| Library / Tipiṭaka / திபிடக • Tipiṭaka / கதா²வத்து²பாளி • Kathāvatthupāḷi |
3. ப்³ரஹ்மசரியகதா²
3. Brahmacariyakathā
1. ஸுத்³த⁴ப்³ரஹ்மசரியகதா²
1. Suddhabrahmacariyakathā
269. நத்தி² தே³வேஸு ப்³ரஹ்மசரியவாஸோதி? ஆமந்தா. ஸப்³பே³ தே³வா ஜளா ஏலமூகா³ 1 அவிஞ்ஞூ ஹத்த²ஸங்வாசிகா நப்படிப³லா ஸுபா⁴ஸிதது³ப்³பா⁴ஸிதானங் அத்த²மஞ்ஞாதுங், ஸப்³பே³ தே³வா ந பு³த்³தே⁴ பஸன்னா ந த⁴ம்மே பஸன்னா ந ஸங்கே⁴ பஸன்னா, ந பு³த்³த⁴ங் ப⁴க³வந்தங் பயிருபாஸந்தி, ந பு³த்³த⁴ங் ப⁴க³வந்தங் பஞ்ஹங் புச்ச²ந்தி, ந பு³த்³தே⁴ன ப⁴க³வதா பஞ்ஹே விஸ்ஸஜ்ஜிதே அத்தமனா, ஸப்³பே³ தே³வா கம்மாவரணேன ஸமன்னாக³தா கிலேஸாவரணேன ஸமன்னாக³தா விபாகாவரணேன ஸமன்னாக³தா அஸ்ஸத்³தா⁴ அச்ச²ந்தி³கா து³ப்பஞ்ஞா அப⁴ப்³பா³ நியாமங் ஓக்கமிதுங் குஸலேஸு த⁴ம்மேஸு ஸம்மத்தங், ஸப்³பே³ தே³வா மாதுகா⁴தகா பிதுகா⁴தகா அரஹந்தகா⁴தகா ருஹிருப்பாத³கா ஸங்க⁴பே⁴த³கா, ஸப்³பே³ தே³வா பாணாதிபாதினோ அதி³ன்னாதா³யினோ காமேஸுமிச்சா²சாரினோ முஸாவாதி³னோ பிஸுணவாசா ப²ருஸாவாசா ஸம்ப²ப்பலாபினோ அபி⁴ஜ்ஜா²லுனோ ப்³யாபன்னசித்தா மிச்சா²தி³ட்டி²காதி? ந ஹேவங் வத்தப்³பே³…பே॰….
269. Natthi devesu brahmacariyavāsoti? Āmantā. Sabbe devā jaḷā elamūgā 2 aviññū hatthasaṃvācikā nappaṭibalā subhāsitadubbhāsitānaṃ atthamaññātuṃ, sabbe devā na buddhe pasannā na dhamme pasannā na saṅghe pasannā, na buddhaṃ bhagavantaṃ payirupāsanti, na buddhaṃ bhagavantaṃ pañhaṃ pucchanti, na buddhena bhagavatā pañhe vissajjite attamanā, sabbe devā kammāvaraṇena samannāgatā kilesāvaraṇena samannāgatā vipākāvaraṇena samannāgatā assaddhā acchandikā duppaññā abhabbā niyāmaṃ okkamituṃ kusalesu dhammesu sammattaṃ, sabbe devā mātughātakā pitughātakā arahantaghātakā ruhiruppādakā saṅghabhedakā, sabbe devā pāṇātipātino adinnādāyino kāmesumicchācārino musāvādino pisuṇavācā pharusāvācā samphappalāpino abhijjhāluno byāpannacittā micchādiṭṭhikāti? Na hevaṃ vattabbe…pe….
நனு அத்தி² தே³வா அஜளா அனேலமூகா³ விஞ்ஞூ ந ஹத்த²ஸங்வாசிகா படிப³லா ஸுபா⁴ஸிதது³ப்³பா⁴ஸிதானங் அத்த²மஞ்ஞாதுங், அத்தி² தே³வா பு³த்³தே⁴ பஸன்னா த⁴ம்மே பஸன்னா ஸங்கே⁴ பஸன்னா, பு³த்³த⁴ங் ப⁴க³வந்தங் பயிருபாஸந்தி, பு³த்³த⁴ங் ப⁴க³வந்தங் பஞ்ஹங் புச்ச²ந்தி, பு³த்³தே⁴ன ப⁴க³வதா பஞ்ஹே விஸ்ஸஜ்ஜிதே அத்தமனா ஹொந்தி, அத்தி² தே³வா ந கம்மாவரணேன ஸமன்னாக³தா ந கிலேஸாவரணேன ஸமன்னாக³தா ந விபாகாவரணேன ஸமன்னாக³தா ஸத்³தா⁴ ச²ந்தி³கா பஞ்ஞவந்தோ ப⁴ப்³பா³ நியாமங் ஓக்கமிதுங் குஸலேஸு த⁴ம்மேஸு ஸம்மத்தங், அத்தி² தே³வா ந மாதுகா⁴தகா ந பிதுகா⁴தகா ந அரஹந்தகா⁴தகா ந ருஹிருப்பாத³கா ந ஸங்க⁴பே⁴த³கா, அத்தி² தே³வா ந பாணாதிபாதினோ ந அதி³ன்னாதா³யினோ ந காமேஸுமிச்சா²சாரினோ ந முஸாவாதி³னோ ந பிஸுணாவாசா ந ப²ருஸாவாசா ந ஸம்ப²ப்பலாபினோ ந அபி⁴ஜ்ஜா²லுனோ அப்³யாபன்னசித்தா ஸம்மாதி³ட்டி²காதி? ஆமந்தா.
Nanu atthi devā ajaḷā anelamūgā viññū na hatthasaṃvācikā paṭibalā subhāsitadubbhāsitānaṃ atthamaññātuṃ, atthi devā buddhe pasannā dhamme pasannā saṅghe pasannā, buddhaṃ bhagavantaṃ payirupāsanti, buddhaṃ bhagavantaṃ pañhaṃ pucchanti, buddhena bhagavatā pañhe vissajjite attamanā honti, atthi devā na kammāvaraṇena samannāgatā na kilesāvaraṇena samannāgatā na vipākāvaraṇena samannāgatā saddhā chandikā paññavanto bhabbā niyāmaṃ okkamituṃ kusalesu dhammesu sammattaṃ, atthi devā na mātughātakā na pitughātakā na arahantaghātakā na ruhiruppādakā na saṅghabhedakā, atthi devā na pāṇātipātino na adinnādāyino na kāmesumicchācārino na musāvādino na pisuṇāvācā na pharusāvācā na samphappalāpino na abhijjhāluno abyāpannacittā sammādiṭṭhikāti? Āmantā.
