| Library / Tipiṭaka / д̇ибидага • Tipiṭaka / махааваг̇г̇абаал̣и • Mahāvaggapāḷi |
13. б̣имб̣исаарасамааг̇амагат̇аа
13. Bimbisārasamāgamakathā
55. ат̇а ко бхаг̇аваа г̇аяаасийсз яат̇аабхиранд̇ам̣ вихарид̇ваа язна рааж̇аг̇ахам̣ д̇зна жааригам̣ баггаами, махад̇аа бхигкусан̇гхзна сад̣̇д̇хим̣ бхигкусахассзна саб̣б̣зхзва бураан̣аж̇адилзхи. ат̇а ко бхаг̇аваа анубуб̣б̣зна жааригам̣ жарамаано язна рааж̇аг̇ахам̣ д̇ад̣̇авасари. д̇ад̇ра суд̣̇ам̣ бхаг̇аваа рааж̇аг̇ахз вихарад̇и ладтиванз 1 суббад̇идтз жзд̇ияз. ассоси ко рааж̇аа мааг̇ад̇хо сзнияо б̣имб̣исааро – саман̣о калу бхо г̇од̇амо сагяабуд̇д̇о сагяагулаа баб̣б̣аж̇ид̇о рааж̇аг̇ахам̣ ануббад̇д̇о рааж̇аг̇ахз вихарад̇и ладтиванз суббад̇идтз жзд̇ияз. д̇ам̣ ко бана бхаг̇аванд̇ам̣ 2 г̇од̇амам̣ звам̣ галяаан̣о гид̇д̇исад̣̇д̣̇о аб̣бхуг̇г̇ад̇о – ид̇иби со бхаг̇аваа арахам̣ саммаасамб̣уд̣̇д̇хо виж̇ж̇аажаран̣асамбанно суг̇ад̇о логавид̣̇уу ануд̇д̇аро бурисад̣̇аммасаарат̇и сад̇т̇аа д̣̇звамануссаанам̣ б̣уд̣̇д̇хо бхаг̇аваа 3. со имам̣ логам̣ сад̣̇звагам̣ самаарагам̣ саб̣рахмагам̣ сассаман̣аб̣раахман̣им̣ баж̇ам̣ сад̣̇звамануссам̣ саяам̣ абхин̃н̃аа сажчигад̇ваа бавзд̣̇зд̇и. со д̇хаммам̣ д̣̇зсзд̇и аад̣̇игаляаан̣ам̣ маж̇жхзгаляаан̣ам̣ барияосаанагаляаан̣ам̣ саад̇т̇ам̣ саб̣яан̃ж̇анам̣ гзвалабарибун̣н̣ам̣ барисуд̣̇д̇хам̣ б̣рахмажарияам̣ багаасзд̇и. саад̇ху ко бана д̇ат̇ааруубаанам̣ арахад̇ам̣ д̣̇ассанам̣ ход̇ийд̇и.
55. Atha kho bhagavā gayāsīse yathābhirantaṃ viharitvā yena rājagahaṃ tena cārikaṃ pakkāmi, mahatā bhikkhusaṅghena saddhiṃ bhikkhusahassena sabbeheva purāṇajaṭilehi. Atha kho bhagavā anupubbena cārikaṃ caramāno yena rājagahaṃ tadavasari. Tatra sudaṃ bhagavā rājagahe viharati laṭṭhivane 4 suppatiṭṭhe cetiye. Assosi kho rājā māgadho seniyo bimbisāro – samaṇo khalu bho gotamo sakyaputto sakyakulā pabbajito rājagahaṃ anuppatto rājagahe viharati laṭṭhivane suppatiṭṭhe cetiye. Taṃ kho pana bhagavantaṃ 5 gotamaṃ evaṃ kalyāṇo kittisaddo abbhuggato – itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavā 6. So imaṃ lokaṃ sadevakaṃ samārakaṃ sabrahmakaṃ sassamaṇabrāhmaṇiṃ pajaṃ sadevamanussaṃ sayaṃ abhiññā sacchikatvā pavedeti. So dhammaṃ deseti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ pakāseti. Sādhu kho pana tathārūpānaṃ arahataṃ dassanaṃ hotīti.
ат̇а ко рааж̇аа мааг̇ад̇хо сзнияо б̣имб̣исааро д̣̇ваад̣̇асанахуд̇зхи 7 мааг̇ад̇хигзхи б̣раахман̣аг̇ахабад̇игзхи баривуд̇о язна бхаг̇аваа д̇знубасан̇гами, убасан̇гамид̇ваа бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇и. д̇зби ко д̣̇ваад̣̇асанахуд̇аа мааг̇ад̇хигаа б̣раахман̣аг̇ахабад̇игаа аббзгажжз бхаг̇аванд̇ам̣ абхиваад̣̇зд̇ваа згаманд̇ам̣ нисийд̣̇им̣су, аббзгажжз бхаг̇авад̇аа сад̣̇д̇хим̣ саммод̣̇им̣су, саммод̣̇анийяам̣ гат̇ам̣ сааран̣ийяам̣ вийд̇исаарзд̇ваа згаманд̇ам̣ нисийд̣̇им̣су, аббзгажжз язна бхаг̇аваа д̇знан̃ж̇алим̣ бан̣аамзд̇ваа згаманд̇ам̣ нисийд̣̇им̣су, аббзгажжз бхаг̇авад̇о санд̇игз наамаг̇од̇д̇ам̣ саавзд̇ваа згаманд̇ам̣ нисийд̣̇им̣су, аббзгажжз д̇ун̣хийбхууд̇аа згаманд̇ам̣ нисийд̣̇им̣су. ат̇а ко д̇зсам̣ д̣̇ваад̣̇асанахуд̇аанам̣ 8 мааг̇ад̇хигаанам̣ б̣раахман̣аг̇ахабад̇игаанам̣ зд̇ад̣̇ахоси – ‘‘гим̣ ну ко махаасаман̣о урувзлагассабз б̣рахмажарияам̣ жарад̇и, уд̣̇ааху урувзлагассабо махаасаман̣з б̣рахмажарияам̣ жарад̇ий’’д̇и? ат̇а ко бхаг̇аваа д̇зсам̣ д̣̇ваад̣̇асанахуд̇аанам̣ мааг̇ад̇хигаанам̣ б̣раахман̣аг̇ахабад̇игаанам̣ жзд̇асаа жзд̇обаривид̇аггаман̃н̃ааяа ааяасманд̇ам̣ урувзлагассабам̣ г̇аат̇ааяа аж̇жхабхааси –
Atha kho rājā māgadho seniyo bimbisāro dvādasanahutehi 9 māgadhikehi brāhmaṇagahapatikehi parivuto yena bhagavā tenupasaṅkami, upasaṅkamitvā bhagavantaṃ abhivādetvā ekamantaṃ nisīdi. Tepi kho dvādasanahutā māgadhikā brāhmaṇagahapatikā appekacce bhagavantaṃ abhivādetvā ekamantaṃ nisīdiṃsu, appekacce bhagavatā saddhiṃ sammodiṃsu, sammodanīyaṃ kathaṃ sāraṇīyaṃ vītisāretvā ekamantaṃ nisīdiṃsu, appekacce yena bhagavā tenañjaliṃ paṇāmetvā ekamantaṃ nisīdiṃsu, appekacce bhagavato santike nāmagottaṃ sāvetvā ekamantaṃ nisīdiṃsu, appekacce tuṇhībhūtā ekamantaṃ nisīdiṃsu. Atha kho tesaṃ dvādasanahutānaṃ 10 māgadhikānaṃ brāhmaṇagahapatikānaṃ etadahosi – ‘‘kiṃ nu kho mahāsamaṇo uruvelakassape brahmacariyaṃ carati, udāhu uruvelakassapo mahāsamaṇe brahmacariyaṃ caratī’’ti? Atha kho bhagavā tesaṃ dvādasanahutānaṃ māgadhikānaṃ brāhmaṇagahapatikānaṃ cetasā cetoparivitakkamaññāya āyasmantaṃ uruvelakassapaṃ gāthāya ajjhabhāsi –
‘‘гимзва д̣̇исваа урувзлавааси, бахааси аг̇г̇им̣ гисаговад̣̇аано;
‘‘Kimeva disvā uruvelavāsi, pahāsi aggiṃ kisakovadāno;
бужчаами д̇ам̣ гассаба, зд̇амад̇т̇ам̣ гат̇ам̣ бахийнам̣ д̇ава аг̇г̇ихуд̇д̇анд̇и.
Pucchāmi taṃ kassapa, etamatthaṃ kathaṃ pahīnaṃ tava aggihuttanti.
‘‘руубз жа сад̣̇д̣̇з жа ат̇о расз жа;
‘‘Rūpe ca sadde ca atho rase ca;
гаамид̇т̇ияо жаабхивад̣̇анд̇и яан̃н̃аа;
Kāmitthiyo cābhivadanti yaññā;
зд̇ам̣ маланд̇и убад̇хийсу н̃ад̇ваа;
Etaṃ malanti upadhīsu ñatvā;
д̇асмаа на яидтз на худ̇з аран̃ж̇инд̇и.
Tasmā na yiṭṭhe na hute arañjinti.
‘‘зд̇т̇зва д̇з мано на рамид̇т̇а (гассабаад̇и бхаг̇аваа);
‘‘Ettheva te mano na ramittha (kassapāti bhagavā);
руубзсу сад̣̇д̣̇зсу ат̇о расзсу;
Rūpesu saddesu atho rasesu;
ат̇а го жарахи д̣̇звамануссалогз;
Atha ko carahi devamanussaloke;
рад̇о мано гассаба, б̣руухи мзд̇анд̇и.
Rato mano kassapa, brūhi metanti.
‘‘д̣̇исваа бад̣̇ам̣ санд̇амануубад̇хийгам̣;
‘‘Disvā padaṃ santamanūpadhīkaṃ;
агин̃жанам̣ гаамабхавз асад̇д̇ам̣;
Akiñcanaṃ kāmabhave asattaṃ;
анан̃н̃ат̇аабхаавиманан̃н̃анзяяам̣;
Anaññathābhāvimanaññaneyyaṃ;
д̇асмаа на яидтз на худ̇з аран̃ж̇и’’нд̇и.
Tasmā na yiṭṭhe na hute arañji’’nti.
56. ат̇а ко ааяасмаа урувзлагассабо удтааяаасанаа згам̣сам̣ уд̇д̇араасан̇г̇ам̣ гарид̇ваа бхаг̇авад̇о баад̣̇зсу сирасаа нибад̇ид̇ваа бхаг̇аванд̇ам̣ зд̇ад̣̇авожа – ‘‘сад̇т̇аа мз, бханд̇з, бхаг̇аваа, саавагохамасми; сад̇т̇аа мз, бханд̇з, бхаг̇аваа, саавагохамасмий’’д̇и. ат̇а ко д̇зсам̣ д̣̇ваад̣̇асанахуд̇аанам̣ мааг̇ад̇хигаанам̣ б̣раахман̣аг̇ахабад̇игаанам̣ зд̇ад̣̇ахоси – ‘‘урувзлагассабо махаасаман̣з б̣рахмажарияам̣ жарад̇ий’’д̇и. ат̇а ко бхаг̇аваа д̇зсам̣ д̣̇ваад̣̇асанахуд̇аанам̣ мааг̇ад̇хигаанам̣ б̣раахман̣аг̇ахабад̇игаанам̣ жзд̇асаа жзд̇обаривид̇аггаман̃н̃ааяа анубуб̣б̣им̣ гат̇ам̣ гат̇зси, сзяяат̇ид̣̇ам̣ – д̣̇аанагат̇ам̣ сийлагат̇ам̣ саг̇г̇агат̇ам̣ гаамаанам̣ аад̣̇ийнавам̣ огаарам̣ сам̣гилзсам̣ нзгкаммз аанисам̣сам̣ багаасзси. яад̣̇аа д̇з бхаг̇аваа ан̃н̃ааси галлажид̇д̇з муд̣̇ужид̇д̇з винийваран̣ажид̇д̇з уд̣̇аг̇г̇ажид̇д̇з басаннажид̇д̇з, ат̇а яаа б̣уд̣̇д̇хаанам̣ саамуггам̣сигаа д̇хаммад̣̇зсанаа, д̇ам̣ багаасзси – д̣̇угкам̣, самуд̣̇аяам̣, нирод̇хам̣, маг̇г̇ам̣. сзяяат̇ааби наама суд̣̇д̇хам̣ вад̇т̇ам̣ абаг̇ад̇агаал̣агам̣ саммад̣̇зва раж̇анам̣ бадиг̇г̇ан̣хзяяа, звамзва згаад̣̇асанахуд̇аанам̣ мааг̇ад̇хигаанам̣ б̣раахман̣аг̇ахабад̇игаанам̣ б̣имб̣исаараббамукаанам̣ д̇асмим̣ язва аасанз вираж̇ам̣ вийд̇амалам̣ д̇хаммажагкум̣ уд̣̇абаад̣̇и – яам̣ гин̃жи самуд̣̇аяад̇хаммам̣, саб̣б̣ам̣ д̇ам̣ нирод̇хад̇хамманд̇и. зганахуд̇ам̣ убаасагад̇д̇ам̣ бадивзд̣̇зси.
56. Atha kho āyasmā uruvelakassapo uṭṭhāyāsanā ekaṃsaṃ uttarāsaṅgaṃ karitvā bhagavato pādesu sirasā nipatitvā bhagavantaṃ etadavoca – ‘‘satthā me, bhante, bhagavā, sāvakohamasmi; satthā me, bhante, bhagavā, sāvakohamasmī’’ti. Atha kho tesaṃ dvādasanahutānaṃ māgadhikānaṃ brāhmaṇagahapatikānaṃ etadahosi – ‘‘uruvelakassapo mahāsamaṇe brahmacariyaṃ caratī’’ti. Atha kho bhagavā tesaṃ dvādasanahutānaṃ māgadhikānaṃ brāhmaṇagahapatikānaṃ cetasā cetoparivitakkamaññāya anupubbiṃ kathaṃ kathesi, seyyathidaṃ – dānakathaṃ sīlakathaṃ saggakathaṃ kāmānaṃ ādīnavaṃ okāraṃ saṃkilesaṃ nekkhamme ānisaṃsaṃ pakāsesi. Yadā te bhagavā aññāsi kallacitte muducitte vinīvaraṇacitte udaggacitte pasannacitte, atha yā buddhānaṃ sāmukkaṃsikā dhammadesanā, taṃ pakāsesi – dukkhaṃ, samudayaṃ, nirodhaṃ, maggaṃ. Seyyathāpi nāma suddhaṃ vatthaṃ apagatakāḷakaṃ sammadeva rajanaṃ paṭiggaṇheyya, evameva ekādasanahutānaṃ māgadhikānaṃ brāhmaṇagahapatikānaṃ bimbisārappamukhānaṃ tasmiṃ yeva āsane virajaṃ vītamalaṃ dhammacakkhuṃ udapādi – yaṃ kiñci samudayadhammaṃ, sabbaṃ taṃ nirodhadhammanti. Ekanahutaṃ upāsakattaṃ paṭivedesi.
57. ат̇а ко рааж̇аа мааг̇ад̇хо сзнияо б̣имб̣исааро д̣̇идтад̇хаммо бад̇д̇ад̇хаммо вид̣̇ид̇ад̇хаммо барияог̇аал̣хад̇хаммо д̇ин̣н̣авижигижчо виг̇ад̇агат̇ам̣гат̇о взсаараж̇ж̇аббад̇д̇о абараббажжаяо сад̇т̇усаасанз бхаг̇аванд̇ам̣ зд̇ад̣̇авожа – ‘‘буб̣б̣з мз, бханд̇з, гумаарасса сад̇о бан̃жа ассаасагаа ахзсум̣, д̇з мз зд̇арахи самид̣̇д̇хаа. буб̣б̣з мз, бханд̇з, гумаарасса сад̇о зд̇ад̣̇ахоси – ‘ахо вад̇а мам̣ раж̇ж̇з абхисин̃жзяяу’нд̇и, аяам̣ ко мз, бханд̇з, батамо ассаасаго ахоси, со мз зд̇арахи самид̣̇д̇хо. ‘д̇асса жа мз виж̇ид̇ам̣ арахам̣ саммаасамб̣уд̣̇д̇хо оггамзяяаа’д̇и, аяам̣ ко мз, бханд̇з, д̣̇уд̇ияо ассаасаго ахоси, со мз зд̇арахи самид̣̇д̇хо. ‘д̇ан̃жаахам̣ бхаг̇аванд̇ам̣ баяирубаасзяяа’нд̇и, аяам̣ ко мз, бханд̇з, д̇ад̇ияо ассаасаго ахоси, со мз зд̇арахи самид̣̇д̇хо. ‘со жа мз бхаг̇аваа д̇хаммам̣ д̣̇зсзяяаа’д̇и, аяам̣ ко мз, бханд̇з, жад̇уд̇т̇о ассаасаго ахоси, со мз зд̇арахи самид̣̇д̇хо. ‘д̇асса жаахам̣ бхаг̇авад̇о д̇хаммам̣ ааж̇аанзяяа’нд̇и, аяам̣ ко мз, бханд̇з, бан̃жамо ассаасаго ахоси, со мз зд̇арахи самид̣̇д̇хо. буб̣б̣з мз, бханд̇з, гумаарасса сад̇о имз бан̃жа ассаасагаа ахзсум̣, д̇з мз зд̇арахи самид̣̇д̇хаа. абхигганд̇ам̣, бханд̇з, абхигганд̇ам̣, бханд̇з, сзяяат̇ааби, бханд̇з, ниггуж̇ж̇ид̇ам̣ ваа уггуж̇ж̇зяяа, бадижчаннам̣ ваа виварзяяа, муул̣хасса ваа маг̇г̇ам̣ аажигкзяяа, анд̇хагаарз ваа д̇злабаж̇ж̇од̇ам̣ д̇хаарзяяа жагкуманд̇о руубаани д̣̇агканд̇ийд̇и – звамзвам̣ бхаг̇авад̇аа анзгабарияааязна д̇хаммо багаасид̇о. зсаахам̣, бханд̇з, бхаг̇аванд̇ам̣ саран̣ам̣ г̇ажчаами, д̇хамман̃жа, бхигкусан̇гхан̃жа. убаасагам̣ мам̣ 11, бхаг̇аваа д̇хаарзд̇у аж̇ж̇ад̇аг̇г̇з баан̣убзд̇ам̣ саран̣ам̣ г̇ад̇ам̣, ад̇хиваасзд̇у жа мз, бханд̇з, бхаг̇аваа , сваад̇анааяа бхад̇д̇ам̣ сад̣̇д̇хим̣ бхигкусан̇гхзнаа’’д̇и . ад̇хиваасзси бхаг̇аваа д̇ун̣хийбхаавзна. ат̇а ко рааж̇аа мааг̇ад̇хо сзнияо б̣имб̣исааро бхаг̇авад̇о ад̇хиваасанам̣ вид̣̇ид̇ваа удтааяаасанаа бхаг̇аванд̇ам̣ абхиваад̣̇зд̇ваа бад̣̇агкин̣ам̣ гад̇ваа баггаами. ат̇а ко рааж̇аа мааг̇ад̇хо сзнияо б̣имб̣исааро д̇ассаа рад̇д̇ияаа ажжаязна бан̣ийд̇ам̣ каад̣̇анийяам̣ бхож̇анийяам̣ бадияаад̣̇аабзд̇ваа бхаг̇авад̇о гаалам̣ аарожаабзси – ‘‘гаало, бханд̇з, нидтид̇ам̣ бхад̇д̇а’’нд̇и.
57. Atha kho rājā māgadho seniyo bimbisāro diṭṭhadhammo pattadhammo viditadhammo pariyogāḷhadhammo tiṇṇavicikiccho vigatakathaṃkatho vesārajjappatto aparappaccayo satthusāsane bhagavantaṃ etadavoca – ‘‘pubbe me, bhante, kumārassa sato pañca assāsakā ahesuṃ, te me etarahi samiddhā. Pubbe me, bhante, kumārassa sato etadahosi – ‘aho vata maṃ rajje abhisiñceyyu’nti, ayaṃ kho me, bhante, paṭhamo assāsako ahosi, so me etarahi samiddho. ‘Tassa ca me vijitaṃ arahaṃ sammāsambuddho okkameyyā’ti, ayaṃ kho me, bhante, dutiyo assāsako ahosi, so me etarahi samiddho. ‘Tañcāhaṃ bhagavantaṃ payirupāseyya’nti, ayaṃ kho me, bhante, tatiyo assāsako ahosi, so me etarahi samiddho. ‘So ca me bhagavā dhammaṃ deseyyā’ti, ayaṃ kho me, bhante, catuttho assāsako ahosi, so me etarahi samiddho. ‘Tassa cāhaṃ bhagavato dhammaṃ ājāneyya’nti, ayaṃ kho me, bhante, pañcamo assāsako ahosi, so me etarahi samiddho. Pubbe me, bhante, kumārassa sato ime pañca assāsakā ahesuṃ, te me etarahi samiddhā. Abhikkantaṃ, bhante, abhikkantaṃ, bhante, seyyathāpi, bhante, nikkujjitaṃ vā ukkujjeyya, paṭicchannaṃ vā vivareyya, mūḷhassa vā maggaṃ ācikkheyya, andhakāre vā telapajjotaṃ dhāreyya cakkhumanto rūpāni dakkhantīti – evamevaṃ bhagavatā anekapariyāyena dhammo pakāsito. Esāhaṃ, bhante, bhagavantaṃ saraṇaṃ gacchāmi, dhammañca, bhikkhusaṅghañca. Upāsakaṃ maṃ 12, bhagavā dhāretu ajjatagge pāṇupetaṃ saraṇaṃ gataṃ, adhivāsetu ca me, bhante, bhagavā , svātanāya bhattaṃ saddhiṃ bhikkhusaṅghenā’’ti . Adhivāsesi bhagavā tuṇhībhāvena. Atha kho rājā māgadho seniyo bimbisāro bhagavato adhivāsanaṃ viditvā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. Atha kho rājā māgadho seniyo bimbisāro tassā rattiyā accayena paṇītaṃ khādanīyaṃ bhojanīyaṃ paṭiyādāpetvā bhagavato kālaṃ ārocāpesi – ‘‘kālo, bhante, niṭṭhitaṃ bhatta’’nti.
