| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৬. বোধিযাবুদ্ধোতিকথাৰণ্ণনা
6. Bodhiyābuddhotikathāvaṇṇanā
৩৯৮. ইদানি বোধিযা বুদ্ধোতিকথা নাম হোতি। তত্থ বোধীতি চতুমগ্গঞাণস্সাপি সব্বঞ্ঞুতঞ্ঞাণস্সাপি অধিৰচনং। তস্মা যেসং যথা ওদাতেন ৰণ্ণেন ওদাতো, সামেন ৰণ্ণেন সামো, এৰং বোধিযা বুদ্ধোতি লদ্ধি, সেয্যথাপি এতরহি উত্তরাপথকানংযেৰ; তে সন্ধায পুচ্ছা চ অনুযোগো চ সকৰাদিস্স, পটিঞ্ঞা চ পটিক্খেপো চ ইতরস্স।
398. Idāni bodhiyā buddhotikathā nāma hoti. Tattha bodhīti catumaggañāṇassāpi sabbaññutaññāṇassāpi adhivacanaṃ. Tasmā yesaṃ yathā odātena vaṇṇena odāto, sāmena vaṇṇena sāmo, evaṃ bodhiyā buddhoti laddhi, seyyathāpi etarahi uttarāpathakānaṃyeva; te sandhāya pucchā ca anuyogo ca sakavādissa, paṭiññā ca paṭikkhepo ca itarassa.
অতীতাযাতি পঞ্হে তস্মিং খণে অভাৰতো পটিক্খিপতি। দুতিযং পুট্ঠো পটিলাভং সন্ধায পটিজানাতি। পুন কিচ্চৰসেন পুট্ঠো কিচ্চাভাৰতো পটিক্খিপতি। দুতিযং পুট্ঠো যং তেন তায করণীযং কতং, তত্থ সম্মোহাভাৰং পটিজানাতি। লেসোকাসং পন অদত্ৰা দুক্খং পরিজানাতীতিআদিনা নযেন পুট্ঠো তস্স কিচ্চস্স অভাৰা পটিক্খিপতি।
Atītāyāti pañhe tasmiṃ khaṇe abhāvato paṭikkhipati. Dutiyaṃ puṭṭho paṭilābhaṃ sandhāya paṭijānāti. Puna kiccavasena puṭṭho kiccābhāvato paṭikkhipati. Dutiyaṃ puṭṭho yaṃ tena tāya karaṇīyaṃ kataṃ, tattha sammohābhāvaṃ paṭijānāti. Lesokāsaṃ pana adatvā dukkhaṃ parijānātītiādinā nayena puṭṭho tassa kiccassa abhāvā paṭikkhipati.
অনাগতপঞ্হে তস্মিং খণে মগ্গঞাণস্স অভাৰা পটিক্খিপতি। দুতিযং পুট্ঠো ‘‘অগমা রাজগহং বুদ্ধো’’তি (সু॰ নি॰ ৪১০) অনাগতায বোধিযা বুদ্ধভাৰং মঞ্ঞমানো পটিজানাতি। বোধিকরণীযং করোতীতি পুট্ঠো তস্মিং খণে কিচ্চাভাৰেন পটিক্খিপতি। দুতিযং পুট্ঠো যদি ন করেয্য, বুদ্ধোতি ন ৰুচ্চেয্য। যস্মা অৰস্সং করিস্সতি, তস্মা করোতিযেৰ নামাতি পটিজানাতি। পুন লেসোকাসং অদত্ৰা পুট্ঠো পটিক্খিপতি। পচ্চুপ্পন্নপঞ্হো সদ্ধিং সংসন্দনায উত্তানত্থোৰ।
Anāgatapañhe tasmiṃ khaṇe maggañāṇassa abhāvā paṭikkhipati. Dutiyaṃ puṭṭho ‘‘agamā rājagahaṃ buddho’’ti (su. ni. 410) anāgatāya bodhiyā buddhabhāvaṃ maññamāno paṭijānāti. Bodhikaraṇīyaṃ karotīti puṭṭho tasmiṃ khaṇe kiccābhāvena paṭikkhipati. Dutiyaṃ puṭṭho yadi na kareyya, buddhoti na vucceyya. Yasmā avassaṃ karissati, tasmā karotiyeva nāmāti paṭijānāti. Puna lesokāsaṃ adatvā puṭṭho paṭikkhipati. Paccuppannapañho saddhiṃ saṃsandanāya uttānatthova.
