| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੨. ਬੀਜਸੁਤ੍ਤવਣ੍ਣਨਾ
2. Bījasuttavaṇṇanā
੫੪. ਦੁਤਿਯੇ ਬੀਜਜਾਤਾਨੀਤਿ ਬੀਜਾਨਿ। ਮੂਲਬੀਜਨ੍ਤਿ વਚਂ વਚਤ੍ਤਂ ਹਲਿਦ੍ਦਂ ਸਿਙ੍ਗਿવੇਰਨ੍ਤਿ ਏવਮਾਦਿ। ਖਨ੍ਧਬੀਜਨ੍ਤਿ ਅਸ੍ਸਤ੍ਥੋ ਨਿਗ੍ਰੋਧੋਤਿ ਏવਮਾਦਿ। ਫਲੁਬੀਜਨ੍ਤਿ ਉਚ੍ਛੁ વੇਲ਼ੁ ਨਲ਼ੋਤਿ ਏવਮਾਦਿ। ਅਗ੍ਗਬੀਜਨ੍ਤਿ ਅਜ੍ਜੁਕਂ ਫਣਿਜ੍ਜਕਨ੍ਤਿ ਏવਮਾਦਿ। ਬੀਜਬੀਜਨ੍ਤਿ ਸਾਲਿવੀਹਿਆਦਿ ਪੁਬ੍ਬਣ੍ਣਞ੍ਚੇવ ਮੁਗ੍ਗਮਾਸਾਦਿ ਅਪਰਣ੍ਣਞ੍ਚ। ਅਖਣ੍ਡਾਨੀਤਿ ਅਭਿਨ੍ਨਾਨਿ। ਭਿਨ੍ਨਕਾਲਤੋ ਪਟ੍ਠਾਯ ਬੀਜਂ ਬੀਜਤ੍ਥਾਯ ਨ ਉਪਕਪ੍ਪਤਿ। ਅਪੂਤਿਕਾਨੀਤਿ ਉਦਕਤੇਮਨੇਨ ਅਪੂਤਿਕਾਨਿ। ਪੂਤਿਬੀਜਞ੍ਹਿ ਬੀਜਤ੍ਥਾਯ ਨ ਉਪਕਪ੍ਪਤਿ। ਅવਾਤਾਤਪਹਤਾਨੀਤਿ વਾਤੇਨ ਚ ਆਤਪੇਨ ਚ ਨ ਹਤਾਨਿ, ਨਿਰੋਜਤਂ ਨ ਪਾਪਿਤਾਨਿ। ਨਿਰੋਜਞ੍ਹਿ ਕਸਟਂ ਬੀਜਂ ਬੀਜਤ੍ਥਾਯ ਨ ਉਪਕਪ੍ਪਤਿ। ਸਾਰਾਦਾਨੀਤਿ ਗਹਿਤਸਾਰਾਨਿ ਪਤਿਟ੍ਠਿਤਸਾਰਾਨਿ। ਨਿਸ੍ਸਾਰਞ੍ਹਿ ਬੀਜਂ ਬੀਜਤ੍ਥਾਯ ਨ ਉਪਕਪ੍ਪਤਿ। ਸੁਖਸਯਿਤਾਨੀਤਿ ਚਤ੍ਤਾਰੋ ਮਾਸੇ ਕੋਟ੍ਠੇ ਪਕ੍ਖਿਤ੍ਤਨਿਯਾਮੇਨੇવ ਸੁਖਂ ਸਯਿਤਾਨਿ। ਪਥવੀਤਿ ਹੇਟ੍ਠਾ ਪਤਿਟ੍ਠਾਨਪਥવੀ। ਆਪੋਤਿ ਉਪਰਿਸ੍ਨੇਹਨਆਪੋ। ਚਤਸ੍ਸੋ વਿਞ੍ਞਾਣਟ੍ਠਿਤਿਯੋਤਿ ਕਮ੍ਮવਿਞ੍ਞਾਣਸ੍ਸ ਆਰਮ੍ਮਣਭੂਤਾ ਰੂਪਾਦਯੋ ਚਤ੍ਤਾਰੋ ਖਨ੍ਧਾ। ਤੇ ਹਿ ਆਰਮ੍ਮਣવਸੇਨ ਪਤਿਟ੍ਠਾਭੂਤਤ੍ਤਾ ਪਥવੀਧਾਤੁਸਦਿਸਾ। ਨਨ੍ਦਿਰਾਗੋ ਸਿਨੇਹਨਟ੍ਠੇਨ ਆਪੋਧਾਤੁਸਦਿਸੋ। વਿਞ੍ਞਾਣਂ ਸਾਹਾਰਨ੍ਤਿ ਸਪ੍ਪਚ੍ਚਯਂ ਕਮ੍ਮવਿਞ੍ਞਾਣਂ। ਤਞ੍ਹਿ ਬੀਜਂ વਿਯ ਪਥવਿਯਂ ਆਰਮ੍ਮਣਪਥવਿਯਂ વਿਰੁਹਤਿ। ਦੁਤਿਯਂ।
54. Dutiye bījajātānīti bījāni. Mūlabījanti vacaṃ vacattaṃ haliddaṃ siṅgiveranti evamādi. Khandhabījanti assattho nigrodhoti evamādi. Phalubījanti ucchu veḷu naḷoti evamādi. Aggabījanti ajjukaṃ phaṇijjakanti evamādi. Bījabījanti sālivīhiādi pubbaṇṇañceva muggamāsādi aparaṇṇañca. Akhaṇḍānīti abhinnāni. Bhinnakālato paṭṭhāya bījaṃ bījatthāya na upakappati. Apūtikānīti udakatemanena apūtikāni. Pūtibījañhi bījatthāya na upakappati. Avātātapahatānīti vātena ca ātapena ca na hatāni, nirojataṃ na pāpitāni. Nirojañhi kasaṭaṃ bījaṃ bījatthāya na upakappati. Sārādānīti gahitasārāni patiṭṭhitasārāni. Nissārañhi bījaṃ bījatthāya na upakappati. Sukhasayitānīti cattāro māse koṭṭhe pakkhittaniyāmeneva sukhaṃ sayitāni. Pathavīti heṭṭhā patiṭṭhānapathavī. Āpoti uparisnehanaāpo. Catasso viññāṇaṭṭhitiyoti kammaviññāṇassa ārammaṇabhūtā rūpādayo cattāro khandhā. Te hi ārammaṇavasena patiṭṭhābhūtattā pathavīdhātusadisā. Nandirāgo sinehanaṭṭhena āpodhātusadiso. Viññāṇaṃ sāhāranti sappaccayaṃ kammaviññāṇaṃ. Tañhi bījaṃ viya pathaviyaṃ ārammaṇapathaviyaṃ viruhati. Dutiyaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੨. ਬੀਜਸੁਤ੍ਤਂ • 2. Bījasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੨. ਬੀਜਸੁਤ੍ਤવਣ੍ਣਨਾ • 2. Bījasuttavaṇṇanā
