| Library / Tipiṭaka / ਤਿਪਿਟਕ • Tipiṭaka / ਸਂਯੁਤ੍ਤਨਿਕਾਯ (ਅਟ੍ਠਕਥਾ) • Saṃyuttanikāya (aṭṭhakathā) |
੩. ਬ੍ਰਹ੍ਮਦੇવਸੁਤ੍ਤવਣ੍ਣਨਾ
3. Brahmadevasuttavaṇṇanā
੧੭੪. ਤਤਿਯੇ ਏਕੋਤਿ ਠਾਨਾਦੀਸੁ ਇਰਿਯਾਪਥੇਸੁ ਏਕਕੋ, ਏਕવਿਹਾਰੀਤਿ ਅਤ੍ਥੋ। વੂਪਕਟ੍ਠੋਤਿ ਕਾਯੇਨ વੂਪਕਟ੍ਠੋ ਨਿਸ੍ਸਟੋ। ਅਪ੍ਪਮਤ੍ਤੋਤਿ ਸਤਿਯਾ ਅવਿਪ੍ਪવਾਸੇ ਠਿਤੋ। ਆਤਾਪੀਤਿ વੀਰਿਯਾਤਾਪੇਨ ਸਮਨ੍ਨਾਗਤੋ। ਪਹਿਤਤ੍ਤੋਤਿ ਪੇਸਿਤਤ੍ਤੋ। ਕੁਲਪੁਤ੍ਤਾਤਿ ਆਚਾਰਕੁਲਪੁਤ੍ਤਾ। ਸਮ੍ਮਦੇવਾਤਿ ਨ ਇਣਟ੍ਟਾ ਨ ਭਯਟ੍ਟਾ ਨ ਜੀવਿਤਪਕਤਾ ਹੁਤ੍વਾ, ਯਥਾ વਾ ਤਥਾ વਾ ਪਬ੍ਬਜਿਤਾਪਿ ਯੇ ਅਨੁਲੋਮਪਟਿਪਦਂ ਪੂਰੇਨ੍ਤਿ, ਤੇ ਸਮ੍ਮਦੇવ ਅਗਾਰਸ੍ਮਾ ਅਨਗਾਰਿਯਂ ਪਬ੍ਬਜਨ੍ਤਿ ਨਾਮ। ਬ੍ਰਹ੍ਮਚਰਿਯਪਰਿਯੋਸਾਨਨ੍ਤਿ ਮਗ੍ਗਬ੍ਰਹ੍ਮਚਰਿਯਸ੍ਸ ਪਰਿਯੋਸਾਨਭੂਤਂ ਅਰਿਯਫਲਂ। ਦਿਟ੍ਠੇવ ਧਮ੍ਮੇਤਿ ਇਮਸ੍ਮਿਂਯੇવ ਅਤ੍ਤਭਾવੇ। ਸਯਂ ਅਭਿਞ੍ਞਾ ਸਚ੍ਛਿਕਤ੍વਾਤਿ ਸਾਮਂ ਜਾਨਿਤ੍વਾ ਪਚ੍ਚਕ੍ਖਂ ਕਤ੍વਾ। ਉਪਸਮ੍ਪਜ੍ਜਾਤਿ ਪਟਿਲਭਿਤ੍વਾ ਸਮ੍ਪਾਦੇਤ੍વਾ વਿਹਾਸਿ। ਏવਂ વਿਹਰਨ੍ਤੋ ਚ ਖੀਣਾ ਜਾਤਿ…ਪੇ॰… ਅਬ੍ਭਞ੍ਞਾਸੀਤਿ। ਏਤੇਨਸ੍ਸ ਪਚ੍ਚવੇਕ੍ਖਣਭੂਮਿ ਦਸ੍ਸਿਤਾ।
174. Tatiye ekoti ṭhānādīsu iriyāpathesu ekako, ekavihārīti attho. Vūpakaṭṭhoti kāyena vūpakaṭṭho nissaṭo. Appamattoti satiyā avippavāse ṭhito. Ātāpīti vīriyātāpena samannāgato. Pahitattoti pesitatto. Kulaputtāti ācārakulaputtā. Sammadevāti na iṇaṭṭā na bhayaṭṭā na jīvitapakatā hutvā, yathā vā tathā vā pabbajitāpi ye anulomapaṭipadaṃ pūrenti, te sammadeva agārasmā anagāriyaṃ pabbajanti nāma. Brahmacariyapariyosānanti maggabrahmacariyassa pariyosānabhūtaṃ ariyaphalaṃ. Diṭṭheva dhammeti imasmiṃyeva attabhāve. Sayaṃ abhiññā sacchikatvāti sāmaṃ jānitvā paccakkhaṃ katvā. Upasampajjāti paṭilabhitvā sampādetvā vihāsi. Evaṃ viharanto ca khīṇā jāti…pe… abbhaññāsīti. Etenassa paccavekkhaṇabhūmi dassitā.