ஹஞ்சி அத்தி² தே³வா அஜளா அனேலமூகா³ விஞ்ஞூ ந ஹத்த²ஸங்வாசிகா படிப³லா ஸுபா⁴ஸிதது³ப்³பா⁴ஸிதானங் அத்த²மஞ்ஞாதுங்…பே॰… அத்தி² தே³வா பு³த்³தே⁴ பஸன்னா…பே॰… ஸம்மாதி³ட்டி²கா, நோ ச வத ரே வத்தப்³பே³ – ‘‘நத்தி² தே³வேஸு ப்³ரஹ்மசரியவாஸோ’’தி.
Hañci atthi devā ajaḷā anelamūgā viññū na hatthasaṃvācikā paṭibalā subhāsitadubbhāsitānaṃ atthamaññātuṃ…pe… atthi devā buddhe pasannā…pe… sammādiṭṭhikā, no ca vata re vattabbe – ‘‘natthi devesu brahmacariyavāso’’ti.
270. அத்தி² தே³வேஸு ப்³ரஹ்மசரியவாஸோதி? ஆமந்தா. அத்தி² தத்த² பப்³ப³ஜ்ஜா முண்டி³யங் காஸாவதா⁴ரணா பத்ததா⁴ரணா, தே³வேஸு ஸம்மாஸம்பு³த்³தா⁴ உப்பஜ்ஜந்தி, பச்சேகஸம்பு³த்³தா⁴ உப்பஜ்ஜந்தி, ஸாவகயுக³ங் உப்பஜ்ஜதீதி? ந ஹேவங் வத்தப்³பே³…பே॰….
270. Atthi devesu brahmacariyavāsoti? Āmantā. Atthi tattha pabbajjā muṇḍiyaṃ kāsāvadhāraṇā pattadhāraṇā, devesu sammāsambuddhā uppajjanti, paccekasambuddhā uppajjanti, sāvakayugaṃ uppajjatīti? Na hevaṃ vattabbe…pe….
தே³வேஸு பப்³ப³ஜ்ஜா நத்தீ²தி, நத்தி² தே³வேஸு ப்³ரஹ்மசரியவாஸோதி? ஆமந்தா. யத்த² அத்தி² பப்³ப³ஜ்ஜா தத்தே²வ ப்³ரஹ்மசரியவாஸோ, யத்த² நத்தி² பப்³ப³ஜ்ஜா நத்தி² தத்த² ப்³ரஹ்மசரியவாஸோதி? ந ஹேவங் வத்தப்³பே³…பே॰… யத்த² அத்தி² பப்³ப³ஜ்ஜா தத்தே²வ ப்³ரஹ்மசரியவாஸோ, யத்த² நத்தி² பப்³ப³ஜ்ஜா நத்தி² தத்த² ப்³ரஹ்மசரியவாஸோதி? ஆமந்தா. யோ பப்³ப³ஜதி தஸ்ஸேவ ப்³ரஹ்மசரியவாஸோ, யோ ந பப்³ப³ஜதி நத்தி² தஸ்ஸ ப்³ரஹ்மசரியவாஸோதி? ந ஹேவங் வத்தப்³பே³…பே॰….
Devesu pabbajjā natthīti, natthi devesu brahmacariyavāsoti? Āmantā. Yattha atthi pabbajjā tattheva brahmacariyavāso, yattha natthi pabbajjā natthi tattha brahmacariyavāsoti? Na hevaṃ vattabbe…pe… yattha atthi pabbajjā tattheva brahmacariyavāso, yattha natthi pabbajjā natthi tattha brahmacariyavāsoti? Āmantā. Yo pabbajati tasseva brahmacariyavāso, yo na pabbajati natthi tassa brahmacariyavāsoti? Na hevaṃ vattabbe…pe….
தே³வேஸு முண்டி³யங் நத்தீ²தி, நத்தி² தே³வேஸு ப்³ரஹ்மசரியவாஸோதி? ஆமந்தா. யத்த² அத்தி² முண்டி³யங் தத்தே²வ ப்³ரஹ்மசரியவாஸோ, யத்த² நத்தி² முண்டி³யங் நத்தி² தத்த² ப்³ரஹ்மசரியவாஸோதி? ந ஹேவங் வத்தப்³பே³…பே॰… யத்த² அத்தி² முண்டி³யங் தத்தே²வ ப்³ரஹ்மசரியவாஸோ, யத்த² நத்தி² முண்டி³யங் நத்தி² தத்த² ப்³ரஹ்மசரியவாஸோதி? ஆமந்தா. யோ முண்டோ³ ஹோதி தஸ்ஸேவ ப்³ரஹ்மசரியவாஸோ, யோ முண்டோ³ ந ஹோதி நத்தி² தஸ்ஸ ப்³ரஹ்மசரியவாஸோதி? ந ஹேவங் வத்தப்³பே³…பே॰….
Devesu muṇḍiyaṃ natthīti, natthi devesu brahmacariyavāsoti? Āmantā. Yattha atthi muṇḍiyaṃ tattheva brahmacariyavāso, yattha natthi muṇḍiyaṃ natthi tattha brahmacariyavāsoti? Na hevaṃ vattabbe…pe… yattha atthi muṇḍiyaṃ tattheva brahmacariyavāso, yattha natthi muṇḍiyaṃ natthi tattha brahmacariyavāsoti? Āmantā. Yo muṇḍo hoti tasseva brahmacariyavāso, yo muṇḍo na hoti natthi tassa brahmacariyavāsoti? Na hevaṃ vattabbe…pe….
தே³வேஸு காஸாவதா⁴ரணா நத்தீ²தி, நத்தி² தே³வேஸு ப்³ரஹ்மசரியவாஸோதி? ஆமந்தா. யத்த² அத்தி² காஸாவதா⁴ரணா தத்தே²வ ப்³ரஹ்மசரியவாஸோ, யத்த² நத்தி² காஸாவதா⁴ரணா நத்தி² தத்த² ப்³ரஹ்மசரியவாஸோதி? ந ஹேவங் வத்தப்³பே³…பே॰… யத்த² அத்தி² காஸாவதா⁴ரணா தத்தே²வ ப்³ரஹ்மசரியவாஸோ, யத்த² நத்தி² காஸாவதா⁴ரணா நத்தி² தத்த² ப்³ரஹ்மசரியவாஸோதி? ஆமந்தா. யோ காஸாவங் தா⁴ரேதி தஸ்ஸேவ ப்³ரஹ்மசரியவாஸோ, யோ காஸாவங் ந தா⁴ரேதி நத்தி² தஸ்ஸ ப்³ரஹ்மசரியவாஸோதி? ந ஹேவங் வத்தப்³பே³…பே॰….
