| Library / Tipiṭaka / ತಿಪಿಟಕ • Tipiṭaka / ಅಙ್ಗುತ್ತರನಿಕಾಯ (ಅಟ್ಠಕಥಾ) • Aṅguttaranikāya (aṭṭhakathā) |
೫. ಬ್ರಹ್ಮಚರಿಯಸುತ್ತವಣ್ಣನಾ
5. Brahmacariyasuttavaṇṇanā
೨೫. ಪಞ್ಚಮೇ ಜನಕುಹನತ್ಥನ್ತಿ ತೀಹಿ ಕುಹನವತ್ಥೂಹಿ ಜನಸ್ಸ ಕುಹನತ್ಥಾಯ। ನ ಜನಲಪನತ್ಥನ್ತಿ ನ ಜನಸ್ಸ ಉಪಲಾಪನತ್ಥಂ। ನ ಲಾಭಸಕ್ಕಾರಸಿಲೋಕಾನಿಸಂಸತ್ಥನ್ತಿ ನ ಚೀವರಾದಿಥುತಿವಚನತ್ಥಂ। ನ ಇತಿವಾದಪ್ಪಮೋಕ್ಖಾನಿಸಂಸತ್ಥನ್ತಿ ನ ತೇನ ತೇನ ಕಾರಣೇನ ಕತವಾದಾನಿಸಂಸತ್ಥಂ, ನ ವಾದಸ್ಸ ಪಮೋಕ್ಖಾನಿಸಂಸತ್ಥಂ। ನ ಇತಿ ಮಂ ಜನೋ ಜಾನಾತೂತಿ ನ ‘‘ಏವಂ ಕಿರ ಏಸ ಭಿಕ್ಖು, ಏವಂ ಕಿರ ಏಸ ಭಿಕ್ಖೂ’’ತಿ ಜನಸ್ಸ ಜಾನನತ್ಥಾಯ। ಸಂವರತ್ಥನ್ತಿ ಪಞ್ಚಹಿ ಸಂವರೇಹಿ ಸಂವರಣತ್ಥಾಯ। ಪಹಾನತ್ಥನ್ತಿ ತೀಹಿ ಪಹಾನೇಹಿ ಪಜಹನತ್ಥಾಯ। ವಿರಾಗತ್ಥನ್ತಿ ರಾಗಾದೀನಂ ವಿರಜ್ಜನತ್ಥಾಯ। ನಿರೋಧತ್ಥನ್ತಿ ತೇಸಂಯೇವ ನಿರುಜ್ಝನತ್ಥಾಯ। ಅನೀತಿಹನ್ತಿ ಇತಿಹಪರಿವಜ್ಜಿತಂ, ಅಪರಪತ್ತಿಯನ್ತಿ ಅತ್ಥೋ। ನಿಬ್ಬಾನೋಗಧಗಾಮಿನನ್ತಿ ನಿಬ್ಬಾನಸ್ಸ ಅನ್ತೋಗಾಮಿನಂ। ಮಗ್ಗಬ್ರಹ್ಮಚರಿಯಞ್ಹಿ ನಿಬ್ಬಾನಂ ಆರಮ್ಮಣಂ ಕರಿತ್ವಾ ನಿಬ್ಬಾನಸ್ಸ ಅನ್ತೋಯೇವ ವತ್ತತಿ ಪವತ್ತತಿ। ಪಟಿಪಜ್ಜನ್ತೀತಿ ದುವಿಧಮ್ಪಿ ಪಟಿಪಜ್ಜನ್ತಿ। ಇಮಸ್ಮಿಂ ಸುತ್ತೇ ವಟ್ಟವಿವಟ್ಟಂ ಕಥೇತ್ವಾ ಗಾಥಾಸು ವಿವಟ್ಟಮೇವ ಕಥಿತಂ।
25. Pañcame janakuhanatthanti tīhi kuhanavatthūhi janassa kuhanatthāya. Na janalapanatthanti na janassa upalāpanatthaṃ. Na lābhasakkārasilokānisaṃsatthanti na cīvarādithutivacanatthaṃ. Na itivādappamokkhānisaṃsatthanti na tena tena kāraṇena katavādānisaṃsatthaṃ, na vādassa pamokkhānisaṃsatthaṃ. Na iti maṃ jano jānātūti na ‘‘evaṃ kira esa bhikkhu, evaṃ kira esa bhikkhū’’ti janassa jānanatthāya. Saṃvaratthanti pañcahi saṃvarehi saṃvaraṇatthāya. Pahānatthanti tīhi pahānehi pajahanatthāya. Virāgatthanti rāgādīnaṃ virajjanatthāya. Nirodhatthanti tesaṃyeva nirujjhanatthāya. Anītihanti itihaparivajjitaṃ, aparapattiyanti attho. Nibbānogadhagāminanti nibbānassa antogāminaṃ. Maggabrahmacariyañhi nibbānaṃ ārammaṇaṃ karitvā nibbānassa antoyeva vattati pavattati. Paṭipajjantīti duvidhampi paṭipajjanti. Imasmiṃ sutte vaṭṭavivaṭṭaṃ kathetvā gāthāsu vivaṭṭameva kathitaṃ.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಅಙ್ಗುತ್ತರನಿಕಾಯ • Aṅguttaranikāya / ೫. ಬ್ರಹ್ಮಚರಿಯಸುತ್ತಂ • 5. Brahmacariyasuttaṃ
ಟೀಕಾ • Tīkā / ಸುತ್ತಪಿಟಕ (ಟೀಕಾ) • Suttapiṭaka (ṭīkā) / ಅಙ್ಗುತ್ತರನಿಕಾಯ (ಟೀಕಾ) • Aṅguttaranikāya (ṭīkā) / ೫. ಬ್ರಹ್ಮಚರಿಯಸುತ್ತವಣ್ಣನಾ • 5. Brahmacariyasuttavaṇṇanā
