| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
5. ப்³ரஹ்மசரியஸுத்தவண்ணனா
5. Brahmacariyasuttavaṇṇanā
25. பஞ்சமே நயித³ந்தி எத்த² ந-இதி படிஸேதே⁴ நிபாதோ, தஸ்ஸ ‘‘வுஸ்ஸதீ’’தி இமினா ஸம்ப³ந்தோ⁴ ‘‘ந வுஸ்ஸதீ’’தி, ய-காரோ பத³ஸந்தி⁴கரோ. இத³ங்-ஸத்³தோ³ ‘‘ஏகமிதா³ஹங், பி⁴க்க²வே, ஸமயங் உக்கட்டா²யங் விஹராமி ஸுப⁴க³வனே ஸாலராஜமூலே’’திஆதீ³ஸு (தீ³॰ நி॰ 2.91; ம॰ நி॰ 1.501) நிபாதமத்தங், ‘‘இத³ங் கோ² தங், பி⁴க்க²வே, அப்பமத்தகங் ஸீலமத்தக’’ந்திஆதீ³ஸு (தீ³॰ நி॰ 1.27) யதா²வுத்தே ஆஸன்னபச்சக்கே² ஆக³தோ.
25. Pañcame nayidanti ettha na-iti paṭisedhe nipāto, tassa ‘‘vussatī’’ti iminā sambandho ‘‘na vussatī’’ti, ya-kāro padasandhikaro. Idaṃ-saddo ‘‘ekamidāhaṃ, bhikkhave, samayaṃ ukkaṭṭhāyaṃ viharāmi subhagavane sālarājamūle’’tiādīsu (dī. ni. 2.91; ma. ni. 1.501) nipātamattaṃ, ‘‘idaṃ kho taṃ, bhikkhave, appamattakaṃ sīlamattaka’’ntiādīsu (dī. ni. 1.27) yathāvutte āsannapaccakkhe āgato.
‘‘இத³ஞ்ஹி தங் ஜேதவனங், இஸிஸங்க⁴னிஸேவிதங்;
‘‘Idañhi taṃ jetavanaṃ, isisaṅghanisevitaṃ;
ஆவுத்த²ங் த⁴ம்மராஜேன, பீதிஸஞ்ஜனநங் மமா’’தி. (ம॰ நி॰ 3.387-388; ஸங்॰ நி॰ 1.48, 101) –
Āvutthaṃ dhammarājena, pītisañjananaṃ mamā’’ti. (ma. ni. 3.387-388; saṃ. ni. 1.48, 101) –
ஆதீ³ஸு வக்க²மானே ஆஸன்னபச்சக்கே². இதா⁴பி வக்க²மானேயேவ ஆஸன்னபச்சக்கே² த³ட்ட²ப்³போ³.
Ādīsu vakkhamāne āsannapaccakkhe. Idhāpi vakkhamāneyeva āsannapaccakkhe daṭṭhabbo.
ப்³ரஹ்மசரிய-ஸத்³தோ³ –
Brahmacariya-saddo –
‘‘கிங் தே வதங் கிங் பன ப்³ரஹ்மசரியங்,
‘‘Kiṃ te vataṃ kiṃ pana brahmacariyaṃ,
கிஸ்ஸ ஸுசிண்ணஸ்ஸ அயங் விபாகோ;
Kissa suciṇṇassa ayaṃ vipāko;
இத்³தீ⁴ ஜுதீ ப³லவீரியூபபத்தி,
Iddhī jutī balavīriyūpapatti,
இத³ஞ்ச தே நாக³ மஹாவிமானங்.
Idañca te nāga mahāvimānaṃ.
‘‘அஹஞ்ச ப⁴ரியா ச மனுஸ்ஸலோகே,
‘‘Ahañca bhariyā ca manussaloke,
ஸத்³தா⁴ உபோ⁴ தா³னபதீ அஹும்ஹா;
Saddhā ubho dānapatī ahumhā;
ஓபானபூ⁴தங் மே க⁴ரங் ததா³ஸி,
Opānabhūtaṃ me gharaṃ tadāsi,
ஸந்தப்பிதா ஸமணப்³ராஹ்மணா ச.
Santappitā samaṇabrāhmaṇā ca.
‘‘தங் மே வதங் தங் பன ப்³ரஹ்மசரியங்,
‘‘Taṃ me vataṃ taṃ pana brahmacariyaṃ,
தஸ்ஸ ஸுசிண்ணஸ்ஸ அயங் விபாகோ;
Tassa suciṇṇassa ayaṃ vipāko;
இத்³தீ⁴ ஜுதீ ப³லவீரியூபபத்தி,
Iddhī jutī balavīriyūpapatti,
இத³ஞ்ச மே வீர மஹாவிமான’’ந்தி. –
Idañca me vīra mahāvimāna’’nti. –
இமஸ்மிங் புண்ணகஜாதகே (ஜா॰ 2.22.1595) தா³னே ஆக³தோ.
Imasmiṃ puṇṇakajātake (jā. 2.22.1595) dāne āgato.
‘‘கேன பாணி காமத³தோ³, கேன பாணி மது⁴ஸ்ஸவோ;
‘‘Kena pāṇi kāmadado, kena pāṇi madhussavo;
கேன தே ப்³ரஹ்மசரியேன, புஞ்ஞங் பாணிம்ஹி இஜ்ஜ²தீ’’தி. –
Kena te brahmacariyena, puññaṃ pāṇimhi ijjhatī’’ti. –
இமஸ்மிங் அங்குரபேதவத்து²ஸ்மிங் (பே॰ வ॰ 275, 277) வெய்யாவச்சே.
Imasmiṃ aṅkurapetavatthusmiṃ (pe. va. 275, 277) veyyāvacce.
