| Library / Tipiṭaka / තිපිටක • Tipiṭaka / පඤ්‌චපකරණ-මූලටීකා • Pañcapakaraṇa-mūlaṭīkā |
3. බ්‍රහ්‌මචරියකථා
3. Brahmacariyakathā
1. සුද්‌ධබ්‍රහ්‌මචරියකථාවණ්‌ණනා
1. Suddhabrahmacariyakathāvaṇṇanā
269. ‘‘පරනිම්‌මිතවසවත්‌තිදෙවෙ උපාදාය තදුපරී’’ති වුත්‌තං, ‘‘තීහි, භික්‌ඛවෙ, ඨානෙහී’’ති (අ. නි. 9.21) පන සුත්‌තස්‌ස වචනෙන හෙට්‌ඨාපි මග්‌ගභාවනම්‌පි න ඉච්‌ඡන්‌තීති විඤ්‌ඤායති.
269. ‘‘Paranimmitavasavattideveupādāya taduparī’’ti vuttaṃ, ‘‘tīhi, bhikkhave, ṭhānehī’’ti (a. ni. 9.21) pana suttassa vacanena heṭṭhāpi maggabhāvanampi na icchantīti viññāyati.
270. ‘‘ගිහීනඤ්‌චෙව එකච්‌චානඤ්‌ච දෙවානං මග්‌ගපටිලාභං සන්‌ධාය පටික්‌ඛෙපො තස්‌සෙවා’’ති වුත්‌තං, ‘‘යත්‌ථ නත්‌ථී’’ති පන ඔකාසවසෙන පුට්‌ඨො පුග්‌ගලවසෙන තස්‌ස පටික්‌ඛෙපො න යුත්‌තො. යදි ච තස්‌සායං අධිප්‌පායො, සකවාදිනා සමානාධිප්‌පායත්‌තා න නිග්‌ගහෙතබ්‌බො.
270. ‘‘Gihīnañceva ekaccānañca devānaṃ maggapaṭilābhaṃ sandhāya paṭikkhepo tassevā’’ti vuttaṃ, ‘‘yattha natthī’’ti pana okāsavasena puṭṭho puggalavasena tassa paṭikkhepo na yutto. Yadi ca tassāyaṃ adhippāyo, sakavādinā samānādhippāyattā na niggahetabbo.
271. එකන්‌තරිකපඤ්‌හාති පරවාදීසකවාදීනං අඤ්‌ඤමඤ්‌ඤං පඤ්‌හන්‌තරිකා පඤ්‌හා.
271. Ekantarikapañhāti paravādīsakavādīnaṃ aññamaññaṃ pañhantarikā pañhā.
සුද්‌ධබ්‍රහ්‌මචරියකථාවණ්‌ණනා නිට්‌ඨිතා.
Suddhabrahmacariyakathāvaṇṇanā niṭṭhitā.
2. සංසන්‌දනබ්‍රහ්‌මචරියකථාවණ්‌ණනා
2. Saṃsandanabrahmacariyakathāvaṇṇanā
273. රූපාවචරමග්‌ගෙන හි සො ඉධවිහායනිට්‌ඨො නාම ජාතොති ඉදං ‘‘ඉධ භාවිතමග්‌ගො හි අනාගාමී ඉධවිහායනිට්‌ඨො නාම හොතී’’තිආදිකෙන ලද්‌ධිකිත්‌තනෙන කථං සමෙතීති විචාරෙතබ්‌බං. පුබ්‌බෙ පන අනාගාමී එව අනාගාමීති වුත්‌තො, ඉධ ඣානානාගාමිසොතාපන්‌නාදිකොති අධිප්‌පායො. ඉධ අරහත්‌තමග්‌ගං භාවෙත්‌වා ඉධෙව ඵලං සච්‌ඡිකරොන්‌තං ‘‘ඉධපරිනිබ්‌බායී’’ති වදති, ඉධ පන මග්‌ගං භාවෙත්‌වා තත්‌ථ ඵලං සච්‌ඡිකරොන්‌තං ‘‘තත්‌ථපරිනිබ්‌බායී අරහා’’ති.
273. Rūpāvacaramaggena hi so idhavihāyaniṭṭho nāma jātoti idaṃ ‘‘idha bhāvitamaggo hi anāgāmī idhavihāyaniṭṭho nāma hotī’’tiādikena laddhikittanena kathaṃ sametīti vicāretabbaṃ. Pubbe pana anāgāmī eva anāgāmīti vutto, idha jhānānāgāmisotāpannādikoti adhippāyo. Idha arahattamaggaṃ bhāvetvā idheva phalaṃ sacchikarontaṃ ‘‘idhaparinibbāyī’’ti vadati, idha pana maggaṃ bhāvetvā tattha phalaṃ sacchikarontaṃ ‘‘tatthaparinibbāyī arahā’’ti.
සංසන්‌දනබ්‍රහ්‌මචරියකථාවණ්‌ණනා නිට්‌ඨිතා.
Saṃsandanabrahmacariyakathāvaṇṇanā niṭṭhitā.
බ්‍රහ්‌මචරියකථාවණ්‌ණනා නිට්‌ඨිතා.
Brahmacariyakathāvaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / අභිධම්‌මපිටක • Abhidhammapiṭaka / කථාවත්‌ථුපාළි • Kathāvatthupāḷi / 3. බ්‍රහ්‌මචරියකථා • 3. Brahmacariyakathā
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 3. බ්‍රහ්‌මචරියකථා • 3. Brahmacariyakathā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 3. බ්‍රහ්‌මචරියකථා • 3. Brahmacariyakathā
