhikkhuno aññavādakaṃ. Khamati saṅghassa, tasmā tuṇhī, evametaṃ dhārayāmī’’ti.
ཨཐ ཁོ བྷགཝཱ ཨཱཡསྨནྟཾ ཚནྣཾ ཨནེཀཔརིཡཱཡེན ཝིགརཧིཏྭཱ དུབྦྷརཏཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Atha kho bhagavā āyasmantaṃ channaṃ anekapariyāyena vigarahitvā dubbharatāya…pe… evañca pana, bhikkhave, imaṃ sikkhāpadaṃ uddiseyyātha –
‘‘ཨཉྙཝཱདཀེ པཱཙིཏྟིཡ’’ནྟི།
‘‘Aññavādake pācittiya’’nti.
ཨེཝཉྩིདཾ བྷགཝཏཱ བྷིཀྑཱུནཾ སིཀྑཱཔདཾ པཉྙཏྟཾ ཧོཏི།
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
༩༦. ཏེན ཁོ པན སམཡེན ཨཱཡསྨཱ ཚནྣོ སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ‘‘ཨཉྙེནཉྙཾ པཊིཙརནྟོ – ‘‘ཨཱཔཏྟིཾ ཨཱཔཛྫིསྶཱམཱི’’ཏི ཏུཎྷཱིབྷཱུཏོ སངྒྷཾ ཝིཧེསེཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱཡསྨཱ ཚནྣོ སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ཏུཎྷཱིབྷཱུཏོ སངྒྷཾ ཝིཧེསེསྶཏཱི’’ཏི…པེ॰… སཙྩཾ ཀིར ཏྭཾ, ཚནྣ, སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ཏུཎྷཱིབྷཱུཏོ སངྒྷཾ ཝིཧེསེསཱིཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏྭཾ, མོགྷཔུརིས, སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ཏུཎྷཱིབྷཱུཏོ སངྒྷཾ ཝིཧེསེསྶསི! ནེཏཾ, མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰… ཝིགརཧིཏྭཱ…པེ॰… དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཏེན ཧི, བྷིཀྑཝེ, སངྒྷོ ཚནྣསྶ བྷིཀྑུནོ ཝིཧེསཀཾ རོཔེཏུ། ཨེཝཉྩ པན, བྷིཀྑཝེ, རོཔེཏབྦཾ། བྱཏྟེན བྷིཀྑུནཱ པཊིབལེན སངྒྷོ ཉཱཔེཏབྦོ –
96. Tena kho pana samayena āyasmā channo saṅghamajjhe āpattiyā anuyuñjīyamāno ‘‘aññenaññaṃ paṭicaranto – ‘‘āpattiṃ āpajjissāmī’’ti tuṇhībhūto saṅghaṃ viheseti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā channo saṅghamajjhe āpattiyā anuyuñjīyamāno tuṇhībhūto saṅghaṃ vihesessatī’’ti…pe… saccaṃ kira tvaṃ, channa, saṅghamajjhe āpattiyā anuyuñjīyamāno tuṇhībhūto saṅghaṃ vihesesīti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, saṅghamajjhe āpattiyā anuyuñjīyamāno tuṇhībhūto saṅghaṃ vihesessasi! Netaṃ, moghapurisa, appasannānaṃ vā pasādāya…pe… vigarahitvā…pe… dhammiṃ kathaṃ katvā bhikkhū āmantesi – ‘‘tena hi, bhikkhave, saṅgho channassa bhikkhuno vihesakaṃ ropetu. Evañca pana, bhikkhave, ropetabbaṃ. Byattena bhikkhunā paṭibalena saṅgho ñāpetabbo –
༩༧. ‘‘སུཎཱཏུ མེ, བྷནྟེ, སངྒྷོ། ཨཡཾ ཚནྣོ བྷིཀྑུ སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ཏུཎྷཱིབྷཱུཏོ སངྒྷཾ ཝིཧེསེཏི། ཡདི སངྒྷསྶ པཏྟཀལླཾ, སངྒྷོ ཚནྣསྶ བྷིཀྑུནོ ཝིཧེསཀཾ རོཔེཡྻ། ཨེསཱ ཉཏྟི།
97. ‘‘Suṇātu me, bhante, saṅgho. Ayaṃ channo bhikkhu saṅghamajjhe āpattiyā anuyuñjīyamāno tuṇhībhūto saṅghaṃ viheseti. Yadi saṅghassa pattakallaṃ, saṅgho channassa bhikkhuno vihesakaṃ ropeyya. Esā ñatti.
‘‘སུཎཱཏུ མེ, བྷནྟེ, སངྒྷོ། ཨཡཾ ཚནྣོ བྷིཀྑུ སངྒྷམཛ྄ཛྷེ ཨཱཔཏྟིཡཱ ཨནུཡུཉྫཱིཡམཱནོ ཏུཎྷཱིབྷཱུཏོ སངྒྷཾ ཝིཧེསེཏི། སངྒྷོ ཚནྣསྶ བྷིཀྑུནོ ཝིཧེསཀཾ རོཔེཏི། ཡསྶཱཡསྨཱཏོ ཁམཏི ཚནྣསྶ བྷིཀྑུནོ ཝིཧེསཀསྶ རོཔནཱ, སོ ཏུཎྷསྶ; ཡསྶ ནཀྑམཏི, སོ བྷཱསེཡྻ།
‘‘Suṇātu me, bhante, saṅgho. Ayaṃ channo bhikkhu saṅghamajjhe āpattiyā anuyuñjīyamāno tuṇhībhūto saṅghaṃ viheseti. Saṅgho channassa bhikkhuno vihesakaṃ ropeti. Yassāyasmāto khamati channassa bhikkhuno vihesakassa ropanā, so tuṇhassa; yassa nakkhamati, so bhāseyya.
‘‘རོཔིཏཾ སངྒྷེན ཚནྣསྶ བྷིཀྑུནོ ཝིཧེསཀཾ། ཁམཏི སངྒྷསྶ, ཏསྨཱ ཏུཎྷཱི, ཨེཝམེཏཾ དྷཱརཡཱམཱི’’ཏི།
‘‘Ropitaṃ saṅghena channassa bhikkhuno vihesakaṃ. Khamati saṅghassa, tasmā tuṇhī, evametaṃ dhārayāmī’’ti.
ཨཐ ཁོ བྷགཝཱ ཨཱཡསྨནྟཾ ཚནྣཾ ཨནེཀཔརིཡཱཡེན ཝིགརཧིཏྭཱ དུབྦྷརཏཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Atha kho bhagavā āyasmantaṃ channaṃ anekapariyāyena vigarahitvā dubbharatāya…pe… evañca pana, bhikkhave, imaṃ sikkhāpadaṃ uddiseyyātha –
༩༨. ‘‘ཨཉྙཝཱདཀེ ཝིཧེསཀེ པཱཙིཏྟིཡ’’ནྟི།
98.‘‘Aññavādake vihesake pācittiya’’nti.
༩༩. ཨཉྙཝཱདཀོ ནཱམ སངྒྷམཛ྄ཛྷེ ཝཏྠུསྨིཾ ཝཱ ཨཱཔཏྟིཡཱ ཝཱ ཨནུཡུཉྫཱིཡམཱནོ ཏཾ ན ཀཐེཏུཀཱམོ ཏཾ ན ཨུགྒྷཱཊེཏུཀཱམོ ཨཉྙེནཉྙཾ པཊིཙརཏི – ‘‘ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཐཾ ཨཱཔནྣོ, ཀཾ བྷཎཐ, ཀིཾ བྷཎཐཱ’’ཏི། ཨེསོ ཨཉྙཝཱདཀོ ནཱམ།
99.Aññavādako nāma saṅghamajjhe vatthusmiṃ vā āpattiyā vā anuyuñjīyamāno taṃ na kathetukāmo taṃ na ugghāṭetukāmo aññenaññaṃ paṭicarati – ‘‘ko āpanno, kiṃ āpanno, kismiṃ āpanno, kathaṃ āpanno, kaṃ bhaṇatha, kiṃ bhaṇathā’’ti. Eso aññavādako nāma.
ཝིཧེསཀོ ནཱམ སངྒྷམཛ྄ཛྷེ ཝཏྠུསྨིཾ ཝཱ ཨཱཔཏྟིཡཱ ཝཱ ཨནུཡུཉྫཱིཡམཱནོ ཏཾ ན ཀཐེཏུཀཱམོ ཏཾ ན ཨུགྒྷཱཊེཏུཀཱམོ ཏུཎྷཱིབྷཱུཏོ སངྒྷཾ ཝིཧེསེཏི། ཨེསོ ཝིཧེསཀོ ནཱམ།
Vihesako nāma saṅghamajjhe vatthusmiṃ vā āpattiyā vā anuyuñjīyamāno taṃ na kathetukāmo taṃ na ugghāṭetukāmo tuṇhībhūto saṅghaṃ viheseti. Eso vihesako nāma.
༡༠༠. ཨཱརོཔིཏེ ཨཉྙཝཱདཀེ སངྒྷམཛ྄ཛྷེ ཝཏྠུསྨིཾ ཝཱ ཨཱཔཏྟིཡཱ ཝཱ ཨནུཡུཉྫཱིཡམཱནོ ཏཾ ན ཀཐེཏུཀཱམོ ཏཾ ན ཨུགྒྷཱཊེཏུཀཱམོ ཨཉྙེནཉྙཾ པཊིཙརཏི – ‘‘ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཐཾ ཨཱཔནྣོ, ཀཾ བྷཎཐ, ཀིཾ བྷཎཐཱ’’ཏི, ཨཱཔཏྟི དུཀྐཊསྶ། ཨཱརོཔིཏེ ཝིཧེསཀེ སངྒྷམཛ྄ཛྷེ ཝཏྠུསྨིཾ ཝཱ ཨཱཔཏྟིཡཱ ཝཱ ཨནུཡུཉྫཱིཡམཱནོ ཏཾ ན ཀཐེཏུཀཱམོ ཏཾ ན ཨུགྒྷཱཊེཏུཀཱམོ ཏུཎྷཱིབྷཱུཏོ སངྒྷཾ ཝིཧེསེཏི, ཨཱཔཏྟི དུཀྐཊསྶ། རོཔིཏེ ཨཉྙཝཱདཀེ སངྒྷམཛ྄ཛྷེ ཝཏྠུསྨིཾ ཝཱ ཨཱཔཏྟིཡཱ ཝཱ ཨནུཡུཉྫཱིཡམཱནོ ཏཾ ན ཀཐེཏུཀཱམོ ཏཾ ན ཨུགྒྷཱཊེཏུཀཱམོ ཨཉྙེནཉྙཾ པཊིཙརཏི – ‘‘ཀོ ཨཱཔནྣོ, ཀིཾ ཨཱཔནྣོ, ཀིསྨིཾ ཨཱཔནྣོ, ཀཐཾ ཨཱཔནྣོ, ཀཾ བྷཎཐ, ཀིཾ བྷཎཐཱ’’ཏི, ཨཱཔཏྟི པཱཙིཏྟིཡསྶ ། རོཔིཏེ ཝིཧེསཀེ སངྒྷམཛ྄ཛྷེ ཝཏྠུསྨིཾ ཝཱ ཨཱཔཏྟིཡཱ ཝཱ ཨནུཡུཉྫཱིཡམཱནོ ཏཾ ན ཀཐེཏུཀཱམོ ཏཾ ན ཨུགྒྷཱཊེཏུཀཱམོ ཏུཎྷཱིབྷཱུཏོ སངྒྷཾ ཝིཧེསེཏི, ཨཱཔཏྟི པཱཙིཏྟིཡསྶ།
100. Āropite aññavādake saṅghamajjhe vatthusmiṃ vā āpattiyā vā anuyuñjīyamāno taṃ na kathetukāmo taṃ na ugghāṭetukāmo aññenaññaṃ paṭicarati – ‘‘ko āpanno, kiṃ āpanno, kismiṃ āpanno, kathaṃ āpanno, kaṃ bhaṇatha, kiṃ bhaṇathā’’ti, āpatti dukkaṭassa. Āropite vihesake saṅghamajjhe vatthusmiṃ vā āpattiyā vā anuyuñjīyamāno taṃ na kathetukāmo taṃ na ugghāṭetukāmo tuṇhībhūto saṅghaṃ viheseti, āpatti dukkaṭassa. Ropite aññavādake saṅghamajjhe vatthusmiṃ vā āpattiyā vā anuyuñjīyamāno taṃ na kathetukāmo taṃ na ugghāṭetukāmo aññenaññaṃ paṭicarati – ‘‘ko āpanno, kiṃ āpanno, kismiṃ āpanno, kathaṃ āpanno, kaṃ bhaṇatha, kiṃ bhaṇathā’’ti, āpatti pācittiyassa . Ropite vihesake saṅghamajjhe vatthusmiṃ vā āpattiyā vā anuyuñjīyamāno taṃ na kathetukāmo taṃ na ugghāṭetukāmo tuṇhībhūto saṅghaṃ viheseti, āpatti pācittiyassa.
༡༠༡. དྷམྨཀམྨེ དྷམྨཀམྨསཉྙཱི ཨཉྙཝཱདཀེ ཝིཧེསཀེ, ཨཱཔཏྟི པཱཙིཏྟིཡསྶ། དྷམྨཀམྨེ ཝེམཏིཀོ ཨཉྙཝཱདཀེ ཝིཧེསཀེ, ཨཱཔཏྟི པཱཙིཏྟིཡསྶ། དྷམྨཀམྨེ ཨདྷམྨཀམྨསཉྙཱི ཨཉྙཝཱདཀེ ཝིཧེསཀེ, ཨཱཔཏྟི པཱཙིཏྟིཡསྶ། ཨདྷམྨཀམྨེ དྷམྨཀམྨསཉྙཱི, ཨཱཔཏྟི དུཀྐཊསྶ། ཨདྷམྨཀམྨེ ཝེམཏིཀོ, ཨཱཔཏྟི དུཀྐཊསྶ། ཨདྷམྨཀམྨེ ཨདྷམྨཀམྨསཉྙཱི, ཨཱཔཏྟི དུཀྐཊསྶ།
101. Dhammakamme dhammakammasaññī aññavādake vihesake, āpatti pācittiyassa. Dhammakamme vematiko aññavādake vihesake, āpatti pācittiyassa. Dhammakamme adhammakammasaññī aññavādake vihesake, āpatti pācittiyassa. Adhammakamme dhammakammasaññī, āpatti dukkaṭassa. Adhammakamme vematiko, āpatti dukkaṭassa. Adhammakamme adhammakammasaññī, āpatti dukkaṭassa.
༡༠༢. ཨནཱཔཏྟི ཨཛཱནནྟོ པུཙྪཏི, གིལཱནོ ཝཱ ན ཀཐེཏི; ‘‘སངྒྷསྶ བྷཎྜནཾ ཝཱ ཀལཧོ ཝཱ ཝིགྒཧོ ཝཱ ཝིཝཱདོ ཝཱ བྷཝིསྶཏཱི’’ཏི ན ཀཐེཏི; ‘‘སངྒྷབྷེདོ ཝཱ སངྒྷརཱཛི ཝཱ བྷཝིསྶཏཱི’’ཏི ན ཀཐེཏི; ‘‘ཨདྷམྨེན ཝཱ ཝགྒེན ཝཱ ནཀམྨཱརཧསྶ ཝཱ ཀམྨཾ ཀརིསྶཏཱི’’ཏི ན ཀཐེཏི; ཨུམྨཏྟཀསྶ, ཨཱདིཀམྨིཀསྶཱཏི།
102. Anāpatti ajānanto pucchati, gilāno vā na katheti; ‘‘saṅghassa bhaṇḍanaṃ vā kalaho vā viggaho vā vivādo vā bhavissatī’’ti na katheti; ‘‘saṅghabhedo vā saṅgharāji vā bhavissatī’’ti na katheti; ‘‘adhammena vā vaggena vā nakammārahassa vā kammaṃ karissatī’’ti na katheti; ummattakassa, ādikammikassāti.
