| Library / Tipiṭaka / ತಿಪಿಟಕ • Tipiṭaka / ವಿಮತಿವಿನೋದನೀ-ಟೀಕಾ • Vimativinodanī-ṭīkā |
॥ ನಮೋ ತಸ್ಸ ಭಗವತೋ ಅರಹತೋ ಸಮ್ಮಾಸಮ್ಬುದ್ಧಸ್ಸ॥
Namo tassa bhagavato arahato sammāsambuddhassa
ಮಹಾವಗ್ಗವಣ್ಣನಾ
Mahāvaggavaṇṇanā
೧. ಮಹಾಖನ್ಧಕೋ
1. Mahākhandhako
ಬೋಧಿಕಥಾವಣ್ಣನಾ
Bodhikathāvaṇṇanā
ಮಹಾವಗ್ಗೇ ಉಭಿನ್ನಂ ಪಾತಿಮೋಕ್ಖಾನನ್ತಿ ಉಭಿನ್ನಂ ಪಾತಿಮೋಕ್ಖವಿಭಙ್ಗಾನಂ। ಯಂ ಖನ್ಧಕಂ ಸಙ್ಗಾಯಿಂಸೂತಿ ಸಮ್ಬನ್ಧೋ। ಖನ್ಧಾನಂ ಸಮೂಹೋ, ಖನ್ಧಾನಂ ವಾ ಪಕಾಸನತೋ ಖನ್ಧಕೋ। ಖನ್ಧಾತಿ ಚೇತ್ಥ ಪಬ್ಬಜ್ಜಾದಿಚಾರಿತ್ತವಾರಿತ್ತಸಿಕ್ಖಾಪದಪಞ್ಞತ್ತಿಸಮೂಹೋ ಅಧಿಪ್ಪೇತೋ। ಪದಭಾಜನೀಯೇ ಯೇಸಂ ಪದಾನಂ ಅತ್ಥಾ ಯೇಹಿ ಅಟ್ಠಕಥಾನಯೇಹಿ ಪಕಾಸಿತಾತಿ ಯೋಜನಾ। ಅಥ ವಾ ಯೇ ಅತ್ಥಾತಿ ಯೋಜೇತಬ್ಬಂ। ಹಿ-ಸದ್ದೋ ಚೇತ್ಥ ಪದಪೂರಣೇ ದಟ್ಠಬ್ಬೋ।
Mahāvagge ubhinnaṃ pātimokkhānanti ubhinnaṃ pātimokkhavibhaṅgānaṃ. Yaṃ khandhakaṃ saṅgāyiṃsūti sambandho. Khandhānaṃ samūho, khandhānaṃ vā pakāsanato khandhako. Khandhāti cettha pabbajjādicārittavārittasikkhāpadapaññattisamūho adhippeto. Padabhājanīye yesaṃ padānaṃ atthā yehi aṭṭhakathānayehi pakāsitāti yojanā. Atha vā ye atthāti yojetabbaṃ. Hi-saddo cettha padapūraṇe daṭṭhabbo.
೧. ವಿಸೇಸಕಾರಣನ್ತಿ ‘‘ಯೇನ ಸಮಯೇನ ಆಯಸ್ಮತೋ ಸಾರಿಪುತ್ತತ್ಥೇರಸ್ಸ ಸಿಕ್ಖಾಪದಪಞ್ಞತ್ತಿಯಾಚನಹೇತುಭೂತೋ ಪರಿವಿತಕ್ಕೋ ಉದಪಾದಿ, ತೇನ ಸಮಯೇನಾ’’ತಿಆದಿನಾ ವುತ್ತಕಾರಣಂ ವಿಯ ವಿಸೇಸಕಾರಣಂ ಭುಮ್ಮವಚನನಿವತ್ತನಕಕಾರಣನ್ತಿ ಅತ್ಥೋ। ಏತಸ್ಸಾತಿ ಅಭಿಸಮ್ಬೋಧಿತೋ ಪಟ್ಠಾಯ ಸತ್ಥು ಚರಿಯಾವಿಭಾವನಸ್ಸ ವಿನಯಪಞ್ಞತ್ತಿಯಂ ಕಿಂ ಪಯೋಜನಂ? ಯದಿ ವಿಸೇಸಕಾರಣಂ ನತ್ಥೀತಿ ಅಧಿಪ್ಪಾಯೋ। ನಿದಾನದಸ್ಸನಂ ಪಯೋಜನನ್ತಿ ಯೋಜನಾ। ನಿದಾನನ್ತಿಚೇತ್ಥ ಸಿಕ್ಖಾಪದಪಞ್ಞತ್ತಿಹೇತುಭೂತಂ ವತ್ಥುಪುಗ್ಗಲಾದಿಕಾರಣಂ ಅಧಿಪ್ಪೇತಂ, ನ ಪಞ್ಞತ್ತಿಟ್ಠಾನಮೇವ। ತೇನಾಹ ‘‘ಯಾ ಹೀ’’ತಿಆದಿ।
1.Visesakāraṇanti ‘‘yena samayena āyasmato sāriputtattherassa sikkhāpadapaññattiyācanahetubhūto parivitakko udapādi, tena samayenā’’tiādinā vuttakāraṇaṃ viya visesakāraṇaṃ bhummavacananivattanakakāraṇanti attho. Etassāti abhisambodhito paṭṭhāya satthu cariyāvibhāvanassa vinayapaññattiyaṃ kiṃ payojanaṃ? Yadi visesakāraṇaṃ natthīti adhippāyo. Nidānadassanaṃ payojananti yojanā. Nidānanticettha sikkhāpadapaññattihetubhūtaṃ vatthupuggalādikāraṇaṃ adhippetaṃ, na paññattiṭṭhānameva. Tenāha ‘‘yā hī’’tiādi.
ಉರುವೇಲಾಯನ್ತಿ ಏತ್ಥ ಉರು-ಸದ್ದೋ ಮಹನ್ತವಾಚೀ। ವೇಲಾ-ಸದ್ದೋ ತೀರಪರಿಯಾಯೋ। ಉನ್ನತತ್ತಾದಿನಾ ವೇಲಾ ವಿಯ ವೇಲಾ। ಉರು ಮಹನ್ತೀ ವೇಲಾ ಉರುವೇಲಾ, ತಸ್ಸಂ। ತೇನಾಹ ‘‘ಮಹಾವೇಲಾಯ’’ನ್ತಿಆದಿ। ಮರಿಯಾದಾತಿ ಸೀಲಾದಿಗುಣಸೀಮಾ। ಪತ್ತಪುಟೇನಾತಿ ತಾಲಾದೀನಂ ಪಣ್ಣಪುಟೇನ।
Uruvelāyanti ettha uru-saddo mahantavācī. Velā-saddo tīrapariyāyo. Unnatattādinā velā viya velā. Uru mahantī velā uruvelā, tassaṃ. Tenāha ‘‘mahāvelāya’’ntiādi. Mariyādāti sīlādiguṇasīmā. Pattapuṭenāti tālādīnaṃ paṇṇapuṭena.
‘‘ಪಠಮಾಭಿಸಮ್ಬುದ್ಧೋ’’ತಿ ಅನುನಾಸಿಕಲೋಪೇನಾಯಂ ನಿದ್ದೇಸೋತಿ ಆಹ ‘‘ಪಠಮಂ ಅಭಿಸಮ್ಬುದ್ಧೋ’’ತಿ। ಪಠಮನ್ತಿ ಚ ಭಾವನಪುಂಸಕನಿದ್ದೇಸೋ। ತಸ್ಮಾ ಅಭಿಸಮ್ಬುದ್ಧೋ ಹುತ್ವಾ ಸಬ್ಬಪಠಮಂ ಬೋಧಿರುಕ್ಖಮೂಲೇ ವಿಹರತೀತಿ ಯೋಜನಾ ದಟ್ಠಬ್ಬಾ।
‘‘Paṭhamābhisambuddho’’ti anunāsikalopenāyaṃ niddesoti āha ‘‘paṭhamaṃ abhisambuddho’’ti. Paṭhamanti ca bhāvanapuṃsakaniddeso. Tasmā abhisambuddho hutvā sabbapaṭhamaṃ bodhirukkhamūle viharatīti yojanā daṭṭhabbā.
ಪಾಳಿಯಂ ಅಥ ಖೋತಿ ಏತ್ಥ ಅಥಾತಿ ಏತಸ್ಮಿಂ ಸಮಯೇತಿ ಅತ್ಥೋ ಅನೇಕತ್ಥತ್ತಾ ನಿಪಾತಾನಂ। ಸತ್ತಾಹನ್ತಿ ಅಚ್ಚನ್ತಸಂಯೋಗೇ ಏತಂ ಉಪಯೋಗವಚನಂ। ಅಥ ಖೋತಿ ಅಧಿಕಾರನ್ತರದಸ್ಸನೇ ನಿಪಾತೋ। ತೇನ ವಿಮುತ್ತಿಸುಖಪಟಿಸಂವೇದನಂ ಪಹಾಯ ಪಟಿಚ್ಚಸಮುಪ್ಪಾದಮನಸಿಕಾರೇ ಅಧಿಕತಭಾವಂ ದಸ್ಸೇತಿ। ಪಟಿಚ್ಚಾತಿ ಪಟಿಮುಖಂ ಗನ್ತ್ವಾ, ಅಞ್ಞಮಞ್ಞಂ ಅಪೇಕ್ಖಿತ್ವಾತಿ ಅತ್ಥೋ। ಏತೇನ ಕಾರಣಬಹುತಾ ದಸ್ಸಿತಾ। ಸಹಿತೇತಿ ಕಾರಿಯಬಹುತಾ। ಅನುಲೋಮನ್ತಿ ಭಾವನಪುಂಸಕನಿದ್ದೇಸೋ। ಸ್ವೇವಾತಿ ಸೋ ಏವ ಪಚ್ಚಯಾಕಾರೋ। ಪುರಿಮನಯೇನ ವಾ ವುತ್ತೋತಿ ‘‘ಅವಿಜ್ಜಾಪಚ್ಚಯಾ ಸಙ್ಖಾರಾ’’ತಿಆದಿನಾ ನಯೇನ ವುತ್ತೋ ಪಚ್ಚಯಾಕಾರೋ। ಪವತ್ತಿಯಾತಿ ಸಂಸಾರಪ್ಪವತ್ತಿಯಾ।
Pāḷiyaṃ atha khoti ettha athāti etasmiṃ samayeti attho anekatthattā nipātānaṃ. Sattāhanti accantasaṃyoge etaṃ upayogavacanaṃ. Atha khoti adhikārantaradassane nipāto. Tena vimuttisukhapaṭisaṃvedanaṃ pahāya paṭiccasamuppādamanasikāre adhikatabhāvaṃ dasseti. Paṭiccāti paṭimukhaṃ gantvā, aññamaññaṃ apekkhitvāti attho. Etena kāraṇabahutā dassitā. Sahiteti kāriyabahutā. Anulomanti bhāvanapuṃsakaniddeso. Svevāti so eva paccayākāro. Purimanayena vā vuttoti ‘‘avijjāpaccayā saṅkhārā’’tiādinā nayena vutto paccayākāro. Pavattiyāti saṃsārappavattiyā.
ಪಾಳಿಯಂ ‘‘ಅವಿಜ್ಜಾಪಚ್ಚಯಾ’’ತಿಆದೀಸು ದುಕ್ಖಾದೀಸು ಅಞ್ಞಾಣಂ ಅವಿಜ್ಜಾ। ಲೋಕಿಯಕುಸಲಾಕುಸಲಚೇತನಾ ಸಙ್ಖಾರಾ। ಲೋಕಿಯವಿಪಾಕಮೇವ ವಿಞ್ಞಾಣಂ। ಲೋಕಿಯವೇದನಾದಿಕ್ಖನ್ಧತ್ತಯಂ ನಾಮಂ, ಭೂತುಪಾದಾಯಭೇದಂ ರೂಪಂ। ಪಸಾದವಿಞ್ಞಾಣಭೇದಂ ಸಳಾಯತನಂ। ವಿಪಾಕಭೂತೋ ಸಬ್ಬೋ ಫಸ್ಸೋ, ವೇದನಾ ಚ। ರಾಗೋ ತಣ್ಹಾ। ಬಲವರಾಗೋ, ತಿವಿಧಾ ಚ ದಿಟ್ಠಿ ಉಪಾದಾನಂ। ಭವೋ ಪನ ದುವಿಧೋ ಕಮ್ಮಭವೋ, ಉಪಪತ್ತಿಭವೋ ಚ। ತತ್ಥ ಕಮ್ಮಭವೋ ಸಾಸವಕುಸಲಾಕುಸಲಚೇತನಾವ, ಉಪಪತ್ತಿಭವೋ ಉಪಾದಿನ್ನಕಕ್ಖನ್ಧಾ। ತೇಸಂ ಉಪಪತ್ತಿ ಜಾತಿ। ಪಾಕೋ ಜರಾ। ಭೇದೋ ಮರಣಂ। ತೇ ಏವ ನಿಸ್ಸಾಯ ಸೋಚನಂ ಸೋಕೋ। ಕನ್ದನಂ ಪರಿದೇವೋ। ದುಕ್ಖಂ ಕಾಯಿಕಂ। ದೋಮನಸ್ಸಂ ಚೇತಸಿಕಂ। ಅತಿವಿಯ ಸೋಕೋ ಉಪಾಯಾಸೋ।
Pāḷiyaṃ ‘‘avijjāpaccayā’’tiādīsu dukkhādīsu aññāṇaṃ avijjā. Lokiyakusalākusalacetanā saṅkhārā. Lokiyavipākameva viññāṇaṃ. Lokiyavedanādikkhandhattayaṃ nāmaṃ, bhūtupādāyabhedaṃ rūpaṃ. Pasādaviññāṇabhedaṃ saḷāyatanaṃ. Vipākabhūto sabbo phasso, vedanā ca. Rāgo taṇhā. Balavarāgo, tividhā ca diṭṭhi upādānaṃ. Bhavo pana duvidho kammabhavo, upapattibhavo ca. Tattha kammabhavo sāsavakusalākusalacetanāva, upapattibhavo upādinnakakkhandhā. Tesaṃ upapatti jāti. Pāko jarā. Bhedo maraṇaṃ. Te eva nissāya socanaṃ soko. Kandanaṃ paridevo. Dukkhaṃ kāyikaṃ. Domanassaṃ cetasikaṃ. Ativiya soko upāyāso.
ಪಚ್ಚೇಕಞ್ಚ ಸಮ್ಭವತಿ-ಸದ್ದೋ ಯೋಜೇತಬ್ಬೋ। ತೇನಾಹ ‘‘ಇಮಿನಾ ನಯೇನಾ’’ತಿಆದಿ। ‘‘ದುಕ್ಖರಾಸಿಸ್ಸಾ’’ತಿ ಇಮಿನಾ ನ ಸತ್ತಸ್ಸ। ನಾಪಿ ಸುಭಸುಖಾದೀನನ್ತಿ ದಸ್ಸೇತಿ।
Paccekañca sambhavati-saddo yojetabbo. Tenāha ‘‘iminā nayenā’’tiādi. ‘‘Dukkharāsissā’’ti iminā na sattassa. Nāpi subhasukhādīnanti dasseti.
