| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
204. б̣имб̣исаарарааж̇авад̇т̇у
204. Bimbisārarājavatthu
331. д̇зна ко бана самаязна ран̃н̃о мааг̇ад̇хасса сзнияасса б̣имб̣исаарасса бхаг̇анд̣̇алааб̣аад̇хо ход̇и. саадагаа лохид̇зна магкияанд̇и. д̣̇звияо д̣̇исваа уббан̣д̣знд̇и – ‘‘уд̇уний д̣̇аани д̣̇зво, бубпам̣ д̣̇звасса уббаннам̣, на жирам̣ 1 д̣̇зво виж̇ааяиссад̇ий’’д̇и. д̇зна рааж̇аа ман̇гу ход̇и . ат̇а ко рааж̇аа мааг̇ад̇хо сзнияо б̣имб̣исааро абхаяам̣ рааж̇агумаарам̣ зд̇ад̣̇авожа – ‘‘маяхам̣ ко, бхан̣з абхаяа, д̇аад̣̇исо ааб̣аад̇хо, саадагаа лохид̇зна магкияанд̇и, д̣̇звияо мам̣ д̣̇исваа уббан̣д̣знд̇и – ‘уд̇уний д̣̇аани д̣̇зво, бубпам̣ д̣̇звасса уббаннам̣, на жирам̣ д̣̇зво виж̇ааяиссад̇ий’д̇и. ин̇гха, бхан̣з абхаяа, д̇аад̣̇исам̣ взж̇ж̇ам̣ ж̇аанаахи яо мам̣ д̇игижчзяяаа’’д̇и. ‘‘аяам̣, д̣̇зва, амхаагам̣ ж̇ийваго взж̇ж̇о д̇арун̣о бхад̣̇раго. со д̣̇звам̣ д̇игижчиссад̇ий’’д̇и. ‘‘д̇зна хи, бхан̣з абхаяа, ж̇ийвагам̣ взж̇ж̇ам̣ аан̣аабзхи; со мам̣ д̇игижчиссад̇ий’’д̇и. ат̇а ко абхаяо рааж̇агумааро ж̇ийвагам̣ гомаарабхажжам̣ аан̣аабзси – ‘‘г̇ажча, бхан̣з ж̇ийвага, рааж̇аанам̣ д̇игижчаахий’’д̇и. ‘‘звам̣, д̣̇зваа’’д̇и ко ж̇ийваго гомаарабхажжо абхаяасса рааж̇агумаарасса бадиссуд̇ваа накзна бхзсаж̇ж̇ам̣ аад̣̇ааяа язна рааж̇аа мааг̇ад̇хо сзнияо б̣имб̣исааро д̇знубасан̇гами, убасан̇гамид̇ваа рааж̇аанам̣ мааг̇ад̇хам̣ сзнияам̣ б̣имб̣исаарам̣ зд̇ад̣̇авожа – ‘‘ааб̣аад̇хам̣ д̇з, д̣̇зва, бассаамаа’’д̇и 2. ат̇а ко ж̇ийваго гомаарабхажжо ран̃н̃о мааг̇ад̇хасса сзнияасса б̣имб̣исаарасса бхаг̇анд̣̇алааб̣аад̇хам̣ згзнзва аалзбзна абагад̣дхи. ат̇а ко рааж̇аа мааг̇ад̇хо сзнияо б̣имб̣исааро арог̇о самаано бан̃жа ид̇т̇исад̇аани саб̣б̣аалан̇гаарам̣ бхуусаабзд̇ваа омун̃жаабзд̇ваа бун̃ж̇ам̣ гаараабзд̇ваа ж̇ийвагам̣ гомаарабхажжам̣ зд̇ад̣̇авожа – ‘‘зд̇ам̣, бхан̣з ж̇ийвага, бан̃жаннам̣ ид̇т̇исад̇аанам̣ саб̣б̣аалан̇гаарам̣ д̇уяхам̣ ход̇уу’’д̇и. ‘‘алам̣, д̣̇зва, ад̇хигаарам̣ мз д̣̇зво сарад̇уу’’д̇и. ‘‘д̇зна хи, бхан̣з ж̇ийвага, мам̣ убадтаха, ид̇т̇ааг̇ааран̃жа, б̣уд̣̇д̇хаббамукан̃жа бхигкусан̇гха’’нд̇и. ‘‘звам̣, д̣̇зваа’’д̇и ко ж̇ийваго гомаарабхажжо ран̃н̃о мааг̇ад̇хасса сзнияасса б̣имб̣исаарасса бажжассоси.
