| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. போ³தி⁴ஸிஞ்சகத்தே²ரஅபதா³னவண்ணனா
9. Bodhisiñcakattheraapadānavaṇṇanā
விபஸ்ஸிஸ்ஸ ப⁴க³வதோதிஆதி³கங் ஆயஸ்மதோ போ³தி⁴ஸிஞ்சகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ அனேகாஸு ஜாதீஸு விவட்டூபனிஸ்ஸயானி புஞ்ஞானி உபசினந்தோ விபஸ்ஸிஸ்ஸ ப⁴க³வதோ காலே குலகே³ஹே நிப்³ப³த்தோ ஸாஸனே பப்³ப³ஜித்வா வத்தபடிபத்தியா ஸாஸனங் ஸோப⁴யந்தோ மஹாஜனே போ³தி⁴பூஜங் குருமானே தி³ஸ்வா அனேகானி புப்பா²னி ஸுக³ந்தோ⁴த³கானி ச கா³ஹாபெத்வா பூஜேஸி. ஸோ தேன புஞ்ஞேன தே³வலோகே நிப்³ப³த்தோ ச² காமாவசரஸம்பத்தியோ அனுப⁴வித்வா இமஸ்மிங் பு³த்³து⁴ப்பாதே³ குலகே³ஹே நிப்³ப³த்தோ வுத்³தி⁴மன்வாய ஸத்³தா⁴ஜாதோ பப்³ப³ஜித்வா நசிரஸ்ஸேவ அரஹா அஹோஸி.
Vipassissa bhagavatotiādikaṃ āyasmato bodhisiñcakattherassa apadānaṃ. Ayampi purimabuddhesu katādhikāro anekāsu jātīsu vivaṭṭūpanissayāni puññāni upacinanto vipassissa bhagavato kāle kulagehe nibbatto sāsane pabbajitvā vattapaṭipattiyā sāsanaṃ sobhayanto mahājane bodhipūjaṃ kurumāne disvā anekāni pupphāni sugandhodakāni ca gāhāpetvā pūjesi. So tena puññena devaloke nibbatto cha kāmāvacarasampattiyo anubhavitvā imasmiṃ buddhuppāde kulagehe nibbatto vuddhimanvāya saddhājāto pabbajitvā nacirasseva arahā ahosi.
46. ஸோ அரஹா ஹுத்வா ஜா²னப²லஸுகே²ன வீதினாமெத்வா புப்³ப³கம்மங் ஸரித்வா ஸோமனஸ்ஸஜாதோ புப்³ப³சரிதாபதா³னங் பகாஸெந்தோ விபஸ்ஸிஸ்ஸ ப⁴க³வதோதிஆதி³மாஹ. தத்த² விஸேஸங் பரமத்த²ங் நிப்³பா³னங் பஸ்ஸதீதி விபஸ்ஸீ, விஸேஸேன ப⁴ப்³பா³ப⁴ப்³ப³ஜனே பஸ்ஸதீதி வா விபஸ்ஸீ, விபஸ்ஸந்தோ சதுஸச்சங் பஸ்ஸனத³க்க²னஸீலோதி வா விபஸ்ஸீ, தஸ்ஸ விபஸ்ஸிஸ்ஸ ப⁴க³வதோ மஹாபோ³தி⁴மஹோ அஹூதி ஸம்ப³ந்தோ⁴. தத்ராபி மஹாபோ³தீ⁴தி போ³தி⁴ வுச்சதி சதூஸு மக்³கே³ஸு ஞாணங், தமெத்த² நிஸின்னோ ப⁴க³வா படிவிஜ்ஜ²தீதி கணிகாரபாத³பருக்கோ²பி போ³தி⁴ச்சேவ வுச்சதி, மஹிதோ ச ஸோ தே³வப்³ரஹ்மனராஸுரேஹி போ³தி⁴ சேதி மஹாபோ³தி⁴, மஹதோ பு³த்³த⁴ஸ்ஸ ப⁴க³வதோ போ³தீ⁴தி வா மஹாபோ³தி⁴, தஸ்ஸ மஹோ பூஜா அஹோஸீதி அத்தோ². ஸேஸங் ஸப்³ப³த்த² உத்தானத்த²மேவாதி.
46. So arahā hutvā jhānaphalasukhena vītināmetvā pubbakammaṃ saritvā somanassajāto pubbacaritāpadānaṃ pakāsento vipassissa bhagavatotiādimāha. Tattha visesaṃ paramatthaṃ nibbānaṃ passatīti vipassī, visesena bhabbābhabbajane passatīti vā vipassī, vipassanto catusaccaṃ passanadakkhanasīloti vā vipassī, tassa vipassissa bhagavato mahābodhimaho ahūti sambandho. Tatrāpi mahābodhīti bodhi vuccati catūsu maggesu ñāṇaṃ, tamettha nisinno bhagavā paṭivijjhatīti kaṇikārapādaparukkhopi bodhicceva vuccati, mahito ca so devabrahmanarāsurehi bodhi ceti mahābodhi, mahato buddhassa bhagavato bodhīti vā mahābodhi, tassa maho pūjā ahosīti attho. Sesaṃ sabbattha uttānatthamevāti.
போ³தி⁴ஸிஞ்சகத்தே²ரஅபதா³னவண்ணனா ஸமத்தா.
Bodhisiñcakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. போ³தி⁴ஸிஞ்சகத்தே²ரஅபதா³னங் • 9. Bodhisiñcakattheraapadānaṃ