ಹವೇತಿ ಬ್ಯತ್ತನ್ತಿ ಇಮಸ್ಮಿಂ ಅತ್ಥೇ ನಿಪಾತೋ। ‘‘ಅನುಲೋಮಪಚ್ಚಯಾಕಾರಪಟಿವೇಧಸಾಧಕಾ ಬೋಧಿಪಕ್ಖಿಯಧಮ್ಮಾ’’ತಿ ಇದಂ ಪಠಮವಾರೇ ಕಿಞ್ಚಾಪಿ ‘‘ಅವಿಜ್ಜಾಯತ್ವೇವ ಅಸೇಸವಿರಾಗನಿರೋಧಾ’’ತಿಆದಿನಾ ಪಟಿಲೋಮಪಚ್ಚಯಾಕಾರೋಪಿ ಆಗತೋ, ತಥಾಪಿ ‘‘ಯತೋ ಪಜಾನಾತಿ ಸಹೇತುಧಮ್ಮ’’ನ್ತಿ ಅನುಲೋಮಪಚ್ಚಯಾಕಾರಪಟಿವೇಧಸ್ಸೇವ ಕಾರಣತ್ತೇನ ವುತ್ತನ್ತಿ। ಯಥಾ ಚೇತ್ಥ, ಏವಂ ದುತಿಯವಾರೇಪಿ ‘‘ಯತೋ ಖಯಂ ಪಚ್ಚಯಾನಂ ಅವೇದೀ’’ತಿ ಗಾಥಾಯ ವುತ್ತತ್ತಾ ‘‘ಪಚ್ಚಯಾನಂ ಖಯಸಙ್ಖಾತ’’ನ್ತಿಆದಿ ವುತ್ತನ್ತಿ ವೇದಿತಬ್ಬಂ। ನೋ ಕಲ್ಲೋ ಪಞ್ಹೋತಿ ಅಯುತ್ತೋ ನ ಬ್ಯಾಕಾತಬ್ಬೋ, ಅವಿಜ್ಜಮಾನಂ ಅತ್ತಾನಂ ಸಿದ್ಧಂ ಕತ್ವಾ ‘‘ಕೋ ಫುಸತೀ’’ತಿ ತಸ್ಸ ಕಿರಿಯಾಯ ಪುಟ್ಠತ್ತಾ ‘‘ಕೋ ವಞ್ಝಾಪುತ್ತೋ ಫುಸತೀ’’ತಿಆದಿ ವಿಯಾತಿ ಅಧಿಪ್ಪಾಯೋ। ಸೋಳಸ ಕಙ್ಖಾತಿ ‘‘ಅಹೋಸಿಂ ನು ಖೋ ಅಹಮತೀತಮದ್ಧಾನಂ, ನನು ಖೋ ಅಹೋಸಿಂ, ಕಿಂ ನು ಖೋ ಅಹೋಸಿಂ, ಕಥಂ ನು ಖೋ ಅಹೋಸಿಂ, ಕಿಂ ಹುತ್ವಾ ಕಿಂ ಅಹೋಸಿಂ ನು ಖೋ ಅಹಮತೀತಮದ್ಧಾನಂ, ಭವಿಸ್ಸಾಮಿ ನು ಖೋ ಅಹಂ ಅನಾಗತಮದ್ಧಾನಂ, ನನು ಖೋ ಭವಿಸ್ಸಾಮಿ, ಕಿಂ ನು ಖೋ ಭವಿಸ್ಸಾಮಿ, ಕಥಂ ನು ಖೋ ಭವಿಸ್ಸಾಮಿ, ಕಿಂ ಹುತ್ವಾ ಕಿಂ ಭವಿಸ್ಸಾಮಿ ನು ಖೋ ಅಹಂ ಅನಾಗತಮದ್ಧಾನಂ, ಅಹಂ ನು ಖೋಸ್ಮಿ, ನೋ ನು ಖೋಸ್ಮಿ, ಕಿಂ ನು ಖೋಸ್ಮಿ, ಕಥಂ ನು ಖೋಸ್ಮಿ, ಅಯಂ ನು ಖೋ ಸತ್ತೋ ಕುತೋ ಆಗತೋ, ಸೋ ಕುಹಿಂ ಗಾಮೀ ಭವಿಸ್ಸತೀ’’ತಿ (ಮ॰ ನಿ॰ ೧.೧೮; ಸಂ॰ ನಿ॰ ೨.೨೦) ಏವಂ ಆಗತಾ ಅತೀತೇ ಪಞ್ಚ, ಅನಾಗತೇ ಪಞ್ಚ, ಪಚ್ಚುಪ್ಪನ್ನೇ ಛಾತಿ ಸೋಳಸವಿಧಾ ಕಙ್ಖಾ।
Haveti byattanti imasmiṃ atthe nipāto. ‘‘Anulomapaccayākārapaṭivedhasādhakā bodhipakkhiyadhammā’’ti idaṃ paṭhamavāre kiñcāpi ‘‘avijjāyatveva asesavirāganirodhā’’tiādinā paṭilomapaccayākāropi āgato, tathāpi ‘‘yato pajānāti sahetudhamma’’nti anulomapaccayākārapaṭivedhasseva kāraṇattena vuttanti. Yathā cettha, evaṃ dutiyavārepi ‘‘yato khayaṃ paccayānaṃ avedī’’ti gāthāya vuttattā ‘‘paccayānaṃ khayasaṅkhāta’’ntiādi vuttanti veditabbaṃ. No kallo pañhoti