ཨཉྙཝཱདཀསིཀྑཱཔདཾ ནིཊྛིཏཾ དུཏིཡཾ།
Aññavādakasikkhāpadaṃ niṭṭhitaṃ dutiyaṃ.
༣. ཨུཛ྄ཛྷཱཔནཀསིཀྑཱཔདཾ
3. Ujjhāpanakasikkhāpadaṃ
༡༠༣. ཏེན སམཡེན བུདྡྷོ བྷགཝཱ རཱཛགཧེ ཝིཧརཏི ཝེལུ༹ཝནེ ཀལནྡཀནིཝཱཔེ། ཏེན ཁོ པན སམཡེན ཨཱཡསྨཱ དབྦོ མལླཔུཏྟོ སངྒྷསྶ སེནཱསནཉྩ པཉྙཔེཏི བྷཏྟཱནི ཙ ཨུདྡིསཏི། ཏེན ཁོ པན སམཡེན མེཏྟིཡབྷཱུམཛཀཱ 3 བྷིཀྑཱུ ནཝཀཱ ཙེཝ ཧོནྟི ཨཔྤཔུཉྙཱ ཙ ། ཡཱནི སངྒྷསྶ ལཱམཀཱནི སེནཱསནཱནི ཏཱནི ཏེསཾ པཱཔུཎནྟི ལཱམཀཱནི ཙ བྷཏྟཱནི། ཏེ ཨཱཡསྨནྟཾ དབྦཾ མལླཔུཏྟཾ བྷིཀྑཱུ ཨུཛ྄ཛྷཱཔེནྟི – ‘‘ཚནྡཱཡ དབྦོ མལླཔུཏྟོ སེནཱསནཾ པཉྙཔེཏི, ཚནྡཱཡ ཙ བྷཏྟཱནི ཨུདྡིསཏཱི’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ མེཏྟིཡབྷཱུམཛཀཱ བྷིཀྑཱུ ཨཱཡསྨནྟཾ དབྦཾ མལླཔུཏྟཾ བྷིཀྑཱུ ཨུཛ྄ཛྷཱཔེསྶནྟཱི’’ཏི…པེ॰… ‘‘སཙྩཾ ཀིར ཏུམྷེ, བྷིཀྑཝེ, དབྦཾ མལླཔུཏྟཾ བྷིཀྑཱུ ཨུཛ྄ཛྷཱཔེཐཱ’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, དབྦཾ མལླཔུཏྟཾ བྷིཀྑཱུ ཨུཛ྄ཛྷཱཔེསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
103. Tena samayena buddho bhagavā rājagahe viharati veḷuvane kalandakanivāpe. Tena kho pana samayena āyasmā dabbo mallaputto saṅghassa senāsanañca paññapeti bhattāni ca uddisati. Tena kho pana samayena mettiyabhūmajakā 4 bhikkhū navakā ceva honti appapuññā ca . Yāni saṅghassa lāmakāni senāsanāni tāni tesaṃ pāpuṇanti lāmakāni ca bhattāni. Te āyasmantaṃ dabbaṃ mallaputtaṃ bhikkhū ujjhāpenti – ‘‘chandāya dabbo mallaputto senāsanaṃ paññapeti, chandāya ca bhattāni uddisatī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma mettiyabhūmajakā bhikkhū āyasmantaṃ dabbaṃ mallaputtaṃ bhikkhū ujjhāpessantī’’ti…pe… ‘‘saccaṃ kira tumhe, bhikkhave, dabbaṃ mallaputtaṃ bhikkhū ujjhāpethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, dabbaṃ mallaputtaṃ bhikkhū ujjhāpessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
‘‘ཨུཛ྄ཛྷཱཔནཀེ པཱཙིཏྟིཡ’’ནྟི།
‘‘Ujjhāpanake pācittiya’’nti.
ཨེཝཉྩིདཾ བྷགཝཏཱ བྷིཀྑཱུནཾ སིཀྑཱཔདཾ པཉྙཏྟཾ ཧོཏི།
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
༡༠༤. ཏེན ཁོ པན སམཡེན མེཏྟིཡབྷཱུམཛཀཱ བྷིཀྑཱུ – ‘‘བྷགཝཏཱ ཨུཛ྄ཛྷཱཔནཀཾ པཊིཀྑིཏྟ’’ནྟི, ‘‘ཨེཏྟཱཝཏཱ བྷིཀྑཱུ སོསྶནྟཱི’’ཏི 5 བྷིཀྑཱུནཾ སཱམནྟཱ ཨཱཡསྨནྟཾ དབྦཾ མལླཔུཏྟཾ ཁིཡྻནྟི – ‘‘ཚནྡཱཡ དབྦོ མལླཔུཏྟོ སེནཱསནཾ པཉྙཔེཏི, ཚནྡཱཡ ཙ བྷཏྟཱནི ཨུདྡིསཏཱི’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ མེཏྟིཡབྷཱུམཛཀཱ བྷིཀྑཱུ ཨཱཡསྨནྟཾ དབྦཾ མལླཔུཏྟཾ ཁིཡྻིསྶནྟཱི’’ཏི…པེ॰… ‘‘སཙྩཾ ཀིར ཏུམྷེ, བྷིཀྑཝེ, དབྦཾ མལླཔུཏྟཾ ཁིཡྻཐཱ’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, དབྦཾ མལླཔུཏྟཾ ཁིཡྻིསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
104. Tena kho pana samayena mettiyabhūmajakā bhikkhū – ‘‘bhagavatā ujjhāpanakaṃ paṭikkhitta’’nti, ‘‘ettāvatā bhikkhū sossantī’’ti 6 bhikkhūnaṃ sāmantā āyasmantaṃ dabbaṃ mallaputtaṃ khiyyanti – ‘‘chandāya dabbo mallaputto senāsanaṃ paññapeti, chandāya ca bhattāni uddisatī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma mettiyabhūmajakā bhikkhū āyasmantaṃ dabbaṃ mallaputtaṃ khiyyissantī’’ti…pe… ‘‘saccaṃ kira tumhe, bhikkhave, dabbaṃ mallaputtaṃ khiyyathā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, dabbaṃ mallaputtaṃ khiyyissatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༡༠༥. ‘‘ཨུཛ྄ཛྷཱཔནཀེ ཁིཡྻནཀེ པཱཙིཏྟིཡ’’ནྟི།
105.‘‘Ujjhāpanake khiyyanake pācittiya’’nti.
༡༠༦. ཨུཛ྄ཛྷཱཔནཀཾ ནཱམ ཨུཔསམྤནྣཾ སངྒྷེན སམྨཏཾ སེནཱསནཔཉྙཱཔཀཾ ཝཱ བྷཏྟུདྡེསཀཾ ཝཱ ཡཱགུབྷཱཛཀཾ ཝཱ ཕལབྷཱཛཀཾ ཝཱ ཁཛྫབྷཱཛཀཾ ཝཱ ཨཔྤམཏྟཀཝིསྶཛྫཀཾ ཝཱ ཨཝཎྞཾ ཀཏྟུཀཱམོ, ཨཡསཾ ཀཏྟུཀཱམོ, མངྐུཀཏྟུཀཱམོ, ཨུཔསམྤནྣཾ ཨུཛ྄ཛྷཱཔེཏི ཝཱ ཁིཡྻཏི ཝཱ, ཨཱཔཏྟི པཱཙིཏྟིཡསྶ། དྷམྨཀམྨེ དྷམྨཀམྨསཉྙཱི ཨུཛ྄ཛྷཱཔནཀེ ཁིཡྻནཀེ ཨཱཔཏྟི པཱཙིཏྟིཡསྶ། དྷམྨཀམྨེ ཝེམཏིཀོ ཨུཛ྄ཛྷཱཔནཀེ ཁིཡྻནཀེ ཨཱཔཏྟི པཱཙིཏྟིཡསྶ། དྷམྨཀམྨེ ཨདྷམྨཀམྨསཉྙཱི ཨུཛ྄ཛྷཱཔནཀེ ཁིཡྻནཀེ ཨཱཔཏྟི པཱཙིཏྟིཡསྶ།
106.Ujjhāpanakaṃ nāma upasampannaṃ saṅghena sammataṃ senāsanapaññāpakaṃ vā bhattuddesakaṃ vā yāgubhājakaṃ vā phalabhājakaṃ vā khajjabhājakaṃ vā appamattakavissajjakaṃ vā avaṇṇaṃ kattukāmo, ayasaṃ kattukāmo, maṅkukattukāmo, upasampannaṃ ujjhāpeti vā khiyyati vā, āpatti pācittiyassa. Dhammakamme dhammakammasaññī ujjhāpanake khiyyanake āpatti pācittiyassa. Dhammakamme vematiko ujjhāpanake khiyyanake āpatti pācittiyassa. Dhammakamme adhammakammasaññī ujjhāpanake khiyyanake āpatti pācittiyassa.
ཨནུཔསམྤནྣཾ ཨུཛ྄ཛྷཱཔེཏི ཝཱ ཁིཡྻཏི ཝཱ, ཨཱཔཏྟི དུཀྐཊསྶ། ཨུཔསམྤནྣཾ སངྒྷེན ཨསམྨཏཾ སེནཱསནཔཉྙཱཔཀཾ ཝཱ བྷཏྟུདྡེསཀཾ ཝཱ ཡཱགུབྷཱཛཀཾ ཝཱ ཕལབྷཱཛཀཾ ཝཱ ཁཛྫབྷཱཛཀཾ ཝཱ ཨཔྤམཏྟཀཝིསྶཛྫཀཾ ཝཱ ཨཝཎྞཾ ཀཏྟུཀཱམོ, ཨཡསཾ ཀཏྟུཀཱམོ, མངྐུཀཏྟུཀཱམོ, ཨུཔསམྤནྣཾ ཝཱ ཨནུཔསམྤནྣཾ ཝཱ ཨུཛ྄ཛྷཱཔེཏི ཝཱ ཁིཡྻཏི ཝཱ, ཨཱཔཏྟི དུཀྐཊསྶ། ཨནུཔསམྤནྣཾ སངྒྷེན སམྨཏཾ ཝཱ ཨསམྨཏཾ ཝཱ སེནཱསནཔཉྙཱཔཀཾ ཝཱ བྷཏྟུདྡེསཀཾ ཝཱ ཡཱགུབྷཱཛཀཾ ཝཱ ཕལབྷཱཛཀཾ ཝཱ ཁཛྫབྷཱཛཀཾ ཝཱ ཨཔྤམཏྟཀཝིསྶཛྫཀཾ ཝཱ ཨཝཎྞཾ ཀཏྟུཀཱམོ, ཨཡསཾ ཀཏྟུཀཱམོ, མངྐུཀཏྟུཀཱམོ, ཨུཔསམྤནྣཾ ཝཱ ཨནུཔསམྤནྣཾ ཝཱ ཨུཛ྄ཛྷཱཔེཏི ཝཱ ཁིཡྻཏི ཝཱ, ཨཱཔཏྟི དུཀྐཊསྶ། ཨདྷམྨཀམྨེ དྷམྨཀམྨསཉྙཱི, ཨཱཔཏྟི དུཀྐཊསྶ། ཨདྷམྨཀམྨེ ཝེམཏིཀོ, ཨཱཔཏྟི དུཀྐཊསྶ། ཨདྷམྨཀམྨེ ཨདྷམྨཀམྨསཉྙཱི ཨཱཔཏྟི དུཀྐཊསྶ།
Anupasampannaṃ ujjhāpeti vā khiyyati vā, āpatti dukkaṭassa. Upasampannaṃ saṅghena asammataṃ senāsanapaññāpakaṃ vā bhattuddesakaṃ vā yāgubhājakaṃ vā phalabhājakaṃ vā khajjabhājakaṃ vā appamattakavissajjakaṃ vā avaṇṇaṃ kattukāmo, ayasaṃ kattukāmo, maṅkukattukāmo, upasampannaṃ vā anupasampannaṃ vā ujjhāpeti vā khiyyati vā, āpatti dukkaṭassa. Anupasampannaṃ saṅghena sammataṃ vā asammataṃ vā senāsanapaññāpakaṃ vā bhattuddesakaṃ vā yāgubhājakaṃ vā phalabhājakaṃ vā khajjabhājakaṃ vā appamattakavissajjakaṃ vā avaṇṇaṃ kattukāmo, ayasaṃ kattukāmo, maṅkukattukāmo, upasampannaṃ vā anupasampannaṃ vā ujjhāpeti vā khiyyati vā, āpatti dukkaṭassa. Adhammakamme dhammakammasaññī, āpatti dukkaṭassa. Adhammakamme vematiko, āpatti dukkaṭassa. Adhammakamme adhammakammasaññī āpatti dukkaṭassa.
༡༠༧. ཨནཱཔཏྟི པཀཏིཡཱ ཚནྡཱ དོསཱ མོཧཱ བྷཡཱ ཀརོནྟཾ ཨུཛ྄ཛྷཱཔེཏི ཝཱ ཁིཡྻཏི ཝཱ, ཨུམྨཏྟཀསྶ, ཨཱདིཀམྨིཀསྶཱཏི།
107. Anāpatti pakatiyā chandā dosā mohā bhayā karontaṃ ujjhāpeti vā khiyyati vā, ummattakassa, ādikammikassāti.
ཨུཛ྄ཛྷཱཔནཀསིཀྑཱཔདཾ ནིཊྛིཏཾ ཏཏིཡཾ།
Ujjhāpanakasikkhāpadaṃ niṭṭhitaṃ tatiyaṃ.
