| Library / Tipiṭaka / තිපිටක • Tipiṭaka / මිලින්‌දපඤ්‌හපාළි • Milindapañhapāḷi |
4. බ්‍රහ්‌මලොකපඤ්‌හො
4. Brahmalokapañho
4. රාජා ආහ ‘‘භන්‌තෙ නාගසෙන, කීවදූරො ඉතො බ්‍රහ්‌මලොකො’’ති? ‘‘දූරො ඛො, මහාරාජ, ඉතො බ්‍රහ්‌මලොකො කූටාගාරමත්‌තා සිලා තම්‌හා පතිතා අහොරත්‌තෙන අට්‌ඨචත්‌තාලීසයොජනසහස්‌සානි භස්‌සමානා චතූහි මාසෙහි පථවියං පතිට්‌ඨහෙය්‍යා’’ති.
4. Rājā āha ‘‘bhante nāgasena, kīvadūro ito brahmaloko’’ti? ‘‘Dūro kho, mahārāja, ito brahmaloko kūṭāgāramattā silā tamhā patitā ahorattena aṭṭhacattālīsayojanasahassāni bhassamānā catūhi māsehi pathaviyaṃ patiṭṭhaheyyā’’ti.
‘‘භන්‌තෙ නාගසෙන, තුම්‌හෙ එවං භණථ ‘සෙය්‍යථාපි බලවා පුරිසො සමිඤ්‌ජිතං වා බාහං පසාරෙය්‍ය , පසාරිතං වා බාහං සමිඤ්‌ජෙය්‍ය, එවමෙව ඉද්‌ධිමා භික්‌ඛු චෙතොවසිප්‌පත්‌තො ජම්‌බුදීපෙ අන්‌තරහිතො බ්‍රහ්‌මලොකෙ පාතුභවෙය්‍යා’ති එතං වචනං න සද්‌දහාමි, එවං අතිසීඝං තාව බහූනි යොජනසතානි ගච්‌ඡිස්‌සතී’’ති.
‘‘Bhante nāgasena, tumhe evaṃ bhaṇatha ‘seyyathāpi balavā puriso samiñjitaṃ vā bāhaṃ pasāreyya , pasāritaṃ vā bāhaṃ samiñjeyya, evameva iddhimā bhikkhu cetovasippatto jambudīpe antarahito brahmaloke pātubhaveyyā’ti etaṃ vacanaṃ na saddahāmi, evaṃ atisīghaṃ tāva bahūni yojanasatāni gacchissatī’’ti.
ථෙරො ආහ ‘‘කුහිං පන, මහාරාජ, තව ජාතභූමී’’ති? ‘‘අත්‌ථි, භන්‌තෙ, අලසන්‌දො නාම දීපො, තත්‌ථාහං ජාතො’’ති. ‘‘කීව දූරො, මහාරාජ, ඉතො අලසන්‌දො හොතී’’ති? ‘‘ද්‌විමත්‌තානි, භන්‌තෙ, යොජනසතානී’’ති. ‘‘අභිජානාසි නු ත්‌වං, මහාරාජ, තත්‌ථ කිඤ්‌චිදෙව කරණීයං කරිත්‌වා සරිතා’’ති? ‘‘ආම, භන්‌තෙ, සරාමී’’ති. ‘‘ලහුං ඛො ත්‌වං, මහාරාජ, ගතොසි ද්‌විමත්‌තානි යොජනසතානී’’ති.
Thero āha ‘‘kuhiṃ pana, mahārāja, tava jātabhūmī’’ti? ‘‘Atthi, bhante, alasando nāma dīpo, tatthāhaṃ jāto’’ti. ‘‘Kīva dūro, mahārāja, ito alasando hotī’’ti? ‘‘Dvimattāni, bhante, yojanasatānī’’ti. ‘‘Abhijānāsi nu tvaṃ, mahārāja, tattha kiñcideva karaṇīyaṃ karitvā saritā’’ti? ‘‘Āma, bhante, sarāmī’’ti. ‘‘Lahuṃ kho tvaṃ, mahārāja, gatosi dvimattāni yojanasatānī’’ti.
‘‘කල්‌ලොසි, භන්‌තෙ නාගසෙනා’’ති.
‘‘Kallosi, bhante nāgasenā’’ti.
බ්‍රහ්‌මලොකපඤ්‌හො චතුත්‌ථො.
Brahmalokapañho catuttho.
