| Library / Tipiṭaka / ติปิฎก • Tipiṭaka / วิภงฺค-อนุฎีกา • Vibhaṅga-anuṭīkā |
๑๐. โพชฺฌงฺควิภโงฺค
10. Bojjhaṅgavibhaṅgo
๑. สุตฺตนฺตภาชนียํ
1. Suttantabhājanīyaṃ
ปฐมนยวณฺณนา
Paṭhamanayavaṇṇanā
๔๖๖. ปติฎฺฐานํ อิธ สํสาเร อวฎฺฐานํ, ตสฺส มูลํ กิเลสาติ อาห ‘‘กิเลสวเสน ปติฎฺฐาน’’นฺติฯ ปติฎฺฐานาย ปน พฺยาปาราปตฺติ กมฺมนฺติ วุตฺตํ ‘‘อภิสงฺขารวเสน อายูหนา’’ติฯ ยสฺมา กิเลเสสุ ตณฺหาทิฎฺฐิโย ตณฺหาทิฎฺฐิจริตานํ วิเสสโต สํสารนายิกา, กิเลสสหิตเมว จ กมฺมํ ปติฎฺฐานาย โหติ, น เกวลํ, ตสฺมา วุตฺตํ ‘‘ตณฺหาทิฎฺฐีหิ…เป.… อายูหนา’’ติฯ ตถา ตณฺหาย ภวสฺสาทภาวโต, ทิฎฺฐิยา วิภวาภินนฺทนภูตาย วิภวาภิสงฺขรณภาวโต ‘‘ตณฺหาวเสน ปติฎฺฐานํ, ทิฎฺฐิวเสน อายูหนา’’ติ วุตฺตํฯ ทิฎฺฐีสุปิ อโนฺตมุขปฺปวตฺตาย ภวทิฎฺฐิยา วิเสสโต สํสาเร อวฎฺฐานํ, ยโต โอลียนาติ วุจฺจตีติ อาห ‘‘สสฺสตทิฎฺฐิยา ปติฎฺฐาน’’นฺติฯ พหิมุขปฺปวตฺตาปิ วิภวทิฎฺฐิ ภวาภิสงฺขรณํ นาติวตฺตตีติ วุตฺตํ ‘‘อุเจฺฉททิฎฺฐิยา อายูหนา’’ติฯ ลยาปตฺติ ยถารทฺธสฺส อารมฺภสฺส อนิฎฺฐานํ อโนฺตสโงฺกจภาวโตติ อาห ‘‘ลีนวเสน ปติฎฺฐาน’’นฺติฯ อุทฺธตาปตฺติ อนุปายภูตา พฺยาปาราปตฺติ อสโงฺกจภาวโตติ วุตฺตํ ‘‘อุทฺธจฺจวเสน อายูหนา’’ติฯ ตถา โกสชฺชปกฺขิกตฺตา จ กามสุขานุโยคสฺส อุทฺธจฺจปกฺขิกตฺตา จ อตฺตกิลมถานุโยคสฺส ตทุภยวเสน ปติฎฺฐานายูหนา วุตฺตา, อิตรํ วุตฺตนยานุสาเรน เวทิตพฺพํฯ อิธาติ อิมิสฺสา สโมฺมหวิโนทนิยาฯ อวุตฺตานนฺติ ‘‘กิเลสวเสน ปติฎฺฐาน’’นฺติอาทีนํ วเสน เวทิตพฺพา ปติฎฺฐานายูหนาติ โยชนาฯ
466. Patiṭṭhānaṃ idha saṃsāre avaṭṭhānaṃ, tassa mūlaṃ kilesāti āha ‘‘kilesavasena patiṭṭhāna’’nti. Patiṭṭhānāya pana byāpārāpatti kammanti vuttaṃ ‘‘abhisaṅkhāravasena āyūhanā’’ti. Yasmā kilesesu taṇhādiṭṭhiyo taṇhādiṭṭhicaritānaṃ visesato saṃsāranāyikā, kilesasahitameva ca kammaṃ patiṭṭhānāya hoti, na kevalaṃ, tasmā vuttaṃ ‘‘taṇhādiṭṭhīhi…pe… āyūhanā’’ti. Tathā taṇhāya bhavassādabhāvato, diṭṭhiyā vibhavābhinandanabhūtāya vibhavābhisaṅkharaṇabhāvato ‘‘taṇhāvasena patiṭṭhānaṃ, diṭṭhivasena āyūhanā’’ti vuttaṃ. Diṭṭhīsupi antomukhappavattāya bhavadiṭṭhiyā visesato saṃsāre avaṭṭhānaṃ, yato olīyanāti vuccatīti āha ‘‘sassatadiṭṭhiyā patiṭṭhāna’’nti. Bahimukhappavattāpi vibhavadiṭṭhi bhavābhisaṅkharaṇaṃ nātivattatīti vuttaṃ ‘‘ucchedadiṭṭhiyā āyūhanā’’ti. Layāpatti yathāraddhassa ārambhassa aniṭṭhānaṃ antosaṅkocabhāvatoti āha ‘‘līnavasena patiṭṭhāna’’nti. Uddhatāpatti anupāyabhūtā byāpārāpatti asaṅkocabhāvatoti vuttaṃ ‘‘uddhaccavasena āyūhanā’’ti. Tathā kosajjapakkhikattā ca kāmasukhānuyogassa uddhaccapakkhikattā ca attakilamathānuyogassa tadubhayavasena patiṭṭhānāyūhanā vuttā, itaraṃ vuttanayānusārena veditabbaṃ. Idhāti imissā sammohavinodaniyā. Avuttānanti ‘‘kilesavasena patiṭṭhāna’’ntiādīnaṃ vasena veditabbā patiṭṭhānāyūhanāti yojanā.
สมปฺปวเตฺต ธเมฺมติ ลีนุทฺธจฺจวิรเหน สมปฺปวเตฺต สมฺปยุตฺตธเมฺมฯ ปฎิสญฺจิกฺขตีติ ปติรูปํ สงฺกเลติ คเณติ ตุเลติฯ เตนาห ‘‘อุปปตฺติโต อิกฺขตี’’ติฯ ตทากาโรติ ปฎิสงฺขานากาโร อุปปตฺติโต อิกฺขนากาโรฯ เอวญฺจ กตฺวาติ ปฎิสงฺขานสภาวตฺตา เอว อุเปกฺขาสโมฺพชฺฌงฺคสฺสฯ ปจฺฉิมปจฺฉิมการณภาโวติ ปจฺฉิมสฺส ปจฺฉิมสฺส การณภาโวฯ ปุริมํ ปุริมญฺหิ ปจฺฉิมสฺส ปจฺฉิมสฺส วิเสสปจฺจโยติฯ
Samappavatte dhammeti līnuddhaccavirahena samappavatte sampayuttadhamme. Paṭisañcikkhatīti patirūpaṃ saṅkaleti gaṇeti tuleti. Tenāha ‘‘upapattito ikkhatī’’ti. Tadākāroti paṭisaṅkhānākāro upapattito ikkhanākāro. Evañca katvāti paṭisaṅkhānasabhāvattā eva upekkhāsambojjhaṅgassa. Pacchimapacchimakāraṇabhāvoti pacchimassa pacchimassa kāraṇabhāvo. Purimaṃ purimañhi pacchimassa pacchimassa visesapaccayoti.
๔๖๗. อวิปรีตกายาทิสภาวคฺคหณสมตฺถตาย พลวตี เอว สติฯ ปญฺญา คหิตา สติเนปเกฺกนาติ อโตฺถฯ เอวํจิโตฺตติ เอวํ ลาภสกฺการสิโลกสนฺนิสฺสิตจิโตฺตฯ จิรกตวตฺตาทิวเสนาติ จิรกตวตฺตาทิสีเสนฯ ‘‘วุโตฺต’’ติ อิมินาปิ ‘‘กตฺวา อาห กายวิญฺญตฺติํ…เป.… โกฎฺฐาส’’นฺติ โยชนาฯ
467. Aviparītakāyādisabhāvaggahaṇasamatthatāya balavatī eva sati. Paññā gahitā satinepakkenāti attho. Evaṃcittoti evaṃ lābhasakkārasilokasannissitacitto. Cirakatavattādivasenāti cirakatavattādisīsena. ‘‘Vutto’’ti imināpi ‘‘katvā āha kāyaviññattiṃ…pe… koṭṭhāsa’’nti yojanā.
ปเรสนฺติ น อนนฺตรานํฯ สเพฺพสํ…เป.… โยเชตพฺพา ‘‘สเพฺพ โพชฺฌงฺคา สเพฺพสํ ปจฺจยวิเสสา โหนฺติเยวา’’ติฯ กาเมตีติ กาโม, อสฺสาทนวเสน อามสตีติ อามิสํ, กาโมว อามิสนฺติ กามามิสํ, กิเลสกาโมฯ วตฺถุกาโม ปน อามสียตีติ อามิสํฯ เอวํ เสสทฺวยมฺปิฯ เตสุ โลกียนฺติ เอตฺถ สุขวิเสสาติ โลโก, อุปปตฺติวิเสโสฯ วฎฺฎํ สํสาโรฯ กามสฺสาทวเสน ปวโตฺต โลโภ กามามิสํฯ ภววิเสสปตฺถนาวเสน ปวโตฺต โลกามิสํฯ วิภโว นาม กิมตฺถิโย, โก วา ตํ อภิปเตฺถยฺยาติ วฎฺฎานุเคธภูโต โลโภ วฎฺฎามิสนฺติ จ วทนฺติฯ ตทารมฺมณนฺติ ตสฺสา ตณฺหาย อารมฺมณํ, รูปาทิฯ โลกธมฺมา ลาภาทโยฯ วุตฺตาวเสสา สพฺพาว ตณฺหา สํสารชนโก ราโคฯ
Paresanti na anantarānaṃ. Sabbesaṃ…pe… yojetabbā ‘‘sabbe bojjhaṅgā sabbesaṃ paccayavisesā hontiyevā’’ti. Kāmetīti kāmo, assādanavasena āmasatīti āmisaṃ, kāmova āmisanti kāmāmisaṃ, kilesakāmo. Vatthukāmo pana āmasīyatīti āmisaṃ. Evaṃ sesadvayampi. Tesu lokīyanti ettha sukhavisesāti loko, upapattiviseso. Vaṭṭaṃ saṃsāro. Kāmassādavasena pavatto lobho kāmāmisaṃ. Bhavavisesapatthanāvasena pavatto lokāmisaṃ. Vibhavo nāma kimatthiyo, ko vā taṃ abhipattheyyāti vaṭṭānugedhabhūto lobho vaṭṭāmisanti ca vadanti. Tadārammaṇanti tassā taṇhāya ārammaṇaṃ, rūpādi. Lokadhammā lābhādayo. Vuttāvasesā sabbāva taṇhā saṃsārajanako rāgo.
ปฐมนยวณฺณนา นิฎฺฐิตาฯ
Paṭhamanayavaṇṇanā niṭṭhitā.
ทุติยนยวณฺณนา
Dutiyanayavaṇṇanā
๔๖๘-๙. สเพฺพ สตฺตาติ กามภวาทีสุ, สญฺญีภวาทีสุ, เอกโวการภวาทีสุ จ สพฺพภเวสุ สเพฺพ สตฺตาฯ อาหารโต ฐิติ เอเตสนฺติ อาหารฎฺฐิติกา, ปจฺจยฎฺฐิติกาฯ เยน ปจฺจเยน เต ติฎฺฐนฺติ, โส เอโกว ธโมฺม ญาตปริญฺญาสงฺขาตาย ‘‘อาหารฎฺฐิติกา’’ติ อภิญฺญาย อภิเญฺญโยฺยฯ เทฺว ธาตุโยติ สงฺขตาสงฺขตธาตุโยฯ ติโสฺส ธาตุโยติ กามธาตุรูปธาตุอรูปธาตุโยฯ ปญฺจ วิมุตฺตายตนานีติ ‘‘อิธ, ภิกฺขเว, ภิกฺขุโน สตฺถา ธมฺมํ เทเสติ อญฺญตโร วา ครุฎฺฐานิโย’’ติอาทินา (ที. นิ. ๓.๓๒๒, ๓๕๕; อ. นิ. ๕.๒๖) อาคตานิ วิมุจฺจนการณานิฯ อนุตฺตริยานีติ ทสฺสนานุตฺตริยาทีนิ ฉ อนุตฺตริยานิฯ นิทฺทสวตฺถูนีติ เยหิ การเณหิ นิทฺทโส โหติ, ตานิ นิทฺทสวตฺถูนิ นามฯ เทสนามตฺตเญฺจตํฯ ขีณาสโว หิ ทสวโสฺส หุตฺวา ปรินิพฺพุโต ปุน ทสวโสฺส น โหติฯ น เกวลญฺจ ทสวโสฺส, นววโสฺสปิ…เป.… เอกมุหุตฺติโกปิ น โหติเยว ปุน ปฎิสนฺธิยา อภาวา, อฎฺฐุปฺปตฺติวเสน ปเนวํ วุตฺตํฯ ตานิ ปน ‘‘อิธ, ภิกฺขุ, สิกฺขาสมาทาเน ติพฺพจฺฉโนฺท โหตี’’ติอาทินา (ที. นิ. ๓.๓๓๑) สุเตฺต อาคตานิเยวฯ ‘‘สมฺมาทิฎฺฐิสฺส ปุริสปุคฺคลสฺส มิจฺฉาทิฎฺฐิ นิชฺชิณฺณา โหตี’’ติอาทีนิ (ที. นิ. ๓.๓๖๐; อ. นิ. ๑๐.๑๐๖) ทส นิชฺชรวตฺถูนิฯ ขนฺธาทโยติ ขนฺธายตนธาตาทโยฯ วินนฺธนนฺติ ‘‘ภวาทิวินนฺธนเฎฺฐน วานํ วุจฺจติ ตณฺหา’’ติ ทเสฺสติฯ คมนนฺติ อสฺสาทนวเสน อารมฺมเณ ปวตฺติมาหฯ เตน วุตฺตํ ‘‘ปิยรูปสาตรูเปสู’’ติฯ
468-9. Sabbe sattāti kāmabhavādīsu, saññībhavādīsu, ekavokārabhavādīsu ca sabbabhavesu sabbe sattā. Āhārato ṭhiti etesanti āhāraṭṭhitikā, paccayaṭṭhitikā. Yena paccayena te tiṭṭhanti, so ekova dhammo ñātapariññāsaṅkhātāya ‘‘āhāraṭṭhitikā’’ti abhiññāya abhiññeyyo. Dve dhātuyoti saṅkhatāsaṅkhatadhātuyo. Tisso dhātuyoti kāmadhāturūpadhātuarūpadhātuyo. Pañca vimuttāyatanānīti ‘‘idha, bhikkhave, bhikkhuno satthā dhammaṃ deseti aññataro vā garuṭṭhāniyo’’tiādinā (dī. ni. 3.322, 355; a. ni. 5.26) āgatāni vimuccanakāraṇāni. Anuttariyānīti dassanānuttariyādīni cha anuttariyāni. Niddasavatthūnīti yehi kāraṇehi niddaso hoti, tāni niddasavatthūni nāma. Desanāmattañcetaṃ. Khīṇāsavo hi dasavasso hutvā parinibbuto puna dasavasso na hoti. Na kevalañca dasavasso, navavassopi…pe… ekamuhuttikopi na hotiyeva puna paṭisandhiyā abhāvā, aṭṭhuppattivasena panevaṃ vuttaṃ. Tāni pana ‘‘idha, bhikkhu, sikkhāsamādāne tibbacchando hotī’’tiādinā (dī. ni. 3.331) sutte āgatāniyeva. ‘‘Sammādiṭṭhissa purisapuggalassa micchādiṭṭhi nijjiṇṇā hotī’’tiādīni (dī. ni. 3.360; a. ni. 10.106) dasa nijjaravatthūni. Khandhādayoti khandhāyatanadhātādayo. Vinandhananti ‘‘bhavādivinandhanaṭṭhena vānaṃ vuccati taṇhā’’ti dasseti. Gamananti assādanavasena ārammaṇe pavattimāha. Tena vuttaṃ ‘‘piyarūpasātarūpesū’’ti.
วิปสฺสนาสหคตนฺติ เวทิตพฺพํ วิญฺญตฺติสมุฎฺฐาปกตฺตาฯ ‘‘มคฺคํ อปฺปตฺตํ กายิกํ วีริย’’นฺติ วิเสเสตฺวา วุตฺตตฺตา ปน โลกุตฺตรวีริยมฺปิ ปริยาเยน กายิกํ นาม อตฺถีติ ทีปิตํ โหติฯ
Vipassanāsahagatanti veditabbaṃ viññattisamuṭṭhāpakattā. ‘‘Maggaṃ appattaṃ kāyikaṃ vīriya’’nti visesetvā vuttattā pana lokuttaravīriyampi pariyāyena kāyikaṃ nāma atthīti dīpitaṃ hoti.
รูปาวจเร ปีติสโมฺพชฺฌโงฺคติ น วุจฺจตีติ อาห ‘‘รูปาวจเร…เป.… ปฎิกฺขิตฺตา’’ติฯ ยถา วิปสฺสนาสหคตา ปีติ ปริยาเยน ‘‘ปีติสโมฺพชฺฌโงฺค’’ติ วุจฺจติ, เอวํ รูปาวจเร ปีติ นิเพฺพธภาคิยา วตฺตพฺพา สิยาฯ เอวํ ลพฺภมานาปิ อลพฺภมานํ อุปาทาย น วุตฺตาฯ ‘‘อวิตกฺกอวิจารา’’ติ วิเสสนํ สนฺตปณีตาย ปีติยา ทสฺสนตฺถํฯ โพชฺฌงฺคภูตาติ ปริยายโพชฺฌงฺคภูตาฯ อวิตกฺกอวิจาโร ปีติ…เป.… น วุโตฺต สวิตกฺกสวิจารตฺตา ตสฺสฯ น หิ กามาวจรา อวิตกฺกอวิจารา ปีติ อตฺถิฯ
Rūpāvacare pītisambojjhaṅgoti na vuccatīti āha ‘‘rūpāvacare…pe… paṭikkhittā’’ti. Yathā vipassanāsahagatā pīti pariyāyena ‘‘pītisambojjhaṅgo’’ti vuccati, evaṃ rūpāvacare pīti nibbedhabhāgiyā vattabbā siyā. Evaṃ labbhamānāpi alabbhamānaṃ upādāya na vuttā. ‘‘Avitakkaavicārā’’ti visesanaṃ santapaṇītāya pītiyā dassanatthaṃ. Bojjhaṅgabhūtāti pariyāyabojjhaṅgabhūtā. Avitakkaavicāro pīti…pe… na vutto savitakkasavicārattā tassa. Na hi kāmāvacarā avitakkaavicārā pīti atthi.
อิธ วุโตฺต ปริยาเยนาติ อโตฺถฯ มคฺคปฎิเวธานุโลมนโต วิปสฺสนาย วิย ปาทกชฺฌาเนสุปิ สติอาทโย ‘‘โพชฺฌงฺคา’’เตฺวว วุจฺจนฺตีติ อาห ‘‘นิเพฺพธภาคิยตฺตา น ปฎิกฺขิปิตโพฺพ’’ติฯ เอวํ กสิณชฺฌานาทีสุ โพชฺฌเงฺค อุทฺธรนฺตานํ อธิปฺปายํ วตฺวา อนุทฺธรนฺตานํ อธิปฺปายํ วตฺตุํ ‘‘อนุทฺธรนฺตา ปนา’’ติอาทิมาหฯ เต หิ อาสเนฺนกนฺตกิจฺจนิพฺพตฺตีหิ วิปสฺสนากฺขเณ โพชฺฌเงฺค อุทฺธรนฺติ, น ฌานกฺขเณ ตทภาวโตฯ เตนาห ‘‘วิปสฺสนากิจฺจสฺส วิย…เป.… น อุทฺธรนฺตี’’ติฯ กสิณนิสฺสโนฺท อรูปานีติ อาห ‘‘ตทายตฺตานี’’ติฯ
Idha vutto pariyāyenāti attho. Maggapaṭivedhānulomanato vipassanāya viya pādakajjhānesupi satiādayo ‘‘bojjhaṅgā’’tveva vuccantīti āha ‘‘nibbedhabhāgiyattā na paṭikkhipitabbo’’ti. Evaṃ kasiṇajjhānādīsu bojjhaṅge uddharantānaṃ adhippāyaṃ vatvā anuddharantānaṃ adhippāyaṃ vattuṃ ‘‘anuddharantā panā’’tiādimāha. Te hi āsannekantakiccanibbattīhi vipassanākkhaṇe bojjhaṅge uddharanti, na jhānakkhaṇe tadabhāvato. Tenāha ‘‘vipassanākiccassa viya…pe… na uddharantī’’ti. Kasiṇanissando arūpānīti āha ‘‘tadāyattānī’’ti.
ทุติยนยวณฺณนา นิฎฺฐิตาฯ
Dutiyanayavaṇṇanā niṭṭhitā.
ตติยนยวณฺณนา
Tatiyanayavaṇṇanā
๔๗๐-๑. โวสฺสชฺชนํ ปหานํ โวสฺสโคฺค, โวสฺสชฺชนํ วา วิสฺสฎฺฐภาโว นิราสงฺกานุปฺปเวโสติ อาห ‘‘โวสฺสคฺคสโทฺท…เป.… ทุวิธตา วุตฺตา’’ติฯ วิปสฺสนากฺขเณ ตทงฺคตนฺนินฺนปฺปกาเรน, มคฺคกฺขเณ สมุเจฺฉทตทารมฺมณกรณปฺปกาเรนฯ
470-1. Vossajjanaṃ pahānaṃ vossaggo, vossajjanaṃ vā vissaṭṭhabhāvo nirāsaṅkānuppavesoti āha ‘‘vossaggasaddo…pe… duvidhatā vuttā’’ti. Vipassanākkhaṇe tadaṅgatanninnappakārena, maggakkhaṇe samucchedatadārammaṇakaraṇappakārena.
ตติยนยวณฺณนา นิฎฺฐิตาฯ
Tatiyanayavaṇṇanā niṭṭhitā.
สุตฺตนฺตภาชนียวณฺณนา นิฎฺฐิตาฯ
Suttantabhājanīyavaṇṇanā niṭṭhitā.
๒. อภิธมฺมภาชนียวณฺณนา
2. Abhidhammabhājanīyavaṇṇanā
๔๗๒. อุเปกฺขนมุเปกฺขาสโมฺพชฺฌงฺคสฺส สภาโว, โส จ สมาธิวีริยสโมฺพชฺฌโงฺค วิย สมฺปยุตฺตานํ อูนาธิกภาวพฺยาวโฎ อหุตฺวา เตสํ อนูนานธิกภาเว มชฺฌตฺตาการปฺปวตฺตีติ อิมมตฺถํ อาห ‘‘อุเปกฺขนวเสนา’’ติอาทินาฯ ตตฺถ อุปปตฺติโต อิกฺขนนฺติ ปฎิสงฺขานมาหฯ
472. Upekkhanamupekkhāsambojjhaṅgassa sabhāvo, so ca samādhivīriyasambojjhaṅgo viya sampayuttānaṃ ūnādhikabhāvabyāvaṭo ahutvā tesaṃ anūnānadhikabhāve majjhattākārappavattīti imamatthaṃ āha ‘‘upekkhanavasenā’’tiādinā. Tattha upapattito ikkhananti paṭisaṅkhānamāha.
อภิธมฺมภาชนียวณฺณนา นิฎฺฐิตาฯ
Abhidhammabhājanīyavaṇṇanā niṭṭhitā.
โพชฺฌงฺควิภงฺควณฺณนา นิฎฺฐิตาฯ
Bojjhaṅgavibhaṅgavaṇṇanā niṭṭhitā.
Related texts:
ติปิฎก (มูล) • Tipiṭaka (Mūla) / อภิธมฺมปิฎก • Abhidhammapiṭaka / วิภงฺคปาฬิ • Vibhaṅgapāḷi / ๑๐. โพชฺฌงฺควิภโงฺค • 10. Bojjhaṅgavibhaṅgo
อฎฺฐกถา • Aṭṭhakathā / อภิธมฺมปิฎก (อฎฺฐกถา) • Abhidhammapiṭaka (aṭṭhakathā) / สโมฺมหวิโนทนี-อฎฺฐกถา • Sammohavinodanī-aṭṭhakathā
๑. สุตฺตนฺตภาชนียวณฺณนา • 1. Suttantabhājanīyavaṇṇanā
๒. อภิธมฺมภาชนียวณฺณนา • 2. Abhidhammabhājanīyavaṇṇanā
ฎีกา • Tīkā / อภิธมฺมปิฎก (ฎีกา) • Abhidhammapiṭaka (ṭīkā) / วิภงฺค-มูลฎีกา • Vibhaṅga-mūlaṭīkā / ๑๐. โพชฺฌงฺควิภโงฺค • 10. Bojjhaṅgavibhaṅgo
