| Library / Tipiṭaka / တိပိဋက • Tipiṭaka / မိလိန္ဒပဉ္ဟပာဠိ • Milindapañhapāḷi |
၃. ဗီဇင္ဂပဉ္ဟော
3. Bījaṅgapañho
၃. ‘‘ဘန္တေ နာဂသေန, ‘ဗီဇသ္သ ဒ္ဝေ အင္ဂာနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ ဒ္ဝေ အင္ဂာနိ ဂဟေတဗ္ဗာနီ’’တိ? ‘‘ယထာ, မဟာရာဇ, ဗီဇံ အပ္ပကမ္ပိ သမာနံ ဘဒ္ဒကေ ခေတ္တေ ဝုတ္တံ ဒေဝေ သမ္မာ ဓာရံ ပဝေစ္ဆန္တေ သုဗဟူနိ ဖလာနိ အနုဒသ္သတိ, ဧဝမေဝ ခော, မဟာရာဇ, ယောဂိနာ ယောဂာဝစရေန ယထာ ပဋိပာဒိတံ သီလံ ကေဝလံ သာမညဖလမနုဒသ္သတိ။ ဧဝံ သမ္မာ ပဋိပဇ္ဇိတဗ္ဗံ။ ဣဒံ, မဟာရာဇ, ဗီဇသ္သ ပဌမံ အင္ဂံ ဂဟေတဗ္ဗံ။
3. ‘‘Bhante nāgasena, ‘bījassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, bījaṃ appakampi samānaṃ bhaddake khette vuttaṃ deve sammā dhāraṃ pavecchante subahūni phalāni anudassati, evameva kho, mahārāja, yoginā yogāvacarena yathā paṭipāditaṃ sīlaṃ kevalaṃ sāmaññaphalamanudassati. Evaṃ sammā paṭipajjitabbaṃ. Idaṃ, mahārāja, bījassa paṭhamaṃ aṅgaṃ gahetabbaṃ.
‘‘ပုန စပရံ, မဟာရာဇ, ဗီဇံ သုပရိသောဓိတေ ခေတ္တေ ရောပိတံ ခိပ္ပမေဝ သံဝိရူဟတိ, ဧဝမေဝ ခော, မဟာရာဇ, ယောဂိနာ ယောဂာဝစရေန မာနသံ သုပရိဂ္ဂဟိတံ သုညာဂာရေ ပရိသောဓိတံ သတိပဋ္ဌာနခေတ္တဝရေ ခိတ္တံ ခိပ္ပမေဝ ဝိရူဟတိ။ ဣဒံ, မဟာရာဇ, ဗီဇသ္သ ဒုတိယံ အင္ဂံ ဂဟေတဗ္ဗံ ။ ဘာသိတမ္ပေတံ, မဟာရာဇ, ထေရေန အနုရုဒ္ဓေန –
‘‘Puna caparaṃ, mahārāja, bījaṃ suparisodhite khette ropitaṃ khippameva saṃvirūhati, evameva kho, mahārāja, yoginā yogāvacarena mānasaṃ supariggahitaṃ suññāgāre parisodhitaṃ satipaṭṭhānakhettavare khittaṃ khippameva virūhati. Idaṃ, mahārāja, bījassa dutiyaṃ aṅgaṃ gahetabbaṃ . Bhāsitampetaṃ, mahārāja, therena anuruddhena –
‘‘‘ယထာပိ ခေတ္တေ 1 ပရိသုဒ္ဓေ၊ ဗီဇဉ္စသ္သ ပတိဋ္ဌိတံ။
‘‘‘Yathāpi khette 2 parisuddhe, bījañcassa patiṭṭhitaṃ;
ဝိပုလံ တသ္သ ဖလံ ဟောတိ၊ အပိ တောသေတိ ကသ္သကံ။
Vipulaṃ tassa phalaṃ hoti, api toseti kassakaṃ.
‘‘‘တထေဝ ယောဂိနော စိတ္တံ၊ သုညာဂာရေ ဝိသောဓိတံ။
‘‘‘Tatheva yogino cittaṃ, suññāgāre visodhitaṃ;
သတိပဋ္ဌာနခေတ္တမ္ဟိ၊ ခိပ္ပမေဝ ဝိရူဟတီ’’’တိ။
Satipaṭṭhānakhettamhi, khippameva virūhatī’’’ti.
ဗီဇင္ဂပဉ္ဟော တတိယော။
Bījaṅgapañho tatiyo.
Footnotes:
