| Library / Tipiṭaka / д̇ибидага • Tipiṭaka / ган̇каавид̇аран̣ий-абхинава-дийгаа • Kaṅkhāvitaraṇī-abhinava-ṭīkā |
8. бхууд̇аарожанасигкаабад̣̇аван̣н̣анаа
8. Bhūtārocanasikkhāpadavaṇṇanā
ниббарияааязнаад̇и ‘‘батамам̣ жхаанам̣ самаабаж̇ж̇и’’нд̇иаад̣̇инаа (баажи. 71) уж̇угамзва. барияааязна аарожид̇анд̇и ‘‘яо д̇з вихаарз васи, со бхигку батамам̣ жхаанам̣ самаабаж̇ж̇и, самаабаж̇ж̇ад̇и, самаабанно’’д̇иаад̣̇инаа (баажи. 75) ан̃н̃аабад̣̇зсзна бхан̣ид̇ам̣. бариниб̣б̣аанагаалз (баажи. адта. 77), бана анд̇араа ваа ад̇игад̣дхияамаанзна убасамбаннасса бхууд̇ам̣ аарожзд̇ум̣ ваддад̇и. анад̇игад̣дхияамаанзнааби (саарад̇т̇а. дий. баажид̇д̇ияа 3.77) д̇ат̇ааруубз гааран̣з сад̇и аарожзд̇ум̣ ваддад̇иязва. д̇знзва ан̃н̃ад̇арзна д̣̇ахарабхигкунаа убавад̣̇ид̇о ан̃н̃ад̇аро т̇зро ‘‘аавусо, убаримаг̇г̇ад̇т̇ааяа вааяаамам̣ маа агааси, кийн̣аасаво д̇аяаа убавад̣̇ид̇о’’д̇и ааха. т̇зрзна жа ‘‘ад̇т̇и д̇з, аавусо, имасмим̣ саасанз бад̇идтаа’’д̇и будто д̣̇ахарабхигку ‘‘аама, бханд̇з, сод̇аабанно ааха’’нд̇и авожа. ‘‘гаараго аяа’’нд̇и н̃ад̇вааби бадибад̇д̇ияаа амогхабхаавад̣̇ассанзна самуд̇д̇зж̇анааяа, самбахам̣санааяа жа арияаа ад̇д̇аанам̣ багаасзнд̇иязва. д̇знааха ‘‘д̇ат̇ааруубз гааран̣з сад̇и убасамбаннасса аарожаяад̇о’’д̇и. суд̇абарияад̇д̇исийлаг̇ун̣ам̣ бана анубасамбаннассаби аарожзд̇ум̣ ваддад̇и. гасмаа на ид̇ха уммад̇д̇агаад̣̇аяо г̇ахид̇аад̇и ааха ‘‘яасмаа банаа’’д̇иаад̣̇и. аад̣̇исад̣̇д̣̇зна кид̇д̇ажид̇д̇авзд̣̇анааддаанам̣ г̇ахан̣ам̣. д̇асмим̣ сад̇ийд̇и уммад̇д̇агаад̣̇ибхаавз сад̇и. ид̇ха на г̇ахид̇аад̇и имасмим̣ сигкаабад̣̇з бад̣̇абхааж̇анияам̣ на г̇ахид̇аа. ажид̇д̇аганд̇и бан̣н̣ад̇д̇иж̇аананажид̇д̇аабхаавзна ажид̇д̇агам̣. гусалааб̣яаагад̇ажид̇д̇зхи д̣̇вижид̇д̇а’’нд̇и ид̣̇ам̣ уггадтабарижчзд̣̇зна арияабуг̇г̇алзязва санд̇хааяа вуд̇д̇ам̣. на хи бан̣н̣ад̇д̇им̣ аж̇аананд̇аа жхааналаабхино бут̇уж̇ж̇анаа вад̇т̇умхи лобхавасзна агусалажид̇д̇знааби на аарожзнд̇ийд̇и. д̣̇угкавзд̣̇анааяа ваа абхаавад̇о ‘‘д̣̇вивзд̣̇ана’’нд̇и имасса ануруубам̣ гад̇ваа звам̣ вуд̇д̇анд̇и д̣̇адтаб̣б̣ам̣.
Nippariyāyenāti ‘‘paṭhamaṃ jhānaṃ samāpajji’’ntiādinā (pāci. 71) ujukameva. Pariyāyena ārocitanti ‘‘yo te vihāre vasi, so bhikkhu paṭhamaṃ jhānaṃ samāpajji, samāpajjati, samāpanno’’tiādinā (pāci. 75) aññāpadesena bhaṇitaṃ. Parinibbānakāle (pāci. aṭṭha. 77), pana antarā vā atikaḍḍhiyamānena upasampannassa bhūtaṃ ārocetuṃ vaṭṭati. Anatikaḍḍhiyamānenāpi (sārattha. ṭī. pācittiya 3.77) tathārūpe kāraṇe sati ārocetuṃ vaṭṭatiyeva. Teneva aññatarena daharabhikkhunā upavadito aññataro thero ‘‘āvuso, uparimaggatthāya vāyāmaṃ mā akāsi, khīṇāsavo tayā upavadito’’ti āha. Therena ca ‘‘atthi te, āvuso, imasmiṃ sāsane patiṭṭhā’’ti puṭṭho daharabhikkhu ‘‘āma, bhante, sotāpanno āha’’nti avoca. ‘‘Kārako aya’’nti ñatvāpi paṭipattiyā amoghabhāvadassanena samuttejanāya, sampahaṃsanāya ca ariyā attānaṃ pakāsentiyeva. Tenāha ‘‘tathārūpe kāraṇe sati upasampannassa ārocayato’’ti. Sutapariyattisīlaguṇaṃ pana anupasampannassapi ārocetuṃ vaṭṭati. Kasmā na idha ummattakādayo gahitāti āha ‘‘yasmā panā’’tiādi. Ādisaddena khittacittavedanāṭṭānaṃ gahaṇaṃ. Tasmiṃ satīti ummattakādibhāve sati. Idha na gahitāti imasmiṃ sikkhāpade padabhājaniyaṃ na gahitā. Acittakanti paṇṇattijānanacittābhāvena acittakaṃ. Kusalābyākatacittehi dvicitta’’nti idaṃ ukkaṭṭhaparicchedena ariyapuggaleyeva sandhāya vuttaṃ. Na hi paṇṇattiṃ ajānantā jhānalābhino puthujjanā vatthumhi lobhavasena akusalacittenāpi na ārocentīti. Dukkhavedanāya vā abhāvato ‘‘dvivedana’’nti imassa anurūpaṃ katvā evaṃ vuttanti daṭṭhabbaṃ.
бхууд̇аарожанасигкаабад̣̇аван̣н̣анаа нидтид̇аа.
Bhūtārocanasikkhāpadavaṇṇanā niṭṭhitā.
