| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. ব্রহ্মদেৰসুত্তং
3. Brahmadevasuttaṃ
১৭৪. এৰং মে সুতং – একং সমযং ভগৰা সাৰত্থিযং ৰিহরতি জেতৰনে অনাথপিণ্ডিকস্স আরামে। তেন খো পন সমযেন অঞ্ঞতরিস্সা ব্রাহ্মণিযা ব্রহ্মদেৰো নাম পুত্তো ভগৰতো সন্তিকে অগারস্মা অনগারিযং পব্বজিতো হোতি।
174. Evaṃ me sutaṃ – ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme. Tena kho pana samayena aññatarissā brāhmaṇiyā brahmadevo nāma putto bhagavato santike agārasmā anagāriyaṃ pabbajito hoti.
অথ খো আযস্মা ব্রহ্মদেৰো একো ৰূপকট্ঠো অপ্পমত্তো আতাপী পহিতত্তো ৰিহরন্তো নচিরস্সেৰ – যস্সত্থায কুলপুত্তা সম্মদেৰ অগারস্মা অনগারিযং পব্বজন্তি, তদনুত্তরং ব্রহ্মচরিযপরিযোসানং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহাসি। ‘‘খীণা জাতি , ৰুসিতং ব্রহ্মচরিযং, কতং করণীযং, নাপরং ইত্থত্তাযা’’তি অব্ভঞ্ঞাসি। অঞ্ঞতরো চ পনাযস্মা ব্রহ্মদেৰো অরহতং অহোসি।
Atha kho āyasmā brahmadevo eko vūpakaṭṭho appamatto ātāpī pahitatto viharanto nacirasseva – yassatthāya kulaputtā sammadeva agārasmā anagāriyaṃ pabbajanti, tadanuttaraṃ brahmacariyapariyosānaṃ diṭṭheva dhamme sayaṃ abhiññā sacchikatvā upasampajja vihāsi. ‘‘Khīṇā jāti , vusitaṃ brahmacariyaṃ, kataṃ karaṇīyaṃ, nāparaṃ itthattāyā’’ti abbhaññāsi. Aññataro ca panāyasmā brahmadevo arahataṃ ahosi.
অথ খো আযস্মা ব্রহ্মদেৰো পুব্বণ্হসমযং নিৰাসেত্ৰা পত্তচীৰরমাদায সাৰত্থিং পিণ্ডায পাৰিসি। সাৰত্থিযং সপদানং পিণ্ডায চরমানো যেন সকমাতু নিৰেসনং তেনুপসঙ্কমি। তেন খো পন সমযেন আযস্মতো ব্রহ্মদেৰস্স মাতা ব্রাহ্মণী ব্রহ্মুনো আহুতিং নিচ্চং পগ্গণ্হাতি । অথ খো ব্রহ্মুনো সহম্পতিস্স এতদহোসি – ‘‘অযং খো আযস্মতো ব্রহ্মদেৰস্স মাতা ব্রাহ্মণী ব্রহ্মুনো আহুতিং নিচ্চং পগ্গণ্হাতি। যংনূনাহং তং উপসঙ্কমিত্ৰা সংৰেজেয্য’’ন্তি। অথ খো ব্রহ্মা সহম্পতি – সেয্যথাপি নাম বলৰা পুরিসো সমিঞ্জিতং ৰা বাহং পসারেয্য, পসারিতং ৰা বাহং সমিঞ্জেয্য এৰমেৰ – ব্রহ্মলোকে অন্তরহিতো আযস্মতো ব্রহ্মদেৰস্স মাতু নিৰেসনে পাতুরহোসি। অথ খো ব্রহ্মা সহম্পতি ৰেহাসং ঠিতো আযস্মতো ব্রহ্মদেৰস্স মাতরং ব্রাহ্মণিং গাথায অজ্ঝভাসি –
Atha kho āyasmā brahmadevo pubbaṇhasamayaṃ nivāsetvā pattacīvaramādāya sāvatthiṃ piṇḍāya pāvisi. Sāvatthiyaṃ sapadānaṃ piṇḍāya caramāno yena sakamātu nivesanaṃ tenupasaṅkami. Tena kho pana samayena āyasmato brahmadevassa mātā brāhmaṇī brahmuno āhutiṃ niccaṃ paggaṇhāti . Atha kho brahmuno sahampatissa etadahosi – ‘‘ayaṃ kho āyasmato brahmadevassa mātā brāhmaṇī brahmuno āhutiṃ niccaṃ paggaṇhāti. Yaṃnūnāhaṃ taṃ upasaṅkamitvā saṃvejeyya’’nti. Atha kho brahmā sahampati – seyyathāpi nāma balavā puriso samiñjitaṃ vā bāhaṃ pasāreyya, pasāritaṃ vā bāhaṃ samiñjeyya evameva – brahmaloke antarahito āyasmato brahmadevassa mātu nivesane pāturahosi. Atha kho brahmā sahampati vehāsaṃ ṭhito āyasmato brahmadevassa mātaraṃ brāhmaṇiṃ gāthāya ajjhabhāsi –
‘‘দূরে ইতো ব্রাহ্মণি ব্রহ্মলোকো,
‘‘Dūre ito brāhmaṇi brahmaloko,
যস্সাহুতিং পগ্গণ্হাসি নিচ্চং।
Yassāhutiṃ paggaṇhāsi niccaṃ;
নেতাদিসো ব্রাহ্মণি ব্রহ্মভক্খো,
Netādiso brāhmaṇi brahmabhakkho,
‘‘এসো হি তে ব্রাহ্মণি ব্রহ্মদেৰো,
‘‘Eso hi te brāhmaṇi brahmadevo,
নিরূপধিকো অতিদেৰপত্তো।
Nirūpadhiko atidevapatto;
অকিঞ্চনো ভিক্খু অনঞ্ঞপোসী,
Akiñcano bhikkhu anaññaposī,
‘‘আহুনেয্যো ৰেদগু ভাৰিতত্তো,
‘‘Āhuneyyo vedagu bhāvitatto,
নরানং দেৰানঞ্চ দক্খিণেয্যো।
Narānaṃ devānañca dakkhiṇeyyo;
বাহিত্ৰা পাপানি অনূপলিত্তো,
Bāhitvā pāpāni anūpalitto,
ঘাসেসনং ইরিযতি সীতিভূতো॥
Ghāsesanaṃ iriyati sītibhūto.
‘‘ন তস্স পচ্ছা ন পুরত্থমত্থি,
‘‘Na tassa pacchā na puratthamatthi,
সন্তো ৰিধূমো অনিঘো নিরাসো।
Santo vidhūmo anigho nirāso;
নিক্খিত্তদণ্ডো তসথাৰরেসু,
Nikkhittadaṇḍo tasathāvaresu,
সো ত্যাহুতিং ভুঞ্জতু অগ্গপিণ্ডং॥
So tyāhutiṃ bhuñjatu aggapiṇḍaṃ.
‘‘ৰিসেনিভূতো উপসন্তচিত্তো,
‘‘Visenibhūto upasantacitto,
নাগোৰ দন্তো চরতি অনেজো।
Nāgova danto carati anejo;
ভিক্খু সুসীলো সুৰিমুত্তচিত্তো,
Bhikkhu susīlo suvimuttacitto,
সো ত্যাহুতিং ভুঞ্জতু অগ্গপিণ্ডং॥
So tyāhutiṃ bhuñjatu aggapiṇḍaṃ.
‘‘তস্মিং পসন্না অৰিকম্পমানা,
‘‘Tasmiṃ pasannā avikampamānā,
পতিট্ঠপেহি দক্খিণং দক্খিণেয্যে।
Patiṭṭhapehi dakkhiṇaṃ dakkhiṇeyye;
করোহি পুঞ্ঞং সুখমাযতিকং,
Karohi puññaṃ sukhamāyatikaṃ,
দিস্ৰা মুনিং ব্রাহ্মণি ওঘতিণ্ণ’’ন্তি॥
Disvā muniṃ brāhmaṇi oghatiṇṇa’’nti.
‘‘তস্মিং পসন্না অৰিকম্পমানা,
‘‘Tasmiṃ pasannā avikampamānā,
পতিট্ঠপেসি দক্খিণং দক্খিণেয্যে।
Patiṭṭhapesi dakkhiṇaṃ dakkhiṇeyye;
অকাসি পুঞ্ঞং সুখমাযতিকং,
Akāsi puññaṃ sukhamāyatikaṃ,
দিস্ৰা মুনিং ব্রাহ্মণী ওঘতিণ্ণ’’ন্তি॥
Disvā muniṃ brāhmaṇī oghatiṇṇa’’nti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. ব্রহ্মদেৰসুত্তৰণ্ণনা • 3. Brahmadevasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. ব্রহ্মদেৰসুত্তৰণ্ণনা • 3. Brahmadevasuttavaṇṇanā