Devesu kāsāvadhāraṇā natthīti, natthi devesu brahmacariyavāsoti? Āmantā. Yattha atthi kāsāvadhāraṇā tattheva brahmacariyavāso, yattha natthi kāsāvadhāraṇā natthi tattha brahmacariyavāsoti? Na hevaṃ vattabbe…pe… yattha atthi kāsāvadhāraṇā tattheva brahmacariyavāso, yattha natthi kāsāvadhāraṇā natthi tattha brahmacariyavāsoti? Āmantā. Yo kāsāvaṃ dhāreti tasseva brahmacariyavāso, yo kāsāvaṃ na dhāreti natthi tassa brahmacariyavāsoti? Na hevaṃ vattabbe…pe….
தே³வேஸு பத்ததா⁴ரணா நத்தீ²தி, நத்தி² தே³வேஸு ப்³ரஹ்மசரியவாஸோதி? ஆமந்தா. யத்த² அத்தி² பத்ததா⁴ரணா தத்தே²வ ப்³ரஹ்மசரியவாஸோ, யத்த² நத்தி² பத்ததா⁴ரணா நத்தி² தத்த² ப்³ரஹ்மசரியவாஸோதி? ந ஹேவங் வத்தப்³பே³…பே॰… யத்த² அத்தி² பத்ததா⁴ரணா தத்தே²வ ப்³ரஹ்மசரியவாஸோ, யத்த² நத்தி² பத்ததா⁴ரணா நத்தி² தத்த² ப்³ரஹ்மசரியவாஸோதி? ஆமந்தா? யோ பத்தங் தா⁴ரேதி தஸ்ஸேவ ப்³ரஹ்மசரியவாஸோ, யோ பத்தங் ந தா⁴ரேதி நத்தி² தஸ்ஸ ப்³ரஹ்மசரியவாஸோதி? ந ஹேவங் வத்தப்³பே³…பே॰….
Devesu pattadhāraṇā natthīti, natthi devesu brahmacariyavāsoti? Āmantā. Yattha atthi pattadhāraṇā tattheva brahmacariyavāso, yattha natthi pattadhāraṇā natthi tattha brahmacariyavāsoti? Na hevaṃ vattabbe…pe… yattha atthi pattadhāraṇā tattheva brahmacariyavāso, yattha natthi pattadhāraṇā natthi tattha brahmacariyavāsoti? Āmantā? Yo pattaṃ dhāreti tasseva brahmacariyavāso, yo pattaṃ na dhāreti natthi tassa brahmacariyavāsoti? Na hevaṃ vattabbe…pe….
தே³வேஸு ஸம்மாஸம்பு³த்³தா⁴ நுப்பஜ்ஜந்தீதி, நத்தி² தே³வேஸு ப்³ரஹ்மசரியவாஸோதி ? ஆமந்தா. யத்த² ஸம்மாஸம்பு³த்³தா⁴ உப்பஜ்ஜந்தி தத்தே²வ ப்³ரஹ்மசரியவாஸோ, யத்த² ஸம்மாஸம்பு³த்³தா⁴ நுப்பஜ்ஜந்தி நத்தி² தத்த² ப்³ரஹ்மசரியவாஸோதி? ந ஹேவங் வத்தப்³பே³…பே॰… யத்த² ஸம்மாஸம்பு³த்³தா⁴ உப்பஜ்ஜந்தி தத்தே²வ ப்³ரஹ்மசரியவாஸோ, யத்த² ஸம்மாஸம்பு³த்³தா⁴ நுப்பஜ்ஜந்தி நத்தி² தத்த² ப்³ரஹ்மசரியவாஸோதி? ஆமந்தா . லும்பி³னியா ப⁴க³வா ஜாதோ, போ³தி⁴யா மூலே அபி⁴ஸம்பு³த்³தோ⁴, பா³ராணஸியங் ப⁴க³வதா த⁴ம்மசக்கங் பவத்திதங்; தத்தே²வ ப்³ரஹ்மசரியவாஸோ, நத்த²ஞ்ஞத்ர ப்³ரஹ்மசரியவாஸோதி? ந ஹேவங் வத்தப்³பே³…பே॰….
Devesu sammāsambuddhā nuppajjantīti, natthi devesu brahmacariyavāsoti ? Āmantā. Yattha sammāsambuddhā uppajjanti tattheva brahmacariyavāso, yattha sammāsambuddhā nuppajjanti natthi tattha brahmacariyavāsoti? Na hevaṃ vattabbe…pe… yattha sammāsambuddhā uppajjanti tattheva brahmacariyavāso, yattha sammāsambuddhā nuppajjanti natthi tattha brahmacariyavāsoti? Āmantā . Lumbiniyā bhagavā jāto, bodhiyā mūle abhisambuddho, bārāṇasiyaṃ bhagavatā dhammacakkaṃ pavattitaṃ; tattheva brahmacariyavāso, natthaññatra brahmacariyavāsoti? Na hevaṃ vattabbe…pe….
தே³வேஸு பச்சேகஸம்பு³த்³தா⁴ நுப்பஜ்ஜந்தீதி, நத்தி² தே³வேஸு ப்³ரஹ்மசரியவாஸோதி? ஆமந்தா. யத்த² பச்சேகஸம்பு³த்³தா⁴ உப்பஜ்ஜந்தி தத்தே²வ ப்³ரஹ்மசரியவாஸோ, யத்த² பச்சேகஸம்பு³த்³தா⁴ நுப்பஜ்ஜந்தி நத்தி² தத்த² ப்³ரஹ்மசரியவாஸோதி? ந ஹேவங் வத்தப்³பே³…பே॰… யத்த² பச்சேகஸம்பு³த்³தா⁴ உப்பஜ்ஜந்தி தத்தே²வ ப்³ரஹ்மசரியவாஸோ, யத்த² பச்சேகஸம்பு³த்³தா⁴ நுப்பஜ்ஜந்தி நத்தி² தத்த² ப்³ரஹ்மசரியவாஸோதி? ஆமந்தா. மஜ்ஜி²மேஸு ஜனபதே³ஸு பச்சேகஸம்பு³த்³தா⁴ உப்பஜ்ஜந்தி, தத்தே²வ ப்³ரஹ்மசரியவாஸோ, நத்த²ஞ்ஞத்ர ப்³ரஹ்மசரியவாஸோதி? ந ஹேவங் வத்தப்³பே³…பே॰….
Devesu paccekasambuddhā nuppajjantīti, natthi devesu brahmacariyavāsoti? Āmantā. Yattha paccekasambuddhā uppajjanti tattheva brahmacariyavāso, yattha paccekasambuddhā nuppajjanti natthi tattha brahmacariyavāsoti? Na hevaṃ vattabbe…pe… yattha paccekasambuddhā uppajjanti tattheva brahmacariyavāso, yattha paccekasambuddhā nuppajjanti natthi tattha brahmacariyavāsoti? Āmantā. Majjhimesu janapadesu paccekasambuddhā uppajjanti, tattheva brahmacariyavāso, natthaññatra brahmacariyavāsoti? Na hevaṃ vattabbe…pe….
தே³வேஸு ஸாவகயுக³ங் நுப்பஜ்ஜதீதி, நத்தி² தே³வேஸு ப்³ரஹ்மசரியவாஸோதி? ஆமந்தா. யத்த² ஸாவகயுக³ங் உப்பஜ்ஜதி தத்தே²வ ப்³ரஹ்மசரியவாஸோ, யத்த² ஸாவகயுக³ங் நுப்பஜ்ஜதி நத்தி² தத்த² ப்³ரஹ்மசரியவாஸோதி? ந ஹேவங் வத்தப்³பே³…பே॰… யத்த² ஸாவகயுக³ங் உப்பஜ்ஜதி தத்தே²வ ப்³ரஹ்மசரியவாஸோ, யத்த² ஸாவகயுக³ங் நுப்பஜ்ஜதி நத்தி² தத்த² ப்³ரஹ்மசரியவாஸோதி? ஆமந்தா. மக³தே⁴ஸு ஸாவகயுக³ங் உப்பன்னங், தத்தே²வ ப்³ரஹ்மசரியவாஸோ, நத்த²ஞ்ஞத்ர ப்³ரஹ்மசரியவாஸோதி? ந ஹேவங் வத்தப்³பே³…பே॰….
Devesu sāvakayugaṃ nuppajjatīti, natthi devesu brahmacariyavāsoti? Āmantā. Yattha sāvakayugaṃ uppajjati tattheva brahmacariyavāso, yattha sāvakayugaṃ nuppajjati natthi tattha brahmacariyavāsoti? Na hevaṃ vattabbe…pe… yattha sāvakayugaṃ uppajjati tattheva brahmacariyavāso, yattha sāvakayugaṃ nuppajjati natthi tattha brahmacariyavāsoti? Āmantā. Magadhesu sāvakayugaṃ uppannaṃ, tattheva brahmacariyavāso, natthaññatra brahmacariyavāsoti? Na hevaṃ vattabbe…pe….
271. அத்தி² தே³வேஸு ப்³ரஹ்மசரியவாஸோதி? ஆமந்தா . ஸப்³ப³தே³வேஸு அத்தி² ப்³ரஹ்மசரியவாஸோதி? ந ஹேவங் வத்தப்³பே³…பே॰….
271. Atthi devesu brahmacariyavāsoti? Āmantā . Sabbadevesu atthi brahmacariyavāsoti? Na hevaṃ vattabbe…pe….
அத்தி² மனுஸ்ஸேஸு ப்³ரஹ்மசரியவாஸோதி? ஆமந்தா. ஸப்³ப³மனுஸ்ஸேஸு அத்தி² ப்³ரஹ்மசரியவாஸோதி? ந ஹேவங் வத்தப்³பே³…பே॰….
Atthi manussesu brahmacariyavāsoti? Āmantā. Sabbamanussesu atthi brahmacariyavāsoti? Na hevaṃ vattabbe…pe….
அத்தி² தே³வேஸு ப்³ரஹ்மசரியவாஸோதி? ஆமந்தா. அஸஞ்ஞஸத்தேஸு தே³வேஸு அத்தி² ப்³ரஹ்மசரியவாஸோதி? ந ஹேவங் வத்தப்³பே³…பே॰….
Atthi devesu brahmacariyavāsoti? Āmantā. Asaññasattesu devesu atthi brahmacariyavāsoti? Na hevaṃ vattabbe…pe….
அத்தி² மனுஸ்ஸேஸு ப்³ரஹ்மசரியவாஸோதி? ஆமந்தா. பச்சந்திமேஸு ஜனபதே³ஸு அத்தி² ப்³ரஹ்மசரியவாஸோ மிலக்கே²ஸு 3 அவிஞ்ஞாதாரேஸு யத்த² நத்தி² க³தி பி⁴க்கூ²னங் பி⁴க்கு²னீனங் உபாஸகானங் உபாஸிகானந்தி? ந ஹேவங் வத்தப்³பே³.
Atthi manussesu brahmacariyavāsoti? Āmantā. Paccantimesu janapadesu atthi brahmacariyavāso milakkhesu 4 aviññātāresu yattha natthi gati bhikkhūnaṃ bhikkhunīnaṃ upāsakānaṃ upāsikānanti? Na hevaṃ vattabbe.
அத்தி² தே³வேஸு ப்³ரஹ்மசரியவாஸோதி? அத்தி² யத்த² அத்தி², அத்தி² யத்த² நத்தீ²தி. அஸஞ்ஞஸத்தேஸு தே³வேஸு அத்தி² யத்த² அத்தி², அத்தி² யத்த² நத்தி² ப்³ரஹ்மசரியவாஸோ, ஸஞ்ஞஸத்தேஸு 5 தே³வேஸு அத்தி² யத்த² அத்தி², அத்தி² யத்த² நத்தி² ப்³ரஹ்மசரியவாஸோதி? ந ஹேவங் வத்தப்³பே³.
Atthi devesu brahmacariyavāsoti? Atthi yattha atthi, atthi yattha natthīti. Asaññasattesu devesu atthi yattha atthi, atthi yattha natthi brahmacariyavāso, saññasattesu 6 devesu atthi yattha atthi, atthi yattha natthi brahmacariyavāsoti? Na hevaṃ vattabbe.
தே³வேஸு அத்தி² யத்த² அத்தி², அத்தி² யத்த² நத்தி² ப்³ரஹ்மசரியவாஸோதி? ஆமந்தா. கத்த² அத்தி², கத்த² நத்தீ²தி? அஸஞ்ஞஸத்தேஸு தே³வேஸு நத்தி² ப்³ரஹ்மசரியவாஸோ, ஸஞ்ஞஸத்தேஸு 7 தே³வேஸு அத்தி² ப்³ரஹ்மசரியவாஸோதி. அஸஞ்ஞஸத்தேஸு தே³வேஸு நத்தி² ப்³ரஹ்மசரியவாஸோதி? ஆமந்தா. ஸஞ்ஞஸத்தேஸு 8 தே³வேஸு நத்தி² ப்³ரஹ்மசரியவாஸோதி? ந ஹேவங் வத்தப்³பே³.
