| Library / Tipiṭaka / তিপিটক • Tipiṭaka / মজ্ঝিমনিকায (টীকা) • Majjhimanikāya (ṭīkā) |
৫. বোধিরাজকুমারসুত্তৰণ্ণনা
5. Bodhirājakumārasuttavaṇṇanā
৩২৪. ওলোকনকপদুমন্তি লীলাঅরৰিন্দং। তস্মাতি কোকনদসণ্ঠানত্তা কোকনদোতি সঙ্খং লভি।
324.Olokanakapadumanti līlāaravindaṃ. Tasmāti kokanadasaṇṭhānattā kokanadoti saṅkhaṃ labhi.
৩২৫. যাৰ পচ্ছিম…পে॰… ফলকং ৰুত্তং তস্স সব্বপচ্ছা সন্থতত্তা। উপরিমফলগতঞ্হি সোপানমত্থকং। ওলোকনত্থংযেৰাতি ন কেৰলং ভগৰতো আগমনঞ্ঞেৰ ওলোকনত্থং, অথ খো অত্তনো পত্থনায সন্থরাপিতায চেলপটিকায অক্কমনস্সপি।
325.Yāva pacchima…pe… phalakaṃ vuttaṃ tassa sabbapacchā santhatattā. Uparimaphalagatañhi sopānamatthakaṃ. Olokanatthaṃyevāti na kevalaṃ bhagavato āgamanaññeva olokanatthaṃ, atha kho attano patthanāya santharāpitāya celapaṭikāya akkamanassapi.
সকুণপোতকেতি কাদম্বটিট্টিভপুত্তকে। অঞ্ঞোৰ ভৰেয্যাতি তস্মিং অত্তভাৰে মাতুগামতো অঞ্ঞো ইদানি ভরিযাভূতো মাতুগামো ভৰেয্য। পুত্তং লভেয্যাতি অত্তনো কম্মৰসেন পুত্তং, নো তস্স। উভোহীতি ইমেহি এৰ উভোহি। ইমেহি কারণেহীতি তস্স রাজকুমারস্স বুদ্ধং পটিচ্চ মিচ্ছাগহণং, তিত্থিযানং উজ্ঝাযনং, অনাগতে মনুস্সানং ভিক্খূনং উদ্দিস্স ৰিপ্পটিসারোতি ইমেহি তীহি কারণেহি। পঞ্ঞত্তন্তি সন্থতং চেলপটিকং। মঙ্গলং ইচ্ছন্তীতি মঙ্গলিকা।
Sakuṇapotaketi kādambaṭiṭṭibhaputtake. Aññova bhaveyyāti tasmiṃ attabhāve mātugāmato añño idāni bhariyābhūto mātugāmo bhaveyya. Puttaṃ labheyyāti attano kammavasena puttaṃ, no tassa. Ubhohīti imehi eva ubhohi. Imehi kāraṇehīti tassa rājakumārassa buddhaṃ paṭicca micchāgahaṇaṃ, titthiyānaṃ ujjhāyanaṃ, anāgate manussānaṃ bhikkhūnaṃ uddissa vippaṭisāroti imehi tīhi kāraṇehi. Paññattanti santhataṃ celapaṭikaṃ. Maṅgalaṃ icchantīti maṅgalikā.
৩২৬. ততিযং কারণন্তি ইমিনা ভিক্খূসু ৰিপ্পটিসারানুপ্পাদনমাহ। যং কিঞ্চি পরিভুঞ্জন-সুখং কামসুখল্লিকানুযোগোতি অধিপ্পাযেন কামসুখল্লিকানুযোগসঞ্ঞী হুত্ৰা…পে॰… মঞ্ঞমানো এৰমাহ।
326.Tatiyaṃkāraṇanti iminā bhikkhūsu vippaṭisārānuppādanamāha. Yaṃ kiñci paribhuñjana-sukhaṃ kāmasukhallikānuyogoti adhippāyena kāmasukhallikānuyogasaññī hutvā…pe… maññamāno evamāha.