‘‘ஏவங் கோ² தங், பி⁴க்க²வே, தித்திரியங் நாம ப்³ரஹ்மசரியங் அஹோஸீ’’தி இமஸ்மிங் தித்திரஜாதகே (சூளவ॰ 311) பஞ்சஸிக்கா²பத³ஸீலே.
‘‘Evaṃ kho taṃ, bhikkhave, tittiriyaṃ nāma brahmacariyaṃ ahosī’’ti imasmiṃ tittirajātake (cūḷava. 311) pañcasikkhāpadasīle.
‘‘தங் கோ² பன மே, பஞ்சஸிக², ப்³ரஹ்மசரியங் நேவ நிப்³பி³தா³ய ந விராகா³ய…பே॰… யாவதே³வ ப்³ரஹ்மலோகூபபத்தியா’’தி இமஸ்மிங் மஹாகோ³விந்த³ஸுத்தே (தீ³॰ நி॰ 2.329) ப்³ரஹ்மவிஹாரே.
‘‘Taṃ kho pana me, pañcasikha, brahmacariyaṃ neva nibbidāya na virāgāya…pe… yāvadeva brahmalokūpapattiyā’’ti imasmiṃ mahāgovindasutte (dī. ni. 2.329) brahmavihāre.
‘‘பரே அப்³ரஹ்மசாரீ ப⁴விஸ்ஸந்தி, மயமெத்த² ப்³ரஹ்மசாரீ ப⁴விஸ்ஸாமா’’தி இமஸ்மிங் ஸல்லேக²ஸுத்தே (ம॰ நி॰ 1.83) மேது²னவிரதியங்.
‘‘Pare abrahmacārī bhavissanti, mayamettha brahmacārī bhavissāmā’’ti imasmiṃ sallekhasutte (ma. ni. 1.83) methunaviratiyaṃ.
‘‘மயஞ்ச ப⁴ரியா நாதிக்கமாம,
‘‘Mayañca bhariyā nātikkamāma,
அம்ஹே ச ப⁴ரியா நாதிக்கமந்தி;
Amhe ca bhariyā nātikkamanti;
அஞ்ஞத்ர தாஹி ப்³ரஹ்மசரியங் சராம,
Aññatra tāhi brahmacariyaṃ carāma,
தஸ்மா ஹி அம்ஹங் த³ஹரா ந மீயரே’’தி. –
Tasmā hi amhaṃ daharā na mīyare’’ti. –
இமஸ்மிங் மஹாத⁴ம்மபாலஜாதகே (ஜா॰ 1.10.97) ஸதா³ரஸந்தோஸே.
Imasmiṃ mahādhammapālajātake (jā. 1.10.97) sadārasantose.
‘‘அபி⁴ஜானாமி கோ² பனாஹங், ஸாரிபுத்த, சதுரங்க³ஸமன்னாக³தங் ப்³ரஹ்மசரியங் சரிதா, தபஸ்ஸீ ஸுத³ங் ஹோமீ’’தி லோமஹங்ஸஸுத்தே (ம॰ நி॰ 1.155) வீரியே.
‘‘Abhijānāmi kho panāhaṃ, sāriputta, caturaṅgasamannāgataṃ brahmacariyaṃ caritā, tapassī sudaṃ homī’’ti lomahaṃsasutte (ma. ni. 1.155) vīriye.
‘‘ஹீனேன ப்³ரஹ்மசரியேன, க²த்தியே உபபஜ்ஜதி;
‘‘Hīnena brahmacariyena, khattiye upapajjati;
மஜ்ஜி²மேன ச தே³வத்தங், உத்தமேன விஸுஜ்ஜ²தீ’’தி. –
Majjhimena ca devattaṃ, uttamena visujjhatī’’ti. –
நிமிஜாதகே (ஜா॰ 2.22.429) அத்தத³மனவஸேன கதே அட்ட²ங்கி³கே உபோஸதே².
Nimijātake (jā. 2.22.429) attadamanavasena kate aṭṭhaṅgike uposathe.
‘‘இத³ங் கோ² பன மே, பஞ்சஸிக², ப்³ரஹ்மசரியங் ஏகந்தனிப்³பி³தா³ய விராகா³ய…பே॰… அயமேவ அரியோ அட்ட²ங்கி³கோ மக்³கோ³’’தி மஹாகோ³விந்த³ஸுத்தேயேவ (தீ³॰ நி॰ 2.329) அரியமக்³கே³.
‘‘Idaṃ kho pana me, pañcasikha, brahmacariyaṃ ekantanibbidāya virāgāya…pe… ayameva ariyo aṭṭhaṅgiko maggo’’ti mahāgovindasutteyeva (dī. ni. 2.329) ariyamagge.
‘‘தயித³ங் ப்³ரஹ்மசரியங் இத்³த⁴ஞ்சேவ பீ²தஞ்ச வித்தா²ரிகங் பா³ஹுஜஞ்ஞங் புது²பூ⁴தங் யாவ தே³வமனுஸ்ஸேஹி ஸுப்பகாஸித’’ந்தி பாஸாதி³கஸுத்தே (தீ³॰ நி॰ 3.174) ஸிக்க²த்தயஸங்க³ஹிதே ஸகலஸ்மிங் ஸாஸனே. இதா⁴பி அரியமக்³கே³ ஸாஸனே ச வத்ததி.
‘‘Tayidaṃ brahmacariyaṃ iddhañceva phītañca vitthārikaṃ bāhujaññaṃ puthubhūtaṃ yāva devamanussehi suppakāsita’’nti pāsādikasutte (dī. ni. 3.174) sikkhattayasaṅgahite sakalasmiṃ sāsane. Idhāpi ariyamagge sāsane ca vattati.
