| Library / Tipiṭaka / திபிடக • Tipiṭaka / கங்கா²விதரணீ-அபி⁴னவ-டீகா • Kaṅkhāvitaraṇī-abhinava-ṭīkā |
8. பூ⁴தாரோசனஸிக்கா²பத³வண்ணனா
8. Bhūtārocanasikkhāpadavaṇṇanā
நிப்பரியாயேனாதி ‘‘பட²மங் ஜா²னங் ஸமாபஜ்ஜி’’ந்திஆதி³னா (பாசி॰ 71) உஜுகமேவ. பரியாயேன ஆரோசிதந்தி ‘‘யோ தே விஹாரே வஸி, ஸோ பி⁴க்கு² பட²மங் ஜா²னங் ஸமாபஜ்ஜி, ஸமாபஜ்ஜதி, ஸமாபன்னோ’’திஆதி³னா (பாசி॰ 75) அஞ்ஞாபதே³ஸேன ப⁴ணிதங். பரினிப்³பா³னகாலே (பாசி॰ அட்ட²॰ 77), பன அந்தரா வா அதிகட்³டி⁴யமானேன உபஸம்பன்னஸ்ஸ பூ⁴தங் ஆரோசேதுங் வட்டதி. அனதிகட்³டி⁴யமானேனாபி (ஸாரத்த²॰ டீ॰ பாசித்திய 3.77) ததா²ரூபே காரணே ஸதி ஆரோசேதுங் வட்டதியேவ. தேனேவ அஞ்ஞதரேன த³ஹரபி⁴க்கு²னா உபவதி³தோ அஞ்ஞதரோ தே²ரோ ‘‘ஆவுஸோ, உபரிமக்³க³த்தா²ய வாயாமங் மா அகாஸி, கீ²ணாஸவோ தயா உபவதி³தோ’’தி ஆஹ. தே²ரேன ச ‘‘அத்தி² தே, ஆவுஸோ, இமஸ்மிங் ஸாஸனே பதிட்டா²’’தி புட்டோ² த³ஹரபி⁴க்கு² ‘‘ஆம, ப⁴ந்தே, ஸோதாபன்னோ ஆஹ’’ந்தி அவோச. ‘‘காரகோ அய’’ந்தி ஞத்வாபி படிபத்தியா அமோக⁴பா⁴வத³ஸ்ஸனேன ஸமுத்தேஜனாய, ஸம்பஹங்ஸனாய ச அரியா அத்தானங் பகாஸெந்தியேவ. தேனாஹ ‘‘ததா²ரூபே காரணே ஸதி உபஸம்பன்னஸ்ஸ ஆரோசயதோ’’தி. ஸுதபரியத்திஸீலகு³ணங் பன அனுபஸம்பன்னஸ்ஸபி ஆரோசேதுங் வட்டதி. கஸ்மா ந இத⁴ உம்மத்தகாத³யோ க³ஹிதாதி ஆஹ ‘‘யஸ்மா பனா’’திஆதி³. ஆதி³ஸத்³தே³ன கி²த்தசித்தவேத³னாட்டானங் க³ஹணங். தஸ்மிங் ஸதீதி உம்மத்தகாதி³பா⁴வே ஸதி. இத⁴ ந க³ஹிதாதி இமஸ்மிங் ஸிக்கா²பதே³ பத³பா⁴ஜனியங் ந க³ஹிதா. அசித்தகந்தி பண்ணத்திஜானநசித்தாபா⁴வேன அசித்தகங். குஸலாப்³யாகதசித்தேஹி த்³விசித்த’’ந்தி இத³ங் உக்கட்ட²பரிச்சே²தே³ன அரியபுக்³க³லேயேவ ஸந்தா⁴ய வுத்தங். ந ஹி பண்ணத்திங் அஜானந்தா ஜா²னலாபி⁴னோ புது²ஜ்ஜனா வத்து²ம்ஹி லோப⁴வஸேன அகுஸலசித்தேனாபி ந ஆரோசெந்தீதி. து³க்க²வேத³னாய வா அபா⁴வதோ ‘‘த்³விவேத³ன’’ந்தி இமஸ்ஸ அனுரூபங் கத்வா ஏவங் வுத்தந்தி த³ட்ட²ப்³ப³ங்.
Nippariyāyenāti ‘‘paṭhamaṃ jhānaṃ samāpajji’’ntiādinā (pāci. 71) ujukameva. Pariyāyena ārocitanti ‘‘yo te vihāre vasi, so bhikkhu paṭhamaṃ jhānaṃ samāpajji, samāpajjati, samāpanno’’tiādinā (pāci. 75) aññāpadesena bhaṇitaṃ. Parinibbānakāle (pāci. aṭṭha. 77), pana antarā vā atikaḍḍhiyamānena upasampannassa bhūtaṃ ārocetuṃ vaṭṭati. Anatikaḍḍhiyamānenāpi (sārattha. ṭī. pācittiya 3.77) tathārūpe kāraṇe sati ārocetuṃ vaṭṭatiyeva. Teneva aññatarena daharabhikkhunā upavadito aññataro thero ‘‘āvuso, uparimaggatthāya vāyāmaṃ mā akāsi, khīṇāsavo tayā upavadito’’ti āha. Therena ca ‘‘atthi te, āvuso, imasmiṃ sāsane patiṭṭhā’’ti puṭṭho daharabhikkhu ‘‘āma, bhante, sotāpanno āha’’nti avoca. ‘‘Kārako aya’’nti ñatvāpi paṭipattiyā amoghabhāvadassanena samuttejanāya, sampahaṃsanāya ca ariyā attānaṃ pakāsentiyeva. Tenāha ‘‘tathārūpe kāraṇe sati upasampannassa ārocayato’’ti. Sutapariyattisīlaguṇaṃ pana anupasampannassapi ārocetuṃ vaṭṭati. Kasmā na idha ummattakādayo gahitāti āha ‘‘yasmā panā’’tiādi. Ādisaddena khittacittavedanāṭṭānaṃ gahaṇaṃ. Tasmiṃ satīti ummattakādibhāve sati. Idha na gahitāti imasmiṃ sikkhāpade padabhājaniyaṃ na gahitā. Acittakanti paṇṇattijānanacittābhāvena acittakaṃ. Kusalābyākatacittehi dvicitta’’nti idaṃ ukkaṭṭhaparicchedena ariyapuggaleyeva sandhāya vuttaṃ. Na hi paṇṇattiṃ ajānantā jhānalābhino puthujjanā vatthumhi lobhavasena akusalacittenāpi na ārocentīti. Dukkhavedanāya vā abhāvato ‘‘dvivedana’’nti imassa anurūpaṃ katvā evaṃ vuttanti daṭṭhabbaṃ.
பூ⁴தாரோசனஸிக்கா²பத³வண்ணனா நிட்டி²தா.
Bhūtārocanasikkhāpadavaṇṇanā niṭṭhitā.