৩২৭. অথ নং ভগৰা ততো মিচ্ছাভিনিৰেসতো ৰিৰেচেতুকামো ‘‘সো খো অহ’’ন্তিআদিনা অত্তনো দুক্করচরিযং দস্সেতুং আরভি। মহাসচ্চকে(ম॰ নি॰ ১.৩৬৪ আদযো) ৰুত্তনযেনেৰ ৰেদিতব্বং ‘‘সো খো অহ’’ন্তিআদিপাঠস্স তত্থ আগতনিযামেনেৰ আগতত্তা। পাসরাসিসুত্তে (ম॰ নি॰ ১.২৭২ আদযো) ৰুত্তনযেনাতি এত্থাপি এসেৰ নযো।
327. Atha naṃ bhagavā tato micchābhinivesato vivecetukāmo ‘‘so kho aha’’ntiādinā attano dukkaracariyaṃ dassetuṃ ārabhi. Mahāsaccake(ma. ni. 1.364 ādayo) vuttanayeneva veditabbaṃ ‘‘so kho aha’’ntiādipāṭhassa tattha āgataniyāmeneva āgatattā. Pāsarāsisutte (ma. ni. 1.272 ādayo) vuttanayenāti etthāpi eseva nayo.
৩৪৩. অঙ্কুসং গণ্হন্তি এতেন তস্স গহণে ছেকো হোতীতি অঙ্কুসগহণসিপ্পং। মেঘউতুন্তি মেঘং পটিচ্চ উপ্পন্নসীতউতুং। পব্বতউতুন্তি পব্বতং পটিচ্চ উণ্হউতুং। উভযৰসেন চ তস্স তথা সীতুণ্হউতুতো এনো আগতোতি ত-কারস্স দ-কারং কত্ৰা উদেনোতি নামং অকাসি।
343. Aṅkusaṃ gaṇhanti etena tassa gahaṇe cheko hotīti aṅkusagahaṇasippaṃ. Meghautunti meghaṃ paṭicca uppannasītautuṃ. Pabbatautunti pabbataṃ paṭicca uṇhautuṃ. Ubhayavasena ca tassa tathā sītuṇhaututo eno āgatoti ta-kārassa da-kāraṃ katvā udenoti nāmaṃ akāsi.
তাপসো ওগাল়্হঞাণৰসেন রঞ্ঞো মতভাৰং ঞত্ৰা। আদিতো পট্ঠাযাতি কোসম্বিনগরে পরন্তপরঞ্ঞো অগ্গমহেসিভাৰতো পট্ঠায। পুব্বেতি সীলৰন্তকালে। হত্থিগন্থন্তি হত্থীনং অত্তনো ৰসে ৰত্তাপনসত্থং। তেনেৰস্স তং সিক্খাপেতি, কিচ্চঞ্চ ইজ্ঝতি।
Tāpaso ogāḷhañāṇavasena rañño matabhāvaṃ ñatvā. Ādito paṭṭhāyāti kosambinagare parantaparañño aggamahesibhāvato paṭṭhāya. Pubbeti sīlavantakāle. Hatthiganthanti hatthīnaṃ attano vase vattāpanasatthaṃ. Tenevassa taṃ sikkhāpeti, kiccañca ijjhati.