༤. པཋམསེནཱསནསིཀྑཱཔདཾ
4. Paṭhamasenāsanasikkhāpadaṃ
༡༠༨. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན བྷིཀྑཱུ ཧེམནྟིཀེ ཀཱལེ ཨཛ྄ཛྷོཀཱསེ སེནཱསནཾ པཉྙཔེཏྭཱ ཀཱཡཾ ཨོཏཱཔེནྟཱ ཀཱལེ ཨཱརོཙིཏེ ཏཾ པཀྐམནྟཱ ནེཝ ཨུདྡྷརིཾསུ ན ཨུདྡྷརཱཔེསུཾ, ཨནཱཔུཙྪཱ པཀྐམིཾསུ། སེནཱསནཾ ཨོཝཊྛཾ ཧོཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཾ ཧི ནཱམ བྷིཀྑཱུ ཨཛ྄ཛྷོཀཱསེ སེནཱསནཾ པཉྙཔེཏྭཱ ཏཾ པཀྐམནྟཱ ནེཝ ཨུདྡྷརིསྶནྟི ན ཨུདྡྷརཱཔེསྶནྟི, ཨནཱཔུཙྪཱ པཀྐམིསྶནྟི, སེནཱསནཾ ཨོཝཊྛ’’ནྟི! ཨཐ ཁོ ཏེ བྷིཀྑཱུ ཏེ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… སཙྩཾ ཀིར, བྷིཀྑཝེ, བྷིཀྑཱུ ཨཛ྄ཛྷོཀཱསེ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
108. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena bhikkhū hemantike kāle ajjhokāse senāsanaṃ paññapetvā kāyaṃ otāpentā kāle ārocite taṃ pakkamantā neva uddhariṃsu na uddharāpesuṃ, anāpucchā pakkamiṃsu. Senāsanaṃ ovaṭṭhaṃ hoti. Ye te bhikkhū appicchā…pe… te ujjhāyanti khiyyanti vipācenti – ‘‘kathaṃ hi nāma bhikkhū ajjhokāse senāsanaṃ paññapetvā taṃ pakkamantā neva uddharissanti na uddharāpessanti, anāpucchā pakkamissanti, senāsanaṃ ovaṭṭha’’nti! Atha kho te bhikkhū te anekapariyāyena vigarahitvā bhagavato etamatthaṃ ārocesuṃ…pe… saccaṃ kira, bhikkhave, bhikkhū ajjhokāse…pe… evañca pana, bhikkhave, imaṃ sikkhāpadaṃ uddiseyyātha –
༡༠༩. ‘‘ཡོ པན བྷིཀྑུ སངྒྷིཀཾ མཉྩཾ ཝཱ པཱིཋཾ ཝཱ བྷིསིཾ ཝཱ ཀོཙྪཾ ཝཱ ཨཛ྄ཛྷོཀཱསེ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, པཱཙིཏྟིཡ’’ནྟི།
109.‘‘Yo pana bhikkhu saṅghikaṃ mañcaṃ vā pīṭhaṃ vā bhisiṃ vā kocchaṃ vā ajjhokāse santharitvā vā santharāpetvā vā taṃ pakkamanto neva uddhareyya na uddharāpeyya, anāpucchaṃ vā gaccheyya, pācittiya’’nti.
ཨེཝཉྩིདཾ བྷགཝཏཱ བྷིཀྑཱུནཾ སིཀྑཱཔདཾ པཉྙཏྟཾ ཧོཏི།
Evañcidaṃ bhagavatā bhikkhūnaṃ sikkhāpadaṃ paññattaṃ hoti.
༡༡༠. ཏེན ཁོ པན སམཡེན བྷིཀྑཱུ ཨཛ྄ཛྷོཀཱསེ ཝསིཏྭཱ ཀཱལསྶེཝ སེནཱསནཾ ཨབྷིཧརནྟི། ཨདྡསཱ ཁོ བྷགཝཱ ཏེ བྷིཀྑཱུ ཀཱལསྶེཝ སེནཱསནཾ ཨབྷིཧརནྟེ། དིསྭཱན ཨེཏསྨིཾ ནིདཱནེ ཨེཏསྨིཾ པཀརཎེ དྷམྨིཾ ཀཐཾ ཀཏྭཱ བྷིཀྑཱུ ཨཱམནྟེསི – ‘‘ཨནུཛཱནཱམི, བྷིཀྑཝེ, ཨཊྛ མཱསེ ཨཝསྶིཀསངྐེཏེ 7 མཎྜཔེ ཝཱ རུཀྑམཱུལེ ཝཱ ཡཏྠ ཀཱཀཱ ཝཱ ཀུལལཱ ཝཱ ན ཨཱུཧདནྟི ཏཏྠ སེནཱསནཾ ནིཀྑིཔིཏུ’’ནྟི།
110. Tena kho pana samayena bhikkhū ajjhokāse vasitvā kālasseva senāsanaṃ abhiharanti. Addasā kho bhagavā te bhikkhū kālasseva senāsanaṃ abhiharante. Disvāna etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, aṭṭha māse avassikasaṅkete 8 maṇḍape vā rukkhamūle vā yattha kākā vā kulalā vā na ūhadanti tattha senāsanaṃ nikkhipitu’’nti.
༡༡༡. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
111.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
སངྒྷིཀཾ ནཱམ སངྒྷསྶ དིནྣཾ ཧོཏི པརིཙྩཏྟཾ།
Saṅghikaṃ nāma saṅghassa dinnaṃ hoti pariccattaṃ.
མཉྩོ ནཱམ ཙཏྟཱརོ མཉྩཱ – མསཱརཀོ, བུནྡིཀཱབདྡྷོ, ཀུལཱི༹རཔཱདཀོ, ཨཱཧཙྩཔཱདཀོ།
Mañco nāma cattāro mañcā – masārako, bundikābaddho, kuḷīrapādako, āhaccapādako.
པཱིཋཾ ནཱམ ཙཏྟཱརི པཱིཋཱནི – མསཱརཀཾ, བུནྡིཀཱབདྡྷཾ, ཀུལཱི༹རཔཱདཀཾ, ཨཱཧཙྩཔཱདཀཾ།
Pīṭhaṃ nāma cattāri pīṭhāni – masārakaṃ, bundikābaddhaṃ, kuḷīrapādakaṃ, āhaccapādakaṃ.
བྷིསི ནཱམ པཉྩ བྷིསིཡོ – ཨུཎྞབྷིསི, ཙོལ༹བྷིཏི, ཝཱཀབྷིསི, ཏིཎབྷིསི, པཎྞབྷིསི།
Bhisi nāma pañca bhisiyo – uṇṇabhisi, coḷabhiti, vākabhisi, tiṇabhisi, paṇṇabhisi.
ཀོཙྪཾ ནཱམ – ཝཱཀམཡཾ ཝཱ ཨུསཱིརམཡཾ ཝཱ མུཉྫམཡཾ ཝཱ པབྦཛམཡཾ 9 ཝཱ ཨནྟོ སཾཝེཋེཏྭཱ བདྡྷཾ ཧོཏི།
Kocchaṃ nāma – vākamayaṃ vā usīramayaṃ vā muñjamayaṃ vā pabbajamayaṃ 10 vā anto saṃveṭhetvā baddhaṃ hoti.
སནྠརིཏྭཱཏི སཡཾ སནྠརིཏྭཱ།
Santharitvāti sayaṃ santharitvā.
སནྠརཱཔེཏྭཱཏི ཨཉྙཾ སནྠརཱཔེཏྭཱ། ཨནུཔསམྤནྣཾ སནྠརཱཔེཏི, ཏསྶ པལིབོདྷོ། ཨུཔསམྤནྣཾ སནྠརཱཔེཏི, སནྠཱརཀསྶ 11 པལིབོདྷོ།
Santharāpetvāti aññaṃ santharāpetvā. Anupasampannaṃ santharāpeti, tassa palibodho. Upasampannaṃ santharāpeti, santhārakassa 12 palibodho.
ཏཾ པཀྐམནྟོ ནེཝ ཨུདྡྷརེཡྻཱཏི ན སཡཾ ཨུདྡྷརེཡྻ།
Taṃ pakkamanto neva uddhareyyāti na sayaṃ uddhareyya.
ན ཨུདྡྷརཱཔེཡྻཱཏི ན ཨཉྙཾ ཨུདྡྷརཱཔེཡྻ།
Na uddharāpeyyāti na aññaṃ uddharāpeyya.
ཨནཱཔུཙྪཾ ཝཱ གཙྪེཡྻཱཏི བྷིཀྑུཾ ཝཱ སཱམཎེརཾ ཝཱ ཨཱརཱམིཀཾ ཝཱ ཨནཱཔུཙྪཱ མཛ྄ཛྷིམསྶ པུརིསསྶ ལེཌྜུཔཱཏཾ ཨཏིཀྐམནྟསྶ ཨཱཔཏྟི པཱཙིཏྟིཡསྶ།
Anāpucchaṃ vā gaccheyyāti bhikkhuṃ vā sāmaṇeraṃ vā ārāmikaṃ vā anāpucchā majjhimassa purisassa leḍḍupātaṃ atikkamantassa āpatti pācittiyassa.
༡༡༢. སངྒྷིཀེ སངྒྷིཀསཉྙཱི ཨཛ྄ཛྷོཀཱསེ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ ན ཨུདྡྷརཱཔེཡྻ ཨནཱཔུཙྪཾ ཝཱ གཙྪེཡྻ, ཨཱཔཏྟི པཱཙིཏྟིཡསྶ། སངྒྷིཀེ ཝེམཏིཀོ…པེ॰… སངྒྷིཀེ པུགྒལིཀསཉྙཱི ཨཛ྄ཛྷོཀཱསེ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, ཨཱཔཏྟི པཱཙིཏྟིཡསྶ།
112. Saṅghike saṅghikasaññī ajjhokāse santharitvā vā santharāpetvā vā taṃ pakkamanto neva uddhareyya na uddharāpeyya anāpucchaṃ vā gaccheyya, āpatti pācittiyassa. Saṅghike vematiko…pe… saṅghike puggalikasaññī ajjhokāse santharitvā vā santharāpetvā vā taṃ pakkamanto neva uddhareyya na uddharāpeyya, anāpucchaṃ vā gaccheyya, āpatti pācittiyassa.
ཙིམིལིཀཾ ཝཱ ཨུཏྟརཏྠརཎཾ ཝཱ བྷཱུམཏྠརཎཾ ཝཱ ཏཊྚིཀཾ ཝཱ ཙམྨཁཎྜཾ ཝཱ པཱདཔུཉྪནིཾ ཝཱ ཕལཀཔཱིཋཾ ཝཱ ཨཛ྄ཛྷོཀཱསེ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, ཨཱཔཏྟི དུཀྐཊསྶ། པུགྒལིཀེ སངྒྷིཀསཉྙཱི, ཨཱཔཏྟི དུཀྐཊསྶ། པུགྒལིཀེ ཝེམཏིཀོ, ཨཱཔཏྟི དུཀྐཊསྶ། པུགྒལིཀེ པུགྒལིཀསཉྙཱི ཨཉྙསྶ པུགྒལིཀེ, ཨཱཔཏྟི དུཀྐཊསྶ། ཨཏྟནོ པུགྒལིཀེ ཨནཱཔཏྟི།
Cimilikaṃ vā uttarattharaṇaṃ vā bhūmattharaṇaṃ vā taṭṭikaṃ vā cammakhaṇḍaṃ vā pādapuñchaniṃ vā phalakapīṭhaṃ vā ajjhokāse santharitvā vā santharāpetvā vā taṃ pakkamanto neva uddhareyya na uddharāpeyya, anāpucchaṃ vā gaccheyya, āpatti dukkaṭassa. Puggalike saṅghikasaññī, āpatti dukkaṭassa. Puggalike vematiko, āpatti dukkaṭassa. Puggalike puggalikasaññī aññassa puggalike, āpatti dukkaṭassa. Attano puggalike anāpatti.
༡༡༣. ཨནཱཔཏྟི ཨུདྡྷརིཏྭཱ གཙྪཏི, ཨུདྡྷརཱཔེཏྭཱ གཙྪཏི, ཨཱཔུཙྪཾ གཙྪཏི, ཨོཏཱཔེནྟོ གཙྪཏི, ཀེནཙི པལིབུདྡྷཾ ཧོཏི, ཨཱཔདཱསུ, ཨུམྨཏྟཀསྶ, ཨཱདིཀམྨིཀསྶཱཏི།
113. Anāpatti uddharitvā gacchati, uddharāpetvā gacchati, āpucchaṃ gacchati, otāpento gacchati, kenaci palibuddhaṃ hoti, āpadāsu, ummattakassa, ādikammikassāti.
པཋམསེནཱསནསིཀྑཱཔདཾ ནིཊྛིཏཾ ཙཏུཏྠཾ།
Paṭhamasenāsanasikkhāpadaṃ niṭṭhitaṃ catutthaṃ.
༥. དུཏིཡསེནཱསནསིཀྑཱཔདཾ
5. Dutiyasenāsanasikkhāpadaṃ
༡༡༤. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན སཏྟརསཝགྒིཡཱ བྷིཀྑཱུ སཧཱཡཀཱ ཧོནྟི། ཏེ ཝསནྟཱཔི ཨེཀཏོཝ ཝསནྟི, པཀྐམནྟཱཔི ཨེཀཏོཝ པཀྐམནྟི། ཏེ ཨཉྙཏརསྨིཾ སངྒྷིཀེ ཝིཧཱརེ སེཡྻཾ སནྠརིཏྭཱ ཏཾ པཀྐམནྟཱ ནེཝ ཨུདྡྷརིཾསུ ན ཨུདྡྷརཱཔེསུཾ, ཨནཱཔུཙྪཱ པཀྐམིཾསུ། སེནཱསནཾ ཨུཔཙིཀཱཧི ཁཱཡིཏཾ ཧོཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ སཏྟརསཝགྒིཡཱ བྷིཀྑཱུ སངྒྷིཀེ ཝིཧཱརེ སེཡྻཾ སནྠརིཏྭཱ ཏཾ པཀྐམནྟཱ ནེཝ ཨུདྡྷརིསྶནྟི ན ཨུདྡྷརཱཔེསྶནྟི, ཨནཱཔུཙྪཱ པཀྐམིསྶནྟི, སེནཱསནཾ ཨུཔཙིཀཱཧི ཁཱཡིཏ’’ནྟི! ཨཐ ཁོ ཏེ བྷིཀྑཱུ སཏྟརསཝགྒིཡེ བྷིཀྑཱུ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར, བྷིཀྑཝེ, སཏྟརསཝགྒིཡཱ བྷིཀྑཱུ སངྒྷིཀེ ཝིཧཱརེ སེཡྻཾ སནྠརིཏྭཱ ཏཾ པཀྐམནྟཱ ནེཝ ཨུདྡྷརིཾསུ ན ཨུདྡྷརཱཔེསུཾ, ཨནཱཔུཙྪཱ པཀྐམིཾསུ, སེནཱསནཾ ཨུཔཙིཀཱཧི ཁཱཡིཏ’’ནྟི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏེ, བྷིཀྑཝེ, མོགྷཔུརིསཱ སངྒྷིཀེ ཝིཧཱརེ སེཡྻཾ སནྠརིཏྭཱ ཏཾ པཀྐམནྟཱ ནེཝ ཨུདྡྷརིསྶནྟི ན ཨུདྡྷརཱཔེསྶནྟི, ཨནཱཔུཙྪཱ པཀྐམིསྶནྟི, སེནཱསནཾ ཨུཔཙིཀཱཧི ཁཱཡིཏཾ! ནེཏཾ, བྷིཀྑཝེ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན , བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
114. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sattarasavaggiyā bhikkhū sahāyakā honti. Te vasantāpi ekatova vasanti, pakkamantāpi ekatova pakkamanti. Te aññatarasmiṃ saṅghike vihāre seyyaṃ santharitvā taṃ pakkamantā neva uddhariṃsu na uddharāpesuṃ, anāpucchā pakkamiṃsu. Senāsanaṃ upacikāhi khāyitaṃ hoti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma sattarasavaggiyā bhikkhū saṅghike vihāre seyyaṃ santharitvā taṃ pakkamantā neva uddharissanti na uddharāpessanti, anāpucchā pakkamissanti, senāsanaṃ upacikāhi khāyita’’nti! Atha kho te bhikkhū sattarasavaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira, bhikkhave, sattarasavaggiyā bhikkhū saṅghike vihāre seyyaṃ santharitvā taṃ pakkamantā neva uddhariṃsu na uddharāpesuṃ, anāpucchā pakkamiṃsu, senāsanaṃ upacikāhi khāyita’’nti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma te, bhikkhave, moghapurisā saṅghike vihāre seyyaṃ santharitvā taṃ pakkamantā neva uddharissanti na uddharāpessanti, anāpucchā pakkamissanti, senāsanaṃ upacikāhi khāyitaṃ! Netaṃ, bhikkhave, appasannānaṃ vā pasādāya…pe… evañca pana , bhikkhave, imaṃ sikkhāpadaṃ uddiseyyātha –
༡༡༥. ‘‘ཡོ པན བྷིཀྑུ སངྒྷིཀེ ཝིཧཱརེ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, པཱཙིཏྟིཡ’’ནྟི།
115.‘‘Yo pana bhikkhu saṅghike vihāre seyyaṃ santharitvā vā santharāpetvā vā taṃ pakkamanto neva uddhareyya na uddharāpeyya, anāpucchaṃ vā gaccheyya, pācittiya’’nti.
