| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
4. களாரக²த்தியவக்³கோ³
4. Kaḷārakhattiyavaggo
1. பூ⁴தஸுத்தவண்ணனா
1. Bhūtasuttavaṇṇanā
31. களாரக²த்தியவக்³க³ஸ்ஸ பட²மே அஜிதபஞ்ஹேதி அஜிதமாணவேன புச்சி²தபஞ்ஹே. ஸங்கா²தத⁴ம்மாஸேதி ஸங்கா²தத⁴ம்மா வுச்சந்தி ஞாதத⁴ம்மா துலிதத⁴ம்மா தீரிதத⁴ம்மா. ஸெக்கா²தி ஸத்த ஸெக்கா². புதூ²தி தேயேவ ஸத்த ஜனே ஸந்தா⁴ய புதூ²தி வுத்தங். இதா⁴தி இமஸ்மிங் ஸாஸனே. நிபகோதி நேபக்கங் வுச்சதி பஞ்ஞா, தாய ஸமன்னாக³தத்தா நிபகோ, த்வங் பண்டி³தோ பப்³ரூஹீதி யாசதி. இரியந்தி வுத்திங் ஆசாரங் கோ³சரங் விஹாரங் படிபத்திங். மாரிஸாதி ப⁴க³வந்தங் ஆலபதி. ஸெக்கா²னஞ்ச ஸங்கா²தத⁴ம்மானஞ்ச கீ²ணாஸவானஞ்ச படிபத்திங் மயா புச்சி²தோ பண்டி³த, மாரிஸ, மய்ஹங் கதே²ஹீதி அயமெத்த² ஸங்கே²பத்தோ².
31. Kaḷārakhattiyavaggassa paṭhame ajitapañheti ajitamāṇavena pucchitapañhe. Saṅkhātadhammāseti saṅkhātadhammā vuccanti ñātadhammā tulitadhammā tīritadhammā. Sekkhāti satta sekkhā. Puthūti teyeva satta jane sandhāya puthūti vuttaṃ. Idhāti imasmiṃ sāsane. Nipakoti nepakkaṃ vuccati paññā, tāya samannāgatattā nipako, tvaṃ paṇḍito pabrūhīti yācati. Iriyanti vuttiṃ ācāraṃ gocaraṃ vihāraṃ paṭipattiṃ. Mārisāti bhagavantaṃ ālapati. Sekkhānañca saṅkhātadhammānañca khīṇāsavānañca paṭipattiṃ mayā pucchito paṇḍita, mārisa, mayhaṃ kathehīti ayamettha saṅkhepattho.
துண்ஹீ அஹோஸீதி கஸ்மா யாவ ததியங் புட்டோ² துண்ஹீ அஹோஸி? கிங் பஞ்ஹே கங்க²தி, உதா³ஹு அஜ்ஜா²ஸயேதி? அஜ்ஜா²ஸயே கங்க²தி, நோ பஞ்ஹே. ஏவங் கிரஸ்ஸ அஹோஸி – ‘‘ஸத்தா² மங் ஸெக்கா²ஸெக்கா²னங் ஆக³மனீயபடிபத³ங் கதா²பேதுகாமோ; ஸா ச க²ந்த⁴வஸேன தா⁴துவஸேன ஆயதனவஸேன பச்சயாகாரவஸேனாதி ப³ஹூஹி காரணேஹி ஸக்கா கதே²துங். கத²ங் கதெ²ந்தோ நு கோ² ஸத்து² அஜ்ஜா²ஸயங் க³ஹெத்வா கதே²துங் ஸக்கி²ஸ்ஸாமீ’’தி? அத² ஸத்தா² சிந்தேஸி – ‘‘ட²பெத்வா மங் அஞ்ஞோ பத்தங் ஆதா³ய சரந்தோ ஸாவகோ நாம பஞ்ஞாய ஸாரிபுத்தஸமோ நத்தி². அயம்பி மயா பஞ்ஹங் புட்டோ² யாவ ததியங் துண்ஹீ ஏவ. பஞ்ஹே நு கோ² கங்க²தி, உதா³ஹு அஜ்ஜா²ஸயே’’தி. அத² ‘‘அஜ்ஜா²ஸயே’’தி ஞத்வா பஞ்ஹகத²னத்தா²ய நயங் த³த³மானோ பூ⁴தமித³ந்தி, ஸாரிபுத்த, பஸ்ஸஸீதி ஆஹ.
Tuṇhī ahosīti kasmā yāva tatiyaṃ puṭṭho tuṇhī ahosi? Kiṃ pañhe kaṅkhati, udāhu ajjhāsayeti? Ajjhāsaye kaṅkhati, no pañhe. Evaṃ kirassa ahosi – ‘‘satthā maṃ sekkhāsekkhānaṃ āgamanīyapaṭipadaṃ kathāpetukāmo; sā ca khandhavasena dhātuvasena āyatanavasena paccayākāravasenāti bahūhi kāraṇehi sakkā kathetuṃ. Kathaṃ kathento nu kho satthu ajjhāsayaṃ gahetvā kathetuṃ sakkhissāmī’’ti? Atha satthā cintesi – ‘‘ṭhapetvā maṃ añño pattaṃ ādāya caranto sāvako nāma paññāya sāriputtasamo natthi. Ayampi mayā pañhaṃ puṭṭho yāva tatiyaṃ tuṇhī eva. Pañhe nu kho kaṅkhati, udāhu ajjhāsaye’’ti. Atha ‘‘ajjhāsaye’’ti ñatvā pañhakathanatthāya nayaṃ dadamāno bhūtamidanti, sāriputta, passasīti āha.
