| Library / Tipiṭaka / ತಿಪಿಟಕ • Tipiṭaka / ಪಞ್ಚಪಕರಣ-ಮೂಲಟೀಕಾ • Pañcapakaraṇa-mūlaṭīkā |
೩. ಬ್ರಹ್ಮಚರಿಯಕಥಾ
3. Brahmacariyakathā
೧. ಸುದ್ಧಬ್ರಹ್ಮಚರಿಯಕಥಾವಣ್ಣನಾ
1. Suddhabrahmacariyakathāvaṇṇanā
೨೬೯. ‘‘ಪರನಿಮ್ಮಿತವಸವತ್ತಿದೇವೇ ಉಪಾದಾಯ ತದುಪರೀ’’ತಿ ವುತ್ತಂ, ‘‘ತೀಹಿ, ಭಿಕ್ಖವೇ, ಠಾನೇಹೀ’’ತಿ (ಅ॰ ನಿ॰ ೯.೨೧) ಪನ ಸುತ್ತಸ್ಸ ವಚನೇನ ಹೇಟ್ಠಾಪಿ ಮಗ್ಗಭಾವನಮ್ಪಿ ನ ಇಚ್ಛನ್ತೀತಿ ವಿಞ್ಞಾಯತಿ।
269. ‘‘Paranimmitavasavattideveupādāya taduparī’’ti vuttaṃ, ‘‘tīhi, bhikkhave, ṭhānehī’’ti (a. ni. 9.21) pana suttassa vacanena heṭṭhāpi maggabhāvanampi na icchantīti viññāyati.
೨೭೦. ‘‘ಗಿಹೀನಞ್ಚೇವ ಏಕಚ್ಚಾನಞ್ಚ ದೇವಾನಂ ಮಗ್ಗಪಟಿಲಾಭಂ ಸನ್ಧಾಯ ಪಟಿಕ್ಖೇಪೋ ತಸ್ಸೇವಾ’’ತಿ ವುತ್ತಂ, ‘‘ಯತ್ಥ ನತ್ಥೀ’’ತಿ ಪನ ಓಕಾಸವಸೇನ ಪುಟ್ಠೋ ಪುಗ್ಗಲವಸೇನ ತಸ್ಸ ಪಟಿಕ್ಖೇಪೋ ನ ಯುತ್ತೋ। ಯದಿ ಚ ತಸ್ಸಾಯಂ ಅಧಿಪ್ಪಾಯೋ, ಸಕವಾದಿನಾ ಸಮಾನಾಧಿಪ್ಪಾಯತ್ತಾ ನ ನಿಗ್ಗಹೇತಬ್ಬೋ।
270. ‘‘Gihīnañceva ekaccānañca devānaṃ maggapaṭilābhaṃ sandhāya paṭikkhepo tassevā’’ti vuttaṃ, ‘‘yattha natthī’’ti pana okāsavasena puṭṭho puggalavasena tassa paṭikkhepo na yutto. Yadi ca tassāyaṃ adhippāyo, sakavādinā samānādhippāyattā na niggahetabbo.
೨೭೧. ಏಕನ್ತರಿಕಪಞ್ಹಾತಿ ಪರವಾದೀಸಕವಾದೀನಂ ಅಞ್ಞಮಞ್ಞಂ ಪಞ್ಹನ್ತರಿಕಾ ಪಞ್ಹಾ।
271. Ekantarikapañhāti paravādīsakavādīnaṃ aññamaññaṃ pañhantarikā pañhā.
ಸುದ್ಧಬ್ರಹ್ಮಚರಿಯಕಥಾವಣ್ಣನಾ ನಿಟ್ಠಿತಾ।
Suddhabrahmacariyakathāvaṇṇanā niṭṭhitā.
