| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၈. ဒုတိယအာမကဓညပေယ္ယာလဝဂ္ဂော
8. Dutiyaāmakadhaññapeyyālavaggo
၈. ဗီဇဂာမသုတ္တဝဏ္ဏနာ
8. Bījagāmasuttavaṇṇanā
၁၁၄၈. ‘‘မူလဗီဇ’’န္တိအာဒီသု မူလမေဝ ဗီဇန္တိ မူလဗီဇံ, မူလဗီဇံ ဧတသ္သာတိပိ မူလဗီဇံ။ တတ္ထ ပုရိမေန ဗီဇဂာမော ဝုတ္တော ‘‘ဗီဇာနံ သမူဟော’’တိ ကတ္ဝာ, ဒုတိယေန ဘူတဂာမော။ ဒုဝိဓောပေသော သာမညနိဒ္ဒေသေန, ‘‘မူလဗီဇဉ္စ မူလဗီဇဉ္စ မူလဗီဇ’’န္တိ ဧကသေသနယေန ဝာ ဗီဇတ္ထော ဝေဒိတဗ္ဗော။ ဧသ နယော သေသေသုပိ။ ဖဠုဗီဇန္တိ ပဗ္ဗဗီဇံ။ ဗာဟိရပစ္စယန္တရသမဝာယေ သဒိသဖလုပ္ပတ္တိယာ ဝိသေသကာရဏဘာဝတော ဝိရုဟနသမတ္ထေ သာရဖလေ နိရုဠ္ဟော ဗီဇ-သဒ္ဒော။ တဒတ္ထသိဒ္ဓိယာ မူလာဒီသုပိ ကေသုစိ ပဝတ္တတီတိ တတော နိဝတ္တနတ္ထံ ဧကေန ဗီဇ-သဒ္ဒေန ဝိသေသေတ္ဝာ ဝုတ္တံ ‘‘ဗီဇဗီဇ’’န္တိ ‘‘ရူပရူပံ, ဒုက္ခဒုက္ခ’’န္တိ (သံ. နိ. ၄.၃၂၇) စ ယထာ။ နီလတိဏရုက္ခာဒိကသ္သာတိ အလ္လတိဏသ္သ စေဝ အလ္လရုက္ခာဒိကသ္သ စ။ အာဒိ-သဒ္ဒေန ဩသဓိဂစ္ဆလတာဒီနံ ဂဟဏံ။
1148. ‘‘Mūlabīja’’ntiādīsu mūlameva bījanti mūlabījaṃ, mūlabījaṃ etassātipi mūlabījaṃ. Tattha purimena bījagāmo vutto ‘‘bījānaṃ samūho’’ti katvā, dutiyena bhūtagāmo. Duvidhopeso sāmaññaniddesena, ‘‘mūlabījañca mūlabījañca mūlabīja’’nti ekasesanayena vā bījattho veditabbo. Esa nayo sesesupi. Phaḷubījanti pabbabījaṃ. Bāhirapaccayantarasamavāye sadisaphaluppattiyā visesakāraṇabhāvato viruhanasamatthe sāraphale niruḷho bīja-saddo. Tadatthasiddhiyā mūlādīsupi kesuci pavattatīti tato nivattanatthaṃ ekena bīja-saddena visesetvā vuttaṃ ‘‘bījabīja’’nti ‘‘rūparūpaṃ, dukkhadukkha’’nti (saṃ. ni. 4.327) ca yathā. Nīlatiṇarukkhādikassāti allatiṇassa ceva allarukkhādikassa ca. Ādi-saddena osadhigacchalatādīnaṃ gahaṇaṃ.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၈. ဗီဇဂာမသုတ္တံ • 8. Bījagāmasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၈. ဗီဇဂာမသုတ္တဝဏ္ဏနာ • 8. Bījagāmasuttavaṇṇanā
