| Library / Tipiṭaka / ਤਿਪਿਟਕ • Tipiṭaka / ਪਞ੍ਚਪਕਰਣ-ਅਟ੍ਠਕਥਾ • Pañcapakaraṇa-aṭṭhakathā |
੩. ਬ੍ਰਹ੍ਮਚਰਿਯਕਥਾ
3. Brahmacariyakathā
੧. ਸੁਦ੍ਧਬ੍ਰਹ੍ਮਚਰਿਯਕਥਾવਣ੍ਣਨਾ
1. Suddhabrahmacariyakathāvaṇṇanā
੨੬੯. ਇਦਾਨਿ ਬ੍ਰਹ੍ਮਚਰਿਯਕਥਾ ਹੋਤਿ। ਤਤ੍ਥ ਦ੍વੇ ਬ੍ਰਹ੍ਮਚਰਿਯવਾਸਾ, ਮਗ੍ਗਭਾવਨਾ ਚ ਪਬ੍ਬਜ੍ਜਾ ਚ। ਪਬ੍ਬਜ੍ਜਾ ਸਬ੍ਬਦੇવੇਸੁ ਨਤ੍ਥਿ। ਮਗ੍ਗਭਾવਨਾ ਠਪੇਤ੍વਾ ਅਸਞ੍ਞਸਤ੍ਤੇ ਸੇਸੇਸੁ ਅਪ੍ਪਟਿਸਿਦ੍ਧਾ। ਤਤ੍ਥ ਯੇ ਪਰਨਿਮ੍ਮਿਤવਸવਤ੍ਤਿਦੇવੇ ਉਪਾਦਾਯ ਤਦੁਪਰਿਦੇવੇਸੁ ਮਗ੍ਗਭਾવਨਮ੍ਪਿ ਨ ਇਚ੍ਛਨ੍ਤਿ ਸੇਯ੍ਯਥਾਪਿ ਸਮ੍ਮਿਤਿਯਾ, ਤੇ ਸਨ੍ਧਾਯ ਨਤ੍ਥਿ ਦੇવੇਸੂਤਿ ਪੁਚ੍ਛਾ ਸਕવਾਦਿਸ੍ਸ। ‘‘ਤੀਹਿ, ਭਿਕ੍ਖવੇ, ਠਾਨੇਹਿ ਜਮ੍ਬੁਦੀਪਕਾ ਮਨੁਸ੍ਸਾ ਉਤ੍ਤਰਕੁਰੁਕੇ ਚ ਮਨੁਸ੍ਸੇ ਅਧਿਗ੍ਗਣ੍ਹਨ੍ਤਿ ਦੇવੇ ਚ ਤਾવਤਿਂਸੇ। ਕਤਮੇਹਿ ਤੀਹਿ? ਸੂਰਾ ਸਤਿਮਨ੍ਤੋ ਇਧ ਬ੍ਰਹ੍ਮਚਰਿਯવਾਸੋ’’ਤਿ (ਅ॰ ਨਿ॰ ੯.੨੧) ਇਦਂ ਸੁਤ੍ਤਂ ਨਿਸ੍ਸਾਯ ਦ੍વੇਪਿ ਬ੍ਰਹ੍ਮਚਰਿਯવਾਸਾ ਨਤ੍ਥਿ ਦੇવੇਸੂਤਿ ਉਪ੍ਪਨ੍ਨਲਦ੍ਧਿવਸੇਨ ਪਟਿਞ੍ਞਾ ਪਰવਾਦਿਸ੍ਸ। ਪੁਨ ਦ੍વਿਨ੍ਨਮ੍ਪਿ ਬ੍ਰਹ੍ਮਚਰਿਯਾਨਂ ਅਨ੍ਤਰਾਯਿਕਧਮ੍ਮવਸੇਨੇવ ਸਬ੍ਬੇ ਦੇવਾ ਜਲ਼ਾਤਿ ਪੁਚ੍ਛਾ ਸਕવਾਦਿਸ੍ਸ। ਤਤ੍ਥ ਹਤ੍ਥਸਂવਾਚਿਕਾਤਿ ਮੂਗਾ વਿਯ ਹਤ੍ਥਮੁਦ੍ਧਾਯ વਤ੍ਤਾਰੋ। ਪਰਤੋ ਅਤ੍ਥਿ ਦੇવੇਸੂਤਿ ਪੁਚ੍ਛਾ ਪਰવਾਦਿਸ੍ਸ, ਮਗ੍ਗਭਾવਨਂ ਸਨ੍ਧਾਯ ਪਟਿਞ੍ਞਾ ਸਕવਾਦਿਸ੍ਸ। ਪਟਿਞ੍ਞਾਯ ਅਧਿਪ੍ਪਾਯਂ ਅਸਲ੍ਲਕ੍ਖੇਤ੍વਾ ਪਬ੍ਬਜ੍ਜਾવਸੇਨ ਅਨੁਯੋਗੋ ਪਰવਾਦਿਸ੍ਸ।
269. Idāni brahmacariyakathā hoti. Tattha dve brahmacariyavāsā, maggabhāvanā ca pabbajjā ca. Pabbajjā sabbadevesu natthi. Maggabhāvanā ṭhapetvā asaññasatte sesesu appaṭisiddhā. Tattha ye paranimmitavasavattideve upādāya taduparidevesu maggabhāvanampi na icchanti seyyathāpi sammitiyā, te sandhāya natthi