೨. ಸಂಸನ್ದನಬ್ರಹ್ಮಚರಿಯಕಥಾವಣ್ಣನಾ
2. Saṃsandanabrahmacariyakathāvaṇṇanā
೨೭೩. ರೂಪಾವಚರಮಗ್ಗೇನ ಹಿ ಸೋ ಇಧವಿಹಾಯನಿಟ್ಠೋ ನಾಮ ಜಾತೋತಿ ಇದಂ ‘‘ಇಧ ಭಾವಿತಮಗ್ಗೋ ಹಿ ಅನಾಗಾಮೀ ಇಧವಿಹಾಯನಿಟ್ಠೋ ನಾಮ ಹೋತೀ’’ತಿಆದಿಕೇನ ಲದ್ಧಿಕಿತ್ತನೇನ ಕಥಂ ಸಮೇತೀತಿ ವಿಚಾರೇತಬ್ಬಂ। ಪುಬ್ಬೇ ಪನ ಅನಾಗಾಮೀ ಏವ ಅನಾಗಾಮೀತಿ ವುತ್ತೋ, ಇಧ ಝಾನಾನಾಗಾಮಿಸೋತಾಪನ್ನಾದಿಕೋತಿ ಅಧಿಪ್ಪಾಯೋ। ಇಧ ಅರಹತ್ತಮಗ್ಗಂ ಭಾವೇತ್ವಾ ಇಧೇವ ಫಲಂ ಸಚ್ಛಿಕರೋನ್ತಂ ‘‘ಇಧಪರಿನಿಬ್ಬಾಯೀ’’ತಿ ವದತಿ, ಇಧ ಪನ ಮಗ್ಗಂ ಭಾವೇತ್ವಾ ತತ್ಥ ಫಲಂ ಸಚ್ಛಿಕರೋನ್ತಂ ‘‘ತತ್ಥಪರಿನಿಬ್ಬಾಯೀ ಅರಹಾ’’ತಿ।
273. Rūpāvacaramaggena hi so idhavihāyaniṭṭho nāma jātoti idaṃ ‘‘idha bhāvitamaggo hi anāgāmī idhavihāyaniṭṭho nāma hotī’’tiādikena laddhikittanena kathaṃ sametīti vicāretabbaṃ. Pubbe pana anāgāmī eva anāgāmīti vutto, idha jhānānāgāmisotāpannādikoti adhippāyo. Idha arahattamaggaṃ bhāvetvā idheva phalaṃ sacchikarontaṃ ‘‘idhaparinibbāyī’’ti vadati, idha pana maggaṃ bhāvetvā tattha phalaṃ sacchikarontaṃ ‘‘tatthaparinibbāyī arahā’’ti.
ಸಂಸನ್ದನಬ್ರಹ್ಮಚರಿಯಕಥಾವಣ್ಣನಾ ನಿಟ್ಠಿತಾ।
Saṃsandanabrahmacariyakathāvaṇṇanā niṭṭhitā.
ಬ್ರಹ್ಮಚರಿಯಕಥಾವಣ್ಣನಾ ನಿಟ್ಠಿತಾ।
Brahmacariyakathāvaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಅಭಿಧಮ್ಮಪಿಟಕ • Abhidhammapiṭaka / ಕಥಾವತ್ಥುಪಾಳಿ • Kathāvatthupāḷi / ೩. ಬ್ರಹ್ಮಚರಿಯಕಥಾ • 3. Brahmacariyakathā
ಅಟ್ಠಕಥಾ • Aṭṭhakathā / ಅಭಿಧಮ್ಮಪಿಟಕ (ಅಟ್ಠಕಥಾ) • Abhidhammapiṭaka (aṭṭhakathā) / ಪಞ್ಚಪಕರಣ-ಅಟ್ಠಕಥಾ • Pañcapakaraṇa-aṭṭhakathā / ೩. ಬ್ರಹ್ಮಚರಿಯಕಥಾ • 3. Brahmacariyakathā
ಟೀಕಾ • Tīkā / ಅಭಿಧಮ್ಮಪಿಟಕ (ಟೀಕಾ) • Abhidhammapiṭaka (ṭīkā) / ಪಞ್ಚಪಕರಣ-ಅನುಟೀಕಾ • Pañcapakaraṇa-anuṭīkā / ೩. ಬ್ರಹ್ಮಚರಿಯಕಥಾ • 3. Brahmacariyakathā