331. Tena kho pana samayena rañño māgadhassa seniyassa bimbisārassa bhagandalābādho hoti. Sāṭakā lohitena makkhiyanti. Deviyo disvā uppaṇḍenti – ‘‘utunī dāni devo, pupphaṃ devassa uppannaṃ, na ciraṃ 3 devo vijāyissatī’’ti. Tena rājā maṅku hoti . Atha kho rājā māgadho seniyo bimbisāro abhayaṃ rājakumāraṃ etadavoca – ‘‘mayhaṃ kho, bhaṇe abhaya, tādiso ābādho, sāṭakā lohitena makkhiyanti, deviyo maṃ disvā uppaṇḍenti – ‘utunī dāni devo, pupphaṃ devassa uppannaṃ, na ciraṃ devo vijāyissatī’ti. Iṅgha, bhaṇe abhaya, tādisaṃ vejjaṃ jānāhi yo maṃ tikiccheyyā’’ti. ‘‘Ayaṃ, deva, amhākaṃ jīvako vejjo taruṇo bhadrako. So devaṃ tikicchissatī’’ti. ‘‘Tena hi, bhaṇe abhaya, jīvakaṃ vejjaṃ āṇāpehi; so maṃ tikicchissatī’’ti. Atha kho abhayo rājakumāro jīvakaṃ komārabhaccaṃ āṇāpesi – ‘‘gaccha, bhaṇe jīvaka, rājānaṃ tikicchāhī’’ti. ‘‘Evaṃ, devā’’ti kho jīvako komārabhacco abhayassa rājakumārassa paṭissutvā nakhena bhesajjaṃ ādāya yena rājā māgadho seniyo bimbisāro tenupasaṅkami, upasaṅkamitvā rājānaṃ māgadhaṃ seniyaṃ bimbisāraṃ etadavoca – ‘‘ābādhaṃ te, deva, passāmā’’ti 4. Atha kho jīvako komārabhacco rañño māgadhassa seniyassa bimbisārassa bhagandalābādhaṃ ekeneva ālepena apakaḍḍhi. Atha kho rājā māgadho seniyo bimbisāro arogo samāno pañca itthisatāni sabbālaṅkāraṃ bhūsāpetvā omuñcāpetvā puñjaṃ kārāpetvā jīvakaṃ komārabhaccaṃ etadavoca – ‘‘etaṃ, bhaṇe jīvaka, pañcannaṃ itthisatānaṃ sabbālaṅkāraṃ tuyhaṃ hotū’’ti. ‘‘Alaṃ, deva, adhikāraṃ me devo saratū’’ti. ‘‘Tena hi, bhaṇe jīvaka, maṃ upaṭṭhaha, itthāgārañca, buddhappamukhañca bhikkhusaṅgha’’nti. ‘‘Evaṃ, devā’’ti kho jīvako komārabhacco rañño māgadhassa seniyassa bimbisārassa paccassosi.
б̣имб̣исаарарааж̇авад̇т̇у нидтид̇ам̣.
Bimbisārarājavatthu niṭṭhitaṃ.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / сздтибхарияаад̣̇ивад̇т̇угат̇аа • Seṭṭhibhariyādivatthukathā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 203. сздтибхарияаад̣̇ивад̇т̇угат̇аа • 203. Seṭṭhibhariyādivatthukathā
