| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
2. බිළාරඞ්‌ගපඤ්‌හො
2. Biḷāraṅgapañho
2. ‘‘භන්‌තෙ නාගසෙන, ‘බිළාරස්‌ස ද්‌වෙ අඞ්‌ගානි ගහෙතබ්‌බානී’ති යං වදෙසි, කතමානි තානි ද්‌වෙ අඞ්‌ගානි ගහෙතබ්‌බානී’’ති? ‘‘යථා, මහාරාජ, බිළාරො ගුහාගතොපි සුසිරගතොපි හම්‌මියන්‌තරගතොපි උන්‌දූරං යෙව පරියෙසති, එවමෙව ඛො, මහාරාජ, යොගිනා යොගාවචරෙන ගාමගතෙනාපි අරඤ්‌ඤගතෙනාපි රුක්‌ඛමූලගතෙනාපි සුඤ්‌ඤාගාරගතෙනාපි සතතං සමිතං අප්‌පමත්‌තෙන කායගතාසතිභොජනං යෙව පරියෙසිතබ්‌බං. ඉදං, මහාරාජ, බිළාරස්‌ස පඨමං අඞ්‌ගං ගහෙතබ්‌බං.
2. ‘‘Bhante nāgasena, ‘biḷārassa dve aṅgāni gahetabbānī’ti yaṃ vadesi, katamāni tāni dve aṅgāni gahetabbānī’’ti? ‘‘Yathā, mahārāja, biḷāro guhāgatopi susiragatopi hammiyantaragatopi undūraṃ yeva pariyesati, evameva kho, mahārāja, yoginā yogāvacarena gāmagatenāpi araññagatenāpi rukkhamūlagatenāpi suññāgāragatenāpi satataṃ samitaṃ appamattena kāyagatāsatibhojanaṃ yeva pariyesitabbaṃ. Idaṃ, mahārāja, biḷārassa paṭhamaṃ aṅgaṃ gahetabbaṃ.
‘‘පුන චපරං, මහාරාජ, බිළාරො ආසන්‌නෙ යෙව ගොචරං පරියෙසති, එවමෙව ඛො, මහාරාජ, යොගිනා යොගාවචරෙන ඉමෙසු යෙව පඤ්‌චසු උපාදානක්‌ඛන්‌ධෙසු උදයබ්‌බයානුපස්‌සිනා විහරිතබ්‌බං ‘ඉති රූපං ඉති රූපස්‌ස සමුදයො ඉති රූපස්‌ස අත්‌ථඞ්‌ගමො, ඉති වෙදනා ඉති වෙදනාය සමුදයො ඉති වෙදනාය අත්‌ථඞ්‌ගමො, ඉති සඤ්‌ඤා ඉති සඤ්‌ඤාය සමුදයො ඉති සඤ්‌ඤාය අත්‌ථඞ්‌ගමො, ඉති සඞ්‌ඛාරා ඉති සඞ්‌ඛාරානං සමුදයො ඉති සඞ්‌ඛාරානං අත්‌ථඞ්‌ගමො, ඉති විඤ්‌ඤාණං ඉති විඤ්‌ඤාණස්‌ස සමුදයො ඉති විඤ්‌ඤාණස්‌ස අත්‌ථඞ්‌ගමො’ති. ඉදං, මහාරාජ, බිළාරස්‌ස දුතියං අඞ්‌ගං ගහෙතබ්‌බං. භාසිතම්‌පෙතං, මහාරාජ, භගවතා දෙවාතිදෙවෙන –
‘‘Puna caparaṃ, mahārāja, biḷāro āsanne yeva gocaraṃ pariyesati, evameva kho, mahārāja, yoginā yogāvacarena imesu yeva pañcasu upādānakkhandhesu udayabbayānupassinā viharitabbaṃ ‘iti rūpaṃ iti rūpassa samudayo iti rūpassa atthaṅgamo, iti vedanā iti vedanāya samudayo iti vedanāya atthaṅgamo, iti saññā iti saññāya samudayo iti saññāya atthaṅgamo, iti saṅkhārā iti saṅkhārānaṃ samudayo iti saṅkhārānaṃ atthaṅgamo, iti viññāṇaṃ iti viññāṇassa samudayo iti viññāṇassa atthaṅgamo’ti. Idaṃ, mahārāja, biḷārassa dutiyaṃ aṅgaṃ gahetabbaṃ. Bhāsitampetaṃ, mahārāja, bhagavatā devātidevena –
‘‘‘න ඉතො දූරෙ භවිතබ්‌බං, භවග්‌ගං කිං කරිස්‌සති;
‘‘‘Na ito dūre bhavitabbaṃ, bhavaggaṃ kiṃ karissati;
පච්‌චුප්‌පන්‌නම්‌හි වොහාරෙ, සකෙ කායම්‌හි වින්‌දථා’’’ති.
Paccuppannamhi vohāre, sake kāyamhi vindathā’’’ti.
බිළාරඞ්‌ගපඤ්‌හො දුතියො.
Biḷāraṅgapañho dutiyo.