ayutto na byākātabbo, avijjamānaṃ attānaṃ siddhaṃ katvā ‘‘ko phusatī’’ti tassa kiriyāya puṭṭhattā ‘‘ko vañjhāputto phusatī’’tiādi viyāti adhippāyo. Soḷasa kaṅkhāti ‘‘ahosiṃ nu kho ahamatītamaddhānaṃ, nanu kho ahosiṃ, kiṃ nu kho ahosiṃ, kathaṃ nu kho ahosiṃ, kiṃ hutvā kiṃ ahosiṃ nu kho ahamatītamaddhānaṃ, bhavissāmi nu kho ahaṃ anāgatamaddhānaṃ, nanu kho bhavissāmi, kiṃ nu kho bhavissāmi, kathaṃ nu kho bhavissāmi, kiṃ hutvā kiṃ bhavissāmi nu kho ahaṃ anāgatamaddhānaṃ, ahaṃ nu khosmi, no nu khosmi, kiṃ nu khosmi, kathaṃ nu khosmi, ayaṃ nu kho satto kuto āgato, so kuhiṃ gāmī bhavissatī’’ti (ma. ni. 1.18; saṃ. ni. 2.20) evaṃ āgatā atīte pañca, anāgate pañca, paccuppanne chāti soḷasavidhā kaṅkhā.
ತತ್ಥ ಕಿಂ ನು ಖೋತಿ ಮನುಸ್ಸದೇವಾದೀಸು, ಖತ್ತಿಯಾದೀಸು ವಾ ಅಞ್ಞತರಂ ನಿಸ್ಸಾಯ ಕಙ್ಖತಿ। ಕಥಂ ನು ಖೋತಿ ಪನ ಸಣ್ಠಾನಾಕಾರಾದೀಸು ಇಸ್ಸರಾದಿಜನಕಂ, ಕಾರಣಂ ವಾ ನಿಸ್ಸಾಯ। ಕಿಂ ಹುತ್ವಾ ಕಿಂ ಅಹೋಸಿನ್ತಿ ಚ ಮನುಸ್ಸಾದೀಸು ಪಠಮಂ ಕಿಂ ಹುತ್ವಾ ಪಚ್ಛಾ ಕಿಂ ಅಹೋಸಿನ್ತಿ ಕಙ್ಖತಿ। ಅಹಂ ನು ಖೋಸ್ಮೀತಿಆದಿ ಇದಾನಿ ಅತ್ತನೋ ವಿಜ್ಜಮಾನಾವಿಜ್ಜಮಾನತಂ, ಸರೂಪಪಕಾರಾದಿಕಞ್ಚ ಕಙ್ಖತಿ। ವಪಯನ್ತೀತಿ ವಿಅಪಯನ್ತಿ ಬ್ಯಪಗಚ್ಛನ್ತಿ। ತೇನಾಹ ‘‘ಅಪಗಚ್ಛನ್ತಿ ನಿರುಜ್ಝನ್ತೀ’’ತಿ।
Tattha kiṃ nu khoti manussadevādīsu, khattiyādīsu vā aññataraṃ nissāya kaṅkhati. Kathaṃ nu khoti pana saṇṭhānākārādīsu issarādijanakaṃ, kāraṇaṃ vā nissāya. Kiṃ hutvā kiṃ ahosinti ca manussādīsu paṭhamaṃ kiṃ hutvā pacchā kiṃ ahosinti kaṅkhati. Ahaṃ nu khosmītiādi idāni attano vijjamānāvijjamānataṃ, sarūpapakārādikañca kaṅkhati. Vapayantīti viapayanti byapagacchanti. Tenāha ‘‘apagacchanti nirujjhantī’’ti.
೩. ತಸ್ಸ ವಸೇನಾತಿ ತಸ್ಸ ಪಚ್ಚಯಾಕಾರಪಜಾನನಸ್ಸ, ಪಚ್ಚಯಕ್ಖಯಾಧಿಗಮಸ್ಸ ಚ ವಸೇನ। ಏಕೇಕಮೇವ ಕೋಟ್ಠಾಸನ್ತಿ ಅನುಲೋಮಪಟಿಲೋಮತೋ ಏಕೇಕಮೇವ ಕೋಟ್ಠಾಸಂ। ಪಾಟಿಪದರತ್ತಿಯಾ ಏವಂ ಮನಸಾಕಾಸೀತಿ ರತ್ತಿಯಾ ತೀಸುಪಿ ಯಾಮೇಸು ಏವಂ ಇಧ ಖನ್ಧಕಪಾಳಿಯಾ ಆಗತನಯೇನ ಅನುಲೋಮಪಟಿಲೋಮಂಯೇವ ಮನಸಾಕಾಸಿ।
3.Tassa vasenāti tassa paccayākārapajānanassa, paccayakkhayādhigamassa ca vasena. Ekekameva koṭṭhāsanti anulomapaṭilomato ekekameva koṭṭhāsaṃ. Pāṭipadarattiyā evaṃ manasākāsīti rattiyā tīsupi yāmesu evaṃ idha khandhakapāḷiyā āgatanayena anulomapaṭilomaṃyeva manasākāsi.
Related texts:
ತಿಪಿಟಕ (ಮೂಲ) • Tipiṭaka (Mūla) / ವಿನಯಪಿಟಕ • Vinayapiṭaka / ಮಹಾವಗ್ಗಪಾಳಿ • Mahāvaggapāḷi / ೧. ಬೋಧಿಕಥಾ • 1. Bodhikathā
ಅಟ್ಠಕಥಾ • Aṭṭhakathā / ವಿನಯಪಿಟಕ (ಅಟ್ಠಕಥಾ) • Vinayapiṭaka (aṭṭhakathā) / ಮಹಾವಗ್ಗ-ಅಟ್ಠಕಥಾ • Mahāvagga-aṭṭhakathā / ಬೋಧಿಕಥಾ • Bodhikathā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಸಾರತ್ಥದೀಪನೀ-ಟೀಕಾ • Sāratthadīpanī-ṭīkā / ಬೋಧಿಕಥಾವಣ್ಣನಾ • Bodhikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ವಜಿರಬುದ್ಧಿ-ಟೀಕಾ • Vajirabuddhi-ṭīkā / ಬೋಧಿಕಥಾವಣ್ಣನಾ • Bodhikathāvaṇṇanā
ಟೀಕಾ • Tīkā / ವಿನಯಪಿಟಕ (ಟೀಕಾ) • Vinayapiṭaka (ṭīkā) / ಪಾಚಿತ್ಯಾದಿಯೋಜನಾಪಾಳಿ • Pācityādiyojanāpāḷi / ೧. ಬೋಧಿಕಥಾ • 1. Bodhikathā
