| Library / Tipiṭaka / តិបិដក • Tipiṭaka / បញ្ចបករណ-មូលដីកា • Pañcapakaraṇa-mūlaṭīkā |
៣. ព្រហ្មចរិយកថា
3. Brahmacariyakathā
១. សុទ្ធព្រហ្មចរិយកថាវណ្ណនា
1. Suddhabrahmacariyakathāvaṇṇanā
២៦៩. ‘‘បរនិម្មិតវសវត្តិទេវេ ឧបាទាយ តទុបរី’’តិ វុត្តំ, ‘‘តីហិ, ភិក្ខវេ, ឋានេហី’’តិ (អ. និ. ៩.២១) បន សុត្តស្ស វចនេន ហេដ្ឋាបិ មគ្គភាវនម្បិ ន ឥច្ឆន្តីតិ វិញ្ញាយតិ។
269. ‘‘Paranimmitavasavattideveupādāya taduparī’’ti vuttaṃ, ‘‘tīhi, bhikkhave, ṭhānehī’’ti (a. ni. 9.21) pana suttassa vacanena heṭṭhāpi maggabhāvanampi na icchantīti viññāyati.
២៧០. ‘‘គិហីនញ្ចេវ ឯកច្ចានញ្ច ទេវានំ មគ្គបដិលាភំ សន្ធាយ បដិក្ខេបោ តស្សេវា’’តិ វុត្តំ, ‘‘យត្ថ នត្ថី’’តិ បន ឱកាសវសេន បុដ្ឋោ បុគ្គលវសេន តស្ស បដិក្ខេបោ ន យុត្តោ។ យទិ ច តស្សាយំ អធិប្បាយោ, សកវាទិនា សមានាធិប្បាយត្តា ន និគ្គហេតព្ពោ។
270. ‘‘Gihīnañceva ekaccānañca devānaṃ maggapaṭilābhaṃ sandhāya paṭikkhepo tassevā’’ti vuttaṃ, ‘‘yattha natthī’’ti pana okāsavasena puṭṭho puggalavasena tassa paṭikkhepo na yutto. Yadi ca tassāyaṃ adhippāyo, sakavādinā samānādhippāyattā na niggahetabbo.
២៧១. ឯកន្តរិកបញ្ហាតិ បរវាទីសកវាទីនំ អញ្ញមញ្ញំ បញ្ហន្តរិកា បញ្ហា។
271. Ekantarikapañhāti paravādīsakavādīnaṃ aññamaññaṃ pañhantarikā pañhā.
សុទ្ធព្រហ្មចរិយកថាវណ្ណនា និដ្ឋិតា។
Suddhabrahmacariyakathāvaṇṇanā niṭṭhitā.
២. សំសន្ទនព្រហ្មចរិយកថាវណ្ណនា
2. Saṃsandanabrahmacariyakathāvaṇṇanā
២៧៣. រូបាវចរមគ្គេន ហិ សោ ឥធវិហាយនិដ្ឋោ នាម ជាតោតិ ឥទំ ‘‘ឥធ ភាវិតមគ្គោ ហិ អនាគាមី ឥធវិហាយនិដ្ឋោ នាម ហោតី’’តិអាទិកេន លទ្ធិកិត្តនេន កថំ សមេតីតិ វិចារេតព្ពំ។ បុព្ពេ បន អនាគាមី ឯវ អនាគាមីតិ វុត្តោ, ឥធ ឈានានាគាមិសោតាបន្នាទិកោតិ អធិប្បាយោ។ ឥធ អរហត្តមគ្គំ ភាវេត្វា ឥធេវ ផលំ សច្ឆិករោន្តំ ‘‘ឥធបរិនិព្ពាយី’’តិ វទតិ, ឥធ បន មគ្គំ ភាវេត្វា តត្ថ ផលំ សច្ឆិករោន្តំ ‘‘តត្ថបរិនិព្ពាយី អរហា’’តិ។
273. Rūpāvacaramaggena hi so idhavihāyaniṭṭho nāma jātoti idaṃ ‘‘idha bhāvitamaggo hi anāgāmī idhavihāyaniṭṭho nāma hotī’’tiādikena laddhikittanena kathaṃ sametīti vicāretabbaṃ. Pubbe pana anāgāmī eva anāgāmīti vutto, idha jhānānāgāmisotāpannādikoti adhippāyo. Idha arahattamaggaṃ bhāvetvā idheva phalaṃ sacchikarontaṃ ‘‘idhaparinibbāyī’’ti vadati, idha pana maggaṃ bhāvetvā tattha phalaṃ sacchikarontaṃ ‘‘tatthaparinibbāyī arahā’’ti.
សំសន្ទនព្រហ្មចរិយកថាវណ្ណនា និដ្ឋិតា។
Saṃsandanabrahmacariyakathāvaṇṇanā niṭṭhitā.
ព្រហ្មចរិយកថាវណ្ណនា និដ្ឋិតា។
Brahmacariyakathāvaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / អភិធម្មបិដក • Abhidhammapiṭaka / កថាវត្ថុបាឡិ • Kathāvatthupāḷi / ៣. ព្រហ្មចរិយកថា • 3. Brahmacariyakathā
អដ្ឋកថា • Aṭṭhakathā / អភិធម្មបិដក (អដ្ឋកថា) • Abhidhammapiṭaka (aṭṭhakathā) / បញ្ចបករណ-អដ្ឋកថា • Pañcapakaraṇa-aṭṭhakathā / ៣. ព្រហ្មចរិយកថា • 3. Brahmacariyakathā
ដីកា • Tīkā / អភិធម្មបិដក (ដីកា) • Abhidhammapiṭaka (ṭīkā) / បញ្ចបករណ-អនុដីកា • Pañcapakaraṇa-anuṭīkā / ៣. ព្រហ្មចរិយកថា • 3. Brahmacariyakathā