༡༡༦. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
116.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
སངྒྷིཀོ ནཱམ ཝིཧཱརོ སངྒྷསྶ དིནྣོ ཧོཏི པརིཙྩཏྟོ།
Saṅghiko nāma vihāro saṅghassa dinno hoti pariccatto.
སེཡྻཾ ནཱམ བྷིསི, ཙིམིལིཀཱ ཨུཏྟརཏྠརཎཾ, བྷཱུམཏྠརཎཾ, ཏཊྚིཀཱ, ཙམྨཁཎྜོ, ནིསཱིདནཾ, པཙྩཏྠརཎཾ, ཏིཎསནྠཱརོ, པཎྞསནྠཱརོ།
Seyyaṃ nāma bhisi, cimilikā uttarattharaṇaṃ, bhūmattharaṇaṃ, taṭṭikā, cammakhaṇḍo, nisīdanaṃ, paccattharaṇaṃ, tiṇasanthāro, paṇṇasanthāro.
སནྠརིཏྭཱཏི སཡཾ སནྠརིཏྭཱ།
Santharitvāti sayaṃ santharitvā.
སནྠརཱཔེཏྭཱཏི ཨཉྙཾ སནྠརཱཔེཏྭཱ།
Santharāpetvāti aññaṃ santharāpetvā.
ཏཾ པཀྐམནྟོ ནེཝ ཨུདྡྷརེཡྻཱཏི ན སཡཾ ཨུདྡྷརེཡྻ།
Taṃ pakkamanto neva uddhareyyāti na sayaṃ uddhareyya.
ན ཨུདྡྷརཱཔེཡྻཱཏི ན ཨཉྙཾ ཨུདྡྷརཱཔེཡྻ།
Na uddharāpeyyāti na aññaṃ uddharāpeyya.
ཨནཱཔུཙྪཾ ཝཱ གཙྪེཡྻཱཏི བྷིཀྑུཾ ཝཱ སཱམཎེརཾ ཝཱ ཨཱརཱམིཀཾ ཝཱ ཨནཱཔུཙྪཱ པརིཀྑིཏྟསྶ ཨཱརཱམསྶ པརིཀྑེཔཾ ཨཏིཀྐམནྟསྶ ཨཱཔཏྟི པཱཙིཏྟིཡསྶ། ཨཔརིཀྑིཏྟསྶ ཨཱརཱམསྶ ཨུཔཙཱརཾ ཨཏིཀྐམནྟསྶ ཨཱཔཏྟི པཱཙིཏྟིཡསྶ། སངྒྷིཀེ སངྒྷིཀསཉྙཱི སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, ཨཱཔཏྟི པཱཙིཏྟིཡསྶ། སངྒྷིཀེ ཝེམཏིཀོ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, ཨཱཔཏྟི པཱཙིཏྟིཡསྶ། སངྒྷིཀེ པུགྒལིཀསཉྙཱི སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, ཨཱཔཏྟི པཱཙིཏྟིཡསྶ།
Anāpucchaṃ vā gaccheyyāti bhikkhuṃ vā sāmaṇeraṃ vā ārāmikaṃ vā anāpucchā parikkhittassa ārāmassa parikkhepaṃ atikkamantassa āpatti pācittiyassa. Aparikkhittassa ārāmassa upacāraṃ atikkamantassa āpatti pācittiyassa. Saṅghike saṅghikasaññī seyyaṃ santharitvā vā santharāpetvā vā taṃ pakkamanto neva uddhareyya na uddharāpeyya, anāpucchaṃ vā gaccheyya, āpatti pācittiyassa. Saṅghike vematiko seyyaṃ santharitvā vā santharāpetvā vā taṃ pakkamanto neva uddhareyya na uddharāpeyya, anāpucchaṃ vā gaccheyya, āpatti pācittiyassa. Saṅghike puggalikasaññī seyyaṃ santharitvā vā santharāpetvā vā taṃ pakkamanto neva uddhareyya na uddharāpeyya, anāpucchaṃ vā gaccheyya, āpatti pācittiyassa.
༡༡༧. ཝིཧཱརསྶ ཨུཔཙཱརེ ཝཱ ཨུཔཊྛཱནསཱལཱཡཾ ཝཱ མཎྜཔེ ཝཱ རུཀྑམཱུལེ ཝཱ སེཡྻཾ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, ཨཱཔཏྟི དུཀྐཊསྶ། མཉྩཾ ཝཱ པཱིཋཾ ཝཱ ཝིཧཱརེ ཝཱ ཝིཧཱརསྶཱུཔཙཱརེ ཝཱ ཨུཔཊྛཱནསཱལཱཡཾ ཝཱ མཎྜཔེ ཝཱ རུཀྑམཱུལེ ཝཱ སནྠརིཏྭཱ ཝཱ སནྠརཱཔེཏྭཱ ཝཱ ཏཾ པཀྐམནྟོ ནེཝ ཨུདྡྷརེཡྻ ན ཨུདྡྷརཱཔེཡྻ, ཨནཱཔུཙྪཾ ཝཱ གཙྪེཡྻ, ཨཱཔཏྟི དུཀྐཊསྶ།
117. Vihārassa upacāre vā upaṭṭhānasālāyaṃ vā maṇḍape vā rukkhamūle vā seyyaṃ santharitvā vā santharāpetvā vā taṃ pakkamanto neva uddhareyya na uddharāpeyya, anāpucchaṃ vā gaccheyya, āpatti dukkaṭassa. Mañcaṃ vā pīṭhaṃ vā vihāre vā vihārassūpacāre vā upaṭṭhānasālāyaṃ vā maṇḍape vā rukkhamūle vā santharitvā vā santharāpetvā vā taṃ pakkamanto neva uddhareyya na uddharāpeyya, anāpucchaṃ vā gaccheyya, āpatti dukkaṭassa.
པུགྒལིཀེ སངྒྷིཀསཉྙཱི, ཨཱཔཏྟི དུཀྐཊསྶ། པུགྒལིཀེ ཝེམཏིཀོ, ཨཱཔཏྟི དུཀྐཊསྶ། པུགྒལིཀེ པུགྒལིཀསཉྙཱི ཨཉྙསྶ པུགྒལིཀེ ཨཱཔཏྟི དུཀྐཊསྶ། ཨཏྟནོ པུགྒལིཀེ ཨནཱཔཏྟི།
Puggalike saṅghikasaññī, āpatti dukkaṭassa. Puggalike vematiko, āpatti dukkaṭassa. Puggalike puggalikasaññī aññassa puggalike āpatti dukkaṭassa. Attano puggalike anāpatti.
༡༡༨. ཨནཱཔཏྟི ཨུདྡྷརིཏྭཱ གཙྪཏི, ཨུདྡྷརཱཔེཏྭཱ གཙྪཏི, ཨཱཔུཙྪཾ གཙྪཏི, ཀེནཙི པལིབུདྡྷཾ ཧོཏི, སཱཔེཀྑོ གནྟྭཱ ཏཏྠ ཋིཏོ ཨཱཔུཙྪཏི, ཀེནཙི པལིབུདྡྷོ ཧོཏི, ཨཱཔདཱསུ, ཨུམྨཏྟཀསྶ, ཨཱདིཀམྨིཀསྶཱཏི།
118. Anāpatti uddharitvā gacchati, uddharāpetvā gacchati, āpucchaṃ gacchati, kenaci palibuddhaṃ hoti, sāpekkho gantvā tattha ṭhito āpucchati, kenaci palibuddho hoti, āpadāsu, ummattakassa, ādikammikassāti.
དུཏིཡསེནཱསནསིཀྑཱཔདཾ ནིཊྛིཏཾ པཉྩམཾ།
Dutiyasenāsanasikkhāpadaṃ niṭṭhitaṃ pañcamaṃ.
༦. ཨནུཔཁཛྫསིཀྑཱཔདཾ
6. Anupakhajjasikkhāpadaṃ
༡༡༩. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན ཚབྦགྒིཡཱ བྷིཀྑཱུ ཝརསེཡྻཱཡོ པལིབུནྡྷེནྟི, ཐེརཱ བྷིཀྑཱུ ཝུཊྛཱཔེནྟི 13། ཨཐ ཁོ ཚབྦགྒིཡཱནཾ བྷིཀྑཱུནཾ ཨེཏདཧོསི – ‘‘ཀེན ནུ ཁོ མཡཾ ཨུཔཱཡེན ཨིདྷེཝ ཝསྶཾ ཝསེཡྻཱམཱ’’ཏི? ཨཐ ཁོ ཚབྦགྒིཡཱ བྷིཀྑཱུ ཐེརེ བྷིཀྑཱུ ཨནུཔཁཛྫ སེཡྻཾ ཀཔྤེནྟི – ཡསྶ སམྦཱདྷོ བྷཝིསྶཏི སོ པཀྐམིསྶཏཱིཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ ཐེརེ བྷིཀྑཱུ ཨནུཔཁཛྫ སེཡྻཾ ཀཔྤེསྶནྟཱི’’ཏི! ཨཐ ཁོ ཏེ བྷིཀྑཱུ ཚབྦགྒིཡེ བྷིཀྑཱུ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ …པེ॰… ‘‘སཙྩཾ ཀིར ཏུམྷེ, བྷིཀྑཝེ, ཐེརེ བྷིཀྑཱུ ཨནུཔཁཛྫ སེཡྻཾ ཀཔྤེཐཱ’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, ཐེརེ བྷིཀྑཱུ ཨནུཔཁཛྫ སེཡྻཾ ཀཔྤེསྶཐ! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
119. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena chabbaggiyā bhikkhū varaseyyāyo palibundhenti, therā bhikkhū vuṭṭhāpenti 14. Atha kho chabbaggiyānaṃ bhikkhūnaṃ etadahosi – ‘‘kena nu kho mayaṃ upāyena idheva vassaṃ vaseyyāmā’’ti? Atha kho chabbaggiyā bhikkhū there bhikkhū anupakhajja seyyaṃ kappenti – yassa sambādho bhavissati so pakkamissatīti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū there bhikkhū anupakhajja seyyaṃ kappessantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ …pe… ‘‘saccaṃ kira tumhe, bhikkhave, there bhikkhū anupakhajja seyyaṃ kappethā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, there bhikkhū anupakhajja seyyaṃ kappessatha! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༡༢༠. ‘‘ཡོ པན བྷིཀྑུ སངྒྷིཀེ ཝིཧཱརེ ཛཱནཾ པུབྦུཔགཏཾ བྷིཀྑུཾ ཨནུཔཁཛྫ སེཡྻཾ ཀཔྤེཡྻ – ཡསྶ སམྦཱདྷོ བྷཝིསྶཏི སོ པཀྐམིསྶཏཱི’ཏི, ཨེཏདེཝ པཙྩཡཾ ཀརིཏྭཱ ཨནཉྙཾ, པཱཙིཏྟིཡ’’ནྟི།
120.‘‘Yo pana bhikkhu saṅghike vihāre jānaṃ pubbupagataṃ bhikkhuṃ anupakhajja seyyaṃ kappeyya – yassa sambādho bhavissati so pakkamissatī’ti, etadeva paccayaṃ karitvā anaññaṃ, pācittiya’’nti.
༡༢༡. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ༢.༠༢༥༡ ཨཏྠེ ཨདྷིཔྤེཏོ བྷིཀྑཱུཏི།
121.Yo panāti yo yādiso…pe… bhikkhūti…pe… ayaṃ imasmiṃ 2.0251 atthe adhippeto bhikkhūti.
སངྒྷིཀོ ནཱམ ཝིཧཱརོ སངྒྷསྶ དིནྣོ ཧོཏི པརིཙྩཏྟོ།
Saṅghiko nāma vihāro saṅghassa dinno hoti pariccatto.
ཛཱནཱཏི ནཱམ ཝུཌྜྷོཏི ཛཱནཱཏི, གིལཱནོཏི ཛཱནཱཏི, སངྒྷེན དིནྣོཏི ཛཱནཱཏི།
Jānāti nāma vuḍḍhoti jānāti, gilānoti jānāti, saṅghena dinnoti jānāti.
ཨནུཔཁཛྫཱཏི ཨནུཔཝིསིཏྭཱ།
Anupakhajjāti anupavisitvā.
སེཡྻཾ ཀཔྤེཡྻཱཏི མཉྩསྶ ཝཱ པཱིཋསྶ ཝཱ པཝིསནྟསྶ ཝཱ ནིཀྑམནྟསྶ ཝཱ ཨུཔཙཱརེ སེཡྻཾ སནྠརཏི ཝཱ སནྠརཱཔེཏི ཝཱ, ཨཱཔཏྟི དུཀྐཊསྶ། ཨབྷིནིསཱིདཏི ཝཱ ཨབྷིནིཔཛྫཏི ཝཱ, ཨཱཔཏྟི པཱཙིཏྟིཡསྶ།
Seyyaṃ kappeyyāti mañcassa vā pīṭhassa vā pavisantassa vā nikkhamantassa vā upacāre seyyaṃ santharati vā santharāpeti vā, āpatti dukkaṭassa. Abhinisīdati vā abhinipajjati vā, āpatti pācittiyassa.
ཨེཏདེཝ པཙྩཡཾ ཀརིཏྭཱ ཨནཉྙནྟི ན ཨཉྙོ ཀོཙི པཙྩཡོ ཧོཏི ཨནུཔཁཛྫ སེཡྻཾ ཀཔྤེཏུཾ།
Etadeva paccayaṃ karitvā anaññanti na añño koci paccayo hoti anupakhajja seyyaṃ kappetuṃ.
༡༢༢. སངྒྷིཀེ སངྒྷིཀསཉྙཱི ཨནུཔཁཛྫ སེཡྻཾ ཀཔྤེཏི, ཨཱཔཏྟི པཱཙིཏྟིཡསྶ། སངྒྷིཀེ ཝེམཏིཀོ ཨནུཔཁཛྫ སེཡྻཾ ཀཔྤེཏི, ཨཱཔཏྟི པཱཙིཏྟིཡསྶ། སངྒྷིཀེ པུགྒལིཀསཉྙཱི ཨནུཔཁཛྫ སེཡྻཾ ཀཔྤེཏི, ཨཱཔཏྟི པཱཙིཏྟིཡསྶ།
122. Saṅghike saṅghikasaññī anupakhajja seyyaṃ kappeti, āpatti pācittiyassa. Saṅghike vematiko anupakhajja seyyaṃ kappeti, āpatti pācittiyassa. Saṅghike puggalikasaññī anupakhajja seyyaṃ kappeti, āpatti pācittiyassa.