Devesu atthi yattha atthi, atthi yattha natthi brahmacariyavāsoti? Āmantā. Kattha atthi, kattha natthīti? Asaññasattesu devesu natthi brahmacariyavāso, saññasattesu 9 devesu atthi brahmacariyavāsoti. Asaññasattesu devesu natthi brahmacariyavāsoti? Āmantā. Saññasattesu 10 devesu natthi brahmacariyavāsoti? Na hevaṃ vattabbe.
ஸஞ்ஞஸத்தேஸு தே³வேஸு அத்தி² ப்³ரஹ்மசரியவாஸோதி? ஆமந்தா. அஸஞ்ஞஸத்தேஸு தே³வேஸு அத்தி² ப்³ரஹ்மசரியவாஸோதி? ந ஹேவங் வத்தப்³பே³.
Saññasattesu devesu atthi brahmacariyavāsoti? Āmantā. Asaññasattesu devesu atthi brahmacariyavāsoti? Na hevaṃ vattabbe.
அத்தி² மனுஸ்ஸேஸு ப்³ரஹ்மசரியவாஸோதி? அத்தி² யத்த² அத்தி², அத்தி² யத்த² நத்தீ²தி. பச்சந்திமேஸு ஜனபதே³ஸு அத்தி² யத்த² அத்தி², அத்தி² யத்த² நத்தி² ப்³ரஹ்மசரியவாஸோ மிலக்கே²ஸு அவிஞ்ஞாதாரேஸு யத்த² நத்தி² க³தி பி⁴க்கூ²னங் பி⁴க்கு²னீனங் உபாஸகானங் உபாஸிகானங், மஜ்ஜி²மேஸு ஜனபதே³ஸு அத்தி² யத்த² அத்தி², அத்தி² யத்த² நத்தி² ப்³ரஹ்மசரியவாஸோதி? ந ஹேவங் வத்தப்³பே³.
Atthi manussesu brahmacariyavāsoti? Atthi yattha atthi, atthi yattha natthīti. Paccantimesu janapadesu atthi yattha atthi, atthi yattha natthi brahmacariyavāso milakkhesu aviññātāresu yattha natthi gati bhikkhūnaṃ bhikkhunīnaṃ upāsakānaṃ upāsikānaṃ, majjhimesu janapadesu atthi yattha atthi, atthi yattha natthi brahmacariyavāsoti? Na hevaṃ vattabbe.
மனுஸ்ஸேஸு அத்தி² யத்த² அத்தி², அத்தி² யத்த² நத்தி² ப்³ரஹ்மசரியவாஸோதி? ஆமந்தா. கத்த² அத்தி², கத்த² நத்தீ²தி? பச்சந்திமேஸு ஜனபதே³ஸு நத்தி² ப்³ரஹ்மசரியவாஸோ மிலக்கே²ஸு அவிஞ்ஞாதாரேஸு யத்த² நத்தி² க³தி பி⁴க்கூ²னங் பி⁴க்கு²னீனங் உபாஸகானங் உபாஸிகானங், மஜ்ஜி²மேஸு ஜனபதே³ஸு அத்தி² ப்³ரஹ்மசரியவாஸோதி. பச்சந்திமேஸு ஜனபதே³ஸு நத்தி² ப்³ரஹ்மசரியவாஸோ மிலக்கே²ஸு அவிஞ்ஞாதாரேஸு யத்த² நத்தி² க³தி பி⁴க்கூ²னங் பி⁴க்கு²னீனங் உபாஸகானங் உபாஸிகானந்தி? ஆமந்தா. மஜ்ஜி²மேஸு ஜனபதே³ஸு நத்தி² ப்³ரஹ்மசரியவாஸோதி? ந ஹேவங் வத்தப்³பே³.
Manussesu atthi yattha atthi, atthi yattha natthi brahmacariyavāsoti? Āmantā. Kattha atthi, kattha natthīti? Paccantimesu janapadesu natthi brahmacariyavāso milakkhesu aviññātāresu yattha natthi gati bhikkhūnaṃ bhikkhunīnaṃ upāsakānaṃ upāsikānaṃ, majjhimesu janapadesu atthi brahmacariyavāsoti. Paccantimesu janapadesu natthi brahmacariyavāso milakkhesu aviññātāresu yattha natthi gati bhikkhūnaṃ bhikkhunīnaṃ upāsakānaṃ upāsikānanti? Āmantā. Majjhimesu janapadesu natthi brahmacariyavāsoti? Na hevaṃ vattabbe.
மஜ்ஜி²மேஸு ஜனபதே³ஸு அத்தி² ப்³ரஹ்மசரியவாஸோதி? ஆமந்தா. பச்சந்திமேஸு ஜனபதே³ஸு அத்தி² ப்³ரஹ்மசரியவாஸோ மிலக்கே²ஸு அவிஞ்ஞாதாரேஸு யத்த² நத்தி² க³தி பி⁴க்கூ²னங் பி⁴க்கு²னீனங் உபாஸகானங் உபாஸிகானந்தி? ந ஹேவங் வத்தப்³பே³.
Majjhimesu janapadesu atthi brahmacariyavāsoti? Āmantā. Paccantimesu janapadesu atthi brahmacariyavāso milakkhesu aviññātāresu yattha natthi gati bhikkhūnaṃ bhikkhunīnaṃ upāsakānaṃ upāsikānanti? Na hevaṃ vattabbe.
அத்தி² தே³வேஸு ப்³ரஹ்மசரியவாஸோதி? ஆமந்தா. நனு வுத்தங் ப⁴க³வதா – ‘‘தீஹி, பி⁴க்க²வே, டா²னேஹி ஜம்பு³தீ³பகா மனுஸ்ஸா உத்தரகுருகே ச மனுஸ்ஸே அதி⁴க்³க³ண்ஹந்தி தே³வே ச தாவதிங்ஸே! கதமேஹி தீஹி? ஸூரா, ஸதிமந்தோ, இத⁴ ப்³ரஹ்மசரியவாஸோ’’தி 11. அத்தே²வ ஸுத்தந்தோதி? ஆமந்தா. தேன ஹி நத்தி² தே³வேஸு ப்³ரஹ்மசரியவாஸோதி.
Atthi devesu brahmacariyavāsoti? Āmantā. Nanu vuttaṃ bhagavatā – ‘‘tīhi, bhikkhave, ṭhānehi jambudīpakā manussā uttarakuruke ca manusse adhiggaṇhanti deve ca tāvatiṃse! Katamehi tīhi? Sūrā, satimanto, idha brahmacariyavāso’’ti 12. Attheva suttantoti? Āmantā. Tena hi natthi devesu brahmacariyavāsoti.
ஸாவத்தி²யங் வுத்தங் ப⁴க³வதா – ‘‘இத⁴ ப்³ரஹ்மசரியவாஸோ’’தி? ஆமந்தா. ஸாவத்தி²யங்யேவ ப்³ரஹ்மசரியவாஸோ, நத்தி² அஞ்ஞத்ர ப்³ரஹ்மசரியவாஸோதி? ந ஹேவங் வத்தப்³பே³.
Sāvatthiyaṃ vuttaṃ bhagavatā – ‘‘idha brahmacariyavāso’’ti? Āmantā. Sāvatthiyaṃyeva brahmacariyavāso, natthi aññatra brahmacariyavāsoti? Na hevaṃ vattabbe.
272. அனாகா³மிஸ்ஸ புக்³க³லஸ்ஸ பஞ்சோரம்பா⁴கி³யானி ஸங்யோஜனானி பஹீனானி, பஞ்சுத்³த⁴ம்பா⁴கி³யானி ஸங்யோஜனானி அப்பஹீனானி, இதோ சுதஸ்ஸ தத்த² உபபன்னஸ்ஸ குஹிங் ப²லுப்பத்தீதி? தத்தே²வ. ஹஞ்சி அனாகா³மிஸ்ஸ புக்³க³லஸ்ஸ பஞ்சோரம்பா⁴கி³யானி ஸங்யோஜனானி பஹீனானி , பஞ்சுத்³த⁴ம்பா⁴கி³யானி ஸங்யோஜனானி அப்பஹீனானி, இதோ சுதஸ்ஸ தத்த² உபபன்னஸ்ஸ தஹிங் ப²லுப்பத்தி; நோ ச வத ரே வத்தப்³பே³ – ‘‘நத்தி² தே³வேஸு ப்³ரஹ்மசரியவாஸோ’’தி.
272. Anāgāmissa puggalassa pañcorambhāgiyāni saṃyojanāni pahīnāni, pañcuddhambhāgiyāni saṃyojanāni appahīnāni, ito cutassa tattha upapannassa kuhiṃ phaluppattīti? Tattheva. Hañci anāgāmissa puggalassa pañcorambhāgiyāni saṃyojanāni pahīnāni , pañcuddhambhāgiyāni saṃyojanāni appahīnāni, ito cutassa tattha upapannassa tahiṃ phaluppatti; no ca vata re vattabbe – ‘‘natthi devesu brahmacariyavāso’’ti.
அனாகா³மிஸ்ஸ புக்³க³லஸ்ஸ பஞ்சோரம்பா⁴கி³யானி ஸங்யோஜனானி பஹீனானி, பஞ்சுத்³த⁴ம்பா⁴கி³யானி ஸங்யோஜனானி அப்பஹீனானி , இதோ சுதஸ்ஸ தத்த² உபபன்னஸ்ஸ குஹிங் பா⁴ரோஹரணங், குஹிங் து³க்க²பரிஞ்ஞாதங், குஹிங் கிலேஸப்பஹானங், குஹிங் நிரோத⁴ஸச்சி²கிரியா, குஹிங் அகுப்பபடிவேதோ⁴தி? தத்தே²வ. ஹஞ்சி அனாகா³மிஸ்ஸ புக்³க³லஸ்ஸ பஞ்சோரம்பா⁴கி³யானி ஸங்யோஜனானி பஹீனானி, பஞ்சுத்³த⁴ம்பா⁴கி³யானி ஸங்யோஜனானி அப்பஹீனானி, இதோ சுதஸ்ஸ தத்த² உபபன்னஸ்ஸ தஹிங் அகுப்பபடிவேதோ⁴; நோ ச வத ரே வத்தப்³பே³ – ‘‘நத்தி² தே³வேஸு ப்³ரஹ்மசரியவாஸோ’’தி.
Anāgāmissa puggalassa pañcorambhāgiyāni saṃyojanāni pahīnāni, pañcuddhambhāgiyāni saṃyojanāni appahīnāni , ito cutassa tattha upapannassa kuhiṃ bhāroharaṇaṃ, kuhiṃ dukkhapariññātaṃ, kuhiṃ kilesappahānaṃ, kuhiṃ nirodhasacchikiriyā, kuhiṃ akuppapaṭivedhoti? Tattheva. Hañci anāgāmissa puggalassa pañcorambhāgiyāni saṃyojanāni pahīnāni, pañcuddhambhāgiyāni saṃyojanāni appahīnāni, ito cutassa tattha upapannassa tahiṃ akuppapaṭivedho; no ca vata re vattabbe – ‘‘natthi devesu brahmacariyavāso’’ti.
அனாகா³மிஸ்ஸ புக்³க³லஸ்ஸ பஞ்சோரம்பா⁴கி³யானி ஸங்யோஜனானி பஹீனானி, பஞ்சுத்³த⁴ம்பா⁴கி³யானி ஸங்யோஜனானி அப்பஹீனானி, இதோ சுதஸ்ஸ தத்த² உபபன்னஸ்ஸ தஹிங் ப²லுப்பத்தி, தஹிங் பா⁴ரோஹரணங், தஹிங் து³க்க²பரிஞ்ஞாதங், தஹிங் கிலேஸப்பஹானங், தஹிங் நிரோத⁴ஸச்சி²கிரியா, தஹிங் அகுப்பபடிவேதோ⁴; கேனட்டே²ன வதே³ஸி – ‘‘நத்தி² தே³வேஸு ப்³ரஹ்மசரியவாஸோ’’தி? ஹந்த³ ஹி அனாகா³மீ புக்³க³லோ இத⁴ பா⁴விதேன மக்³கே³ன தத்த² ப²லங் ஸச்சி²கரோதீதி 13.
Anāgāmissa puggalassa pañcorambhāgiyāni saṃyojanāni pahīnāni, pañcuddhambhāgiyāni saṃyojanāni appahīnāni, ito cutassa tattha upapannassa tahiṃ phaluppatti, tahiṃ bhāroharaṇaṃ, tahiṃ dukkhapariññātaṃ, tahiṃ kilesappahānaṃ, tahiṃ nirodhasacchikiriyā, tahiṃ akuppapaṭivedho; kenaṭṭhena vadesi – ‘‘natthi devesu brahmacariyavāso’’ti? Handa hi anāgāmī puggalo idha bhāvitena maggena tattha phalaṃ sacchikarotīti 14.
2. ஸங்ஸந்த³னப்³ரஹ்மசரியகதா²
2. Saṃsandanabrahmacariyakathā
273. அனாகா³மீ புக்³க³லோ இத⁴ பா⁴விதேன மக்³கே³ன தத்த² ப²லங் ஸச்சி²கரோதீதி? ஆமந்தா. ஸோதாபன்னோ புக்³க³லோ தத்த² பா⁴விதேன மக்³கே³ன இத⁴ ப²லங் ஸச்சி²கரோதீதி? ந ஹேவங் வத்தப்³பே³.
273. Anāgāmī puggalo idha bhāvitena maggena tattha phalaṃ sacchikarotīti? Āmantā. Sotāpanno puggalo tattha bhāvitena maggena idha phalaṃ sacchikarotīti? Na hevaṃ vattabbe.
அனாகா³மீ புக்³க³லோ இத⁴ பா⁴விதேன மக்³கே³ன தத்த² ப²லங் ஸச்சி²கரோதீதி? ஆமந்தா. ஸகதா³கா³மீ புக்³க³லோ இத⁴ பரினிப்³பா³யிபுக்³க³லோ 15 தத்த² பா⁴விதேன மக்³கே³ன இத⁴ ப²லங் ஸச்சி²கரோதீதி? ந ஹேவங் வத்தப்³பே³.
Anāgāmī puggalo idha bhāvitena maggena tattha phalaṃ sacchikarotīti? Āmantā. Sakadāgāmī puggalo idha parinibbāyipuggalo 16 tattha bhāvitena maggena idha phalaṃ sacchikarotīti? Na hevaṃ vattabbe.
ஸோதாபன்னோ புக்³க³லோ இத⁴ பா⁴விதேன மக்³கே³ன இத⁴ ப²லங் ஸச்சி²கரோதீதி? ஆமந்தா. அனாகா³மீ புக்³க³லோ தத்த² பா⁴விதேன மக்³கே³ன தத்த² ப²லங் ஸச்சி²கரோதீதி? ந ஹேவங் வத்தப்³பே³.
Sotāpanno puggalo idha bhāvitena maggena idha phalaṃ sacchikarotīti? Āmantā. Anāgāmī puggalo tattha bhāvitena maggena tattha phalaṃ sacchikarotīti? Na hevaṃ vattabbe.
ஸகதா³கா³மீ புக்³க³லோ இத⁴ பரினிப்³பா³யிபுக்³க³லோ இத⁴ பா⁴விதேன மக்³கே³ன இத⁴ ப²லங் ஸச்சி²கரோதீதி? ஆமந்தா. அனாகா³மீ புக்³க³லோ தத்த² பா⁴விதேன மக்³கே³ன தத்த² ப²லங் ஸச்சி²கரோதீதி? ந ஹேவங் வத்தப்³பே³…பே॰….
Sakadāgāmī puggalo idha parinibbāyipuggalo idha bhāvitena maggena idha phalaṃ sacchikarotīti? Āmantā. Anāgāmī puggalo tattha bhāvitena maggena tattha phalaṃ sacchikarotīti? Na hevaṃ vattabbe…pe….
இத⁴ விஹாய நிட்ட²ஸ்ஸ புக்³க³லஸ்ஸ மக்³கோ³ ச பா⁴வீயதி, ந ச கிலேஸா பஹீயந்தீதி? ஆமந்தா. ஸோதாபத்திப²லஸச்சி²கிரியாய படிபன்னஸ்ஸ புக்³க³லஸ்ஸ மக்³கோ³ ச பா⁴வீயதி, ந ச கிலேஸா பஹீயந்தீதி? ந ஹேவங் வத்தப்³பே³…பே॰….
Idha vihāya niṭṭhassa puggalassa maggo ca bhāvīyati, na ca kilesā pahīyantīti? Āmantā. Sotāpattiphalasacchikiriyāya paṭipannassa puggalassa maggo ca bhāvīyati, na ca kilesā pahīyantīti? Na hevaṃ vattabbe…pe….
இத⁴ விஹாய நிட்ட²ஸ்ஸ புக்³க³லஸ்ஸ மக்³கோ³ ச பா⁴வீயதி, ந ச கிலேஸா பஹீயந்தீதி? ஆமந்தா. ஸகதா³கா³மிப²லஸச்சி²கிரியாய படிபன்னஸ்ஸ புக்³க³லஸ்ஸ…பே॰… அரஹத்தஸச்சி²கிரியாய படிபன்னஸ்ஸ புக்³க³லஸ்ஸ மக்³கோ³ ச பா⁴வீயதி, ந ச கிலேஸா பஹீயந்தீதி? ந ஹேவங் வத்தப்³பே³…பே॰….
Idha vihāya niṭṭhassa puggalassa maggo ca bhāvīyati, na ca kilesā pahīyantīti? Āmantā. Sakadāgāmiphalasacchikiriyāya paṭipannassa puggalassa…pe… arahattasacchikiriyāya paṭipannassa puggalassa maggo ca bhāvīyati, na ca kilesā pahīyantīti? Na hevaṃ vattabbe…pe….
ஸோதாபத்திப²லஸச்சி²கிரியாய படிபன்னஸ்ஸ புக்³க³லஸ்ஸ அபுப்³ப³ங் அசரிமங் மக்³கோ³ ச பா⁴வீயதி, கிலேஸா ச பஹீயந்தீதி? ஆமந்தா. இத⁴ விஹாய நிட்ட²ஸ்ஸ புக்³க³லஸ்ஸ அபுப்³ப³ங் அசரிமங் மக்³கோ³ ச பா⁴வீயதி, கிலேஸா ச பஹீயந்தீதி? ந ஹேவங் வத்தப்³பே³.
Sotāpattiphalasacchikiriyāya paṭipannassa puggalassa apubbaṃ acarimaṃ maggo ca bhāvīyati, kilesā ca pahīyantīti? Āmantā. Idha vihāya niṭṭhassa puggalassa apubbaṃ acarimaṃ maggo ca bhāvīyati, kilesā ca pahīyantīti? Na hevaṃ vattabbe.
ஸகதா³கா³மிப²லஸச்சி²கிரியாய படிபன்னஸ்ஸ புக்³க³லஸ்ஸ…பே॰… அரஹத்தஸச்சி²கிரியாய படிபன்னஸ்ஸ புக்³க³லஸ்ஸ அபுப்³ப³ங் அசரிமங் மக்³கோ³ ச பா⁴வீயதி, கிலேஸா ச பஹீயந்தீதி? ஆமந்தா. இத⁴ விஹாய நிட்ட²ஸ்ஸ புக்³க³லஸ்ஸ அபுப்³ப³ங் அசரிமங் மக்³கோ³ ச பா⁴வீயதி, கிலேஸா ச பஹீயந்தீதி? ந ஹேவங் வத்தப்³பே³ .
