| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
2. பீ³ஜஸுத்தங்
2. Bījasuttaṃ
54. ஸாவத்தி²னிதா³னங் . ‘‘பஞ்சிமானி, பி⁴க்க²வே, பீ³ஜஜாதானி. கதமானி பஞ்ச? மூலபீ³ஜங், க²ந்த⁴பீ³ஜங், அக்³க³பீ³ஜங், ப²லுபீ³ஜங், பீ³ஜபீ³ஜஞ்ஞேவ பஞ்சமங். இமானி சஸ்ஸு, பி⁴க்க²வே , பஞ்ச பீ³ஜஜாதானி அக²ண்டா³னி அபூதிகானி அவாதாதபஹதானி ஸாராதா³னி 1 ஸுக²ஸயிதானி, பத²வீ 2 ச நாஸ்ஸ, ஆபோ ச நாஸ்ஸ; அபி நுமானி 3, பி⁴க்க²வே, பஞ்ச பீ³ஜஜாதானி வுத்³தி⁴ங் விரூள்ஹிங் வேபுல்லங் ஆபஜ்ஜெய்யு’’ந்தி? ‘‘நோ ஹேதங், ப⁴ந்தே’’. ‘‘இமானி சஸ்ஸு, பி⁴க்க²வே, பஞ்ச பீ³ஜஜாதானி அக²ண்டா³னி…பே॰… ஸுக²ஸயிதானி, பத²வீ ச அஸ்ஸ, ஆபோ ச அஸ்ஸ; அபி நுமானி, பி⁴க்க²வே, பஞ்ச பீ³ஜஜாதானி வுத்³தி⁴ங் விரூள்ஹிங் வேபுல்லங் ஆபஜ்ஜெய்யு’’ந்தி? ‘‘ஏவங், ப⁴ந்தே’’. ‘‘ஸெய்யதா²பி, பி⁴க்க²வே, பத²வீதா⁴து, ஏவங் சதஸ்ஸோ விஞ்ஞாணட்டி²தியோ த³ட்ட²ப்³பா³. ஸெய்யதா²பி, பி⁴க்க²வே, ஆபோதா⁴து, ஏவங் நந்தி³ராகோ³ த³ட்ட²ப்³போ³. ஸெய்யதா²பி, பி⁴க்க²வே, பஞ்ச பீ³ஜஜாதானி, ஏவங் விஞ்ஞாணங் ஸாஹாரங் த³ட்ட²ப்³ப³ங்’’.
54. Sāvatthinidānaṃ . ‘‘Pañcimāni, bhikkhave, bījajātāni. Katamāni pañca? Mūlabījaṃ, khandhabījaṃ, aggabījaṃ, phalubījaṃ, bījabījaññeva pañcamaṃ. Imāni cassu, bhikkhave , pañca bījajātāni akhaṇḍāni apūtikāni avātātapahatāni sārādāni 4 sukhasayitāni, pathavī 5 ca nāssa, āpo ca nāssa; api numāni 6, bhikkhave, pañca bījajātāni vuddhiṃ virūḷhiṃ vepullaṃ āpajjeyyu’’nti? ‘‘No hetaṃ, bhante’’. ‘‘Imāni cassu, bhikkhave, pañca bījajātāni akhaṇḍāni…pe… sukhasayitāni, pathavī ca assa, āpo ca assa; api numāni, bhikkhave, pañca bījajātāni vuddhiṃ virūḷhiṃ vepullaṃ āpajjeyyu’’nti? ‘‘Evaṃ, bhante’’. ‘‘Seyyathāpi, bhikkhave, pathavīdhātu, evaṃ catasso viññāṇaṭṭhitiyo daṭṭhabbā. Seyyathāpi, bhikkhave, āpodhātu, evaṃ nandirāgo daṭṭhabbo. Seyyathāpi, bhikkhave, pañca bījajātāni, evaṃ viññāṇaṃ sāhāraṃ daṭṭhabbaṃ’’.
‘‘ரூபுபயங் , பி⁴க்க²வே, விஞ்ஞாணங் திட்ட²மானங் திட்டெ²ய்ய , ரூபாரம்மணங் ரூபப்பதிட்ட²ங் நந்தூ³பஸேசனங் வுத்³தி⁴ங் விரூள்ஹிங் வேபுல்லங் ஆபஜ்ஜெய்ய. வேத³னுபயங் வா, பி⁴க்க²வே, விஞ்ஞாணங் திட்ட²மானங் திட்டெ²ய்ய…பே॰… ஸஞ்ஞுபயங் வா, பி⁴க்க²வே, விஞ்ஞாணங் திட்ட²மானங் திட்டெ²ய்ய…பே॰… ஸங்கா²ருபயங் வா, பி⁴க்க²வே, விஞ்ஞாணங் திட்ட²மானங் திட்டெ²ய்ய, ஸங்கா²ராரம்மணங் ஸங்கா²ரப்பதிட்ட²ங் நந்தூ³பஸேசனங் வுத்³தி⁴ங் விரூள்ஹிங் வேபுல்லங் ஆபஜ்ஜெய்ய.