མཉྩསྶ ཝཱ པཱིཋསྶ ཝཱ པཝིསནྟསྶ ཝཱ ནིཀྑམནྟསྶ ཝཱ ཨུཔཙཱརཾ ཋཔེཏྭཱ སེཡྻཾ སནྠརཏི ཝཱ སནྠརཱཔེཏི ཝཱ, ཨཱཔཏྟི དུཀྐཊསྶ། ཨབྷིནིསཱིདཏི ཝཱ ཨབྷིནིཔཛྫཏི ཝཱ, ཨཱཔཏྟི དུཀྐཊསྶ། ཝིཧཱརསྶ ཨུཔཙཱརེ ཝཱ ཨུཔཊྛཱནསཱལཱཡཾ ཝཱ མཎྜཔེ ཝཱ རུཀྑམཱུལེ ཝཱ ཨཛ྄ཛྷོཀཱསེ ཝཱ སེཡྻཾ སནྠརཏི ཝཱ སནྠརཱཔེཏི ཝཱ, ཨཱཔཏྟི དུཀྐཊསྶ། ཨབྷིནིསཱིདཏི ཝཱ ཨབྷིནིཔྤཛྫཏི ཝཱ, ཨཱཔཏྟི དུཀྐཊསྶ། པུགྒལིཀེ སངྒྷིཀསཉྙཱི, ཨཱཔཏྟི དུཀྐཊསྶ། པུགྒལིཀེ ཝེམཏིཀོ, ཨཱཔཏྟི དུཀྐཊསྶ། པུགྒལིཀེ པུགྒལིཀསཉྙཱི ཨཉྙསྶ པུགྒལིཀེ ཨཱཔཏྟི དུཀྐཊསྶ ། ཨཏྟནོ པུགྒལིཀེ ཨནཱཔཏྟི།
Mañcassa vā pīṭhassa vā pavisantassa vā nikkhamantassa vā upacāraṃ ṭhapetvā seyyaṃ santharati vā santharāpeti vā, āpatti dukkaṭassa. Abhinisīdati vā abhinipajjati vā, āpatti dukkaṭassa. Vihārassa upacāre vā upaṭṭhānasālāyaṃ vā maṇḍape vā rukkhamūle vā ajjhokāse vā seyyaṃ santharati vā santharāpeti vā, āpatti dukkaṭassa. Abhinisīdati vā abhinippajjati vā, āpatti dukkaṭassa. Puggalike saṅghikasaññī, āpatti dukkaṭassa. Puggalike vematiko, āpatti dukkaṭassa. Puggalike puggalikasaññī aññassa puggalike āpatti dukkaṭassa . Attano puggalike anāpatti.
༡༢༣. ཨནཱཔཏྟི གིལཱནོ པཝིསཏི, སཱིཏེན ཝཱ ཨུཎྷེན ཝཱ པཱིལི༹ཏོ པཝིསཏི, ཨཱཔདཱསུ, ཨུམྨཏྟཀསྶ, ཨཱདིཀམྨིཀསྶཱཏི།
123. Anāpatti gilāno pavisati, sītena vā uṇhena vā pīḷito pavisati, āpadāsu, ummattakassa, ādikammikassāti.
ཨནུཔཁཛྫསིཀྑཱཔདཾ ནིཊྛིཏཾ ཚཊྛཾ།
Anupakhajjasikkhāpadaṃ niṭṭhitaṃ chaṭṭhaṃ.
༧. ནིཀྐཌྜྷནསིཀྑཱཔདཾ
7. Nikkaḍḍhanasikkhāpadaṃ
༡༢༤. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན སཏྟརསཝགྒིཡཱ བྷིཀྑཱུ ཨཉྙཏརཾ པཙྩནྟིམཾ མཧཱཝིཧཱརཾ པཊིསངྑརོནྟི – ‘‘ཨིདྷ མཡཾ ཝསྶཾ ཝསིསྶཱམཱ’’ཏི ། ཨདྡསཾསུ ཁོ ཚབྦགྒིཡཱ བྷིཀྑཱུ སཏྟརསཝགྒིཡེ བྷིཀྑཱུ ཝིཧཱརཾ པཊིསངྑརོནྟེ། དིསྭཱན ཨེཝམཱཧཾསུ – ‘‘ཨིམེ, ཨཱཝུསོ, སཏྟརསཝགྒིཡཱ བྷིཀྑཱུ ཝིཧཱརཾ པཊིསངྑརོནྟི། ཧནྡ ནེ ཝུཊྛཱཔེསྶཱམཱ’’ཏི! ཨེཀཙྩེ ཨེཝམཱཧཾསུ – ‘‘ཨཱགམེཐཱཝུསོ, ཡཱཝ པཊིསངྑརོནྟི; པཊིསངྑཏེ ཝུཊྛཱཔེསྶཱམཱ’’ཏི།
124. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena sattarasavaggiyā bhikkhū aññataraṃ paccantimaṃ mahāvihāraṃ paṭisaṅkharonti – ‘‘idha mayaṃ vassaṃ vasissāmā’’ti . Addasaṃsu kho chabbaggiyā bhikkhū sattarasavaggiye bhikkhū vihāraṃ paṭisaṅkharonte. Disvāna evamāhaṃsu – ‘‘ime, āvuso, sattarasavaggiyā bhikkhū vihāraṃ paṭisaṅkharonti. Handa ne vuṭṭhāpessāmā’’ti! Ekacce evamāhaṃsu – ‘‘āgamethāvuso, yāva paṭisaṅkharonti; paṭisaṅkhate vuṭṭhāpessāmā’’ti.
ཨཐ ཁོ ཚབྦགྒིཡཱ བྷིཀྑཱུ སཏྟརསཝགྒིཡེ བྷིཀྑཱུ ཨེཏདཝོཙུཾ – ‘‘ཨུཊྛེཐཱཝུསོ, ཨམྷཱཀཾ ཝིཧཱརོ པཱཔུཎཱཏཱི’’ཏི། ‘‘ནནུ, ཨཱཝུསོ, པཊིཀཙྩེཝ 15 ཨཱཙིཀྑིཏབྦཾ, མཡཉྩཉྙཾ པཊིསངྑརེཡྻཱམཱ’’ཏི། ‘‘ནནུ, ཨཱཝུསོ, སངྒྷིཀོ ཝིཧཱརོ’’ཏི? ‘‘ཨཱམཱཝུསོ, སངྒྷིཀོ ཝིཧཱརོ’’ཏི། ‘‘ཨུཊྛེཐཱཝུསོ, ཨམྷཱཀཾ ཝིཧཱརོ པཱཔུཎཱཏཱི’’ཏི། ‘‘མཧལླཀོ, ཨཱཝུསོ, ཝིཧཱརོ། ཏུམྷེཔི ཝསཐ, མཡམྤི ཝསིསྶཱམཱ’’ཏི། ‘‘ཨུཊྛེཐཱཝུསོ, ཨམྷཱཀཾ ཝིཧཱརོ པཱཔུཎཱཏཱི’’ཏི ཀུཔིཏཱ ཨནཏྟམནཱ གཱིཝཱཡཾ གཧེཏྭཱ ནིཀྐཌྜྷནྟི། ཏེ ནིཀྐཌྜྷཱིཡམཱནཱ རོདནྟི། བྷིཀྑཱུ ཨེཝམཱཧཾསུ – ‘‘ཀིསྶ ཏུམྷེ, ཨཱཝུསོ, རོདཐཱ’’ཏི? ‘‘ཨིམེ, ཨཱཝུསོ, ཚབྦགྒིཡཱ བྷིཀྑཱུ ཀུཔིཏཱ ཨནཏྟམནཱ ཨམྷེ སངྒྷིཀཱ ཝིཧཱརཱ ནིཀྐཌྜྷནྟཱི’’ཏི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཚབྦགྒིཡཱ བྷིཀྑཱུ ཀུཔིཏཱ ཨནཏྟམནཱ བྷིཀྑཱུ སངྒྷིཀཱ ཝིཧཱརཱ ནིཀྐཌྜྷིསྶནྟཱི’’ཏི! ཨཐ ཁོ ཏེ བྷིཀྑཱུ ཚབྦགྒིཡེ བྷིཀྑཱུ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར ཏུམྷེ, བྷིཀྑཝེ, ཀུཔིཏཱ ཨནཏྟམནཱ བྷིཀྑཱུ སངྒྷིཀཱ ཝིཧཱརཱ ནིཀྐཌྜྷཐཱ’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, ཀུཔིཏཱ ཨནཏྟམནཱ བྷིཀྑཱུ སངྒྷིཀཱ ཝིཧཱརཱ ནིཀྐཌྜྷིསྶཐ? ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
Atha kho chabbaggiyā bhikkhū sattarasavaggiye bhikkhū etadavocuṃ – ‘‘uṭṭhethāvuso, amhākaṃ vihāro pāpuṇātī’’ti. ‘‘Nanu, āvuso, paṭikacceva 16 ācikkhitabbaṃ, mayañcaññaṃ paṭisaṅkhareyyāmā’’ti. ‘‘Nanu, āvuso, saṅghiko vihāro’’ti? ‘‘Āmāvuso, saṅghiko vihāro’’ti. ‘‘Uṭṭhethāvuso, amhākaṃ vihāro pāpuṇātī’’ti. ‘‘Mahallako, āvuso, vihāro. Tumhepi vasatha, mayampi vasissāmā’’ti. ‘‘Uṭṭhethāvuso, amhākaṃ vihāro pāpuṇātī’’ti kupitā anattamanā gīvāyaṃ gahetvā nikkaḍḍhanti. Te nikkaḍḍhīyamānā rodanti. Bhikkhū evamāhaṃsu – ‘‘kissa tumhe, āvuso, rodathā’’ti? ‘‘Ime, āvuso, chabbaggiyā bhikkhū kupitā anattamanā amhe saṅghikā vihārā nikkaḍḍhantī’’ti. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma chabbaggiyā bhikkhū kupitā anattamanā bhikkhū saṅghikā vihārā nikkaḍḍhissantī’’ti! Atha kho te bhikkhū chabbaggiye bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, kupitā anattamanā bhikkhū saṅghikā vihārā nikkaḍḍhathā’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, kupitā anattamanā bhikkhū saṅghikā vihārā nikkaḍḍhissatha? Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༡༢༥. ‘‘ཡོ པན བྷིཀྑུ བྷིཀྑུཾ ཀུཔིཏོ ཨནཏྟམནོ སངྒྷིཀཱ ཝིཧཱརཱ ནིཀྐཌྜྷེཡྻ ཝཱ ནིཀྐཌྜྷཱཔེཡྻ ཝཱ, པཱཙིཏྟིཡ’’ནྟི།
125.‘‘Yo pana bhikkhu bhikkhuṃ kupito anattamano saṅghikā vihārā nikkaḍḍheyya vā nikkaḍḍhāpeyya vā, pācittiya’’nti.
༡༢༦. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
126.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
བྷིཀྑུནྟི ཨཉྙཾ བྷིཀྑུཾ།
Bhikkhunti aññaṃ bhikkhuṃ.
ཀུཔིཏོ ཨནཏྟམནོཏི ཨནབྷིརདྡྷོ ཨཱཧཏཙིཏྟོ ཁིལཛཱཏོ།
Kupito anattamanoti anabhiraddho āhatacitto khilajāto.
སངྒྷིཀོ ནཱམ ཝིཧཱརོ སངྒྷསྶ དིནྣོ ཧོཏི པརིཙྩཏྟོ།
Saṅghiko nāma vihāro saṅghassa dinno hoti pariccatto.
ནིཀྐཌྜྷེཡྻཱཏི གབྦྷེ གཧེཏྭཱ པམུཁཾ ནིཀྐཌྜྷཏི, ཨཱཔཏྟི པཱཙིཏྟིཡསྶ། པམུཁེ གཧེཏྭཱ བཧི ནིཀྐཌྜྷཏི, ཨཱཔཏྟི པཱཙིཏྟིཡསྶ། ཨེཀེན པཡོགེན བཧུཀེཔི དྭཱརེ ཨཏིཀྐཱམེཏི, ཨཱཔཏྟི པཱཙིཏྟིཡསྶ།
Nikkaḍḍheyyāti gabbhe gahetvā pamukhaṃ nikkaḍḍhati, āpatti pācittiyassa. Pamukhe gahetvā bahi nikkaḍḍhati, āpatti pācittiyassa. Ekena payogena bahukepi dvāre atikkāmeti, āpatti pācittiyassa.
ནིཀྐཌྜྷཱཔེཡྻཱཏི ཨཉྙཾ ཨཱཎཱཔེཏི, ཨཱཔཏྟི པཱཙིཏྟིཡསྶ 17། སཀིཾ ཨཱཎཏྟོ བཧུཀེཔི དྭཱརེ ཨཏིཀྐཱམེཏི, ཨཱཔཏྟི པཱཙིཏྟིཡསྶ།
Nikkaḍḍhāpeyyāti aññaṃ āṇāpeti, āpatti pācittiyassa 18. Sakiṃ āṇatto bahukepi dvāre atikkāmeti, āpatti pācittiyassa.
༡༢༧. སངྒྷིཀེ སངྒྷིཀསཉྙཱི ཀུཔིཏོ ཨནཏྟམནོ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཨཱཔཏྟི པཱཙིཏྟིཡསྶ། སངྒྷིཀེ ཝེམཏིཀོ ཀུཔིཏོ ཨནཏྟམནོ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཨཱཔཏྟི པཱཙིཏྟིཡསྶ། སངྒྷིཀེ པུགྒལིཀསཉྙཱི ཀུཔིཏོ ཨནཏྟམནོ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཨཱཔཏྟི པཱཙིཏྟིཡསྶ།
127. Saṅghike saṅghikasaññī kupito anattamano nikkaḍḍhati vā nikkaḍḍhāpeti vā, āpatti pācittiyassa. Saṅghike vematiko kupito anattamano nikkaḍḍhati vā nikkaḍḍhāpeti vā, āpatti pācittiyassa. Saṅghike puggalikasaññī kupito anattamano nikkaḍḍhati vā nikkaḍḍhāpeti vā, āpatti pācittiyassa.