வுஸ்ஸதீதி வுஸீயதி, சரீயதீதி அத்தோ². ஜனகுஹனத்த²ந்தி ‘‘அஹோ அய்யோ ஸீலவா வத்தஸம்பன்னோ அப்பிச்சோ² ஸந்துட்டோ² மஹித்³தி⁴கோ மஹானுபா⁴வோ’’திஆதி³னா ஜனஸ்ஸ ஸத்தலோகஸ்ஸ விம்ஹாபனத்த²ங். கேசி பன ‘‘குஹனத்த²ந்தி பாபிச்ச²ஸ்ஸ இச்சா²பகதஸ்ஸ ஸதோ ஸாமந்தஜப்பனஇரியாபத²னிஸ்ஸிதபச்சயபடிஸேவனஸங்கா²தேன திவிதே⁴ன குஹனவத்து²னா குஹகபா⁴வேன ஜனஸ்ஸ விம்ஹாபனத்த²’’ந்தி வத³ந்தி. இதா⁴பி அயமேவத்தோ² த³ஸ்ஸிதோ. தேனேவாஹ ‘‘தீஹி குஹனவத்தூ²ஹி ஜனஸ்ஸ குஹனத்தா²யா’’தி, ஜனஸ்ஸ விம்ஹாபனத்தா²யாதி அத்தோ². ஜனலாபனத்த²ந்தி ‘‘ஏவரூபஸ்ஸ நாம அய்யஸ்ஸ தி³ன்னங் மஹப்ப²லங் ப⁴விஸ்ஸதீ’’தி பஸன்னசித்தேஹி ‘‘கேனத்தோ², கிங் ஆஹரீயதூ’’தி வதா³பனத்த²ங். ‘‘ஜனலபனத்த²’’ந்திபி பட²ந்தி, தஸ்ஸ பாபிச்ச²ஸ்ஸ ஸதோ பச்சயத்த²ங் பரிகதோ²பா⁴ஸாதி³வஸேன லபனபா⁴வேன உபலாபகபா⁴வேன ஜனஸ்ஸ லபனத்த²ந்தி அத்தோ². தேனேவாஹ ‘‘ந ஜனலபனத்த²ந்தி ந ஜனஸ்ஸ உபலாபனத்த²’’ந்தி.
Vussatīti vusīyati, carīyatīti attho. Janakuhanatthanti ‘‘aho ayyo sīlavā vattasampanno appiccho santuṭṭho mahiddhiko mahānubhāvo’’tiādinā janassa sattalokassa vimhāpanatthaṃ. Keci pana ‘‘kuhanatthanti pāpicchassa icchāpakatassa sato sāmantajappanairiyāpathanissitapaccayapaṭisevanasaṅkhātena tividhena kuhanavatthunā kuhakabhāvena janassa vimhāpanattha’’nti vadanti. Idhāpi ayamevattho dassito. Tenevāha ‘‘tīhi kuhanavatthūhi janassa kuhanatthāyā’’ti, janassa vimhāpanatthāyāti attho. Janalāpanatthanti ‘‘evarūpassa nāma ayyassa dinnaṃ mahapphalaṃ bhavissatī’’ti pasannacittehi ‘‘kenattho, kiṃ āharīyatū’’ti vadāpanatthaṃ. ‘‘Janalapanattha’’ntipi paṭhanti, tassa pāpicchassa sato paccayatthaṃ parikathobhāsādivasena lapanabhāvena upalāpakabhāvena janassa lapanatthanti attho. Tenevāha ‘‘na janalapanatthanti na janassa upalāpanattha’’nti.
ந இதிவாத³ப்பமொக்கா²னிஸங்ஸத்த²ந்தி எத்த² ‘‘ந லாப⁴ஸக்காரஸிலோகானிஸங்ஸத்த²’’ந்திபி பட²ந்தி. தத்த² ய்வாயங் ‘‘ஆகங்கெ²ய்ய சே, பி⁴க்க²வே, பி⁴க்கு² ‘லாபீ⁴ அஸ்ஸங் சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரான’ந்தி, ஸீலெஸ்வேவஸ்ஸ பரிபூரகாரீ’’தி (ம॰ நி॰ 1.65) ஸீலானிஸங்ஸபா⁴வேன வுத்தோ சதுபச்சயலாபோ⁴ ச. சதுன்னங் பச்சயானங் ஸக்கச்சதா³னஸங்கா²தோ ஆத³ரப³ஹுமானக³ருகரணஸங்கா²தோ ச ஸக்காரோ, யோ ச ‘‘ஸீலஸம்பன்னோ ப³ஹுஸ்ஸுதோ ஸுதத⁴ரோ ஆரத்³த⁴வீரியோ’’திஆதி³னா நயேன உக்³க³ச்ச²னகது²திகோ⁴ஸஸங்கா²தோ ஸிலோகோ ப்³ரஹ்மசரியங் வஸந்தானங் தி³ட்ட²த⁴ம்மிகோ ஆனிஸங்ஸோ, தத³த்த²ந்தி அத்தோ². கேசி பன ‘‘லாப⁴ஸக்காரஸிலோகானிஸங்ஸத்த²ந்தி பாபிச்ச²ஸ்ஸேவ ஸதோ லாபா⁴தி³க³ருதாய லாப⁴ஸக்காரஸிலோகஸங்கா²தஸ்ஸ ஆனிஸங்ஸஸ்ஸ உத³யஸ்ஸ நிப்பா²த³னத்த²’’ந்தி ஏவமத்த²ங் வத³ந்தி.
Na itivādappamokkhānisaṃsatthanti ettha ‘‘na lābhasakkārasilokānisaṃsattha’’ntipi paṭhanti. Tattha yvāyaṃ ‘‘ākaṅkheyya ce, bhikkhave, bhikkhu ‘lābhī assaṃ cīvarapiṇḍapātasenāsanagilānapaccayabhesajjaparikkhārāna’nti, sīlesvevassa paripūrakārī’’ti (ma. ni. 1.65) sīlānisaṃsabhāvena vutto catupaccayalābho ca. Catunnaṃ paccayānaṃ sakkaccadānasaṅkhāto ādarabahumānagarukaraṇasaṅkhāto ca sakkāro, yo ca ‘‘sīlasampanno bahussuto sutadharo āraddhavīriyo’’tiādinā nayena uggacchanakathutighosasaṅkhāto siloko brahmacariyaṃ vasantānaṃ diṭṭhadhammiko ānisaṃso, tadatthanti attho. Keci pana ‘‘lābhasakkārasilokānisaṃsatthanti pāpicchasseva sato lābhādigarutāya lābhasakkārasilokasaṅkhātassa ānisaṃsassa udayassa nipphādanattha’’nti evamatthaṃ vadanti.
ந இதி மங் ஜனோ ஜானாதூதி ஏவங் ப்³ரஹ்மசரியவாஸே ஸதி ‘‘ஸீலவா கல்யாணத⁴ம்மோ’’திஆதி³னா மங் லோகோ ஜானாது ஸம்பா⁴வேதூதி அத்தனோ ஸந்தகு³ணவஸேன ஸம்பா⁴வனத்த²ம்பி ந இத³ங் ப்³ரஹ்மசரியங் வுஸ்ஸதீதி ஸம்ப³ந்தோ⁴. கேசி பன ‘‘பாபிச்ச²ஸ்ஸ ஸதோ அஸந்தகு³ணஸம்பா⁴வனாதி⁴ப்பாயேன ‘இதி ஏவங்கு³ணோதி மங் லோகோ ஜானாதூ’தி ந இத³ங் ப்³ரஹ்மசரியங் வுஸ்ஸதீ’’தி ஏவமெத்த² அத்த²ங் வத³ந்தி. ஸப்³ப³த்தா²பி பனெத்த² புரிமோ புரிமோயேவ அத்த²விகப்போ ஸுந்த³ரதரோ.
Naiti maṃ jano jānātūti evaṃ brahmacariyavāse sati ‘‘sīlavā kalyāṇadhammo’’tiādinā maṃ loko jānātu sambhāvetūti attano santaguṇavasena sambhāvanatthampi na idaṃ brahmacariyaṃ vussatīti sambandho. Keci pana ‘‘pāpicchassa sato asantaguṇasambhāvanādhippāyena ‘iti evaṃguṇoti maṃ loko jānātū’ti na idaṃ brahmacariyaṃ vussatī’’ti evamettha atthaṃ vadanti. Sabbatthāpi panettha purimo purimoyeva atthavikappo sundarataro.
அத² கோ²தி எத்த² அதா²தி அஞ்ஞத்தே² நிபாதோ, கோ²தி அவதா⁴ரணே. தேன குஹனாதி³தோ அஞ்ஞத³த்த²ங்யேவ இத³ங், பி⁴க்க²வே, ப்³ரஹ்மசரியங் வுஸ்ஸதீதி த³ஸ்ஸேதி. இதா³னி தங் பயோஜனங் த³ஸ்ஸெந்தோ ‘‘ஸங்வரத்த²ங் பஹானத்த²’’ந்தி ஆஹ. தத்த² பஞ்சவிதோ⁴ ஸங்வரோ – பாதிமொக்க²ஸங்வரோ, ஸதிஸங்வரோ, ஞாணஸங்வரோ, க²ந்திஸங்வரோ, வீரியஸங்வரோதி. ‘‘இதி இமினா பாதிமொக்க²ஸங்வரேன உபேதோ ஹோதி ஸமுபேதோ’’திஆதி³னா (விப⁴॰ 511) நயேன ஆக³தோ அயங் பாதிமொக்க²ஸங்வரோ, ஸீலஸங்வரோதிபி வுச்சதி. ‘‘ரக்க²தி சக்கு²ந்த்³ரியங், சக்கு²ந்த்³ரியே ஸங்வரங் ஆபஜ்ஜதீ’’தி (ம॰ நி॰ 1.295; ஸங்॰ நி॰ 4.239; அ॰ நி॰ 3.16) ஆக³தோ அயங் ஸதிஸங்வரோ.
Atha khoti ettha athāti aññatthe nipāto, khoti avadhāraṇe. Tena kuhanādito aññadatthaṃyeva idaṃ, bhikkhave, brahmacariyaṃ vussatīti dasseti. Idāni taṃ payojanaṃ dassento ‘‘saṃvaratthaṃ pahānattha’’nti āha. Tattha pañcavidho saṃvaro – pātimokkhasaṃvaro, satisaṃvaro, ñāṇasaṃvaro, khantisaṃvaro, vīriyasaṃvaroti. ‘‘Iti iminā pātimokkhasaṃvarena upeto hoti samupeto’’tiādinā (vibha. 511) nayena āgato ayaṃ pātimokkhasaṃvaro, sīlasaṃvarotipi vuccati. ‘‘Rakkhati cakkhundriyaṃ, cakkhundriye saṃvaraṃ āpajjatī’’ti (ma. ni. 1.295; saṃ. ni. 4.239; a. ni. 3.16) āgato ayaṃ satisaṃvaro.
‘‘யானி ஸோதானி லோகஸ்மிங், ஸதி தேஸங் நிவாரணங்;
‘‘Yāni sotāni lokasmiṃ, sati tesaṃ nivāraṇaṃ;
ஸோதானங் ஸங்வரங் ப்³ரூமி, பஞ்ஞாயேதே பிதீ⁴யரே’’தி. (ஸு॰ நி॰ 1041; சூளனி॰ அஜிதமாணவபுச்சா²னித்³தே³ஸோ 4; நெத்தி॰ 4.11, 45) –
Sotānaṃ saṃvaraṃ brūmi, paññāyete pidhīyare’’ti. (su. ni. 1041; cūḷani. ajitamāṇavapucchāniddeso 4; netti. 4.11, 45) –
ஆக³தோ அயங் ஞாணஸங்வரோ. ‘‘க²மோ ஹோதி ஸீதஸ்ஸ உண்ஹஸ்ஸா’’திஆதி³னா (ம॰ நி॰ 1.24; அ॰ நி॰ 4.114; 6.58) நயேன ஆக³தோ அயங் க²ந்திஸங்வரோ.
Āgato ayaṃ ñāṇasaṃvaro. ‘‘Khamo hoti sītassa uṇhassā’’tiādinā (ma. ni. 1.24; a. ni. 4.114; 6.58) nayena āgato ayaṃ khantisaṃvaro.
‘‘உப்பன்னங் காமவிதக்கங் நாதி⁴வாஸேதீ’’திஆதி³னா (ம॰ நி॰ 1.26; அ॰ நி॰ 4.114; 6.58) நயேன ஆக³தோ அயங் வீரியஸங்வரோ.
‘‘Uppannaṃ kāmavitakkaṃ nādhivāsetī’’tiādinā (ma. ni. 1.26; a. ni. 4.114; 6.58) nayena āgato ayaṃ vīriyasaṃvaro.
அத்த²தோ பன பாணாதிபாதாதீ³னங் பஜஹனவஸேன வத்தப்படிவத்தானங் பூரணவஸேன ச பவத்தா சேதனா சேவ விரதி ச. ஸங்கே²பதோ ஸப்³போ³ காயவசீஸங்யமோ, வித்தா²ரதோ ஸத்தன்னங் ஆபத்திக்க²ந்தா⁴னங் அவீதிக்கமோ ஸீலஸங்வரோ. ஸதி ஏவ ஸதிஸங்வரோ, ஸதிப்பதா⁴னா வா குஸலா க²ந்தா⁴. ஞாணமேவ ஞாணஸங்வரோ. அதி⁴வாஸனவஸேன அதோ³ஸோ, அதோ³ஸப்பதா⁴னா வா ததா²பவத்தா குஸலா க²ந்தா⁴ க²ந்திஸங்வரோ, பஞ்ஞாதி ஏகே. காமவிதக்காதீ³னங் அபி⁴ப⁴வனவஸேன பவத்தங் வீரியமேவ வீரியஸங்வரோ. தேஸு பட²மோ காயது³ச்சரிதாதீ³ஸு து³ஸ்ஸீலஸ்ஸ ஸங்வரணதோ ஸங்வரோ, து³தியோ முட்ட²ஸ்ஸச்சஸ்ஸ , ததியோ அஞ்ஞாணஸ்ஸ, சதுத்தோ² அக்க²ந்தியா, பஞ்சமோ கோஸஜ்ஜஸ்ஸ ஸங்வரணதோ பித³ஹனதோ ஸங்வரோதி வேதி³தப்³போ³. ஏவமேதஸ்ஸ ஸங்வரஸ்ஸ அத்தா²ய ஸங்வரத்த²ங் ஸங்வரனிப்பா²த³னத்த²ந்தி அத்தோ².
Atthato pana pāṇātipātādīnaṃ pajahanavasena vattappaṭivattānaṃ pūraṇavasena ca pavattā cetanā ceva virati ca. Saṅkhepato sabbo kāyavacīsaṃyamo, vitthārato sattannaṃ āpattikkhandhānaṃ avītikkamo sīlasaṃvaro. Sati eva satisaṃvaro, satippadhānā vā kusalā khandhā. Ñāṇameva ñāṇasaṃvaro. Adhivāsanavasena adoso, adosappadhānā vā tathāpavattā kusalā khandhā khantisaṃvaro, paññāti eke. Kāmavitakkādīnaṃ abhibhavanavasena pavattaṃ vīriyameva vīriyasaṃvaro. Tesu paṭhamo kāyaduccaritādīsu dussīlassa saṃvaraṇato saṃvaro, dutiyo muṭṭhassaccassa , tatiyo aññāṇassa, catuttho akkhantiyā, pañcamo kosajjassa saṃvaraṇato pidahanato saṃvaroti veditabbo. Evametassa saṃvarassa atthāya saṃvaratthaṃ saṃvaranipphādanatthanti attho.
தீஹி பஹானேஹீதி தத³ங்க³விக்க²ம்ப⁴னஸமுச்சே²த³ஸங்கா²தேஹி தீஹி பஹானேஹி. பஞ்சவித⁴ப்பஹானம்பி இத⁴ வத்துங் வட்டதியேவ. பஞ்சவித⁴ஞ்ஹி பஹானங் தத³ங்க³விக்க²ம்ப⁴னஸமுச்சே²த³ப்படிப்பஸ்ஸத்³தி⁴னிஸ்ஸரணவஸேன. தத்த² யங் தீ³பாலோகேனேவ தமஸ்ஸ படிபக்க²பா⁴வதோ அலோபா⁴தீ³ஹி லோபா⁴தி³கஸ்ஸ நாமரூபபரிச்சே²தா³தி³விபஸ்ஸனாஞாணேஹி தஸ்ஸ தஸ்ஸ அனத்த²ஸ்ஸ பஹானங், ஸெய்யதி²த³ங் – பரிச்சாகே³ன லோபா⁴தி³மலஸ்ஸ, ஸீலேன பாணாதிபாதாதி³து³ஸ்ஸீல்யஸ்ஸ, ஸத்³தா⁴தீ³ஹி அஸ்ஸத்³தி⁴யாதி³கஸ்ஸ, நாமரூபவவத்தா²னேன ஸக்காயதி³ட்டி²யா, பச்சயபரிக்³க³ஹேன அஹேதுவிஸமஹேதுதி³ட்டீ²னங், தஸ்ஸேவ அபரபா⁴கே³ன கங்கா²விதரணேன கத²ங்கதீ²பா⁴வஸ்ஸ, கலாபஸம்மஸனேன அஹங்மமாதி கா³ஹஸ்ஸ, மக்³கா³மக்³க³வவத்தா²னேன அமக்³கே³ மக்³க³ஸஞ்ஞாய, உத³யத³ஸ்ஸனேன உச்சே²த³தி³ட்டி²யா, வயத³ஸ்ஸனேன ஸஸ்ஸததி³ட்டி²யா, ப⁴யத³ஸ்ஸனேன ஸப⁴யே அப⁴யஸஞ்ஞாய, ஆதீ³னவத³ஸ்ஸனேன அஸ்ஸாத³ஸஞ்ஞாய, நிப்³பி³தா³னுபஸ்ஸனேன அபி⁴ரதிஸஞ்ஞாய, முச்சிதுகம்யதாஞாணேன அமுச்சிதுகம்யதாய, உபெக்கா²ஞாணேன அனுபெக்கா²ய, அனுலோமேன த⁴ம்மட்டி²தியங் நிப்³பா³னே ச படிலோமபா⁴வஸ்ஸ, கொ³த்ரபு⁴னா ஸங்கா²ரனிமித்தக்³கா³ஹஸ்ஸ பஹானங், ஏதங் தத³ங்க³ப்பஹானங் நாம.
Tīhi pahānehīti tadaṅgavikkhambhanasamucchedasaṅkhātehi tīhi pahānehi. Pañcavidhappahānampi idha vattuṃ vaṭṭatiyeva. Pañcavidhañhi pahānaṃ tadaṅgavikkhambhanasamucchedappaṭippassaddhinissaraṇavasena. Tattha yaṃ dīpālokeneva tamassa paṭipakkhabhāvato alobhādīhi lobhādikassa nāmarūpaparicchedādivipassanāñāṇehi tassa tassa anatthassa pahānaṃ, seyyathidaṃ – pariccāgena lobhādimalassa, sīlena pāṇātipātādidussīlyassa, saddhādīhi assaddhiyādikassa, nāmarūpavavatthānena sakkāyadiṭṭhiyā, paccayapariggahena ahetuvisamahetudiṭṭhīnaṃ, tasseva aparabhāgena kaṅkhāvitaraṇena kathaṃkathībhāvassa, kalāpasammasanena ahaṃmamāti gāhassa, maggāmaggavavatthānena amagge maggasaññāya, udayadassanena ucchedadiṭṭhiyā, vayadassanena sassatadiṭṭhiyā, bhayadassanena sabhaye abhayasaññāya, ādīnavadassanena assādasaññāya, nibbidānupassanena abhiratisaññāya, muccitukamyatāñāṇena amuccitukamyatāya, upekkhāñāṇena anupekkhāya, anulomena dhammaṭṭhitiyaṃ nibbāne ca paṭilomabhāvassa, gotrabhunā saṅkhāranimittaggāhassa pahānaṃ, etaṃ tadaṅgappahānaṃ nāma.
யங் பன உபசாரப்பனாபே⁴தே³ன ஸமாதி⁴னா பவத்திபா⁴வனிவாரணதோ க⁴டப்பஹாரேனேவ உத³கபிட்டே² ஸேவாலஸ்ஸ, தேஸங் தேஸங் நீவரணாதி³த⁴ம்மானங் பஹானங், ஏதங் விக்க²ம்ப⁴னப்பஹானங் நாம. யங் சதுன்னங் அரியமக்³கா³னங் பா⁴விதத்தா தங்தங்மக்³க³வதோ அத்தனோ ஸந்தானே ‘‘தி³ட்டி²க³தானங் பஹானாயா’’திஆதி³னா (த⁴॰ ஸ॰ 277; விப⁴॰ 628) நயேன வுத்தஸ்ஸ ஸமுத³யபக்கி²யஸ்ஸ கிலேஸக³ஹணஸ்ஸ அச்சந்தங் அப்பவத்திபா⁴வேன ஸமுச்சி²ந்த³னங், ஏதங் ஸமுச்சே²த³ப்பஹானங் நாம. யங் பன ப²லக்க²ணே படிப்பஸ்ஸத்³த⁴த்த²ங் கிலேஸானங், ஏதங் படிப்பஸ்ஸத்³தி⁴ப்பஹானங் நாம. யங் ஸப்³ப³ஸங்க²தனிஸ்ஸடத்தா பஹீனஸப்³ப³ஸங்க²தங் நிப்³பா³னங், ஏதங் நிஸ்ஸரணப்பஹானங் நாம . தஸ்ஸ பஞ்சவித⁴ஸ்ஸபி ததா² ததா² ராகா³தி³கிலேஸானங் படினிஸ்ஸஜ்ஜனட்டே²ன ஸமதிக்கமனட்டே²ன வா பஹானஸ்ஸ அத்தா²ய, பஹானஸாத⁴னத்த²ந்தி ஏவமெத்த² அத்தோ² த³ட்ட²ப்³போ³.
Yaṃ pana upacārappanābhedena samādhinā pavattibhāvanivāraṇato ghaṭappahāreneva udakapiṭṭhe sevālassa, tesaṃ tesaṃ nīvaraṇādidhammānaṃ pahānaṃ, etaṃ vikkhambhanappahānaṃ nāma. Yaṃ catunnaṃ ariyamaggānaṃ bhāvitattā taṃtaṃmaggavato attano santāne ‘‘diṭṭhigatānaṃ pahānāyā’’tiādinā (dha. sa. 277; vibha. 628) nayena vuttassa samudayapakkhiyassa kilesagahaṇassa accantaṃ appavattibhāvena samucchindanaṃ, etaṃ samucchedappahānaṃ nāma. Yaṃ pana phalakkhaṇe paṭippassaddhatthaṃ kilesānaṃ, etaṃ paṭippassaddhippahānaṃ nāma. Yaṃ sabbasaṅkhatanissaṭattā pahīnasabbasaṅkhataṃ nibbānaṃ, etaṃ nissaraṇappahānaṃ nāma . Tassa pañcavidhassapi tathā tathā rāgādikilesānaṃ paṭinissajjanaṭṭhena samatikkamanaṭṭhena vā pahānassa atthāya, pahānasādhanatthanti evamettha attho daṭṭhabbo.
தத்த² ஸங்வரேன கிலேஸானங் சித்தஸந்தானே பவேஸனிவாரணங் பஹானேன ச பவேஸனிவாரணமேவ ஸமுக்³கா⁴தோ சாதி வத³ந்தி. உப⁴யேனபி பன யதா²ரஹங் உப⁴யங் ஸம்பஜ்ஜதீதி த³ட்ட²ப்³ப³ங். ஸீலாதி³த⁴ம்மா ஏவ ஹி ஸங்வரணதோ ஸங்வரங், பஜஹனதோ பஹானந்தி.
Tattha saṃvarena kilesānaṃ cittasantāne pavesanivāraṇaṃ pahānena ca pavesanivāraṇameva samugghāto cāti vadanti. Ubhayenapi pana yathārahaṃ ubhayaṃ sampajjatīti daṭṭhabbaṃ. Sīlādidhammā eva hi saṃvaraṇato saṃvaraṃ, pajahanato pahānanti.
அனீதிஹந்தி ஈதியோ வுச்சந்தி உபத்³த³வா தி³ட்ட²த⁴ம்மிகா ஸம்பராயிகா ச. ஈதியோ ஹந்தீதி ஈதிஹங், அனு ஈதிஹந்தி அனீதிஹங், ஸாஸனப்³ரஹ்மசரியங் மக்³க³ப்³ரஹ்மசரியஞ்ச. அத² வா ஈதீஹி அனத்தே²ஹி ஸத்³தி⁴ங் ஹனந்தி க³ச்ச²ந்தி பவத்தந்தீதி ஈதிஹா, தண்ஹாதி³உபக்கிலேஸா. நத்தி² எத்த² ஈதிஹாதி அனீதிஹங். ஈதிஹா வா யதா²வுத்தேனத்தே²ன தித்தி²யஸமயா, தப்படிபக்க²தோ இத³ங் அனீதிஹங். ‘‘அனிதிஹ’’ந்திபி பாடோ². தஸ்ஸத்தோ² – ‘‘இதிஹாய’’ந்தி த⁴ம்மேஸு அனேகங்ஸக்³கா³ஹபா⁴வதோ விசிகிச்சா² இதிஹங் நாம, ஸம்மாஸம்பு³த்³த⁴ப்பவேதி³தத்தா யதா²னுஸிட்ட²ங் படிபஜ்ஜந்தானங் நிக்கங்க²பா⁴வஸாத⁴னதோ ச நத்தி² எத்த² இதிஹந்தி அனிதிஹங், அபரபத்தியந்தி அத்தோ². வுத்தஞ்ஹேதங் ‘‘பச்சத்தங் வேதி³தப்³போ³ விஞ்ஞூஹீ’’தி, ‘‘அதக்காவசரோ’’தி (தீ³॰ நி॰ 2.67; ம॰ நி॰ 1.281; 2.337; ஸங்॰ நி॰ 1.172; மஹாவ॰ 7-8) ச. கா³தா²ப³ந்த⁴ஸுக²த்த²ங் பன ‘‘அனீதிஹ’’ந்தி தீ³க⁴ங் கத்வா பட²ந்தி. பச்சி²மங் பனெத்த² அத்த²விகப்பங் த³ஸ்ஸேதுங் ‘‘இதிஹபரிவஜ்ஜித’’ந்திஆதி³ வுத்தங்.
Anītihanti ītiyo vuccanti upaddavā diṭṭhadhammikā samparāyikā ca. Ītiyo hantīti ītihaṃ, anu ītihanti anītihaṃ, sāsanabrahmacariyaṃ maggabrahmacariyañca. Atha vā ītīhi anatthehi saddhiṃ hananti gacchanti pavattantīti ītihā, taṇhādiupakkilesā. Natthi ettha ītihāti anītihaṃ. Ītihā vā yathāvuttenatthena titthiyasamayā, tappaṭipakkhato idaṃ anītihaṃ. ‘‘Anitiha’’ntipi pāṭho. Tassattho – ‘‘itihāya’’nti dhammesu anekaṃsaggāhabhāvato vicikicchā itihaṃ nāma, sammāsambuddhappaveditattā yathānusiṭṭhaṃ paṭipajjantānaṃ nikkaṅkhabhāvasādhanato ca natthi ettha itihanti anitihaṃ, aparapattiyanti attho. Vuttañhetaṃ ‘‘paccattaṃ veditabbo viññūhī’’ti, ‘‘atakkāvacaro’’ti (dī. ni. 2.67; ma. ni. 1.281; 2.337; saṃ. ni. 1.172; mahāva. 7-8) ca. Gāthābandhasukhatthaṃ pana ‘‘anītiha’’nti dīghaṃ katvā paṭhanti. Pacchimaṃ panettha atthavikappaṃ dassetuṃ ‘‘itihaparivajjita’’ntiādi vuttaṃ.
நிப்³பா³னஸங்கா²தங் ஓக³த⁴ங் பதிட்ட²ங் பாரங் க³ச்ச²தீதி நிப்³பா³னோக³த⁴கா³மீ, விமுத்திரஸத்தா ஏகந்தேனேவ நிப்³பா³னஸம்பாபகோதி அத்தோ², தங் நிப்³பா³னோக³த⁴கா³மினங் ப்³ரஹ்மசரியங். நிப்³பா³னோக³தோ⁴தி வா அரியமக்³கோ³ வுச்சதி தேன வினா நிப்³பா³னாவகா³ஹணஸ்ஸ அஸம்ப⁴வதோ தஸ்ஸ ச நிப்³பா³னங் அனாலம்பி³த்வா அப்பவத்தனதோ, தஞ்சேதங் ஏகந்தஸம்பாத³னேன க³ச்ச²தீதி நிப்³பா³னோக³த⁴கா³மீ. அத² வா நிப்³பா³னோக³த⁴கா³மினந்தி நிப்³பா³னஸ்ஸ அந்தோகா³மினங். மக்³க³ப்³ரஹ்மசரியஞ்ஹி நிப்³பா³னங் ஆரம்மணங் கரித்வா தஸ்ஸ அந்தோ ஏவ பவத்ததீதி. இமமேவ ச அத்த²விகப்பங் த³ஸ்ஸேதுங் ‘‘நிப்³பா³னஸ்ஸ அந்தோகா³மின’’ந்திஆதி³ வுத்தங். ஸோதி யோ ஸோ ஸமதிங்ஸ பாரமியோ பூரெத்வா ஸப்³ப³கிலேஸே ப⁴ஞ்ஜித்வா அனுத்தரங் ஸம்மாஸம்போ³தி⁴ங் அபி⁴ஸம்பு³த்³தோ⁴, ஸோ ப⁴க³வா அதே³ஸயி தே³ஸேஸி . மஹந்தேஹீதி மஹாஆதுமேஹி உளாரஜ்ஜா²ஸயேஹி. மஹந்தங் நிப்³பா³னங், மஹந்தே வா ஸீலக்க²ந்தா⁴தி³கே ஏஸந்தி க³வேஸந்தீதி மஹேஸினோ, பு³த்³தா⁴த³யோ அரியா. தேஹி அனுயாதோ படிபன்னோ.
Nibbānasaṅkhātaṃ ogadhaṃ patiṭṭhaṃ pāraṃ gacchatīti nibbānogadhagāmī, vimuttirasattā ekanteneva nibbānasampāpakoti attho, taṃ nibbānogadhagāminaṃ brahmacariyaṃ. Nibbānogadhoti vā ariyamaggo vuccati tena vinā nibbānāvagāhaṇassa asambhavato tassa ca nibbānaṃ anālambitvā appavattanato, tañcetaṃ ekantasampādanena gacchatīti nibbānogadhagāmī. Atha vā nibbānogadhagāminanti nibbānassa antogāminaṃ. Maggabrahmacariyañhi nibbānaṃ ārammaṇaṃ karitvā tassa anto eva pavattatīti. Imameva ca atthavikappaṃ dassetuṃ ‘‘nibbānassa antogāmina’’ntiādi vuttaṃ. Soti yo so samatiṃsa pāramiyo pūretvā sabbakilese bhañjitvā anuttaraṃ sammāsambodhiṃ abhisambuddho, so bhagavā adesayi desesi . Mahantehīti mahāātumehi uḷārajjhāsayehi. Mahantaṃ nibbānaṃ, mahante vā sīlakkhandhādike esanti gavesantīti mahesino, buddhādayo ariyā. Tehi anuyāto paṭipanno.
யதா² பு³த்³தே⁴ன தே³ஸிதந்தி யதா² அபி⁴ஞ்ஞெய்யாதி³பா⁴வேன ஸம்மாஸம்பு³த்³தே⁴ன மயா தே³ஸிதங், ஏவங் யே ஏதங் மக்³க³ப்³ரஹ்மசரியங் தத³த்த²ங் ஸாஸனப்³ரஹ்மசரியஞ்ச படிபஜ்ஜந்தி. தே தி³ட்ட²த⁴ம்மிகஸம்பராயிகபரமத்தே²ஹி யதா²ரஹங் அனுஸாஸந்தஸ்ஸ ஸத்து² மய்ஹங் ஸாஸனகாரினோ ஓவாத³ப்படிகரா ஸகலஸ்ஸ வட்டது³க்க²ஸ்ஸ அந்தங் பரியந்தங் அப்பவத்திங் கரிஸ்ஸந்தி, து³க்க²ஸ்ஸ வா அந்தங் நிப்³பா³னங் ஸச்சி²கரிஸ்ஸந்தீதி.
Yathā buddhena desitanti yathā abhiññeyyādibhāvena sammāsambuddhena mayā desitaṃ, evaṃ ye etaṃ maggabrahmacariyaṃ tadatthaṃ sāsanabrahmacariyañca paṭipajjanti. Te diṭṭhadhammikasamparāyikaparamatthehi yathārahaṃ anusāsantassa satthu mayhaṃ sāsanakārino ovādappaṭikarā sakalassa vaṭṭadukkhassa antaṃ pariyantaṃ appavattiṃ karissanti, dukkhassa vā antaṃ nibbānaṃ sacchikarissantīti.
ப்³ரஹ்மசரியஸுத்தவண்ணனா நிட்டி²தா.
Brahmacariyasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 5. ப்³ரஹ்மசரியஸுத்தங் • 5. Brahmacariyasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 5. ப்³ரஹ்மசரியஸுத்தவண்ணனா • 5. Brahmacariyasuttavaṇṇanā