৩৪৪. পদহনভাৰোতি ভাৰনানুযোগো। পধানে ৰা নিযুত্তো পধানিযো, পধানিযস্স ভিক্খুনো, তস্সেৰ পধানিযভাৰস্স অঙ্গানি কারণানি পধানিযঙ্গানি। সদ্ধা এতস্স অত্থীতি সদ্ধো। কিঞ্চাপি পচ্চেকবোধিসত্তানম্পি অভিনীহারতো পট্ঠায আগতা আগমনসদ্ধা এৰ, মহাবোধিসত্তানং পন সদ্ধা গরুতরাতি সা এৰ গহিতা। অচলভাৰেন ওকপ্পনং ‘‘সম্মাসম্বুদ্ধো ভগৰা, স্ৰাখ্যাতো ধম্মো, সুপ্পটিপন্নো সঙ্ঘো’’তি কেনচি অকম্পিযভাৰেন রতনত্তযগুণে ওগাহিত্ৰা কপ্পনং। পসাদুপ্পত্তি রতনত্তযে পসীদনমেৰ। বোধিন্তি চতুমগ্গঞাণন্তি ৰুত্তং তংনিমিত্তত্তা সব্বঞ্ঞুতঞ্ঞাণস্স, বোধীতি ৰা সম্মাসম্বোধি। সব্বঞ্ঞুতঞ্ঞাণপদট্ঠানঞ্হি মগ্গঞাণং, মগ্গঞাণপদট্ঠানঞ্চ সব্বঞ্ঞুতঞ্ঞাণং ‘‘সম্মাসম্বোধী’’তি ৰুচ্চতি। নিচ্ছিতসুবুদ্ধতায ধম্মস্স সুধম্মতা সঙ্ঘস্স সুপ্পটিপত্তি ৰিনিচ্ছিতা এৰ হোতীতি আহ ‘‘দেসনাসীসমেৰ চেত’’ন্তিআদি। তস্স পধানং ৰীরিযং ইজ্ঝতি রতনত্তযসদ্ধায ‘‘ইমায পটিপদায জরামরণতো মুচ্চিস্সামী’’তি পধানানুযোগে অৰংমুখসম্ভৰতো।
344.Padahanabhāvoti bhāvanānuyogo. Padhāne vā niyutto padhāniyo, padhāniyassa bhikkhuno, tasseva padhāniyabhāvassa aṅgāni kāraṇāni padhāniyaṅgāni. Saddhā etassa atthīti saddho. Kiñcāpi paccekabodhisattānampi abhinīhārato paṭṭhāya āgatā āgamanasaddhā eva, mahābodhisattānaṃ pana saddhā garutarāti sā eva gahitā. Acalabhāvena okappanaṃ ‘‘sammāsambuddho bhagavā, svākhyāto dhammo, suppaṭipanno saṅgho’’ti kenaci akampiyabhāvena ratanattayaguṇe ogāhitvā kappanaṃ. Pasāduppatti ratanattaye pasīdanameva. Bodhinti catumaggañāṇanti vuttaṃ taṃnimittattā sabbaññutaññāṇassa, bodhīti vā sammāsambodhi. Sabbaññutaññāṇapadaṭṭhānañhi maggañāṇaṃ, maggañāṇapadaṭṭhānañca sabbaññutaññāṇaṃ ‘‘sammāsambodhī’’ti vuccati. Nicchitasubuddhatāya dhammassa sudhammatā saṅghassa suppaṭipatti vinicchitā eva hotīti āha ‘‘desanāsīsameva ceta’’ntiādi. Tassa padhānaṃ vīriyaṃ ijjhati ratanattayasaddhāya ‘‘imāya paṭipadāya jarāmaraṇato muccissāmī’’ti padhānānuyoge avaṃmukhasambhavato.