ਕਤਮਾ ਪਨਸ੍ਸ ਜਾਤਿ ਖੀਣਾ, ਕਥਞ੍ਚ ਨਂ ਅਬ੍ਭਞ੍ਞਾਸੀਤਿ? વੁਚ੍ਚਤੇ, ਨ ਤਾવਸ੍ਸ ਅਤੀਤਾ ਜਾਤਿ ਖੀਣਾ ਪੁਬ੍ਬੇવ ਖੀਣਤ੍ਤਾ, ਨ ਅਨਾਗਤਾ ਤਤ੍ਥ વਾਯਾਮਾਭਾવਤੋ, ਨ ਪਚ੍ਚੁਪ੍ਪਨ੍ਨਾ વਿਜ੍ਜਮਾਨਤ੍ਤਾ। ਮਗ੍ਗਸ੍ਸ ਪਨ ਅਭਾવਿਤਤ੍ਤਾ ਯਾ ਉਪ੍ਪਜ੍ਜੇਯ੍ਯ ਏਕਚਤੁਪਞ੍ਚવੋਕਾਰਭવੇਸੁ ਏਕਚਤੁਪਞ੍ਚਕ੍ਖਨ੍ਧਪ੍ਪਭੇਦਾ ਜਾਤਿ। ਸਾ ਮਗ੍ਗਸ੍ਸ ਭਾવਿਤਤ੍ਤਾ ਅਨੁਪ੍ਪਾਦਧਮ੍ਮਤਂ ਆਪਜ੍ਜਨੇਨ ਖੀਣਾ। ਤਂ ਸੋ ਮਗ੍ਗਭਾવਨਾਯ ਪਹੀਨਕਿਲੇਸੇ ਪਚ੍ਚવੇਕ੍ਖਿਤ੍વਾ – ‘‘ਕਿਲੇਸਾਭਾવੇ વਿਜ੍ਜਮਾਨਮ੍ਪਿ ਕਮ੍ਮਂ ਆਯਤਿਂ ਅਪ੍ਪਟਿਸਨ੍ਧਿਕਂ ਹੋਤੀ’’ਤਿ ਜਾਨਨ੍ਤੋ ਜਾਨਾਤਿ।
Katamā panassa jāti khīṇā, kathañca naṃ abbhaññāsīti? Vuccate, na tāvassa atītā jāti khīṇā pubbeva khīṇattā, na anāgatā tattha vāyāmābhāvato, na paccuppannā vijjamānattā. Maggassa pana abhāvitattā yā uppajjeyya ekacatupañcavokārabhavesu ekacatupañcakkhandhappabhedā jāti. Sā maggassa bhāvitattā anuppādadhammataṃ āpajjanena khīṇā. Taṃ so maggabhāvanāya pahīnakilese paccavekkhitvā – ‘‘kilesābhāve vijjamānampi kammaṃ āyatiṃ appaṭisandhikaṃ hotī’’ti jānanto jānāti.
વੁਸਿਤਨ੍ਤਿ વੁਤ੍ਥਂ ਪਰਿવੁਤ੍ਥਂ, ਕਤਂ ਚਰਿਤਂ ਨਿਟ੍ਠਾਪਿਤਨ੍ਤਿ ਅਤ੍ਥੋ। ਬ੍ਰਹ੍ਮਚਰਿਯਨ੍ਤਿ ਮਗ੍ਗਬ੍ਰਹ੍ਮਚਰਿਯਂ । ਕਤਂ ਕਰਣੀਯਨ੍ਤਿ ਚਤੂਸੁ ਸਚ੍ਚੇਸੁ ਚਤੂਹਿ ਮਗ੍ਗੇਹਿ ਪਰਿਞ੍ਞਾਪਹਾਨਸਚ੍ਛਿਕਿਰਿਯਭਾવਨਾવਸੇਨ ਸੋਲ਼ਸવਿਧਮ੍ਪਿ ਕਿਚ੍ਚਂ ਨਿਟ੍ਠਾਪਿਤਨ੍ਤਿ ਅਤ੍ਥੋ। ਨਾਪਰਂ ਇਤ੍ਥਤ੍ਤਾਯਾਤਿ ਇਦਾਨਿ ਪੁਨ ਇਤ੍ਥਭਾવਾਯ, ਏવਂ ਸੋਲ਼ਸਕਿਚ੍ਚਭਾવਾਯ, ਕਿਲੇਸਕ੍ਖਯਾਯ વਾ ਕਤਮਗ੍ਗਭਾવਨਾ ਨਤ੍ਥੀਤਿ। ਅਥ વਾ ਇਤ੍ਥਤ੍ਤਾਯਾਤਿ ਇਤ੍ਥਤ੍ਤਭਾવਤੋ, ਇਮਸ੍ਮਾ ਏવਂਪਕਾਰਾ ਇਦਾਨਿ વਤ੍ਤਮਾਨਕ੍ਖਨ੍ਧਸਨ੍ਤਾਨਾ ਅਪਰਂ ਖਨ੍ਧਸਨ੍ਤਾਨਂ ਨਤ੍ਥਿ, ਇਮੇ ਪਨ ਪਞ੍ਚਕ੍ਖਨ੍ਧਾ ਪਰਿਞ੍ਞਾਤਾ ਤਿਟ੍ਠਨ੍ਤਿ ਛਿਨ੍ਨਮੂਲਕੋ ਰੁਕ੍ਖੋ વਿਯਾਤਿ ਅਬ੍ਭਞ੍ਞਾਸਿ। ਅਞ੍ਞਤਰੋਤਿ ਏਕੋ। ਅਰਹਤਨ੍ਤਿ ਅਰਹਨ੍ਤਾਨਂ, ਭਗવਤੋ ਸਾવਕਾਨਂ ਅਰਹਤਂ ਅਬ੍ਭਨ੍ਤਰੋ ਅਹੋਸਿ।
Vusitanti vutthaṃ parivutthaṃ, kataṃ caritaṃ niṭṭhāpitanti attho. Brahmacariyanti maggabrahmacariyaṃ . Kataṃ karaṇīyanti catūsu saccesu catūhi maggehi pariññāpahānasacchikiriyabhāvanāvasena soḷasavidhampi kiccaṃ niṭṭhāpitanti attho. Nāparaṃ itthattāyāti idāni puna itthabhāvāya, evaṃ soḷasakiccabhāvāya, kilesakkhayāya vā katamaggabhāvanā natthīti. Atha vā itthattāyāti itthattabhāvato, imasmā evaṃpakārā idāni vattamānakkhandhasantānā aparaṃ khandhasantānaṃ natthi, ime pana pañcakkhandhā pariññātā tiṭṭhanti chinnamūlako rukkho viyāti abbhaññāsi. Aññataroti eko. Arahatanti arahantānaṃ, bhagavato sāvakānaṃ arahataṃ abbhantaro ahosi.
ਸਪਦਾਨਨ੍ਤਿ ਸਪਦਾਨਚਾਰਂ, ਸਮ੍ਪਤ੍ਤਘਰਂ ਅਨੁਕ੍ਕਮ੍ਮ ਪਟਿਪਾਟਿਯਾ ਚਰਨ੍ਤੋ। ਉਪਸਙ੍ਕਮੀਤਿ ਉਪਸਙ੍ਕਮਨ੍ਤੋ। ਮਾਤਾ ਪਨਸ੍ਸ ਪੁਤ੍ਤਂ ਦਿਸ੍વਾવ ਘਰਾ ਨਿਕ੍ਖਮ੍ਮ ਪਤ੍ਤਂ ਗਹੇਤ੍વਾ ਅਨ੍ਤੋਨਿવੇਸਨਂ ਪવੇਸੇਤ੍વਾ ਪਞ੍ਞਤ੍ਤਾਸਨੇ ਨਿਸੀਦਾਪੇਸਿ।
Sapadānanti sapadānacāraṃ, sampattagharaṃ anukkamma paṭipāṭiyā caranto. Upasaṅkamīti upasaṅkamanto. Mātā panassa puttaṃ disvāva gharā nikkhamma pattaṃ gahetvā antonivesanaṃ pavesetvā paññattāsane nisīdāpesi.
ਆਹੁਤਿਂ ਨਿਚ੍ਚਂ ਪਗ੍ਗਣ੍ਹਾਤੀਤਿ ਨਿਚ੍ਚਕਾਲੇ ਆਹੁਤਿਪਿਣ੍ਡਂ ਪਗ੍ਗਣ੍ਹਾਤਿ। ਤਂ ਦਿવਸਂ ਪਨ ਤਸ੍ਮਿਂ ਘਰੇ ਭੂਤਬਲਿਕਮ੍ਮਂ ਹੋਤਿ। ਸਬ੍ਬਗੇਹਂ ਹਰਿਤੁਪਲਿਤ੍ਤਂ વਿਪ੍ਪਕਿਣ੍ਣਲਾਜਂ વਨਮਾਲਪਰਿਕ੍ਖਿਤ੍ਤਂ ਉਸ੍ਸਿਤਦ੍ਧਜਪਟਾਕਂ ਤਤ੍ਥ ਤਤ੍ਥ ਪੁਣ੍ਣਘਰੇ ਠਪੇਤ੍વਾ ਦਣ੍ਡਦੀਪਿਕਾ ਜਾਲੇਤ੍વਾ ਗਨ੍ਧਚੁਣ੍ਣਮਾਲਾਦੀਹਿ ਅਲਙ੍ਕਤਂ, ਸਮਨ੍ਤਤੋ ਸਞ੍ਛਾਦਿਯਮਾਨਾ ਧੂਮਕਟਚ੍ਛੁ ਅਹੋਸਿ। ਸਾਪਿ ਬ੍ਰਾਹ੍ਮਣੀ ਕਾਲਸ੍ਸੇવ વੁਟ੍ਠਾਯ ਸੋਲ਼ਸਹਿ ਗਨ੍ਧੋਦਕਘਟੇਹਿ ਨ੍ਹਾਯਿਤ੍વਾ ਸਬ੍ਬਾਲਙ੍ਕਾਰੇਨ ਅਤ੍ਤਭਾવਂ ਅਲਙ੍ਕਰਿ। ਸਾ ਤਸ੍ਮਿਂ ਸਮਯੇ ਮਹਾਖੀਣਾਸવਂ ਨਿਸੀਦਾਪੇਤ੍વਾ, ਯਾਗੁਉਲ਼ੁਙ੍ਕਮਤ੍ਤਮ੍ਪਿ ਅਦਤ੍વਾ, ‘‘ਮਹਾਬ੍ਰਹ੍ਮਂ ਭੋਜੇਸ੍ਸਾਮੀ’’ਤਿ ਸੁવਣ੍ਣਪਾਤਿਯਂ ਪਾਯਾਸਂ ਪੂਰੇਤ੍વਾ ਸਪ੍ਪਿਮਧੁਸਕ੍ਖਰਾਦੀਹਿ ਯੋਜੇਤ੍વਾ ਨਿવੇਸਨਸ੍ਸ ਪਚ੍ਛਾਭਾਗੇ ਹਰਿਤੁਪਲਿਤ੍ਤਭਾવਾਦੀਹਿ ਅਲਙ੍ਕਤਾ ਭੂਤਪੀਠਿਕਾ ਅਤ੍ਥਿ। ਸਾ ਤਂ ਪਾਤਿਂ ਆਦਾਯ, ਤਤ੍ਥ ਗਨ੍ਤ੍વਾ, ਚਤੂਸੁ ਕੋਣੇਸੁ ਮਜ੍ਝੇ ਚ ਏਕੇਕਂ ਪਾਯਾਸਪਿਣ੍ਡਂ ਠਪੇਤ੍વਾ, ਏਕਂ ਪਿਣ੍ਡਂ ਹਤ੍ਥੇਨ ਗਹੇਤ੍વਾ, ਯਾવ ਕਪ੍ਪਰਾ ਸਪ੍ਪਿਨਾ ਪਗ੍ਘਰਨ੍ਤੇਨ ਪਥવਿਯਂ ਜਾਣੁਮਣ੍ਡਲਂ ਪਤਿਟ੍ਠਾਪੇਤ੍વਾ ‘‘ਭੁਞ੍ਜਤੁ ਭવਂ ਮਹਾਬ੍ਰਹ੍ਮਾ, ਸਾਯਤੁ ਭવਂ ਮਹਾਬ੍ਰਹ੍ਮਾ, ਤਪ੍ਪੇਤੁ ਭવਂ ਮਹਾਬ੍ਰਹ੍ਮਾ’’ਤਿ વਦਮਾਨਾ ਬ੍ਰਹ੍ਮਾਨਂ ਭੋਜੇਤਿ।
Āhutiṃ niccaṃ paggaṇhātīti niccakāle āhutipiṇḍaṃ paggaṇhāti. Taṃ divasaṃ pana tasmiṃ ghare bhūtabalikammaṃ hoti. Sabbagehaṃ haritupalittaṃ vippakiṇṇalājaṃ vanamālaparikkhittaṃ ussitaddhajapaṭākaṃ tattha tattha puṇṇaghare ṭhapetvā daṇḍadīpikā jāletvā gandhacuṇṇamālādīhi alaṅkataṃ, samantato sañchādiyamānā dhūmakaṭacchu ahosi. Sāpi brāhmaṇī kālasseva vuṭṭhāya soḷasahi gandhodakaghaṭehi nhāyitvā sabbālaṅkārena attabhāvaṃ alaṅkari. Sā tasmiṃ samaye mahākhīṇāsavaṃ nisīdāpetvā, yāguuḷuṅkamattampi adatvā, ‘‘mahābrahmaṃ bhojessāmī’’ti suvaṇṇapātiyaṃ pāyāsaṃ pūretvā sappimadhusakkharādīhi yojetvā nivesanassa pacchābhāge haritupalittabhāvādīhi alaṅkatā bhūtapīṭhikā atthi. Sā taṃ pātiṃ ādāya, tattha gantvā, catūsu koṇesu majjhe ca ekekaṃ pāyāsapiṇḍaṃ ṭhapetvā, ekaṃ piṇḍaṃ hatthena gahetvā, yāva kapparā sappinā paggharantena pathaviyaṃ jāṇumaṇḍalaṃ patiṭṭhāpetvā ‘‘bhuñjatu bhavaṃ mahābrahmā, sāyatu bhavaṃ mahābrahmā, tappetu bhavaṃ mahābrahmā’’ti vadamānā brahmānaṃ bhojeti.
ਏਤਦਹੋਸੀਤਿ ਮਹਾਖੀਣਾਸવਸ੍ਸ ਸੀਲਗਨ੍ਧਂ ਛਦੇવਲੋਕੇ ਅਜ੍ਝੋਤ੍ਥਰਿਤ੍વਾ ਬ੍ਰਹ੍ਮਲੋਕਂ ਉਪਗਤਂ ਘਾਯਮਾਨਸ੍ਸ ਏਤਂ ਅਹੋਸਿ। ਸਂવੇਜੇਯ੍ਯਨ੍ਤਿ ਚੋਦੇਯ੍ਯਂ, ਸਮ੍ਮਾਪਟਿਪਤ੍ਤਿਯਂ ਯੋਜੇਯ੍ਯਂ। ‘ਅਯਂ ਹਿ ਏવਰੂਪਂ ਅਗ੍ਗਦਕ੍ਖਿਣੇਯ੍ਯਂ ਮਹਾਖੀਣਾਸવਂ ਨਿਸੀਦਾਪੇਤ੍વਾ ਯਾਗੁਉਲ਼ੁਙ੍ਕਮਤ੍ਤਮ੍ਪਿ ਅਦਤ੍વਾ, ‘‘ਮਹਾਬ੍ਰਹ੍ਮਂ ਭੋਜੇਸ੍ਸਾਮੀ’’ਤਿ ਤੁਲਂ ਪਹਾਯ ਹਤ੍ਥੇਨ ਤੁਲਯਨ੍ਤੀ વਿਯ, ਭੇਰਿਂ ਪਹਾਯ ਕੁਚ੍ਛਿਂ વਾਦੇਨ੍ਤੀ વਿਯ, ਅਗ੍ਗਿਂ ਪਹਾਯ ਖਜ੍ਜੋਪਨਕਂ ਧਮਮਾਨਾ વਿਯ ਭੂਤਬਲਿਂ ਕੁਰੁਮਾਨਾ ਆਹਿਣ੍ਡਤਿ। ਗਚ੍ਛਾਮਿਸ੍ਸਾ ਮਿਚ੍ਛਾਦਸ੍ਸਨਂ ਭਿਨ੍ਦਿਤ੍વਾ ਅਪਾਯਮਗ੍ਗਤੋ ਉਦ੍ਧਰਿਤ੍વਾ ਯਥਾ ਅਸੀਤਿਕੋਟਿਧਨਂ ਬੁਦ੍ਧਸਾਸਨੇ વਿਪ੍ਪਕਿਰਿਤ੍વਾ ਸਗ੍ਗਮਗ੍ਗਂ ਆਰੋਹਤਿ, ਤਥਾ ਕਰੋਮੀਤਿ વੁਤ੍ਤਂ ਹੋਤਿ।
Etadahosīti mahākhīṇāsavassa sīlagandhaṃ chadevaloke ajjhottharitvā brahmalokaṃ upagataṃ ghāyamānassa etaṃ ahosi. Saṃvejeyyanti codeyyaṃ, sammāpaṭipattiyaṃ yojeyyaṃ. ‘Ayaṃ hi evarūpaṃ aggadakkhiṇeyyaṃ mahākhīṇāsavaṃ nisīdāpetvā yāguuḷuṅkamattampi adatvā, ‘‘mahābrahmaṃ bhojessāmī’’ti tulaṃ pahāya hatthena tulayantī viya, bheriṃ pahāya kucchiṃ vādentī viya, aggiṃ pahāya khajjopanakaṃ dhamamānā viya bhūtabaliṃ kurumānā āhiṇḍati. Gacchāmissā micchādassanaṃ bhinditvā apāyamaggato uddharitvā yathā asītikoṭidhanaṃ buddhasāsane vippakiritvā saggamaggaṃ ārohati, tathā karomīti vuttaṃ hoti.
ਦੂਰੇ ਇਤੋਤਿ ਇਮਮ੍ਹਾ ਠਾਨਾ ਦੂਰੇ ਬ੍ਰਹ੍ਮਲੋਕੋ। ਤਤੋ ਹਿ ਕੂਟਾਗਾਰਮਤ੍ਤਾ ਸਿਲਾ ਪਾਤਿਤਾ ਏਕੇਨ ਅਹੋਰਤ੍ਤੇਨ ਅਟ੍ਠਚਤ੍ਤਾਲੀਸਯੋਜਨਸਹਸ੍ਸਾਨਿ ਖੇਪਯਮਾਨਾ ਚਤੂਹਿ ਮਾਸੇਹਿ ਪਥવਿਯਂ ਪਤਿਟ੍ਠਹੇਯ੍ਯ, ਸਬ੍ਬਹੇਟ੍ਠਿਮੋਪਿ ਬ੍ਰਹ੍ਮਲੋਕੋ ਏવਂ ਦੂਰੇ। ਯਸ੍ਸਾਹੁਤਿਨ੍ਤਿ ਯਸ੍ਸ ਬ੍ਰਹ੍ਮੁਨੋ ਆਹੁਤਿਂ ਪਗ੍ਗਣ੍ਹਾਸਿ, ਤਸ੍ਸ ਬ੍ਰਹ੍ਮਲੋਕੋ ਦੂਰੇਤਿ ਅਤ੍ਥੋ। ਬ੍ਰਹ੍ਮਪਥਨ੍ਤਿ ਏਤ੍ਥ ਬ੍ਰਹ੍ਮਪਥੋ ਨਾਮ ਚਤ੍ਤਾਰਿ ਕੁਸਲਜ੍ਝਾਨਾਨਿ, વਿਪਾਕਜ੍ਝਾਨਾਨਿ ਪਨ ਨੇਸਂ ਜੀવਿਤਪਥੋ ਨਾਮ, ਤਂ ਬ੍ਰਹ੍ਮਪਥਂ ਅਜਾਨਨ੍ਤੀ ਤ੍વਂ ਕਿਂ ਜਪ੍ਪਸਿ વਿਪ੍ਪਲਪਸਿ? ਬ੍ਰਹ੍ਮਾਨੋ ਹਿ ਸਪ੍ਪੀਤਿਕਜ੍ਝਾਨੇਨ ਯਾਪੇਨ੍ਤਿ, ਨ ਏਤਂ ਤਿਣਬੀਜਾਨਿ ਪਕ੍ਖਿਪਿਤ੍વਾ ਰਨ੍ਧਂ ਗੋਯੂਸਂ ਖਾਦਨ੍ਤਿ, ਮਾ ਅਕਾਰਣਾ ਕਿਲਮਸੀਤਿ।
Dūre itoti imamhā ṭhānā dūre brahmaloko. Tato hi kūṭāgāramattā silā pātitā ekena ahorattena aṭṭhacattālīsayojanasahassāni khepayamānā catūhi māsehi pathaviyaṃ patiṭṭhaheyya, sabbaheṭṭhimopi brahmaloko evaṃ dūre. Yassāhutinti yassa brahmuno āhutiṃ paggaṇhāsi, tassa brahmaloko dūreti attho. Brahmapathanti ettha brahmapatho nāma cattāri kusalajjhānāni, vipākajjhānāni pana nesaṃ jīvitapatho nāma, taṃ brahmapathaṃ ajānantī tvaṃ kiṃ jappasi vippalapasi? Brahmāno hi sappītikajjhānena yāpenti, na etaṃ tiṇabījāni pakkhipitvā randhaṃ goyūsaṃ khādanti, mā akāraṇā kilamasīti.
ਏવਂ વਤ੍વਾ ਪੁਨ ਸੋ ਮਹਾਬ੍ਰਹ੍ਮਾ ਅਞ੍ਜਲਿਂ ਪਗ੍ਗਯ੍ਹ ਅવਕੁਜ੍ਜੋ ਹੁਤ੍વਾ ਥੇਰਂ ਉਪਦਿਸਨ੍ਤੋ ਏਸੋ ਹਿ ਤੇ ਬ੍ਰਾਹ੍ਮਣਿ ਬ੍ਰਹ੍ਮਦੇવੋਤਿਆਦਿਮਾਹ। ਤਤ੍ਥ ਨਿਰੂਪਧਿਕੋਤਿ ਕਿਲੇਸਾਭਿਸਙ੍ਖਾਰਕਾਮਗੁਣੋਪਧੀਹਿ વਿਰਹਿਤੋ। ਅਤਿਦੇવਪਤ੍ਤੋਤਿ ਦੇવਾਨਂ ਅਤਿਦੇવਭਾવਂ ਬ੍ਰਹ੍ਮਾਨਂ ਅਤਿਬ੍ਰਹ੍ਮਭਾવਂ ਪਤ੍ਤੋ। ਅਨਞ੍ਞਪੋਸੀਤਿ ਠਪੇਤ੍વਾ ਇਮਂ ਅਤ੍ਤਭਾવਂ ਅਞ੍ਞਸ੍ਸ ਅਤ੍ਤਭਾવਸ੍ਸ વਾ ਪੁਤ੍ਤਦਾਰਸ੍ਸ વਾ ਅਪੋਸਨਤਾਯ ਅਨਞ੍ਞਪੋਸੀ।
Evaṃ vatvā puna so mahābrahmā añjaliṃ paggayha avakujjo hutvā theraṃ upadisanto eso hi te brāhmaṇi brahmadevotiādimāha. Tattha nirūpadhikoti kilesābhisaṅkhārakāmaguṇopadhīhi virahito. Atidevapattoti devānaṃ atidevabhāvaṃ brahmānaṃ atibrahmabhāvaṃ patto. Anaññaposīti ṭhapetvā imaṃ attabhāvaṃ aññassa attabhāvassa vā puttadārassa vā aposanatāya anaññaposī.
ਆਹੁਨੇਯ੍ਯੋਤਿ ਆਹੁਨਪਿਣ੍ਡਂ ਪਟਿਗ੍ਗਹੇਤੁਂ ਯੁਤ੍ਤੋ। વੇਦਗੂਤਿ ਚਤੁਮਗ੍ਗਸਙ੍ਖਾਤੇਹਿ વੇਦੇਹਿ ਦੁਕ੍ਖਸ੍ਸਨ੍ਤਂ ਗਤੋ। ਭਾવਿਤਤ੍ਤੋਤਿ ਅਤ੍ਤਾਨਂ ਭਾવੇਤ੍વਾ વਡ੍ਢੇਤ੍વਾ ਠਿਤੋ। ਅਨੂਪਲਿਤ੍ਤੋਤਿ ਤਣ੍ਹਾਦੀਹਿ ਲੇਪੇਹਿ ਆਲਿਤ੍ਤੋ। ਘਾਸੇਸਨਂ ਇਰਿਯਤੀਤਿ ਆਹਾਰਪਰਿਯੇਸਨਂ ਚਰਤਿ।
Āhuneyyoti āhunapiṇḍaṃ paṭiggahetuṃ yutto. Vedagūti catumaggasaṅkhātehi vedehi dukkhassantaṃ gato. Bhāvitattoti attānaṃ bhāvetvā vaḍḍhetvā ṭhito. Anūpalittoti taṇhādīhi lepehi ālitto. Ghāsesanaṃ iriyatīti āhārapariyesanaṃ carati.
ਨ ਤਸ੍ਸ ਪਚ੍ਛਾ ਨ ਪੁਰਤ੍ਥਮਤ੍ਥੀਤਿ ਪਚ੍ਛਾ વੁਚ੍ਚਤਿ ਅਤੀਤਂ, ਪੁਰਤ੍ਥਂ વੁਚ੍ਚਤਿ ਅਨਾਗਤਂ, ਅਤੀਤਾਨਾਗਤੇਸੁ ਖਨ੍ਧੇਸੁ ਛਨ੍ਦਰਾਗવਿਰਹਿਤਸ੍ਸ ਪਚ੍ਛਾ વਾ ਪੁਰਤ੍ਥਂ વਾ ਨਤ੍ਥੀਤਿ વਦਤਿ। ਸਨ੍ਤੋਤਿਆਦੀਸੁ ਰਾਗਾਦਿਸਨ੍ਤਤਾਯ ਸਨ੍ਤੋ। ਕੋਧਧੂਮવਿਗਮਾ વਿਧੂਮੋ, ਦੁਕ੍ਖਾਭਾવਾ ਅਨੀਘੋ, ਕਤ੍ਤਰਦਣ੍ਡਾਦੀਨਿ ਗਹੇਤ੍વਾ વਿਚਰਨ੍ਤੋਪਿ વਧਕਚੇਤਨਾਯ ਅਭਾવਾ ਨਿਕ੍ਖਿਤ੍ਤਦਣ੍ਡੋ। ਤਸਥਾવਰੇਸੂਤਿ ਏਤ੍ਥ ਪਨ ਪੁਥੁਜ੍ਜਨਾ ਤਸਾ ਨਾਮ, ਖੀਣਾਸવਾ ਥਾવਰਾ ਨਾਮ। ਸਤ੍ਤ ਪਨ ਸੇਖਾ ਤਸਾਤਿ વਤ੍ਤੁਂ ਨ ਸਕ੍ਕਾ, ਥਾવਰਾ ਨ ਹੋਨ੍ਤਿ, ਭਜਮਾਨਾ ਪਨ ਥਾવਰਪਕ੍ਖਮੇવ ਭਜਨ੍ਤਿ। ਸੋ ਤ੍ਯਾਹੁਤਿਨ੍ਤਿ ਸੋ ਤੇ ਆਹੁਤਿਂ।
Na tassa pacchā na puratthamatthīti pacchā vuccati atītaṃ, puratthaṃ vuccati anāgataṃ, atītānāgatesu khandhesu chandarāgavirahitassa pacchā vā puratthaṃ vā natthīti vadati. Santotiādīsu rāgādisantatāya santo. Kodhadhūmavigamā vidhūmo, dukkhābhāvā anīgho, kattaradaṇḍādīni gahetvā vicarantopi vadhakacetanāya abhāvā nikkhittadaṇḍo. Tasathāvaresūti ettha pana puthujjanā tasā nāma, khīṇāsavā thāvarā nāma. Satta pana sekhā tasāti vattuṃ na sakkā, thāvarā na honti, bhajamānā pana thāvarapakkhameva bhajanti. So tyāhutinti so te āhutiṃ.
વਿਸੇਨਿਭੂਤੋਤਿ ਕਿਲੇਸਸੇਨਾਯ વਿਸੇਨੋ ਜਾਤੋ। ਅਨੇਜੋਤਿ ਨਿਤ੍ਤਣ੍ਹੋ। ਸੁਸੀਲੋਤਿ ਖੀਣਾਸવਸੀਲੇਨ ਸੁਸੀਲੋ। ਸੁવਿਮੁਤ੍ਤਚਿਤ੍ਤੋਤਿ ਫਲવਿਮੁਤ੍ਤਿਯਾ ਸੁਟ੍ਠੁ વਿਮੁਤ੍ਤਚਿਤ੍ਤੋ। ਓਘਤਿਣ੍ਣਨ੍ਤਿ ਚਤ੍ਤਾਰੋ ਓਘੇ ਤਿਣ੍ਣਂ। ਏਤ੍ਤਕੇਨ ਕਥਾਮਗ੍ਗੇਨ ਬ੍ਰਹ੍ਮਾ ਥੇਰਸ੍ਸ વਣ੍ਣਂ ਕਥੇਨ੍ਤੋ ਆਯਤਨੇ ਬ੍ਰਾਹ੍ਮਣਿਂ ਨਿਯੋਜੇਸਿ। ਅવਸਾਨਗਾਥਾ ਪਨ ਸਙ੍ਗੀਤਿਕਾਰੇਹਿ ਠਪਿਤਾ। ਪਤਿਟ੍ਠਪੇਸਿ ਦਕ੍ਖਿਣਨ੍ਤਿ ਚਤੁਪਚ੍ਚਯਦਕ੍ਖਿਣਂ ਪਤਿਟ੍ਠਪੇਸਿ। ਸੁਖਮਾਯਤਿਕਨ੍ਤਿ ਸੁਖਾਯਤਿਕਂ ਆਯਤਿਂ ਸੁਖવਿਪਾਕਂ, ਸੁਖਾવਹਨ੍ਤਿ ਅਤ੍ਥੋ। ਤਤਿਯਂ।
Visenibhūtoti kilesasenāya viseno jāto. Anejoti nittaṇho. Susīloti khīṇāsavasīlena susīlo. Suvimuttacittoti phalavimuttiyā suṭṭhu vimuttacitto. Oghatiṇṇanti cattāro oghe tiṇṇaṃ. Ettakena kathāmaggena brahmā therassa vaṇṇaṃ kathento āyatane brāhmaṇiṃ niyojesi. Avasānagāthā pana saṅgītikārehi ṭhapitā. Patiṭṭhapesi dakkhiṇanti catupaccayadakkhiṇaṃ patiṭṭhapesi. Sukhamāyatikanti sukhāyatikaṃ āyatiṃ sukhavipākaṃ, sukhāvahanti attho. Tatiyaṃ.
Related texts:
ਤਿਪਿਟਕ (ਮੂਲ) • Tipiṭaka (Mūla) / ਸੁਤ੍ਤਪਿਟਕ • Suttapiṭaka / ਸਂਯੁਤ੍ਤਨਿਕਾਯ • Saṃyuttanikāya / ੩. ਬ੍ਰਹ੍ਮਦੇવਸੁਤ੍ਤਂ • 3. Brahmadevasuttaṃ
ਟੀਕਾ • Tīkā / ਸੁਤ੍ਤਪਿਟਕ (ਟੀਕਾ) • Suttapiṭaka (ṭīkā) / ਸਂਯੁਤ੍ਤਨਿਕਾਯ (ਟੀਕਾ) • Saṃyuttanikāya (ṭīkā) / ੩. ਬ੍ਰਹ੍ਮਦੇવਸੁਤ੍ਤવਣ੍ਣਨਾ • 3. Brahmadevasuttavaṇṇanā
