| Library / Tipiṭaka / တိပိဋက • Tipiṭaka / အင္ဂုတ္တရနိကာယ • Aṅguttaranikāya |
၄. ဗီဇသုတ္တံ
4. Bījasuttaṃ
၁၀၄. 1 ‘‘မိစ္ဆာဒိဋ္ဌိကသ္သ, ဘိက္ခဝေ, ပုရိသပုဂ္ဂလသ္သ မိစ္ဆာသင္ကပ္ပသ္သ မိစ္ဆာဝာစသ္သ မိစ္ဆာကမ္မန္တသ္သ မိစ္ဆာအာဇီဝသ္သ မိစ္ဆာဝာယာမသ္သ မိစ္ဆာသတိသ္သ မိစ္ဆာသမာဓိသ္သ မိစ္ဆာဉာဏိသ္သ မိစ္ဆာဝိမုတ္တိသ္သ ယဉ္စ ကာယကမ္မံ ယထာဒိဋ္ဌိ သမတ္တံ သမာဒိန္နံ 2 ယဉ္စ ဝစီကမ္မံ။ ယဉ္စ မနောကမ္မံ ယထာဒိဋ္ဌိ သမတ္တံ သမာဒိန္နံ ယာ စ စေတနာ ယာ စ ပတ္ထနာ ယော စ ပဏိဓိ ယေ စ သင္ခာရာ, သဗ္ဗေ တေ ဓမ္မာ အနိဋ္ဌာယ အကန္တာယ အမနာပာယ အဟိတာယ ဒုက္ခာယ သံဝတ္တန္တိ။ တံ ကိသ္သ ဟေတု? ဒိဋ္ဌိ ဟိသ္သ 3, ဘိက္ခဝေ, ပာပိကာ။
104.4 ‘‘Micchādiṭṭhikassa, bhikkhave, purisapuggalassa micchāsaṅkappassa micchāvācassa micchākammantassa micchāājīvassa micchāvāyāmassa micchāsatissa micchāsamādhissa micchāñāṇissa micchāvimuttissa yañca kāyakammaṃ yathādiṭṭhi samattaṃ samādinnaṃ 5 yañca vacīkammaṃ… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa 6, bhikkhave, pāpikā.
‘‘သေယ္ယထာပိ, ဘိက္ခဝေ, နိမ္ဗဗီဇံ ဝာ ကောသာတကိဗီဇံ ဝာ တိတ္တကာလာဗုဗီဇံ ဝာ အလ္လာယ ပထဝိယာ နိက္ခိတ္တံ ယဉ္စေဝ ပထဝိရသံ ဥပာဒိယတိ ယဉ္စ အာပောရသံ ဥပာဒိယတိ , သဗ္ဗံ တံ တိတ္တကတ္တာယ ကဋုကတ္တာယ အသာတတ္တာယ သံဝတ္တတိ။ တံ ကိသ္သ ဟေတု? ဗီဇဉ္ဟိ, ဘိက္ခဝေ, ပာပကံ။ ဧဝမေဝံ ခော, ဘိက္ခဝေ, မိစ္ဆာဒိဋ္ဌိကသ္သ ပုရိသပုဂ္ဂလသ္သ မိစ္ဆာသင္ကပ္ပသ္သ မိစ္ဆာဝာစသ္သ မိစ္ဆာကမ္မန္တသ္သ မိစ္ဆာအာဇီဝသ္သ မိစ္ဆာဝာယာမသ္သ မိစ္ဆာသတိသ္သ မိစ္ဆာသမာဓိသ္သ မိစ္ဆာဉာဏိသ္သ မိစ္ဆာဝိမုတ္တိသ္သ ယဉ္စေဝ ကာယကမ္မံ ယထာဒိဋ္ဌိ သမတ္တံ သမာဒိန္နံ ယဉ္စ ဝစီကမ္မံ။ ယဉ္စ မနောကမ္မံ ယထာဒိဋ္ဌိ သမတ္တံ သမာဒိန္နံ ယာ စ စေတနာ ယာ စ ပတ္ထနာ ယော စ ပဏိဓိ ယေ စ သင္ခာရာ, သဗ္ဗေ တေ ဓမ္မာ အနိဋ္ဌာယ အကန္တာယ အမနာပာယ အဟိတာယ ဒုက္ခာယ သံဝတ္တန္တိ။ တံ ကိသ္သ ဟေတု? ဒိဋ္ဌိ ဟိသ္သ, ဘိက္ခဝေ , ပာပိကာ။
‘‘Seyyathāpi, bhikkhave, nimbabījaṃ vā kosātakibījaṃ vā tittakālābubījaṃ vā allāya pathaviyā nikkhittaṃ yañceva pathavirasaṃ upādiyati yañca āporasaṃ upādiyati , sabbaṃ taṃ tittakattāya kaṭukattāya asātattāya saṃvattati. Taṃ kissa hetu? Bījañhi, bhikkhave, pāpakaṃ. Evamevaṃ kho, bhikkhave, micchādiṭṭhikassa purisapuggalassa micchāsaṅkappassa micchāvācassa micchākammantassa micchāājīvassa micchāvāyāmassa micchāsatissa micchāsamādhissa micchāñāṇissa micchāvimuttissa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā, sabbe te dhammā aniṭṭhāya akantāya amanāpāya ahitāya dukkhāya saṃvattanti. Taṃ kissa hetu? Diṭṭhi hissa, bhikkhave , pāpikā.