devesūti pucchā sakavādissa. ‘‘Tīhi, bhikkhave, ṭhānehi jambudīpakā manussā uttarakuruke ca manusse adhiggaṇhanti deve ca tāvatiṃse. Katamehi tīhi? Sūrā satimanto idha brahmacariyavāso’’ti (a. ni. 9.21) idaṃ suttaṃ nissāya dvepi brahmacariyavāsā natthi devesūti uppannaladdhivasena paṭiññā paravādissa. Puna dvinnampi brahmacariyānaṃ antarāyikadhammavaseneva sabbe devā jaḷāti pucchā sakavādissa. Tattha hatthasaṃvācikāti mūgā viya hatthamuddhāya vattāro. Parato atthi devesūti pucchā paravādissa, maggabhāvanaṃ sandhāya paṭiññā sakavādissa. Paṭiññāya adhippāyaṃ asallakkhetvā pabbajjāvasena anuyogo paravādissa.
੨੭੦. ਯਤ੍ਥ ਨਤ੍ਥਿ ਪਬ੍ਬਜ੍ਜਾਤਿ ਪਞ੍ਹੇ ਗਿਹੀਨਞ੍ਚੇવ ਏਕਚ੍ਚਾਨਞ੍ਚ ਦੇવਾਨਂ ਮਗ੍ਗਪਟਿਲਾਭਂ ਸਨ੍ਧਾਯ ਪਟਿਕ੍ਖੇਪੋ ਤਸ੍ਸੇવ। ਪੁਨ ਪੁਟ੍ਠੋ ਪਚ੍ਚਨ੍ਤવਾਸਿਨੋ ਚੇવ ਅਸਞ੍ਞਸਤ੍ਤੇ ਚ ਸਨ੍ਧਾਯ ਪਟਿਞ੍ਞਾ ਤਸ੍ਸੇવ। ਯੋ ਪਬ੍ਬਜਤੀਤਿਆਦੀਸੁ ਪੁਚ੍ਛਾਸੁਪਿ ਏਸੇવ ਨਯੋ। ਪੁਨ ‘‘ਅਤ੍ਥਿ ਦੇવੇਸੂ’’ਤਿ ਪਞ੍ਹੇਪਿ ਮਗ੍ਗਭਾવਨਂ ਸਨ੍ਧਾਯੇવ ਪਟਿਞ੍ਞਾ ਸਕવਾਦਿਸ੍ਸ, ‘‘ਸਬ੍ਬਦੇવੇਸੂ’’ਤਿ વੁਤ੍ਤੇ ਅਸਞ੍ਞਸਤ੍ਤੇ ਸਨ੍ਧਾਯ ਪਟਿਕ੍ਖੇਪੋ ਤਸ੍ਸੇવ।
270. Yattha natthi pabbajjāti pañhe gihīnañceva ekaccānañca devānaṃ maggapaṭilābhaṃ sandhāya paṭikkhepo tasseva. Puna puṭṭho paccantavāsino ceva asaññasatte ca sandhāya paṭiññā tasseva. Yo pabbajatītiādīsu pucchāsupi eseva nayo. Puna ‘‘atthi devesū’’ti pañhepi maggabhāvanaṃ sandhāyeva paṭiññā sakavādissa, ‘‘sabbadevesū’’ti vutte asaññasatte sandhāya paṭikkhepo tasseva.
