| Library / Tipiṭaka / ཏིཔིཊཀ • Tipiṭaka / མིལིནྡཔཉྷཔཱལི༹ • Milindapañhapāḷi |
༣. བཱིཛངྒཔཉྷོ
3. Bījaṅgapañho
༣. ‘‘བྷནྟེ ནཱགསེན, ‘བཱིཛསྶ དྭེ ཨངྒཱནི གཧེཏབྦཱནཱི’ཏི ཡཾ ཝདེསི, ཀཏམཱནི ཏཱནི དྭེ ཨངྒཱནི གཧེཏབྦཱནཱི’’ཏི? ‘‘ཡཐཱ, མཧཱརཱཛ, བཱིཛཾ ཨཔྤཀམྤི སམཱནཾ བྷདྡཀེ ཁེཏྟེ ཝུཏྟཾ དེཝེ སམྨཱ དྷཱརཾ པཝེཙྪནྟེ སུབཧཱུནི ཕལཱནི ཨནུདསྶཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན ཡཐཱ པཊིཔཱདིཏཾ སཱིལཾ ཀེཝལཾ སཱམཉྙཕལམནུདསྶཏི། ཨེཝཾ སམྨཱ པཊིཔཛྫིཏབྦཾ། ཨིདཾ, མཧཱརཱཛ, བཱིཛསྶ པཋམཾ ཨངྒཾ གཧེཏབྦཾ།
3. ‘‘Bhante nāgasena, ‘bījassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, bījaṃ appakampi samānaṃ bhaddake khette vuttaṃ deve sammā dhāraṃ pavecchante subahūni phalāni anudassati, evameva kho, mahārāja, yoginā yogāvacarena yathā paṭipāditaṃ sīlaṃ kevalaṃ sāmaññaphalamanudassati. Evaṃ sammā paṭipajjitabbaṃ. Idaṃ, mahārāja, bījassa paṭhamaṃ aṅgaṃ gahetabbaṃ.
‘‘པུན ཙཔརཾ, མཧཱརཱཛ, བཱིཛཾ སུཔརིསོདྷིཏེ ཁེཏྟེ རོཔིཏཾ ཁིཔྤམེཝ སཾཝིརཱུཧཏི, ཨེཝམེཝ ཁོ, མཧཱརཱཛ, ཡོགིནཱ ཡོགཱཝཙརེན མཱནསཾ སུཔརིགྒཧིཏཾ སུཉྙཱགཱརེ པརིསོདྷིཏཾ སཏིཔཊྛཱནཁེཏྟཝརེ ཁིཏྟཾ ཁིཔྤམེཝ ཝིརཱུཧཏི། ཨིདཾ, མཧཱརཱཛ, བཱིཛསྶ དུཏིཡཾ ཨངྒཾ གཧེཏབྦཾ ། བྷཱསིཏམྤེཏཾ, མཧཱརཱཛ, ཐེརེན ཨནུརུདྡྷེན –
‘‘Puna caparaṃ, mahārāja, bījaṃ suparisodhite khette ropitaṃ khippameva saṃvirūhati, evameva kho, mahārāja, yoginā yogāvacarena mānasaṃ supariggahitaṃ suññāgāre parisodhitaṃ satipaṭṭhānakhettavare khittaṃ khippameva virūhati. Idaṃ, mahārāja, bījassa dutiyaṃ aṅgaṃ gahetabbaṃ . Bhāsitampetaṃ, mahārāja, therena anuruddhena –
‘‘‘ཡཐཱཔི ཁེཏྟེ 1 པརིསུདྡྷེ, བཱིཛཉྩསྶ པཏིཊྛིཏཾ།
‘‘‘Yathāpi khette 2 parisuddhe, bījañcassa patiṭṭhitaṃ;
ཝིཔུལཾ ཏསྶ ཕལཾ ཧོཏི, ཨཔི ཏོསེཏི ཀསྶཀཾ༎
Vipulaṃ tassa phalaṃ hoti, api toseti kassakaṃ.
‘‘‘ཏཐེཝ ཡོགིནོ ཙིཏྟཾ, སུཉྙཱགཱརེ ཝིསོདྷིཏཾ།
‘‘‘Tatheva yogino cittaṃ, suññāgāre visodhitaṃ;
སཏིཔཊྛཱནཁེཏྟམྷི, ཁིཔྤམེཝ ཝིརཱུཧཏཱི’’’ཏི༎
Satipaṭṭhānakhettamhi, khippameva virūhatī’’’ti.
བཱིཛངྒཔཉྷོ ཏཏིཡོ།
Bījaṅgapañho tatiyo.
Footnotes:
