| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
5. போ³தி⁴ராஜகுமாரஸுத்தவண்ணனா
5. Bodhirājakumārasuttavaṇṇanā
324. ஓலோகனகபது³மந்தி லீலாஅரவிந்த³ங். தஸ்மாதி கோகனத³ஸண்டா²னத்தா கோகனதோ³தி ஸங்க²ங் லபி⁴.
324.Olokanakapadumanti līlāaravindaṃ. Tasmāti kokanadasaṇṭhānattā kokanadoti saṅkhaṃ labhi.
325. யாவ பச்சி²ம…பே॰… ப²லகங் வுத்தங் தஸ்ஸ ஸப்³ப³பச்சா² ஸந்த²தத்தா. உபரிமப²லக³தஞ்ஹி ஸோபானமத்த²கங். ஓலோகனத்த²ங்யேவாதி ந கேவலங் ப⁴க³வதோ ஆக³மனஞ்ஞேவ ஓலோகனத்த²ங், அத² கோ² அத்தனோ பத்த²னாய ஸந்த²ராபிதாய சேலபடிகாய அக்கமனஸ்ஸபி.
325.Yāva pacchima…pe… phalakaṃ vuttaṃ tassa sabbapacchā santhatattā. Uparimaphalagatañhi sopānamatthakaṃ. Olokanatthaṃyevāti na kevalaṃ bhagavato āgamanaññeva olokanatthaṃ, atha kho attano patthanāya santharāpitāya celapaṭikāya akkamanassapi.
ஸகுணபோதகேதி காத³ம்ப³டிட்டிப⁴புத்தகே. அஞ்ஞோவ ப⁴வெய்யாதி தஸ்மிங் அத்தபா⁴வே மாதுகா³மதோ அஞ்ஞோ இதா³னி ப⁴ரியாபூ⁴தோ மாதுகா³மோ ப⁴வெய்ய. புத்தங் லபெ⁴ய்யாதி அத்தனோ கம்மவஸேன புத்தங், நோ தஸ்ஸ. உபோ⁴ஹீதி இமேஹி ஏவ உபோ⁴ஹி. இமேஹி காரணேஹீதி தஸ்ஸ ராஜகுமாரஸ்ஸ பு³த்³த⁴ங் படிச்ச மிச்சா²க³ஹணங், தித்தி²யானங் உஜ்ஜா²யனங், அனாக³தே மனுஸ்ஸானங் பி⁴க்கூ²னங் உத்³தி³ஸ்ஸ விப்படிஸாரோதி இமேஹி தீஹி காரணேஹி. பஞ்ஞத்தந்தி ஸந்த²தங் சேலபடிகங். மங்க³லங் இச்ச²ந்தீதி மங்க³லிகா.
Sakuṇapotaketi kādambaṭiṭṭibhaputtake. Aññova bhaveyyāti tasmiṃ attabhāve mātugāmato añño idāni bhariyābhūto mātugāmo bhaveyya. Puttaṃ labheyyāti attano kammavasena puttaṃ, no tassa. Ubhohīti imehi eva ubhohi. Imehi kāraṇehīti tassa rājakumārassa buddhaṃ paṭicca micchāgahaṇaṃ, titthiyānaṃ ujjhāyanaṃ, anāgate manussānaṃ bhikkhūnaṃ uddissa vippaṭisāroti imehi tīhi kāraṇehi. Paññattanti santhataṃ celapaṭikaṃ. Maṅgalaṃ icchantīti maṅgalikā.
326. ததியங் காரணந்தி இமினா பி⁴க்கூ²ஸு விப்படிஸாரானுப்பாத³னமாஹ. யங் கிஞ்சி பரிபு⁴ஞ்ஜன-ஸுக²ங் காமஸுக²ல்லிகானுயோகோ³தி அதி⁴ப்பாயேன காமஸுக²ல்லிகானுயோக³ஸஞ்ஞீ ஹுத்வா…பே॰… மஞ்ஞமானோ ஏவமாஹ.
326.Tatiyaṃkāraṇanti iminā bhikkhūsu vippaṭisārānuppādanamāha. Yaṃ kiñci paribhuñjana-sukhaṃ kāmasukhallikānuyogoti adhippāyena kāmasukhallikānuyogasaññī hutvā…pe… maññamāno evamāha.
327. அத² நங் ப⁴க³வா ததோ மிச்சா²பி⁴னிவேஸதோ விவேசேதுகாமோ ‘‘ஸோ கோ² அஹ’’ந்திஆதி³னா அத்தனோ து³க்கரசரியங் த³ஸ்ஸேதுங் ஆரபி⁴. மஹாஸச்சகே(ம॰ நி॰ 1.364 ஆத³யோ) வுத்தனயேனேவ வேதி³தப்³ப³ங் ‘‘ஸோ கோ² அஹ’’ந்திஆதி³பாட²ஸ்ஸ தத்த² ஆக³தனியாமேனேவ ஆக³தத்தா. பாஸராஸிஸுத்தே (ம॰ நி॰ 1.272 ஆத³யோ) வுத்தனயேனாதி எத்தா²பி ஏஸேவ நயோ.
327. Atha naṃ bhagavā tato micchābhinivesato vivecetukāmo ‘‘so kho aha’’ntiādinā attano dukkaracariyaṃ dassetuṃ ārabhi. Mahāsaccake(ma. ni. 1.364 ādayo) vuttanayeneva veditabbaṃ ‘‘so kho aha’’ntiādipāṭhassa tattha āgataniyāmeneva āgatattā. Pāsarāsisutte (ma. ni. 1.272 ādayo) vuttanayenāti etthāpi eseva nayo.
343. அங்குஸங் க³ண்ஹந்தி ஏதேன தஸ்ஸ க³ஹணே சே²கோ ஹோதீதி அங்குஸக³ஹணஸிப்பங். மேக⁴உதுந்தி மேக⁴ங் படிச்ச உப்பன்னஸீதஉதுங். பப்³ப³தஉதுந்தி பப்³ப³தங் படிச்ச உண்ஹஉதுங். உப⁴யவஸேன ச தஸ்ஸ ததா² ஸீதுண்ஹஉதுதோ ஏனோ ஆக³தோதி த-காரஸ்ஸ த³-காரங் கத்வா உதே³னோதி நாமங் அகாஸி.
343. Aṅkusaṃ gaṇhanti etena tassa gahaṇe cheko hotīti aṅkusagahaṇasippaṃ. Meghautunti meghaṃ paṭicca uppannasītautuṃ. Pabbatautunti pabbataṃ paṭicca uṇhautuṃ. Ubhayavasena ca tassa tathā sītuṇhaututo eno āgatoti ta-kārassa da-kāraṃ katvā udenoti nāmaṃ akāsi.
தாபஸோ ஓகா³ள்ஹஞாணவஸேன ரஞ்ஞோ மதபா⁴வங் ஞத்வா. ஆதி³தோ பட்டா²யாதி கோஸம்பி³னக³ரே பரந்தபரஞ்ஞோ அக்³க³மஹேஸிபா⁴வதோ பட்டா²ய. புப்³பே³தி ஸீலவந்தகாலே. ஹத்தி²க³ந்த²ந்தி ஹத்தீ²னங் அத்தனோ வஸே வத்தாபனஸத்த²ங். தேனேவஸ்ஸ தங் ஸிக்கா²பேதி, கிச்சஞ்ச இஜ்ஜ²தி.
Tāpaso ogāḷhañāṇavasena rañño matabhāvaṃ ñatvā. Ādito paṭṭhāyāti kosambinagare parantaparañño aggamahesibhāvato paṭṭhāya. Pubbeti sīlavantakāle. Hatthiganthanti hatthīnaṃ attano vase vattāpanasatthaṃ. Tenevassa taṃ sikkhāpeti, kiccañca ijjhati.
344. பத³ஹனபா⁴வோதி பா⁴வனானுயோகோ³. பதா⁴னே வா நியுத்தோ பதா⁴னியோ, பதா⁴னியஸ்ஸ பி⁴க்கு²னோ, தஸ்ஸேவ பதா⁴னியபா⁴வஸ்ஸ அங்கா³னி காரணானி பதா⁴னியங்கா³னி. ஸத்³தா⁴ ஏதஸ்ஸ அத்தீ²தி ஸத்³தோ⁴. கிஞ்சாபி பச்சேகபோ³தி⁴ஸத்தானம்பி அபி⁴னீஹாரதோ பட்டா²ய ஆக³தா ஆக³மனஸத்³தா⁴ ஏவ, மஹாபோ³தி⁴ஸத்தானங் பன ஸத்³தா⁴ க³ருதராதி ஸா ஏவ க³ஹிதா. அசலபா⁴வேன ஓகப்பனங் ‘‘ஸம்மாஸம்பு³த்³தோ⁴ ப⁴க³வா, ஸ்வாக்²யாதோ த⁴ம்மோ, ஸுப்படிபன்னோ ஸங்கோ⁴’’தி கேனசி அகம்பியபா⁴வேன ரதனத்தயகு³ணே ஓகா³ஹித்வா கப்பனங். பஸாது³ப்பத்தி ரதனத்தயே பஸீத³னமேவ. போ³தி⁴ந்தி சதுமக்³க³ஞாணந்தி வுத்தங் தங்னிமித்தத்தா ஸப்³ப³ஞ்ஞுதஞ்ஞாணஸ்ஸ, போ³தீ⁴தி வா ஸம்மாஸம்போ³தி⁴. ஸப்³ப³ஞ்ஞுதஞ்ஞாணபத³ட்டா²னஞ்ஹி மக்³க³ஞாணங், மக்³க³ஞாணபத³ட்டா²னஞ்ச ஸப்³ப³ஞ்ஞுதஞ்ஞாணங் ‘‘ஸம்மாஸம்போ³தீ⁴’’தி வுச்சதி. நிச்சி²தஸுபு³த்³த⁴தாய த⁴ம்மஸ்ஸ ஸுத⁴ம்மதா ஸங்க⁴ஸ்ஸ ஸுப்படிபத்தி வினிச்சி²தா ஏவ ஹோதீதி ஆஹ ‘‘தே³ஸனாஸீஸமேவ சேத’’ந்திஆதி³. தஸ்ஸ பதா⁴னங் வீரியங் இஜ்ஜ²தி ரதனத்தயஸத்³தா⁴ய ‘‘இமாய படிபதா³ய ஜராமரணதோ முச்சிஸ்ஸாமீ’’தி பதா⁴னானுயோகே³ அவங்முக²ஸம்ப⁴வதோ.
344.Padahanabhāvoti bhāvanānuyogo. Padhāne vā niyutto padhāniyo, padhāniyassa bhikkhuno, tasseva padhāniyabhāvassa aṅgāni kāraṇāni padhāniyaṅgāni. Saddhā etassa atthīti saddho. Kiñcāpi paccekabodhisattānampi abhinīhārato paṭṭhāya āgatā āgamanasaddhā eva, mahābodhisattānaṃ pana saddhā garutarāti sā eva gahitā. Acalabhāvena okappanaṃ ‘‘sammāsambuddho bhagavā, svākhyāto dhammo, suppaṭipanno saṅgho’’ti kenaci akampiyabhāvena ratanattayaguṇe ogāhitvā kappanaṃ. Pasāduppatti ratanattaye pasīdanameva. Bodhinti catumaggañāṇanti vuttaṃ taṃnimittattā sabbaññutaññāṇassa, bodhīti vā sammāsambodhi. Sabbaññutaññāṇapadaṭṭhānañhi maggañāṇaṃ, maggañāṇapadaṭṭhānañca sabbaññutaññāṇaṃ ‘‘sammāsambodhī’’ti vuccati. Nicchitasubuddhatāya dhammassa sudhammatā saṅghassa suppaṭipatti vinicchitā eva hotīti āha ‘‘desanāsīsameva ceta’’ntiādi. Tassa padhānaṃ vīriyaṃ ijjhati ratanattayasaddhāya ‘‘imāya paṭipadāya jarāmaraṇato muccissāmī’’ti padhānānuyoge avaṃmukhasambhavato.
அப்பாபா³தோ⁴திஆதி³ ஹெட்டா² வுத்தமேவ. அகு³ணங் பகாஸேதா ஆயதிங் ஸங்வரங் ஆபஜ்ஜிதா ஸம்மாபடிபத்தியா விஸோத⁴னத்த²ங். உத³யஞ்ச அத்த²ஞ்ச க³ந்துந்தி ‘‘அவிஜ்ஜாஸமுத³யா’’திஆதி³னா பஞ்சன்னங் உபாதா³னக்க²ந்தா⁴னங் உத³யஞ்ச வயஞ்ச ஜானிதுங். தேனாஹ ‘‘ஏதேனா’’திஆதி³. பரிஸுத்³தா⁴ய உபக்கிலேஸவினிமுத்தாய. நிப்³பி³ஜ்ஜி²துந்தி தத³ங்க³வஸேன பஜஹிதுங் ஸமுச்சே²த³ப்பஹானஸ்ஸ பச்சயோ ப⁴விதுங். யங் து³க்க²ங் கீ²யதீதி கிலேஸேஸு அப்பஹீனேஸு தேன தது³பனிஸ்ஸயகம்மங் படிச்ச யங் து³க்க²ங் உப்பஜ்ஜெய்ய, தங் ஸந்தா⁴ய வுத்தங்.