தத்த² பூ⁴தந்தி ஜாதங் நிப்³ப³த்தங், க²ந்த⁴பஞ்சகஸ்ஸேதங் நாமங். இதி ஸத்தா² ‘‘பஞ்சக்க²ந்த⁴வஸேன, ஸாரிபுத்த, இமங் பஞ்ஹங் கதே²ஹீ’’தி தே²ரஸ்ஸ நயங் தே³தி. ஸஹனயதா³னேன பன தே²ரஸ்ஸ தீரே டி²தபுரிஸஸ்ஸ விவடோ ஏகங்க³ணோ மஹாஸமுத்³தோ³ விய நயஸதேன நயஸஹஸ்ஸேன பஞ்ஹப்³யாகரணங் உபட்டா²ஸி. அத² நங் ப்³யாகரொந்தோ பூ⁴தமித³ந்தி, ப⁴ந்தேதிஆதி³மாஹ. தத்த² பூ⁴தமித³ந்தி இத³ங் நிப்³ப³த்தங் க²ந்த⁴பஞ்சகங். ஸம்மப்பஞ்ஞாய பஸ்ஸதீதி ஸஹ விபஸ்ஸனாய மக்³க³பஞ்ஞாய ஸம்மா பஸ்ஸதி. படிபன்னோ ஹோதீதி ஸீலதோ பட்டா²ய யாவ அரஹத்தமக்³கா³ நிப்³பி³தா³தீ³னங் அத்தா²ய படிபன்னோ ஹோதி. ததா³ஹாரஸம்ப⁴வந்தி இத³ங் கஸ்மா ஆரபி⁴? ஏதங் க²ந்த⁴பஞ்சகங் ஆஹாரங் படிச்ச டி²தங், தஸ்மா தங் ஆஹாரஸம்ப⁴வங் நாம கத்வா த³ஸ்ஸேதுங் இத³ங் ஆரபி⁴. இதி இமினாபி பரியாயேன ஸெக்க²படிபதா³ கதி²தா ஹோதி. ததா³ஹாரனிரோதா⁴தி தேஸங் ஆஹாரானங் நிரோதே⁴ன. இத³ங் கஸ்மா ஆரபி⁴? தஞ்ஹி க²ந்த⁴பஞ்சகங் ஆஹாரனிரோதா⁴ நிருஜ்ஜ²தி, தஸ்மா தங் ஆஹாரனிரோத⁴ஸம்ப⁴வங் நாம கத்வா த³ஸ்ஸேதுங் இத³ங் ஆரபி⁴. இதி இமினாபி பரியாயேன ஸெக்க²ஸ்ஸேவ படிபதா³ கதி²தா. நிப்³பி³தா³தி ஆதீ³னி ஸப்³பா³னி காரணவசனானீதி வேதி³தப்³பா³னி. அனுபாதா³ விமுத்தோதி சதூஹி உபாதா³னேஹி கஞ்சி த⁴ம்மங் அக³ஹெத்வா விமுத்தோ. ஸாது⁴ ஸாதூ⁴தி இமினா தே²ரஸ்ஸ ப்³யாகரணங் ஸம்பஹங்ஸெத்வா ஸயம்பி ததே²வ ப்³யாகரொந்தோ புன ‘‘பூ⁴தமித³’’ந்திஆதி³மாஹாதி. பட²மங்.
Tattha bhūtanti jātaṃ nibbattaṃ, khandhapañcakassetaṃ nāmaṃ. Iti satthā ‘‘pañcakkhandhavasena, sāriputta, imaṃ pañhaṃ kathehī’’ti therassa nayaṃ deti. Sahanayadānena pana therassa tīre ṭhitapurisassa vivaṭo ekaṅgaṇo mahāsamuddo viya nayasatena nayasahassena pañhabyākaraṇaṃ upaṭṭhāsi. Atha naṃ byākaronto bhūtamidanti, bhantetiādimāha. Tattha bhūtamidanti idaṃ nibbattaṃ khandhapañcakaṃ. Sammappaññāya passatīti saha vipassanāya maggapaññāya sammā passati. Paṭipanno hotīti sīlato paṭṭhāya yāva arahattamaggā nibbidādīnaṃ atthāya paṭipanno hoti. Tadāhārasambhavanti idaṃ kasmā ārabhi? Etaṃ khandhapañcakaṃ āhāraṃ paṭicca ṭhitaṃ, tasmā taṃ āhārasambhavaṃ nāma katvā dassetuṃ idaṃ ārabhi. Iti imināpi pariyāyena sekkhapaṭipadā kathitā hoti. Tadāhāranirodhāti tesaṃ āhārānaṃ nirodhena. Idaṃ kasmā ārabhi? Tañhi khandhapañcakaṃ āhāranirodhā nirujjhati, tasmā taṃ āhāranirodhasambhavaṃ nāma katvā dassetuṃ idaṃ ārabhi. Iti imināpi pariyāyena sekkhasseva paṭipadā kathitā. Nibbidāti ādīni sabbāni kāraṇavacanānīti veditabbāni. Anupādā vimuttoti catūhi upādānehi kañci dhammaṃ agahetvā vimutto. Sādhu sādhūti iminā therassa byākaraṇaṃ sampahaṃsetvā sayampi tatheva byākaronto puna ‘‘bhūtamida’’ntiādimāhāti. Paṭhamaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 1. பூ⁴தஸுத்தங் • 1. Bhūtasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 1. பூ⁴தஸுத்தவண்ணனா • 1. Bhūtasuttavaṇṇanā
