| Library / Tipiṭaka / තිපිටක • Tipiṭaka / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) |
2. බීජසුත්‌තවණ්‌ණනා
2. Bījasuttavaṇṇanā
54. දුතියෙ බීජජාතානීති බීජානි. මූලබීජන්‌ති වචං වචත්‌තං හලිද්‌දං සිඞ්‌ගිවෙරන්‌ති එවමාදි. ඛන්‌ධබීජන්‌ති අස්‌සත්‌ථො නිග්‍රොධොති එවමාදි. ඵලුබීජන්‌ති උච්‌ඡු වෙළු නළොති එවමාදි. අග්‌ගබීජන්‌ති අජ්‌ජුකං ඵණිජ්‌ජකන්‌ති එවමාදි. බීජබීජන්‌ති සාලිවීහිආදි පුබ්‌බණ්‌ණඤ්‌චෙව මුග්‌ගමාසාදි අපරණ්‌ණඤ්‌ච. අඛණ්‌ඩානීති අභින්‌නානි. භින්‌නකාලතො පට්‌ඨාය බීජං බීජත්‌ථාය න උපකප්‌පති. අපූතිකානීති උදකතෙමනෙන අපූතිකානි. පූතිබීජඤ්‌හි බීජත්‌ථාය න උපකප්‌පති. අවාතාතපහතානීති වාතෙන ච ආතපෙන ච න හතානි, නිරොජතං න පාපිතානි. නිරොජඤ්‌හි කසටං බීජං බීජත්‌ථාය න උපකප්‌පති. සාරාදානීති ගහිතසාරානි පතිට්‌ඨිතසාරානි. නිස්‌සාරඤ්‌හි බීජං බීජත්‌ථාය න උපකප්‌පති. සුඛසයිතානීති චත්‌තාරො මාසෙ කොට්‌ඨෙ පක්‌ඛිත්‌තනියාමෙනෙව සුඛං සයිතානි. පථවීති හෙට්‌ඨා පතිට්‌ඨානපථවී. ආපොති උපරිස්‌නෙහනආපො. චතස්‌සො විඤ්‌ඤාණට්‌ඨිතියොති කම්‌මවිඤ්‌ඤාණස්‌ස ආරම්‌මණභූතා රූපාදයො චත්‌තාරො ඛන්‌ධා. තෙ හි ආරම්‌මණවසෙන පතිට්‌ඨාභූතත්‌තා පථවීධාතුසදිසා. නන්‌දිරාගො සිනෙහනට්‌ඨෙන ආපොධාතුසදිසො. විඤ්‌ඤාණං සාහාරන්‌ති සප්‌පච්‌චයං කම්‌මවිඤ්‌ඤාණං. තඤ්‌හි බීජං විය පථවියං ආරම්‌මණපථවියං විරුහති. දුතියං.
54. Dutiye bījajātānīti bījāni. Mūlabījanti vacaṃ vacattaṃ haliddaṃ siṅgiveranti evamādi. Khandhabījanti assattho nigrodhoti evamādi. Phalubījanti ucchu veḷu naḷoti evamādi. Aggabījanti ajjukaṃ phaṇijjakanti evamādi. Bījabījanti sālivīhiādi pubbaṇṇañceva muggamāsādi aparaṇṇañca. Akhaṇḍānīti abhinnāni. Bhinnakālato paṭṭhāya bījaṃ bījatthāya na upakappati. Apūtikānīti udakatemanena apūtikāni. Pūtibījañhi bījatthāya na upakappati. Avātātapahatānīti vātena ca ātapena ca na hatāni, nirojataṃ na pāpitāni. Nirojañhi kasaṭaṃ bījaṃ bījatthāya na upakappati. Sārādānīti gahitasārāni patiṭṭhitasārāni. Nissārañhi bījaṃ bījatthāya na upakappati. Sukhasayitānīti cattāro māse koṭṭhe pakkhittaniyāmeneva sukhaṃ sayitāni. Pathavīti heṭṭhā patiṭṭhānapathavī. Āpoti uparisnehanaāpo. Catasso viññāṇaṭṭhitiyoti kammaviññāṇassa ārammaṇabhūtā rūpādayo cattāro khandhā. Te hi ārammaṇavasena patiṭṭhābhūtattā pathavīdhātusadisā. Nandirāgo sinehanaṭṭhena āpodhātusadiso. Viññāṇaṃ sāhāranti sappaccayaṃ kammaviññāṇaṃ. Tañhi bījaṃ viya pathaviyaṃ ārammaṇapathaviyaṃ viruhati. Dutiyaṃ.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 2. බීජසුත්‌තං • 2. Bījasuttaṃ
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 2. බීජසුත්‌තවණ්‌ණනා • 2. Bījasuttavaṇṇanā