੨੭੧. ਮਨੁਸ੍ਸੇਸੂਤਿ ਪਞ੍ਹਦ੍વਯੇ ਜਮ੍ਬੁਦੀਪਕੇ ਸਨ੍ਧਾਯ ਪਟਿਞ੍ਞਾ। ਪਚ੍ਚਨ੍ਤવਾਸਿਨੋ ਸਨ੍ਧਾਯ ਪਟਿਕ੍ਖੇਪੋ વੇਦਿਤਬ੍ਬੋ।
271. Manussesūti pañhadvaye jambudīpake sandhāya paṭiññā. Paccantavāsino sandhāya paṭikkhepo veditabbo.
ਅਤ੍ਥਿ ਯਤ੍ਥ ਅਤ੍ਥੀਤਿ ਅਤ੍ਥਿ ਤੇ ਦੇવਾ, ਅਤ੍ਥਿ વਾ ਸੋ ਪਦੇਸੋ, ਯਤ੍ਥ ਅਤ੍ਥੀਤਿ ਏવਂ ਸਤ੍ਤਪਦੇਸવਿਭਾਗਮੁਖੇਨ વਿਸ੍ਸਜ੍ਜਨਂ ਸਕવਾਦਿਸ੍ਸ। ਇਮਿਨਾ ਨਯੇਨ ਸਬ੍ਬੇ ਏਕਨ੍ਤਰਿਕਪਞ੍ਹਾ વੇਦਿਤਬ੍ਬਾ।
Atthi yattha atthīti atthi te devā, atthi vā so padeso, yattha atthīti evaṃ sattapadesavibhāgamukhena vissajjanaṃ sakavādissa. Iminā nayena sabbe ekantarikapañhā veditabbā.
੨੭੨. ਸੁਤ੍ਤਾਨੁਯੋਗੇ ਕੁਹਿਂ ਫਲੁਪ੍ਪਤ੍ਤੀਤਿ ਤਸ੍ਸ ਅਨਾਗਾਮਿਨੋ ਅਰਹਤ੍ਤਫਲੁਪ੍ਪਤ੍ਤਿ ਕੁਹਿਨ੍ਤਿ ਪੁਚ੍ਛਾ ਸਕવਾਦਿਸ੍ਸ। ਤਤ੍ਥੇવਾਤਿ ਸੁਦ੍ਧਾવਾਸੇਸੂਤਿ ਅਤ੍ਥੋ।
272. Suttānuyoge kuhiṃ phaluppattīti tassa anāgāmino arahattaphaluppatti kuhinti pucchā sakavādissa. Tatthevāti suddhāvāsesūti attho.
ਹਨ੍ਦ ਹੀਤਿ ਕਾਰਣਤ੍ਥੇ ਨਿਪਾਤੋ। ਇਦਂ વੁਤ੍ਤਂ ਹੋਤਿ – ਯਸ੍ਮਾ ਅਨਾਗਾਮਿਪੁਗ੍ਗਲੋ ਇਧ ਲੋਕੇ ਭਾવਿਤੇਨ ਮਗ੍ਗੇਨ ਤਤ੍ਥ ਸੁਦ੍ਧਾવਾਸੇਸੁ ਫਲਂ ਸਚ੍ਛਿਕਰੋਤਿ, ਨ ਤਤ੍ਥ ਅਞ੍ਞਂ ਮਗ੍ਗਂ ਭਾવੇਤਿ, ਤਸ੍ਮਾ ਨਤ੍ਥਿ ਦੇવੇਸੁ ਬ੍ਰਹ੍ਮਚਰਿਯવਾਸੋਤਿ।
Handa hīti kāraṇatthe nipāto. Idaṃ vuttaṃ hoti – yasmā anāgāmipuggalo idha loke bhāvitena maggena tattha suddhāvāsesu phalaṃ sacchikaroti, na tattha aññaṃ maggaṃ bhāveti, tasmā natthi devesu brahmacariyavāsoti.
੨. ਸਂਸਨ੍ਦਨਬ੍ਰਹ੍ਮਚਰਿਯવਣ੍ਣਨਾ
2. Saṃsandanabrahmacariyavaṇṇanā
੨੭੩. ਇਦਾਨਿ ਯਦਿ ਅਞ੍ਞਤ੍ਥ ਭਾવਿਤੇਨ ਮਗ੍ਗੇਨ ਅਞ੍ਞਤ੍ਥ ਫਲਸਚ੍ਛਿਕਿਰਿਯਾ ਹੋਤਿ, ਸੋਤਾਪਨ੍ਨਾਦੀਨਮ੍ਪਿ ਸਿਯਾਤਿ ਏਤਮਤ੍ਥਂ ਦਸ੍ਸੇਤੁਂ ਪੁਨ ਅਨਾਗਾਮੀਤਿਆਦੀਨਂ ਸਂਸਨ੍ਦਨਪੁਚ੍ਛਾ ਸਕવਾਦਿਸ੍ਸ। ਤਤ੍ਥ ਅਨਾਗਾਮਿਸ੍ਸ ਫਲਸਚ੍ਛਿਕਿਰਿਯਾਯ ਪਟਿਞ੍ਞਾ, ਸੇਸਾਨਂ ਫਲਸਚ੍ਛਿਕਿਰਿਯਾਯ ਪਟਿਕ੍ਖੇਪੋ ਪਰવਾਦਿਸ੍ਸ। ਇਧ ਭਾવਿਤਮਗ੍ਗੋ ਹਿ ਅਨਾਗਾਮੀ ਇਧવਿਹਾਯਨਿਟ੍ਠੋ ਨਾਮ ਹੋਤਿ। ਸੋ ਇਧ ਅਨਾਗਾਮਿਮਗ੍ਗਂ ਭਾવੇਤ੍વਾ ‘‘ਓਪਪਾਤਿਕੋ ਤਤ੍ਥਪਰਿਨਿਬ੍ਬਾਯੀ’’ਤਿ વਚਨਤੋ ‘‘ਪੁਨ ਮਗ੍ਗਭਾવਨਂ વਿਨਾ ਉਪਪਤ੍ਤਿવਸੇਨੇવ ਅਰਹਤ੍ਤਫਲਂ ਸਚ੍ਛਿਕਰੋਤੀ’’ਤਿ ਤਸ੍ਸ ਲਦ੍ਧਿ। ਸੋਤਾਪਨ੍ਨਸਕਦਾਗਾਮਿਨੋ ਪਨ ਤਤ੍ਥ ਮਗ੍ਗਂ ਭਾવੇਤ੍વਾ ਤਤ੍ਰੁਪਪਤ੍ਤਿਕਾ ਨਾਮ ਹੋਨ੍ਤੀਤਿ ਤੇਸਂ ਇਧਾਗਮਨਞ੍ਞੇવ ਨਤ੍ਥਿ। ਇਤਿ ਸੋ ਅਨਾਗਾਮਿਸ੍ਸ ਫਲਸਚ੍ਛਿਕਿਰਿਯਂ ਪੁਟ੍ਠੋ ਪਟਿਜਾਨਾਤਿ। ਇਤਰੇਸਂ ਪਟਿਕ੍ਖਿਪਤਿ।
273. Idāni yadi aññattha bhāvitena maggena aññattha phalasacchikiriyā hoti, sotāpannādīnampi siyāti etamatthaṃ dassetuṃ puna anāgāmītiādīnaṃ saṃsandanapucchā sakavādissa. Tattha anāgāmissa phalasacchikiriyāya paṭiññā, sesānaṃ phalasacchikiriyāya paṭikkhepo paravādissa. Idha bhāvitamaggo hi anāgāmī idhavihāyaniṭṭho nāma hoti. So idha anāgāmimaggaṃ bhāvetvā ‘‘opapātiko tatthaparinibbāyī’’ti vacanato ‘‘puna maggabhāvanaṃ vinā upapattivaseneva arahattaphalaṃ sacchikarotī’’ti tassa laddhi. Sotāpannasakadāgāmino pana tattha maggaṃ bhāvetvā tatrupapattikā nāma hontīti tesaṃ idhāgamanaññeva natthi. Iti so anāgāmissa phalasacchikiriyaṃ puṭṭho paṭijānāti. Itaresaṃ paṭikkhipati.
ਅਨਾਗਾਮੀ ਪੁਗ੍ਗਲੋ ਤਤ੍ਥ ਭਾવਿਤੇਨ ਮਗ੍ਗੇਨਾਤਿ ਪਞ੍ਹੇ ‘‘ਅਨਾਗਾਮਿਨੋ ਤਤ੍ਥ ਮਗ੍ਗਭਾવਨਾવ ਨਤ੍ਥੀ’’ਤਿ ਲਦ੍ਧਿਯਾ ਪਟਿਕ੍ਖਿਪਤਿ। ਮਗ੍ਗੋ ਚ ਭਾવੀਯਤਿ, ਨ ਚ ਕਿਲੇਸਾ ਪਹੀਯਨ੍ਤੀਤਿ ਪੁਚ੍ਛਾ ਸਕવਾਦਿਸ੍ਸ , ਰੂਪਾવਚਰਮਗ੍ਗਂ ਸਨ੍ਧਾਯ ਪਟਿਞ੍ਞਾ ਇਤਰਸ੍ਸ। ਰੂਪਾવਚਰਮਗ੍ਗੇਨ ਹਿ ਸੋ ਇਧવਿਹਾਯਨਿਟ੍ਠੋ ਨਾਮ ਜਾਤੋ।
Anāgāmī puggalo tattha bhāvitena maggenāti pañhe ‘‘anāgāmino tattha maggabhāvanāva natthī’’ti laddhiyā paṭikkhipati. Maggo ca bhāvīyati, na ca kilesā pahīyantīti pucchā sakavādissa , rūpāvacaramaggaṃ sandhāya paṭiññā itarassa. Rūpāvacaramaggena hi so idhavihāyaniṭṭho nāma jāto.
ਅਨਾਗਾਮੀ ਪੁਗ੍ਗਲੋ ਕਤਕਰਣੀਯੋਤਿ ਪਞ੍ਹੇ ‘‘ਓਪਪਾਤਿਕੋ ਤਤ੍ਥਪਰਿਨਿਬ੍ਬਾਯੀ’’ਤਿ વਚਨਤੋ ਉਪਪਤ੍ਤਿਯਾવਸ੍ਸ ਕਤਕਰਣੀਯਾਦਿਭਾવਂ ਸਨ੍ਧਾਯ ਪਟਿਜਾਨਾਤਿ। ਅਰਹਾਤਿ ਪਞ੍ਹੇ ਇਧਪਰਿਨਿਬ੍ਬਾਯਿਨੋ ਅਰਹਤੋ વਸੇਨੇવ ਪਟਿਕ੍ਖਿਪਤਿ। ਪੁਨ ਪੁਟ੍ਠੋ ਤਤ੍ਥਪਰਿਨਿਬ੍ਬਾਯਿਨੋ વਸੇਨ ਪਟਿਜਾਨਾਤਿ।
Anāgāmī puggalo katakaraṇīyoti pañhe ‘‘opapātiko tatthaparinibbāyī’’ti vacanato upapattiyāvassa katakaraṇīyādibhāvaṃ sandhāya paṭijānāti. Arahāti pañhe idhaparinibbāyino arahato vaseneva paṭikkhipati. Puna puṭṭho tatthaparinibbāyino vasena paṭijānāti.
ਅਤ੍ਥਿ ਅਰਹਤੋ ਪੁਨਬ੍ਭવੋਤਿਆਦੀਸੁਪਿ ਤਤ੍ਥਪਰਿਨਿਬ੍ਬਾਯੀ ਇਧਪਰਿਨਿਬ੍ਬਾਯੀਨਂ વਸੇਨੇવ ਅਤ੍ਥੋ વੇਦਿਤਬ੍ਬੋ। ਅਪ੍ਪਟਿવਿਦ੍ਧਾਕੁਪ੍ਪੋવ ਤਤ੍ਥਪਰਿਨਿਬ੍ਬਾਯਤੀਤਿ ਪੁਟ੍ਠੋ ਇਧੇવ ਭਾવਿਤੇਨ ਮਗ੍ਗੇਨ ਤਸ੍ਸ ਅਕੁਪ੍ਪਪਟਿવੇਧਂ ਇਚ੍ਛਨ੍ਤੋ ਪਟਿਕ੍ਖਿਪਤਿ।
Atthi arahato punabbhavotiādīsupi tatthaparinibbāyī idhaparinibbāyīnaṃ vaseneva attho veditabbo. Appaṭividdhākuppova tatthaparinibbāyatīti puṭṭho idheva bhāvitena maggena tassa akuppapaṭivedhaṃ icchanto paṭikkhipati.
ਯਥਾ ਮਿਗੋਤਿ ਪਠਮਂ ਉਦਾਹਰਣਂ ਪਰવਾਦਿਸ੍ਸ, ਦੁਤਿਯਂ ਸਕવਾਦਿਸ੍ਸ। ਸੇਸਂ ਸਬ੍ਬਤ੍ਥ ਉਤ੍ਤਾਨਤ੍ਥਮੇવਾਤਿ।
Yathā migoti paṭhamaṃ udāharaṇaṃ paravādissa, dutiyaṃ sakavādissa. Sesaṃ sabbattha uttānatthamevāti.
ਬ੍ਰਹ੍ਮਚਰਿਯਕਥਾ ਨਿਟ੍ਠਿਤਾ।
Brahmacariyakathā niṭṭhitā.
੩. ਓਧਿਸੋਕਥਾવਣ੍ਣਨਾ
3. Odhisokathāvaṇṇanā
੨੭੪. ਇਦਾਨਿ ਓਧਿਸੋਕਥਾ ਨਾਮ ਹੋਤਿ। ਤਤ੍ਥ ਯੇ ਸੋਤਾਪਨ੍ਨਾਦੀਨਂ ਨਾਨਾਭਿਸਮਯવਸੇਨ ਦੁਕ੍ਖਦਸ੍ਸਨਾਦੀਹਿ ਓਧਿਸੋ ਓਧਿਸੋ ਏਕਦੇਸੇਨ ਏਕਦੇਸੇਨ ਕਿਲੇਸਪ੍ਪਹਾਨਂ ਇਚ੍ਛਨ੍ਤਿ ਸੇਯ੍ਯਥਾਪਿ ਏਤਰਹਿ ਸਮ੍ਮਿਤਿਯਾਦਯੋ, ਤੇਸਂ ਤਂ ਲਦ੍ਧਿਂ ਭਿਨ੍ਦਿਤੁਂ ਓਧਿਸੋਤਿ ਪੁਚ੍ਛਾ ਸਕવਾਦਿਸ੍ਸ, ਪਟਿਞ੍ਞਾ ਪਰવਾਦਿਸ੍ਸ। ਪੁਨ ਅਨੁਯੋਗੋ ਸਕવਾਦਿਸ੍ਸ, ਏਕਦੇਸੇਨ ਸੋਤਾਪਨ੍ਨਾਦਿਭਾવਸ੍ਸ ਅਭਾવਤੋ ਪਟਿਕ੍ਖੇਪੋ ਪਰવਾਦਿਸ੍ਸ। ਇਮਿਨਾ ਉਪਾਯੇਨ ਸਬ੍ਬવਾਰੇਸੁ ਅਤ੍ਥੋ વੇਦਿਤਬ੍ਬੋਤਿ।
274. Idāni odhisokathā nāma hoti. Tattha ye sotāpannādīnaṃ nānābhisamayavasena dukkhadassanādīhi odhiso odhiso ekadesena ekadesena kilesappahānaṃ icchanti seyyathāpi etarahi sammitiyādayo, tesaṃ taṃ laddhiṃ bhindituṃ odhisoti pucchā sakavādissa, paṭiññā paravādissa. Puna anuyogo sakavādissa, ekadesena sotāpannādibhāvassa abhāvato paṭikkhepo paravādissa. Iminā upāyena sabbavāresu attho veditabboti.
ਓਧਿਸੋਕਥਾવਣ੍ਣਨਾ।
Odhisokathāvaṇṇanā.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਅਭਿਧਮ੍ਮਪਿਟਕ • Abhidhammapiṭaka / ਕਥਾવਤ੍ਥੁਪਾਲ਼ਿ • Kathāvatthupāḷi / ੩. ਬ੍ਰਹ੍ਮਚਰਿਯਕਥਾ • 3. Brahmacariyakathā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਮੂਲਟੀਕਾ • Pañcapakaraṇa-mūlaṭīkā
੩. ਬ੍ਰਹ੍ਮਚਰਿਯਕਥਾ • 3. Brahmacariyakathā
੪. ਓਧਿਸੋਕਥਾવਣ੍ਣਨਾ • 4. Odhisokathāvaṇṇanā
ਟੀਕਾ • Tīkā / ਅਭਿਧਮ੍ਮਪਿਟਕ (ਟੀਕਾ) • Abhidhammapiṭaka (ṭīkā) / ਪਞ੍ਚਪਕਰਣ-ਅਨੁਟੀਕਾ • Pañcapakaraṇa-anuṭīkā / ੩. ਬ੍ਰਹ੍ਮਚਰਿਯਕਥਾ • 3. Brahmacariyakathā