ཏསྶ པརིཀྑཱརཾ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཨཱཔཏྟི དུཀྐཊསྶ། ཝིཧཱརསྶ ཨུཔཙཱརཱ ཝཱ ཨུཔཊྛཱནསཱལཱཡ ཝཱ མཎྜཔཱ ཝཱ རུཀྑམཱུལཱ ཝཱ ཨཛ྄ཛྷོཀཱསཱ ཝཱ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཨཱཔཏྟི དུཀྐཊསྶ། ཏསྶ པརིཀྑཱརཾ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཨཱཔཏྟི དུཀྐཊསྶ། ཨནུཔསམྤནྣཾ ཝིཧཱརཱ ཝཱ ཝིཧཱརསྶ ཨུཔཙཱརཱ ཝཱ ཨུཔཊྛཱནསཱལཱཡ ཝཱ མཎྜཔཱ ཝཱ རུཀྑམཱུལཱ ཝཱ ཨཛ྄ཛྷོཀཱསཱ ཝཱ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཨཱཔཏྟི དུཀྐཊསྶ། ཏསྶ པརིཀྑཱརཾ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཨཱཔཏྟི དུཀྐཊསྶ།
Tassa parikkhāraṃ nikkaḍḍhati vā nikkaḍḍhāpeti vā, āpatti dukkaṭassa. Vihārassa upacārā vā upaṭṭhānasālāya vā maṇḍapā vā rukkhamūlā vā ajjhokāsā vā nikkaḍḍhati vā nikkaḍḍhāpeti vā, āpatti dukkaṭassa. Tassa parikkhāraṃ nikkaḍḍhati vā nikkaḍḍhāpeti vā, āpatti dukkaṭassa. Anupasampannaṃ vihārā vā vihārassa upacārā vā upaṭṭhānasālāya vā maṇḍapā vā rukkhamūlā vā ajjhokāsā vā nikkaḍḍhati vā nikkaḍḍhāpeti vā, āpatti dukkaṭassa. Tassa parikkhāraṃ nikkaḍḍhati vā nikkaḍḍhāpeti vā, āpatti dukkaṭassa.
པུགྒལིཀེ སངྒྷིཀསཉྙཱི, ཨཱཔཏྟི དུཀྐཊསྶ། པུགྒལིཀེ ཝེམཏིཀོ, ཨཱཔཏྟི དུཀྐཊསྶ། པུགྒལིཀེ པུགྒལིཀསཉྙཱི ཨཉྙསྶ པུགྒལིཀེ ཨཱཔཏྟི དུཀྐཊསྶ། ཨཏྟནོ པུགྒལིཀེ ཨནཱཔཏྟི།
Puggalike saṅghikasaññī, āpatti dukkaṭassa. Puggalike vematiko, āpatti dukkaṭassa. Puggalike puggalikasaññī aññassa puggalike āpatti dukkaṭassa. Attano puggalike anāpatti.
༡༢༨. ཨནཱཔཏྟི ཨལཛྫིཾ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཏསྶ པརིཀྑཱརཾ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཨུམྨཏྟཀཾ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཏསྶ པརིཀྑཱརཾ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, བྷཎྜནཀཱརཀཾ ཀལཧཀཱརཀཾ ཝིཝཱདཀཱརཀཾ བྷསྶཀཱརཀཾ སངྒྷེ ཨདྷིཀརཎཀཱརཀཾ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཏསྶ པརིཀྑཱརཾ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཨནྟེཝཱསིཀཾ ཝཱ སདྡྷིཝིཧཱརིཀཾ ཝཱ ན སམྨཱ ཝཏྟནྟཾ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཏསྶ པརིཀྑཱརཾ ནིཀྐཌྜྷཏི ཝཱ ནིཀྐཌྜྷཱཔེཏི ཝཱ, ཨུམྨཏྟཀསྶ, ཨཱདིཀམྨིཀསྶཱཏི།
128. Anāpatti alajjiṃ nikkaḍḍhati vā nikkaḍḍhāpeti vā, tassa parikkhāraṃ nikkaḍḍhati vā nikkaḍḍhāpeti vā, ummattakaṃ nikkaḍḍhati vā nikkaḍḍhāpeti vā, tassa parikkhāraṃ nikkaḍḍhati vā nikkaḍḍhāpeti vā, bhaṇḍanakārakaṃ kalahakārakaṃ vivādakārakaṃ bhassakārakaṃ saṅghe adhikaraṇakārakaṃ nikkaḍḍhati vā nikkaḍḍhāpeti vā, tassa parikkhāraṃ nikkaḍḍhati vā nikkaḍḍhāpeti vā, antevāsikaṃ vā saddhivihārikaṃ vā na sammā vattantaṃ nikkaḍḍhati vā nikkaḍḍhāpeti vā, tassa parikkhāraṃ nikkaḍḍhati vā nikkaḍḍhāpeti vā, ummattakassa, ādikammikassāti.
ནིཀྐཌྜྷནསིཀྑཱཔདཾ ནིཊྛིཏཾ སཏྟམཾ།
Nikkaḍḍhanasikkhāpadaṃ niṭṭhitaṃ sattamaṃ.
༨. ཝེཧཱསཀུཊིསིཀྑཱཔདཾ
8. Vehāsakuṭisikkhāpadaṃ
༡༢༩. ཏེན སམཡེན བུདྡྷོ བྷགཝཱ སཱཝཏྠིཡཾ ཝིཧརཏི ཛེཏཝནེ ཨནཱཐཔིཎྜིཀསྶ ཨཱརཱམེ། ཏེན ཁོ པན སམཡེན དྭེ བྷིཀྑཱུ སངྒྷིཀེ ཝིཧཱརེ ཨུཔརིཝེཧཱསཀུཊིཡཱ ཝིཧརནྟི?། ཨེཀོ ཧེཊྛཱ ཝིཧརཏི 19, ཨེཀོ ཨུཔརི། ཨུཔརིམོ བྷིཀྑུ ཨཱཧཙྩཔཱདཀཾ མཉྩཾ སཧསཱ ཨབྷིནིསཱིདི། མཉྩཔཱདོ ནིཔྤཏིཏྭཱ 20 ཧེཊྛིམསྶ བྷིཀྑུནོ མཏྠཀེ ཨཝཏྠཱསི། སོ བྷིཀྑུ ཝིསྶརམཀཱསི། བྷིཀྑཱུ ཨུཔདྷཱཝིཏྭཱ ཏཾ བྷིཀྑུཾ ཨེཏདཝོཙུཾ – ‘‘ཀིསྶ ཏྭཾ, ཨཱཝུསོ, ཝིསྶརམཀཱསཱི’’ཏི? ཨཐ ཁོ སོ བྷིཀྑུ བྷིཀྑཱུནཾ ཨེཏམཏྠཾ ཨཱརོཙེསི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ བྷིཀྑུ སངྒྷིཀེ ཝིཧཱརེ ཨུཔརིཝེཧཱསཀུཊིཡཱ ཨཱཧཙྩཔཱདཀཾ མཉྩཾ སཧསཱ ཨབྷིནིསཱིདིསྶཏཱི’’ཏི! ཨཐ ཁོ ཏེ བྷིཀྑཱུ ཏཾ བྷིཀྑུཾ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར ཏྭཾ, བྷིཀྑུ, སངྒྷིཀེ ཝིཧཱརེ ཨུཔརིཝེཧཱསཀུཊིཡཱ ཨཱཧཙྩཔཱདཀཾ མཉྩཾ སཧསཱ ཨབྷིནིསཱིདསཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏྭཾ, མོགྷཔུརིས, སངྒྷིཀེ ཝིཧཱརེ ཨུཔརིཝེཧཱསཀུཊིཡཱ ཨཱཧཙྩཔཱདཀཾ མཉྩཾ སཧསཱ ཨབྷིནིསཱིདིསྶསི! ནེཏཾ, མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
129. Tena samayena buddho bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena dve bhikkhū saṅghike vihāre uparivehāsakuṭiyā viharanti?. Eko heṭṭhā viharati 21, eko upari. Uparimo bhikkhu āhaccapādakaṃ mañcaṃ sahasā abhinisīdi. Mañcapādo nippatitvā 22 heṭṭhimassa bhikkhuno matthake avatthāsi. So bhikkhu vissaramakāsi. Bhikkhū upadhāvitvā taṃ bhikkhuṃ etadavocuṃ – ‘‘kissa tvaṃ, āvuso, vissaramakāsī’’ti? Atha kho so bhikkhu bhikkhūnaṃ etamatthaṃ ārocesi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma bhikkhu saṅghike vihāre uparivehāsakuṭiyā āhaccapādakaṃ mañcaṃ sahasā abhinisīdissatī’’ti! Atha kho te bhikkhū taṃ bhikkhuṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, bhikkhu, saṅghike vihāre uparivehāsakuṭiyā āhaccapādakaṃ mañcaṃ sahasā abhinisīdasī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, saṅghike vihāre uparivehāsakuṭiyā āhaccapādakaṃ mañcaṃ sahasā abhinisīdissasi! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༡༣༠. ‘‘ཡོ པན བྷིཀྑུ སངྒྷིཀེ ཝིཧཱརེ ཨུཔརིཝེཧཱསཀུཊིཡཱ ཨཱཧཙྩཔཱདཀཾ མཉྩཾ ཝཱ པཱིཋཾ ཝཱ ཨབྷིནིསཱིདེཡྻ ཝཱ ཨབྷིནིཔཛྫེཡྻ ཝཱ, པཱཙིཏྟིཡ’’ནྟི།
130.‘‘Yo pana bhikkhu saṅghike vihāre uparivehāsakuṭiyā āhaccapādakaṃ mañcaṃ vā pīṭhaṃvā abhinisīdeyya vā abhinipajjeyya vā, pācittiya’’nti.
༡༣༡. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
131.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
སངྒྷིཀོ ནཱམ ཝིཧཱརོ སངྒྷསྶ དིནྣོ ཧོཏི པརིཙྩཏྟོ།
Saṅghiko nāma vihāro saṅghassa dinno hoti pariccatto.
ཝེཧཱསཀུཊི ནཱམ མཛ྄ཛྷིམསྶ པུརིསསྶ ཨསཱིསགྷཊྚཱ།
Vehāsakuṭi nāma majjhimassa purisassa asīsaghaṭṭā.
ཨཱཧཙྩཔཱདཀོ ནཱམ མཉྩོ ཨངྒེ ཝིཛ྄ཛྷིཏྭཱ ཋིཏོ ཧོཏི། ཨཱཧཙྩཔཱདཀཾ ནཱམ པཱིཋཾ ཨངྒེ ཝིཛ྄ཛྷིཏྭཱ ཋིཏཾ ཧོཏི།
Āhaccapādako nāma mañco aṅge vijjhitvā ṭhito hoti. Āhaccapādakaṃ nāma pīṭhaṃ aṅge vijjhitvā ṭhitaṃ hoti.
ཨབྷིནིསཱིདེཡྻཱཏི ཏསྨིཾ ཨབྷིནིསཱིདཏི, ཨཱཔཏྟི པཱཙིཏྟིཡསྶ།
Abhinisīdeyyāti tasmiṃ abhinisīdati, āpatti pācittiyassa.
ཨབྷིནིཔཛྫེཡྻཱཏི ཏསྨིཾ ཨབྷིནིཔཛྫཏི, ཨཱཔཏྟི པཱཙིཏྟིཡསྶ།
Abhinipajjeyyāti tasmiṃ abhinipajjati, āpatti pācittiyassa.
༡༣༢. སངྒྷིཀེ སངྒྷིཀསཉྙཱི ཨུཔརིཝེཧཱསཀུཊིཡཱ ཨཱཧཙྩཔཱདཀཾ མཉྩཾ ཝཱ པཱིཋཾ ཝཱ ཨབྷིནིསཱིདཏི ཝཱ ཨབྷིནིཔཛྫཏི ཝཱ, ཨཱཔཏྟི པཱཙིཏྟིཡསྶ། སངྒྷིཀེ ཝེམཏིཀོ…པེ॰… སངྒྷིཀེ པུགྒལིཀསཉྙཱི ཨུཔརིཝེཧཱསཀུཊིཡཱ ཨཱཧཙྩཔཱདཀཾ མཉྩཾ ཝཱ པཱིཋཾ ཝཱ ཨབྷིནིསཱིདཏི ཝཱ ཨབྷིནིཔཛྫཏི ཝཱ, ཨཱཔཏྟི པཱཙིཏྟིཡསྶ།
132. Saṅghike saṅghikasaññī uparivehāsakuṭiyā āhaccapādakaṃ mañcaṃ vā pīṭhaṃ vā abhinisīdati vā abhinipajjati vā, āpatti pācittiyassa. Saṅghike vematiko…pe… saṅghike puggalikasaññī uparivehāsakuṭiyā āhaccapādakaṃ mañcaṃ vā pīṭhaṃ vā abhinisīdati vā abhinipajjati vā, āpatti pācittiyassa.
པུགྒལིཀེ སངྒྷིཀསཉྙཱི, ཨཱཔཏྟི དུཀྐཊསྶ། པུགྒལིཀེ ཝེམཏིཀོ, ཨཱཔཏྟི དུཀྐཊསྶ། པུགྒལིཀེ པུགྒལིཀསཉྙཱི ཨཉྙསྶ པུགྒལིཀེ, ཨཱཔཏྟི དུཀྐཊསྶ། ཨཏྟནོ པུགྒལིཀེ, ཨནཱཔཏྟི།
Puggalike saṅghikasaññī, āpatti dukkaṭassa. Puggalike vematiko, āpatti dukkaṭassa. Puggalike puggalikasaññī aññassa puggalike, āpatti dukkaṭassa. Attano puggalike, anāpatti.
༡༣༣. ཨནཱཔཏྟི – ཨཝེཧཱསཀུཊིཡཱ སཱིསགྷཊྚཱཡ ཧེཊྛཱ ཨཔརིབྷོགཾ ཧོཏི, པདརསཉྩིཏཾ ཧོཏི, པཊཱཎི དིནྣཱ ཧོཏི, ཏསྨིཾ ཋིཏོ གཎྷཏི ཝཱ ལགྒེཏི ཝཱ, ཨུམྨཏྟཀསྶ, ཨཱདིཀམྨིཀསྶཱཏི།
133. Anāpatti – avehāsakuṭiyā sīsaghaṭṭāya heṭṭhā aparibhogaṃ hoti, padarasañcitaṃ hoti, paṭāṇi dinnā hoti, tasmiṃ ṭhito gaṇhati vā laggeti vā, ummattakassa, ādikammikassāti.
ཝེཧཱསཀུཊིསིཀྑཱཔདཾ ནིཊྛིཏཾ ཨཊྛམཾ།
Vehāsakuṭisikkhāpadaṃ niṭṭhitaṃ aṭṭhamaṃ.