‘‘Rūpupayaṃ , bhikkhave, viññāṇaṃ tiṭṭhamānaṃ tiṭṭheyya , rūpārammaṇaṃ rūpappatiṭṭhaṃ nandūpasecanaṃ vuddhiṃ virūḷhiṃ vepullaṃ āpajjeyya. Vedanupayaṃ vā, bhikkhave, viññāṇaṃ tiṭṭhamānaṃ tiṭṭheyya…pe… saññupayaṃ vā, bhikkhave, viññāṇaṃ tiṭṭhamānaṃ tiṭṭheyya…pe… saṅkhārupayaṃ vā, bhikkhave, viññāṇaṃ tiṭṭhamānaṃ tiṭṭheyya, saṅkhārārammaṇaṃ saṅkhārappatiṭṭhaṃ nandūpasecanaṃ vuddhiṃ virūḷhiṃ vepullaṃ āpajjeyya.
‘‘யோ, பி⁴க்க²வே, ஏவங் வதெ³ய்ய – ‘அஹமஞ்ஞத்ர ரூபா அஞ்ஞத்ர வேத³னாய அஞ்ஞத்ர ஸஞ்ஞாய அஞ்ஞத்ர ஸங்கா²ரேஹி விஞ்ஞாணஸ்ஸ ஆக³திங் வா க³திங் வா சுதிங் வா உபபத்திங் வா வுத்³தி⁴ங் வா விரூள்ஹிங் வா வேபுல்லங் வா பஞ்ஞாபெஸ்ஸாமீ’தி, நேதங் டா²னங் விஜ்ஜதி.
‘‘Yo, bhikkhave, evaṃ vadeyya – ‘ahamaññatra rūpā aññatra vedanāya aññatra saññāya aññatra saṅkhārehi viññāṇassa āgatiṃ vā gatiṃ vā cutiṃ vā upapattiṃ vā vuddhiṃ vā virūḷhiṃ vā vepullaṃ vā paññāpessāmī’ti, netaṃ ṭhānaṃ vijjati.
‘‘ரூபதா⁴துயா சேவ, பி⁴க்க²வே, பி⁴க்கு²னோ ராகோ³ பஹீனோ ஹோதி. ராக³ஸ்ஸ பஹானா வொச்சி²ஜ்ஜதாரம்மணங் பதிட்டா² விஞ்ஞாணஸ்ஸ ந ஹோதி. வேத³னாதா⁴துயா சே… ஸஞ்ஞாதா⁴துயா சே… ஸங்கா²ரதா⁴துயா சே… விஞ்ஞாணதா⁴துயா சே, பி⁴க்க²வே, பி⁴க்கு²னோ ராகோ³ பஹீனோ ஹோதி. ராக³ஸ்ஸ பஹானா வொச்சி²ஜ்ஜதாரம்மணங் பதிட்டா² விஞ்ஞாணஸ்ஸ ந ஹோதி. தத³ப்பதிட்டி²தங் விஞ்ஞாணங் அவிரூள்ஹங் அனபி⁴ஸங்க²ச்சவிமுத்தங். விமுத்தத்தா டி²தங். டி²தத்தா ஸந்துஸிதங். ஸந்துஸிதத்தா ந பரிதஸ்ஸதி. அபரிதஸ்ஸங் பச்சத்தஞ்ஞேவ பரினிப்³பா³யதி. ‘கீ²ணா ஜாதி, வுஸிதங் ப்³ரஹ்மசரியங், கதங் கரணீயங், நாபரங் இத்த²த்தாயா’தி பஜானாதீ’’தி. து³தியங்.
‘‘Rūpadhātuyā ceva, bhikkhave, bhikkhuno rāgo pahīno hoti. Rāgassa pahānā vocchijjatārammaṇaṃ patiṭṭhā viññāṇassa na hoti. Vedanādhātuyā ce… saññādhātuyā ce… saṅkhāradhātuyā ce… viññāṇadhātuyā ce, bhikkhave, bhikkhuno rāgo pahīno hoti. Rāgassa pahānā vocchijjatārammaṇaṃ patiṭṭhā viññāṇassa na hoti. Tadappatiṭṭhitaṃ viññāṇaṃ avirūḷhaṃ anabhisaṅkhaccavimuttaṃ. Vimuttattā ṭhitaṃ. Ṭhitattā santusitaṃ. Santusitattā na paritassati. Aparitassaṃ paccattaññeva parinibbāyati. ‘Khīṇā jāti, vusitaṃ brahmacariyaṃ, kataṃ karaṇīyaṃ, nāparaṃ itthattāyā’ti pajānātī’’ti. Dutiyaṃ.
Footnotes:
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 2. பீ³ஜஸுத்தவண்ணனா • 2. Bījasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 2. பீ³ஜஸுத்தவண்ணனா • 2. Bījasuttavaṇṇanā
