| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
6. බොජ්‌ඣඞ්‌ගපඤ්‌හො
6. Bojjhaṅgapañho
6. රාජා ආහ ‘‘කති නු ඛො, භන්‌තෙ නාගසෙන, බොජ්‌ඣඞ්‌ගා’’ති? ‘‘සත්‌ත ඛො, මහාරාජ, බොජ්‌ඣඞ්‌ගා’’ති. ‘‘කතිහි පන, භන්‌තෙ, බොජ්‌ඣඞ්‌ගෙහි බුජ්‌ඣතී’’ති? ‘‘එකෙන ඛො, මහාරාජ, බොජ්‌ඣඞ්‌ගෙන බුජ්‌ඣති ධම්‌මවිචයසම්‌බොජ්‌ඣඞ්‌ගෙනා’’ති. ‘‘අථ කිස්‌ස නු ඛො, භන්‌තෙ, වුච්‌චන්‌ති ‘සත්‌ත බොජ්‌ඣඞ්‌ගා’’’ති? ‘‘තං කිං මඤ්‌ඤසි, මහාරාජ, අසි කොසියා පක්‌ඛිත්‌තො අග්‌ගහිතො හත්‌ථෙන උස්‌සහති ඡෙජ්‌ජං ඡින්‌දිතු’’න්‌ති. ‘‘න හි, භන්‌තෙ’’ති. ‘‘එවමෙව ඛො, මහාරාජ, ධම්‌මවිචයසම්‌බොජ්‌ඣඞ්‌ගෙන විනා ඡහි බොජ්‌ඣඞ්‌ගෙහි න බුජ්‌ඣතී’’ති.
6. Rājā āha ‘‘kati nu kho, bhante nāgasena, bojjhaṅgā’’ti? ‘‘Satta kho, mahārāja, bojjhaṅgā’’ti. ‘‘Katihi pana, bhante, bojjhaṅgehi bujjhatī’’ti? ‘‘Ekena kho, mahārāja, bojjhaṅgena bujjhati dhammavicayasambojjhaṅgenā’’ti. ‘‘Atha kissa nu kho, bhante, vuccanti ‘satta bojjhaṅgā’’’ti? ‘‘Taṃ kiṃ maññasi, mahārāja, asi kosiyā pakkhitto aggahito hatthena ussahati chejjaṃ chinditu’’nti. ‘‘Na hi, bhante’’ti. ‘‘Evameva kho, mahārāja, dhammavicayasambojjhaṅgena vinā chahi bojjhaṅgehi na bujjhatī’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
බොජ්‌ඣඞ්‌ගපඤ්‌හො ඡට්‌ඨො.
Bojjhaṅgapañho chaṭṭho.