‘‘သမ္မာဒိဋ္ဌိကသ္သ, ဘိက္ခဝေ, ပုရိသပုဂ္ဂလသ္သ သမ္မာသင္ကပ္ပသ္သ သမ္မာဝာစသ္သ သမ္မာကမ္မန္တသ္သ သမ္မာအာဇီဝသ္သ သမ္မာဝာယာမသ္သ သမ္မာသတိသ္သ သမ္မာသမာဓိသ္သ သမ္မာဉာဏိသ္သ သမ္မာဝိမုတ္တိသ္သ ယဉ္စေဝ ကာယကမ္မံ ယထာဒိဋ္ဌိ သမတ္တံ သမာဒိန္နံ ယဉ္စ ဝစီကမ္မံ ယထာဒိဋ္ဌိ သမတ္တံ သမာဒိန္နံ ယဉ္စ မနောကမ္မံ ယထာဒိဋ္ဌိ သမတ္တံ သမာဒိန္နံ ယာ စ စေတနာ ယာ စ ပတ္ထနာ ယော စ ပဏိဓိ ယေ စ သင္ခာရာ, သဗ္ဗေ တေ ဓမ္မာ ဣဋ္ဌာယ ကန္တာယ မနာပာယ ဟိတာယ သုခာယ သံဝတ္တန္တိ။ တံ ကိသ္သ ဟေတု? ဒိဋ္ဌိ ဟိသ္သ, ဘိက္ခဝေ, ဘဒ္ဒိကာ။
‘‘Sammādiṭṭhikassa, bhikkhave, purisapuggalassa sammāsaṅkappassa sammāvācassa sammākammantassa sammāājīvassa sammāvāyāmassa sammāsatissa sammāsamādhissa sammāñāṇissa sammāvimuttissa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ yathādiṭṭhi samattaṃ samādinnaṃ yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā, sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā.
‘‘သေယ္ယထာပိ, ဘိက္ခဝေ, ဥစ္ဆုဗီဇံ ဝာ သာလိဗီဇံ ဝာ မုဒ္ဒိကာဗီဇံ ဝာ အလ္လာယ ပထဝိယာ နိက္ခိတ္တံ ယဉ္စ ပထဝိရသံ ဥပာဒိယတိ ယဉ္စ အာပောရသံ ဥပာဒိယတိ သဗ္ဗံ တံ သာတတ္တာယ မဓုရတ္တာယ အသေစနကတ္တာယ သံဝတ္တတိ။ တံ ကိသ္သ ဟေတု? ဗီဇဉ္ဟိ ဘိက္ခဝေ, ဘဒ္ဒကံ။ ဧဝမေဝံ ခော, ဘိက္ခဝေ, သမ္မာဒိဋ္ဌိကသ္သ။ပေ. ။ သမ္မာဝိမုတ္တိသ္သ ယဉ္စေဝ ကာယကမ္မံ ယထာဒိဋ္ဌိ သမတ္တံ သမာဒိန္နံ ယဉ္စ ဝစီကမ္မံ။ ယဉ္စ မနောကမ္မံ ယထာဒိဋ္ဌိ သမတ္တံ သမာဒိန္နံ ယာ စ စေတနာ ယာ စ ပတ္ထနာ ယော စ ပဏိဓိ ယေ စ သင္ခာရာ, သဗ္ဗေ တေ ဓမ္မာ ဣဋ္ဌာယ ကန္တာယ မနာပာယ ဟိတာယ သုခာယ သံဝတ္တန္တိ။ တံ ကိသ္သ ဟေတု? ဒိဋ္ဌိ ဟိသ္သ, ဘိက္ခဝေ, ဘဒ္ဒိကာ’’တိ။ စတုတ္ထံ။
‘‘Seyyathāpi, bhikkhave, ucchubījaṃ vā sālibījaṃ vā muddikābījaṃ vā allāya pathaviyā nikkhittaṃ yañca pathavirasaṃ upādiyati yañca āporasaṃ upādiyati sabbaṃ taṃ sātattāya madhurattāya asecanakattāya saṃvattati. Taṃ kissa hetu? Bījañhi bhikkhave, bhaddakaṃ. Evamevaṃ kho, bhikkhave, sammādiṭṭhikassa…pe. … sammāvimuttissa yañceva kāyakammaṃ yathādiṭṭhi samattaṃ samādinnaṃ yañca vacīkammaṃ… yañca manokammaṃ yathādiṭṭhi samattaṃ samādinnaṃ yā ca cetanā yā ca patthanā yo ca paṇidhi ye ca saṅkhārā, sabbe te dhammā iṭṭhāya kantāya manāpāya hitāya sukhāya saṃvattanti. Taṃ kissa hetu? Diṭṭhi hissa, bhikkhave, bhaddikā’’ti. Catutthaṃ.
Footnotes:
Related texts:
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) / ၄-၅. ဗီဇသုတ္တာဒိဝဏ္ဏနာ • 4-5. Bījasuttādivaṇṇanā
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၁-၁၂. သမဏသညာသုတ္တာဒိဝဏ္ဏနာ • 1-12. Samaṇasaññāsuttādivaṇṇanā