Sakadāgāmiphalasacchikiriyāya paṭipannassa puggalassa…pe… arahattasacchikiriyāya paṭipannassa puggalassa apubbaṃ acarimaṃ maggo ca bhāvīyati, kilesā ca pahīyantīti? Āmantā. Idha vihāya niṭṭhassa puggalassa apubbaṃ acarimaṃ maggo ca bhāvīyati, kilesā ca pahīyantīti? Na hevaṃ vattabbe .
அனாகா³மீ புக்³க³லோ கதகரணீயோ பா⁴விதபா⁴வனோ தத்த² உபபஜ்ஜதீதி? ஆமந்தா. அரஹா உபபஜ்ஜதீதி? ந ஹேவங் வத்தப்³பே³.
Anāgāmī puggalo katakaraṇīyo bhāvitabhāvano tattha upapajjatīti? Āmantā. Arahā upapajjatīti? Na hevaṃ vattabbe.
அரஹா உபபஜ்ஜதீதி? ஆமந்தா. அத்தி² அரஹதோ புனப்³ப⁴வோதி? ந ஹேவங் வத்தப்³பே³.
Arahā upapajjatīti? Āmantā. Atthi arahato punabbhavoti? Na hevaṃ vattabbe.
அத்தி² அரஹதோ புனப்³ப⁴வோதி? ஆமந்தா. அரஹா ப⁴வேன ப⁴வங் க³ச்ச²தி, க³தியா க³திங் க³ச்ச²தி, ஸங்ஸாரேன ஸங்ஸாரங் க³ச்ச²தி, உபபத்தியா உபபத்திங் க³ச்ச²தீதி? ந ஹேவங் வத்தப்³பே³.
Atthi arahato punabbhavoti? Āmantā. Arahā bhavena bhavaṃ gacchati, gatiyā gatiṃ gacchati, saṃsārena saṃsāraṃ gacchati, upapattiyā upapattiṃ gacchatīti? Na hevaṃ vattabbe.
அனாகா³மீ புக்³க³லோ கதகரணீயோ பா⁴விதபா⁴வனோ அனோஹடபா⁴ரோ தத்த² உபபஜ்ஜதீதி? ஆமந்தா. பா⁴ரோஹரணாய புன மக்³க³ங் பா⁴வேதீதி? ந ஹேவங் வத்தப்³பே³.
Anāgāmī puggalo katakaraṇīyo bhāvitabhāvano anohaṭabhāro tattha upapajjatīti? Āmantā. Bhāroharaṇāya puna maggaṃ bhāvetīti? Na hevaṃ vattabbe.
அனாகா³மீ புக்³க³லோ கதகரணீயோ பா⁴விதபா⁴வனோ அபரிஞ்ஞாதது³க்கோ² அப்பஹீனகிலேஸோ அஸச்சி²கதனிரோதோ⁴ அப்படிவித்³தா⁴குப்போ தத்த² உபபஜ்ஜதீதி? ஆமந்தா. அகுப்பபடிவேதா⁴ய புன மக்³க³ங் பா⁴வேதீதி? ந ஹேவங் வத்தப்³பே³.
Anāgāmī puggalo katakaraṇīyo bhāvitabhāvano apariññātadukkho appahīnakileso asacchikatanirodho appaṭividdhākuppo tattha upapajjatīti? Āmantā. Akuppapaṭivedhāya puna maggaṃ bhāvetīti? Na hevaṃ vattabbe.
அனாகா³மீ புக்³க³லோ கதகரணீயோ பா⁴விதபா⁴வனோ அனோஹடபா⁴ரோ தத்த² உபபஜ்ஜதி, ந ச பா⁴ரோஹரணாய புன மக்³க³ங் பா⁴வேதீதி? ஆமந்தா. அனோஹடபா⁴ரோ ச தத்த² பரினிப்³பா³யதீதி? ந ஹேவங் வத்தப்³பே³.
Anāgāmī puggalo katakaraṇīyo bhāvitabhāvano anohaṭabhāro tattha upapajjati, na ca bhāroharaṇāya puna maggaṃ bhāvetīti? Āmantā. Anohaṭabhāro ca tattha parinibbāyatīti? Na hevaṃ vattabbe.
அனாகா³மீ புக்³க³லோ கதகரணீயோ பா⁴விதபா⁴வனோ அபரிஞ்ஞாதது³க்கோ² அப்பஹீனகிலேஸோ அஸச்சி²கதனிரோதோ⁴ அப்படிவித்³தா⁴குப்போ தத்த² உபபஜ்ஜதி, ந ச அகுப்பபடிவேதா⁴ய புன மக்³க³ங் பா⁴வேதீதி ? ஆமந்தா. அப்படிவித்³தா⁴குப்போ ச தத்த² பரினிப்³பா³யதீதி? ந ஹேவங் வத்தப்³பே³. யதா² மிகோ³ ஸல்லேன வித்³தோ⁴ தூ³ரம்பி க³ந்த்வா காலங் கரோதி, ஏவமேவங் அனாகா³மீ புக்³க³லோ இத⁴ பா⁴விதேன மக்³கே³ன தத்த² ப²லங் ஸச்சி²கரோதீதி.
Anāgāmī puggalo katakaraṇīyo bhāvitabhāvano apariññātadukkho appahīnakileso asacchikatanirodho appaṭividdhākuppo tattha upapajjati, na ca akuppapaṭivedhāya puna maggaṃ bhāvetīti ? Āmantā. Appaṭividdhākuppo ca tattha parinibbāyatīti? Na hevaṃ vattabbe. Yathā migo sallena viddho dūrampi gantvā kālaṃ karoti, evamevaṃ anāgāmī puggalo idha bhāvitena maggena tattha phalaṃ sacchikarotīti.
யதா² மிகோ³ ஸல்லேன வித்³தோ⁴ தூ³ரம்பி க³ந்த்வா ஸஸல்லோவ காலங் கரோதி, ஏவமேவங் அனாகா³மீ புக்³க³லோ இத⁴ பா⁴விதேன மக்³கே³ன தத்த² ஸஸல்லோவ பரினிப்³பா³யதீதி? ந ஹேவங் வத்தப்³பே³…பே॰….
Yathā migo sallena viddho dūrampi gantvā sasallova kālaṃ karoti, evamevaṃ anāgāmī puggalo idha bhāvitena maggena tattha sasallova parinibbāyatīti? Na hevaṃ vattabbe…pe….
ப்³ரஹ்மசரியகதா² நிட்டி²தா.
Brahmacariyakathā niṭṭhitā.
Footnotes:
Related texts:
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 3. ப்³ரஹ்மசரியகதா² • 3. Brahmacariyakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 3. ப்³ரஹ்மசரியகதா² • 3. Brahmacariyakathā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-அனுடீகா • Pañcapakaraṇa-anuṭīkā / 3. ப்³ரஹ்மசரியகதா² • 3. Brahmacariyakathā