58. ат̇а ко бхаг̇аваа буб̣б̣ан̣хасамаяам̣ ниваасзд̇ваа бад̇д̇ажийварамаад̣̇ааяа рааж̇аг̇ахам̣ баависи махад̇аа бхигкусан̇гхзна сад̣̇д̇хим̣ бхигкусахассзна саб̣б̣зхзва бураан̣аж̇адилзхи. д̇зна ко бана самаязна сагго д̣̇зваанаминд̣̇о маан̣авагаван̣н̣ам̣ абхинимминид̇ваа б̣уд̣̇д̇хаббамукасса бхигкусан̇гхасса бурад̇о бурад̇о г̇ажчад̇и имаа г̇аат̇ааяо г̇ааяамаано –
58. Atha kho bhagavā pubbaṇhasamayaṃ nivāsetvā pattacīvaramādāya rājagahaṃ pāvisi mahatā bhikkhusaṅghena saddhiṃ bhikkhusahassena sabbeheva purāṇajaṭilehi. Tena kho pana samayena sakko devānamindo māṇavakavaṇṇaṃ abhinimminitvā buddhappamukhassa bhikkhusaṅghassa purato purato gacchati imā gāthāyo gāyamāno –
‘‘д̣̇анд̇о д̣̇анд̇зхи саха бураан̣аж̇адилзхи, виббамуд̇д̇о виббамуд̇д̇зхи;
‘‘Danto dantehi saha purāṇajaṭilehi, vippamutto vippamuttehi;
син̇г̇ийнигкасаван̣н̣о, рааж̇аг̇ахам̣ баависи бхаг̇аваа.
Siṅgīnikkhasavaṇṇo, rājagahaṃ pāvisi bhagavā.
‘‘муд̇д̇о муд̇д̇зхи саха бураан̣аж̇адилзхи, виббамуд̇д̇о виббамуд̇д̇зхи;
‘‘Mutto muttehi saha purāṇajaṭilehi, vippamutto vippamuttehi;
син̇г̇ийнигкасаван̣н̣о, рааж̇аг̇ахам̣ баависи бхаг̇аваа.
Siṅgīnikkhasavaṇṇo, rājagahaṃ pāvisi bhagavā.
‘‘д̇ин̣н̣о д̇ин̣н̣зхи саха бураан̣аж̇адилзхи;
‘‘Tiṇṇo tiṇṇehi saha purāṇajaṭilehi;
виббамуд̇д̇о виббамуд̇д̇зхи;
Vippamutto vippamuttehi;
син̇г̇ийнигкасуван̣н̣о;
Siṅgīnikkhasuvaṇṇo;
рааж̇аг̇ахам̣ баависи бхаг̇аваа.
Rājagahaṃ pāvisi bhagavā.
‘‘санд̇о санд̇зхи саха бураан̣аж̇адилзхи;
‘‘Santo santehi saha purāṇajaṭilehi;
виббамуд̇д̇о виббамуд̇д̇зхи;
Vippamutto vippamuttehi;
син̇г̇ийнигкасаван̣н̣о;
Siṅgīnikkhasavaṇṇo;
рааж̇аг̇ахам̣ баависи бхаг̇аваа.
Rājagahaṃ pāvisi bhagavā.
‘‘д̣̇асаваасо д̣̇асаб̣ало, д̣̇асад̇хаммавид̣̇уу д̣̇асабхи жубзд̇о;
‘‘Dasavāso dasabalo, dasadhammavidū dasabhi cupeto;
со д̣̇асасад̇абаривааро 13 рааж̇аг̇ахам̣, баависи бхаг̇аваа’’д̇и.
So dasasataparivāro 14 rājagahaṃ, pāvisi bhagavā’’ti.
мануссаа саггам̣ д̣̇зваанаминд̣̇ам̣ бассид̇ваа звамаахам̣су – ‘‘абхируубо вад̇ааяам̣ маан̣аваго, д̣̇ассанийяо вад̇ааяам̣ маан̣аваго, баасаад̣̇иго вад̇ааяам̣ маан̣аваго. гасса ну ко аяам̣ маан̣аваго’’д̇и? звам̣ вуд̇д̇з сагго д̣̇зваанаминд̣̇о д̇з мануссз г̇аат̇ааяа аж̇жхабхааси –
Manussā sakkaṃ devānamindaṃ passitvā evamāhaṃsu – ‘‘abhirūpo vatāyaṃ māṇavako, dassanīyo vatāyaṃ māṇavako, pāsādiko vatāyaṃ māṇavako. Kassa nu kho ayaṃ māṇavako’’ti? Evaṃ vutte sakko devānamindo te manusse gāthāya ajjhabhāsi –
‘‘яо д̇хийро саб̣б̣ад̇хи д̣̇анд̇о, суд̣̇д̇хо аббадибуг̇г̇ало;
‘‘Yo dhīro sabbadhi danto, suddho appaṭipuggalo;
арахам̣ суг̇ад̇о логз, д̇ассаахам̣ барижаараго’’д̇и.
Arahaṃ sugato loke, tassāhaṃ paricārako’’ti.
59. ат̇а ко бхаг̇аваа язна ран̃н̃о мааг̇ад̇хасса сзнияасса б̣имб̣исаарасса нивзсанам̣ д̇знубасан̇гами, убасан̇гамид̇ваа бан̃н̃ад̇д̇з аасанз нисийд̣̇и сад̣̇д̇хим̣ бхигкусан̇гхзна. ат̇а ко рааж̇аа мааг̇ад̇хо сзнияо б̣имб̣исааро б̣уд̣̇д̇хаббамукам̣ бхигкусан̇гхам̣ бан̣ийд̇зна каад̣̇анийязна бхож̇анийязна сахад̇т̇аа санд̇аббзд̇ваа самбаваарзд̇ваа бхаг̇аванд̇ам̣ бхуд̇д̇аавим̣ онийд̇абад̇д̇абаан̣им̣ згаманд̇ам̣ нисийд̣̇и. згаманд̇ам̣ нисиннасса ко ран̃н̃о мааг̇ад̇хасса сзнияасса б̣имб̣исаарасса зд̇ад̣̇ахоси 15 – ‘‘гад̇т̇а ну ко бхаг̇аваа вихарзяяа? яам̣ асса г̇аамад̇о нзва авид̣̇уурз на ажжаасаннз, г̇аманааг̇аманасамбаннам̣, ад̇т̇игаанам̣ ад̇т̇игаанам̣ мануссаанам̣ абхиггаманийяам̣, д̣̇иваа аббаагин̣н̣ам̣ 16, рад̇д̇им̣ аббасад̣̇д̣̇ам̣ аббаниг̇гхосам̣ виж̇анаваад̇ам̣, мануссараахассзяяагам̣, бадисаллаанасаарубба’’нд̇и. ат̇а ко ран̃н̃о мааг̇ад̇хасса сзнияасса б̣имб̣исаарасса зд̇ад̣̇ахоси – ‘‘ид̣̇ам̣ ко амхаагам̣ взл̣уванам̣ уяяаанам̣ г̇аамад̇о нзва авид̣̇уурз на ажжаасаннз г̇аманааг̇аманасамбаннам̣ ад̇т̇игаанам̣ ад̇т̇игаанам̣ мануссаанам̣ абхиггаманийяам̣ д̣̇иваа аббаагин̣н̣ам̣ рад̇д̇им̣ аббасад̣̇д̣̇ам̣ аббаниг̇гхосам̣ виж̇анаваад̇ам̣ мануссараахассзяяагам̣ бадисаллаанасааруббам̣. яам̣нуунаахам̣ взл̣уванам̣ уяяаанам̣ б̣уд̣̇д̇хаббамукасса бхигкусан̇гхасса д̣̇ад̣̇зяяа’’нд̇и. ат̇а ко рааж̇аа мааг̇ад̇хо сзнияо б̣имб̣исааро сован̣н̣амаяам̣ бхин̇гаарам̣ г̇ахзд̇ваа бхаг̇авад̇о он̣ож̇зси – ‘‘зд̇аахам̣, бханд̇з, взл̣уванам̣ уяяаанам̣ б̣уд̣̇д̇хаббамукасса бхигкусан̇гхасса д̣̇аммий’’д̇и. бадиг̇г̇ахзси бхаг̇аваа аараамам̣. ат̇а ко бхаг̇аваа рааж̇аанам̣ мааг̇ад̇хам̣ сзнияам̣ б̣имб̣исаарам̣ д̇хаммияаа гат̇ааяа санд̣̇ассзд̇ваа самаад̣̇абзд̇ваа самуд̇д̇зж̇зд̇ваа самбахам̣сзд̇ваа удтааяаасанаа баггаами. ат̇а ко бхаг̇аваа зд̇асмим̣ нид̣̇аанз зд̇асмим̣ багаран̣з д̇хаммим̣ гат̇ам̣ гад̇ваа бхигкуу ааманд̇зси – ‘‘ануж̇аанаами, бхигкавз, аараама’’нд̇и.
59. Atha kho bhagavā yena rañño māgadhassa seniyassa bimbisārassa nivesanaṃ tenupasaṅkami, upasaṅkamitvā paññatte āsane nisīdi saddhiṃ bhikkhusaṅghena. Atha kho rājā māgadho seniyo bimbisāro buddhappamukhaṃ bhikkhusaṅghaṃ paṇītena khādanīyena bhojanīyena sahatthā santappetvā sampavāretvā bhagavantaṃ bhuttāviṃ onītapattapāṇiṃ ekamantaṃ nisīdi. Ekamantaṃ nisinnassa kho rañño māgadhassa seniyassa bimbisārassa etadahosi 17 – ‘‘kattha nu kho bhagavā vihareyya? Yaṃ assa gāmato neva avidūre na accāsanne, gamanāgamanasampannaṃ, atthikānaṃ atthikānaṃ manussānaṃ abhikkamanīyaṃ, divā appākiṇṇaṃ 18, rattiṃ appasaddaṃ appanigghosaṃ vijanavātaṃ, manussarāhasseyyakaṃ, paṭisallānasāruppa’’nti. Atha kho rañño māgadhassa seniyassa bimbisārassa etadahosi – ‘‘idaṃ kho amhākaṃ veḷuvanaṃ uyyānaṃ gāmato neva avidūre na accāsanne gamanāgamanasampannaṃ atthikānaṃ atthikānaṃ manussānaṃ abhikkamanīyaṃ divā appākiṇṇaṃ rattiṃ appasaddaṃ appanigghosaṃ vijanavātaṃ manussarāhasseyyakaṃ paṭisallānasāruppaṃ. Yaṃnūnāhaṃ veḷuvanaṃ uyyānaṃ buddhappamukhassa bhikkhusaṅghassa dadeyya’’nti. Atha kho rājā māgadho seniyo bimbisāro sovaṇṇamayaṃ bhiṅkāraṃ gahetvā bhagavato oṇojesi – ‘‘etāhaṃ, bhante, veḷuvanaṃ uyyānaṃ buddhappamukhassa bhikkhusaṅghassa dammī’’ti. Paṭiggahesi bhagavā ārāmaṃ. Atha kho bhagavā rājānaṃ māgadhaṃ seniyaṃ bimbisāraṃ dhammiyā kathāya sandassetvā samādapetvā samuttejetvā sampahaṃsetvā uṭṭhāyāsanā pakkāmi. Atha kho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi – ‘‘anujānāmi, bhikkhave, ārāma’’nti.
б̣имб̣исаарасамааг̇амагат̇аа нидтид̇аа.
Bimbisārasamāgamakathā niṭṭhitā.
Footnotes:
Related texts:
адтагат̇аа • Aṭṭhakathā / винаяабидага (адтагат̇аа) • Vinayapiṭaka (aṭṭhakathā) / махааваг̇г̇а-адтагат̇аа • Mahāvagga-aṭṭhakathā / б̣имб̣исаарасамааг̇амагат̇аа • Bimbisārasamāgamakathā
дийгаа • Tīkā / винаяабидага (дийгаа) • Vinayapiṭaka (ṭīkā) / саарад̇т̇ад̣̇ийбаний-дийгаа • Sāratthadīpanī-ṭīkā / б̣имб̣исаарасамааг̇амагат̇ааван̣н̣анаа • Bimbisārasamāgamakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / важ̇ираб̣уд̣̇д̇хи-дийгаа • Vajirabuddhi-ṭīkā / б̣имб̣исаарасамааг̇амагат̇ааван̣н̣анаа • Bimbisārasamāgamakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / вимад̇ивинод̣̇аний-дийгаа • Vimativinodanī-ṭīkā / б̣имб̣исаарасамааг̇амагат̇ааван̣н̣анаа • Bimbisārasamāgamakathāvaṇṇanā
дийгаа • Tīkā / винаяабидага (дийгаа) • Vinayapiṭaka (ṭīkā) / баажид̇яаад̣̇ияож̇анаабаал̣и • Pācityādiyojanāpāḷi / 13. б̣имб̣исаарасамааг̇амагат̇аа • 13. Bimbisārasamāgamakathā
