| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๑๐. โพธิฆรทายกเตฺถรอปทานํ
10. Bodhigharadāyakattheraapadānaṃ
๖๙.
69.
‘‘สิทฺธตฺถสฺส ภควโต, ทฺวิปทินฺทสฺส ตาทิโน;
‘‘Siddhatthassa bhagavato, dvipadindassa tādino;
ปสนฺนจิโตฺต สุมโน, โพธิฆรมการยิํฯ
Pasannacitto sumano, bodhigharamakārayiṃ.
๗๐.
70.
‘‘ตุสิตํ อุปปโนฺนมฺหิ, วสามิ รตเน ฆเร;
‘‘Tusitaṃ upapannomhi, vasāmi ratane ghare;
น เม สีตํ วา อุณฺหํ วา, วาโต คเตฺต น สมฺผุเสฯ
Na me sītaṃ vā uṇhaṃ vā, vāto gatte na samphuse.
๗๑.
71.
‘‘ปญฺจสฎฺฐิมฺหิโต กเปฺป, จกฺกวตฺตี อโหสหํ;
‘‘Pañcasaṭṭhimhito kappe, cakkavattī ahosahaṃ;
๗๒.
72.
‘‘ทสโยชนอายามํ, อฎฺฐโยชนวิตฺถตํ;
‘‘Dasayojanaāyāmaṃ, aṭṭhayojanavitthataṃ;
น ตมฺหิ นคเร อตฺถิ, กฎฺฐํ วลฺลี จ มตฺติกาฯ
Na tamhi nagare atthi, kaṭṭhaṃ vallī ca mattikā.
๗๓.
73.
‘‘ติริยํ โยชนํ อาสิ, อทฺธโยชนวิตฺถตํ;
‘‘Tiriyaṃ yojanaṃ āsi, addhayojanavitthataṃ;
มงฺคโล นาม ปาสาโท, วิสฺสกเมฺมน มาปิโตฯ
Maṅgalo nāma pāsādo, vissakammena māpito.
๗๔.
74.
‘‘จุลฺลาสีติสหสฺสานิ, ถมฺภา โสณฺณมยา อหุํ;
‘‘Cullāsītisahassāni, thambhā soṇṇamayā ahuṃ;
มณิมยา จ นิยฺยูหา, ฉทนํ รูปิยํ อหุฯ
Maṇimayā ca niyyūhā, chadanaṃ rūpiyaṃ ahu.
๗๕.
75.
‘‘สพฺพโสณฺณมยํ ฆรํ, วิสฺสกเมฺมน มาปิตํ;
‘‘Sabbasoṇṇamayaṃ gharaṃ, vissakammena māpitaṃ;
อชฺฌาวุตฺถํ มยา เอตํ, ฆรทานสฺสิทํ ผลํฯ
Ajjhāvutthaṃ mayā etaṃ, gharadānassidaṃ phalaṃ.
๗๖.
76.
‘‘เต สเพฺพ อนุโภตฺวาน, เทวมานุสเก ภเว;
‘‘Te sabbe anubhotvāna, devamānusake bhave;
อชฺฌปโตฺตมฺหิ นิพฺพานํ, สนฺติปทมนุตฺตรํฯ
Ajjhapattomhi nibbānaṃ, santipadamanuttaraṃ.
๗๗.
77.
‘‘ติํสกปฺปสหสฺสมฺหิ, โพธิฆรมการยิํ;
‘‘Tiṃsakappasahassamhi, bodhigharamakārayiṃ;
ทุคฺคติํ นาภิชานามิ, ฆรทานสฺสิทํ ผลํฯ
Duggatiṃ nābhijānāmi, gharadānassidaṃ phalaṃ.
๗๘.
78.
‘‘กิเลสา ฌาปิตา มยฺหํ…เป.… วิหรามิ อนาสโวฯ
‘‘Kilesā jhāpitā mayhaṃ…pe… viharāmi anāsavo.
๗๙.
79.
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
‘‘Svāgataṃ vata me āsi…pe… kataṃ buddhassa sāsanaṃ.
๘๐.
80.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา โพธิฆรทายโก เถโร อิมา คาถาโย
Itthaṃ sudaṃ āyasmā bodhigharadāyako thero imā gāthāyo
อภาสิตฺถาติฯ
Abhāsitthāti.
โพธิฆรทายกเตฺถรสฺสาปทานํ ทสมํฯ
Bodhigharadāyakattherassāpadānaṃ dasamaṃ.
วิภีตกวโคฺค ปญฺจจตฺตาลีสโมฯ
Vibhītakavaggo pañcacattālīsamo.
ตสฺสุทฺทานํ –
Tassuddānaṃ –
วิภีตกี โกลผลี, พิลฺลภลฺลาตกปฺปโท;
Vibhītakī kolaphalī, billabhallātakappado;
อุตฺตลมฺพฎกี เจว, อาสนี ปาทปีฐโกฯ
Uttalambaṭakī ceva, āsanī pādapīṭhako.
เวทิโก โพธิฆริโก, คาถาโย คณิตาปิ จ;
Vediko bodhighariko, gāthāyo gaṇitāpi ca;
เอกูนาสีติกา สพฺพา, อสฺมิํ วเคฺค ปกิตฺติตาฯ
Ekūnāsītikā sabbā, asmiṃ vagge pakittitā.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๑-๖๐. สกิํสมฺมชฺชกเตฺถรอปทานาทิวณฺณนา • 1-60. Sakiṃsammajjakattheraapadānādivaṇṇanā