༩. མཧལླཀཝིཧཱརསིཀྑཱཔདཾ
9. Mahallakavihārasikkhāpadaṃ
༡༣༤. ཏེན སམཡེན བུདྡྷོ བྷགཝཱ ཀོསམྦིཡཾ ཝིཧརཏི གྷོསིཏཱརཱམེ། ཏེན ཁོ པན སམཡེན ཨཱཡསྨཏོ ཚནྣསྶ ཨུཔཊྛཱཀོ མཧཱམཏྟོ ཨཱཡསྨཏོ ཚནྣསྶ ཝིཧཱརཾ ཀཱརཱཔེཏི། ཨཐ ཁོ ཨཱཡསྨཱ ཚནྣོ ཀཏཔརིཡོསིཏཾ ཝིཧཱརཾ པུནཔྤུནཾ ཚཱདཱཔེཏི, པུནཔྤུནཾ ལེཔཱཔེཏི། ཨཏིབྷཱརིཏོ ཝིཧཱརོ པརིཔཏི། ཨཐ ཁོ ཨཱཡསྨཱ ཚནྣོ ཏིཎཉྩ ཀཊྛཉྩ སཾཀཌྜྷནྟོ ཨཉྙཏརསྶ བྲཱཧྨཎསྶ ཡཝཁེཏྟཾ དཱུསེསི། ཨཐ ཁོ སོ བྲཱཧྨཎོ ཨུཛ྄ཛྷཱཡཏི ཁིཡྻཏི ཝིཔཱཙེཏི – ‘‘ཀཐཉྷི ནཱམ བྷདནྟཱ ཨམྷཱཀཾ ཡཝཁེཏྟཾ དཱུསེསྶནྟཱི’’ཏི! ཨསྶོསུཾ ཁོ བྷིཀྑཱུ ཏསྶ བྲཱཧྨཎསྶ ཨུཛ྄ཛྷཱཡནྟསྶ ཁིཡྻནྟསྶ ཝིཔཱཙེནྟསྶ། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱཡསྨཱ ཚནྣོ ཀཏཔརིཡོསིཏཾ ཝིཧཱརཾ པུནཔྤུནཾ ཚཱདཱཔེསྶཏི, པུནཔྤུནཾ ལེཔཱཔེསྶཏི, ཨཏིབྷཱརིཏོ ཝིཧཱརོ པརིཔཏཱི’’ཏི! ཨཐ ཁོ ཏེ བྷིཀྑཱུ ཨཱཡསྨནྟཾ ཚནྣཾ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར ཏྭཾ, ཚནྣ, ཀཏཔརིཡོསིཏཾ ཝིཧཱརཾ པུནཔྤུནཾ ཚཱདཱཔེསི, པུནཔྤུནཾ ལེཔཱཔེསི, ཨཏིབྷཱརིཏོ ཝིཧཱརོ པརིཔཏཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏྭཾ, མོགྷཔུརིས, ཀཏཔརིཡོསིཏཾ ཝིཧཱརཾ པུནཔྤུནཾ ཚཱདཱཔེསྶསི, པུནཔྤུནཾ ལེཔཱཔེསྶསི , ཨཏིབྷཱརིཏོ ཝིཧཱརོ པརིཔཏི! ནེཏཾ, མོགྷཔུརིས, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
134. Tena samayena buddho bhagavā kosambiyaṃ viharati ghositārāme. Tena kho pana samayena āyasmato channassa upaṭṭhāko mahāmatto āyasmato channassa vihāraṃ kārāpeti. Atha kho āyasmā channo katapariyositaṃ vihāraṃ punappunaṃ chādāpeti, punappunaṃ lepāpeti. Atibhārito vihāro paripati. Atha kho āyasmā channo tiṇañca kaṭṭhañca saṃkaḍḍhanto aññatarassa brāhmaṇassa yavakhettaṃ dūsesi. Atha kho so brāhmaṇo ujjhāyati khiyyati vipāceti – ‘‘kathañhi nāma bhadantā amhākaṃ yavakhettaṃ dūsessantī’’ti! Assosuṃ kho bhikkhū tassa brāhmaṇassa ujjhāyantassa khiyyantassa vipācentassa. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āyasmā channo katapariyositaṃ vihāraṃ punappunaṃ chādāpessati, punappunaṃ lepāpessati, atibhārito vihāro paripatī’’ti! Atha kho te bhikkhū āyasmantaṃ channaṃ anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tvaṃ, channa, katapariyositaṃ vihāraṃ punappunaṃ chādāpesi, punappunaṃ lepāpesi, atibhārito vihāro paripatī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tvaṃ, moghapurisa, katapariyositaṃ vihāraṃ punappunaṃ chādāpessasi, punappunaṃ lepāpessasi , atibhārito vihāro paripati! Netaṃ, moghapurisa, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༡༣༥. ‘‘མཧལླཀཾ པན བྷིཀྑུནཱ ཝིཧཱརཾ ཀཱརཡམཱནེན ཡཱཝདྭཱརཀོསཱ ཨགྒལ༹ཊྛཔནཱཡ ཨཱལོཀསནྡྷིཔརིཀམྨཱཡ དྭཏྟིཙྪདནསྶ པརིཡཱཡ ཨཔྤཧརིཏེ ཋིཏེན ཨདྷིཊྛཱཏབྦཾ། ཏཏོ ཙེ ཨུཏྟརིཾ ཨཔྤཧརིཏེཔི ཋིཏོ ཨདྷིཊྛཧེཡྻ པཱཙིཏྟིཡ’’ནྟི།
135.‘‘Mahallakaṃ pana bhikkhunā vihāraṃ kārayamānena yāvadvārakosā aggaḷaṭṭhapanāya ālokasandhiparikammāya dvatticchadanassa pariyāya appaharite ṭhitena adhiṭṭhātabbaṃ. Tato ce uttariṃ appaharitepi ṭhito adhiṭṭhaheyya pācittiya’’nti.
༡༣༦. མཧལླཀོ ནཱམ ཝིཧཱརོ སསྶཱམིཀོ ཝུཙྩཏི།
136.Mahallako nāma vihāro sassāmiko vuccati.
ཝིཧཱརོ ནཱམ ཨུལླིཏྟོ ཝཱ ཧོཏི ཨཝལིཏྟོ ཝཱ ཨུལླིཏྟཱཝལིཏྟོ ཝཱ།
Vihāro nāma ullitto vā hoti avalitto vā ullittāvalitto vā.
ཀཱརཡམཱནེནཱཏི ཀརོནྟོ ཝཱ ཀཱརཱཔེནྟོ ཝཱ།
Kārayamānenāti karonto vā kārāpento vā.
ཡཱཝ དྭཱརཀོསཱཏི པིཊྛསངྒྷཱཊསྶ 23 སམནྟཱ ཧཏྠཔཱསཱ།
Yāva dvārakosāti piṭṭhasaṅghāṭassa 24 samantā hatthapāsā.
ཨགྒལ༹ཊྛཔནཱཡཱཏི དྭཱརཊྛཔནཱཡ།
Aggaḷaṭṭhapanāyāti dvāraṭṭhapanāya.
ཨཱལོཀསནྡྷིཔརིཀམྨཱཡཱཏི ཝཱཏཔཱནཔརིཀམྨཱཡ སེཏཝཎྞཾ ཀཱལ༹ཝཎྞཾ གེརུཀཔརིཀམྨཾ མཱལཱཀམྨཾ ལཏཱཀམྨཾ མཀརདནྟཀཾ པཉྩཔཊིཀཾ།
Ālokasandhiparikammāyāti vātapānaparikammāya setavaṇṇaṃ kāḷavaṇṇaṃ gerukaparikammaṃ mālākammaṃ latākammaṃ makaradantakaṃ pañcapaṭikaṃ.
དྭཏྟིཙྪདནསྶ པརིཡཱཡཾ ཨཔྤཧརིཏེ ཋིཏེན ཨདྷིཊྛཱཏབྦནྟི – ཧརིཏཾ ནཱམ པུབྦཎྞཾ ཨཔརཎྞཾ། སཙེ ཧརིཏེ ཋིཏོ ཨདྷིཊྛཱཏི, ཨཱཔཏྟི དུཀྐཊསྶ། མགྒེན ཚཱདེནྟསྶ དྭེ མགྒེ ཨདྷིཊྛཧིཏྭཱ ཏཏིཡཾ མགྒཾ ཨཱཎཱཔེཏྭཱ པཀྐམིཏབྦཾ། པརིཡཱཡེན ཚཱདེནྟསྶ དྭེ པརིཡཱཡེ ཨདྷིཊྛཧིཏྭཱ ཏཏིཡཾ པརིཡཱཡཾ ཨཱཎཱཔེཏྭཱ པཀྐམིཏབྦཾ།
Dvatticchadanassa pariyāyaṃ appaharite ṭhitena adhiṭṭhātabbanti – haritaṃ nāma pubbaṇṇaṃ aparaṇṇaṃ. Sace harite ṭhito adhiṭṭhāti, āpatti dukkaṭassa. Maggena chādentassa dve magge adhiṭṭhahitvā tatiyaṃ maggaṃ āṇāpetvā pakkamitabbaṃ. Pariyāyena chādentassa dve pariyāye adhiṭṭhahitvā tatiyaṃ pariyāyaṃ āṇāpetvā pakkamitabbaṃ.
༡༣༧. ཏཏོ ཙེ ཨུཏྟརི ཨཔྤཧརིཏེཔི ཋིཏོ ཨདྷིཊྛཧེཡྻཱཏི ཨིཊྛཀཱཡ ༢.༠༢༦༢ ཚཱདེནྟསྶ ཨིཊྛཀིཊྛཀཱཡ ཨཱཔཏྟི པཱཙིཏྟིཡསྶ། སིལཱཡ ཚཱདེནྟསྶ སིལཱཡ སིལཱཡ ཨཱཔཏྟི པཱཙིཏྟིཡསྶ། སུདྷཱཡ ཚཱདེནྟསྶ པིཎྜེ པིཎྜེ ཨཱཔཏྟི པཱཙིཏྟིཡསྶ། ཏིཎེན ཚཱདེནྟསྶ ཀརལེ༹ ཀརལེ༹ ཨཱཔཏྟི པཱཙིཏྟིཡསྶ། པཎྞེན ཚཱདེནྟསྶ པཎྞེ པཎྞེ ཨཱཔཏྟི པཱཙིཏྟིཡསྶ།
137.Tato ce uttari appaharitepi ṭhito adhiṭṭhaheyyāti iṭṭhakāya 2.0262 chādentassa iṭṭhakiṭṭhakāya āpatti pācittiyassa. Silāya chādentassa silāya silāya āpatti pācittiyassa. Sudhāya chādentassa piṇḍe piṇḍe āpatti pācittiyassa. Tiṇena chādentassa karaḷe karaḷe āpatti pācittiyassa. Paṇṇena chādentassa paṇṇe paṇṇe āpatti pācittiyassa.
ཨཏིརེཀདྭཏྟིཔརིཡཱཡེ ཨཏིརེཀསཉྙཱི ཨདྷིཊྛཱཏི, ཨཱཔཏྟི པཱཙིཏྟིཡསྶ། ཨཏིརེཀདྭཏྟིཔརིཡཱཡེ ཝེམཏིཀོ ཨདྷིཊྛཱཏི, ཨཱཔཏྟི པཱཙིཏྟིཡསྶ། ཨཏིརེཀདྭཏྟིཔརིཡཱཡེ ཨཱུནཀསཉྙཱི ཨདྷིཊྛཱཏི, ཨཱཔཏྟི པཱཙིཏྟིཡསྶ།
Atirekadvattipariyāye atirekasaññī adhiṭṭhāti, āpatti pācittiyassa. Atirekadvattipariyāye vematiko adhiṭṭhāti, āpatti pācittiyassa. Atirekadvattipariyāye ūnakasaññī adhiṭṭhāti, āpatti pācittiyassa.
ཨཱུནཀདྭཏྟིཔརིཡཱཡེ ཨཏིརེཀསཉྙཱི, ཨཱཔཏྟི དུཀྐཊསྶ། ཨཱུནཀདྭཏྟིཔརིཡཱཡེ ཝེམཏིཀོ, ཨཱཔཏྟི དུཀྐཊསྶ། ཨཱུནཀདྭཏྟིཔརིཡཱཡེ ཨཱུནཀསཉྙཱི, ཨནཱཔཏྟི།
Ūnakadvattipariyāye atirekasaññī, āpatti dukkaṭassa. Ūnakadvattipariyāye vematiko, āpatti dukkaṭassa. Ūnakadvattipariyāye ūnakasaññī, anāpatti.
༡༣༨. ཨནཱཔཏྟི དྭཏྟིཔརིཡཱཡེ, ཨཱུནཀདྭཏྟིཔརིཡཱཡེ, ལེཎེ, གུཧཱཡ, ཏིཎཀུཊིཀཱཡ, ཨཉྙསྶཏྠཱཡ, ཨཏྟནོ དྷནེན, ཝཱསཱགཱརཾ ཋཔེཏྭཱ སབྦཏྠ ཨནཱཔཏྟི, ཨུམྨཏྟཀསྶ, ཨཱདིཀམྨིཀསྶཱཏི།
138. Anāpatti dvattipariyāye, ūnakadvattipariyāye, leṇe, guhāya, tiṇakuṭikāya, aññassatthāya, attano dhanena, vāsāgāraṃ ṭhapetvā sabbattha anāpatti, ummattakassa, ādikammikassāti.
མཧལླཀཝིཧཱརསིཀྑཱཔདཾ ནིཊྛིཏཾ ནཝམཾ།
Mahallakavihārasikkhāpadaṃ niṭṭhitaṃ navamaṃ.
༡༠. སཔྤཱཎཀསིཀྑཱཔདཾ
10. Sappāṇakasikkhāpadaṃ
༡༣༩. ཏེན སམཡེན བུདྡྷོ བྷགཝཱ ཨཱལ༹ཝིཡཾ ཝིཧརཏི ཨགྒཱལ༹ཝེ ཙེཏིཡེ། ཏེན ཁོ པན སམཡེན ཨཱལ༹ཝཀཱ བྷིཀྑཱུ ནཝཀམྨཾ ཀརོནྟཱ ཛཱནཾ སཔྤཱཎཀཾ ཨུདཀཾ ཏིཎམྤི མཏྟིཀམྤི སིཉྩནྟིཔི སིཉྩཱཔེནྟིཔི། ཡེ ཏེ བྷིཀྑཱུ ཨཔྤིཙྪཱ…པེ॰… ཏེ ཨུཛ྄ཛྷཱཡནྟི ཁིཡྻནྟི ཝིཔཱཙེནྟི – ‘‘ཀཐཉྷི ནཱམ ཨཱལ༹ཝཀཱ བྷིཀྑཱུ ཛཱནཾ སཔྤཱཎཀཾ ཨུདཀཾ ཏིཎམྤི མཏྟིཀམྤི སིཉྩིསྶནྟིཔི སིཉྩཱཔེསྶནྟིཔཱི’’ཏི! ཨཐ ཁོ ཏེ བྷིཀྑཱུ ཨཱལ༹ཝཀེ བྷིཀྑཱུ ཨནེཀཔརིཡཱཡེན ཝིགརཧིཏྭཱ བྷགཝཏོ ཨེཏམཏྠཾ ཨཱརོཙེསུཾ…པེ॰… ‘‘སཙྩཾ ཀིར ཏུམྷེ, བྷིཀྑཝེ, ཛཱནཾ སཔྤཱཎཀཾ ཨུདཀཾ ཏིཎམྤི མཏྟིཀམྤི སིཉྩཐཔི སིཉྩཱཔེཐཔཱི’’ཏི? ‘‘སཙྩཾ, བྷགཝཱ’’ཏི། ཝིགརཧི བུདྡྷོ བྷགཝཱ…པེ॰… ཀཐཉྷི ནཱམ ཏུམྷེ, མོགྷཔུརིསཱ, ཛཱནཾ སཔྤཱཎཀཾ ཨུདཀཾ ཏིཎམྤི མཏྟིཀམྤི སིཉྩིསྶཐཔི སིཉྩཱཔེསྶཐཔི! ནེཏཾ, མོགྷཔུརིསཱ, ཨཔྤསནྣཱནཾ ཝཱ པསཱདཱཡ…པེ॰… ཨེཝཉྩ པན, བྷིཀྑཝེ, ཨིམཾ སིཀྑཱཔདཾ ཨུདྡིསེཡྻཱཐ –
139. Tena samayena buddho bhagavā āḷaviyaṃ viharati aggāḷave cetiye. Tena kho pana samayena āḷavakā bhikkhū navakammaṃ karontā jānaṃ sappāṇakaṃ udakaṃ tiṇampi mattikampi siñcantipi siñcāpentipi. Ye te bhikkhū appicchā…pe… te ujjhāyanti khiyyanti vipācenti – ‘‘kathañhi nāma āḷavakā bhikkhū jānaṃ sappāṇakaṃ udakaṃ tiṇampi mattikampi siñcissantipi siñcāpessantipī’’ti! Atha kho te bhikkhū āḷavake bhikkhū anekapariyāyena vigarahitvā bhagavato etamatthaṃ ārocesuṃ…pe… ‘‘saccaṃ kira tumhe, bhikkhave, jānaṃ sappāṇakaṃ udakaṃ tiṇampi mattikampi siñcathapi siñcāpethapī’’ti? ‘‘Saccaṃ, bhagavā’’ti. Vigarahi buddho bhagavā…pe… kathañhi nāma tumhe, moghapurisā, jānaṃ sappāṇakaṃ udakaṃ tiṇampi mattikampi siñcissathapi siñcāpessathapi! Netaṃ, moghapurisā, appasannānaṃ vā pasādāya…pe… evañca pana, bhikkhave, imaṃ sikkhāpadaṃ uddiseyyātha –
༡༤༠. ‘‘ཡོ པན བྷིཀྑུ ཛཱནཾ སཔྤཱཎཀཾ ཨུདཀཾ ཏིཎཾ ཝཱ མཏྟིཀཾ ཝཱ སིཉྩེཡྻ ཝཱ སིཉྩཱཔེཡྻ ཝཱ, པཱཙིཏྟིཡ’’ནྟི།
140.‘‘Yo pana bhikkhu jānaṃ sappāṇakaṃ udakaṃ tiṇaṃ vā mattikaṃ vā siñceyya vā siñcāpeyya vā, pācittiya’’nti.