৩৯৯. তিস্সো বোধিযো একতো কত্ৰা পুট্ঠো সব্বঞ্ঞুতঞ্ঞাণং সন্ধায তীহিপি বুদ্ধোতি ৰত্তব্বভাৰতো পটিজানাতি। পুন তীহিতি পুট্ঠো সব্বাসং একক্খণে অভাৰা পটিক্খিপতি। দুতিযং পুট্ঠো অতীতানাগতপচ্চুপ্পন্নস্স সব্বঞ্ঞুতঞ্ঞাণস্স ৰসেন পটিজানাতি। পুন লেসোকাসং অদত্ৰা সততং সমিতন্তি পুট্ঠো পটিক্খিপতি।
399. Tisso bodhiyo ekato katvā puṭṭho sabbaññutaññāṇaṃ sandhāya tīhipi buddhoti vattabbabhāvato paṭijānāti. Puna tīhiti puṭṭho sabbāsaṃ ekakkhaṇe abhāvā paṭikkhipati. Dutiyaṃ puṭṭho atītānāgatapaccuppannassa sabbaññutaññāṇassa vasena paṭijānāti. Puna lesokāsaṃ adatvā satataṃ samitanti puṭṭho paṭikkhipati.
ন বত্তব্বং বোধিযাতি পুচ্ছা পরৰাদিস্স, বোধিযা অভাৰক্খণে অবুদ্ধভাৰাপত্তিতো পটিঞ্ঞা সকৰাদিস্স। ননু বোধিপটিলাভাতি পঞ্হে পন যস্মিং সন্তানে বোধিসঙ্খাতং মগ্গঞাণং উপ্পন্নং, তত্থ বুদ্ধোতি সম্মুতিসব্ভাৰতো পটিঞ্ঞা তস্সেৰ। তস্স অধিপ্পাযং অজানিত্ৰা হঞ্চীতি লদ্ধিট্ঠপনা পরৰাদিস্স। ইদানিস্স অসল্লক্খণং পাকটং কাতুং বোধিপটিলাভা বুদ্ধোতি বোধিযা বুদ্ধোতি পুচ্ছা সকৰাদিস্স। তস্সত্থো – ‘‘কিং তে যস্মা বোধিপটিলাভা বুদ্ধো, তস্মা বোধিযা বুদ্ধো’’তি। ইতরো ‘‘বোধিপটিলাভো নাম বোধিযা উপ্পজ্জিত্ৰা নিরুদ্ধাযপি সন্তানে উপ্পন্নভাৰোযেৰ। বোধি নাম মগ্গক্খণে ঞাণ’’ন্তি ইমং ৰিভাগং অসল্লক্খেন্তোৰ পুন পটিজানাতি। ততো সকৰাদিনা বোধিপটিলাভা বোধীতি পুট্ঠো ৰচনোকাসং অলভন্তো পটিক্খিপতীতি।
Na battabbaṃ bodhiyāti pucchā paravādissa, bodhiyā abhāvakkhaṇe abuddhabhāvāpattito paṭiññā sakavādissa. Nanu bodhipaṭilābhāti pañhe pana yasmiṃ santāne bodhisaṅkhātaṃ maggañāṇaṃ uppannaṃ, tattha buddhoti sammutisabbhāvato paṭiññā tasseva. Tassa adhippāyaṃ ajānitvā hañcīti laddhiṭṭhapanā paravādissa. Idānissa asallakkhaṇaṃ pākaṭaṃ kātuṃ bodhipaṭilābhā buddhoti bodhiyā buddhoti pucchā sakavādissa. Tassattho – ‘‘kiṃ te yasmā bodhipaṭilābhā buddho, tasmā bodhiyā buddho’’ti. Itaro ‘‘bodhipaṭilābho nāma bodhiyā uppajjitvā niruddhāyapi santāne uppannabhāvoyeva. Bodhi nāma maggakkhaṇe ñāṇa’’nti imaṃ vibhāgaṃ asallakkhentova puna paṭijānāti. Tato sakavādinā bodhipaṭilābhā bodhīti puṭṭho vacanokāsaṃ alabhanto paṭikkhipatīti.
বোধিযাবুদ্ধোতিকথাৰণ্ণনা।
Bodhiyābuddhotikathāvaṇṇanā.
ইতি ইমা তিস্সোপি কথা উত্তরাপথকানংযেৰ।
Iti imā tissopi kathā uttarāpathakānaṃyeva.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (৩৮) ৬. বোধিযা বুদ্ধোতিকথা • (38) 6. Bodhiyā buddhotikathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৬. বোধিযাবুদ্ধোতিকথাৰণ্ণনা • 6. Bodhiyābuddhotikathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৬. বোধিযাবুদ্ধোতিকথাৰণ্ণনা • 6. Bodhiyābuddhotikathāvaṇṇanā
