| Library / Tipiṭaka / তিপিটক • Tipiṭaka / সংযুত্তনিকায (টীকা) • Saṃyuttanikāya (ṭīkā) |
২. বীজসুত্তৰণ্ণনা
2. Bījasuttavaṇṇanā
৫৪. বীজজাতানীতি জাত-সদ্দো পদপূরণমত্তন্তি আহ ‘‘বীজানী’’তি। ৰচন্তি সেতৰচং। অজ্জুকন্তি তচ্ছকং। ফণিজ্জকং তুলসি। অভিন্নানীতি একদেসেনপি অখণ্ডিতানি। বীজত্থাযাতি বীজকিচ্চায। ন উপকপ্পতীতি পচ্চযো ন হোতীতি দস্সেতি। ন পাপিতানীতি পূতিতং ন উপগতানি। তণ্ডুলসারস্স আদানতো সারাদানি। আরম্মণগ্গহণৰসেন ৰিঞ্ঞাণং তিট্ঠতি এত্থাতি ৰিঞ্ঞাণট্ঠিতিযো। আরম্মণৰসেনাতি আরম্মণভাৰৰসেন। সিনেহনট্ঠেনাতি তণ্হাযনৰসেন সিনিদ্ধতাপাদনেন, যতো ‘‘নন্দূপসেচন’’ন্তি ৰুত্তং। তথা হি ৰিরোপিতং তং কম্মৰিঞ্ঞাণং পটিসন্ধিঅঙ্কুরুপ্পাদনসমত্থং হোতি। সপ্পচ্চযন্তি অৰিজ্জাঅযোনিসোনমনসিকারাদিপচ্চযেহি সপ্পচ্চযং। ৰিরুহতি ৰিপাকসন্তানুপ্পাদনসমত্থো হুত্ৰা।
54.Bījajātānīti jāta-saddo padapūraṇamattanti āha ‘‘bījānī’’ti. Vacanti setavacaṃ. Ajjukanti tacchakaṃ. Phaṇijjakaṃ tulasi. Abhinnānīti ekadesenapi akhaṇḍitāni. Bījatthāyāti bījakiccāya. Na upakappatīti paccayo na hotīti dasseti. Na pāpitānīti pūtitaṃ na upagatāni. Taṇḍulasārassa ādānato sārādāni. Ārammaṇaggahaṇavasena viññāṇaṃ tiṭṭhati etthāti viññāṇaṭṭhitiyo. Ārammaṇavasenāti ārammaṇabhāvavasena. Sinehanaṭṭhenāti taṇhāyanavasena siniddhatāpādanena, yato ‘‘nandūpasecana’’nti vuttaṃ. Tathā hi viropitaṃ taṃ kammaviññāṇaṃ paṭisandhiaṅkuruppādanasamatthaṃ hoti. Sappaccayanti avijjāayonisonamanasikārādipaccayehi sappaccayaṃ. Viruhati vipākasantānuppādanasamattho hutvā.
বীজসুত্তৰণ্ণনা নিট্ঠিতা।
Bījasuttavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / সংযুত্তনিকায • Saṃyuttanikāya / ২. বীজসুত্তং • 2. Bījasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ২. বীজসুত্তৰণ্ণনা • 2. Bījasuttavaṇṇanā