Appābādhotiādi heṭṭhā vuttameva. Aguṇaṃ pakāsetā āyatiṃ saṃvaraṃ āpajjitā sammāpaṭipattiyā visodhanatthaṃ. Udayañca atthañca gantunti ‘‘avijjāsamudayā’’tiādinā pañcannaṃ upādānakkhandhānaṃ udayañca vayañca jānituṃ. Tenāha ‘‘etenā’’tiādi. Parisuddhāya upakkilesavinimuttāya. Nibbijjhitunti tadaṅgavasena pajahituṃ samucchedappahānassa paccayo bhavituṃ. Yaṃ dukkhaṃ khīyatīti kilesesu appahīnesu tena tadupanissayakammaṃ paṭicca yaṃ dukkhaṃ uppajjeyya, taṃ sandhāya vuttaṃ.
345. ஸேஸதி³வஸேதி ஸத்ததி³வஸதோ பட்டா²ய யாவ த்³வே ரத்திந்தி³வா.
345.Sesadivaseti sattadivasato paṭṭhāya yāva dve rattindivā.
346. குச்சி²ஸன்னிஸ்ஸிதோ க³ப்³போ⁴ நிஸ்ஸயவோஹாரேன ‘‘குச்சீ²’’தி வுச்சதி, ஸோ ஏதிஸ்ஸா அத்தீ²தி குச்சி²மதீ. தேனாஹ ‘‘ஆபன்னஸத்தா’’தி. ஆரக்கோ² பனஸ்ஸ பச்சுபட்டி²தோ ஹோதீதி மாதரா க³ஹிதஸரணங் க³ப்³ப⁴வுட்டி²தஸ்ஸ தஸ்ஸ ஸரணக³மனங் பவேத³யிதஸ்ஸ குஸலங் ஸரணங் நாம, மாது கதரக்கோ² புத்தஸ்ஸபி பச்சுபட்டி²தோதி. மஹல்லககாலேதி வசனத்த²ங் ஜானநகாலே. ஸாரெந்தீதி யதா²தி³ட்ட²ங் யதா²ப³லங் ரதனத்தயகு³ணபதிட்டா²பனவஸேன அஸ்ஸ ஸாரெந்தி. ஸல்லக்கெ²த்வாதி வுத்தமத்த²ங் உபதா⁴ரெத்வா. ஸரணங் க³ஹிதங் நாம ஹோதி ரதனத்தயஸ்ஸ ஸரணபா⁴வஸல்லக்க²ணபுப்³ப³கதன்னின்னசித்தபா⁴வதோவ. ஸேஸங் ஸுவிஞ்ஞெய்யமேவ.
346. Kucchisannissito gabbho nissayavohārena ‘‘kucchī’’ti vuccati, so etissā atthīti kucchimatī. Tenāha ‘‘āpannasattā’’ti. Ārakkho panassa paccupaṭṭhito hotīti mātarā gahitasaraṇaṃ gabbhavuṭṭhitassa tassa saraṇagamanaṃ pavedayitassa kusalaṃ saraṇaṃ nāma, mātu katarakkho puttassapi paccupaṭṭhitoti. Mahallakakāleti vacanatthaṃ jānanakāle. Sārentīti yathādiṭṭhaṃ yathābalaṃ ratanattayaguṇapatiṭṭhāpanavasena assa sārenti. Sallakkhetvāti vuttamatthaṃ upadhāretvā. Saraṇaṃ gahitaṃ nāma hoti ratanattayassa saraṇabhāvasallakkhaṇapubbakatanninnacittabhāvatova. Sesaṃ suviññeyyameva.
போ³தி⁴ராஜகுமாரஸுத்தவண்ணனாய லீனத்த²ப்பகாஸனா ஸமத்தா.
Bodhirājakumārasuttavaṇṇanāya līnatthappakāsanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 5. போ³தி⁴ராஜகுமாரஸுத்தங் • 5. Bodhirājakumārasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 5. போ³தி⁴ராஜகுமாரஸுத்தவண்ணனா • 5. Bodhirājakumārasuttavaṇṇanā