༡༤༡. ཡོ པནཱཏི ཡོ ཡཱདིསོ…པེ॰… བྷིཀྑཱུཏི…པེ॰… ཨཡཾ ཨིམསྨིཾ ཨཏྠེ ཨདྷིཔྤེཏོ བྷིཀྑཱུཏི།
141.Yo panāti yo yādiso…pe… bhikkhūti…pe… ayaṃ imasmiṃ atthe adhippeto bhikkhūti.
ཛཱནཱཏི ནཱམ 25 སཱམཾ ཝཱ ཛཱནཱཏི ཨཉྙེ ཝཱ ཏསྶ ཨཱརོཙེནྟི།
Jānāti nāma 26 sāmaṃ vā jānāti aññe vā tassa ārocenti.
སིཉྩེཡྻཱཏི སཡཾ སིཉྩཏི, ཨཱཔཏྟི པཱཙིཏྟིཡསྶ།
Siñceyyāti sayaṃ siñcati, āpatti pācittiyassa.
སིཉྩཱཔེཡྻཱཏི ཨཉྙཾ ཨཱཎཱཔེཏི, ཨཱཔཏྟི པཱཙིཏྟིཡསྶ 27། སཀིཾ ཨཱཎཏྟོ བཧུཀམྤི སིཉྩཏི, ཨཱཔཏྟི པཱཙིཏྟིཡསྶ།
Siñcāpeyyāti aññaṃ āṇāpeti, āpatti pācittiyassa 28. Sakiṃ āṇatto bahukampi siñcati, āpatti pācittiyassa.
༡༤༢. སཔྤཱཎཀེ སཔྤཱཎཀསཉྙཱི ཏིཎཾ ཝཱ མཏྟིཀཾ ཝཱ སིཉྩཏི ཝཱ སིཉྩཱཔེཏི ཝཱ, ཨཱཔཏྟི པཱཙིཏྟིཡསྶ། སཔྤཱཎཀེ ཝེམཏིཀོ ཏིཎཾ ཝཱ མཏྟིཀཾ ཝཱ སིཉྩཏི ཝཱ སིཉྩཱཔེཏི ཝཱ, ཨཱཔཏྟི དུཀྐཊསྶ། སཔྤཱཎཀེ ཨཔྤཱཎཀསཉྙཱི ཏིཎཾ ཝཱ མཏྟིཀཾ ཝཱ སིཉྩཏི ཝཱ སིཉྩཱཔེཏི ཝཱ, ཨནཱཔཏྟི། ཨཔྤཱཎཀེ སཔྤཱཎཀསཉྙཱི, ཨཱཔཏྟི དུཀྐཊསྶ། ཨཔྤཱཎཀེ ཝེམཏིཀོ, ཨཱཔཏྟི དུཀྐཊསྶ། ཨཔྤཱཎཀེ ཨཔྤཱཎཀསཉྙཱི, ཨནཱཔཏྟི།
142. Sappāṇake sappāṇakasaññī tiṇaṃ vā mattikaṃ vā siñcati vā siñcāpeti vā, āpatti pācittiyassa. Sappāṇake vematiko tiṇaṃ vā mattikaṃ vā siñcati vā siñcāpeti vā, āpatti dukkaṭassa. Sappāṇake appāṇakasaññī tiṇaṃ vā mattikaṃ vā siñcati vā siñcāpeti vā, anāpatti. Appāṇake sappāṇakasaññī, āpatti dukkaṭassa. Appāṇake vematiko, āpatti dukkaṭassa. Appāṇake appāṇakasaññī, anāpatti.
༡༤༣. ཨནཱཔཏྟི ཨསཉྩིཙྩ, ཨསྶཏིཡཱ, ཨཛཱནནྟསྶ, ཨུམྨཏྟཀསྶ, ཨཱདིཀམྨིཀསྶཱཏི།
143. Anāpatti asañcicca, assatiyā, ajānantassa, ummattakassa, ādikammikassāti.
སཔྤཱཎཀསིཀྑཱཔདཾ ནིཊྛིཏཾ དསམཾ།
Sappāṇakasikkhāpadaṃ niṭṭhitaṃ dasamaṃ.
བྷཱུཏགཱམཝགྒོ དུཏིཡོ།
Bhūtagāmavaggo dutiyo.
ཏསྶུདྡཱནཾ –
Tassuddānaṃ –
བྷཱུཏཾ ཨཉྙཱཡ ཨུཛ྄ཛྷཱཡཾ, པཀྐམནྟེན ཏེ དུཝེ།
Bhūtaṃ aññāya ujjhāyaṃ, pakkamantena te duve;
པུབྦེ ནིཀྐཌྜྷནཱཧཙྩ, དྭཱརཾ སཔྤཱཎཀེན ཙཱཏི༎
Pubbe nikkaḍḍhanāhacca, dvāraṃ sappāṇakena cāti.
Footnotes:
Related texts:
ཨཊྛཀཐཱ • Aṭṭhakathā / ཝིནཡཔིཊཀ (ཨཊྛཀཐཱ) • Vinayapiṭaka (aṭṭhakathā) / མཧཱཝིབྷངྒ-ཨཊྛཀཐཱ • Mahāvibhaṅga-aṭṭhakathā
༡. བྷཱུཏགཱམསིཀྑཱཔདཝཎྞནཱ • 1. Bhūtagāmasikkhāpadavaṇṇanā
༢. ཨཉྙཝཱདཀསིཀྑཱཔདཝཎྞནཱ • 2. Aññavādakasikkhāpadavaṇṇanā
༣. ཨུཛ྄ཛྷཱཔནཀསིཀྑཱཔདཝཎྞནཱ • 3. Ujjhāpanakasikkhāpadavaṇṇanā
༤. པཋམསེནཱསནསིཀྑཱཔདཝཎྞནཱ • 4. Paṭhamasenāsanasikkhāpadavaṇṇanā
༥. དུཏིཡསེནཱསནསིཀྑཱཔདཝཎྞནཱ • 5. Dutiyasenāsanasikkhāpadavaṇṇanā
༦. ཨནུཔཁཛྫསིཀྑཱཔདཝཎྞནཱ • 6. Anupakhajjasikkhāpadavaṇṇanā
༧. ནིཀྐཌྜྷནསིཀྑཱཔདཝཎྞནཱ • 7. Nikkaḍḍhanasikkhāpadavaṇṇanā
༨. ཝེཧཱསཀུཊིསིཀྑཱཔདཝཎྞནཱ • 8. Vehāsakuṭisikkhāpadavaṇṇanā
༩. མཧལླཀཝིཧཱརསིཀྑཱཔདཝཎྞནཱ • 9. Mahallakavihārasikkhāpadavaṇṇanā
༡༠. སཔྤཱཎཀསིཀྑཱཔདཝཎྞནཱ • 10. Sappāṇakasikkhāpadavaṇṇanā
༡. ཨོཝཱདསིཀྑཱཔདཝཎྞནཱ • 1. Ovādasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / སཱརཏྠདཱིཔནཱི-ཊཱིཀཱ • Sāratthadīpanī-ṭīkā
༡. བྷཱུཏགཱམསིཀྑཱཔདཝཎྞནཱ • 1. Bhūtagāmasikkhāpadavaṇṇanā
༢. ཨཉྙཝཱདཀསིཀྑཱཔདཝཎྞནཱ • 2. Aññavādakasikkhāpadavaṇṇanā
༣. ཨུཛ྄ཛྷཱཔནཀསིཀྑཱཔདཝཎྞནཱ • 3. Ujjhāpanakasikkhāpadavaṇṇanā
༤. པཋམསེནཱསནསིཀྑཱཔདཝཎྞནཱ • 4. Paṭhamasenāsanasikkhāpadavaṇṇanā
༥. དུཏིཡསེནཱསནསིཀྑཱཔདཝཎྞནཱ • 5. Dutiyasenāsanasikkhāpadavaṇṇanā
༦. ཨནུཔཁཛྫསིཀྑཱཔདཝཎྞནཱ • 6. Anupakhajjasikkhāpadavaṇṇanā
༧. ནིཀྐཌྜྷནསིཀྑཱཔདཝཎྞནཱ • 7. Nikkaḍḍhanasikkhāpadavaṇṇanā
༨. ཝེཧཱསཀུཊིསིཀྑཱཔདཝཎྞནཱ • 8. Vehāsakuṭisikkhāpadavaṇṇanā
༩. མཧལླཀཝིཧཱརསིཀྑཱཔདཝཎྞནཱ • 9. Mahallakavihārasikkhāpadavaṇṇanā
༡༠. སཔྤཱཎཀསིཀྑཱཔདཝཎྞནཱ • 10. Sappāṇakasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝཛིརབུདྡྷི-ཊཱིཀཱ • Vajirabuddhi-ṭīkā
༡. བྷཱུཏགཱམསིཀྑཱཔདཝཎྞནཱ • 1. Bhūtagāmasikkhāpadavaṇṇanā
༢. ཨཉྙཝཱདཀསིཀྑཱཔདཝཎྞནཱ • 2. Aññavādakasikkhāpadavaṇṇanā
༣. ཨུཛ྄ཛྷཱཔནཀསིཀྑཱཔདཝཎྞནཱ • 3. Ujjhāpanakasikkhāpadavaṇṇanā
༤. པཋམསེནཱསནསིཀྑཱཔདཝཎྞནཱ • 4. Paṭhamasenāsanasikkhāpadavaṇṇanā
༥. དུཏིཡསེནཱསནསིཀྑཱཔདཝཎྞནཱ • 5. Dutiyasenāsanasikkhāpadavaṇṇanā
༦. ཨནུཔཁཛྫསིཀྑཱཔདཝཎྞནཱ • 6. Anupakhajjasikkhāpadavaṇṇanā
༧. ནིཀྐཌྜྷནསིཀྑཱཔདཝཎྞནཱ • 7. Nikkaḍḍhanasikkhāpadavaṇṇanā
༨. ཝེཧཱསཀུཊིསིཀྑཱཔདཝཎྞནཱ • 8. Vehāsakuṭisikkhāpadavaṇṇanā
༩. མཧལླཀཝིཧཱརསིཀྑཱཔདཝཎྞནཱ • 9. Mahallakavihārasikkhāpadavaṇṇanā
༡༠. སཔྤཱཎཀསིཀྑཱཔདཝཎྞནཱ • 10. Sappāṇakasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / ཝིམཏིཝིནོདནཱི-ཊཱིཀཱ • Vimativinodanī-ṭīkā
༡. བྷཱུཏགཱམསིཀྑཱཔདཝཎྞནཱ • 1. Bhūtagāmasikkhāpadavaṇṇanā
༢. ཨཉྙཝཱདཀསིཀྑཱཔདཝཎྞནཱ • 2. Aññavādakasikkhāpadavaṇṇanā
༣. ཨུཛ྄ཛྷཱཔནཀསིཀྑཱཔདཝཎྞནཱ • 3. Ujjhāpanakasikkhāpadavaṇṇanā
༤. པཋམསེནཱསནསིཀྑཱཔདཝཎྞནཱ • 4. Paṭhamasenāsanasikkhāpadavaṇṇanā
༥. དུཏིཡསེནཱསནསིཀྑཱཔདཝཎྞནཱ • 5. Dutiyasenāsanasikkhāpadavaṇṇanā
༦. ཨནུཔཁཛྫསིཀྑཱཔདཝཎྞནཱ • 6. Anupakhajjasikkhāpadavaṇṇanā
༧. ནིཀྐཌྜྷནསིཀྑཱཔདཝཎྞནཱ • 7. Nikkaḍḍhanasikkhāpadavaṇṇanā
༨. ཝེཧཱསཀུཊིསིཀྑཱཔདཝཎྞནཱ • 8. Vehāsakuṭisikkhāpadavaṇṇanā
༩. མཧལླཀཝིཧཱརསིཀྑཱཔདཝཎྞནཱ • 9. Mahallakavihārasikkhāpadavaṇṇanā
༡༠. སཔྤཱཎཀསིཀྑཱཔདཝཎྞནཱ • 10. Sappāṇakasikkhāpadavaṇṇanā
ཊཱིཀཱ • Tīkā / ཝིནཡཔིཊཀ (ཊཱིཀཱ) • Vinayapiṭaka (ṭīkā) / པཱཙིཏྱཱདིཡོཛནཱཔཱལི༹ • Pācityādiyojanāpāḷi
༡. བྷཱུཏགཱམསིཀྑཱཔད-ཨཏྠཡོཛནཱ • 1. Bhūtagāmasikkhāpada-atthayojanā
༢. ཨཉྙཝཱདཀསིཀྑཱཔདཾ • 2. Aññavādakasikkhāpadaṃ
༣. ཨུཛ྄ཛྷཱཔནཀསིཀྑཱཔདཾ • 3. Ujjhāpanakasikkhāpadaṃ
༤. པཋམསེནཱསནསིཀྑཱཔདཾ • 4. Paṭhamasenāsanasikkhāpadaṃ
༥. དུཏིཡསེནཱསནསིཀྑཱཔདཾ • 5. Dutiyasenāsanasikkhāpadaṃ
༦. ཨནུཔཁཛྫསིཀྑཱཔདཾ • 6. Anupakhajjasikkhāpadaṃ
༧. ནིཀྐཌྜྷནསིཀྑཱཔདཾ • 7. Nikkaḍḍhanasikkhāpadaṃ
༨. ཝེཧཱསཀུཊིསིཀྑཱཔདཾ • 8. Vehāsakuṭisikkhāpadaṃ
༩. མཧལླཀཝིཧཱརསིཀྑཱཔདཾ • 9. Mahallakavihārasikkhāpadaṃ
༡༠. སཔྤཱཎཀསིཀྑཱཔདཾ • 10. Sappāṇakasikkhāpadaṃ
