| Library / Tipiṭaka / តិបិដក • Tipiṭaka / ជាតកបាឡិ • Jātakapāḷi |
៤៥០. ពិលារកោសិយជាតកំ (១២)
450. Bilārakosiyajātakaṃ (12)
១២៥.
125.
អបចន្តាបិ ទិច្ឆន្តិ, សន្តោ លទ្ធាន ភោជនំ;
Apacantāpi dicchanti, santo laddhāna bhojanaṃ;
កិមេវ ត្វំ បចមានោ, យំ ន ទជ្ជា ន តំ សមំ។
Kimeva tvaṃ pacamāno, yaṃ na dajjā na taṃ samaṃ.
១២៦.
126.
មច្ឆេរា ច បមាទា ច, ឯវំ ទានំ ន ទិយ្យតិ;
Maccherā ca pamādā ca, evaṃ dānaṃ na diyyati;
បុញ្ញំ អាកង្ខមានេន, ទេយ្យំ ហោតិ វិជានតា។
Puññaṃ ākaṅkhamānena, deyyaṃ hoti vijānatā.
១២៧.
127.
យស្សេវ ភីតោ ន ទទាតិ មច្ឆរី, តទេវាទទតោ ភយំ;
Yasseva bhīto na dadāti maccharī, tadevādadato bhayaṃ;
ជិឃច្ឆា ច បិបាសា ច, យស្ស ភាយតិ មច្ឆរី;
Jighacchā ca pipāsā ca, yassa bhāyati maccharī;
តមេវ ពាលំ ផុសតិ, អស្មិំ លោកេ បរម្ហិ ច។
Tameva bālaṃ phusati, asmiṃ loke paramhi ca.
១២៨.
128.
តស្មា វិនេយ្យ មច្ឆេរំ, ទជ្ជា ទានំ មលាភិភូ;
Tasmā vineyya maccheraṃ, dajjā dānaṃ malābhibhū;
បុញ្ញានិ បរលោកស្មិំ, បតិដ្ឋា ហោន្តិ បាណិនំ។
Puññāni paralokasmiṃ, patiṭṭhā honti pāṇinaṃ.
១២៩.
129.
ទុទ្ទទំ ទទមានានំ, ទុក្ករំ កម្ម កុព្ពតំ;
Duddadaṃ dadamānānaṃ, dukkaraṃ kamma kubbataṃ;
អសន្តោ នានុកុព្ពន្តិ, សតំ ធម្មោ ទុរន្នយោ។
Asanto nānukubbanti, sataṃ dhammo durannayo.
១៣០.
130.
អសន្តោ និរយំ យន្តិ, សន្តោ សគ្គបរាយនា។
Asanto nirayaṃ yanti, santo saggaparāyanā.
១៣១.
131.
អប្បស្មា ទក្ខិណា ទិន្នា, សហស្សេន សមំ មិតា។
Appasmā dakkhiṇā dinnā, sahassena samaṃ mitā.
១៣២.
132.
ធម្មំ ចរេ យោបិ សមុញ្ឆកំ ចរេ, ទារញ្ច បោសំ ទទមប្បកស្មិំ 5;
Dhammaṃ care yopi samuñchakaṃ care, dārañca posaṃ dadamappakasmiṃ 6;
សតំ សហស្សានំ សហស្សយាគិនំ, កលម្បិ នាគ្ឃន្តិ តថាវិធស្ស តេ។
Sataṃ sahassānaṃ sahassayāginaṃ, kalampi nāgghanti tathāvidhassa te.
១៣៣.
133.
កេនេស យញ្ញោ វិបុលោ មហគ្ឃតោ 7, សមេន ទិន្នស្ស ន អគ្ឃមេតិ;
Kenesa yañño vipulo mahagghato 8, samena dinnassa na agghameti;
កថំ សតំ សហស្សានំ 9 សហស្សយាគិនំ, កលម្បិ នាគ្ឃន្តិ តថាវិធស្ស តេ។
Kathaṃ sataṃ sahassānaṃ 10 sahassayāginaṃ, kalampi nāgghanti tathāvidhassa te.
១៣៤.
134.
ទទន្តិ ហេកេ វិសមេ និវិដ្ឋា, ឆេត្វា 11 វធិត្វា អថ សោចយិត្វា;
Dadanti heke visame niviṭṭhā, chetvā 12 vadhitvā atha socayitvā;
សា ទក្ខិណា អស្សុមុខា សទណ្ឌា, សមេន ទិន្នស្ស ន អគ្ឃមេតិ;
Sā dakkhiṇā assumukhā sadaṇḍā, samena dinnassa na agghameti;
ឯវំ សតំ សហស្សានំ 13 សហស្សយាគិនំ, កលម្បិ នាគ្ឃន្តិ តថាវិធស្ស តេតិ។
Evaṃ sataṃ sahassānaṃ 14 sahassayāginaṃ, kalampi nāgghanti tathāvidhassa teti.
ពិលារកោសិយជាតកំ ទ្វាទសមំ។
Bilārakosiyajātakaṃ dvādasamaṃ.
Footnotes:
Related texts:
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / ខុទ្ទកនិកាយ (អដ្ឋកថា) • Khuddakanikāya (aṭṭhakathā) / ជាតក-អដ្ឋកថា • Jātaka-aṭṭhakathā / [៤៥០] ១២. ពិលារកោសិយជាតកវណ្ណនា • [450] 12. Bilārakosiyajātakavaṇṇanā