অপ্পাবাধোতিআদি হেট্ঠা ৰুত্তমেৰ। অগুণং পকাসেতা আযতিং সংৰরং আপজ্জিতা সম্মাপটিপত্তিযা ৰিসোধনত্থং। উদযঞ্চ অত্থঞ্চ গন্তুন্তি ‘‘অৰিজ্জাসমুদযা’’তিআদিনা পঞ্চন্নং উপাদানক্খন্ধানং উদযঞ্চ ৰযঞ্চ জানিতুং। তেনাহ ‘‘এতেনা’’তিআদি। পরিসুদ্ধায উপক্কিলেসৰিনিমুত্তায। নিব্বিজ্ঝিতুন্তি তদঙ্গৰসেন পজহিতুং সমুচ্ছেদপ্পহানস্স পচ্চযো ভৰিতুং। যং দুক্খং খীযতীতি কিলেসেসু অপ্পহীনেসু তেন তদুপনিস্সযকম্মং পটিচ্চ যং দুক্খং উপ্পজ্জেয্য, তং সন্ধায ৰুত্তং।
Appābādhotiādi heṭṭhā vuttameva. Aguṇaṃ pakāsetā āyatiṃ saṃvaraṃ āpajjitā sammāpaṭipattiyā visodhanatthaṃ. Udayañca atthañca gantunti ‘‘avijjāsamudayā’’tiādinā pañcannaṃ upādānakkhandhānaṃ udayañca vayañca jānituṃ. Tenāha ‘‘etenā’’tiādi. Parisuddhāya upakkilesavinimuttāya. Nibbijjhitunti tadaṅgavasena pajahituṃ samucchedappahānassa paccayo bhavituṃ. Yaṃ dukkhaṃ khīyatīti kilesesu appahīnesu tena tadupanissayakammaṃ paṭicca yaṃ dukkhaṃ uppajjeyya, taṃ sandhāya vuttaṃ.
৩৪৫. সেসদিৰসেতি সত্তদিৰসতো পট্ঠায যাৰ দ্ৰে রত্তিন্দিৰা।
345.Sesadivaseti sattadivasato paṭṭhāya yāva dve rattindivā.
৩৪৬. কুচ্ছিসন্নিস্সিতো গব্ভো নিস্সযৰোহারেন ‘‘কুচ্ছী’’তি ৰুচ্চতি, সো এতিস্সা অত্থীতি কুচ্ছিমতী। তেনাহ ‘‘আপন্নসত্তা’’তি। আরক্খো পনস্স পচ্চুপট্ঠিতো হোতীতি মাতরা গহিতসরণং গব্ভৰুট্ঠিতস্স তস্স সরণগমনং পৰেদযিতস্স কুসলং সরণং নাম, মাতু কতরক্খো পুত্তস্সপি পচ্চুপট্ঠিতোতি। মহল্লককালেতি ৰচনত্থং জাননকালে। সারেন্তীতি যথাদিট্ঠং যথাবলং রতনত্তযগুণপতিট্ঠাপনৰসেন অস্স সারেন্তি। সল্লক্খেত্ৰাতি ৰুত্তমত্থং উপধারেত্ৰা। সরণং গহিতং নাম হোতি রতনত্তযস্স সরণভাৰসল্লক্খণপুব্বকতন্নিন্নচিত্তভাৰতোৰ। সেসং সুৰিঞ্ঞেয্যমেৰ।
346. Kucchisannissito gabbho nissayavohārena ‘‘kucchī’’ti vuccati, so etissā atthīti kucchimatī. Tenāha ‘‘āpannasattā’’ti. Ārakkho panassa paccupaṭṭhito hotīti mātarā gahitasaraṇaṃ gabbhavuṭṭhitassa tassa saraṇagamanaṃ pavedayitassa kusalaṃ saraṇaṃ nāma, mātu katarakkho puttassapi paccupaṭṭhitoti. Mahallakakāleti vacanatthaṃ jānanakāle. Sārentīti yathādiṭṭhaṃ yathābalaṃ ratanattayaguṇapatiṭṭhāpanavasena assa sārenti. Sallakkhetvāti vuttamatthaṃ upadhāretvā. Saraṇaṃ gahitaṃ nāma hoti ratanattayassa saraṇabhāvasallakkhaṇapubbakatanninnacittabhāvatova. Sesaṃ suviññeyyameva.
বোধিরাজকুমারসুত্তৰণ্ণনায লীনত্থপ্পকাসনা সমত্তা।
Bodhirājakumārasuttavaṇṇanāya līnatthappakāsanā samattā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ৫. বোধিরাজকুমারসুত্তং • 5. Bodhirājakumārasuttaṃ
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / মজ্ঝিমনিকায (অট্ঠকথা) • Majjhimanikāya (aṭṭhakathā) / ৫. বোধিরাজকুমারসুত্তৰণ্ণনা • 5. Bodhirājakumārasuttavaṇṇanā
