| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
3. බීජඞ්‌ගපඤ්‌හො
3. Bījaṅgapañho
3. ‘‘භන්‌තෙ නාගසෙන, ‘බීජස්‌ස ද්‌වෙ අඞ්‌ගානි ගහෙතබ්‌බානී’ති යං වදෙසි, කතමානි තානි ද්‌වෙ අඞ්‌ගානි ගහෙතබ්‌බානී’’ති? ‘‘යථා, මහාරාජ, බීජං අප්‌පකම්‌පි සමානං භද්‌දකෙ ඛෙත්‌තෙ වුත්‌තං දෙවෙ සම්‌මා ධාරං පවෙච්‌ඡන්‌තෙ සුබහූනි ඵලානි අනුදස්‌සති, එවමෙව ඛො, මහාරාජ, යොගිනා යොගාවචරෙන යථා පටිපාදිතං සීලං කෙවලං සාමඤ්‌ඤඵලමනුදස්‌සති. එවං සම්‌මා පටිපජ්‌ජිතබ්‌බං. ඉදං, මහාරාජ, බීජස්‌ස පඨමං අඞ්‌ගං ගහෙතබ්‌බං.
3. ‘‘Bhante nāgasena, ‘bījassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, bījaṃ appakampi samānaṃ bhaddake khette vuttaṃ deve sammā dhāraṃ pavecchante subahūni phalāni anudassati, evameva kho, mahārāja, yoginā yogāvacarena yathā paṭipāditaṃ sīlaṃ kevalaṃ sāmaññaphalamanudassati. Evaṃ sammā paṭipajjitabbaṃ. Idaṃ, mahārāja, bījassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, බීජං සුපරිසොධිතෙ ඛෙත්‌තෙ රොපිතං ඛිප්‌පමෙව සංවිරූහති, එවමෙව ඛො, මහාරාජ, යොගිනා යොගාවචරෙන මානසං සුපරිග්‌ගහිතං සුඤ්‌ඤාගාරෙ පරිසොධිතං සතිපට්‌ඨානඛෙත්‌තවරෙ ඛිත්‌තං ඛිප්‌පමෙව විරූහති. ඉදං, මහාරාජ, බීජස්‌ස දුතියං අඞ්‌ගං ගහෙතබ්‌බං . භාසිතම්‌පෙතං, මහාරාජ, ථෙරෙන අනුරුද්‌ධෙන –
‘‘Puna caparaṃ, mahārāja, bījaṃ suparisodhite khette ropitaṃ khippameva saṃvirūhati, evameva kho, mahārāja, yoginā yogāvacarena mānasaṃ supariggahitaṃ suññāgāre parisodhitaṃ satipaṭṭhānakhettavare khittaṃ khippameva virūhati. Idaṃ, mahārāja, bījassa dutiyaṃ aṅgaṃ gahetabbaṃ . Bhāsitampetaṃ, mahārāja, therena anuruddhena –
‘‘‘යථාපි ඛෙත්‌තෙ 1 පරිසුද්‌ධෙ, බීජඤ්‌චස්‌ස පතිට්‌ඨිතං;
‘‘‘Yathāpi khette 2 parisuddhe, bījañcassa patiṭṭhitaṃ;
විපුලං තස්‌ස ඵලං හොති, අපි තොසෙති කස්‌සකං.
Vipulaṃ tassa phalaṃ hoti, api toseti kassakaṃ.
‘‘‘තථෙව යොගිනො චිත්‌තං, සුඤ්‌ඤාගාරෙ විසොධිතං;
‘‘‘Tatheva yogino cittaṃ, suññāgāre visodhitaṃ;
සතිපට්‌ඨානඛෙත්‌තම්‌හි, ඛිප්‌පමෙව විරූහතී’’’ති.
Satipaṭṭhānakhettamhi, khippameva virūhatī’’’ti.
බීජඞ්‌ගපඤ්‌හො තතියො.
Bījaṅgapañho tatiyo.
Footnotes:
