| Library / Tipiṭaka / तिपिटक • Tipiṭaka / अपदानपाळि • Apadānapāḷi |
१०. बोधिघरदायकत्थेरअपदानं
10. Bodhigharadāyakattheraapadānaṃ
६९.
69.
‘‘सिद्धत्थस्स भगवतो, द्विपदिन्दस्स तादिनो।
‘‘Siddhatthassa bhagavato, dvipadindassa tādino;
पसन्नचित्तो सुमनो, बोधिघरमकारयिं॥
Pasannacitto sumano, bodhigharamakārayiṃ.
७०.
70.
‘‘तुसितं उपपन्नोम्हि, वसामि रतने घरे।
‘‘Tusitaṃ upapannomhi, vasāmi ratane ghare;
न मे सीतं वा उण्हं वा, वातो गत्ते न सम्फुसे॥
Na me sītaṃ vā uṇhaṃ vā, vāto gatte na samphuse.
७१.
71.
‘‘पञ्चसट्ठिम्हितो कप्पे, चक्कवत्ती अहोसहं।
‘‘Pañcasaṭṭhimhito kappe, cakkavattī ahosahaṃ;
७२.
72.
‘‘दसयोजनआयामं, अट्ठयोजनवित्थतं।
‘‘Dasayojanaāyāmaṃ, aṭṭhayojanavitthataṃ;
न तम्हि नगरे अत्थि, कट्ठं वल्ली च मत्तिका॥
Na tamhi nagare atthi, kaṭṭhaṃ vallī ca mattikā.
७३.
73.
‘‘तिरियं योजनं आसि, अद्धयोजनवित्थतं।
‘‘Tiriyaṃ yojanaṃ āsi, addhayojanavitthataṃ;
मङ्गलो नाम पासादो, विस्सकम्मेन मापितो॥
Maṅgalo nāma pāsādo, vissakammena māpito.
७४.
74.
‘‘चुल्लासीतिसहस्सानि, थम्भा सोण्णमया अहुं।
‘‘Cullāsītisahassāni, thambhā soṇṇamayā ahuṃ;
मणिमया च निय्यूहा, छदनं रूपियं अहु॥
Maṇimayā ca niyyūhā, chadanaṃ rūpiyaṃ ahu.
७५.
75.
‘‘सब्बसोण्णमयं घरं, विस्सकम्मेन मापितं।
‘‘Sabbasoṇṇamayaṃ gharaṃ, vissakammena māpitaṃ;
अज्झावुत्थं मया एतं, घरदानस्सिदं फलं॥
Ajjhāvutthaṃ mayā etaṃ, gharadānassidaṃ phalaṃ.
७६.
76.
‘‘ते सब्बे अनुभोत्वान, देवमानुसके भवे।
‘‘Te sabbe anubhotvāna, devamānusake bhave;
अज्झपत्तोम्हि निब्बानं, सन्तिपदमनुत्तरं॥
Ajjhapattomhi nibbānaṃ, santipadamanuttaraṃ.
७७.
77.
‘‘तिंसकप्पसहस्सम्हि, बोधिघरमकारयिं।
‘‘Tiṃsakappasahassamhi, bodhigharamakārayiṃ;
दुग्गतिं नाभिजानामि, घरदानस्सिदं फलं॥
Duggatiṃ nābhijānāmi, gharadānassidaṃ phalaṃ.
७८.
78.
‘‘किलेसा झापिता मय्हं…पे॰… विहरामि अनासवो॥
‘‘Kilesā jhāpitā mayhaṃ…pe… viharāmi anāsavo.
७९.
79.
‘‘स्वागतं वत मे आसि…पे॰… कतं बुद्धस्स सासनं॥
‘‘Svāgataṃ vata me āsi…pe… kataṃ buddhassa sāsanaṃ.
८०.
80.
‘‘पटिसम्भिदा चतस्सो…पे॰… कतं बुद्धस्स सासनं’’॥
‘‘Paṭisambhidā catasso…pe… kataṃ buddhassa sāsanaṃ’’.
इत्थं सुदं आयस्मा बोधिघरदायको थेरो इमा गाथायो
Itthaṃ sudaṃ āyasmā bodhigharadāyako thero imā gāthāyo
अभासित्थाति।
Abhāsitthāti.
बोधिघरदायकत्थेरस्सापदानं दसमं।
Bodhigharadāyakattherassāpadānaṃ dasamaṃ.
विभीतकवग्गो पञ्चचत्तालीसमो।
Vibhītakavaggo pañcacattālīsamo.
तस्सुद्दानं –
Tassuddānaṃ –
विभीतकी कोलफली, बिल्लभल्लातकप्पदो।
Vibhītakī kolaphalī, billabhallātakappado;
उत्तलम्बटकी चेव, आसनी पादपीठको॥
Uttalambaṭakī ceva, āsanī pādapīṭhako.
वेदिको बोधिघरिको, गाथायो गणितापि च।
Vediko bodhighariko, gāthāyo gaṇitāpi ca;
एकूनासीतिका सब्बा, अस्मिं वग्गे पकित्तिता॥
Ekūnāsītikā sabbā, asmiṃ vagge pakittitā.
Footnotes:
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / अपदान-अट्ठकथा • Apadāna-aṭṭhakathā / १-६०. सकिंसम्मज्जकत्थेरअपदानादिवण्णना • 1-60. Sakiṃsammajjakattheraapadānādivaṇṇanā
